Category: Lajme

Gjykata Themelore në Prizren ka shpllur aktgjykim dënues ndaj të akuzuarit Remzi Shala, i njohur si komandant “Molla e Kuqe”, duke e dënuar me 9 vjet e 6 muaj burgim efektiv, lidhur me akuzën për krime lufte kundër popullatës civile.

Shala, i njohur si komandant “Molla e Kuqe” akuzohej se së bashku me disa pjesëtarë tjerë të paidentifikuar, e kishin marrë H.P nga shtëpia e tij dhe pas disa ditësh trupi i pajetë i të ndjerit ishte gjetur në afërsi të rrugës, afër qendrës së fshatit Duhël.

Aktgjykimi u shpall të martën, nga kryetarja e trupit gjykues, Raima Elezi, raporton “Betimi për Drejtësi”.

Sipas aktgjykimit, i akuzuari obligohet që t’i paguajë edhe shpenzimet e procedurës penale në shumën prej 500 euro në emër të paushallit gjyqësor dhe 50 euro për fondin e viktimave të krimit.Pala e dëmtuar, për realizimin e kërkesës pasurore-juridike është udhëzuar në kontest të rregullt civil.

Palët e pakënaqura, kundër këtij aktgjykimi kanë të drejtë ankese në afat prej 30 ditësh në Gjykatën e Apelit.

Ndryshe, Gjykata Themelore në Prizren, në korrik të 2019-ës, kishte marrë aktgjykim, me të cilin të akuzuarin Shala e kishte shpallur fajtor për veprën penale “Krime lufte kundër popullatës civile”, duke e dënuar me 14 vjet burg.

Pas ankesës së mbrojtjes, Gjykata e Apelit e kishte ndryshuar aktgjykimin e shkallës së parë, duke ia zbritur dënimin Shalës në 10 vjet burgim.Kërkesë për mbrojtje të ligjshmërisë në Gjykatë Supreme, kishte parashtruar mbrojtësi i të akuzuarit Shala, avokati Natal Bullakaj.

Gjykata Supreme, në maj të vitit 2020 e kishte kthyer rastin në rigjykim në shkallën e parë.Ish-komandanti i UÇK-së, Remzi Shala, i njohur si komandant “Molla e Kuqe”, akuzohej nga Prokuroria Speciale e Republikës së Kosovës (PSRK), për vrasjen e një civili gjatë luftës së fundit në Kosovë.

Shala akuzohej nga PSRK se gjatë kohës së luftës në Kosovë, më 26 qershor 1998, duke vepruar si pjesëtar i Ushtrisë Çlirimtare të Kosovës (UÇK), së bashku edhe me disa pjesëtarë tjerë të paidentifikuar, kanë marrë nga shtëpia e tij, viktimën H.P.Gjithnjë sipas aktakuzës, Remzi Shala, i cili ishte i vetmi pa maskë në kokë, së bashku edhe me 5-6 pjesëtarë tjerë të UÇK-së, të maskuar, nën dyshimin se i ndjeri ishte bashkëpunëtorë i forcave serbe, kanë shkuar në fshatin Duhël dhe të njëjtin e kanë dërguar në një vend të panjohur.

Në aktakuzë thuhet se djali i viktimës, A.P, i kishte parë ata të largoheshin, së bashku me babanë e tij, në drejtim të fshatit Grajqevc dhe pas disa dite trupi i pajetë i të ndjerit ishte gjetur në afërsi të rrugës, afër qendrës së fshatit Duhël.

Serbët në Graçanicë janë mbledhur sërish për të kundërshtuar arrestimin e Dragisha Milenkoviq dhe serbëve të tjerë. Për të katërtën herë me radhë, pranë komunës dhe stacionit policor, është protestuar me kërkesën për lirimin e tyre. Aty u paraqit edhe një dokument i quajtur “Deklarata e Vidovdanit”, me pesë pika ku thuhej se në këtë festë duhet të tregohet nëse do të ketë asociacion.

“Anamorava është me Vuçiqin”, “Prej Anamoravës deri në Leposaviq jena një familje” dhe “Liri për të gjithë serbët e arrestuar”, shkruhej në pankartat e grupit të protestuesve nga Anamorova.

Në protestë ka marrë pjesë edhe kryetarja e Graçanices, Liliana Shubariq dhe ai i Shtërpcës, Dalibor Jevtiq. Ky i fundit ka lexuar “Deklaratën e Vidovdanit”, derisa tha se bashkësia ndërkombëtare duhet të dëgjojë serbët për gjoja “regjimin aktual në Prishtinë”.

Jevtiq: Politika e Kurtit, me qëllim që të zhduken serbët nga këto zona
(Video)
“Vëllezërit tanë nga Zhupa, të cilëve u shkelen të drejtat elementare të njeriut, por ato të drejta të përcaktuara me ligj këtu në Kosovë, dhe unë dua t/ju drejtohem në emër të të gjithë atyre që janë arrestuar nën drejtësinë e Zotit dhe të ndaluar vetëm pse janë serbë. Ne sot këtu si dhe nga momenti kur Kurti erdhi në pushtet, me protestë paqësore ftojmë bashkësinë ndërkombëtare të na dëgjojë, i ftojmë edhe sot që më në fund të kuptojnë se sa ditët kalojnë terrori i regjimit aktual në Prishtinë tashmë po bëhet më i madh. Ajo që po ndodh nga Shtërpci në Leposaviq, nga Gorazhdeci në Shilovë, ajo që po ndodh këtu në Kosovën qendrore, e gjitha është politikë e Kurtit me qëllim që të zhduken serbët nga këto zona”, pretendoi Jevtiq.

Bashkimi i serbëve në Graçanicë e veri, siç e quajti Jevtiq, dërgon mesazh të qartë se nuk do të heqin dorë. Ai deklaroi se nuk kanë problem me popullin shqiptar, por me kryeministrin Kurti.

“Sot dua ta bëj shumë të qartë se ne nuk kemi problem me popullin shqiptar, kemi problem me një njeri që tregon qartë se nuk i do serbët në këto zona, ne kemi problem me Kurtin dhe regjimin e tij në Prishtinë”, tha ai.

Në prag të festës së Vidovdanit, kryetari i Shtërpcës ka lexuar edhe deklaratën e popullit serb. Aty pretendohet se nga fillimi i vitit, janë plagosur fëmijë e bashkatdhetarë të tjerë për shkak të urrejtjes etnike.

“I bëjmë thirrje komunitetit ndërkombëtar që të ndërmarrë hapa vendimtarë për të qetësuar tensionet, sepse ne nuk mund ta tolerojmë më këtë zullum”, pretendoi ai.

Në këtë deklaratë përmendet edhe çështja e asociacionit, ku kërkohet që të thuhet nëse do të ndodhë një gjë e tillë.

“Nën dy, njerëzit tanë të vuajtur, besimin në një të nesërme e ka thurur në asociacionin e komunave serbe, të cilën na e garantoi edhe bashkësia ndërkombëtare. Prej 10 vitesh presim të drejtën tonë për një jetë të denjë për njeriun në shekullin e 21-të, për qëndrimin dhe mbijetesën tonë në këto treva. Ka ardhur koha që e vërteta të dalë në dritë dhe kjo në këtë Vidovdan të thuhet qartë nëse do të kemi ZSO, përndryshe e dimë se çfarë duhet të bëjmë”, shtoi ai.

Po ashtu, Jevtiq gjatë leximit të kësaj deklarate tha se nëse vazhdon një situatë e tillë, do të detyrohen të përgjigjen.

Ndryshe, për Dragisha Milenkoviq, i cili u arrestua ditë më parë, ekziston dyshimi i arsyeshëm se ka kryer krime lufte kundër popullatës civile gjatë luftës së fundit në Kosovë. /kp

Gjykata Themelore e Gjakovës ka njoftuar se ia ka caktuar masën e paraburgimit prej një muaji të pandehurit GJ.GJ, i cili dyshohet për vrasjen e dy vëllezërve nga fshati Madanaj dhe mbajtje pa autorizim të armës.

Sipas kërkesës së Prokurorisë, “me datën 25 qershor 2023 rreth orës 20:20min në fshatin Madanaj të Gjakovës, me dashje ka privuar nga jeta të ndjerin H. I. dhe B. I., nga fshati Madanaj dhe këtë për shkak të një kontesti pronësor”, raporton Express.

“Gjyqtari i procedurës paraprake Drilon Haraçia, në seancën dëgjimore të mbajtur në ambientet e spitalit ku i pandehuri gjendet për trajtim mjekësor, ka vlerësuar se janë përmbushur kushtet ligjore për caktimin e masës së paraburgimit për të pandehurin në fjalë, ngase kemi të bëjmë me vepra penale të rënda.

I pandehur do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 25 qershor 2023 dhe do të zgjasë deri më 25 korrik 2023”, ka njoftuar Gjykata.

Njoftimi i plotë:

Një (1) muaj paraburgim ndaj të pandehurit Gj. Gj., për vepër penale të vrasjes së rëndë

Gjakovë, 27 qershor 2023 – Gjykata Themelore në Gjakovë ka aprovuar kërkesën e Prokurorisë Themelore të Gjakovës, duke i caktuar masën e paraburgimit një (1) muaj të pandehurit GJ. Gj., për shkak të dyshimit të bazuar se ka kryer veprën penale të vrasjes së rëndë dhe mbajtjes pa autorizim të armës.

Sipas kërkesës, “me datën 25 qershor 2023 rreth orës 20:20min në fshatin Madanaj të Gjakovës, me dashje ka privuar nga jeta të ndjerin H. I. dhe B. I., nga fshati Madanaj dhe këtë për shkak të një kontesti pronësor”.

Me këto veprime i pandehuri dyshohet se ka kryer dy vepra penale, ”Vrasja e rëndë” dhe veprën penale “Mbajtja në pronësi, kontroll ose posedim të paautorizuar të armëve”, vepra të sanksionuara me Kodin Penal të Republikës së Kosovës.

Gjyqtari i procedurës paraprake Drilon Haraçia, në seancën dëgjimore të mbajtur në ambientet e spitalit ku i pandehuri gjendet për trajtim mjekësor, ka vlerësuar se janë përmbushur kushtet ligjore për caktimin e masës së paraburgimit për të pandehurin në fjalë, ngase kemi të bëjmë me vepra penale të rënda.

I pandehur do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 25 qershor 2023 dhe do të zgjasë deri më 25 korrik 2023.

Palët kanë të drejtën e ankesës ndaj këtij vendimi në Gjykatën e Apelit të Kosovës.

Komandanti i Gardës Kombëtare të Ajoas, gjeneral major Stephen Osborn, ka vizituar Forcën e Sigurisë së Kosovës ku është pritur në takim nga komandanti Bashkim Jashari. Ata janë pajtuar që të fillohet me planifikim për Planin Dinamik GK Ajoa-FSK 2024-2025.

Të dy gjeneralët kanë diskutuar për thellimin e bashkëpunimit në mes të FSK dhe Gardës së Ajoas.

“Gjatë takimit gjeneralët diskutuan për bashkëpunimin e ndërsjellë gjatë UF “Defender Europe 23”, bashkëpunimin në fusha tjera dhe thellimin e bashkëpunimit mes GK Iowa dhe FSK, ku edhe u pajtuan që të fillohet me planifikim për Planin Dinamik GK Iowa-FSK 2024-2025”, ka njoftuar Shtabi i Përgjithshëm i FSK-së.

Gjenerali Osborn ka vizituar edhe Regjimentin e Parë të Komandës së Forcës Tokësore (R1 KFT).

Gjatë vizitës në R1K, Gjeneral Osborn, është njoftuar në detaje me misionin, detyrat, pajisjet e R1K dhe është diskutuar më gjerësisht rreth angazhimeve të regjimentit e me fokus gjatë ushtrimit fushor “Defender Europe 23”.

Kryetari i Aleancës për Ardhmërinë e Kosovës (AAK), Ramush Haradinaj, ka pritur sot në takim Guvernatoren e shtetit të Iowa-s, Kim Reynolds.

Haradinaj ka falënderuar Guvernatoren Reynolds për kontributin e saj në avancimin e bashkëpunimit mes dy vendeve.

“Kisha nderin që në vizitën e saj të parë në Kosovë, të zhvilloj një bashkëbisedim të ngrohtë me Guvernatoren e shtetit të Iowa-s, Kim Reynolds. Me këtë rast, shpreha falënderimin për kontributin e jashtëzakonshëm të saj në avancimin e bashkëpunimit të gjithanshëm mes vendeve tona, e veçmas për ndihmën e Gardës së Ioëa-s në forcimin e Ushtrisë së Kosovës”, është shprehur Haradinaj.

Me këtë rast, Haradinaj ka falënderuar edhe shqiptaro-amerikanim Rrustem Gecaj dhe djalin e tij Avdiun për kontributin e tyre të vazhdueshëm për Kosovën.

“Gjithashtu, falënderim të veçantë i shpreha shqiptaro-amerikanit shembull, Rrustem Gecaj dhe djalit të tij Avdiut, ku kontributin e tyre të jashtëzakonshëm për Kosovën nuk e ndalën asnjëherë”, ka përfunduar Haradinaj.

Me 27 vota për, 1 kundër dhe 1 abstenim, Kuvendi i Prishtinës ka shkarkuar kryesuesin e Kryeqytetit, Fehmi Kupinën.

Po ashtu partitë që udhëheqin me Prishtinën, LDK dhe PDK kanë rikthyer sërish pushtetin në ndërmarrjet publike në kryeqytet.

Në mbledhjen e sotme të Kuvendit Komunal të Prishtinës, me 27 vota për gjithashtu u anulua vendimi i datës 8 qershor për shkarkimin e aksionarëve të ndërmarrjeve publike në Prishtinë.

Këto vendime në Prishtinë u morën pasi braktisen seancënkryesuesi dhe asamblistët e Vetëvendosjes.

Fillimisht asamblistët e Vetëvendosjes me zhurmë nuk e lejuan kryetarin e Prishtinës, Përparim Rama të merr fjalën.

Kryetari Rama duke kërkuar qetësinë e këshilltarëve të Vetëvendosjes, pati një kërkesë tallëse me ta.

“S’po doni me dëgjuar a? Mbani madje ndonjë ritëm më të mirë, qysh ja keni nisë ju me kërcye, luani Shotën e a naj sen tjetër a… Unë po vazhdoj po bërtas. Prej datës 1 unë si kryetar I kryeqytetit kam qenë këtu dhe do të jem për të mirën e kryeqytetit. Gëzim Sveçla ka ardhur dhe ka thënë se e kam e shumicën, dhe normalisht që i kam thënë atij e ke shumicën, bëje shumicën. Jemi në demokraci. Kush e ka shumicën sot këtu, po me vjen keq për anëtarë të tjerë të Vetëvendosjes që bien pre dhe fore të Gëzim Sveçlës”, theksoi Rama.

Megjithatë, para se të shkarkohej, kryesuesi Fehmi Kupina e shpalli të mbyllur seancën, duke thënë se nuk ka kushte për punë.

“Kryetar a ka mundësi ju lutemi, për arse se nuk ka kushte për këtë mbledhje. E shpalli të mbyllur këtë seancë”, theksoi Kupina.

Por, kryetari i Prishtinës, Rama dhe asamblistët e partisë së tij vazhduan punën duke theksuar se ka kushte për punë.

“Ka kushte për seancë, sepse ne jemi shumicë këtu”, ka thënë Rama.

Pasi braktisën seancën kryesuesi, Fehmi Kupina me asamblistët e Vetëvendosjes, seancën e udhëhoqi asamblisti më i vjetër Ajet Brajshori nga radhët e LDK-së.

Ndërkohë, u fut në rend dite propozimi Jeta Rafunës nga LDK-ja për shkarkimin e kryesuesit Fehmi Kupina.

27 këshilltarë komunal me vota të fshehta votuan për shkarkimin e Kupinës nga pozita e kryesuesit.

Asamblisti nga LDK-ja, Sami Salihu në emër të Komisionit për Mbarëvajtjen e procesit të votimit konstatoi shkarkimin e kryesuesit, Kupina.

“Në emër të Komisionit për Mbarëvajtjen e procesit të votimit për shkarkimin e kryesuesit të kryeqytetit, Fehmi Kupina, konstatojmë se në votim kanë marrë pjesë 28 këshilltarë komunal, prej tyre 27 janë për, 1 kundër dhe asnjë abstenim. Dhe me këtë konstatojmë se miratohet propozimi për shkarkimin e kryesuesit të kryeqytetit, Fehmi Kupina”, theksoi Salihu.

Pas këtij vendimi, në mbledhjen e Kuvendit të Kryeqytetit, me 27 vota për është miratuar propozim vendimi për anulimin e vendimit të datës 08.06.2023 për shkarkimin e anëtarëve në Komisionet e aksionarëve të ndërmarrjeve publike të Komunës së Prishtinës.

Këtë votim e konstatoi asamblisti më i vjetër, Ajet Brajshori, i cili e udhëhoqi seancën.

“Me 27 vota për është miratuar për anulimin e vendimit të datës 08.06.2023 për shkarkimin e anëtarëve në Komisionet e aksionarëve të ndërmarrjeve publike të Komunës së Prishtinës”, theksoi Brajshori.

Po ashtu me 27 vota për është marrë vendim për caktimin e anëtarëve të Komisionit të Aksionarëve të ndërmarrjeve publike të Prishtinës.

Ndryshe, në mbledhjen e Kuvendit të Kryeqytetit më 8 qershor, Fehmi Kupina kishte dhënë dorëheqje nga LDK-ja në Prishtinë. /kp

Hetuesit policorë nga Sektori për Hetimin e Krimeve Ekonomike, kanë trajtuar një informatë lidhur me një person i cili dyshohet të ketë aplikuar për kredi-lizing në një bankë me dokumente të falsifikuara.

Sipas Policisë, gjatë veprimeve hetimore, janë siguruar dëshmi se i dyshuari Sh.Sh., (viti i lindjes 1987, mashkull kosovar), gjatë procedurave të kredi-marrjes, ka paraqitur dokumente si: letërnjoftimin, patentë-shoferi, gjendjen e llogarisë bankare, kontratën e punës dhe kontratën e qirasë, të cilat dokumente është vërtetuar se janë të falsifikuara.

“I dyshuari ka arritur të marrë aprovimin për kredi në shumën prej 71,250 €uro. I dyshuari pasi që i është aprovuar lizingu nga institucioni bankar, i njëjti e kishte në posedim veturën BMË X7 të cilën e kishte pranuar me lizing për shumën e lartcekur. Pasi është bërë identifikimi i të dyshuarit, nga zyrtarët e institucionit bankar, vetura i është marrë personit të dyshuar. Sot, më 27.06.2023 është arritur të arrestohet ky person i cili më pastaj është intervistuar në prezencën e avokatit të tij mbrojtës dhe ndaj tij është iniciuar rasti karshi veprave penale: ‘falsifikim i dokumenteve’ dhe ‘mashtrim’. I dyshuari me aktvendim të prokurorit kujdestar dërgohen në mbajtje deri në 48 orë”, thuhet në komunikatë.

Ministri i Administrimit të Pushtetit Lokal, Elbert Krasniqi, ka reaguar pas sulmit të mbrëmshëm në objektin e Komunës së Mitrovicës Veriore me granatë dore.

Sipas Krasniqi, sulmi kishte për qëllim frikësimin e banorëve.

“Sulmi i mbrëmshëm në objektin e Komunës së Mitrovicës Veriore, me granatë dore është sulm në institucionet e vetqeverisjes lokale, me qëllim të friksimit të banorëve të cilët çdo ditë e më shumë po gjejnë mbështetje për kërkesat e tyre nga autoritetet lokale”, u shpreh Krasniqi.

Tutje ai ka dënuar fuqishëm sulmin mbi instuticionet dhe tentativat e grupeve kriminale për destabilizim të situatës.

“Dënojmë fuqishëm sulmin mbi institucionet, pronën publike dhe tentativat e vazhdushme të grupeve kriminale për destabilizim të situatës”, është shprehur Krasniqi.