Category: Lajme

Sot në Dhomat e Specializuara në Hagë vazhdon gjykimin ndaj krerëve të ish-Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Dje ka filluar dëshminë dëshmitari i gjashtë i ZPS-së në gjykimin e Thaçit dhe të tjerëve.

Dëshmitari i radhës i ZPS-së është dëshmitari i mbrojtur 4355.

Po ashtu dje ka përfunduar dëshminë edhe dëshmitari i pestë me kodin 3165 në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Sikur ditët e kaluara edhe dje seanca në shumicën e kohës ka qenë me përmbajtje të redaktuar dhe në sesion privat.

Seancat në gjykimin e Hashim Thaçit, Kadri Veselit, Rexhep Selimit dhe Jakup Krasniqit për këtë javë janë planifikuar të vazhdojnë deri të mërkurën.

Kryeministri i Republikës së Kosovës, Albin Kurti, mori sot pjesë në hapjen e Bibliotekës së Adem Demaçit, në kuadër të Javës së Bibliotekës.

Ajo mban emrin e madh Adem Demaçi, veprimtarit dhe intelektualit, të papërsëritshëm. Kështu tha kryeministri Kurti në fjalën e tij para të pranishmëve.

‘’Por, në këtë ditë të veçantë, Adem Demaçi është emri i prozatorit të dashurisë kuantike, pra emri i shkrimtarit. Qenia e kësaj biblioteke, na flet me fjalët e Adem Demaçit: “Imagjinata është imja, realiteti është i juaji.” E me këtë, baca Adem ose biblioteka e tij, na thotë se imagjinata ka shumë forma autonome dhe të mundshme, ndërsa realiteti është kombinimi i tyre kompleks në aktualitet’’, u shpreh ai.

“Si të doni, sa të doni bëni realitet! Realiteti është në vullnetin tuaj.” Kjo është deviza që na propozon biblioteka, shtoi më tej ai, duke theksuar se gjithçka ka qenë realitet këtu, por që ta duam realitetin tonë, le të ushtrohemi me imagjinatën që është brenda këtyre rafteve të bibliotekës Demaçi, brenda mureve të bibliotekës Bogdani.

Kjo bibliotekë, sipas kryeministrit, vërtet do të ketë këtej e tutje edhe librat e Demaçit, atij Demaçi, që lexoi e që i mbrujti ndoshta shumicën e prozave të veta në burg. Kështu që, sipas kryeministrit, çdo i ri mund të gjejë në të një udhë, mund të kryejë një udhëtim dhe të takojë një mendimtar e shkrimtar, personazhe dhe ngjarje për ta kuptuar shumë më thellë të tashmen e vet, të qytetit dhe njerëzimit, por dhe të tashmen e dikurshme të intelektualit dhe militantit që rrezikonte veten si askush tjetër për të gjithë neve.

Pas takimit me senatorët amerikanë Murphy dhe Peters, Kryeministri i Republikës së Kosovës, Albin Kurti, bashkë me Shefin e Stafit, Luan Dalipi mirëpritën përfaqësues të shoqatës kryesore të bizneseve në Itali, Confindustria, e cila ka anëtare mbi 150 mijë kompani të prodhimit dhe shërbimit dhe që punësojnë mbi 5.4 milionë persona.

Stabiliteti institucional, mjedisi i përshtatshëm për biznes, politikat e qëndrueshme makroekonomike, zhvillimi ekonomik, progresi demokratik, sundimi i ligjit, gjykata komerciale, fuqia punëtore profesionale dhe e talentuar, pozita e përshtatshme gjeografike dhe një ekonomi e orientuar nga eksportit, ishin disa nga tiparet dhe përparësitë për investime dhe investitorë të huaj, veçoi kryeministri Kurti.

Duke i falënderuar për interesimin dhe vizitën, ai i ftoi ata dhe partnerët e tyre që të eksplorojnë mundësitë që Kosova ofron.

Në takim, të shoqëruar nga ambasadori i Italisë në Kosovës, Antonello De Riu, ishin Muharrem Salihu, biznesmen italiano-shqiptar me prejardhje nga Medvegja, Silvano Martinotti, përfaqësues i Confindustria për mjedis dhe sport, Valentina Lazzarini, Presidente e kompanisë Fidoimpresa S.P.A që bashkëpunon me Confidustria dhe Daniela De Giorgi, Drejtuese e Zyrës për Tregti në ambasadën e Italisë.

Ministrja e Jashtme e Kosovës, Donika Gërvalla, deklaroi se shpreson që Presidenca suedeze e Këshillit të Bashkimi Evropian të ketë rezultate konkrete në bisedat që po bën me anëtarët e tjerë të Unionit në lidhje me aplikimin e Kosovës për në BE.

Këto deklarata, Gërvalla i bëri pas takimit në Bruksel të ministrave të BE-së, ku në Këshillin e Punëve të Jashtme u diskutua për situatën në rajonin e Ballkanit Perëndimor dhe për normalizimin e raporteve mes Kosovës dhe Serbisë.

Gërvalla tha se në këtë takim e kanë paraqitur qartë pozicionin e Kosovës në lidhje me raportet me Serbinë ndërsa kanë kujtuar se Beogradi zyrtar në vazhdimësi refuzon të zbatojë marrëveshjen e 27 shkurtit të arritur në Bruksel dhe aneksin e saj të 18 marsit në Ohër.

“Kam paraqitur qëndrimin e Republikës së Kosovës që në marrëveshjen që kemi lidhur në Bruksel dhe fazën e implementimit në Ohër e shohim si një marrëveshje ligjërisht të detyrueshme dhe që presim nga Serbia edhe pse sinjalet janë jo të mira, ngaqë jeni vetë dëshmitarë, që presidenti Vuçiq, ministri i Jashtëm Daçiq por edhe shumë të tjerë, në vazhdimësi jo vetëm refuzojnë implementimin por shpesh edhe mohojnë ekzistencën e një marrëveshjeje të tillë. Ka pasur intervenime të ndryshme nga disa ministra të cilat e kanë shprehur rëndësinë e normalizimit të marrëdhënieve mes Kosovës dhe Serbisë dhe mendoj që pozicionin e Republikës së Kosovës e kemi shfaqur shumë qartë”, deklaroi Gërvalla.

Zëvendëskryeministrja e Kosovës foli edhe për aplikimin e Kosovës në Bashkimin Evropian ku deklaroi se Suedia ende është duke biseduar me shtetet anëtare rreth kësaj kërkese, por tha se ky shtet gjatë presidencës së saj është treguar i gatshëm për të çuar përpara kërkesën e Kosovës.

“Ne shpresojmë që Presidenca suedeze të finalizojë bisedat që po zhvillon me shtetet anëtare të Bashkimit Evropian dhe të vijnë me një rezultat konkret, parashikimi se cili mund të jetë rezultati dhe kur nuk jam në gjendje të jap se nuk do të ishin serioze por besoj që me qasjen të cilën Suedia ka pasur gjatë presidencës së saj është treguar shumë e gatshme për të çuar përpara kërkesën tonë dhe për të biseduar me të gjithë anëtarët, pra edhe me ata që janë përkrahës të kërkesës sonë dhe me ata që hezitojnë pak më shumë”, tha Gërvalla.

Gërvalla tha se takimet e tilla ku marrin pjesë edhe ministrat e Jashtëm të Ballkani Perëndimor janë mundësi e mirë për të diskutuar sfidat për të cilat është duke kaluar Evropa dhe rajoni ynë.

“E rëndësishme është gjithashtu që Evropa ka filluar, Bashkimi Evropian ka filluar të ndërgjegjësohet që Ballkani Perëndimor jo vetëm që është pjesë gjeografike e Evropës por duhet edhe më shumë të afrohet politikisht me Bashkimin Evropian me qëllim që në një të ardhme integrimi të jetë i shpejtë dhe i natyrshëm”, tha Gërvalla.

Përpos Gërvallës, në këtë takim në Bruksel morën pjesë edhe ministrat e Jashtëm nga pesë vendet e tjera të Ballkanit Perëndimor.

Rishi Sunak tha se lufta në Ukrainë po “po hynte në një fazë kritike”.

Ai tha se mirëpriti kufizime më të forta mbi eksportet që ndihmojnë “makinerinë ruse të luftës”, duke iu referuar sanksioneve shtesë të vendosura nga Britania e Madhe për të përkuar me samitin.

Ai tha gjithashtu se Perëndimi qëndron pas Ukrainës dhe se “liria duhet të fitojë”.

“Putini duhet të dijë se ne nuk do të shkojmë askund,” tha ai.

Kryeministri gjithashtu përsëriti mbështetjen e Mbretërisë së Bashkuar për Ukrainën, duke shtuar: “Ne do të qëndrojmë me Ukrainën për aq kohë sa të duhet”.