Ministrja e Drejtësisë Albulena Haxhiu, ka dalë në mbrojtje të Shefen e Grupit Parlamentar të LVV-së Mimoza Kusari-Lila, ku kësaj të fundit iu publikuan përgjimet në një bisedë me ish-shefin e GP-së Slavko Simiq.
Haxhiu ka thënë se Kusari-Lila nuk i është bindur asnjë urdhri të Listës Serbe.
“Zonja Kusari-Lila e sqaruar edhe mbrëmë tendencën për të shpërfaqur të deformuar dhe duhet ta kuptoni që Lista Serbe është një parti politike që përfaqëson komunitetin serbë në Kosovë por në mënyrën më të keqe. Lista Serbe që është themeluar nga partitë opozitare, në vend që të punonte për interesat serbe merret me Vuçiqin.
Haxhiu mes tjerash ka thënë se arsyeja e vetme e publikimit të përgjimeve, janë publikuar për të vetmen arsye për ta shantazhuar Kusari-Lila.
“Ato që janë publikuar janë publikuar për një arsye të vetme, sepse Lista Serbe nuk ka mundur ti bëjë presion dhe as ta shantazojë shefen e GP-së Mimoza Kusari-Lila. Prej kohës kur eshtë bërë ky përgjim kemi një sërë veprimesh që konfirmojnë sundimin e ligjit në veri të Kosovës”.
Ish-presidenti i Shqipërisë, Ilir Meta, përmes një postimi në facebook, ka mbështetur apelin e presidentes së KE-së, Ursula von der Leyen, për zbatimin e plotë dhe të pakushtëzuar të marrëveshjeve mes Kosovës dhe Serbisë.
Ai ka thënë se është e rëndësishme që Serbia të heqë dorë nga veprimet nxitëse të dhunës dhe ashtu siç Kosova e ka shprehur vullnetin konstruktiv, që tu përmbahet zotimeve të saj përpara BE-së dhe të zbatojë marrëveshjet e dakorduara.
“E mbështes thirrjen e sinqertë të Kryetares së Komisionit Europian, Ursula von der Leyen për nevojën jetike të rikthimit tek dialogu Kosovë-Serbi dhe zbatimit të plotë, të drejtë dhe të pakushtëzuar të marrëveshjeve të negociuara përmes BE dhe SHBA, si rruga e vetme për normalizimin përfundimtar të situatës dhe të marrëdhënieve mes dy shteteve. Është shumë e rëndësishme që Serbia të heqë dorë nga veprimet nxitëse të dhunës dhe ashtu siç Kosova e ka shprehur vullnetin konstruktiv, t’i përmbahet zotimeve të saj përpara BE-së dhe të zbatojë marrëveshjet e dakorduara”, ka shkruar Meta.
Kuvendi Komunal i Rahovecit shkarkoi kryesuesin, Defrim Kafexhiun, i cili vjen nga Lëvizja Vetëvendosje në komunën që udhëhiqet nga kryetari Smajl Latifi i Aleancës për Ardhmërinë e Kosovës (AAK). Nga 27 anëtarë prezentë në këtë seancë të jashtëzakonshme, 16 votuan pro shkarkimit të Kafexhiut, dhjetë ishin kundër ndërsa një abstenoi.
Në fjalën e tij para votimit, Kafexhiu deklaroi se nuk ka arsye për ta shkarkuar atë përpos që Latifi kërkon të jetë, edhe kryetar Komune, edhe kryesues i Kuvendit Komunal.
AAK, që fitoi 12 mandatë në zgjedhjet lokale të vitit 2021 në Asamble, arriti të mbledh rreth vetes për këtë mocion edhe katër asamblistë të tjerë për të formuar shumicën prej 16 votash. Këta që iu bashkuan AAK-së, Kafexhiu i akuzoi se e bënë për interesa personale.
Kafexhiu pati akuza të rënda ndaj Latifit duke thënë se kërkon një kryesues të Kuvendit që e dëgjon atë se si duhet të sillet në seanca.
“Kryetari është i zgjedhur me shumicën e votave dhe i dal prej zgjedhjeve të rregullta, ama kryetari po do me votat e veta të udhëheq edhe Kuvendin. Duhet të mësoj dallimin. Duhet të mësoj rëndësinë e Kuvendit, Duhet të mësojë rëndësinë e të zgjedhurve të tjerë, sepse ne nuk jemi emëruar prej tij sepse qytetarët votuan edhe për Kuvendin, andaj duhet respektuar. E di që arsyeja për shkarkim është vetëm forma e qeverisjes së kryetarit, nuk po do me pas një organ institucional që ai të mos e diktojë, ai do një kryesues që e dëgjon kujt e tek me ia dhënë fjalën, kur t’i nxjerrë pikat në votim, e kur me mbyll seancën. Ai do me qenë edhe kryetar Komune dhe kryesues i Kuvendit, kjo është e pa tolerueshme”, deklaroi Kafexhiu.
Nismëtarja e këtij mocioni, AAK, në arsyetimin e saj tha se Kuvendi mund të funksionojë më mirë me një kryesues tjetër, por kundër kësaj u shprehën LVV dhe LDK.
Shefi i asamblistëve të AAK-së, Hasan Përboqi, në fjalën e tij tha se nuk kanë asgjë personale me Kafexhiun, por është një proces demokratik dhe po bëjnë veprimin e nevojshëm në interes të zbatimit më të mirë të programit politik me të cilën i kanë fituar zgjedhjet më 2021.
“Për të pasur funksionim edhe më të mirë, për të ndërtuar marrëdhënie edhe më të qëndrueshme dhe më të shëndetshme e më funksionale që mundëson zbatimin edhe më efikas të programit qeverisës të fituesit të zgjedhjeve lokale të vitit 2021, në këtë frymë për të vënë në shërbim të rrethanave për të jetësuar sa më mirë programin qeveris i cili u dedikohet qytetarëve tanë kemi ardhur në përfundim se kjo përpjekje është për të mundësuar një zhvillim normal politik i cili rrit edhe më shumë përkushtimin e rolit të Kuvendit”, deklaroi Përboqi.
Në anën tjetër, shefi i asamblistëve të Lëvizjes Vetëvendosje, Leonard Morina, deklaroi se pozita në Rahovec po tregon mosdurim ndaj vlerave profesionale e intelektuale që i zotëron Defrim Kafexhiu.
“Para dy vitesh keni filluar procesin e shkarkimit të kryesuesit, për arse të vetme se ai nuk është nga radhët e AAK-së, duke joshur asamblistë nga subjekte të tjera nëpërmjet favoreve të ndryshme që t’ju bashkëngjiten juve si sasi por jo edhe si cilësi. Kërkoj nga delegatët nënshkrues të kërkesës të këtij mocioni të tregojnë se në cilat raste e ka shkelur rregulloren kryesuesi… Kjo është një mënyrë klasike për të kontrolluar gjithçka, për të sunduar dhe kontrolluar edhe Kuvendin, si organ më i lartë në nivel lokal”, tha Morina.
Edhe Lidhja Demokratike e Kosovës (LDK) është shprehur kundër shkarkimit, duke thënë se po bëhet për të kënaqur kryetarin Smajl Latifi.
“Është për keqardhje kur në arsyetim nuk ka asnjë vërejtje por o duhet të thirret mocion. Mocioni ka një arsyetim, ka një bazë dhe ka një qëllim të përmirësimit përmes një ndryshimi. Nuk po shoh që ka qëllim përmirësimi përmes një ndryshimi por ka qëllime të kënaqjes së kryetarit që kur të thotë ndale seancën me pas një kryesues që e ndal seancën, lëshojë seancën ta lëshojë seancën.. Nuk ka të bëjë me ecurinë e Asamblesë komunale, nuk ka të bëjë me mos punë për Asamble komune, ose të shkeljes së demokracisë”, tha Burim Krasniqi, shef i asamblistëve të LDK-së.
Kuvendi Komunal i Rahovecit pritet të mblidhet gjatë ditës për të zgjedhur kryesuesin e ri.
Prokuroria Themelore në Prizren ka informuar sot se ka ngritur aktakuzë kundër një personi, me inicialet D.G., i cili gjendet në paraburgim për shkak të dyshimit se ka kryer veprën “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” si dhe ndaj një të pandehurës A.M., për shkak të dyshimit se ka kryer veprën penale “Dhënia e ndihmës kryesve pas kryerjes së veprave penale”.
“Sipas aktakuzës, i pandehuri D.G., me datë 04.05.2023 rreth orës 17:30 min në lagjen Arbana të Prizrenit, në hyrje – dalje të autostradës Prizren – veri, pa autorizim dhe me qëllim të shpërndarjes dhe shitjes, posedon substanca të cilat janë shpallur me ligj si narkotikë dhe atë të llojit “marihuanë”, mirëpo të njëjtat nuk arrin t’i shesë pasi që ndërhynë policia, në atë mënyrë që i pandehuri pasi siguron narkotikun në një vend të panjohur afër qytetit të Pejës, me veturën e tij personale “BMW” të cilën po e drejtonte e pandehura A.M., sapo arrijnë afër pompës së derivateve, ndalen nga patrulla policore, mirëpo gjatë parkimit drejtuesja e automjetit niset me vrull duke vazhduar në drejtim të lagjes “Arbana” me shpejtësi të madhe, edhe pse e ndjekur pas nga patrulla policore, e njëjta kryen vozitje të rrezikshme ku gjatë kyçjes në rrugën “Skender Latifi” godet ulëset së bashku me tavolinat e një lokali që ndodhej aty, dhe më pas vazhdon deri në kryqëzimin e rrugës “Ismail Qemali” ku vetura pëson dëme duke i plasur goma e parë djathtas, në ato momente nga dera e pasme del i pandehuri D.G., hap bagazhin nga ku merr një thes dhe vazhdon të ikë duke kaluar pengesa e mure të shtëpive, derisa zyrtarët policorë arrijnë ta kapin brenda një oborri ku edhe i vendosin prangat dhe sekuestrojnë nga i njëjti një thes ngjyrë kafe në të cilin kishte dy qese plastike me substancë të dyshuar për narkotikë, e gjithë kjo sasi narkotiku në peshë të përgjithshme prej 2 kg 180.74 gram, e cila pas ekzaminimit dhe ekspertimit nga Laboratori i Agjencisë Kosovare për Forenzikë, rezulton të jetë e llojit kanabis – marihuanë.”, është bërë e ditur në komunikatë.
Ndërsa, e pandehura A.M., në datë, kohë dhe vend të njëjtë, me dashje e ka ndihmuar të pandehurin D.G., në shmangien e zbulimit dhe arrestimit, duke ndërmarrë veprime për pengimin e arrestimit të tij.
Po ashtu, lidhur me rastin, si mjete të kryerjes, janë konfiskuar sendet, të cilat kanë mundësuar kryerjen e veprës penale: Vetura e tipit BMW, pronë e të pandehurit D.G., një qese plastike me substancë të dyshuar narkotike të llojit marihuanë me peshë 1093.23 gramë, një qese plastike me substancë të dyshuar narkotike të llojit marihuanë me peshë 1087.51 gramë, një thes ngjyrë kafe, një sprej me ngjyrë të zezë, dy grinder – mullinj.
Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit lartëcekur për veprat penale, për të cilat akuzohen të shpallen fajtorë dhe të dënohen sipas ligjit.
Qeveria e Kosovës e ka miratuar Projektligjin e ri për Këshillin Prokurorial të Kosovës, pasi versionin e parë e shfuqizoi Gjykata Kushtetuese.
Kryeministri Albin Kurti ka thënë se ky projektligj parasheh reformë në KPK, synon eliminimin e grupeve të interesit dhe korporatizimit brenda KPK-së, eliminimin e ndikimeve politike dhe synohet përmbushja e mandatit kushtetues të KPK-së, raporton EO.
Ndërkaq, ministrja e Drejtësisë, Albulena Haxhiu, e ka cilësuar me prioritet këtë çështje.
Ajo ka thënë se në projektligj parashihet që si anëtarë të përhershëm të Këshillit të jenë 7 prokurorë, tre prej tyre të zgjedhur nga Kuvendi.
“Propozojmë si anëtar permanent të jenë 7 anëtarë, 3 prokurorë dhe Kryeprokurori sipas detyrës zyrtare, dhe 3 anëtarë joprokurorë por duke ndryshuar mënyrën e zgjedhjes së tyre në Kuvend duke adresuar vendimet e Gjykatës Kushtetuese”, tha Haxhiu.
Ajo ka bërë të ditur se përbërjes aktuale deri në vitin 2026 do t’i shtohen edhe disa anëtarë joprokurorë.
“Natyrisht që ne nuk mund të presim deri në vitin 2026 duke penguar sundimin e ligjit, Proozojmë që në përbërjen aktuale të kemi edhe një numër shtesë të anëtarë joprokurorë deri në vitin 2026, duke mundësuar që KPK-ja të funksionojë në përputhje me Kushtetutën”, ka thënë ajo.
Presidenti serb Aleksandar Vuçiq tha sot se Thesari i SHBA-së nuk ka vendosur sanksione ndaj kreut të Agjencisë së Inteligjencës së Sigurisë (BIA) Aleksandar Vulin për ndonjë krim dhe korrupsion, por për shkak të marrëdhënieve të tij me Rusinë.
Madje ai pyeti pse këto sanksione u vendosën ndaj Vulin-it e jo ndaj Ministrit të Punëve të Brendshme të Kosovës Xhelal Sveçla.
“Pyetja ime është se si ka sanksione kundër Vulin, por jo sanksione ndaj Sveçlës? Epo, nuk jam budalla, e di se çfarë kam folur gjatë gjithë këtyre muajve dhe çfarë të kam thënë dhe çfarë më është thënë mua”, ka thënë Vuçiq.
“Nuk do të ketë sanksione për të, sepse ne e dimë se si duhet të vendoset një ekuilibër. U vendosën sanksione kundër meje në vitet ’90 dhe nuk më interesonte shumë sepse as amerikanët dhe as rusët nuk do ta udhëheqin politikën time. Politika që unë drejtoj duhet të jetë e mirë për Serbinë dhe popullin serb” tha Vuçiq.
Sa më shumë t’i referohesh një destinacioni si një vend krejtësisht i ndryshëm, aq më shumë do të bëhet një pikë e nxehtë turistike.
Shqipëria, e cila po gëzon një rritje të madhe të numrit të turistëve, së fundmi i janë referuar si ‘Kroacia e Re’,
‘Maldivet e Evropës’, ‘Karaibet e Evropës’ e ‘Greqia e ardhshme’.
E ashtuquajtura “Toka e Shqiponjave” është shpërndarë kudo në rrjetet sociale kohët e fundit, ku mund të shihen turistët duke shijuar diellin në plazhet e saj me rërë, duke u zhytur në ujërat e paeksploruara dhe duke kërcyer në festivalet e saj.
Nga viti 2010 deri në vitin 2019, numri i turistëve që shkojnë në Shqipëri çdo vit u trefishua në 3,3 milionë, ku 120.000 prej vizitorëve ndërkombëtarë ishin nga Britania e Madhe.
Së shpejti parashikohet që vendi të vizitohet nga miliona turistë britanikë.
Mirëpo për dekada me radhë, Shqipëria njihej si vendi më i izoluar në Evropën Lindore, i cili nuk i hapi dyert deri në fund të viteve ’80, duke ekzistuar si një shtet komunist i mbyllur për pjesën tjetër të botës.
Kur Enver Hoxha vdiq në vitin 1985, turistët filluan të vërshonin drejt vendit, deri në vitin 1989 ku vetëm 10.000 njerëz në të gjithë globin shkonin në Shqipëri çdo vit.
Vizitat filluan të rriteshin në fund të viteve ’90, kur industria evropiane e turizmit filloi të zbulonte potencialin e Shqipërisë për të konkurruar në Mesdhe.
Megjithëse vendi ende përballej me ndërprerje të energjisë elektrike, probleme me ujin e papijshëm dhe ujërat e zeza, në vitin 2003 Ministria e Turizmit vendosi të shkatërronte ndërtesat për të zbukuruar plazhet dhe për të riemërtuar kombin.
Në vitin 2017, ishte vetëm një linjë udhëtimi me “British Airways” nga aeroporti “Gatwick” i Londrës në Tiranë, ndërsa tani, ka mbi dhjetë linja.
Numri i pasagjerëve është rritur 27% në gjysmën e parë të vitit në 2023, krahasuar me të njëjtën periudhë në 2022.
Për të përmbushur kërkesën, është rritur kapaciteti për të kryer 19 fluturime në javë me një linjë ajrore.
Pritet që numri i turistëve drejt Shqipërisë të vazhdojë të rritet, një besim që ka çuar në investime nga e gjithë bota dhe ndërtimin e një aeroporti me vlerë 125 milionë dollarë në Vlorë, i cili është në punime e sipër, deri në përfundimin e tij në prill të 2024.
Shumë njerëz, tërhiqen kryesisht nga festivalet. “Kala”, një festival i nisur në vitin 2018 nga “Mainstage Festivals” dhe i vendosur në Rivierën Shqiptare, ka fituar shpejt zemrat e vizitorëve.
“Ne nuk mund të marrim meritën e plotë për rritjen më të gjerë të turizmit, mendoj se festivalet tona muzikore kanë ndihmuar që Shqipëria të vendoset në hartë për një numër të madh të rinjsh
që nuk kishin dëgjuar më parë për të”, tha Juan J. Lopez, drejtor i Marketingut në “Mainstage”.
“Shqipëria ofron peizazhe mahnitëse mesdhetare, ujëra të mrekullueshëm bruz, plazhe të paprekura, ushqim të shkëlqyeshëm dhe çmime shumë të përballueshme”, shtoi ai.
Shqipëria u bë virale verën e kaluar, veçanërisht resorti i plazhit Ksamil, shkëlqimi i të cilit nuk po shuhet.
Gushti do të jetë i çmendur dhe kjo për shkak të TikTok-ut, sepse vitin e kaluar të gjithë ripostonin vendodhjet e tyre.
Krahas figurave të njohura si Rita Ora dhe Bebe Rexha, ekziston gjithashtu efekti “Dua Lipa”.
Ajo është bërë një vajzë që promovon vendin përmes postimeve.
Në fund të vitit të kaluar, ajo u bë qytetare nderi dhe madje përmbylli turneun e saj botëror “Future Nostalgia” në Tiranë.
“Një shkak i zakonshëm i arratisjes së shqiptarëve nga vendi i tyre është gjakmarrja”, shkruhet në “The Guardian”, duke shpjeguar se shumë prej tyre përballen me kërcënimin e sulmeve hakmarrëse nga familje të tjera, që zgjasin me breza.
Fatkeqësisht, shumica e njerëzve nuk dinë shumë për Shqipërinë dhe mbështeten thjesht në stereotipe negative.
“Megjithatë, kjo është në avantazhin tonë, pasi aventurierët kur vijnë në Shqipëri habiten shumë kur zbulojnë se të gjitha këto paragjykime janë larg realitetit”, tha Lopez.
Sidoqoftë, duket se pushuesit e verës 2023 do të thyejnë industrinë e turizmit të Shqipërisë.
Ashtu si çdo vend në zhvillim, ekziston rreziku drejt një kolapsi te turizmit, që numëron mbrapsht drejt erozionit kulturor.
Nëse të ardhurat nga turizmi rrjedhin në ekonominë lokale, kjo mund të çojë në një rezultat pozitiv për të gjithë.
Kryeministri i Kosovës Albin Kurti në fjalimin e tij para fillimit të mbledhjes së Qeverisë, ka konfirmuar se të hënë zv.kryeministri Besnik Bislim dhe emisari Miroslav Lajçak janë dakorduar për një marrëveshje që përmban 4 pika për de-eskalim të situatës, raporton EO.
Kurti tha se katër pikat do të krijojnë parakushte nё zbatimin e plotё dhe tё pakusht tё Marrёveshjes Bazike tё 27 shkurtit dhe aneksit tё Ohrit tё datёs 18 mars.
Tutje, Kurti është shprehur se Kosova mbështet mbajtjen e zgjedhjeve tё parakohshme nё 4 komunat nё veri tё vendit dhe atё pas stinёs sё verёs.
Më tej, kreu i Qeverisë tha se dakordimi që ndodhi në Bratisllavë, do të ndihmojë në vendosjen e barazisë midis palëve, që sipas tij, ndihmon zbatimin e plotë të marrëveshjes bazike dhe aneksit të saj.
“Z.Bislimi ka arritur një dakordim me emrirasin Lajçak për këto pika. E para zvogëlimi nё masën e 25% tё prezencës policore nё dhe rreth ndërtesave komunale. E dyta Policia e Kosovës bashkё me EULEX-in dhe KFOR-in, sipas nevojës do të vlerësojnë gjendjen e sigurisë. E treta Qeveria e Kosovës do të bëjë një deklaratë publike ku do të mbështes mbajtjen e zgjedhjeve në katër komunat veriore. E katërta ka të bëjë me ftesë që BE do të bëjë për kryenegociatorët për finalizimin e planit tё sekuencimit pёr Marrëveshjen drejt Normalizimit”.
“Marrëveshje duhet të zbatohet në plotëni, zbatimi i marrëveshjeve nuk duhet që të kushtëzohet, duhet që të negociojnë në mënyrë të barabartë. Si përfundim dakordimi i Bartisllavës do të ndihmojë. Reforma në drejtësi është prioritet i ynë , puna për të nuk ka ndaluar asnjëhërë. Ka më shumë se 4 muaj që jemi në pritje të Gjykatës Kushtetuese. Sot do të shqyrtojmë edhe Projektligjin për Këshillit Prokurorila”, tha ai.
Në muajin prill 2023, indeksi i qarkullimit të tregtisë me pakicë kishte rritje më të madhe te tregtia me pakicë jo në dyqane, tezga ose tregje me 66,2% dhe tregtia me pakicë jo në dyqane përmes postës ose internetit me 34,2% krahasuar me muajin e njëjtë të viti paraprak prill 2022.
Ndërsa, rënie të qarkullimit kishte te sektori i tregtisë me pakicë e pajisjeve të tjera shtëpiake në dyqane të specializuara me 10,5%, tregtia me pakicë e produkteve ushqimore, pijeve dhe duhanit, në dyqane të specializuara po ashtu me 5,9%, krahasuar me muajin e njëjtë të viti paraprak (Prill 2022).
“Në muajin prill 2023, indeksi i qarkullimit të tregtisë me pakicë kishte rritje më të madhe te: Tregtia me pakicë jo në dyqane, tezga ose tregje (66,2%); Tregtia me pakicë jo në dyqane, (përmes postës ose internetit) (34,2%), krahasuar me muajin e njëjtë të viti paraprak (Prill 2022). Ndërsa rënie kishte te: Tregtia me pakicë e pajisjeve të tjera shtëpiake në dyqane të specializuara (-10,5%); Tregtia me pakicë e produkteve ushqimore, pijeve dhe duhanit, në dyqane të specializuara (-5,9%), krahasuar me muajin e njëjtë të viti paraprak (Prill 2022)”, thuhet në raportin e Agjencisë së Statistikave për qarkullimin e tregtisë me pakicë dhe numrit të të punësuarve prill 2023.
Ndërkaq, në muajin prill 2023, indeksi i numrit të të punësuarve, kishte rritje më të madhe te tregtia me pakicë e pajisjeve informatike dhe të komunikimit, në dyqane të specializuara me 6,9% dhe te tregtia me pakicë e mallrave të tjerë në dyqane të specializuara me 3,8%.
Ndërsa sipas ASK-së rënie të punësimit kishte te tregtia me pakicë jo në dyqane, tezga ose tregje me 27,2%, dhe te tregtia me pakicë e mallrave kulturore dhe të argëtimit, në dyqane të specializuara 9,6%.
Inspektori i Përgjithshëm i Agjencisë së Kosovës për Inteligjencë (AKI), Kujtim Shala, ka raportuar në Komisionin për Mbikëqyrjen e Agjencisë së Kosovës për Inteligjencë, lidhur me Platformën Vjetore të Politikës së Inteligjencës dhe Sigurisë (PVPIS), raporton EO.
Mediet janë lejuar të marrin vetëm pamje në fillim të takimit. Përderisa pas mbledhjes kryetarja e Komisionit Ganimete Musliu do të mbajë konferencë për medie.
