Category: Lajme

Nacionale ka publikuar pjesën e dytë të përgjimeve që ka bërë shefja e deputetëve të VV-së, Mimoza Kusari-Lila me deputetin serb, Slavko Simiq.

Në këto përgjime, Simiq i thotë Kusari-Lilës se ka folur pesë herë me Radojiçiqin. Aty, Kusari-Lila nuk ndërhyn, edhe pse mbrëmë në Dukagjini thoshte se është takuar vetëm një herë.

Kur Simiq po e lavdëronte Milan Radojiçiqin, të dyshuarin për vrasjen e Ivanoviqit, Kusari-Lila e pyet pse e kanë vënë në listën e zezë. Madje e orienton ta diskutojnë këtë temë me ambasadorin amerikan.

Pra, nuk ia përmend veprimtaritë kriminale të Radojiçiqit.

Biseda:
Kusari-Lila: E pse e kanë vënë në listën e zezë të Amerikës.

Simiq: E pse e kanë vënë?

Kusari-Lila: Vallë jo për shkak të Kurtit.

Simiq: Janë disa raste të mëhershme.

Kusari-Lila: Për shkak të Zvonko Veselinoviqit.

Simiq: Janë njerëz biznesmenë dhe familjarë, janë të respektuar se kanë asnjë njollë.

Kusari-Lila: E di Sllavko, por nuk janë të pastër për amerikanët.

Kusari-Lila: E di që keni takime me ambasadorin amerikan pse nuk e pyesni

18 mjekë specialistë të Klinikës së Kardiologjisë, i kanë dorëzuar peticion drejtorit të Shërbimit Spitalor dhe Klinik Universitar të Kosovës, Elvir Azizi, shkarkimin e drejtorit të Kardiologjisë, Lulzim Kamberi, raporton EO.

Peticioni i drejtohet drejtorit Elvir Azizi, kryesuesit të Bordit Naim Bardiqi dhe ministrit të Shëndetësisë, Arben Vitia

Në këtë peticion kanë hedhur firmat e tyre 18 mjekë të kësaj klinike, të cilët po kërkojnë shkarkimin e menjëhershëm të Kamberit nga detyra e drejtorit për disa arsye.

Në kërkesën që e ka siguruar Ekonomia Online, specifikohen arsyet e kërkesës për dorëheqje si; parregullsi menaxheriale, diskriminim e abuzim duke keqpërdorur pozitën të cilën e ka.

Në letrën e nënshkruar nga 18 kardiologë, përmendet edhe sulmi fizik nga doktor Artan Ahmeti ndaj kolegut të tij, Fisnik Veliu.

I pari sipas tyre është ngritur në pozitë dy javë pas aktit të dhunshëm, përkundër se ndaj tij ishte ngritur procedure e veprës penale

“Më këtë ju njoftojmë zyrtarisht se ne Kardiologët e shërbimit invaziv, elektrostimulimit dhe të reparteve të Klinikës së Kardiologjisë dënojme ashpër sulmin fizik të ndodhur më datën 31.05.2023,në prezenc të kolegëve Kardiolog dhe familjarëve të pacientit, nga Dr.Artan Ahmeti – Kardiolog në cilësi të Zv. Drejtorit të Klinikës se Kardiologjisë, njëherit Kryetar i komisionit për ankesa në SH.S.K.U.K si dhe asistent pran Fakultetit të Mjekësisë në katedren e internos, kryen sulm fizik ndaj Kolegut Dr.Fisnik Veliu – Kardiolog i shërbimit invaziv”.

“Aktualisht i paraqituri në komision disiciplinor nga Drejtori i Klinikës së Kardiologjisë Dr.Lulzim Kamberi i cili të lartcekurin e ngrit në pozitë dy javë pas aktit të dhunshëm, përkundër se ndaj tij ishte ngritur procedure e veprës penale, sulm fizik në vendin e punës, pran organeve përgjegjëse të drejtësisë, rast ky i njohur për opinionin publik përmes mediave elektronike”, thuhet në letrën e nënshkruar nga mjekët.

Sipas tyre, Kamberi në cilësinë e drejtorit të Klinikës, ushtron presion e dhunë psikike me qëllim të manipulimit të deklaratave të dëshmitarëve për rastin e rrahjes.

“Drejtori i Klinikës se Kardiologjisë Dr.Lulzim Kamberi dhe shefat gjatë kësaj kohe ushtrojnë presion dhe dhune psikike më qellim të manipulimit të deklaratave të dëshmitarëve okular nga stafi i lartë, mesëm dhe specializanteve për të relativizuar peshën e aktit të dhunës dhe shpalljen e dhunuesit si të pafajshem në këtë rast. Shkarkimi ose dorëheqja e Drejtorit të Klinikës se Kardiologjisë Dr.Lulzim Kamberi për anshmërinë e dëshmuar ndaj një numri të vogël të stafit të lartë shefave, në këtë rast si dhe shumë raste të tjera, duke mbrojtur haptas aktin e dhunës fizike, paraqet akt të lartë moral dhe ligjor”, thuhet ndër të tjerash në këtë letër.

Presidentja e Republikës së Kosovës, Vjosa Osmani, në Ditën e Përkujtimit për Gjenocidin e Srebrenicës, ka pritur në takim deputetin e Dhomës së Përfaqësuesve të Bosnje dhe Hercegovinës, Semsudin Mehmedoviq, si dhe një delegacion të përfaqësuesve të komunitetit boshnjak në Kosovë, përfshirë zëvendëskryeministren Emilija Redzepi dhe deputetë të Kuvendit të Republikës.

Në takim, Presidentja Osmani ka potencuar se vuajtjet e popullit boshnjak në këtë ditë të trishtë ndahen edhe nga populli i Kosovës, duke theksuar se gjenocidi në Srebrenicë është simbol i tmerrit të krimeve gjenocidale serbe. Presidentja ka thënë se kujtimi për ta është i çdoditshëm, ndërsa ka folur edhe për krimet makabre dhe masakrat e regjimit gjenocidal serb kundër popullit të Kosovës.

Presidentja ka përsëritur dënimin e fuqishëm kundër çdo përpjekjeje për të mohuar gjenocidin e Srebrenicës, sepse ky mohim ka për qëllim denigrimin e viktimave dhe fshehjen e motiveve të krimeve të kryera.

Sipas komunikatës së Presidencës, në diskutim me deputetin Mehmedoviq, Presidentja Osmani ka thënë se koordinimi i përbashkët është tejet i rëndësishëm në këtë periudhë kur tendencat për destabilizim dhe minim të paqes janë në rritje, prandaj në këtë drejtim, ka vlerësuar edhe kontributin e jashtëzakonshëm të komunitetit boshnjak në Kosovë si urë ndërlidhëse e këtij koordinimi.

Gjatë takimit, deputeti Mehmedović falënderoi Presidenten Osmani për përkrahjen e vazhdueshme, si dhe për rolin e saj në miratimin e Rezolutës së Kuvendit të Republikës për Gjenocidin në Srebrenicë.

– Gjenocidi i Srebrenicës

Më shumë se 8,000 burra dhe djemë boshnjakë u vranë kur forcat serbe të Bosnjës sulmuan qytetin lindor të Srebrenicës në korrik të vitit 1995, pavarësisht nga prania e trupave paqeruajtëse holandeze.

Forcat serbe po përpiqeshin të merrnin territorin nga boshnjakë dhe kroatët për të formuar një shtet.

Këshilli i Sigurimit i OKB-së e kishte shpallur Srebrenicën një “zonë të sigurt” në pranverën e vitit 1993. Megjithatë, trupat e udhëhequr nga gjenerali Ratko Mlladiq, i cili më vonë u shpall fajtor për krime lufte, krime kundër njerëzimit dhe gjenocid, pushtuan zonën e OKB-së.

Trupat holandeze nuk arritën të vepronin, ndërsa forcat serbe pushtuan zonën, duke vrarë rreth 2,000 burra dhe djem vetëm më 11 korrik.

Rreth 15,000 banorë të Srebrenicës u larguan në malet përreth, por trupat serbe gjuajtën dhe vranë 6,000 njerëz të tjerë.

Trupat e viktimave janë gjetur në 570 vende në të gjithë vendin.

Në vitin 2007, Gjykata Ndërkombëtare e Drejtësisë në Hagë vendosi se në Srebrenicë ishte kryer gjenocid.

Më 8 qershor 2021, gjyqtarët e gjykatës së OKB-së lanë në fuqi në një gjykim të shkallës së dytë një vendim që dënonte Mlladiqin me burgim të përjetshëm për gjenocid, persekutim, krime kundër njerëzimit, shfarosje dhe krime të tjera lufte në Bosnje e Hercegovinë.

Ministria e Infrastrukturës njofton se nga nesër (e mërkurë) 12 deri më 14 korrik 2023, do të zhvillohen punimet për asfaltimin e zgjerimit të rrugës “Brahim Ademi dhe Driton Islami” deri te Parku i Lirisë në Ferizaj.

Sipas Ministrisë, për shkak të zhvillimit të këtyre punimeve, do të bëhet ndërprerja e përkohshme e qarkullimit të automjeteve në këto rrugë, duke filluar nga ora 8.00- 17.00.

“Kërkojmë nga qytetarët që gjatë këtyre ditëve të shfrytëzojnë rrugët tjera, për të qarkulluar”, thuhet në njoftim.

Në muajin prill 2023, ka shënuar rënie indeksi i vëllimit të industrisë nxjerrëse në minierat dhe guroret me 0,7%, industria përpunuese 0,1%); si dhe te furnizimi me rrymë, gaz, avull dhe ajër të kondicionuar me 0,1%, krahasuar me muajin e njëjtë të vitit paraprak (Prill 2022).

Në këtë industri ka shënuar rënie edhe numri i të punësuarve.

Ndërkaq, në muajin prill të vitit 2023, indeksi i vëllimit të industrisë kishte rritje në sektorin e furnizimit me ujë, veprimtaritë e menaxhimit dhe trajtimit të mbeturinave me 0,3%.

Sa i përket numri të të punësuarve në këtë sektor, ulje kishte në sektorin e industrisë nxjerrëse minierat dhe guroret për 0.1%, krahasuar me muajin e njëjtë të vitit paraprak prill 2022.

“Në muajin prill 2023, indeksi i numrit të të punësuarve ishte: Furnizimi me ujë, veprimtari të menaxhimit dhe trajtimit të mbeturinave (0,0%); Industria përpunuese (0,0%); si dhe Furnizimi me rrymë, gaz, avull dhe ajër të kondicionuar (0,0%). Ndërsa, ulje kishte në sektorin e industrisë nxjerrëse (minierat dhe guroret) për (-0.1%), krahasuar me muajin e njëjtë të vitit paraprak (Prill 2022)”, thuhet në raportin e Agjencisë së Statistikave të Kosovës për Statistikat Afatshkurtra të Industrisë për muajin prill 2023.

Ambasadori britanik në Kosovë, Nicholas Abbott, sot ka vizituar komandantin e KFOR-it Angelo Michele Ristuccia.

Për këtë takim ka njoftuar KFOR në Twitter, duke thënë se temë e diskutimit ishte situata e sigurisë.

“Ambasadori i Mbretërisë së Bashkuar në Kosovë, Shkëlqesia e Tij Nicholas Abbott, erdhi për vizitë te Komandanti i KFOR-it, Major Gjeneral Ristuccia, në kampin Film City në Prishtinë dhe diskutuan rreth situatës së përgjithshme të sigurisë në vend”.

 

Lidhja Demokratike e Kosovës (LDK) ka kërkuar zgjedhje të reja në katër komunat në veri të vendit, dhe hartimin e një ekipi profesionistësh, për të ndërtuar draft statusin e ardhshëm të Asocacionit të Komunave me shumice serbe në Kosovë.

Kryetari i Lidhjes Demokratike të Kosovës, Lumir Abdixhiku pas takimit të dytë që kishte me shoqërinë civile dhe OJQ-të, për të diskutuar për gjendjen politike në vend, me theks të veçantë relacionet e Kosovës me aleatët, ka theksuar se kishte mbështetjeje të shoqërisë civile për propozimet që vendi të dal sa më shpejtë nga kjo gjendje e rënduar.

Abdixhiku tha se gjatë takimit kanë prezantuar shtatë pika për të cilën vendi mund të arrijë përpara. Sipas tij, pozicioni i Kosovës ndërkombëtarisht është i dëmtuar, jo vetëm për shkak të politikave të gabuara të kryeministrit Kurti me aleatë, por siç tha ai, edhe paaftësisë të jashtëzakonshme të Ministrisë së Punëve të Jashtme.

“Mbi 20 organizata të shoqërisë civile i janë përgjigjur pozitivisht ftesës sonë dhe në takimin që zgjati pothuajse 3 orë folëm hapur për gjendjen e tanishme politike në vend dhe mbi të gjitha për rrugën që duhet dalë përpara. Jam jashtëzakonisht i lumtur, jo vetëm për pjesëmarrjen e organizatave të shoqërisë civile, por edhe për mendimet e hapura përmbajëtsore dhe thelbësore në atë që po shtrojmë tani. Për LDK gjendja e tanishme kërkon shtensionim, kërkon zgjedhje të reja sa më parë të jetë e mundshme në veri të vendit, me qëllim të kthimit të legjitimitetit tek institucionet lokale në katër komunat veriore, dhe zgjedhjet e reja duhet të organizohen nëpërmjet marrëveshjes politike mes VV-së, PDK-së dhe katër kryetareve aktual atje për dorëheqjen e tyre dhe shkuarjen e zgjedhjeve brenda periudhës 45 ditore. Pozicioni i Kosovës ndërkombëtarisht është i dëmtuar, jo vetëm për shkak të politikave të gabuara, të paprecedente të kryeministrit Kurti dhe Qeverisë së Kosovës me aleatët tanë por edhe paaftësisë të jashtëzakonshme të Ministrisë së Punëve të Jashtme”, ka theksuaar Abdixhiku.

Kreu i LDK-së, Abdixhiku tha se Kosova duhet të ndërtojë ekipe profesionistësh që të dërgojë në çdo kryeqendër evropiane për të kërkuar jo vetëm heqjen e dënimeve, por edhe për ta parashtruar hapat e ardhshëm të vendit. Për këtë, Abdixhiku tha se kishte pajtueshmëri të plotë pothuajse me të gjithë për gjendjen alarmante që ka Kosova.

“Kosova duhet të ndërtojë ekipe profesionistësh, diplomatësh me përvojë që të dërgojë në çdo kryeqendër evropiane dhe botërore, në ato kryesoret, për të kërkuar jo vetëm heqjen e dënimeve, masave sanksionuese ndaj Republikës së Kosovës, por edhe për ta parashtruar hapat e ardhshëm të vendit. Po ashtu, prezantuam idenë që Kosova do të ndërtojë një ekip profesionistësh, ekspertesh të rendit kushtetues, drejtës juridike, arsimit, kulturës e zhvillimeve ekonomike për të ndërtuar draft statusin e ardhshëm të Asosacionit të komunave me shumicë serbe në Kosovë. Po ashtu, kemi prezantuar edhe planin tonë për kërkesa të drejtpërdrejta mbi obligimet që Serbia duhet t’i ketë ndaj Kosovës në marrëveshjet e arritura deri më tani. Dhe ka një pajtueshmëri të plotë me pothuajse të gjithë për gjendje alarmante që ka Kosova”, tha Abdixhiku.

Mes tjerash, Abdixhiku derisa tha se morën mbështetje për propozime nga shoqëritë civile, u shpreh se nuk sheh rrugë përpara me këtë qeveri.

“Tani shoqëria civile, organizata të shoqërisë civile, por edhe nga java e kaluar në takimin që patëm dhanë mbështetjen në këtë propozim, si ide që mund të ofrojë fillimisht shtensionimin dhe më pas zgjedhjen afatgjate të Kosovës, por në thelb të këtij angazhimi është vullneti i mirë, i institucioneve të vendit që të ecin drejt integrimit euroatlantik….Unë nuk shohë rrugë përpara me këtë qeveri prandaj rruga jonë nuk ka të bëjë me bashkëpunim me këto institucione që i kanë sjellë vendit edhe tension edhe përplasje dhe nuk janë të aftë të dalin prej kësaj rruge, unë po flasë për një rrugë të tret i cili kryeministri i Kosovës nuk ka vend”, tha Abdixhiku.

Sipas tij, Kosova duhet të marrë autorësinë mbi draftin, duke shtuar se kjo ka qenë kërkesë e vazhdueshme e institucioneve ndërkombëtare.

Ai shtoi se duhet të krijohet një version i qartë që Kosova është vend i paqes dhe stabilitetit, sidomos në veri të vendit.

“Kosova duhet të marrë autorësinë mbi draftin dhe kjo ka qenë kërkesë e vazhdueshme e institucioneve ndërkombëtare. Pra, tash e një vit të gjitha institucionet ndërkombëtare në veçanti SHBA-të, kanë kërkuar që Kosova, institucionet e vendit të marrin autorësinë, në mënyrë që kjo autorësi të mos i vihet një pale tjetër. Pra, nuk është e vërtetë se nga ne nuk pritet një gjë e tillë, përkundrazi kërkohet nga ne dhe jo vetëm kaq, Kosovës i garantohet që kjo pritje nuk ka të bëjë me rrenim kushtetues ose me dalje prej Kornizës Kushtetuese. Ne duhet të ndihemi me veten më të sigurtë por edhe duhet të shtrojmë një version të qartë se Kosova është një vend i paqes, stabilitetit, jo vetëm në vend, por sidomos në veri të vendit dhe në rajon”, tha mes tjerash Abdixhiku.

Komisioni për Ekonomi, Industri, Ndërmarrësi dhe Tregti, me 6 vota pro i ka rekomanduar Kuvendit të Kosovës shkarkimin e Bordit të Komisionit të Pavarur për Miniera dhe Minerale (KPMM).

Komisioni me iniciativë të deputetit të Vetëvendosje, Armend Muja ka rekomanduar shkarkimin e Selvete Grajqevci – Pllana kryesuese e Bordit, Gani Maliqi, Gani Kastrati dhe Rozeta Pushkolli Makoll anëtarë.

Ndërsa, një ditë më parë anëtari i pestë i Bordit të KPMM-së, Jahir Gashi ka dhënë dorëheqje, raporton KosovaPress.

Fillimisht kryetari i Komisionit parlamentar për Ekonomi, Ferat Shala, ka kërkuar nga anëtarët e këtij komisioni që të tërheqin kërkesën për shkarkimin e Bordit të KPMM-së.

Për shkarkimin e bordit të KPMM-së, kanë votuar deputetët, Mimoza Kusari – Lila, Jeta Statovci, Amend Muja, Gramos Agusholli, Fidan Jilta dhe Driton Hyseni.

Por, në votim nuk morën pjesë kryetari i Komisionit nga radhët e PDK-së, Ferat Shala dhe anëtari i Komisionit nga AAK, Pal Lekaj.

Gjatë shqyrtimit të kërkesës për shkarkimin e Bordit të Komisionit të Pavarur për Miniera dhe Minerale (KPMM), deputeti i Vetëvendosjes Armend Muja me ton të lartë ka qortuar kryesuesen e Bordit të KPMM-së, Selevete Grajqevci – Pllana për faljen, siç thotë ai, të rentës minerare në vlerë prej mbi 9 milionë euro kompanisë “Ferronikel”.

Ish-komandanti i Zonës Operative të Llapit, Rrustem Mustafa, ka filluar dëshminë para Gjykatës Speciale, në rastin ndaj ish-krerëve të Ushtrisë Çlirimtare të Kosovës. Edhe pse Zyra e Prokurorit të Specializuar insistoi që deklaratën e tij ta paraqesë vetëm me shkrim, trupi gjykues e rrëzoi kërkesën e tyre dhe e solli atë në gjykatore.

Në seancën e pasdites, prokuroria ka filluar intervistimin e tij me pyetjet për të dhënat personale të Mustafës ku ndër të tjera ai ka pohuar se është i njohur si “Remi” dhe se ka qenë ushtar i UÇK-së dhe komandant i Zonës Operative të Llapit.

Ai ka konfirmuar se ka dhënë deklarata për procesin gjyqësor qe ka qenë kundër tij gjatë kohës së UNMIK-ut dhe EULEX-it, si dhe deklaratat e dhëna tri vjet më para Gjykatës Speciale.

Prokurorja Clarie Lawson ka shfaqur një dokument sipas saj me udhëzime që tregon se si duhet të ndërveprohet me gazetarët, vëzhguesit e diplomatët.

Lidhur me këtë, Mustafa ka thënë se ata të Zonës Operative të Llapit i ka caktuar ai vet dhe jo shtabi i përgjithshëm.

Lawson: Është një dokument që jep udhëzime tregon si duhet të ndërveprohet me gazetarët, me vëzhguesit, me diplomatet. A ju kujtohet që u janë dhënë udhëzime nga shtabi i përgjithshëm lidhur me këto çështje?

Mustafa: Unë e di që është diskutuar brenda radhëve të UÇK-së mirësjellja me vëzhgues, me gazetarë, por dokumenti si dokument nuk po më kujtohet tani.

Lawson: Nëse e shohim paragrafin e dytë të këtij dokumenti që ka të bëjë me vëzhguesit, pra thuhet që shtabi i përgjithshëm ka caktuar personin i cili është i ngarkuar për informim të ndërsjellë me vëzhguesit dhe se ka caktim i këtij personi do të njoftohet me shkresë të veçantë, a ka ndodhur kjo gjë?

Mustafa: As sot nuk e di kush ka qenë.

Lawson: Nuk ju kujtohet apo nuk e dini kush ka qenë personi i ngarkuar në zonën operative të Llapit për të mbajtur marrëdhënie me vëzhguesit.

Mustafa: Për zonën operative të Llapit e kam caktuar unë, nuk e ka caktuar shtabi i përgjithshëm.

Lawson: Kush ishte ky person?

Mustafa: Kam pasur nga zyra për informim publik tre ose katër persona.

Lawson: A mund të na thoni si quheshin këta persona?

Mustafa: Ismet Cakiqi, Lirak Celaj, Hysen Fazliu, dhe eprorë të lartë të zonës në përgjithësi, shefi i shtabit, zëvendësi im dhe komandant të brigadave.

Pas kësaj, prokurorja ka shfaqur një tjetër dokument të datës 19 nëntor 1998.

Mustafa: UÇK shtrirja e saj në teren dhe raporti me vëzhguesit e OSBE-së.

Lawson: A e shihni aty që Fatmir Humolli është përcaktuar si ndërlidhës për zonën e Llapit. A Ju kujtohet që është bërë ky caktim?

Mustafa: Më duket është gabim.

Lawson: Ju nuk e dini që ai ka pasur një rol për të luajtur në lidhje me OSBE-në

Mustafa: Është emri më sa paku është marrë me këtë çështje. Mund të jetë caktuar por unë nuk e paskam ditë këtë gjë.

Pas kësaj seanca është ndërprerë për shkak të pauzës së drejtës dhe pritet të vazhdojë pas orës 15:00 me dëshminë e Rrustem Mustafës.

Ai pritet të intervistohet për rreth 36 orë, prej tyre 12 nga prokuroria, 23 nga mbrojtja e të akuzuarve dhe një orë nga avokati i viktimave.

Gjykimi kundër Hashim Thaçit, Kadri Veselit, Jakup Krasniqit e Rexhep Selimit, ka nisur më 3 prill me deklaratat hyrëse të tyre.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës.

Ata ndodhen në qendrën e paraburgimit në Hagë prej nëntorit të vitit 2020./KP