ATV

Category: Lajme

  • ​Konjufca takoi senatorët amerikanë: Nuk mund të formohet mekanizëm që cenon sovranitetin

    ​Konjufca takoi senatorët amerikanë: Nuk mund të formohet mekanizëm që cenon sovranitetin

    Kryetari i Kuvendit, Glauk Konjufca, ka deklaruar se nuk mund të formohet Asociacion, apo ndonjë mekanizëm tjetër, që cenon sovranitetin dhe integritetin e Republikës së Kosovës. Këtë qëndrim ai e ka ndarë edhe me senatorët amerikanë, Chris Murphy dhe Gary Peters, të cilët po qëndrojnë në Kosovë.

    Në takimin e zhvilluar në Kuvendin e Kosovës, Konjufca ka theksuar se mbështetja e shteteve të bashkuara është qenësore për proceset nëpër të cilat po kalon Kosova.

    “Ai theksoi se mbështetja e SHBA-së është qenësore për proceset e rëndësishme nëpër të cilat po kalon Republika e Kosovës. Gjithashtu përsëriti qëndrimin e shtetit të Kosovës, mbështetur edhe në garancinë e Departamentit të Shtetit, se nuk mund të formohet kurrfarë asociacioni apo ndonjë mekanizëm tjetër që cenon sovranitetin, integritetin territorial dhe rendin kushtetutës të Republikës së Kosovës”, është bërë e ditur në komunikatën e Kuvendit.

    Sipas kësaj komunikate, Konjufca dhe senatorët amerikanë kanë konstatuar se marrëdhënia mes Kosovës dhe SHBA-ve është speciale dhe se ata kanë shprehur përkushtimin për fuqizimin e mëtejmë të bashkëpunimit dhe avancimin e marrëdhënieve.

  • ​Sveçla vizitoi kryetarin e veriut të Mitrovicës

    ​Sveçla vizitoi kryetarin e veriut të Mitrovicës

    Ministri i Punëve të Brendshme, Xhelal Sveçla, ka vizituar kryetarin e veriut të Mitrovicës, Erden Atiq. Ai ka thënë se kjo pjesë e Mitrovicës do të përjetojë progresin e merituar.

    Pas takimit në zyrën e kryetarit të zgjedhur, Sveçla ka thënë se i ka ofruar atij gatishmërinë e plotë në zbatimin e prioriteteve të tij.

    “I urova punë të mbarë në detyrën e tij të re duke i ofruar gatishmërinë time të plotë në zbatimin e prioriteteve të tij. Do të angazhohemi bashkërisht, si nivel qendror dhe lokal, që qytetarëve tanë të Mitrovicës së Veriut të ju sigurojmë mirëqenie, arsim, shëndetësi, siguri e kushte të qëndrueshme jetese. Mitrovica e Veriut si çdo komunë e Republikës së Kosovës do të përjetojë progresin e merituar”, ka shkruar ministri i Brendshëm.

    Më 19 maj, Erden Atiq është betuar kryetar i veriut të Mitrovicës, pas zgjedhjeve të mbajtura më 23 prill në katër komunat veriore të Kosovës.

    Këto zgjedhje janë bojkotuar nga Lista Serbe, me mbështetjen e Beogradit zyrtar.

  • ​Gjenden mbetje mortore, dyshohet të jenë të një shqiptari të zhdukur gjatë luftës së fundit

    ​Gjenden mbetje mortore, dyshohet të jenë të një shqiptari të zhdukur gjatë luftës së fundit

    Sot (e hënë) ekipet e Institutit të Mjekësisë Ligjore (IML) bashkë me ato të EULEX-it dhe Policisë së Kosovës kanë gjetur mbetje mortore në varrezat e Muhaxherëve në lagjen “Mati 1” në Prishtinë dhe sipas ekspertëve dyshohet se i përkasin një personi të nacionalitetit shqiptar të vrarë e më pas të zhdukur gjatë luftës së fundit në Kosovë.

    Mbetjet u gjetën gjatë gërmimeve që po kryheshin për të katërtën herë në të njëjtën lokacion, ku dyshohet se ishin mbetjet e dy personave të zhdukur. I gjithë procesi është ndjekur nga afër edhe nga ambasadori i Britanisë në Kosovë, Nicholas Abbott.

    Kryetari i Komisionit Qeveritar për Persona të Zhdukur, Andin Hoti, deklaroi për KosovaPress se duhet të priten procedurat e tjera deri në marrjen e raportit të ADN-së për të konfirmuar identitetin e mbetjeve mortore.

    “Aktualisht ekipet tona të IML-së, të policisë dhe ekipet e komisionit e kanë has me një varr dhe në atë varr është gjetur një trup që sipas ekspertëve dyshohet të jetë person i zhdukur i luftës së fundit në Kosovë. Natyrisht këtë nuk mund ta vërtetojmë deri në procedurat e tjera të ekspertëve, deri në marrjen e raportit të ADN-së. Megjithatë, për mua në këtë rast, jo vetëm si kryetar i komisionit por edhe si familjar, sa herë një pajisje e tillë gërmon nën tokë e kemi një ndjesi të rëndë ndër vete, mirëpo tash kur e gjetëm ishte një ndjesi edhe më e rëndë por edhe lehtësimi që megjithatë shpresojmë se do të arrijmë te rezultati i personave të zhdukur. Shpresojmë se familjes, personi që i përket, t’ia lehtësojmë sado pak dhimbjen”, deklaroi Hoti.

    Në lidhje me personin e dytë që po kërkohet, Hoti deklaroi se kërkimet do të vijojnë në të gjitha pikat ku dyshohet.

    “Nuk e di nëse do të mund të gjejnë prapë në të njëjtin varr apo në varre të tjera personin tjetër nëse ky është person i zhdukur, mirëpo ne nuk do te ndalim deri në gjitha pikat e tjera që kemi dyshime për persona të zhdukur”, tha Hoti.

    Në të njëjtin lokacion më parë janë gjetur edhe trupa të tjerë, prandaj është vlerësuar se at mund të ketë prapë mbeteje. Se si dyshohet se përfunduan aty viktimat e gjenocidit serb tregon Kushtrim Gara nga Komisioni Qeveritar për Persona të Zhdukur.

    “Në bazë të dhënave që paraprakisht kemi lexuar, forcat serbe nga Spitali i Prishtinës gjatë viteve 99-të kanë bartur, në përpjekje të tyre për te fshehur gjurmët e krimit, mbetjet mortore kufomat e tetë viktimave në këtë lokacion dhe gjashtë nga tetë në bazë të dhënave janë gjetur të zhvarrosur, qoftë duke i identifikuar me metodë tradicionale nga ana e vet familjeve apo edhe me metodë shkencore të ADN-së nga ana e mekanizmave ndërkombëtarë që kanë qenë pjesë e këtij procesi, siç kemi pas rastin në vitin 2009 nga ana e EULEX-it”, tha Gara.

    Mbi 1600 persona ende janë të zhdukur nga lufta e fundit në Kosovë.

  • Kurti pas takimit me senatorët amerikanë: Marrëveshja me Serbinë duhet zbatohet tërësisht e pa kushtëzime

    Kurti pas takimit me senatorët amerikanë: Marrëveshja me Serbinë duhet zbatohet tërësisht e pa kushtëzime

    Kryeministri i Kosovës, Albin Kurti, tha se marrëdhëniet e Kosovës me Amerikën janë të shkëlqyera dhe çdo ditë sa vijën e forcohen e thellohen.

    Kurti pas takimit me senatorët amerikanë, Chris Murphy dhe Gary Peters, shtoi se të dy ka pasur një bisedë të përzemërt me senatorët.

    Ai theksoi se marrëveshja me Serbinë duhet zbatohet tërësisht e pa kushtëzime.

    “Me senatorët patëm një bisedë të përzemërt, folëm për marrëdhëniet e shkëlqyera që sa vijnë e thellohen e forcohen. Diskutuam mbi zhvillimet në vend, arritjen dhe synime. Bisedim edhe për dialogun me Serbinë, me theks te marrëveshja bazike dhe aneksi i zbatimit. Na duhet zbatim i tërësishëm, i shpejtë dhe pa kushtëzime. I falënderojë ata për kontributin, jeni të mirëseardhur çdo herë”.

    Të dy senatorët fillimisht janë pritur në takim nga presidentja Vjosa Osmani.

    Në prillin e vitit të kaluar senatori amerikan Chris Murphy kishte vizituar Prishtinën e Beogradin.

    Murphy në atë kohë shprehej i prerë se duhet një marrëveshje finale ndërmjet Kosovës e Serbisë. Ai madje e kishte vlerësuar si “kokëforte” qasjen e kryeministrit Kurtit.

  • Gjykata ia vazhdon edhe për dy muaj paraburgimin Nagip Krasniqit

    Gjykata ia vazhdon edhe për dy muaj paraburgimin Nagip Krasniqit

    Gjykata Themelore në Prishtinë ka vendosur që kryeshefit të pezulluar të Korporatës Energjetike të Kosovës (KEK), Nagip Krasniqit t’i vazhdohet paraburgimi edhe për dy muaj.

    Lajmin për KosovaPress e ka konfirmuar zëdhënësja e Gjykatës Themelore në Prishtinë, Mirlinda Gashi.

    “Gjykata Themelore në Prishtinë, Departamenti Special, me datë 19.05.2023 ka vazhduar masën e paraburgimit për të pandehurin N.K, në kohëzgjatje edhe për dy muaj. Pala ka të drejtën e ankesës në Gjykatën e Apelit”, ka thanë ajo në një përgjigje me shkrim për Kosovapress.

    Më 19 prill, Prokuroria Speciale ka arrestuar kryeshefin ekzekutiv të KEK-ut, Nagip Krasniqi. Krasniqi sipas Prokurorisë, është arrestuar për shkak të dyshimit se ka kryer “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”. Një ditë pas arrestimit, Gjykata Themelore në Prishtinë i ka caktuar masën e paraburgimit prej një muaji për Nagip Krasniqin.

    Ndërkohë, më 25 prill Bordi i kompanisë publike të KEK-ut, ka pezulluar nga detyra e kryeshefit Nagip Krasniqin.

  • Fermeri nga Deçani që thotë nuk e lëshon Kosovën as për Amerikën

    Fermeri nga Deçani që thotë nuk e lëshon Kosovën as për Amerikën

    Ekipi i ATV-së ishte në vizitë të ferma e familjes Islamaj në fshatin Ratish të Deçanit.

    Pronari i kësaj ferme, Valdet Islamaj në rubrikën “Ferma Jonë” në emisionin “E Diela Vlen”, tregon se si e nis ditën, t’u e pas parasysh se kishte edhe kuaj dhe lopë, për vështirësitë të mirat dhe gjithçka tjetër.

    Ai tha së vetëm dashuria për kuaj dhe të mirat që sjellin lopët i mban, pasi që sipas tij, nga Komuna nuk ka asnjë mbështetje.

    “Edhe në Kosovë ka punë, vetëm se nuk po dojnë rinia. Ju ka ba truni veç jashtë. Mu me m’thanë qetash në Amerikë me shku, unë nuk shkoj se e kam biznesin tem, e njoh dhe e du”, tha ndër të tjera Islamaj.

    Islamaj gjithashtu foli edhe për një sfidë, të cilën e kishte kaluar, e pavarësisht kësaj, ai nuk e lëshoi vendin.

    “Mu vjet mu ka djeg posdomi ,diku 3000 danga sanë 1000 danga kashtë. I kam kërkua ndihmë Komunës, po më kanë thanë, por që nuk është realizu asnjë send, të paktën as 1 euro nuk është realizua”, u shpreh ai. /atvlive.tv

    Emisionin e plotë e gjeni në videon më poshtë:

  • Murphy: Kosova çdo herë u është përgjigjur thirrjeve të ShBA-së, Serbia mos ta pengojë anëtarësimin

    Murphy: Kosova çdo herë u është përgjigjur thirrjeve të ShBA-së, Serbia mos ta pengojë anëtarësimin

    Senatori amerikan, Chris Murphy, tha se Kosova çdo herë ka treguar bashkëpunim me ShBA, sa herë që i është kërkuar, raporton Ekonomia Online.

    Peters mori si shembull të bashkëpunimit, sanksionet që i ka vënë Kosova ndaj Rusisë dhe strehimin e afganëve.

    Ai pas takimit me presidenten Vjosa Osmani, pati fjalë të mëdha edhe për qasjen e Qeverisë në luftën ndaj korrupsionit dhe rritjen ekonomike.

    Murphy shtoi se kanë biseduar për dialogun Kosovë-Serbi, duke kërkuar që Serbia mos ta pengojë anëtarësimin në organizata ndërkombëtare.

    “Shtetet e Bashkuara të Amerikës do të bëjnë gjithçka që është e mundur në rrugëtimin transatlantik të Kosovës dhe rrugëtimin evropian. Më vjen mirë për marrëveshjen e fundit që është arritur në Bruksel që përfshin njohjen e ndërsjellë të dokumenteve zyrtare”.

    “Por edhe hapat e vështirë që duhet ndërmerren nga të dyja palët. Serbia duhet të ndalojë për të qenë pengesë për anëtarësimin e Kosovës në organizata ndërkombëtare. Kosova e ka marrë një zotim për t’u lejuar komunave që të bashkohen në një asociacion. Mendoj se zotimet sipas asaj marrëveshjeje të realizohen sa më shpejtë që është e mundur”.

    “Mos u lajthitni marrëdhënia mes Kosovës dhe ShBA-së është e fuqishme dhe do të fuqizohet edhe më tej”, ka thënë Murphy.

  • Senatori Peters garanton se ShBA-ja do ta përkrah Kosovën në çdo hap

    Senatori Peters garanton se ShBA-ja do ta përkrah Kosovën në çdo hap

    Senatori amerikan Gary Peters tha se Kosova dhe ShBA-ja kanë marrëdhënie speciale, raporton Ekonomia Online.

    Peters shtoi se Shtetet e Bashkuara të Amerikës do të vazhdojnë ta mbështesin dhe përkrahin Kosovën.

    Ai, në një konferencë për medie pas përfundimit të takimit me presidenten Vjosa Osmani, ka deklaruar se pjesë të diskutimeve ishte edhe mbështetja e FSK-së.

    “Marrëdhënia mes Kosovës dhe ShBA-së është speciale, nuk e di që ekziston ndonjë vend në botë që kanë marrëdhënie kaq të ngushta sa dy vende”.

    “Keni ndihmuar ShBA-në që të mbrojë e të ruajë demokracinë në botë. Prandaj SHBA-ja do të jetë pranë jush”.

    “Ne do të punojmë me ju edhe për sigurinë kibernetike, do të mundohemi të bashkëpunojmë edhe në furnizimin e pajisjeve ushtarake”, shtoi ai.

  • Mbrojtja e Krasniqit thotë se dëshmitari është konfuz në deklaratat e tij

    Mbrojtja e Krasniqit thotë se dëshmitari është konfuz në deklaratat e tij

    Mbrojta e ish-zëdhënësit të Ushtrisë Çlirimtare të Kosovës, Jakup Krasniqi, Venkateswari Alagendra, ka thënë se dëshmitari i prokurorisë është konfuz gjatë deklaratave të tij. Në gjykatoren e Hagës po dëgjohet dëshmitari i pestë i Zyrës së Prokurorit të Specializuar(ZPS).

    Derisa ajo ka parashtruar pyetje për dëshmitarin lidhur me një person, i koduar si “numri 2”, dëshmitari fliste për “numrin 4”.

    Alagendra: Na thatë që shkuat në vendin e incidentit dhe patë dy trupa të vdekur atje, dhe u larguat me makinë në shtëpi, dhe thatë se i treguat ‘numrit 2’ se çfarë kishte ndodhur a është e saktë kjo?

    Alagendra: A u ktheve mbrapshtë në vendin e incidentit ku ishin trupat e vdekur pasi i tregoni ‘numrit 2’ çfarë kishte ndodhur?

    Dëshmitari: I kam treguar para se mi pa kufomat, tu shku i kam treguar që i kanë marrë, kah jam kthyer prej shpatit tjetër e kam parë makinën e tij në shpat, unë kam qenë në shpatin tjetër.

    Alagendra: Po flisni për ‘numrin 2’?

    Dëshmitari: Kur kam shkuar në shtëpi ‘numri 2’ dhe ‘numri 4’ kanë shkuar tek vendi i ngjarjes e kanë marr armën dhe kanë vazhduar rrugën përpjetë fshatit.

    Alagendra: Të nderuar gjykatës më duket sikur dëshmitari është pak konfuz, a po thoni që ‘numri 2’ dhe ‘numri 4’ shkuan bashkë me njëri tjetrin?

    Dëshmitari: ‘Numri 4’ me ‘numrin 5’, më falni.

    Alagendra: Pyetje ime ka të bëjë me ‘numrin 2’ pasi shkuat në vendin e incidentit kur patë se çfarë kishte ndodhur aty u kthyet mbrapshtë në fshat dhe i thatë ‘numrit 2’ se çfarë kishte ndodhur, kështu?

    Dëshmitari: I kam thënë para se me shkua tek vendi i ngjarjes, kur kam shkuar tek vendi i ngjarjes më nuk e kam parë ‘numrin 2’, nuk kam komunikuar me ‘numrin 4’ në të vërtetë.

    Më pas, mbrojtja e Jakup Krasniqi ka kërkuar që marrjen në pyetje ta bëjë në seancë të mbyllur për publikun.

    Dëshmitari i pestë i ZPS-së gjatë javës së kaluar u është përgjigjur pyetjeve të prokurorisë dhe atyre të mbrojtjes së ish-presidentit, Hashim Thaçi dhe ish-kryeparlamentarit, Kadri Veseli, ndërsa sot ka dhënë dëshmi në pyetjet e mbrojtjes së ish-deputetit, Rexhep Selimi.

    Në rastin ndaj ish-krerëve të UÇK-së, deri tani kanë përfunduar dëshmitë e katër dëshmitarëve të prokurorisë.

    Dëshmia e tyre nuk është bërë e ditur për publikun dhe të njëjtit kanë dëshmuar nën masa mbrojtëse.

    Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

    Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.

  • Konjufca: Padia kundër gjenocidit të Serbisë në Kosovë është afër

    Konjufca: Padia kundër gjenocidit të Serbisë në Kosovë është afër

    Kryetari i Kuvendit të Kosovës, Glauk Konjufca ka deklaruar Kosova është afër përfundimit të padisë profesionale kundër gjenocidit të Serbisë ndaj popullit të Kosovës.

    Konjufca pas mbledhjes së kryesisë së Kuvendit, ka thënë se për padinë ndaj Serbisë janë konsultuar edhe personat më të rëndësishëm profesional.

    “Prej ditës kur është bërë ndryshimi i madh dhe ka ardhë një qeverisje e re, është punuar pandërprerë, çdo ditë, edhe sot dhe mund të konstatoj që kjo është shumë afër…nuk mund të jap muaj apo kohë të caktuar veç se e dijë që është bërë një punë e madhe deri tash, janë konsultuar edhe personat më të rëndësishëm profesional, që kanë njohuri në këtë fushë për ndërtimin e një padie profesionale kundër gjenocidit të Serbisë ndaj popullit të Kosovës dhe mendoj që është bërë një punë e mirë deri tash, është afër por për të gjitha hollësitë ua shtroni pyetjen Qeverisë“, tha ai.

    Për padinë ndaj Serbisë për krime lufte në Kosovë, ka folur edhe shefi i grupit parlamentar të PDK-së, Abelard Tahri

    “Sikur shumë procese tjera jotransparence as për këtë nuk e dimë asgjë sepse nuk kemi qenë të involvuar dhe nuk e dimë as kjo shumë afër çka nënkupton, ku janë afër, çka është përgatit, kush janë ato ekipe që kanë punuar dhe thjesht nëse janë shumë afër mund të them se është një lajm i mirë“, tha ai.

    Konjufca ka njoftuar se të mërkurën do të ketë vazhdim të seancës, ku do të shqyrtohen rreth 30 pikat e papërfunduara nga seancat e kaluara, derisa shtoi se nuk kishte kuorum për seanca të reja.

    Sipas tij, punën e Kuvendit po e vështirëson qasja e opozitës që nuk po marrin pjesë në votim dhe pushimit të lehonisë së deputeteve nga pozita.

    “Kjo situatë mund të zgjidhet edhe me kërkesën që e kanë vendosur si kusht për pjesëmarrje në punët normale të kuvendit nga ana e partive opozitave. Ata e kanë vendosur kusht çështjen e bllokimit të të hyrave vetanake të komunave dhe nëse kjo zgjidhet do të kemi punën shumë më të lehtë të Kuvendit. Krejt kjo sqarohet të hënën në mëngjes kur qeveria e ka mbledhjen dhe ta shohim nëse po e procedon atë plotësim ndryshim të ligjit, prej atij pastaj do të mundësohet që thesari të veproj në drejtim të zhbllokimit të mjeteve të cilat komunat pretendojnë se janë të tyre dhe janë edhe një e drejt kushtetuese dhe nuk mund t’i merr askush ato të hyra, thjesht janë bllokuar për shkak të një mënyre si është formuluar një amandament në projektligjin për buxhetin, kështu që nëse kjo çështje zhbllokohet ne e patëm premtimin nga opozita që do ta ndryshojnë qasjen e tyre“, tha ai.

    Ai është pyetur edhe për këshilltarin e Drilon Gashi, i cili ka ushtruar dhunë fizike ndaj bashkëshortes së tij.

    “Sa i përket këshilltarit tim, konsultohuni me shefin tim të stafit të cilit ia kam dhënë të gjitha instruksionet për zotin Gashi”, tha ai, pa saktësuar nëse do ta lirojë nga detyra.