Category: Lajme

Presidenti i Republikës, Bajram Begaj, zhvilloi takime dypalëshe me Presidentin e Bullgarisë, Rumen Radev, dhe Ministrin e Jashtëm të Turqisë, zotin Hakan Fidan, në kuadër të pjesëmarrjes në Takimin e Nivelit të Lartë të Procesit të Bashkëpunimit të vendeve të Evropës Juglindore.

Në takimin me Presidentin e Bullgarisë Radev, Presidenti Begaj vlerësoi marrëdhëniet shumë të mira mes Shqipërisë dhe Bullgarisë, si dhe nënvizoi nevojën e një bashkëpunimi e koordinimi më të mirë në funksion të përmirësimit të infrastrukturës ndërlidhëse rajonale, duke e vënë theksin në mënyrë të veçantë te Korridori 8-të.

Lidhur me këtë të fundit, Presidenti Begaj vlerësoi rolin e Bullgarisë si vend anëtar i BE-së në mbështetje të projektit.

Të dy bashkëbiseduesit shkëmbyen mendime edhe mbi zhvillimet më të fundit në rajonin e Ballkanit Perëndimor, për nevojën e mbështetjes së dialogut mes Kosovës dhe Serbisë, si dhe për ndikimin e pasojat e agresionit rus në Ukrainë.

Presidenti Begaj u takua edhe me Ministrin e Punëve të Jashtme të Turqisë, zotin Hakan Fidan, me kërkesë të këtij të fundit.

Pasi e uroi për marrjen e detyrës së Ministrit të Jashtëm të një vendi mik, Presidenti Begaj vlerësoi marrëdhëniet shumë të mira të bashkëpunimit e të partneritetit strategjik midis dy vendeve, si dhe shprehu mirënjohje për mbështetjen e vyer që Turqia i ka dhënë Shqipërisë dhe shqiptarëve, veçanërisht në kapërcimin e pasojave të tërmetit shkatërrimtar në nëntor të vitit 2019, si dhe gjatë periudhës së pandemisë Covid-19.

Në një kohë kur në nëntor të këtij viti Turqia pritet të marrë komandën e KFOR-it në Kosovë, të dy bashkëbiseduesit u ndalën edhe te zhvillimet më të fundit në rajonin e Ballkanit Perëndimor. Presidenti Begaj vlerësoi rolin personal të Presidentit Erdogan në ruajtjen e paqes dhe të sigurisë në këtë rajon.

Në mënyrë të veçantë u shkëmbyen mendime edhe për dialogun Kosovë-Serbi dhe për nevojën e vijimit të këtij dialogu, në shërbim jo vetëm të të dy vendeve, por të gjithë rajonit në tërësi.

Kryetari i Partisë Demokratike të Kosovës, Memli Krasniqi, të mërkurën ka vizituar Bashkësinë Islame të Kosovës me rastin e festës së Kurban Bajramit, ku ka uruar të gjithë besimtarëve myslimanë, raporton Ekonomia Online.

Nga aty, Krasniqi nuk la pa përmendur ish-krerët e Ushtrisë Çlirimtare të Kosovës të cilët gjenden në Hagë. Aty, Krasniqi u uroi festën e Kurban Bajramit.

“Në emër te PDK-se uroj myftiun dhe përmes tij të gjithë anëtarët dhe besimtarët. Kjo është një festë që na e simbolizon solidaritetin dhe sakrificën. Në mënyrë të veçantë kujtojmë miqtë tanë që ndodhen në Hagë. Ua urojmë atyre prej këtu festën”, tha Krasniqi.

Me rastin e festës së Kurban Bajramit, Bashkësinë Islame të Kosovës, e vizitoi kryetari i Lidhjes Demokratike të Kosovës, Lumir Abdixhiku, raporton Ekonomia Online.

Abdixhiku ka uruar të gjithë besimtarët myslimanë, me ç’rast vlerësoi lartë punën e gazetarëve.

“Sot me bashkëpunëtorë të LDK-së vizituam BIK-un dhe myftiun Tërnava dhe nëpërmes tij ju uruam festën të gjithë besimtarëve. Më lejoni të ju uroj juve gazetarëve në veçanti, kjo është festë edhe për familjet tuaja e ju sot jeni në punë”, u shpreh Abdixhiku.

Një grup i senatorëve amerikanë kërkoi nga administrata e presidentit të Shteteve të Bashkuara, Joe Biden, që “t’i japë përparësi adresimit të situatës së përkeqësuar të sigurisë midis Kosovës dhe Serbisë”.

Letra që përmban nënshkrimet e tetë senatorëve demokratë dhe republikanë, inkurajon presidentin që të shqyrtojë shitjet ushtarake, nëse dy palët nuk angazhohen për propozimin e Bashkimit Evropian për shtensionimin e situatës.

Situata në veriun e Kosovës, të banuar me shumicë serbe, është tensionuar qysh në fund të majit, kur kryetarët shqiptarë të komunave atje kanë hyrë në objektet komunale, me gjithë rezistencën e banorëve lokalë.

Tensionet kanë kulmuar në dhunë më 29 maj, kur protestuesit serbë janë përleshur me ushtarë të misionit të NATO-s, KFOR. Dhjetëra të plagosur janë raportuar në të dyja anët.

Derisa Kosova dhe Serbia kanë fajësuar njëra-tjetrën për situatën e krijuar, komuniteti ndërkombëtar ka hedhur përgjegjësinë kryesisht mbi Kosovën.

Bashkimi Evropian është duke kërkuar prej saj që të mbajë zgjedhje të reja lokale në veri, si dhe ta tërheqë policinë speciale nga ajo zonë. Nga Serbia, në anën tjetër, kërkon që të sigurojë pjesëmarrjen e pakushtëzuar të serbëve në zgjedhjet e mundshme lokale.

Kryeministri i Kosovës, Albin Kurti, ka thënë se zgjedhjet mund të mbahen vetëm brenda kornizave ligjore të shtetit.

Letra e tetë senatorëve amerikanë i bën thirrje Bidenit që “të ushtrojë presion diplomatik, për t’i dhënë fund krizës aktuale”.

Letra përmend edhe nevojën e zbatimit të Marrëveshjes së Ohrit, që Kosova dhe Serbia kanë arritur në muajin mars, me qëllim normalizimin e marrëdhënieve.

Mijëra besimtarët myslimanë në Tiranë kanë falur namazin e Bajramit të Kurbanit.

E cilësuar si një ndër festat më të rëndësishme të kalendarit islam, edhe këtë herë falja e Bajramit është kryer në sheshin Skënderbej, i cili u mbush nga mijëra qytetarë.

Ceremonisë së faljes i parapriu me fjalën e tij Kreu i Komunitetit Mysliman, Spahiu i cili përcolli mesazhin për më shumë paqe, mirësi ,respekt e dashuri ndaj njeri-tjetrit dhe sidomos për më tepër besim, duke e konsideruar njeriun si pasurinë më të madhe të krijuar nga Zoti.

Sipas tij kjo është festa e të gjithëve, për të kaluar më shumë kohë me familjen, fëmijët, të afërmit e fqinjët, për të përcjellë tek gjithsecilin mirësitë që jep Allahu i Madhërishëm.

Me rastin e festës së Kurban Bajramit, kryetari i Aleancës për Ardhmërinë e Kosovës, Ramush Haradinaj ka vizituar Bashkësinë Islame të Kosovës (BIK).

Nga aty, Haradinaj ka uruar gjithë qytetarët për festën e Bajramit, me ç’rast tha se do të vazhdojnë të qëndrojnë së bashku si shqiptarë.

“Sot personalisht por edhe me kolegë të Aleancës e kemi nderin të shprehim urimet për festën e Kurban Bajramit. Neve na ka përcjellë sakrifica e edhe porosia e Kurban Bajramit është sakrifica. Ne do vazhdojmë të qëndrojmë bashkë si shqiptarë dhe do festojmë bashkë”, tha Haradinaj.

Në Bashkësinë Islame të Kosovës (BIK) për të uruar Kurban Bajramin, erdhi kryeipeshki i Peshkvisë së Kosovës, Imzot Don Lush Gjergji, raporton Ekonomia Online.

Ai është pritur nga kryetari i BIK-ut, Naim Tërnava.

“Jemi këtu për t’i shprehur myftiut urimet më të përzemërta për këtë festë, të Kurban Bajramit. Flijimi, vuajtja, dhe mësimi janë kapitali ynë. Ne kemi vuajtur, pësuar, mësuar ndër vite. Ne besojmë në Zot, prandaj besojmë edhe në njëri-tjetrin”, u shpreh ai.