ATV

Category: Lajme

  • Dënim meritor për Krivaqën, të zhgënjyer me dënimin ndaj Sejdiut

    Dënim meritor për Krivaqën, të zhgënjyer me dënimin ndaj Sejdiut

    Me pankarta të cilat bënë thirrje për dënim maksimal për dy të akuzuarit për vrasjen e Marigona Osmanit, Dardan Krivaqa e Arbër Sjediu, Kolektivi për Mendim dhe Veprim Feminist mbajti aksion para Gjykatës Themelore në Ferizaj.

    Sipas kësaj organizate, dënimi me burgim të përjetshëm ndaj të akuzuarit kryesor, është mesazh për keqbërësit, por nuk munguan kritikat për institucionet e drejtësisë.

    “E nga këtu çojmë mesazhe për çdo institucion që t’i mbrojë gratë para se të jetë shumë vonë, edhe prapë theksojmë se shteti duhet ta trajtojë femicidin si urgjencë shtetërore…”, tha Bjeshkë Guri nga Kolektivi për Mendim dhe Veprim Feminist.

    Megjithatë, dënimin me 15 vjet burgim ndaj të akuzuarit të dytë, Arbër Sejdiu, solli pakënaqësi.

    Për vrasjen e Marigona Osmanit, Gjykata Themelore në Ferizaj ka dënuar me burgim të përjetshëm Krivaqën. Ndërkaq, Arbër Sejdiu është dënuar me 15 vjet burgim, për veprën penale “ndihmë në kryerjen e vrasjes së rëndë”. /atvlive.tv

    Edicionin Qendror të lajmeve në ATV e gjeni në videon e më poshtme:

  • Burgim të përjetshëm për Dardan Krivaçën, reagimi i familjarëve kur kuptojnë vendimin!

    Burgim të përjetshëm për Dardan Krivaçën, reagimi i familjarëve kur kuptojnë vendimin!

    Me brohoritje e duartrokitje në sallën e Gjykatës Themelore në Ferizaj është përcjellë dënimi për Dardan Krivaqën, i akuzuar për vrasjen e Marigona Osmanit.

    Krivaqa u dënua për “Vrasje të rëndë”, por është liruar nga akuza për dhunim.

    Nga akuza për ndihmë në kryerjen e dhunimit u lirua edhe Arbër Sejdiu. Por, për akuzën ndihmë në vrasje të rëndë, ai u dënua me 15 vjet burgim.

    Të kënaqur me vendimin e gjykatës ndaj të akuzuarit kryesor, Dardan Krivaqa ishin familjarët e viktimës, edhe pse nga salla dolën të mllefosur për shkak të dënimit ndaj Sejdiut.

    Megjithatë, avokati i familjes Osmani njoftoi se me të marrë aktgjykimin e plotë do të ankohen ndaj këtij vendimi.

    Vendimi ndaj të akuzuarve Krivaqa e Sejdiu, shpallet pothuajse 2 vjet pas vrasjes së Marigona Osmanit. Marigona, 18 vjeçe, u vra më 22 gusht të vitit 2021. Krivaqa e Sejdiu e kishin lënë atë pa shenja jete te dyert e spitalit të Ferizajt.

    Sipas aktakuzës, Marigona ishte keqtrajtuar për më shumë se 72 orë. Gjykimi për vrasjen e saj filloi më 12 korrik të vitit të shkuar. /atvlive.tv

    Edicionin Qendror të lajmeve në ATV e gjeni në videon e më poshtme:

  • Oficeri i FSK-së shpëtoi nënë e bijë nga Kosova nga mbytja në det

    Oficeri i FSK-së shpëtoi nënë e bijë nga Kosova nga mbytja në det

    Një grua nga Kosova, F.Berisha dhe vajza e saj, R.Berisha, kanë shpëtuar nga mbytja në det, falë intervenimit të shpejtë dhe vetëmohues të oficerit të FSK-së, nënkolonel Bexhet Shala.

    Ministria e Mbrojtjes ka bërë të ditur se ngjarja ka ndodhur në një nga plazhet e qytetit të Shëngjinit në Shqipëri, ku nënkolonel Shala ishte për pushime me familjen tij.

    “Unë kam bërë vetëm detyrën. Ne si ushtarakë të FSK-së, e kemi mision që çdo herë të jemi në gatishmëri për tu përgjigjur situatave që kërkohen që të jemi të gatshëm të ndihmojmë këdo, pa dallim, deri në vetëmohim”, ka theksuar nënkolonel Bexhet Shala.

    Nënkolonel Bexhet Shala ka marrë falënderime të shumta nga familja Berisha, për veprën e tij humane, në shpëtimin e jetëve të të dy familjareve të tyre.

  • Aktakuzë kundër tre personave që sulmuan gazetarin Valon Syla

    Aktakuzë kundër tre personave që sulmuan gazetarin Valon Syla

    Prokuroria Speciale e Republikës së Kosovës (PSRK), ka ngritur sot aktakuzë në Gjykatën Themelore në Prishtinë – Departamentin Special, kundër tre të pandehurve me inicialet L.D, K.H dhe O.H. pasi që ekziston dyshimi i bazuar mirë se të njëjtit, të motivuar me ideologji ekstreme radikale Islame përkatësisht të besimit fetarë, e kanë sulmuar fizikisht dhe i kanë shkaktuar lëndime të lehta trupore të dëmtuarit, gazetarit, Valon Syla.

    Me këto veprime të pandehurit L.D, K.H dhe O.H. në bashkëkryerje e kanë kryer veprën penale ‘’Lëndimi i lehtë trupor’’ nga neni 185 paragrafi 3 nën paragrafi 3.1 lidhur me paragrafin 1 dhe nenin 31 të KPRK-së.

  • ​Milano mbyll parqet pas paralajmërimeve për stuhi

    ​Milano mbyll parqet pas paralajmërimeve për stuhi

    Të premten Milano mbylli parqet, varrezat dhe tregjet e hapura në afërsi të të cilëve ka pemë, për shkak të stuhive të dhunshme që parashihet të godasin rajonin verior të Lombardisë.

    Ardhja e ciklonit Circe pritet të sjellë stuhi me shi të rrëmbyeshëm dhe erëra të fuqishme në shumë pjesë të Italisë, raporton ANSA.

    Meteorologu i iLMeteo.it, Lorenzo Tedici, tha se temperaturat do të bien për të paktën 10 gradë Celsius.

    Italia u godit nga një sërë valësh të jashtëzakonshme të nxehti muajin e kaluar si dhe nga valë stuhish shkatërruese.

    Në mesin e majit përmbytjet dhe rrëshqitjet e dheut të shkaktuara nga reshjet e rrëmbyeshme lanë 15 të vdekur dhe shkaktuan miliarda euro dëme në bujqësi, ekonomi dhe infrastrukturë.

    Shkencëtarët thonë se kriza klimatike e shkaktuar nga emetimet e gazrave serrë të njeriut po i bën më të shpeshta dhe më intensive ngjarjet ekstreme të motit si valët e të nxehtit, thatësirat, stuhitë e forta, stuhitë me breshër, erërat e forta dhe përmbytjet.

  • ​PDK: Qeveria Kurti është rreziku kryesor për rendin demokratik në Kosovë

    ​PDK: Qeveria Kurti është rreziku kryesor për rendin demokratik në Kosovë

    Partia Demokratike e Kosovës (PDK) e ka akuzuar Qeverinë e Kosovës për rrezikim të rendit demokratik në vend. Sipas partisë më të madhe opozitare në Kuvend, vendimi i Gjykatës Kushtetuese për Ligjin për zyrtarët publikë konfirmon veprimtarinë dhe aktivitetin antikushtetues të kryeministrit Albin Kurti.

    Anëtari i Kryesisë së PDK-së, Bernard Nikaj, në një konferencë për medie të premten tha se Qeveria Kurti, në 900 ditë të qeverisjes së tyre është karakterizuar vetëm me skandale, afera korruptive, kapje të institucioneve, dhe stagnim e degradim të politikës së jashtme.

    “Gjatë këtyre 900 ditëve, fatkeqësisht, Qeveria është marrë shumë pak me qeverisje dhe është marrë tejet shumë me sulme kundër rendit kushtetues të vendit tonë… Ndonëse shkeljet e pushtetarëve tashmë janë me qindra e po shtohen për çdo ditë, për të shtatën herë më radhë, vendim (Gjykatës Kushtetuese për Ligjin për zyrtarët publik) konfirmon veprimtarinë dhe aktivitetin antikushtetues të Qeverisë së Albin Kurtit, e karakterizuar për skandale, afera korruptive, kapje të institucioneve, dhe stagnim e degradim të politikës së jashtme…Në vend që qeveria t’i kontribuoj zhvillimit të demokracisë ajo po shfaqet si rreziku kryesor për rendin demokratik për vendin tonë. Është koha e fundit që kjo qeveri të mbajë përgjegjësi për veprimet e veta në kundërshtim me ligjin dhe Kushtetutën e vendit”, tha ai.

    Kritik ndaj ekzekutivit u shfaq edhe avokati i Grupit Parlamentar të PDK-së, Faton Fetahu, i cili tha se vendimi i djeshëm i Gjykatës Kushtetuese për të rrëzuar nenet kyçe të Ligjit për zyrtarët publik është historik.

    Sipas tij, Kushtetuesja rrëzoi përpjekjet e qeverisë për të vënë kontroll të plotë mbi Administratën e Shtetit.

    “U rrënuan përpjekjet e kësaj qeverie për të vënë kontroll të plotë dhe centralizuar mbi administratën e shtetit. Mund të quajmë se ky vendim është historik i Gjykatës Kushtetuese, pasi nuk u përligj standardi i vënë në këtë projektligj, që për kalim në shërbimin civil kandidatët duhet të kenë kriterin e përshtatshmërisë. Gjykata Kushtetuese i tha jo këtij kriteri për të punuar në administratë. Po ashtu, kushtetuesja rrënoi përpjekjet e qeverisë për t’i privuar zyrtarët publik nga e drejta për ankesa dhe i tha jo përpjekjeve për të larguar masivisht zyrtarët civil që zgjidhen në pozita të ulëta dhe të mesme drejtuese”, theksoi Fetahu.

    I pyetur nga gazetarët, Nikaj i PDK-së, foli edhe për vendimin e sotëm të Qeverisë së Kosovës për zvogëlim edhe të 25 për qind të prezencës së Policisë së Kosovës në dhe rreth objekteve komunale në veri.

    Ai kritikoi Kurtin për qasjen e tij në raport me situatën në veri, pasi siç tha Kosova vazhdon të jetë nën sanksione.

    “PDK-ja ka qenë në vazhdimësi e mendimit se kryeministri duhet të marrë veprime të shpejta dhe guximshme për të adresuar në detaje dhe koordinim me miqtë tanë ndërkombëtar situatën në veri. Por kryeministri ka vendosur të bëjë të kundërtën, të bëjë të njëjtën gjë, por me hapa të ngadalshëm që vetëm kanë humbur kohë, rritë tensionin dhe fut vendin nën sanksione. Ashtu siç e keni parë kemi një dy kuptim të asaj çka po ndodh. Derisa kryeministri mendon se këto masa janë të mjaftueshme për të hequr sanksionet e vendosura nga BE-ja, ata vazhdojnë t’ia ri-përsërisin kërkesat që i kanë bërë në fillim që Kosova t’i përmbushë tri pikat për të cilat është dakorduar Këshilli i BE-së, që përfshinë tërheqjen e të gjitha forcave dhe shpalljen e zgjedhjeve. Prandaj Kurti edhe në këtë fushë po humb kohë, ku qytetarët vazhdojnë të jenë nën sanksione”, përfundoi ai./KP/

  • ​Dhjetëra të vdekur pasi autobusi me emigrantë u përplas në një luginë në Meksikë

    ​Dhjetëra të vdekur pasi autobusi me emigrantë u përplas në një luginë në Meksikë

    Të paktën 18 persona kanë vdekur dhe 23 të tjerë u lënduan, shumica e të cilëve ishin shtetas të huaj, kur autobusi që po i transportonte ra në një luginë në veriperëndim të Meksikës të enjten.

    Autobusi, i cili po transportonte rreth 42 pasagjerë nga India, Republika Domenikane dhe disa vende afrikane, po udhëtonte nga Mexico City për në Tijuana, e cila kufizohet me San Diego në shtetin e Kalifornisë, nga ku shumë emigrantë përpiqen të kërkojnë strehim në SHBA, njoftuan mediat lokale, duke cituar zyrtarë.

    Autobusi ra nga një lartësi prej 40 metrash, sipas një deklarate nga Mbrojtja Civile dhe Zjarrfikësit e Nayarit.

    Nga aksidenti kanë humbur jetën 18 persona, mes tyre tre fëmijë, ndërsa 23 të tjerë kanë mbetur të lënduar, shkruan Anadolu Agency.

    Shoferi i autobusit, i cili i mbijetoi përplasjes, është arrestuar me dyshimin për shpejtësi tej normave të lejuara, çka bëri që ai të humbiste kontrollin dhe të rrëzohej në një luginë pranë kryeqytetit të shtetit Tepic.

    Besohet se pasagjerët në autobus ishin emigrantë të parregullt që tentonin të kalonin kufirin amerikan.

  • ​Borrell: BE duhet të bindë Rusinë që të rikthehet në marrëveshjen e grurit

    ​Borrell: BE duhet të bindë Rusinë që të rikthehet në marrëveshjen e grurit

    Bashkimi Evropian duhet të bindë Rusinë që të rifillojë pjesëmarrjen e saj në Iniciativën e Kokrrave të Detit të Zi, tha të premten shefi i Politikës së Jashtme të BE-së, Josep Borrell, në një postim në Twitter.

    “Rusia duhet të ndalojë së përdoruri ushqimin si armë”, shtoi Borrell.

    Borrell kritikoi Rusinë për vendimin e saj për t’u tërhequr nga marrëveshja e grurit dhe për përpjekjen për të shmangur fajin duke pretenduar “se eksportet e saj bujqësore nuk u lehtësuan mjaftueshëm”.

    “Në kundërshtim me gënjeshtrat e përhapura nga Rusia, BE-ja me të vërtetë ka siguruar që sanksionet tona të mos kenë ndikim në sigurinë globale të ushqimit”, shtoi Borrell.

    Ai tha gjithashtu se pas tërheqjes së saj muajin e kaluar, ushtria ruse filloi të synonte objektet e magazinimit të grurit të Ukrainës, gjë që rriti çmimet.

    Ai garantoi se BE do të vazhdojë të mbështesë përpjekjet e Turqisë dhe përpjekjet e OKB-së për të rifilluar marrëveshjen.

    Unioni do të forcojë gjithashtu “korsitë e tij të solidaritetit si rrugë alternative për eksportet bujqësore ukrainase për të arritur tregjet globale përmes BE” dhe do të rrisë mbështetjen e tij financiare për vendet në nevojë.

    Më 17 korrik, Rusia ka pezulluar pjesëmarrjen e saj në marrëveshjen e grurit të Detit të Zi, duke thënë se pjesa ruse e marrëveshjes nuk është zbatuar. Ajo ka kërkuar lehtësimin e kufizimeve bankare dhe mundësinë për të transportuar plehrat e saj para se t’i kthehet marrëveshjes.

    Marrëveshja, e nënshkruar në korrik 2022 në Stamboll nga Turqia, OKB, Rusia dhe Ukraina ka pasur për qëllim rifillimin e eksporteve të grurit nga portet ukrainase të ndërprera për shkak të luftës Rusi-Ukrainë, e cila ka filluar në shkurt të vitit 2022, shkruan AA, përcjell KosovaPress

    Turqia ka thënë se vendet perëndimore duhet të përpiqen të adresojnë ankesat e Rusisë dhe se shpreson që Rusia të kthehet në marrëveshje.

  • Kroacia bllokon importin e patateve të skuqura nga Serbia, kjo është arsyeja

    Kroacia bllokon importin e patateve të skuqura nga Serbia, kjo është arsyeja

    Kroacia ka bllokuar importin e patateve të skuqura nga Serbia, pas paralajmërimeve nga Komisioni Evropian se në to ka substancë kancerogjene.

    Siç ka informuar Komisioni Evropian të mërkurën, përmbajtja e lartë e akrilamidit është gjetur në patate të skuqura (çipsa) me aromë speci nga Serbia.

    “Niveli i akrilamidit është më i lartë se vlerat treguese të përcaktuara nga Rregullorja e Komisionit (BE) nr. 2017/2158”, është bërë e ditur në faqen e KE-së.

    Akrilamide është një substancë që formohet përmes një reaksioni kimik natyror midis sheqernave dhe asparaginës, një aminoacid, në ushqimet me bazë bimore – duke përfshirë ushqimet me bazë patate dhe drithëra. Akrilamide formohet gjatë gatimit në temperaturë të lartë, të tilla si skuqja dhe pjekja.

    Akrilamidi është një kancerogjen i mundshëm te njerëzit. Ka disa prova që shkakton kancer të pankreasit te njerëzit dhe është treguar se shkakton kancer të sistemit nervor qendror dhe llojeve të tjera të kancerit te kafshët.

  • ​Osmani: Po krijohet paqartësi, mbajtja e zgjedhjeve në veri s’ka të bëjë me referendum

    ​Osmani: Po krijohet paqartësi, mbajtja e zgjedhjeve në veri s’ka të bëjë me referendum

    Presidentja e vendit, Vjosa Osmani, ka folur për mbajtjen e zgjedhjeve të reja në komunat veriore të Kosovës, derisa ka theksuar se kjo nuk ka të bëjë me referendum. Ajo ka thënë se iniciativa për largimin e kryetarëve tashmë është e paraparë me ligj. Derisa ka theksuar se Kosova ka vullnet për mbajtjen e këtyre zgjedhjeve, ajo u ka bërë thirrje ndërkombëtarëve që të parandalojnë ndërhyrjet e Serbisë në këtë proces.

    Osmani ka deklaruar se Serbia duhet ta dëshmojë që nuk do të ndërhyjë ilegalisht në zgjedhjet për katër komunat veriore të Kosovës.

    “Vullneti nga ana jonë për organizimin e zgjedhjeve të reja ekziston, tani duhet edhe serbët në këto komuan të tregojnë vullnetin për pjesëmarrje në zgjedhje dhe mbi të gjitha Serbia duhet ta dëshmojë, gjë që nuk e ka dëshmuar akoma që nuk do të ndërhyjë ilegalisht, siç ka bërë në të kaluarën, në zgjedhje që mbahen në komunat e Republikës së Kosovës. Dhe i bëjmë natyrisht thirrje partnerëve tanë ndërkombëtar, aleatëve tanë, që të bëjnë çmos që të parandalojnë ndërhyrje të tilla të paligjshme që shpesh herë kanë përfunduar me dhunë e frikësim ndaj qytetarëve serb në veri, që të mos i lejojnë ato që të bëhen nga ana e Serbisë”, ka deklaruar Osmani gjatë një konference të mbajtur në Komunën e Istogut, e të transmetuar në faqen zyrtare të Presidencës në Facebook.

    Osmani ka ritheksuar se ekzistojnë dy mundësi për mbajtjen e zgjedhjeve në veri, njëra nëse kryetarët japin dorëheqje he tjetra nëse qytetarët në këto komuna kërkojnë largimin e kryetarëve përmes peticionit.

    “Po krijohet një lloj paqartësie dhe një lloj hutie, nuk e di a është e qëllimshme apo jo dhe kjo çështje po lidhet me referendumin, kjo nuk ka fare të bëjë me referendum, është një kategori komplet tjetër ligjore, iniciativa për largimin e kryetarëve tashmë është e paraparë me ligj, pra ekziston një ligj që ua njeh qytetarëve të të gjitha komunave, jo vetëm këtyre katër komuna, të drejtën që nëpërmjet peticionit dhe pastaj rivotimit ta largojnë një kryetar komune nëpërmjet votës. Nuk është referendum, quhet kategori e largimit të kryetarit përmes procesit të rivotimit”, ka thënë Osmani.

    Ajo ka thënë se çështjet teknike procedurale të afateve duhet të determinohen përmes udhëzimeve administrative apo rregulloreve të KQZ-së.

    “Krejt çka duhet është që çështjet teknike procedurale të afateve të determinohen nëpërmjet qoftë udhëzimeve administrative, qoftë rregulloreve të KQZ-së, tashmë ekziston një grup punues ku edhe kabineti im është prezent dhe të jap kontributin e vet. Unë u bëj thirrje anëtarëve të këtij grupi punues që urgjentisht ta përfundojnë punën. Sapo të krijohet baza ligjore atëherë qytetarët e këtyre komunave kanë të drejtë të dorëzojnë poziciononin”, ka shtuar Osmani./KosovaPress