Category: Lajme

Ushtruesi i detyrës së kryetarit të OVL-UÇK-së, Faton Klinaku tha sa me kryeministrin Albin Kurti nuk është kompetentë që të flas për numrin e veteranëve të luftës, raporton EO.

Ai pas takimit me presidenten Vjosa Osmani, duke iu referuar një deklarate të Kurtit se është trefishuar numri i veteranëve pohoi se nuk i takon atij që të merret me këtë çështje kur verifikimi është bërë nga komandantët dhe se dosja është në Prokurori.

Kërkesat e tyre sa i përket ligjit për pagën minimale, ai tha Osmani i ka shënuar, por që nuk ka dhënë ndonjë koment shtesë.

Përderisa tha se me Kurtin nuk kanë kontaktuar qe një vit dhe se Qeveria e Kuvendi nuk po merren me kërkesat a tyre. Madje thotë se Qeveria po trumbeton e po thërret në përçarje.

Ky takim është kërkuar nga veteranët e UÇK-së, pasi sipas tyre, janë lënë jashtë kategorisë në Ligjin për pagën minimale.

Kurse, shoqëria civile së bashku me Organizatën e Veteranëve të Luftës protestuan gjatë së shtunës së kaluar para ndërtesës së Qeverisë, rreth këtyre pakënaqësive.

Gjykata Themelore në Ferizaj, ka shpallur aktgjykim lirues ndaj të akuzuarve Muhamet e Arbër Sejdiu dhe Gazmend Peci, të cilët akuzoheshin për tentim vrasje e armëmbajtje pa leje.

Ndryshe, Arbër Sejdiu është i akuzuar edhe në rastin vrasjes së 18-vjeçares në Ferizaj, Marigona Osmanit. Sipas aktgjykimit të shpallur të martën nga kryetari i trupit gjykues, Habib Zeqiri, të akuzuarit janë liruar nga të gjitha pikat e aktakuzës me arsyetimin se nuk është provuar se të njëjtit kanë kryer veprat penale si në aktakuzë, raporton “Betimi për Drejtësi”.

Sipas aktgjykimit, janë konfiskuar në mënyrë të përhershme katër gëzhoja, tri predha, një shufër e gomës si dhe një fishek 7×62 mm.

Ndërsa, shpenzimet e procedurës bien në barrë të kësaj gjykate.

Sipas aktakuzës, të akuzuarit Muhamet Sejdiu dhe Arbër Sejdiu më 11 korrik 2013 në rrugën “Driton Islami” në Ferizaj afër pompës së derivateve “Kema Petrol”, me dashje kishin tentuar që t’i privojnë nga jeta Gazmend Pecin dhe Fevzi Smajlin, në atë mënyrë që kishin shtënë me armë zjarri të kalibrit 9×19 mm, katër herë në drejtim të tyre, me ç’rast kishin goditur veturën në pjesën e prapme, të cilën ishte duke e vozitur Gazmend Peci, e tipit “Pasat”, duke rrezikuar jetën edhe të pasagjerit Fevzi Smajli.

Gjithnjë sipas aktakuzës, krejt kjo kishte ardhur pasi në muajin shkurt të vitit 2012, Gazmendi kishte bërë një marrëveshje me vajzën e të pandehurit të parë, I.S, që të lidhin martesë për t’ia rregulluar shtetësinë suedeze, për të cilën Gazmendi kishte për të paguar 20 mijë euro, ndërsa kishte dhënë parapagesën në shumën prej 7 mijë e 500 euro sipas marrëveshjes, gjë që nuk kishte ndodhur deri më tani martesa në fjalë.

Me këtë, akuzohen se në bashkëkryerje kanë kryer veprën penale “Vrasje në tentativë”, nga neni 178, par. 1, nënparagrafi 1.5 lidhur me nenin 28 dhe 31 të Kodit Penal.

Sipas dispozitivit II të aktakuzës, me datë, kohë dhe vendin si në dispozitivin e parë të kësaj akuze, të pandehurit kishin mbajtur në mënyrë të paautorizuar armën e llojit revole të kalibrit 9x19mm, të cilën e kanë përdorur në rrethana dhe mënyrën, si në dispozitivin e parë të kësaj aktakuze.

Me këtë, akuzohen se në bashkëkryerje kanë veprën penale “Mbajtja në pronësi, kontroll, posedim ose në shfrytëzim të paautorizuar të armēve” nga nenin 374, par. 1 të Kodit Penal.

Tutje, sipas aktakuzës i akuzuari Gazmend Peci më 11 korrik 2013, në rrugën “Driton Islami” në Ferizaj afër pompës së derivateve “Kema Petrol”, me dashje kishte tentuar të privojë nga jeta Muhamet e Arbër Sejdiun dhe Admir Aliun, në atë mënyrë pasi që kishte filluar konfliktin me Muhametin tek shtëpia e këtij të fundit, i pandehuri kishte vazhduar rrugën nga Ferizaj për në drejtim të Prishtinës, pasi që i ishte vënë pas ndjekjes Muhameti, Arbëri dhe Admir Aliu, kishte nxjerrë revolen dhe kishte shtënë një herë në drejtim të tyre, duke goditur në pjesën e përparme të motorit të automjetit “Volvo”, e cila ishte pronë e familjes Sejdiu.

Sipas aktit akuzues, krejt kjo kishte ardhur për shkak të marrëveshjes që Gazmendi e kishte bërë me vajzën e të pandehurit të parë rreth martesës për t’ia rregulluar shtetësinë suedeze.

Me këtë, akuzohet se ka kryer veprën penale “Vrasje në tentativë” nga neni 178, par.1, nënparagrafi 1.5 lidhur me nenin 28 të Kodit Penal.

Sipa dispozitivit IV të aktakuzës, me datë, kohë dhe vendin si në dispozitivin e tretë të kësaj aktakuze, i pandehurit kishte mbajtur në mënyrë të paautorizuar armën e llojit revole të kalibrit 7×26, të cilën e kishte përdorur ne rrethana dhe mënyrën si në dispozitivin e tretë të kësaj aktakuze.

Me këtë, akuzohej se ka kryer veprën penale “Mbajtja në pronēsi, kontroll, posedim ose në shfrytëzim të paautorizuar të armēve”, nga neni 374, par. 1 të Kodit Penal, vepër me të cilën kryerësi dënohet me gjobë deri në 7 mijë e 500 euro ose me burgim deri në pesë vjet. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Kryeministrja italiane, Giorgia Meloni ka kritikuar vendimin e Rusisë për të mos zgjatur marrëveshjen e ndërmjetësuar nga OKB-ja, e cila i lejonte Ukrainës të eksportonte drithërat e saj gjatë luftës së shkaktuar nga pushtimi i Moskës.

“Vendimi i Rusisë për të ndërprerë marrëveshjen e drithërave është një provë e mëtejshme se kush është miku dhe kush është armiku i vendeve më të varfra”, tha Meloni vonë të hënën, “udhëheqësit e atyre vendeve që nuk duan të bëjnë dallimin midis sulmuesit dhe të sulmuarit duhet të reflektojnë”.

“Përdorimi si armë i lëndës së parë që ushqen botën është një tjetër shkelje kundër njerëzimit”, tha ajo, shkruan ANSA.

Zëvendëskryeministri dhe ministri i Jashtëm Antonio Tajani tha të hënën se Italia dhe partnerët e saj ndërkombëtarë po punonin për “zgjidhje alternative” pasi Rusia vendosi të prishë marrëveshjen, përcjell KosovaPress.

“Mungesa e ushqimit në Afrikë na shqetëson të gjithëve”, tha Tajani përmes Tëitter.

“Ne jemi shumë të shqetësuar që Rusia i dha fund marrëveshjes për drithërat.

“Tashmë jemi duke punuar për zgjidhje alternative.

“Çështja do të trajtohet në samitin e sigurisë ushqimore që kemi organizuar me Kombet e Bashkuara në Romë, më 24 korrik”.

Sekretari i Përgjithshëm i Kombeve të Bashkuara Antonio Guterres tha të hënën se “miliona njerëz do të paguajnë çmimin” e tërheqjes së Rusisë nga marrëveshja.

Agjencia e Menaxhimit Emergjent apelon qytetarët të jenë të kujdesshëm për shmangien e të gjithë shkaktarëve të mundshëm të zjarrit, në këto ditë me temperatura të larta.

Në një njoftim publik theksohet se zjarrvëniet e qëllimta, si dhe ato të shkaktuara nga pakujdesia, janë vepra penale të cilat sanksionohen me ligj.

Agjencia për Menaxhimin Emergjent thotë se temperaturat e larta të ndikojnë në rritjen e rrezikut për shfaqjen dhe zgjerimin e vrullshëm të zjarreve në sipërfaqe të hapura, malore dhe fushore.

“APELOJMË, të jemi të gjithë të kujdesshëm dhe vigjilent për shmangien e të gjithë shkaktarëve të mundshëm të zjarrit, vërejtjen dhe lajmërimin me kohë në numrat emergjent, si dhe të ndihmojmë në shuarjen e zjarrit” kudo që ai mund të paraqitet dhe kërcënon, pasi që për një veprim të tillë përveç tjerash na obligon edhe Kushtetuta e Republikës së Kosovës si dhe aktet tjera ligjore dhe nënligjore. Vlenë të theksohet dhe t’iu bëhet e ditur se zjarrvëniet e qëllimta, si dhe ato të shkaktuara nga pakujdesia, janë vepër penale të cilat sanksionohen me ligj”, thuhet në njoftim.

Numrat emergjent për rastë të tilla janë pa pagesë dhe funksionojnë 24 orë, shtatë ditë të javës:

112 Qendra Operative Emergjente nga VALA dhe IPKO(pa pagesë), 193 zjarrfikësit, 192 Policia dhe 194 Shërbimi Mjekësor Emergjent. /KP

Ish-komandanti i Zonës Operative të Llapit, Rrustem Mustafa pas përfundimit të dëshmisë të tij në Hagë, duke thënë se ishte shumë e rënd ndjesia të ketë përballë bashkluftarët me akuza aq të padrejta.

Ai ka shkruar në Facebook se nuk ka relativizim të fajit.

“Ky relativizim sa i pamoralshëm po aq i palogjikshëm, përfundoi me një kategorizim absurd dhe cinik: ata që sulmonin, ata që masakronin, ata që zbatonin strategjinë e tokës së djegur, ata që e pastronin etnikisht një territor të huaj, ata që ishin në tokë të huaj. Rrugën e relativizimit të fajit e ndjek politika serbe e mbështetur nga Rusia, madje edhe drejtuesit më të moderuar të partive politike dhe të shtetit. Ata me po aq zell vazhdojnë ta zbulojnë fajin e të tjerëve, ndërkohë që nuk distancohen nga krimet që ka bërë një regjim, një shtet, njerëz konkretë në kohë dhe hapësirë të caktuar. Asnjë shpifje kundër të tjerëve, veçmas UÇK-së, asnjë imputim nuk mund ta zhbëjë katrahurën që shkaktoi politika kriminale e një regjimi, i cili duke indoktrinuar të tjerët e indoktrinoi veten, siç shihet, përjetësisht”, ka shkruar ai.

Bordi i Shërbimit Spitalor Klinik Universitar të Kosovës (SHSKUK) para deputetëve të Komisionit për Shëndetësi deklaroi se janë duke punuar për përmirësimin e sistemit shëndetësor me të gjithë mundësitë që kanë. Të njëjtit janë kritikuar për mungesë të barnave esenciale në klinikat e QKUK-së dhe spitalet rajonale si dhe për lista të gjata të pritjes për shërbimet që ofrohen nga institucionet nën ombrellën e SHSKUK.

Kryesues i bordit të SHSKUK-së, Naim Bardiqi derisa ka prezantuar punën që kanë realizuar për gati tre muaj tha se po mundohen të japin kontribut për përmirësimin e sistemit shëndetësor gjithmonë duke pasur në fokus shërbimet cilësore dhe të sigurta për qytetarët e vendit.

Bardiqi tha se në 12 mbledhjet me bordin që janë mbajtur deri më tani kanë trajtuar tema të caktuara në mënyrë që ne të kenë mundësi të njohin dhe të ofrojnë zgjidhje për problemet që ballafaqohet SHSKUK.

“Po mundohemi të japim një kontribut për përmirësimin e sistemit gjithmonë duke pasur në fokus shërbimet cilësore dhe të sigurta për qytetarët e vendit… Rëndësi të veçantë i kemi kërkuar adresimit të rekomandimeve që kanë dalë nga raporti i auditimit për pasqyrat vjetore financiare të SHSKUK-së për vitin 2022 nga Zyra Kombëtare e Auditimit, duke kërkuar nga menaxhmenti përgatitjen e fushëveprimit që janë në funksion të rekomandimeve… Për vitin 2023 në organizatën buxhetore në SHSKUK janë buthtuar 139 milionë e 665 mijë euro… Si rrjedhojë kemi për fokus ngritjen e nivelit menaxherial të njësive organizative të SHSKUK-së, ofrimin e kujdesit shëndetësor, cilësor dhe të sigurt, kosto efektive, ngritje e performancës, rritjen e shfrytzueshmerisë së shtretërve, së pajisjeve mjekësore dhe aty ku ka mundësi eliminimin e listave të pritjes”, tha Bardiqi.

Ndërsa drejtori i ri i SHSKUK-së, Elvir Azizi i cili ka tetë ditë që është emëruar në këtë detyrë, ka përmendur disa nga sfidat që ka hasur gjatë këtyre ditëve.

Azizi është zotuar se do të bëjë më të mirën që qytetarët të ndihen të sigurtë në shërbimet që ofron SHSKUK.

“Gjatë kësaj periudhe kohore kam realizuar vizita më shumë për t’u njoftuar me infrastrukturën e komplet shërbimeve. Gjatë kësaj kohe, por edhe më përpara kam vërejtur që njëra prej sfidave më të mëdha është vet funksionimi i SHSKUK-së dhe QKUK-së së bashku, pra drejtori i përgjithshëm njëkohësisht është menaxher edhe i SHSKUK-së dhe i QKUK-së. Sfidat e tjera janë edhe furnizimi i rregullt me barna dhe materiale shpenzuese, mungon dokumentacioni i brendshëm, nuk ka përshkrim të detyrave të punës, nuk ka protokolle klinike, ka mungese të gjithmbarshme të një baze të mirë për sistem të cilësisë. Infrastruktura është vjetruar dhe jemi shumë vonë me digjitalizimin. Do të merrem me disa drejtime, kryesisht në listën e shërbimeve, prioritet është që të themelohet dhe të aprovohet lista e shërbimeve shëndetësore, në listën e shërbimeve shëndetësore ekziston edhe një mungesë e transparencës së cili shërbim duhet të ofrohet e cili jo… Secili spital rajonal mund të referon në QKUK pacientët pa pas rregulla se kur duhet t’i referojë e kur jo. Ngecja në furnizim shkakton ngecje në ofrimin e shërbimeve të sigurta”, tha Azizi.

Ndërsa, deputeti i Lidhjes Demokratike të Kosovës, Armend Zemaj, ka uruar që drejtori i ri i SHSKUK-së të ketë prioritet punën dhe jo të jetë i lidhur me pushtetin.

Ai u interesua më shumë rreth listave të pritjes që ekzistojnë nëpër klinikat e QKUK-së.

“Janë 30 muaj të kësaj Qeverie dhe është drejtori i katërt i SHSKUK-së… E kemi parë një dëshirë të flaktë të kësaj Qeverie është për një kontroll të plotë dhe kjo u bë me zgjedhjen e një sekretari në krye të bordit… Esenciale është mungesa e barnave dhe kjo është fatkeqësi me fol kur është proklamuar për rritje të buxhetit. Si do ta adresoni sepse mos të ketë antibiotik është papërgjegjësi dhe e dyta është lista e pritjes në të gjitha klinikat. Kur së fundmi është përpiluar lista e pritjes dhe kur do të ketë përditësim të saj dhe çfarë hapa keni me ndërmarr”, pyeti tutje Zemaj.

Bardiqi, duke përmendur edhe arsyet që kanë bërë të shtohen listat e pritjes, tha se kanë kërkuar nga të gjitha klinikat që t’ju dërgohen ato.

“Bordi drejtues i SHSKUK-së-së meqenëse kemi dy muaj e gjysmë kur kemi filluar punën, kemi kërkuar me datën 26 qershor të na dërgohen nga menaxhmenti listat e pritjeve. Në funksion të kësaj kemi identifikuar se listat e pritjes janë për pasojë e mos racionalizimit të stafit. Mirëpo, në këtë drejtim është keqpërdorimi eventual në mungesë të mekanizmave të monitorimit të periudhës kohore të mos prezencës në punë, një mungesë e furnizimit me barna, ose mosmirëmbajtje e mirë e pajisjeve”, tha Bardiqi.

Kryetarja e këtij komisioni parlamentar, Fatmire Kollçaku ka kërkuar që në punë të ketë etikë të veshjes e të sjelljes ndaj pacienteve, sipas saj kjo është duke munguar në spitale.

“Në Pejë ka funksionuar një komision perfekt ku ka qenë një infermiere Fatime Kurmehaj e cila është pensionuar. Mendoj ta thërrisni atë veç të mbaj trajnime në spitale të tjera regjionale, edhe pse është e pensionuar do të shërbejë shumë, sepse në kohën e saj nuk ka pas mundësi një infermiere të vendos unaza, me thonj, aty me dalë nëpër byrektore e qebaptore e të kthehet. Në punë duhet të ketë etikë të veshjes e sjelljes, pacienti nuk e din ku gabuar një mjek të terapia, ai e mban mend sjelljen, e jo sjellje jo njerëzore”, tha Kollçaku.

Shërbimi Spitalor Klinik Universitar i Kosovës ka nën ombrellën e saj 37 klinikat e Qendrës Klinike Universitare të Kosovës si dhe shtatë spitale rajonale./KP

Përfaqësues të degës së Lëvizjes Vetëvendosje në Prishtinë, ka akuzuar kryetarin e Komunës së Prishtinës, Përparim Rama se po sfidon opinionin ligjor të Ministrisë së Pushtetit Lokal, e cila i ka vlerësuar disa vendime si pa efekt juridik. Ata theksuan se po bëhet një precedentë shumë i rrezikshëm ku për herë të parë një kryetar i komunës nuk merr parasysh opinionin e ministrisë.

Shefi i asamblistëstëve të Lëvizjes Vetëvendosje, Gëzim Sveçla në konferencën e mbajtur për media tha së ata si aksionarë të lëvizjes Vetëvendosje janë penguar fizikisht të ndërhyjnë në ndërmarrje publike, disa nga ndërmarrjet nuk kanë gjetur as edhe persona përgjegjës e as nuk janë pritur.

Ai duke bërë një kronologji të ngjarjeve, ka thënë se më 8 qershor Kuvendi komunal ka shkarkuar ish aksionarët dhe janë emëruar aksionarët e rinj të ndërmarrjeve komunale dhe më 14 qershor, gjë që është konfirmuar edhe nga ministria se gjithçka ka shkuar sipas procedurës ligjore.

Sveçla i ka përmendur edhe seancën e 27 qershorit, ku pas përfundimit të seancës nga kryesuesi, LDK dhe PDK ka vazhduar seancën, duke marrë disa vendime të cilat, Ministria e Pushtetit Lokal, i ka konsideruar si pa efekt juridik, gjë që në fuqi do të duhej të mbesin vendimet e 8 qershorit, ku janë emëruar kryetarët e rinj të ndërmarrjeve.

“Në disa ndërmarrje na është ndaluar qasje, e në disa nuk na ka pritur askush dhe ne nuk kemi arritur që t’i ushtrojmë kompetencat tona, si aksionarë legjitim të qytetit të Prishtinës. Kryetari Rama përkundër se ministria ka vlerësuar se vendimet të cilat i kanë marrë në seancën e cila ishte mbyllur bëjnë efekt juridik, ai i ka sfiduar këto vendime dhe ka publikuar në faqen e komunës, është një precedentë shumë i rrezikshëm ku për herë të parë një kryetar nuk merr parasysh opinionin ligjor të ministrisë por publikon vendime të cilat nuk kanë vlerë juridikë. Është një precedent i rrezikshëm i cili mund të shërbej për kryetarë të komunave tjera dhe në këtë mënyrë kryetari Rama po e sfidon procedurën administrativë në nivel vendi”, tha Sveçla.

Ndërsa, aksionari i Ndërmarrjes Publike Banesore, Arianit Beqiri tha se ata janë votuar si aksionar më 8 qershor, aksionarët e mëhershëm, bashkë me kryeshefin dhe bordin e saj, kanë vendosur që të anulohet projekti i dëmshëm 120 mijë euro.

Ai tha se kanë tentuar të hyjnë në ndërmarrje, por me ndërhyrjen e aksionarëve të kaluar, ndërhyri policia duke mos i lënë të futën në ndërmarrje.

“Nuhi Halimi, kryesues i Bordit të NPB-së, kandidat për asamble i PDK-së, dje bashkë me anëtarët e PSD-së të instaluar nga Dardan Molliqaj në NPB, e ruanin objektin thuajse i takon atyre e jo qytetarëve të Prishtinës, Po atë ditë, dje në mëngjes, drejtori për siguri dhe emergjenca në Prishtinës i dërgon një letër Policisë së Kosovës ku i kërkon që të patrullojë nëpër objektet e ndërmarrjeve se mund të ketë tentim të prishjes së rendit dhe qetësisë publike, por në asnjë vend nuk thuhet se një drejtor i një drejtorie ka për kompetencë që të urdhërojë policinë që të sigurojë këto hapësira. Sigurisht policia e vënë në lajthitje nga ky dokument që ky drejtor kishte dërguar, pra ato dokumente nga ata të emëruarit e atëhershëm e jo këta tash, ndërhyri duke mos na lënë që ne të futemi në objektet e komunës, me këtë rast të vend që të asistonte kundër pengimit të personit zyrtar në kryerjen e detyrës zyrtare, ata asistuan në zaptimin e ndërmarrjes….asaj që nga ka ndodhur dje që për neve përbën vepër penale që do të ankohemi në gjykatë, do të ankohemi edhe për këta policë në Inspektoratin Policor”, tha ai. /kp