ATV

Category: Lajme

  • Projektligji për avokaturën shtetërore

    Projektligji për avokaturën shtetërore

    Emërimi dhe shkarkimi i Avokatit të Përgjithshëm Shtetëror, nëse projektligji për përfaqësimin e Institucioneve Shtetërore në Procedura Gjyqësore dhe Arbitrash do të miratohet, do të bëhet drejtpërdrejt nga Ministri i Drejtësisë.

    Sipas draftit të këtij projektligji, parashihet që ky institucion të përbëhet të paktën nga dhjetë avokatë shtetërorë, të cilët gjithashtu do të emërohen nga udhëheqësi i këtij dikasteri.

    Por për juristët që kanë disa vërejtje në këtë projektligj, kjo mënyrë e emërimit cenon pavarësinë e këtij institucioni.

    Ish-avokati i përgjithshëm, Sami Istrefi, thotë se nëse do të mbesin këto ndryshime avokatura rrezikon politizimin.

    Megjithatë, ministrja që udhëheq dikasterin e Drejtësisë, teksa ka paralajmëruar që ky projektligj do të jetë në rend të ditës në seancën e ardhshme të Kuvendit, ka deklaruar se mënyra e përzgjedhjes së avokatit shtetëror nuk do të ndryshojë.

    Sipas ligjit aktual, Avokati i Përgjithshëm Shtetëror dhe avokatët shtetërorë emërohen me konkurs publik, sipas procedurës së paraparë me dispozitat për emërimin për pozitat e larta drejtuese në Shërbimin Civil të Kosovës.

    Me projektligjin e ri, parashihet edhe avokati i komunës, që do t’i përfaqësojë komunat në kontestet komunale, deri në shumën 200 mijë euro. /atvlive.tv

    Edicionin Qendror të lajmeve në ATV e gjeni në videon më poshtë:

  • Kryeministri dhe ministrja e Drejtësisë mbrojnë Mimoza Kusari-Lilën

    Kryeministri dhe ministrja e Drejtësisë mbrojnë Mimoza Kusari-Lilën

    Audio-incizimet e publikuara nga gazeta online “Nacionale”, në të cilat shefja e Grupit Parlamentar të Lëvizjes Vetëvendosje, Mimoza Kusari, gjatë një takimi me Slako Simiqin e Listës, pranon se ka biseduar me Milan Radojçiqit, kryeministri Albin Kurti i vlerësoi luftë hibride të Serbisë ndaj Kosovës.

    Teksa incizimeve iu referua si të gjymtuara e të redaktuara, Kurti mbrojti Kusarin duke thënë se komunikimi me Simiqin ishte bërë në kuadër të punës si shefe e grupit parlamentar.

    “Asaj i është lëshuar në interfon të telefonit të Slavko Simiqit, gjë që s’mund të thuhet që është takim, andaj unë edhe një herë po e theksoj, pushteti ynë është demokratik, shteti ynë është i pavarur dhe të gjitha këto sulme në kuadër të luftës hibride, do të dështojnë”, tha Kurti.

    Kurti mohoi pretendimet që e implikojnë atë në audio-incizim.

    “As që jam takuar e as kam komunikuar ndonjëherë me personin në fjalë”, tha Kurti.

    Duke iu shmangur pyetjeve nëse Kusari-Lila duhet të shkarkohet ose të vihet para përgjegjësisë për bisedën me Radojçiqin, i cili është në arrati nga institucionet vendore dhe në listën e sanksioneve të SHBA-së, ministrja e Drejtësisë, Albulena Haxhiu, mbrojti shefen e grupit parlamentar të partisë së saj.

    “Lista Serbe nuk ka mundur të shantazhojë dhe t’i bëjë presion shefes së Grupit Parlamentar të LV-së, Mimoza Kusari-Lila. Po të kishin efektin e tyre dhe të shkonin përpara kërkesat e Listës Serbe ato nuk do të publikoheshin”, tha Haxhiu.

    Edhe Haxhiu mohoi implikimet nga përmendja që i bëhet në audio-incizim.

    Lidhur me incizimin e publikuar, në një intervistë në CONTEXT të ATV-së, Kusari Lila ka paralajmëruar padi ndaj Slavko Simiqit dhe gazetarit Berat Buzhala. /atvlive.tv

    Edicionin Qendror të lajmeve në ATV e gjeni në videon më poshtë:

  • Mundësia e lëshuar për arrestimin e I.B. që tash akuzohet në mungesë

    Mundësia e lëshuar për arrestimin e I.B. që tash akuzohet në mungesë

    Meqë nuk u gjet askund në Kosovë e as në vendet me të cilat ka bashkëpunim, Prokuroria Speciale ngriti aktakuzë në mungesë ndaj Ilir Berishës.

    Por, sipas banorëve të Klinës, para tre vjetësh institucionet e Kosovës lëshuan një mundësi për arrestimin e romit që akuzohet për dëbim të shqiptarëve, djegie të shtëpive me njerëz të vrarë brenda, si dhe plaçkitje.

    “Dëgjova se e kanë pa në Klinë se ka ardhë me apliku në Klinë për pasaportë. Kur ka ardhë me marrë, i kam thënë Delisë (një polic) pse s’po e merrni. Unë vi deklaroj se çka kam pa për ta”, tha Asllan Morina, fqinj i të dyshuarit.

    Kështu, me insistim të dëshmitarit Asllan Morina, Policia e ndaloi përkohësisht Ilir Berishën.

    “E pyetshin, send nuk pranojke. Dikur i thashë: a muj me dalë unë ballë për ballë me të. Edhe kur e takova i thash: o ilir, ma ktheu: ku je kojshi, i thashë: ja ma s’ka kojshi. A e ke ba qita, e pranojke…”, tha Morina.

    Por, dëshmia dhe pranimi i fajësisë për disa nga veprat, sipas Morinës, nuk mjaftoi për ta mbajtur prapa grilave.

    “Edhe në fund kurrgjë, prapë u liru. I kam thanë Deliut, pse me u liru… Këto dëshmi për të bëmat e tij a nuk mjaftojnë a?”, u shpreh Morina.

    Policia e as Prokuroria Speciale deri në transmetimin e kësaj kronike, nuk janë deklaruar rreth intervistimit për të cilin flasin banorët e Klinës.
    Por Fondi për të Drejtën Humanitare sugjeron të bëhen më shumë përpjekje për sigurim të dëshmive.

    “Është shumë e rëndësishme për prokurorinë, në mënyrë që ta dëshmojë përgjegjësinë e të akuzuarit, dhe është për të ardhur keq nëse prokuroria nuk i ka intevristu të gjithë dëshmitarët…”, tha Bekim Blakaj nga Fondi për të Drejtën Humanitare.

    Nga fillimi i majit e deri në mesin e muajit korrik, Prokuroria Speciale ka ngritur 4 aktakuza në mungesë. /atvlive.tv

    Edicionin Qendror të lajmeve në ATV e gjeni në videon më poshtë:

  • ​Serbia dërgoi armë në Rusi? Belgjika i suspendon licencën

    ​Serbia dërgoi armë në Rusi? Belgjika i suspendon licencën

    Një kompani belge që prodhon makineri për prodhimin e municioneve u ndalua të martën të eksportonte në Serbi, pasi dyshohej se kjo e fundit kishte dërguar armë në Rusi.

    Mediat ndërkombëtare shkruajnë se ndalimi i eksportit është bërë ndaj kompanisë New Lachaussee.

    Kompania dyshohej se kishte shkelur sanksionet e BE-së të vendosura në vitin 2014, kur Rusia aneksoi gadishullin e Krimesë të Ukrainës, duke dërguar makineritë e saj në Rusi nëpërmjet një ndërmjetësi në Serbi.

    Sipas mediave ndërkombëtare, kreu i administratës së Wallonisë, Elio Di Rupo, mori vendimin për të pezulluar licencat aktuale të eksportit të Neë Lachaussee “me efekt të menjëhershëm” për shkak të “një rreziku të mundshëm” të shkeljeve të sanksioneve, tha zyra e tij.

    E lidhur me këtë lajm ka reaguar edhe deputetja britanike, Alicia Kearns, e cila ka thënë se “Mbretëria e Bashkuar duhet gjithashtu të pezullojë licencat e armëve për Serbinë, për të lejuar një hetim të menjëhershëm të pajisjeve britanike”.

    “Kam bërë thirrje për një thyerje të ngjashme disa muaj më parë pas shqetësimeve më të gjera rreth keqpërdorimit të mundshëm të eksporteve të mbrojtjes”, ka shkruar ajo në Twitter, shkruan KosovaPress.

    Kujtojmë se Serbia refuzon të respektojë sanksionet perëndimore ndaj Rusisë.

  • Vitia lajmëron hapjen e një konkursi për 25 vende pune në Ministrinë e Shëndetësisë

    Vitia lajmëron hapjen e një konkursi për 25 vende pune në Ministrinë e Shëndetësisë

    Ministri i Shëndetësisë, Arben Vitia ka njoftuar se është hapur konkursi për punësimin e 25 inspektorëve shëndetësorë.

    Vitia u ka bërë thirrje profesionistëve që të aplikojnë për punë.

    Ai ka thënë se shtimi i numrit të inspektorëve shëndetësorë është i nevojshëm për siguruar cilësinë e mbikëqyrjes së shërbimeve shëndetësore.

    Njoftimi i plotë i ministrit Vitia:

    HAPET KONKURSI PËR INSPEKTORË SHËNDETËSORË

    Për të siguruar cilësinë e mbikëqyrjen e nevojshme për shërbimet shëndetësore kemi planifikuar shtimin e numrit të inspektorëve shëndetësorë.

    Puna e inspektorëve shëndetësorë është mision në shërbim të drejtëpërdrejtë për sigurinë e pacientëve tanë kudo që ata janë duke u trajtuar.

    Andaj ju bëj thirrje të gjithë profesionistëve që plotësojnë kushtet që të aplikojnë pa hezitim.

    Angazhimi në fushën e inspektimit shëndetësor është jetik për transformimin e shumëpritur të shërbimeve shëndetësore.

    Të dhënat e aplikimit gjenden në këtë link: https://konkursi.rks-gov.net/jobs?servant=1&type=2

  • Krasniqi kërkon Komision hetimor për audio-incizimet e Kusari-Lilës: Kanë lënë shije të hidhur

    Krasniqi kërkon Komision hetimor për audio-incizimet e Kusari-Lilës: Kanë lënë shije të hidhur

    Profesori universitar Milazim Krasniqi, i tha Ekonomia Online, se çdo bisedë e fshehur është pjesë politikave të pa moralshme, duke i’u referuar përgjimeve të publikuar së fundi në medie ku është e implikuar shefja e Grupit Parlamentar, Mimoza Kusari-Lila, me pjesëtarë të Listës Serbe.

    Ai ka shtuar se për këtë çështje do të duhet që të krijohej një Komision hetimor Parlamentar. Krasniqi ka theksuar se komunikimi i Kusari-Lilës më Milan Radojiçiqin, që është në listën e zezë të ShBA-së, dhe në kërkim nga organet e drejtësisë, lënë shije të hidhur.

    “E para çdo bisedë jo zyrtare e fshehtë është një farë mënyre pjesë e spiunazhit ose politikave të pa moralshme pavarësisht se kush i zhvillon. E dyta varet edhe në rastin që bisedohet me Listën Serbe e cila bënë diversion permanent ndaj shtetit të Kosovës dhe veçmas me Milan Radojiçiqin që është në listën e zezë të ShBA-së dhe është në kërkim nga organet e drejtësisë kjo lënë shije edhe më të hidhur”.

    “E treta zhvillimet në veri që janë tash sa muaj në sfondin e këtyre përgjimeve krijohen dyshime serioze se janë disi të orkestruara, të koordinuara dhe në këtë rast nëse është kështu unë sinqerisht nuk do të dëshiroja që të ishte ashtu, atëherë rezulton që këto politika të koordinuara me Listën Serbe edhe me Radojiçiqin janë tmerrësisht të dëmshme për stabilitetin e Kosovës”, tha ai.

    Sipas tij, Prokuroria e Shtetit do të duhej që të vije ne lëvizje për të parë eventualisht pasojat që janë shkaktuar.

    “E kanë dëmtuar imazhin e Kosovës shumë, me një fjalë dhe vetë këto biseda jo vetëm që lënë shije të hidhur por bindja ime e thellë është që ka hapësirë për të hapu minimumi në Parlament një Komision hetimorë për këtë. Dhe e dyta unë mendoj që Prokuroria e Shtetit do të duhej që të vije ne lëvizje për të parë gjithë këtë ngjarje dhe për të parë eventualisht pasojat që ajo ka shkaktuar”, tha ai.

    Krasniqi shtoi se të gjitha partitë në vend kanë bashkëpunuar në të kaluarën me Listën Serbe, por sipas tij, problem është kur bëhen biseda të fshehta e koordinime me Milan Radojiçiqin që është person në kërkim.

    “Ata në fakt edhe kanë qenë partner të pa shpallur të koalicionit sepse më votat të eksponentëve të listës Serbe është zgjedhur edhe Vjosa Osmani, presidente dhe këtë nuk e fshehë askush sepse dihet botërisht. Ka pasur një periudhë të bashkëpunimit, periudha e bashkëpunimit me Listën Serbe kanë pasur edhe partitë e tjera, si e tillë ajo është pjesë e infrastrukturës politike të Kosovës dhe askush nuk e konteston bashkëpunimin më të”.

    “Problemi është kur bëhen biseda të fshehta dhe kurë benë pazare të fshehta në stilin ju na votoni këtë ligj, ne ju votojmë këtë ligj jashtë syrit të publikut. Nuk do të ishte fare kontestuese pse bëhen takime me Listën Serbe, por është kontestuese pse behën koordinime me Milan Radojiçiqin që është person në kërkim”, tha ai.

  • Dodik thotë se ka “një plan” nëse shkarkohet nga posti i presidentit të Republikës Sërpska

    Dodik thotë se ka “një plan” nëse shkarkohet nga posti i presidentit të Republikës Sërpska

    Presidenti i entitetit të Republikës Sërpska, Millorad Dodik, tha se vendimet e përfaqësuesit të lartë në Bosnje e Hercegovinë, Christian Schmidt, nuk do të aplikohen në entitetin serb.

    “Unë jam një plan nëse përfaqësuesi i lartë sjell diçka. Do të jetë shumë interesant, por plani nuk përfshin asnjë konflikt, por sfidë politike”, tha Dodik duke komentuar raportimet mediave për shkarkimin e tij.

    Përfaqësuesi i lartë në Bosnje, Christian Schmidt, ka autoritetin që të shkarkojë çdo zyrtarë të emëruar apo të zgjedhur, nëse ai vlerëson se ata kërcënojnë Marrëveshjen e Paqes të Dejtonit apo sundimin e ligjit.

    Gjatë një konference për media, Dodik tha se ai është zgjedhur në postin e presidentit të Republikës Sërpska nga qytetarët gjatë zgjedhjeve të mbajtura tetorin e vitit të kaluar.

    “Lëreni të tentojë, ndoshta ai ka dëshirë që ajo të ndodhë në mënyrë që të shfaqet paaftësia e tij për të bërë diçka”, tha Dodik.

    Deklarata e tij vjen një ditë pasi anëtarët e Agjencisë për Hetim dhe Mbrojtje (SIPA) mblodhi dokumentacione në zyrat e Gazetës Zyrtare në Republikën Sërpska.

    Ky institucion ka publikuar dekretin joligjor të Dodikut që thotë se vendimet e Zyrës së përfaqësuesit të lartë më nuk do të publikohen në Republikën Sërpska, sikurse edhe vendimet e Gjykatës Kushtetuese të Bosnje e Hercegovinës më nuk do të aplikohen në territorin e entitetit.

    Dekreti i Dodikut është publikuar në Gazetën Zyrtare më 10 korrik. Propozuesit e këtij legjislacioni ishin Dodik, deputetët dhe Qeveria e Republikës Sërpska. Asambleja e këtij entiteti i miratoi këto ndryshime ligjore në fund të qershorit.

    Schmidt me vendimet e tij të 1 korrikut ka pezulluar krejtësisht të gjithë procedurën ligjore. Përfaqësuesi i lartë po ashtu ka penalizuar mosrespektimin e vendimeve të tij dhe kushdo që e bën këtë shkelje mund të dënohet deri me pesë vjet burgim.

    Konferenca për media e Dodikut u mbajt pas takimit të zyrtarëve të lartë të Bosnjës me kryetaren e Delegacionit të Bashkimit Evropian, Johanna Sattler, dhe drejtoreshën për Evropë të Shërbimit për Punë të Jashtme të BE-së, Angelina Eichhorst.

    Pas takimit të mbajtur në Sarajevë, Dodik tha se ai dëshiron që Bosnja të pranohet si anëtare e BE-së.

    Gjatë këtij takimi është diskutuar edhe për krizën politike të shkaktuar nga aktivitetet anti-Dejton të Dodikut.

    Dodik tha se u pajtua me BE-në që përfaqësuesit e autoriteteve duhet të paraqesin një propozim për shtensionim politik deri të hënën./REL/

  • Mustafa dyshon në vërtetësinë e një dokumenti që i paraqitet në Speciale me nënshkrimin e tij

    Mustafa dyshon në vërtetësinë e një dokumenti që i paraqitet në Speciale me nënshkrimin e tij

    Rrustem Mustafa Remi e ka vazhduar edhe sot dëshminë në Gjykatën Speciale në Hagë.

    Gjatë dëshmisë atij i është paraqitur një dokument me nënshkrimin e tij.

    E për vërtetësinë e tij ai hodhi dyshime.

    Mustafës nuk iu duk as forma e as përmbajtja si e dokumenteve që i kanë përpiluara ata gjatë kohës së luftës.

    Prokurorja: A e njihini këtë nënshkrim

    Mustafa: Nënshkrimi duhet të jetë i imi, por unë befasohem me këtë dokument. Nuk është formë e dokumenteve tona që unë i kam nënshkruar. Forma përmbajtja po më duken interesant.

    Prokurorja: Z.Mustafa dua që ta lexosh paragrafin e parë, emrin datën dhe kohën që personi thuhet se është arrestuar

    Mustafa: Emrin nëse më lejoni do ta kursej sepse nuk dëshirojë që të ndihet familja e tij keq, apo ai personalisht. I lindur më 12.06.1965 , në Llapashticë të Poshtme ku edhe jeton, mbajtje në lokalet prej 04.01.1999 për shkak të dyshimit të bazuar se ka kryer vepër penale të vjedhjes.

  • ​Më pak çifte të shkurorëzuara në vitin 2022 sesa një vit më parë

    ​Më pak çifte të shkurorëzuara në vitin 2022 sesa një vit më parë

    Në vitin 2022, janë regjistruar 2 mijë e 88 shkurorëzime, ndërsa numri më i madh i shkurorëzimeve, sipas komunave, ishte në Prizren me 209 raste ose 10,0%, në Gjakovë janë regjistruar 172 raste ose 8,2% dhe në Ferizaj 145 raste ose 6,9%.

    Sipas kohëzgjatjes së martesës, dominon viti 5-9 me 31,5%, viti 10-14 me 14,5% dhe viti i katërt (4) me 9,1% e të shkurorëzuarve.

    Në raportin për Statistikat e Shkurorëzimeve për vitin 2022 të publikuara nga Agjencia e Statistikave të Kosovës thuhet se shkurorëzimet e regjistruara brenda Kosovës janë më pak në vitin 2022, krahasuar me vitin 2021 që ishin 2 mijë e 160

    “Te shkurorëzimet sipas grup-moshave, te femrat dominonte mosha 25-29 vjeçare me 452 shkurorëzime, ose 21,6%, kurse tek meshkujt dominonte mosha 30-34 vjeç me 431, ose 20,6%”, thuhet në raport.

    Ndërsa, mosha mesatare e personave të shkurorëzuar të regjistruar gjatë vitit 2022 ishte 29 vjeç.

  • Ngrihet aktakuzë ndaj një serbi për krime lufte kundër popullatës civile

    Ngrihet aktakuzë ndaj një serbi për krime lufte kundër popullatës civile

    Prokuroria Speciale e Kosovës (PSRK) ka ngritur sot aktakuzë në Gjykatën Themelore në Prishtinë kundër një personi me inicialet S.T, i nacionalitetit serb për veprën penale “Krime lufte kundër popullatës civile”.

    “Prokuroria Speciale njofton se aktakuza kundër të pandehurit të lartcekur është ngritur për shkak të dyshimit se gjatë kohës së luftës në Kosovë, në periudhën kohore 1998-1999, në fshatin Reznik, komuna e Vushtrrisë dhe në fshatrat përreth të rajonit të Vushtrrisë, individualisht dhe në bashkëkryerje me persona të tjerë, duke shkelur rëndë rregullat e të Drejtës Ndërkombëtare si pjesëmarrës i forcave policore dhe ushtarake serbe ka kontribuar në vrasje, bastisje, rrahje, maltretimit, arrestimit, torturë, trajtim në mënyrë mizore dhe çnjerëzore, mbajtja në kushte skllavërie, dëbimin dhe depërtimin të mijëra civileve shqiptarë si dhe masat e plaçkitjes, djegies dhe shkatërrimit të shtëpive të popullsisë civile të nacionalitetit shqiptarë që nuk kanë marrë pjesë drejtpërdrejtë në konflikt me ç’rast ka shkelur rëndë rregullat e të drejtës ndërkombëtare gjatë kohës së luftës, konkretisht nenin 3 paragrafin 1 shkronja a, b, c, të përbashkët me katër konventa (1a dhe b) të përbashkët për katër Konventat e Gjenevës të datës 12 Gusht të vitit 1949 dhe Protokollet shtesë (protokollin I).”, ka bërë të ditur Prokuroria Speciale.

    Me veprimet e përmendura më lart, i pandehuri S.T. në bashkëkryerje me pjesëtarë të tjerë të panjohur të njësisë së përmendur të policisë serbe dhe persona tjerë të armatosur dhe të uniformuar ka kryer veprën penale “Krimet e luftës kundër popullatës civile’’, e paraparë dhe e dënueshme sipas nenit 142 dhe 22 të Ligjit Penal të ish Republikës Socialiste Federative të Jugosllavisë aktualisht i inkriminuar si krime kundër njerëzimit nga nenin 143 paragrafi 1 nënparagrafi 1.4, 1.6 dhe 1.7 lidhur me nenin 31 të Kodit Penal të Republikës së Kosovës.