ATV

Category: Lajme

  • 17 komuna pa noterë, Ministria e Drejtësisë ende pa konkurs

    17 komuna pa noterë, Ministria e Drejtësisë ende pa konkurs

    PËRGATITI: DRITON SADIKU  

    2 vjet e 4 muaj në pushtet, Qeveria e kryeministrit Kurti nuk ka hapur asnjë konkurs për noter të rinj. Në mandatin e parë, Ministria e Drejtësisë kishte anuluar një konkurs nën dyshime për parregullsi. Ministria e Drejtësisë nuk ka treguar se çfarëdo të bëhet me konkursin e fundit që ishte anuluar, vendim të cilin e kishte rrëzuar pastaj edhe Gjykata Kushtetuese. Juristët thotë se Ministria duhet t’i përfillë vendimet e gjykatës.

    Që nga ardhja në pushtet, Ministria e Drejtësisë nuk ka hapur konkurse për noter të rinj, ndonëse janë plot 17 komuna që nuk e kanë asnjë noter.

    Madje, janë bërë rreth 3 vjet e gjysmë nga kur ministrja Albulena Haxhiu, gjatë mandatit të parë në Qeverinë Kurti 1, kishte anuluar konkursin për noter nën dyshimet për parregullsi, nuk ka pasur lëvizje në shtimin e numrit të noterëve.

    Megjithatë, Ministria e Drejtësisë tha për ATV-në se në vjeshtën e këtij viti do të mbahet provimi i noterisë që do t’i hapë rrugë konkursit për noter të rinj.

    “Ministrja e Drejtësisë ka emëruar Komisionin për Dhënien e Provimit të Noterisë. Ky Komision është duke punuar në krijimin e parakushteve të nevojshme për mbarëvajtjen e Provimit të Noterisë dhe, së shpejti, do të organizojë provimin që ka për qëllim rritjen e konkurrencës dhe cilësisë. Pas Provimit të Noterisë, Ministria e Drejtësisë do të shpallë konkurs për emërimin e noterëve, me të cilin do t’u jepet mundësia kandidatëve që kanë dhënë Provimin e Noterisë të kandidojnë për t’u emëruar noterë. Përmes këtij procesi, Ministria e Drejtësisë do të zgjidhë problemin e mungesës së numrit të nevojshëm të noterëve dhe, sidomos, komunave pa noterë.”

    Mirëpo, nuk treguan se çfarë do të bëhet me konkursin që e kishin anuluar në shkurt të 2020-tës, vendim ky i cili ishte anuluar më pas nga gjykata, me arsyetimin se nuk ka gjetur prova se e paditura, qoftë në procedurë administrative ose edhe para gjykatës ka vërtetuar se Komisioni për Dhënien e Provimit për Noterinë ka cenuar parimin e ligjshmërisë.

    Kësisoj nga Instituti i Kosovës për Drejtësi, thonë se Ministria nuk mund të mos i përfillë vendimet e Kushtetueses.

    “Gjykata në rastin konkret e ka anuluar vendimin e Ministrisë së Drejtësisë për anulimin e konkursit në fjalë dhe në këtë drejtim ajo çfarë mund të themi është se është obligative për Ministrinë e Drejtësisë, që të zbatohet vendimi i gjykatës pa marrë parasysh se cilat janë veprimet e tjera në drejtim të zgjedhjes së noterëve të rinj, asnjë proces i ri, qoftë proces brenda ministrisë së drejtësisë, qoftë ndonjë proces plotësues apo diçka tjetër, nuk mund të shkojë në dëm dhe ta amnistojë Ministrinë e Drejtësisë nga obligimi për ta zbatuar vendimin e gjykatës”.  

    Në fakt, në tërë vendin aktualisht aktiv janë vetëm 50 noterë. Përveç 17 komunave që s’e kanë asnjë, 10 të tjera operojnë me vetëm nga një noter.

    Përveç kryeqytetit që numëron 13 dhe Prizreni e Gjilani nga 4, komunat e tjera operojnë me më pak se 3 noterë.

     

  • ​Përfundon takimi i Ramës me udhëheqësit e vendeve të Ballkanit Perëndimor

    ​Përfundon takimi i Ramës me udhëheqësit e vendeve të Ballkanit Perëndimor

    Ka përfunduar takimi informal i kryeministrit të Shqipërisë, Edi Rama me krerët e vendeve të Ballkanit Perëndimor. Takimi i cili u zhvillua në Vilën 30 në Tiranë është mbajtur në kuadër të Samitit të Procesit të Berlinit që do të zhvillohet në Shqipëri më 16 tetor.

    Radio Televizioni Shqiptar raportoi se të pranishëm në takim ishin kryeministri i Malit të Zi, Dritan Abazoviç, kryeministri i Maqedonisë se Veriut, Dimitar Kovaçevski, kryeministrja e Serbisë, Ana Brnabiç si dhe kryetarja e Këshillit të Ministrave të Bosnje Hercegovinës, Borjana Kristo.

    Në takim mungoi kryeministri i Kosovës, Albin Kurti, i cili ndodhet në një aktivitet tjetër në Greqi. Megjithatë, Kurti do të marrë pjesë në samitin e Tetorit.

    Zëdhënësi i Qeverisë së Kosovës, Përparim Kryeziu ka sqaruar se kryeministri Albin Kurti e kishte njoftuar kryeministrin e Shqipërisë, Edi Rama se nuk do të mund të shkojë në takimin joformal të liderëve të rajonit në Tiranë, meqë muaj më parë e ka konfirmuar pjesëmarrjen në një konferencë në Kretë të Greqisë e ku paneli për Ballkanin Perëndimor, është saktësisht në ditën e njëjtë e në kohën e njëjtë.

    “Kryeministri Kurti e ka njoftuar Kryeministrin Rama që nuk do të mund të shkojë kësaj radhe meqë muaj më parë e ka konfirmuar pjesëmarrjen në një konferencë në Kretë të Greqisë e ku paneli për Ballkanin Perëndimor është saktësisht në ditën e njëjtë e në kohën e njëjtë. Natyrisht Kryeministri Kurti do të marrë pjesë në Samitin e Procesit të Berlinit që do të mbahet në Tiranë, data e të cilit dihet: 16 tetor 2023”, ka shkruar ai.

    Ndërsa Klisman Kadiu, këshilltar për media i Besnik Bislimit, ka mohuar lajmin se zëvendëskryeministrit iu është refuzuar pjesëmarrja në takimin joformal të liderëve të Ballkanit Perendimor, pasi sipas tij, pjesëmarrja në këtë takim nuk ka qenë e planifikuar nga vet Bislimi.

    “Lajmi i djeshëm për pjesëmarrjen e zëvendëskryeministrit Bislimi në takimin joformal në Tiranë nuk është i vërtetë. Nuk ka qenë i planifikuar e aq më pak i konfirmuar. Meqë nuk ka patur asnjë konfirmim nga zëvendëskryeministri Bislimi, atëherë nuk ka mundur as t’i refuzohej pjesëmarrja apo prania e tij. Prandaj edhe raportimet nga disa media shqiptare në lidhje me refuzimin nuk janë gjë tjetër veçse spekulim dhe duke qenë i tillë veç mund të spekulojmë për origjinën e tij”, ka shkruar ai.

    Ndërkohë, mediat në Shqipëri raportuan se në takimin e liderëve rajonit në Tiranë nga Qeveria e Kosovës ishte konfirmuar ardhja e zëvendëskryeministrit Besnik Bislimi. Por ky takim i Bislimit me krerët e rajonit nuk do të jetë i mundur për shkak të protokollit.

    Mediat atje theksuan se zëvendëskryeministrit të Kosovës i është komunikuar nga organizatorët e takimit se niveli i tij është dytësor dhe jo i përshtatshëm dhe se dosja e takimit do t’i dërgohet me poste të sigurt Qeverisë së Kosovës, përkatësisht zyrës së kryeministrit.

  • BE-ja s’tregon nëse do t’i largoj masat ndëshkuese ndaj Kosovës – këtë javë pritet takim në Bruksel

    BE-ja s’tregon nëse do t’i largoj masat ndëshkuese ndaj Kosovës – këtë javë pritet takim në Bruksel

    Bashkimi Evropian ende nuk ka vendosur nëse do t’i largojë masat ndëshkuese që i ka vendosur Kosovës për shkak të situatës që ishte krijuar në veri të vendit, ani pse Qeveria ndërmori hapa për de-përshkallëzim të situatës.

    Nga BE-ja kanë thënë se presin që Kosova të ndërmarrë hapa të tjerë në këtë drejtim.

    “Ne mirëpresim përkushtimin e Kosovës ndaj marrëveshjes së arritur dhe presim që Kosova të ndërmarrë hapa të mëtejshëm pozitivë dhe të vazhdojë të përparojë në këtë drejtim”, thuhet në përgjigjen e BE-së.

    Më tej BE-ja përmend këtu edhe takimin që pati në Bratislavë, emisari i BE-së, Mirsolav Lajçak me zëvendëskryeministrin Besnik Bislimi.

    “Ata diskutuan përgjigjen e Kosovës ndaj kërkesave të BE-së për de-përshkallëzimin e situatës në veri të Kosovës, organizimin e zgjedhjeve të parakohshme lokale në 4 komunat veriore dhe kthimin në zbatimin e Marrëveshjeve të Dialogut, sipas deklaratës së 27 vendeve të BE-së të lëshuar më 3 qershor”, thuhet në përgjigjen e tyre.

    Sa i përket një takimi të mundshëm gjatë kësaj jave në kuadër të dialogut, nga BE-ja i thanë Telegrafit se Lajçak tashmë ka ftuar dy kryenegociatorët për takim.

    “Emisari ka ftuar kryenegociatorët në Bruksel këtë javë për të vazhduar diskutimet mbi zbatimin e Marrëveshjes së re për Rrugën drejt Normalizimit dhe Aneksin e zbatimit të saj, me shpresën që palët të bien dakord për hapat e ardhshëm që mundësojnë zbatimin e plotë të Marrëveshjes”, deklaruan nga Bashkimi Evropian.

    Masat që po zbaton BE-ja ndaj Kosovës përfshijnë: pezullimin e përkohshëm të punës së trupave të krijuara në bazë të Marrëveshjes së Stabilizim Asociimit (MSA), mosftesën e Kosovës në takime të nivelit të lartë dhe pezullimin e vizitave dypalëshe, përveç atyre që përqendrohen në adresimin e krizës në veri të Kosovës në kuadër të kornizës së dialogut të lehtësuar nga BE-ja.

    Masat tjera përfshijnë edhe ndaljen e programimit të fondeve për Kosovën nga IPA 2024 (Instrumentet e Para-Anëtarësimit) si dhe propozimet e Kosovës në kuadër të Kornizës së Investimeve në Ballkanin Perëndimor nuk janë dorëzuar për shqyrtim nga bordi më 29 dhe 30 qershor.

    Megjithatë, më 10 korrik, Kosova dhe BE-ja kanë arritur pajtim për hapat e parë drejt shtensionimit të situatës në veriun e Kosovës, të banuar me shumicë serbe.

    Pikat e marrëveshjes Kosovë-BE për shtensionimin e situatës në veri:

    1.Qeveria e Kosovës publikisht shpall përkushtimin e saj për të punuar në depërshkallëzimin e situatës dhe se nuk do të ndërmarrë asnjë masë për përshkallëzimin e situatës në veri të Kosovës. Kjo përfshin një ulje të menjëhershme për 25% të gjithë pranisë së policisë brenda dhe përreth ndërtesave komunale.

    2.Policia e Kosovës kryen rregullisht vlerësime të përbashkëta të sigurisë me EULEX-in dhe me KFOR-in sipas nevojës, për të vlerësuar mundësinë e zvogëlimit të mëtejshëm të gjithë pranisë së policisë brenda dhe përreth ndërtesave komunale.

    3.Qeveria e Kosovës bën një deklaratë publike duke inkurajuar mbajtjen e zgjedhjeve të reja pas verës në katër komunar në veri. Kosova angazhohet që të ketë bazën e nevojshme ligjore për të mundësuar organizimin e zgjedhjeve.

    4.BE-ja do të ftojë dy kryenegociatorët në Bruksel për të finalizuar Marrëveshjen për Rrugën e Normalizimit, pas së cilës do të fillojë zbatimi i të gjitha dispozitave të marrëveshjes.

  • Në 25-vjetorin e rënies heroike, përkujtohet dëshmori i parë i Rahovecit – Abdullah Bugari

    Në 25-vjetorin e rënies heroike, përkujtohet dëshmori i parë i Rahovecit – Abdullah Bugari

    Sot, janë bërë 25 vite nga rënia heroike e dëshmorit të parë të Epopesë së Rahovecit, Abdullah Bugari,

    Në këtë përvjetor ai është përkujtuar nga kryetari i komunës së Rahovecit, Smajl Latifi, bashkëluftëtarët dhe familjarët e tij.

    Latifi ka vlerësuar lart figurën e Bugarit për të cilin ka thënë se ai mbetet i gjallë, i buzëqeshur dhe i pavdekshëm në kujtesën e tij dhe bashkëveprimtarëve të organizuar në lëvizjen atdhetare ilegale të kohës, gjithashtu, edhe si një bashkëluftëtar i shquar i UÇK-së.

  • ​Kurti bojkotoi takimin BE-Ballkani, AAK: Logjikë inatçore

    ​Kurti bojkotoi takimin BE-Ballkani, AAK: Logjikë inatçore

    Aleanca për Ardhmërinë e Kosovës (AAK) i ka bërë thirrje qeverisë që të ndalojë eksperimentet me Kosovën në rrafshin e brendshëm dhe atë të jashtëm. Shefi i Grupit Parlamentar të kësaj partie, Besnik Tahiri, deklaroi se mosshkuarja e kryeministrit Albin Kurti në një takimin BE-Ballkan që mbahet sot në Shqipëri tregon logjikën e mbrapsht, inatçore dhe autoritare të një njeriu që udhëheq Kosovën.

    Sipas tij, është e papranueshme që Kosova të përjashtohet nga të gjitha tryezat.

    Tahiri ka kërkuar nga Qeveria që të marrë pjesë në takime ku flitet për të mirën e vendit. Ndërsa shtoi se mospjesëmarrja e kryeministrit Kurti në takim e sotëm që mbahet në Shqipëri, është duke e dëmtuar më shumë Kosovën.

    “Mos shkuarja e Kryeministrit Kurti në një takim joformal i ftuar nga kryeministri i Shqipërisë tregon logjikën e mbrapsht, inatçore, logjikën autoritare të një njeriu që udhëheq Kosovën. Është e papranueshme që Kosova të përjashtohet nga të gjitha tryezat. Kjo është joshtetformuese”, tha Tahiri.

    Në një konferencë për media shefi i GP tw AAK-sw tha po ashtu se në rrafshin e brendshëm Kosova nuk ka pasur asnjëherë më pak sovranitet, duke shtuar se edhe ‘një pjesë e veriut ka mbetur në duar të askujt’.

    “Në rrafshin e brendshëm Kosova nuk ka qenë kurrë me më pak sovrinatitet, veriut i Kosovës është në duar të askujt, kemi dy kryetar që janë të mbyllur tash e më shumë se një muaj dhe kemi një vend, një lokacion i cili nuk ka sundim të ligjit. Rreziku që po vjen është ajo pjesë e vendit në arsyejet që nuk ka veprim nga qeveria të kthehet në një zonë me rezolutën 1244. Mosveprimi i qeverisë dhe mungesa totale e strategjisë për atë pjesë është duke e trajtuar çështjen e Kosovës në formë eksperimentale, ka deklaruar Tahiri.

    Mes tjerash, ai sërish ka akuzuar Qeverinë pwr masat e marra ndaj Kosovws nga bashkësia ndërkombëtare.

    “Ekonomia vazhdon në vitin e tretë të jetë sektori më i sulmuar, drejtpërdrejt me investimet kapitale, tendenca me ja marr mundësinë komunave, fondet e tyre tregon që kjo qeveri po e dëmton Kosovën… Në rrafshin e jashtëm, sot Kosova është vend i barabartë me shtetet autoritare, BE ka sanksionuar Kosovën me anë të projekteve që kishin me pas investime në vend. SHBA-të kanë marrë sanksione dhe masa të drejtpërdrejta ndaj Qeverisë tonë. Së fundmi edhe në takimin rajonal Qeveria e Kosovës nuk përfaqësohet me kryeministër, ndërsa qeveria Shqipërisë detyrohet ta ndalojë një zyrtar të shtetit”, tha mes tjerash Tahiri.

    Ai foli edhe për Ligjin e pagave, derisa shtoi se Qeveria po abuzon me të.

    “Në rrafshin e brendshëm, zyrtarët shtetëror që punojnë në administratë të shtetit, policët, mjeket, kurrë nuk kanë qenë më të varfër dhe kurrë nuk kanë pas më pas siguri juridike në vend. Vazhdon abuzimi me Ligjin e pagave dhe zvogëlimin e saj. Prej mbi 900 të punësuarve që janë civilë në Policinë e Kosovës, 600 prej tyre iu është zvogëluar paga. Në rrafshin e drejtësisë, kurrë nuk ka pasur më pak drejtësi për punëtorët e sektorit privat, ata nuk kanë asnjë të drejtë, i është shkelur në mënyrë flagrante edhe me Ligjin për pagën minimale me një mashtrim ku thuhet se është rritur. Këtu kam një pyetje për kryeministrin Kurti dhe ministrin e Financave, Muratin, le të gjejë vetëm një të punësuar në sektorin privat që ka rrogën më pak se 260? Paga minimale është dashur me qenë 400 euro. Ky ligj ka pas për qëllim të largojë një kategori të rëndësishme, të veteranëve dhe të paraplegjikëve”, tha Tahiri./KP

  • Policia e Kosovës: Dikush në emrin tonë po lëshon emaile të falsifikuara

    Policia e Kosovës: Dikush në emrin tonë po lëshon emaile të falsifikuara

    Policia e Kosovës ka dalur me një njoftim jashtëzakonisht shqetësues. Sipas Policisë, dikush po falsifikon e-maila, vula, e po thirret në emër të Policisë, duke pretenduar se ndaj personit që i dërgohet ky e-mail, ka urdhër gjykate.

    Tutje Policia ka dhënë detaje se si po përdoren edhe emrat e zyrtarëve policor në këtë “falsifikim”.

  • Leku më i fortë se kurrë, zhvlerësimi i Euros prek rekorde të reja

    Leku më i fortë se kurrë, zhvlerësimi i Euros prek rekorde të reja

    Leku e ka nisur këtë javë me një forcim të mëtejshëm në kursin e këmbimit ndaj Euros dhe valutave të tjera kryesore.

    Sipas kursit zyrtar të këmbimit të Bankës së Shqipërisë, Euro u këmbye të hënën me 102.36 lekë, në rënie me 0.99 lekë që nga fundi i javës së kaluar. Me bazë vjetore, kursi i këmbimit Euro-Lek ka arritur një rënie prej 12.7%. Për agjentët e këmbimit valutor, rënia e Euros është konfirmim i pritshmërive të tregut.

    Kursi Euro-Lek këtë filloi një rënie të ndjeshme qysh në fillim të tremujorit të dytë, ndërsa ardhja e sezonit turistik po e zhyt më shumë në rënie monedhën europiane. Të dhënat e deritanishme kanë treguar një numër rekord të turistëve të huaj dhe të flukseve valutore hyrëse nga turizmi. Besohet se prurjet e mëdha valutore janë faktori kryesor që po ndikon në zhvlerësimin e shpejtë dhe të paprecedentë të monedhës europiane.

    Përveç turizmit, prurjet valutore po ndikohen nga rigjallërimi i remitancave dhe nga vlerat e larta të investimeve të huaja. Tendencë e re e viteve të fundit është rritja e investimeve të shtetasve të huaj në pasuri të paluajtshme në Shqipëri.

    Agjentët e këmbimit mendojnë se prurjet informale ngelen gjithashtu një faktor që ka ndikimin e vet edhe kursin e këmbimit valutor. Agjentët presin që, për shkak të efektit sezonal, kursi Euro-Lek të vazhdojë të ndjekë një tendencë rënëse të paktën deri në javën e parë të muajit gusht.

    Me rënien e saj të fortë, Euro po përheq pas vetes edhe valutat e tjera kryesore.

    Paundi Britanik ka rënë në minimumin e ri historik prej 119.12 lekëve.

    Dollari Amerikan ka rënë në vlerën e 91.03 lekëve, niveli më i ulët që prej vitit 2009.

    Franga zvicerane ka zbritur në nivelin e 106.11 lekëve, niveli më i ulët që prej vitit 2010.

    Euro është valuta referuese për sektorin financiar në Shqipëri dhe kursi i monedhave të tjera përcaktohet nga vlera e Euros e kombinuar me kursin e këmbimit të monedhës europiane kundrejt secilës prej tyre. Në javët e fundit, rënia e Euros ndaj Lekut po shoqërohet me një rënie të valutave kryesore ndaj Euros në tregjet ndërkombëtare. Rrjedhimisht, kjo ka sjellë rënie rekord edhe për shumicën e valutave të huaja kundrejt Lekut.

    Forcimi i Lekut në kursin e këmbimit, veçanërisht kundrejt Euros, sjell ndikime të rëndësishme në ekonomi. Leku më i fortë ul çmimin e importeve të mallrave dhe shërbimeve dhe në teori ushtron presione rënëse mbi çmimet e importit dhe inflacionin.

    Leku i fortë po favorizon shumë edhe huamarrësit në valutë të huaj, duke tkurrur vlerën e detyrimeve të tyre në monedhën vendase. Përfituesi më i madh mes tyre është vetë qeveria shqiptare, që po përfiton rënie të ndjeshme të portofolit të borxhit në valutë të huaj.

    Por, një forcim në këto përmasa i Lekut po dëmton ato subjekte ekonomike që kanë të ardhura në valutë të huaj dhe shpenzime në Lekë, duke filluar nga eksportuesit. Forcimi i Lekut me rreth 13% në një vit ka një efekt të fortë negativ mbi marzhet e fitimit dhe në këto kushte alternativat janë rritja e çmimeve, shkurtimi i shpenzimeve ose gjetja e mënyrave për të rritur produktivitetin.

    Një kategori që po preket ndjeshëm forcimit të Lekut janë edhe familjet e varura nga remitancat. Zhvlerësimi i valutave ka ulur fuqinë e tyre blerëse dhe potencialisht mund të jetë një faktor që do t’i nxisë emigrantët të dërgojnë më shumë para, faktor që, nga ana tjetër, do të krijonte presione të reja për forcimin e Lekut.

    Leku i fortë po ul gjithnjë e më shumë vlerën e kursimeve në valutë të huaj të shqiptarëve. Megjithatë, duke qenë se ekonomia shqiptare është e euroizuar në një shkallë të lartë, ky faktor nuk duket se po e dekurajon shumë mbajtjen e kursimeve në Euro, siç tregojnë të dhënat e depozitave bankare. /Monitor.al

  • ​Policia bën thirrje për shkak të temperaturave të larta: Mos ndizni zjarre

    ​Policia bën thirrje për shkak të temperaturave të larta: Mos ndizni zjarre

    Qytetarët të cilët frekuentojnë zonat malore të rajonit të Pejës, në veçanti Bjeshkët e Nemuna, duhet të jenë të kujdesshëm dhe të përmbahen nga aktivitetet që mund të shkaktojnë zjarre. Kjo për shkak të temperaturave të larta që po mbizotërojnë këto ditë në vendin tonë.

    Kjo është thirrja e Policisë së Kosovës në Pejë ku është theksuar se do të ndërmerren masa ligjore ndaj të gjithë aty që rrezikojnë jetën apo pronën e qytetarëve.

    Në njoftim është theksuar thirrja që qytetarët të shmangin ndezjen e zjarreve dhe të lajmërojnë autoritetet për çdo person të dystuar që mund të jetë i përfshirë në raste të të tilla.

    “Policia e Kosovës do të ndërmerr masa ligjore ndaj të gjithë atyre individëve që në një formë apo tjetër rrezikojnë jetën apo pronën e qytetarëve, qoftë qëllimisht apo përmes pakujdesisë së shfaqur në çfarëdo forme. Apelojmë tё tё gjithë qytetarët të cilët frekuentojnë zonat malore të rajonit tё Pejёs, e nё veçanti Bjeshkët e Nemuna qё maksimalisht tё jenё tё kujdesshëm dhe tё përmbahen çdo aktivitet qё mund tё shkaktoj zjarre gjatё përdorimit si shkrepsa, cigare, grilla, zjarre nё natyrё etj”, është bërë e ditur në komunikatën e Policisë.

  • Erdogan nis turneun në Gjirin Persik, optimist për marrëveshjen e grurit

    Erdogan nis turneun në Gjirin Persik, optimist për marrëveshjen e grurit

    Presidenti i Turqisë, Recep Tayyip Erdogan, njoftoi se ministrat e Jashtëm të Turqisë dhe Rusisë do të angazhohen në diskutime në lidhje me marrëveshjen e grurit të Detit të Zi të hënën.

    Ai shprehu optimizëm se kjo çështje mund të përparojë edhe pse Moska mori vendim për të pezulluar marrëveshjen.

    Erdogan, i cili udhëton të hënën në Arabinë Saudite në një turne me tre ndalesa në shtetet e Gjirit Persik për të kërkuar mundësi tregtare dhe investimesh për ekonominë e Turqisë, tha se do të diskutojë marrëveshjen, përfshirë eksportin e plehrave ruse, me Putinin kur ata të takohen personalisht në gusht.

    “Shpresoj se me këtë diskutim, ne mund të bëjmë një përparim dhe të vazhdojmë rrugën tonë pa pushim”, tha Erdogan, duke folur me gazetarët.

    Sipas Bordit të Marrëdhënieve Ekonomike me Jashtë të Turqisë, Erdogan do të mbërrijë në Xhedah i shoqëruar me rreth 200 biznesmenë.

    Ai pritet të takohet me Mbretin Salman dhe Princin e Kurorës Mohammed bin Salman. Gjatë udhëtimit tre-ditor të Erdoganit janë organizuar forume biznesi në Arabinë Saudite, Katar dhe Emiratet e Bashkuara Arabe.

    “Shpresojmë të përmirësojmë marrëdhëniet dhe bashkëpunimin tonë në shumë fusha. Ne do të fokusohemi në investimet e përbashkëta dhe iniciativat tregtare që do të realizohen në periudhën e ardhshme”, u tha Erdogan gazetarëve në Stamboll përpara se të nisej.

    Vizita vjen në kohën kur qytetarët e Turqisë janë goditur me rritje të taksave të produkteve dhe karburantit, të cilat ministri i Financave, Mehmet Simsek, ka thënë se janë të nevojshme për të rivendosur disiplinën fiskale dhe për të ulur inflacionin.

    Muajin e kaluar, banka qendrore turke njoftoi një rritje të madhe të normave të interesit, duke sinjalizuar një zhvendosje drejt politikave ekonomike më konvencionale pas kritikave se qasja e normës së ulët të Erdoganit e kishte përkeqësuar krizën e kostos së jetesës.

    Ankaraja kohët e fundit ka rivendosur marrëdhëniet me Arabinë Saudite dhe Emiratet e Bashkuara Arabe, pas një përçarjeje të gjatë dhjetëvjeçare.

    Çarja e raporteve ndodhi pas Pranverës Arabe të vitit 2011 dhe mbështetjes së Turqisë për Vëllazërinë Myslimane, e konsideruar si një kërcënim nga disa monarki të Gjirit.

    Katari dhe Emiratet e Bashkuara Arabe i kanë dhënë Turqisë rreth 20 miliardë dollarë kohët e fundit, ndërsa Arabia Saudite depozitoi 5 miliardë dollarë në Bankën Qendrore të Turqisë në mars.

    Disa ditë pasi Erdogan fitoi zgjedhjet presidenciale muajin e kaluar, Emiratet e Bashkuara Arabe dhe Turqia nënshkruan një marrëveshje tregtare me vlerë 40 miliardë dollarë për pesë vitet e ardhshme.

    Erdogan do të takohet me emirin e Katarit, Sheikh Tamim bin Hamad Al Thani, në Doha të martën përpara se të takojë udhëheqësin e Emirateve të Bashkuara Arabe në Abu Dhabi të mërkurën.

  • Italia mbyll aeroportin kryesor të Sicilisë për shkak të zjarrit

    Italia mbyll aeroportin kryesor të Sicilisë për shkak të zjarrit

    Aeroporti në qytetin sicilian të Katanias, një nga pikat kryesore turistike në Sicilinë lindore, është mbyllur deri të mërkurën për shkak të një zjarri, bëri të ditur kompania e menaxhimit të aeroportit në Twitter.

    Zjarri shpërtheu vonë të dielën dhe nuk pati të lënduar, njoftoi aeroporti.

    Zjarrfikësit thanë se ishin në gjendje të frenonin zjarrin rreth 90 minuta pasi u ndez, por nuk dhanë detaje mbi shkakun e mundshëm apo ndonjë lidhje me temperaturat e larta aktuale në rajon.

    Katania është një nga qytetet italiane që lëshoi alarmin e kuq për temperaturat e larta të dielën, së bashku me kryeqytetin sicilian Palermo dhe qytetin e tretë më të madh në ishullin Mesina.

    Vendi po përgatitet për temperatura të larta rekord në ditët në vijim.

    Fluturimet në aeroportin sicilian, i cili sipas grupit të sektorit Assoaeroporti, ishte i pesti më i ngarkuari në Itali vitin e kaluar, u pezulluan deri të mërkurën në orën 14:00 me kohën e Evropës Qendrore, njoftoi kompania.

    Agjencia e lajmeve Ansa njoftoi se pas shpërthimit të zjarrit, në pjesën e poshtme të ndërtesës u shfaq tym i dendur, duke bërë që njerëzit të largoheshin nga aeroporti në panik.

    Aeroporti i Katanias përdoret rregullisht nga turistët që shkojnë në vende si mali Etna dhe Taormina, i cili është rreth 70 kilometra larg, dhe Sirakuza, me teatrin e tij grek dhe qendrën historike në ishullin Ortigia.

    Dhjetëra miliona njerëz janë duke u përballur me temperatura shumë të larta në gjithë botën.

    Moti i nxehtë në Shtetet e Bashkuara, Evropë dhe Azi, konsiderohet një prej shembujve se si rrezikohet bota nga ngrohja globale.

    Temperatura mesatare globale e ka prekur një rekord të ri në javën e parë të korrikut.

    Temperatura mesatare në botë e ka prekur shifrën 16.89 gradë Celsius më 3 korrik dhe e ka tejkaluar shifrën 17 gradë për herë të parë më 4 korrik, me një mesatare globale prej 17.04 gradë Celsius. /REL/