ATV

Category: Lajme

  • Kurti: Zgjedhje të parakohshme, por që paraprihen nga sundimi i ligjit

    Kurti: Zgjedhje të parakohshme, por që paraprihen nga sundimi i ligjit

    Kurti para gazetarëve bëri të ditur se zhvilloi takime bilaterale me shefin e Politikës së Jashtme e të Sigurisë së BE-së, Josep Borrell, si dhe me emisarin e BE-së për dialogun Kosovë-Serbi, Mirosllav Lajçak, ku sqaroi se takimi nuk ishte trelateral, sepse pala tjetër ka refuzuar një gjë të tillë.

    Tutje, kryeministri Kurti foli për rrjedhën e takimeve që para katër muajsh e deri më tani, kur siç u shpreh ai, u konfirmua që ka marrëveshje, por nuk patën takim, teksa kritikoi sjelljen joserioze të presidentit Vuçiq.

    “Unë kam ardhur për t’u takuar për t’u marrë vesh që të kemi dakordësime e të ecim përpara”, tha kryeministri Kurti, derisa shtoi se jo gjithçka varet prej tij.

    “Në fillim të takimit unë kam prezantuar një dokumentacion Borrell-it e Lajcak-ut lidhur me rrëmbimi n e tre policëve të Kosovës në Leposaviq, më 14 qershor, kur janë bërë më shumë se një javë e që po mbahen peng nga Serbia në burgun e Kralevës”, duke kërkuar që ta dënojnë agresionin e Serbisë ndaj Kosovës publikisht.

    Tutje, kryeministri Kurti tha se është diskutuar edhe për de-eskalimin, ku nënkuptohet largimin e grupeve kriminale që menjëherë do të përcillej me zvogëlimin e trupave të policisë në ndërtesën komunave.

    “Ndërkaq sa i përket zgjidhjes më të qëndrueshme, natyrisht se ka nevojë për zgjedhje të parakohshme në katër komunat në veri me një proces qe i paraprihet nga sundimi i ligjit, nga një fushatë e hapur e fer dhe nga zgjedhjet e lira e demokratike”, tha mes tjerash Kurti.

  • Rama: Pa lirimin e policëve, s’ka përparim – Franca e Gjermania të veprojnë fuqishëm

    Rama: Pa lirimin e policëve, s’ka përparim – Franca e Gjermania të veprojnë fuqishëm

    Kryeministri Albin Kurti ka qëndruar sot në Bruksel, ku ka zhvilluar takime me kreun e diplomacisë evropiane, Josep Borrell dhe emisarin e BE-së për dialogun, Miroslav Lajçak.

    Takime me dyshen evropiane ka zhvilluar edhe presidenti serb, Aleksandar Vuçiq, ndërsa takim mes dy liderëve të Kosovës dhe Serbisë nuk pati.

    Megjithatë, Borrelli doli në konferencë për media pas këtyre takimeve, ku tha se palët kishin qëndrime të kundërta për sa i përket de-përshkallëzimit të situatës mes dy vendeve.

    Por, ai tha t’i ketë thënë Vuçiqit që tre policët e rrëmbyer kosovarë duhet të lirohen menjëherë dhe pa kushte.

    E për këto zhvillime ka reaguar kryeministri shqiptar, Edi Rama. Ai tha se pa lirimin e tre policëve, nuk ka kurrfarë mundësie që të ecet përpara.

    Madje, Rama kërkoi nga Franca dhe Gjermania që të veprojnë fuqishëm.

    “Pa largimin e tre djemve shëndoshë e mirë nga Serbia, nuk ka hapësirë për të bërë asnjë centimetër përparim të vërtetë! Sapo të kthehen në shtëpi, nevojitet një veprim i ri i fortë i Francës dhe Gjermanisë për të ndaluar këtë spirale absurditeti! Por gjëja e parë në radhë të parë: LIRONI 3 POLICËT”, theksoi Rama në Twitter.

    Kurti ndërkaq ende nuk është deklaruar pas dy takimeve që i zhvilloi ditën e sotme me Borrellin e Lajçakun.

    E Vuçiqi tha se nuk është se varet diçka nga Serbia dhe BE-ja, por la të kuptohet se avancimi përpara varet nga Kosova.

  • Kurti për Papa Françeskun: Vështirë që të ketë një tjetër të tillë këtë shekull

    Kurti për Papa Françeskun: Vështirë që të ketë një tjetër të tillë këtë shekull

    Kryeministri Albin Kurti ka lavdëruar Papa Françeskun, të cilin e takoi në Vatikan të enjten. Ai ka thënë se është e vështirë “që të ketë një tjetër të tillë në këtë shekull”.

    Sipas një njoftimi të Zyrës së Kryeministrit, takimi i së enjtes ka qenë “i përzemërt”. E të tillë e ka vlerësuar edhe Kurti, që ka deklaruar të ketë mbetur i impresionuar me njerëzinë e interesimin e Papës.

    “Ndonëse disi ngathët hedhja hapat përpara, ecje e shkurtër m’u duk mua ajo nëpër disa korridore të gjata deri te biblioteka e Atit të Shenjtë. Për shkak të Papa Françeskut doja të mbërrij sa më shpejt tek ai, për shkak të pikturave mahnitëse të Rafaelit nëpër mure e tavan, silueta e shefit të protokollit po zvogëhej teksa më printe. Ekziston dritarja e përsosur për të parë Sheshin e Shën Pjetrit me kupën qiellore sipër. Disa sekonda, jo më shumë, sepse syri im i djathtë tashmë kërkonte derën pas së cilës sakaq u shfaq mikëpritja e bardhë dhe e ngrohtë”, ka shkruar Kurti në Facebook në mbrëmje.

    “Papa Françesku është shumë njerëzor e fort social. Ai bënte pyetje për Kosovën, rininë e fëmijët, arsimin e punën, historinë e kulturën, vlerat dhe të ardhmen. Flet për paqen me dashuri, për popujt me dhembshuri. Interesohet në një mënyrë të angazhuar, dëgjon me një durim që të përvetëson. Shërbimi ndihmon shërbyesin jo më pak se të shërbyerin. E politika është shërbim. Veprimet nuk kanë autonomi nga etika. E politika është veprim. Idetë janë më të rëndësishme se vetja. E populli është edhe më i rëndësishëm se idetë”, ka vazhduar ai.

  • Serbia liron Rrahim Musliun që e arrestoi për shqiponjën dykrenare në veturën e tij

    Serbia liron Rrahim Musliun që e arrestoi për shqiponjën dykrenare në veturën e tij

    Dje është liruar nga arresti Rrahim Musliu, shtetasi i Kosovës i cili ishte arrestuar në Serbi me 24 maj 2023 gjatë kalimit tranzit nëpër Serbi duke u kthyer në Gjermani.

    Kështu kanë bërë të ditur burimet mediatike.

    Ai ishte arrestuar nga policia serbe pasi që në pjesën e pasme të veturës së tij kishte vendosur simbolin kombëtar të Kosovës, shqiponjën dykrenare.

    Gjykata e Lartë e Beogradit, më 26 maj 2023 i kishte shqiptuar masën e paraburgimit për 30 ditë, ndërsa, Prokuroria e Gjykatës së Lartë të Beogradit kishte ngritur akuzë për ‘nxitje të urrejtjes kombëtare, racore dhe fetare,’ të përcaktuar sipas Kodit Penal të Serbisë.

  • Deputetja britanike i reagon Hillit: Serbia ka marrëveshje me Rusinë dhe mban në ndalim tre policë kosovarë

    Deputetja britanike i reagon Hillit: Serbia ka marrëveshje me Rusinë dhe mban në ndalim tre policë kosovarë

    Deputetja e Parlamentit të Britanisë së Madhe, Alicia Kearns, i ka replikuar ambasadorit amerikan në Serbi, Christopher Hill, pas mbajtjes së stërvitjes së forcave amerikane me ato serbe, të quajtur “Platinum Wolf”.

    “Kosova, një aleate demokratike e denoncuar dhe e dënuar”, nis teksti i saj.

    “Më mirë ‘Platinum Wolf’, një ushtrim i përbashkët me një vend që ka nënshkruar marrëveshje të politikës së jashtme me Rusinë, si ripërtëritje pas pushimit të paligjshëm të Ukrainës dhe aktualisht është duke i mbajtur ilegalisht tre policë kosovarë”, ka shkruar Kearns.

    Gjatë ditës ambasadori Hill është shprehur tejet i kënaqur me zhvillimin e stërvitjes së përbashkët me forcat serbe.

  • Gjermania demanton Bratislav Gasiçin, ekspertët: Ai gënjeu për qëllime politike

    Gjermania demanton Bratislav Gasiçin, ekspertët: Ai gënjeu për qëllime politike

    Gjermania ka demantuar deklaratën e ministrit të Brendshëm të Serbisë, Bratislav Gasiç, se autoritetet gjermane e kanë në mbrojtje vrasësin e Oliver Ivanovicit.

    “Deklaratat që thonë se dorasi është nën mbrojtjen e autoriteteve gjermane nuk janë të vërteta”, theksoi mes tjerash Ambasada Gjermane në Beograd.

    Ish-drejtori i Policisë së Kosovës, deputeti Rashit Qalaj, i cilësoi tërësisht të paqëndrueshme deklaratat e ministrit të Brendshëm të Serbisë.

    Më e rëndësishmja, sot patëm një deklarim të Ambasadës Gjermane në Serbi, e cila e demantoi që ajo është duke i ofruar mbrojtje kujtdo që lidhet me rastin e Oliver Ivanovicit. Pra, ministri serb ka gënjyer, ka rrejtë – në gjuhën popullore, dhe realisht e bën për çështje personale, marketing politik, dhe gjoja se Serbia ka aftësi të zbulojë një rast të tillë, rast i cili është duke u hetuar në Kosovë, të cilin e ka Prokuroria Speciale në Kosovë”, tha Qalaj.

    Teksa vuri theksin te procesi gjyqësor në Kosovë, lidhur me vrasjen e Ivanovicin, eksperti i sigurisë, Nuredin Ibishi, deklaratën e Gasiçit e quajti
    “gënjeshtër përtej imagjinatës” për konsum politik në Serbi.

    “Pa fije turpi del në Kuvendin e Serbisë dhe mundohet ta manipulojë opinionin në vendin e tij, pasi që ky është i implikuar në rastin e kidnapimit të tre zyrtarëve policorë, thuhet ashtu. Dhe, tash mundohet në gjithë këtë trysninë dhe debatin që po bëhet në Serbi kundër presidentit Vucic dhe establishmentit të tij, mundohet ta zhvendosë vëmendjen te Oliver Ivanovici”, tha Ibishi.

    Përmendja e Tiranës dhe Prishtinës, pa emrin e dorasit, sipas Ibishit, shpërfaq përpjekjen për të aluduar se dorasi është shqiptar, për t’iu kontribuuar tensioneve.

    “Kjo është në këtë trend të zhvillimeve, pra tensioneve që ata vetë po i krijojnë në Kosovë, veçmas tash që po afrohet Vidovdani, kur ata mendojnë të inskenojnë dhe të bëjnë incidente të reja dhe tensione”, tha Ibishi.

    Në një intervistë për mediat në Serbi, vëllai i Oliverit, Miroslav Ivanovic, akuzoi Gasiçin se po e përdor rastin për arsyetime politike apo ryshfet.

    Në Departamentin Special të Gjykatës në Prishtinë, tash e disa vite është duke u zhvilluar procesi gjyqësor për vrasjen e Ivanovicit – në të cilin aktakuza ngarkon me përgjegjësi dhjetë të pandehur, në mesin e tyre Milan Radoicicin dhe Zvonko Veselinovicin. /atvlive.tv

    Edicionin Qendror të lajmeve në ATV e gjeni në videon më poshtë:

  • “Kosova nuk mund të bëjë vetëvrasje politike, madje as për partnerët”, Gërvalla sqaron deklaratën e saj

    “Kosova nuk mund të bëjë vetëvrasje politike, madje as për partnerët”, Gërvalla sqaron deklaratën e saj

    Ministrja e Punëve të Jashtme, Donika Gërvalla, në emisionin CONTEXT në ATV, ka sqaruar deklaratën e saj se “Kosova nuk mund të bëjë vetëvrasje politike, madje as për partnerët”, të cilën e ka dhënë gjatë një interviste për “Der Standard”.

    Ajo tha se kjo deklaratë i është dedikuar një publiku gjermano folës, ndërsa është e vetëdijshme se në Kosovë mund të tingëllojë pak e ashpër.

    “Citati është “nuk mund të bëjë vetëvrasje politike, madje as për partnerët”. Është një intervistë e cila i dedikohet një publiku gjermano folës, në mënyrën dhe në gjuhën me të cilën shkruajnë dhe shërbehen mediat gjermano folesë. Unë e kuptojë që një gjuhë e tillë në Kosovë mund të tingëllojë pak e ashpër, por Kosova e ka synimin e forcimit të shtetësisë së saj, e sundimit të ligjit, e demokratizimit të mëtejshëm të vendit, edhe vetëvrasje politike është të heqësh dorë prej njërës prej këtyre tri parimeve”, tha Gërvalla.

    Ajo tha se kjo shprehje nuk i adresohet asnjërit nga partnerët e Kosovës.

    “Ajo është më tepër një shprehje e cila nuk i adresohet asnjërit nga partnerët tanë, por do të thotë që ne jemi të sigurt që ajo çfarë ne kemi synim të arrijmë në gjithë vendin tonë, është shumë e rëndësishme sepse duhet të japi sinjalin që fqinji i ynë verior nuk duhet të guxojë as të mendojë që ka të drejtë të ndërhyjë në vendin tonë në mënyrë agresive në të cilën ka ndërhyrë gjatë muajve të kaluar edhe viteve të kaluara”, sqaroi Gërvalla. /atvlive.tv

    Emisionin e plotë e gjeni në videon më poshtë:

  • Osmani shpreh keqardhjen që partitë e tjera opozitare refuzuan takimin

    Osmani shpreh keqardhjen që partitë e tjera opozitare refuzuan takimin

    Presidentja Vjosa Osmani në vazhdën e takimeve për koordinim ndërinstitucional, ka ftuar sot në takim kryetarët e partive opozitare në Kuvendin e Kosovës.

    Përveç takimeve të vazhdueshme me krerët e institucioneve të vendit: Kryetarin e Kuvendit, Kryeministrin, Zëvendëskryeministren, Ministren e Punëve të Jashtme si dhe ministrat e dikastereve të tjera, Presidentja e ka parë të nevojshme që të mbajë komunikim të rregullt edhe me partitë opozitare, nëpërmjet ftesave të vazhdueshme për takime e ngjarje të ndryshme, thuhet në një komunikatë të Zyrës së Presidentes.

    “Në këtë kuadër, pas letrës së Kryetarit të AAK-së, z. Ramush Haradinaj dhe diskutimeve me krerët e institucioneve, Presidentja ka ftuar liderët opozitarë fillimisht në takime të ndara, meqë disa nga krerët e institucioneve këto ditë nuk ishin në Kosovë. Ajo ndërkaq ka paralajmëruar edhe ftesën për një takim të përbashkët të të gjithë liderëve në një moment kur të gjithë të jenë në Kosovë”.

    Në letrën e saj, Presidentja ka vlerësuar se bashkëpunimi dhe dialogu i hapur ndërmjet institucioneve dhe partive politike janë thelbësore për t’i përballuar sfidat aktuale dhe për të punuar së bashku drejt arritjes së synimeve të përbashkëta që përfshijnë mbrojtjen e tërësisë territoriale, sovranitetit dhe kushtetutshmërisë si dhe fuqizimin ndërkombëtar të Republikës, sikurse edhe në përmbushjen e prioritetit tonë shtetëror, anëtarësimin në NATO dhe BE.

    Presidentja Osmani, sot paradite ka zhvilluar një takim me kryetarin e Kuvendit të Kosovës, Glauk Konjufca, me të cilin ka biseduar për koordinimin e vazhdueshëm ndërinstitucional.

    Ndërkaq pasdite, Presidentja Osmani ka pritur në takim Kryetarin e Aleancës për Ardhmërinë e Kosovës, Ramush Haradinaj, me të cilin ka këmbyer pikëpamjet në raport me zhvillimet e fundit politike dhe të sigurisë në vend.

    Presidentja ka shprehur keqardhje që partitë e tjera opozitare kanë refuzuar mundësinë që ta japin kontributin e tyre për çështje të interesit nacional, përfshirë përpjekjet për fuqizimin e aleancave strategjike e ekzistenciale të Republikës së Kosovës me partnerët, e në veçanti me Shtetet e Bashkuara të Amerikës. Ajo ka ritheksuar, se në përputhje me Kushtetutën do të vazhdojë të angazhohet në përfaqësimin e unitetit qytetar, mbrojtjen e kushtetutës, ruajtjen dhe fuqizimin e aleancave strategjike, sikurse edhe krijimin e një klime konstruktive për t’i adresuar sfidat dhe çështjet e rëndësishme në Republikën e Kosovës.

    Sipas Presidentes Osmani, kontributi i secilit lider dhe subjekti politik është të bashkëpunojë për çështje të rëndësisë nacionale me institucionet shtetërore, por jo duke refuzuar.

    Pavarësisht kësaj, Presidentja Osmani ka bërë të ditur se dera e zyrës së saj vazhdon të jetë e hapur për liderë institucionalë dhe parti politike, në funksion të mbrojtjes së interesit shtetëror.

  • Pyetja e gazetarit që vuri në “siklet” Donika Gërvallën

    Pyetja e gazetarit që vuri në “siklet” Donika Gërvallën

    “Nëse edhe tri katër shtete në Evropë e kanë problem me ua shpjegu popullit dhe parlamenteve të veta, pse djemtë e tyre vinë në Kosovë dhe lëndohen dhe plagosën, pyetja është, a e keni ndërmend, a jeni duke e shqyrtuar me e tërheqë atë Lulzim Hetemin e shkretë prej atje?”.

    Kjo pyetje e moderatorit të emisionit CONTEXT në ATV, Leart Hoxha, duket se e vuri në “siklet” ministren Gërvalla.

    “Nëse ky emision do të ndërtohet në këtë formë, unë shumë me kënaqësi mund t’i bëjë unë pyetjet e mia dhe mund ta ndërrojmë rolin, mund të ju pyes për opinionet tuaja se vërtetë do më interesonte shumë që t’i dëgjoja, por nëse doni të dëgjoni opinionin tim rreth asaj se çfarë ka ndodhur dhe pse janë të shqetësuara shtetet, edhe për dhunën e ushtruar…”, iu drejtua Gërvalla gazetarit Hoxha, deri sa ky i fundit e ndërpreu sërish duke i thënë se dëshiron ta dëgjojë qëndrimin e saj dhe jo opinionin.

    “Nuk po më duhet opinioni i juaj por qëndrimi. Jeni zëvendës kryeministre. Për opinione unë kam tjera kategori të njerëzve që i ftoj”, ishte kërkesa e gazetarit Hoxha për ministren Gërvalla. /atvlive.tv

    Emisionin e plotë e gjeni në videon më poshtë:

  • Shpallen të vdekur pesë pjesëtarët e ekuipazhit të “Titan”

    Shpallen të vdekur pesë pjesëtarët e ekuipazhit të “Titan”

    Kompania që kishte në pronësi nëndetësen e humbur i ka shpallur të vdekur pesë pjesëtarët e ekuipazhit të “Titan”.

    OceanGate në një deklaratë për mediat ka shprehur ngushëllimet për jetët e humbura në këtë tragjedi.

    Kompania falenderon të gjithë ekuipazhet që morën pjesë në mision kërkim-shpëtimin dhe kërkon nga publiku të respektohet privatësia e familjeve.

    Deklarata e plotë e OceanGate

    CEO ynë Stockton Rush, Shahzada Dawood dhe djali i tij Suleman Dawood, Hamish Harding dhe Paul-Henri Nargeolet, fatkeqësisht kanë humbur jetën.

    Këta njerëz ishin eksplorues të vërtetë që kishin një dëshirë një dhe një pasion të thellë për të eksploruar dhe mbrojtur oqeanet e botës. Zemrat tona janë me të ndjerët dhe çdo pjesëtar të familjeve të tyre gjatë kësaj kohe tragjike. Ne do të kujtojmë me pikëllim dhe gëzim atë çka ata sollën për të gjithë publikun.

    Kjo është një kohë jashtëzakonisht e trishtuar për punonjësit tanë të përkushtuar, të cilët janë të rraskapitur dhe të pikëlluar thellë për këtë humbje. E gjithë familja OceanGate është thellësisht mirënjohëse për burrat dhe gratë e panumërta nga organizata të shumta të komunitetit ndërkombëtar që kanë punuar kaq shumë në këtë mision.

    Ne e vlerësojmë angazhimin e tyre të palodhur për ditë dhe netë me radhë për të gjetur këta pesë eksplorues.

    Kjo është një kohë shumë e trishtuar për të gjithë komunitetin e eksploruesve dhe për secilin nga anëtarët e familjes së atyre që humbën në det.

    Me respekt kërkojmë që të respektohet privatësia e këtyre familjeve në këtë kohë shumë të dhimbshme.