Category: Lajme

Edhe një tjetër dëshmitar i mbrojtur i Zyrës së Prokurorit të Specializuar (ZPS), ka nisur dëshminë e tij para trupit gjykues në Hagë, në rastin kundër ish-krerëve të Ushtrisë Çlirimtare të Kosovës (UÇK). Ai po intervistohet nga prokuroria në seancë private, lidhur me periudhën e vitit 1998 kur ai pretendon se është mbajtur e keqtrajtuar nga pjesëtarë të UÇK-së.

Një përmbledhje të dëshmitarit me kodin 4337 e ka lexuar prokuroi James Pace, sipas së cilit, ai ishte marrë nga shtëpia e tij në vitin 1998 dhe ishte mbajtur i ndaluar për rreth një muaj.

Prokurori ka thënë se dëshmitari është shqiptar i Kosovës dhe se në vitin 1998 ishte një bujk.

“Dëshmitari 4337 është shqiptar i Kosovës i cili në vitin 1998 ishte një bujk. Në mes të gushtit e morën nga shtëpia ushtarët e UÇK-së dhe e mbajtën për rreth një muaj të ndaluar. E morën në pyetje anëtarët e UÇK-së. U abuzua verbalisht dhe u kërcënua, u keqtrajtua dhe u rrah disa herë nga pjesëtarë të UÇK-së, gjithashtu vërejti që u rrahën edhe të ndaluar të tjerë dhe ishin në kushte të dobëta. Gjatë kohës që u mbajt në ndalim, dëshmitari 4337 qëndroi në një dhomë pa dyshekë dhe nuk i dhanë ushqim të mjaftueshëm, nuk u trajtua nga pikë[amja mjekësore. Lëndimet që pësoi dëshmitari 4337 për shkak të rrahjes dhe keqtrajtimit kanë ende ndikim në mirëqenien dhe shëndetin e tij”, ka lexuar Pace.

Pyetjet sqaruese për këtë dëshmitar janë zhvilluar në seancë private e cila pastaj ka vazhduar me përmbajtje të redaktuar apo tërësisht e mbyllur për publikun.

Tutje, gjykata ka lëshuar në transmetim publik një pjesë të shkurtë të dëshmisë së këtij dëshmitari.

Prokurori Pace: Ne seancë private ne folëm lidhur me ndalimin tuaj, nuk do e themi vendin se ku, a mund të na thoni nëse gjatë apo pas këtij ndalimi ndonjë pjesëtar i UÇK-së ju dha mundësinë të kundërshtoni faktin që ishit ndaluar?

Dëshmitari: Asnjëherë.

Prokurori Pace: Gjatë ose pas ndalimit, a ju dha ndonjë pjesëtar u UÇK-së ndonjë dokument që pretendonte se kjo ishte baza se pse ju kishin ndaluar juve, që pretendon e ju kishit bërë diçka keq dhe për këtë arsye ju ndaluan?

Dëshmitari: … (Nuk kuptohet përgjigja)

Prokurori Pace: Gjatë ose pas ndalimit tuaj, ndonjë pjesëtar i UÇK-së a ju ka akuzuar konkretisht për ndonjë krim që pretendohej se ishte kryer atëherë?

Dëshmitari: Jo asnjëherë.

Prokuroi Pace: Gjatë ose pas ndalimit tuaj, a ka pasur ndonjë pjesëtar të UÇK-së që ju ka akuzuar për ndonjë krim konkret që pretendohet që keni kryer ju.

Dëshmitari: Askujt nuk i kam pasur borxh asnjëherë.

Pas kësaj seanca ka vijuar me përmbajtje të redaktuar.

Dëshmitari me kodin 4337 pritet të intervistohet rreth tri orë nga prokuroria ndërsa gjashtë të tjera nga ekipet mbrojtëse.

E gjithë dëshmia e tij mund të përfundojë brenda dy ditësh.

Ky është dëshmitari i dymbëdhjetë i ZPS-së në gjykimin kundër Hashim Thaçit, Kadri Veselit, Jakup Krasniqit e Rexhep Selimit.

Gjykimi ka nisur më 3 prill me deklaratat hyrëse të tyre.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës.

Ata ndodhen në qendrën e paraburgimit në Hagë prej nëntorit të vitit 2020./KosovaPress

Shefi i Grupit Parlamentar të Partisë Demokratike të Kosovës, Abelard Tahiri, ka thënë se sot po fillon një e etapë e re e bashkëpunimit të Lëvizjes Vetëvendosje me kriminelin Milan Radojiçiq, i cili është edhe nënkryetar i Listës Serbe.

Tahiri reagoi në Kuvendin e Kosovës, pas publikimit në medie të disa përgjimeve mes shefes së Grupit Parlamentar të LVV-së, Mimoza Kusari-Lila me anëtarin e Listës Serbe, Slavko Simiq.

“I bëjë thirrje Prokurorisë së Shtetit që të ndërmarrë hapa në raport me të gjithë ata njerëz që janë në komunikim me njerëz që janë ndjekje nga Prokuroria e Shtetit dhe listën e zezë të ShBA-së. Sot me gjasë po fillon një etapë e re e bashkëpunimit të Lëvizjes Vetëvendosje me Milan Radojçiq”, tha ai. /KP

Ministri i Mbrojtjes, Armend Mehaj ka shprehur keqardhjen për ushtarin hungarez të KFOR-it, të lënduar nga grupet kriminale serbe gjatë protestave në Zveçan, të cilit për shkak të gjendjes së rënduar shëndetësore iu është dashur që t’i amputohet këmba nga ana e mjekëve të Institutit Kombëtar të Rehabilitimit Mjekësor në Hungari.

Mehaj ka uruar uror që 26 ushtarët tjerë hungarez të plagosur sa më parë të rikuperohen, e të vazhdojnë angazhimin e tyre në kuadër të misionit të KFOR-it.

“Grupet kriminale përgjegjëse për sulmin ndaj pjesëtarëve të KFOR-it duhet të marrin dënimin meritor, ngase dhuna është e papranueshme dhe asnjë formë nuk mund të zmbraps ushtrimin e rendit e ligjit, mjeteve demokratike të pakontestueshme, të drejta e të domosdoshme për sigurinë e vendit dhe të qytetarëve të Republikës së Kosovës”, ka shkruar ai në Facebook.

Mërgimtarë të shumtë kanë zgjedhur rrugën ajrore për të ardhur në Kosovë që t’i kalojnë pushimet.

Në aeroportin “Adem Jashari” kanë ateruar mërgimtarë të shumë, të cilët vijnë në vendlindje me zemrën plotë për t’i kaluar pushimet e tyre.

Ekipi i ATV-së ishte në aeroport për të parë atmosferën e krijuar në aeroport me rastin e ardhjes së shumë mërgimtarëve.

Një i ri me prejardhje nga Prizreni, i cili jeton në Gjermani prej rreth 22 vitesh, thotë se vizitën e parë do ta bëjë tek “qebapat në Prizren”, për të cilët thotë se i kanë munguar shumë.

Ai tregon se në vendlindje do të qëndrojë për katër javë.

Për më shumë, videon e plotë të ATV-së të realizuar në aeroportin e Prishtinës e gjeni në videon më poshtë.

Kuvendi i Kosovës ka miratuar në lexim të parë Projektligjin për pronën e paluajtshme, që mundëson faljen e 100 eurove të tatimit për këtë vit.

Pro këtij projektligji votuan 61 deputetë, ndërsa dy të tjerë abstenuan, ndër ta edhe kryeparlamentari Glauk Konjufca. Ndërkaq, partitë opozitare nuk morën fare pjesë në votim.

Ky projektligj u përcoll me debate të shumta ndërmjet mazhorancës dhe opozitës, të cilët kërkuan që i njëjti mos të miratohet pasi rritë tatimin në pronë./KP

Presidenti turk Recep Tayyip Erdogan tha të hënën se Bashkimi Evropian duhet të hapë rrugën për anëtarësimin e Ankarasë në bllokun evropian, përpara se parlamenti i Turqisë të miratojë aplikimin e Suedisë për t’u bashkuar me aleancën ushtarake të NATO-s.

Duke folur përpara nisjes së tij për samitin e NATO-s në Vilnius të Lituanisë, Erdogan tha se pranimi i Suedisë varet nga zbatimi i një marrëveshjeje të arritur verën e kaluar gjatë samitit të aleancës në Madrid, duke shtuar se askush nuk duhet të presë që Ankaraja të bëjë kompromise.

Liderët e NATO-s do të takohen në Vilnius më 11 dhe 12 korrik për të trajtuar një sërë çështjesh, duke nisur nga ndasitë lidhur me anëtarësimin e mundshëm të Ukrainës dhe pranimin e Suedisë, e deri te rritja e furnizimeve me municion dhe shqyrtimi i planeve të mbrojtjes pas shumë dekadash.

Ky do të jetë samiti i katërt i NATO-s që kur Rusia nisi pushtimin e Ukrainës, pasi samiti i parë ishte mbajtur virtualisht më 25 shkurt 2022, një ditë pasi Rusia nisi luftën. Dy samitet e tjera janë mbajtur në Bruksel dhe Madrid.

Qëndrimi i Turqisë për Suedinë mbetet i njëjtë, duke u shprehur se Stokholmi nuk e ka trajtuar sigurinë e Ankarasë me seriozitet.

Ndër vite, Suedia e ka akuzuar dhe kritikuar Turqinë për abuzim dhe shkelje të të drejtave themelore të njeriut dhe standardeve demokratike të jetesës, gjë që ka irrituar politikanët në Ankara.

Ndërsa, në anën tjetër, Turqia pretendon se Suedia është duke strehuar anëtarë të grupeve që autoritetet turke i konsiderojnë terroriste.

Në këmbim të anëtarësimit të Suedisë në NATO, Qeveria turke ka kërkuar ekstradimin – apo dorëzimin e personave të kërkuar.

Suedia thotë se ka zbatuar marrëveshjen e Madridit – duke përfshirë ligje më të ashpra kundër terrorizmit – dhe se disa nga kërkesat e tjera të Ankarasë janë të pamundura për t’u përmbushur.

Turqia ka hapur negociatat për anëtarësim në Bashkimin Evropian në vitin 1999.

Kryeministri i Republikës së Kosovës, Albin Kurti, vizitoi Ipeshkvinë e Kosovës, ku u mirëprit nga Ipeshkvi i Ipeshkvisë së Kosovës, imzot Dodë Gjergji dhe Don Lush Gjergji.

Në takim ata folën për Ligjin për Liritë Fetare, për bashkëpunimin e ndërsjellë, për kontributin e Kishës Katolike për paqe midis njerëzve dhe bashkim të njerëzve, dhe për nevojën e rregullimit të statusit juridik të Kishës Katolike në Kosovë.

Kryeministri Kurti me këtë rast falënderoi udhëheqësit e Ipeshkvisë së Kosovës për bashkëpunimin e afërt, kontributin e vazhdueshëm, dhe rolin e rëndësishëm të tyre.

Ata gjithashtu biseduan edhe për vizitën e fundit që kryeministri Kurti zhvilloi në Vatikan, ku u prit nga Ati i Shenjtë, Papa Françesku dhe Sekretari i Shtetit të Selisë së Shenjtë, Kardinali Pietro Paroli. Kryeministri ndau me Ipeshkvin, imzot Dodë Gjergji dhe Don Lush Gjergji mbresat e tij nga vizita në Vatikan dhe nga takimi me shenjtërinë e tij, Papa Françesku.

Me 22 qershor, kryeministri Kurti kishte realizuar vizitën e tij të parë zyrtare në Vatikan. Në takimin me shenjtërinë e tij, Papa Françeskun, kryeministri Kurti kishte biseduar për rininë dhe ardhmërinë, për figurën, veprën dhe trashëgiminë e Nënës Terezë, për Letnicën e Vitisë ku asaj i erdhi thirrja për devocion, dhe për bashkëjetesën multi-fetare në Kosovë, si dhe e kishte ftuar atë që ta vizitojë Kosovën.

Ministri i Financave, Hekuran Murati tha se me Projektligjin për Tatimin në pronë synohet të reduktohet çmimi i banesave.

Ai tha se përveç faljes së vlerës deri në 100 euro për tatimin në pronë për vitin 2023, Projektligji për Tatimin në pronë parasheh uljen e çmimit të banesave nga viti 2025 përmes aplikimit të taksës progresive.

Murati tha se është e rëndësishme që projektligji të votohet sot, para muajit shtator kur obligohet kryerja e pagesave nga tatimpaguesit. Murati tha se Qeveria e Kosovës synon që ndërtimtarët të cilët i mbajnë banesat pa i shitur, t’i lirojnë ato në treg.

“Me këtë projektligj, çfarë kemi propozuar është që për vitin aktual të zvogëlohet barra e tatimpaguesve për secilin deri në 100 euro. Kjo pra prek 95 për qind të qytetarëve”, tha ai.

“Çështja e dytë ka të bëjë me periudhën kalimtare për vitin e ardhshëm ku pragu prej 0.15 për qind ulet në 0.10 për qind për të gjithë. Dhe, për vitin 2025 e tutje, është propozu që të ketë tatim progresiv, pra të përshkallëzuar, e ku me lirimet e përshkuara për pronën primare duhet të arrihet vlera prej 275 mijë euro e pronës, në mënyrë që të fillojë të paguhet më shumë. Pra kushdo që është nën 275 mijë të vlerës së pronës, i bie të paguajë më pak”, u shpreh ministri Murati.

“Ky është pra synimi. Deri më tani çka ka ndodhë është që, sikur dikush që e ka pasur një banim primar, sikur dikush që i ka pasur 20 banesa si ndërtimtar e i ka mbajtur pa shitur – në mënyrë që të ndikojë në mungesë të ofertës dhe kësisoj ta mbajë çmimin e lartë – kanë paguar njësoj tatim. Këtë po tentojmë ta ndryshojmë. Në momentin që atij që i mban 20 banesa pa shitë, sepse do ta bllokojë tregun, i bëhet më shtrenjtë patjetër atëherë do t’i lëshoj ato në treg dhe kësisoj ndikon edhe në reduktimin e çmimit. Është pozitive për ata që kanë nevojë të blejnë banesa. Pra, do të mundësohet të ketë banim më tëpërballueshëm edhe për ta, sepse do të ketë ofertë më të madhe në treg sepse do të bëhet më shtrenjtë për t’i blloku stokun e banesave të pashitura”.

Kryeministri holandez, Mark Rutte nuk do të kandidojë më për një mandat të pestë. Rutte ka marrë vendimin për t’u larguar nga politika pas zgjedhjeve të nëntorit.

Ai dha dorëheqjen pasi nuk u arrit një marrëveshje për politikat për krizën e emigrantëve.

“Ditët e fundit ka pasur shumë spekulime. Dje në mëngjes mora vendim që nuk do të jem më kryetar i VVD-së. Sapo të formohet kabineti i ri pas zgjedhjeve do të largohem nga politika.

Vendimi i Rutte do të shënojë fundin e mandatit të tij si kreu i qeverisë më jetëgjatë në historinë holandeze. Ai mori postin e kryeministrit në tetor 2010.

Rutte, 56 vjeç, do të qëndrojë si kryeministër i përkohshëm derisa të formohet një qeveri e re pas zgjedhjeve të ardhshme, një proces që mund të zgjasë muaj duke pasur parasysh situatën politike të tensionuar të Holandës.