Category: Lajme

Një grua 28-vjeçare vdiq si pasojë e dhunës së ushtruar në të në parkingun e një shitore në Aachen të Gjermanisë. Rasti ka ndodhur mbrëmjen e së shtunës.

Disa orë më vonë në Polici u dorëzua 37-vjeçar, bashkëshorti i të ndjerës, që dyshohet se e vrau atë, raporton “Bild”.

Raportohet se dorasi dhe viktima janë kosovarë.

Kryeprokurorja e Aachenit, Katja Schleknermann-Pitts bëri të ditur të hënën për “Bild”, se bëhej fjalë për një çift që ishin ndarë.

Ajo ka thënë se nuk dihen ende motivet e vrasjes.

Krimi ndodhi rreth orës 19:00 të së shtunës në mbrëmje, në sy të klientëve. Policia kishte rrethuar vendin e krimit dhe zonën përreth.

I dyshuari ndodhet në paraburgim që nga e diela.

Prokuroria publike nuk ka dashur të komentojë pyetjet nëse ai tashmë është akuzuar për vrasje, nëse ka precedentë penalë dhe nëse është gjetur një armë e vrasjes.

Në ditën e Shën Nikollës, familjes së Stefan Jovanoviçit nga fshati Dobratini i Graçanicës po i vihet gurthemeli i shtëpisë së re.

Falë Ministrisë për Komunitete dhe Kthim, familja Jovanoviç nuk do të jetojë në shtëpinë e vjetër.

“Kjo shtëpi do të thotë shumë për mua. Deri tani askush nuk na ka ndihmuar. E falënderojmë z. Rashiq, i falënderoj të gjithë. Jetoj me gruan dhe me dy vajzat, dhe në bashkësi me vëllain dhe babanë. Faleminderit të gjithëve. Shtëpia i ka 75 m2. Punoj si sigurim”, tha Stefan Jovanoviç, kryefamiljar.

Në vënien e gurthemelit të shtëpisë së Jovanoviqit, mori pjesë edhe Ministri për Komunitete dhe Kthim, Nenad Rashiq.

“Mendoj se është ditë shumë e veçantë për neve serbët dhe kjo na jep shpresë se ne mund të jetojmë e të mbijetojmë këtu dhe natyrisht të ndihmojmë familjet që jetojnë këtu, siç është kjo familja e Stefan Jovanoviqit, i cili është njëri nga fituesit”, tha Rashiq.

Ai për më tepër tha se janë koordinuar me Komunën e Graçanicës, që familjet që aplikojnë për lejet e ndërtimit për shtëpi, të kenë prioritet.

“Më vjen mirë t’ju njoftoj se mosmarrëveshjet që i kemi pasur, i kemi sqaruar dhe kam marrë premtim nga Komuna e Graçanicës, që të gjithë aplikuesit tanë që do t’i kemi ende nga kjo komunë, do të kenë prioritet dhe lejet e tyre për ndërtim do të shqyrtohen me urgjencë dhe ato do të mundësohen brenda dy-tre ditëve”, tha Rashiq.

Megjithatë, Rashiq tha se Ministria për Komunitete dhe Kthim do të vazhdojë të mbështesë dhe të koordinohet me projekte të ngjashme në të ardhmen, duke u fokusuar në sigurimin e shtëpive të reja dhe renovimin e shtëpive ekzistuese për banorët e komuniteteve jo-shumicë në gjithë Kosovën. /atvlive.tv

Edicionin Qendror të lajmeve e gjeni në videon më poshtë:

Që nga tre maji, deputetët e Kuvendit nuk janë mbledhur më në seanca plenare.

Kësisoj edhe mbi 30 projektligje, raporte e diskutime të tjera, përfshirë edhe nga seanca të vitit të kaluar, kanë mbetur pa përfunduar.

E për këto vonesa, pozitë e opozitë fajësojnë njëra-tjetrën.

“Po unë mendoj që vërtet Kuvendin po e vështirëson edhe kjo qasja tash e fundit e opozitës, që të mos marrin pjesë fare në votim”, tha kryeparlamentari Konjufca.

“Opozita nuk është ajo që i bën numrat në Kuvend, sepse po t’i kishim numrat ne do të ishim pozitë. Ne nuk e bëjmë shumicën, le ta kenë të qartë të gjithë, shumicën e përbën lëvizja Vetëvendosje me partnerët e saj të koalicionit”, tha shefi i GP të PDK-së, Abelard Tahiri.

“Bllokimi i Kuvendit nuk është për fajin e opozitës. Zhbllokimi i Kuvendit mund të ndodhë vetëm në qoftë se qasja popullsitë e qeverisë, respektivisht ministrisë së financave një raport me të hyrat vetanake të komunave të ndodh dhe ajo duhet të ndodh këtë javë”, tha shefi i GP të AAK-së, Besnik Tahiri.

Sidoqoftë, me mungesa nga të dyja palët, Kryesia e Kuvendit nuk pati kuorum as sot, kështu që edhe këtë javë nuk do të ketë seancë të re.

Edhe pse është mjaft prapa agjenda legjislative, kreu i Kuvendit beson se për dy seanca do të përfundohen të gjitha pikat.

“Do të ishte mirë që me një punë dyditore të arrijmë t’i përfundojmë të gjitha këto pika. Mendoj që nuk kemi më shumë punë se sa dy ditë të plota, që ta pastrojmë agjendën legjislative”, tha kryetar i kuvendit, Glauk Konjufca.

Një pjesë e tyre do të mund të shqyrtohen në mes të javës, pasi deputetët, për këtë çështje do mblidhen të mërkurën. /atvlive.tv

Edicionin Qendror të lajmeve e gjeni në videon më poshtë:

Dëshmitari i pestë në procesin gjyqësor ndaj Thaçit dhe të tjerëve, ka treguar se si iu vra një familjar nga disa persona të maskuar.

Mbrojtja e Jakup Krasniqit ka kërkuar më shumë detaje, duke e vënë në pikëpyetje besueshmërinë e dëshmitarit.

Ai është pyetur nëse është e saktë ajo që ka thënë se numri një është marrë nga UÇK-ja nga shtëpia e tij.

Ai nuk u tregua as i sigurt për numrin e saktë të personave që i kishte parë me maskë.

Avokatja Venkateswari Alagendra: A u ktheve prapa në vendin e incidentit?

Dëshmitari : Jo, nuk është e vërtetë se në shtëpi, ndoshta një gabim te përkthimi”. Para se mi pa kufomat kam shku. Kah jam kthy e kam pa makinën në shpat. Kur jam shku në shtëpi, numri 2… me numrin 4.

Pyetjet e mbrojtjes së Krasniqit kanë qenë kryesisht sa i përket një dokumenti jopublik, të cilin dëshmitari e pohoi se është ankesë e bërë nga ai.

Avokatja Venkateswari Alagendra: Dëshmitari është pak konfuz, a po thoni se numri 2 dhe ai 4 shkuan bashkë me njëri-tjetrin? Pasi shkuat në vendin e incidentin, u kthyet në fshat dhe i treguat çfarë kishte ndodhur?

Dëshmitari: I kam thanë para se me shku te vendi i ngjarjes. Para se me shku të vendi s’kam komuniku ma me numrin 2… numrin 4.

Dëshmitari i pestë i mbrojtur i ZPS-së, ish-anëtar i UÇK-së, pjesën më të madhe të dëshmisë e ka dhënë në seancë të mbyllur për publikun.

Gjykimi ndaj ish-liderëve të UÇK-së, Hashim Thaçi, Kadri Veseli, Rexhep Selimi e Jakup Krasniqi do të vazhdojë të martën. /atvlive.tv

Edicionin Qendror të lajmeve e gjeni në videon më poshtë:

Në kuadër të Javës së Bibliotekës në Kosovë është hapur biblioteka e Adem Demaçit, ku i biri i tij ka deponuar një prej shkrimeve të veprimtarit të çështjes kombëtare.

Aty ka marrë pjesë edhe kryeministri i vendit, Albin Kurti i cili ka bërë thirrje që të lexohen librat e Demaçit, raporton KP.

Kreu i ekzekutivit ka thënë se kjo bibliotekë flet me fjalët e Adem Demaçit.

“Qenia e kësaj biblioteke na flet me fjalët e Adem Demaçit, imagjinata është e imja, realiteti është i juaji. E me këtë, baca Adem, ose biblioteka e tij na thotë se imagjinata ka shumë forma autonome dhe të mundshme ndërsa realiteti është kombinimi i tyre kompleks në aktualitet”, ka thënë Kurti.

Ai ka theksuar rëndësinë që ka leximi i librave të Demaçit, por sipas tij duhet lexuar edhe librat që veprimtari i çështjes kombëtare kishte lexuar dikur.

“Populli i Adem Demaçit, populli i bacës Adem, që i përdori më së miri burgjet si bibliotekë, nuk ka se si të mos e përdorë mirë bibliotekën për një liri më të ditur. Nuk mjafton t’i lexojmë librat e bacës Adem e të mësojmë për të, por duhet të shkojmë edhe tek biblioteka Adem Demaçi dhe te Adem Demaçi si bibliotekë, të lexojmë librat e tij por edhe të lexojmë librat që ai lexoi”, ka thënë ai.

Ndërsa Shqiptar Demaçi, ka lexuar idenë për lëvizjen politike, të shkruar nga babai i tij.

Ai ka bërë të ditur se të njëjtën letër, me shkrimin origjinal të Adem Demaçit, do ta deponojë në bibliotekë.

“Ne synojmë që në sistemin tonë politik të përfshijmë të gjitha të arriturat pozitive të deritashme të njerizimit në të gjitha fushat. 11 gusht, 2014, Prishtinë, Adem Demaçi. Kjo do të deponohet tani në bibliotekë do të mbesë aty, meqenëse është origjinali”, ka thënë i biri i Adem Demaçit.

Në anën tjetër, kryetari i Këshillit Drejtues të Bibliotekës Kombëtare, Bardh Rugova, ka folur edhe për rëndësinë që ka aktiviteti i Javës së Bibliotekës.

“Ne jemi në këtë bibliotekë këtu me mbiemrin etiketë kombëtare dhe kjo më shumë se gjithçka tjetër tregon se kemi të bëjmë me simbolin e një arkivi të dijës së këtij vendi, të trashëgimisë së dijës së Kosovës. Java e bibliotekës zakonisht shërben pjesërisht për të kremtuar këtë trashëgimi, pjesërisht, Aktivitete si kjo, si Java e Bibliotekës, më shumë se kaq, shërbejnë për të na vetëdijesuar për sistemin e vlerës së kësaj trashëgimie”, ka thënë Rugova.

Ndërsa rektori i Universitetit të Prishtinës, Qerim Qerimi ka bërë thirrje që të mbrohen koleksionet e trashëguara.

“Ju bëj thirrje nga pozicionet tuaja që të mbrojmë pronën tonë intelektuale, dokumentet, librat dhe të gjitha koleksionet e trashëguara dhe t’i përdorim ato në mënyra që lartësojnë vlerën e kërkimit dhe cilësinë e mësimit duke avokuar për vetëdije më të lartë për këtë pasuri”, ka thënë Qerimi.

Biblioteka Kombëtare e Kosovës ka hapur edicionin e 20 të Javës së Bibliotekës.

Aktivitetet do zgjasin deri me 28 maj ku do të ketë ligjërata e diskutime me temën “Biblioteka dhe shërbimi i referencave”.

Derisa deputeti i Kosovës, Enver Dugolli, i ka kërkuar Zyrës së Prokurorit të Specializuar në Hagë, ta hetojë masakrën e Dubravës, Prokuroria Speciale në Prishtinë thotë se i ka intensifikuar hetimet.

Prokurori i rastit Ilir Morina në një intervistë për ATV-në, ka thënë se kanë arritur të identifikojnë mbi 40 të dyshuar, por të cilët nuk jetojnë në Kosovë.

Lidhur me këtë rast, një person është në paraburgim që nga dhjetori i vitit të kaluar.

“Kemi arritur të identifikojmë mbi 40 të pandehur, mbi 60 të dëmtuar dhe mbi 100 dëshmitarë, në këtë fazë për shkak të hetimeve, nuk mund të ndajmë më shumë informacione”, tha Morina.

Duke marrë parasysh që tashmë lejohet gjykimi në mungesë, Morina nuk e përjashton mundësinë që të aplikohet një gjykimi i tillë, meqë aktualisht bashkëpunimi juridik me Serbinë mungon.

DEK: Ilir Morina, Prokuror Special
“Në parim kemi synimin që t’i kompletojmë hetimet dhe në momentin që vijmë në atë fazë dhe nuk i kemi të pandehurit prezentë do t’i aplikojmë dispozitat për gjykimin në mungesë”, tha Morina.

Derisa ZPS-ja nuk e ka mohuar e as pohuar mundësinë për nisjen e hetimeve pas kërkesës së Dugollit, Morina ka thënë se rasti është në kompetencë të Prokurorisë Speciale.

“Ju deklaroj që aktualisht çështja është në kompetencë të Prokurorisë Speciale dhe jemi duke punuar me lëndën dhe kemi kompetencë të plotë”, tha Morina.

Ndërkohë, juristët thonë se dy Prokurori të të njëjtit shtet nuk mund ta hetojnë të njëjtin rast. Ligji për Dhomat e Specializuara specifikon se brenda juridiksionit lëndor të tyre, Dhomat kanë përparësi mbi të gjitha gjykatat e tjera të Kosovës.

“Dy prokurori nuk mund të njëjtën kohë me zhvillu hetime. Nëse vlerësohet se ZPS-ja ka juridiksion që të merret edhe me masakrën e Dubravës, atëherë Prokuroria duhet t’i ndërpresë hetimet”, tha Artan Qerkini, Avokat.

Hetimet për masakrën e Dubravës kishin nisur në vitin 2013 nga prokurorët e EULEX-it. Dy vjet më vonë për të ruajtur afatin e hetimeve ishte bërë pezullimi i tyre, teksa rasti ishte vazhduar në vitin 2018, kur edhe lëndët e krimeve të luftës ishin transferuar te prokurorët vendorë. /atvlive.tv

Edicionin Qendror të lajmeve e gjeni në videon më poshtë:

Ministrja e Jashtme e Kosovës, Donika Gërvalla, deklaroi se shpreson që Presidenca suedeze e Këshillit të Bashkimi Evropian të ketë rezultate konkrete në bisedat që po bën me anëtarët e tjerë të Unionit në lidhje me aplikimin e Kosovës për në BE.

Këto deklarata, Gërvalla i bëri pas takimit në Bruksel të ministrave të BE-së, ku në Këshillin e Punëve të Jashtme u diskutua për situatën në rajonin e Ballkanit Perëndimor dhe për normalizimin e raporteve mes Kosovës dhe Serbisë.

Gërvalla tha se në këtë takim e kanë paraqitur qartë pozicionin e Kosovës në lidhje me raportet me Serbinë ndërsa kanë kujtuar se Beogradi zyrtar në vazhdimësi refuzon të zbatojë marrëveshjen e 27 shkurtit të arritur në Bruksel dhe aneksin e saj të 18 marsit në Ohër.

“Kam paraqitur qëndrimin e Republikës së Kosovës që në marrëveshjen që kemi lidhur në Bruksel dhe fazën e implementimit në Ohër e shohim si një marrëveshje ligjërisht të detyrueshme dhe që presim nga Serbia edhe pse sinjalet janë jo të mira, ngaqë jeni vetë dëshmitarë, që presidenti Vuçiq, ministri i Jashtëm Daçiq por edhe shumë të tjerë, në vazhdimësi jo vetëm refuzojnë implementimin por shpesh edhe mohojnë ekzistencën e një marrëveshjeje të tillë. Ka pasur intervenime të ndryshme nga disa ministra të cilat e kanë shprehur rëndësinë e normalizimit të marrëdhënieve mes Kosovës dhe Serbisë dhe mendoj që pozicionin e Republikës së Kosovës e kemi shfaqur shumë qartë”, deklaroi Gërvalla.

Zëvendëskryeministrja e Kosovës foli edhe për aplikimin e Kosovës në Bashkimin Evropian ku deklaroi se Suedia ende është duke biseduar me shtetet anëtare rreth kësaj kërkese, por tha se ky shtet gjatë presidencës së saj është treguar i gatshëm për të çuar përpara kërkesën e Kosovës.

“Ne shpresojmë që Presidenca suedeze të finalizojë bisedat që po zhvillon me shtetet anëtare të Bashkimit Evropian dhe të vijnë me një rezultat konkret, parashikimi se cili mund të jetë rezultati dhe kur nuk jam në gjendje të jap se nuk do të ishin serioze por besoj që me qasjen të cilën Suedia ka pasur gjatë presidencës së saj është treguar shumë e gatshme për të çuar përpara kërkesën tonë dhe për të biseduar me të gjithë anëtarët, pra edhe me ata që janë përkrahës të kërkesës sonë dhe me ata që hezitojnë pak më shumë”, tha Gërvalla.

Gërvalla tha se takimet e tilla ku marrin pjesë edhe ministrat e Jashtëm të Ballkani Perëndimor janë mundësi e mirë për të diskutuar sfidat për të cilat është duke kaluar Evropa dhe rajoni ynë.

“E rëndësishme është gjithashtu që Evropa ka filluar, Bashkimi Evropian ka filluar të ndërgjegjësohet që Ballkani Perëndimor jo vetëm që është pjesë gjeografike e Evropës por duhet edhe më shumë të afrohet politikisht me Bashkimin Evropian me qëllim që në një të ardhme integrimi të jetë i shpejtë dhe i natyrshëm”, tha Gërvalla.

Përpos Gërvallës, në këtë takim në Bruksel morën pjesë edhe ministrat e Jashtëm nga pesë vendet e tjera të Ballkanit Perëndimor. /KP

Duke pas parasysh që tani më kemi hyrë në sezonin kur disa sektorë të bizneseve rrisin aktivitetin e tyre, Administrata Tatimore e Kosovës u bënë thirrje të gjithë tatimpaguesve të cilët në aktivitetet e tyre kanë veprimtarinë e gastronomisë/hotelerisë, këngëtarëve, stilistëve, si dhe salloneve të bukurisë, që të deklarojnë saktë detyrimet e tyre tatimore, pasi që në të kundërtën do të duhet të veprojmë sipas thirrjeve ligjore.

“ATK paralajmëron se para se të fillojmë me verifikimet dhe kontrollet tatimore, i bëjmë thirrje të gjithë personave e bizneseve të deklarojnë dhe paguajnë saktë obligimet e tyre të përcaktuara me Legjislacionin Tatimor në fuqi, në të kundërtën ne jemi të obliguar që të fillojmë me verifikime dhe hapjen e kontrolleve tatimore, të cilat mund të rezultojnë me ndëshkimet nga parregullsitë dhe pasaktësitë e hasura”, thuhet në njoftimin e ATK-së.

Sipas ATK-së, sezonit të verës shumëfishohen aktivitetet e lartpërmendura, të cilat bazuar në aktivitetin që kanë, janë si një zinxhir, ku kryesisht janë shumë evidente ndeja të ndryshme, si në restorante ashtu edhe në diskoteka, në të cilat ndërlidhen pjesa e këndimit ose DJ, si dhe përgatitja nga sallonet e bukurisë dhe stilistet.

“Për ketë qëllim ATK ka dizajnuar projektin për Akomodim dhe Shërbime Ushqimore, i cili bazuar në të dhënat e përmbushjes, renditet si njëra ndër industritë me nivel të lartë të mos-përmbushjes së detyrimeve tatimore, andaj edhe është pjesë e planeve specifike të përmbushjes për grupet e identifikuara me rreziqe të larta për vitin 2022”, thuhet në njoftim.

Modulet e ndërtuara përbrenda ATK-së, kanë nxjerrë faktorët të ndryshëm që kanë kontribuar në përzgjedhjen e kësaj industrie si: pagesa/të hyra përgjithësisht të ulëta, pavarësisht numrit të madh të tyre; mos-deklarimi i punëtorëve dhe pagesa cash e tyre; mos-deklarimi apo nën-deklarimi i ahengjeve dhe mos-mbajtja e evidencave lidhur me këngëtarët gjatë mbrëmjeve muzikore; mos-lëshimi i kuponëve fiskal; pagesat po ashtu në cash të realizuara në mes të konsumatorëve dhe bizneseve gjatë organizimit të ahengjeve të ndryshme; si dhe mos mbajtja e tatimit në qira apo nën-deklarimi i saj.