ATV

Category: Lajme

  • William Walker: Vuçiqi do duhej të ishte në Hagë, jo Thaçi

    William Walker: Vuçiqi do duhej të ishte në Hagë, jo Thaçi

    Ish-shefi i Misionit Verifikues të OSBE-së në Kosovë, ambasadori  William Walker, masat ndëshkuese ndaj Kosovës po i cilëson si të padrejta.

    Madje, diplomatin amerikan është e pazakonshme që një vendi demokratik t’i vihen sanksione nga Bashkimi Evropian dhe Shtetet e Bashkuara të Amerikës.

    “Konsideroj që masat ndëshkuese apo sanksionet, sido që t’i quani ato, janë të padrejta ndaj Kosovës. Masa ndëshkuese u vihen atyre shteteve që i shkelin ligjet ndërkombëtare, siç është rasti me Rusinë. Nuk është normale që BE-ja dhe SHBA-të ta sanksionojnë një vend demokratik siç është Kosova. Kjo është me të vërtetë diçka e pazakonshme”, tha Walker.

    Walker shprehet pesimist për të ardhmen e procesit të dialogut mes Kosovës dhe Serbisë.

    Sipas tij, kjo e fundit nuk është akoma e gatshme të ndryshoj dhe ta njoh pavarësinë e Kosovës.

    “Për çfarë dialogu jemi duke folur? Krerët shtetërorë serbë e kanë bërë të qartë se nuk do ta njohin pavarësinë e Kosovës. Si mund të jesh optimist për të ardhmen e dialogut kur Serbia nuk është e gatshme të ndryshoj. Tani shikoni se çfarë qasje destruktive ka Serbia, ndërsa Perëndimi i bënë presionin vendit më demokratik në rajon”, u shpreh Walker.

    Diplomati amerikan në pension thotë se disa prej vendimmarrësve aktual në Uashington janë shumë të painformuar për historinë e Kosovës, dhe për këtë, ai shprehet shumë i shqetësuar.

    “Ka ndryshime të mëdha gjeopolitike dhe SHBA-të tani e shohin më ndryshe rajonin e Ballkanit Perëndimor. Mos harroni se kanë kaluar 23 vjet që nga përfundimi i luftës në Kosovë. Duhet ta dini që në vendimmarrjen amerikane nuk janë më personat e njëjtë dhe tani jam shumë i shqetësuar se sa të painformuar janë disa prej tyre për të kaluarën e Kosovës. Prandaj do t’u sugjeroja që të lexonin më shumë histori”, shtoi ai.

    Walker i ka disa fjalë edhe për presidentin aktual serb, Aleksandar Vuçiq.

    “Po ta kishim një situatë normale, sot në bankën e të akuzuarve në Hagë do duhej të ishte ish-ministri i propagandës në kohën e Millosheviqit, Aleksandar Vuçiq, e jo Hashim Thaçi, Rexhep Selimi, Jakup Krasniqi e Kadri Veseli. Të gjithë e dimë se çfarë roli ka pasur gjatë viteve të 90-ta Aleksandër Vuçiqi, dhe sot imagjinoni ai është President i Serbisë dhe për më tepër respektohet nga partnerët ndërkombëtar. Këtu e keni vetëm një shembull se sa shumë ka ndryshuar komuniteti ndërkombëtar në raport me Kosovën”, tha Walker.

    Ndryshe, emisari i SHBA-së për Ballkanin Perëndimor, Gabriel Escobar, ka mohuar të ketë qenë i ashpër me Kosovën dhe i butë me Serbinë.

  • Merdarë, pritje deri në katër orë për të dalë nga Kosova

    Merdarë, pritje deri në katër orë për të dalë nga Kosova

    Bashkatdhetarët po presin deri në katër orë në pikë kalimin në Merdarë për të dalë nga Kosova, duke bërë që kolona të jetë deri në 1 mijë e 500 metra. Ndërsa për të hyrë pritjet janë vetëm 3 deri 5 minuta.

    Ndërsa për të hyrë, pritjet janë vetëm 3 deri në 5 minuta.

    Sipas Qendrës Kombëtare të Menaxhimit kufitar, kolona ka edhe tek Dheu i Bardhë ku pritjet janë deri gati dy orë.

    Ndërsa në Muçibabë qytetarët po presin deri në 40 minuta.

  • Presidentja Osmani sot viziton Klinën

    Presidentja Osmani sot viziton Klinën

    Presidentja Vjosa Osmani do të vizitojë sot Komunën e Klinës.

    Sipas njoftimit, atje, e para e vendit do të takohet me institucionet komunale, me qytetarë, si dhe do të vizitojë biznese e organizata joqeveritare.

    Në ora 12:00, ajo do të pritet në takim nga kryetari i Komunës së Klinës, Zenun Elezaj. Ndërkaq në ora 12:40, Osmani dhe Elezaj do të deklarohen për media.

    Kjo është vizita e dytë e Osmanit në kuadër të vizitave në komunat e vendit për këtë javë, pasi të martën ajo qëndroi në Dragash.

  • Qyteti spanjoll përfshihet nga zjarret “më të tmerrshme në 40 vitet e fundit”

    Qyteti spanjoll përfshihet nga zjarret “më të tmerrshme në 40 vitet e fundit”

    Mijëra njerëzve iu është dashur të largohen nga shtëpitë e tyre, pasi qytetit spanjoll, Tenerife, u përfshi nga zjarret.

    Mbi 4 mijë e 500 njerëz u urdhëruar të largoheshin nga fshatrat dhe kampingjet, pasi zjarri mori fuqi të madhe të mërkurën, ndërsa mijëra të tjerëve iu është thënë të qëndrojnë brenda.

    Sipas udhëheqësit rajonal, Fernando Clavjio, ky është zjarri më i tmerrshëm në 40 vitet e fundit, shkruan Skynews.

    Avionët me ujë kanë arritur të stabilizojnë zjarrin në jug të malit Teide, majës më të lartë të Spanjës, por ai mbeti jashtë kontrollit në krahun verior.

    Më shumë se 3,800 njerëzve u është thënë të qëndrojnë në shtëpi për shkak të cilësisë së dobët të ajrit, tha shefi i mbrojtjes civile Montse Roman.

    Shtatëmbëdhjetë avionë dhe rreth 350 zjarrfikës dhe personel ushtarak janë përfshirë në përpjekjet për shuarjen e zjarrit deri më tani.

  • Dënohet me 22-vjet burgim gruaja që ia dërgoi Trumpit një zarf me helm

    Dënohet me 22-vjet burgim gruaja që ia dërgoi Trumpit një zarf me helm

    Një grua kanadeze është dënuar me 22-vjet burgim në Shtetet e Bashkuara të Amerikës për dërgimin e letrave të mbushura me helm ricin, duke përfshirë edhe Donald Trumpin kur ai ishte president.

    Pascale Ferrier, 56-vjeçare, ra dakord për dënimin në janar pasi u deklarua fajtore për akuzat për armë biologjike.

    Zarfi vdekjeprurës drejtuar Trump u kap në shtator të vitit 2020 përpara dorëzimit në Shtëpinë e Bardhë.

    Ferrier i tha gjykatës se i vinte keq që plani i saj kishte dështuar dhe se “nuk mund ta ndalonte Trumpin”.

    Në një fjalim të gjatë në gjykatë, ajo tha gjithashtu se e shihte veten si një aktiviste dhe jo si terroriste.

    “Dua të gjej mjete paqësore për të arritur qëllimet e mia”, shtoi Ferrier.

    FBI gjeti gjurmët e gishtave të saj në letrën drejtuar Trump, e cila i kërkoi atij të hiqte dorë nga gara presidenciale.

    “Kam gjetur një emër të ri për ty: “Kllouni i shëmtuar tiran”, shkruan ajo në letër, sipas dokumenteve të akuzës së FBI-së.

    Gjykatësja e qarkut, Dabney Friedrich, e dënoi Ferrierin me 262 muaj e 22-vjet burgim. Ajo do të deportohet nga ShBA-ja pas vuajtjes së dënimit dhe do të përballet me mbikëqyrjen e përjetshme nëse kthehet ndonjëherë.

    Gjykatësja Friedrich i tha Ferrier-it se veprimet e saj ishin “potencialisht vdekjeprurëse” dhe “të dëmshme për ju, të dëmshme për shoqërinë, të dëmshme për viktimat e mundshme”.
    Ferrier pranoi gjithashtu dërgimin e letrave të ngjashme të te tetë zyrtarë të zbatimit të ligjit në Teksas.

    Ferrier, një shtetase e dyfishtë e Francës dhe Kanadasë, u arrestua duke kaluar kufirin në Buffalo, New York në shtator 2020. Ajo mbante një armë, thikë dhe fishekë municionesh, shkruan BBC.

  • Informimi, si zëvendësim për shërbimin e detyrueshëm ushtarak

    Informimi, si zëvendësim për shërbimin e detyrueshëm ushtarak

    Qeveria ka finalizuar draftin e një udhëzimi administrativ për edukimin, vetëdijesimin dhe ngritjen e potencialit të qytetarëve për shërbim në fushën e mbrojtjes. Ajo ka paraparë ngritjen e ekipeve mobile nëpër komuna, në të cilat zyrtarë civilë dhe ushtarakë do të ligjërojnë dhe demonstrojnë edhe në praktikë aftësitë për mbrojtje. Por, njohës të çështjeve të sigurisë thonë se, në vend të kësaj, Qeveria duhej ta bënte të detyrueshëm shërbimin ushtarak.

    Njohës të Sigurisë janë shprehur skeptikë me nismën e Qeverisë, sipas së cilës në komunat e Kosovës do të ngrihen qendra, në të cilat të rinjtë do të aftësohen teorikisht dhe në praktikë për ta mbrojtur territorin e shtetit. Ata thonë se, në vend të kësaj, Qeveria duhej ta bënte të detyrueshëm shërbimin ushtarak.

    Njohësi i çështjeve të sigurisë, Suad Bikliqi, thotë se informimi i qytetarëve për fushën e mbrojtjes është i nevojshëm, por kërkon diçka tjetër.

    “Në aspektin e draftudhëzimit, i hartuar nga MM-ja, nuk mendoj që mund të ketë shumë efektivitet kjo pjesë e vetëdijesimit duke ndërtuar zyra mobile nëpër qytete të ndryshme ose në të gjithë territorin e Republikës së Kosovës. Kjo, sepse koha që iu ofrohet qytetarëve të Republikës së Kosovës është e shkurtër dhe nuk mund të ndikojë shumë në pjesën e vetëdijesimit”, ka thënë Bikliqi.

    Është Ministria e Mbrojtjes ajo që ka finalizuar draftin e një udhëzimi administrativ, i cili ka për qëllim përcaktimin e autoriteteve, përgjegjësitë, mënyrën e organizimit dhe zhvillimit të edukimit, vetëdijesimit dhe ngritjes së potencialit të qytetarëve për shërbim në fushën e mbrojtjes.

    “Zyrat mobile do të jenë të kompletuara me pajisje dhe me personel të trajnuar, i cili do të angazhohet për prezantimin e politikave të edukimit, vetëdijesimit dhe angazhimit të qytetarëve në fushën e mbrojtjes”, thuhet në dokument.

    Udhëzimi administrativ është paraparë të zbatohet nga personeli civil dhe ushtarak që shërbejnë në Ministrinë e Mbrojtjes dhe në Forcën e Sigurisë.

    Në nenin e shtatë të draftit janë listuar aspektet që duhet t’i përmbajë Programi për realizimin e aktiviteteve të kësaj politike. Ne mesin e tyre është edhe ofrimi i informacioneve për fushën e mbrojtjes, si dhe motivimi dhe nxitja për përfshirje në FSK. Po ashtu janë paraparë edhe orë teorike e edhe ofrimi i trajnimeve praktike për të rinjtë vullnetarë.

    Njohësi Suad Bikliqi konsideron se nxitja e të rinjve për të shërbyer në FSK do të ishte më e suksesshme nëse do të realizohej përmes shërbimit të detyrueshëm ushtarak.

    “Në aspektin e sigurisë pa dyshim se kjo nismë e ka një pjesë të efektit të saj se qytetarët vetëdijesohen, por sa i përket nxitjes, unë mendoj që mënyra më e mirë për nxitjen ose angazhimin e të rinjve në Ushtrinë e Kosovës është vetë shërbimi obligues ushtarak në Republikën tonë”, ka thënë ai.

    Vetëvendosja që qeveris me vendin është zotuar sa ka qenë në opozitë se, kur ta marrë pushtetin, do ta bëjë të detyrueshëm shërbimin ushtarak. Por, pas marrjes së pushtetit, veprime për këtë nuk ka ndërmarrë, ndërkaq zyrtarë të saj kanë thënë se një politikë e tillë do të ishte e kushtueshme.

  • Osmani: Dorëheqja e tre zyrtarëve policorë serbë, rezultat i kërcënimeve të Beogradit

    Osmani: Dorëheqja e tre zyrtarëve policorë serbë, rezultat i kërcënimeve të Beogradit

    Presidentja Vjosa Osmani ka thënë se dorëheqja e tre zyrtarëve policorë serbë vjen nga kërcënimet direkte të Serbisë.

    Me anë të një postimi në Twitter, ajo ka deklaruar se Kosova do të vazhdojë të ofrojë një ambient të sigurt për të gjithë qytetarët e saj.

    “Dorëheqja e policëve të komunitetit serb është rezultat i drejtpërdrejtë i kërcënimeve dhe frikësimeve të vazhdueshme nga Serbia, një dëshmi se politikat e saj vazhdojnë të pasqyrojnë taktikat e Millosheviqit”.

    “Ne do të vazhdojmë të sigurojmë gjithëpërfshirje në të gjitha institucionet dhe një Kosovë më të sigurt për të gjithë”, ka thënë Osmani.

    Paparaci të enjten ka marrë vesh se policët e dorëhequr kanë arritur marrëveshje për të marrë pagë dhe garanci për punë të mëtejshme nga kryekrimineli i veriut, Milan Radojiçiq.

  • ​Rohde reagon pas dorëheqjes së tre policëve serbë: Duhet të kryejnë detyrat pa frikë

    ​Rohde reagon pas dorëheqjes së tre policëve serbë: Duhet të kryejnë detyrat pa frikë

    Ambasadori i Gjermanisë në Kosovë, Jorn Rohde, ka deklaruar se pajtohet me shefin e EULEX-it, Giovanni Pietro Barbano, se një vend multietnik, kërkon një polici multietnike.

    Ky reagim i ambasadorit Rohdes vjen pas dorëheqjes së fundit të tre serbëve të saporekrutuar në Policinë e Kosovës.

    “Jam plotësisht dakord: një vend multietnik kërkon një polici multietnike. Të gjithë pjesëtarët e Policisë së Kosovës – pa marrë parasysh se cilit grup etnik i përkasin – duhet të jenë në gjendje të kryejnë detyrat e tyre pa frikë”, ka shkruar Rohde në Twitter.

    Ndërsa, shefi i misionit të EULEX-it në Kosovë, Giovanni Barbano, tha se EULEX-i po i ndjekin nga afër zhvillimet, të cilat i quajti shqetësuese.

  • Ish-zëdhënësi i KFOR-it: Lista Serbe sabotoi iniciativat për serbët e Kosovës, nuk e kundërshtuam shumë këtë

    Ish-zëdhënësi i KFOR-it: Lista Serbe sabotoi iniciativat për serbët e Kosovës, nuk e kundërshtuam shumë këtë

    Ish-zëdhënësi i KFOR-it, Vicenzo Grasso, ka thënë se nuk është ndonjë befasi dorëheqja e tre serbëve nga pozita që kishin si pjesëtarë të Policisë së Kosovës.

    Sipas tij, Serbia nuk i mbështet iniciativat që kanë për qëllim integrimin e serbëve në Kosovë.

    “Nuk vjen si befasi! Beogradi, përmes Listës Serbe, gjithmonë e ka sabotuar çdo iniciativë që çon në integrimin e serbëve për zhvillimin e shoqërisë paqësore shumëkombëshe në Kosovë. Ata e kanë bërë këtë gjithmonë dhe ne e kemi toleruar gjithmonë pa e kundërshtuar fort këtë sjellje”, ka thënë Grasso.

    Grasso, ka reaguar në një postim në X të shefit të EULEX-it në Kosovë, Giovanni Barbano, ku tha se EULEX-i po i ndjek nga afër zhvillimet e fundit, të cilat i quajti shqetësuese.

  • Ekzekutohen pagat, ndërpritet greva e minatorëve në “Trepçë”

    Ekzekutohen pagat, ndërpritet greva e minatorëve në “Trepçë”

    Dhjetëra minatorë të ndërmarrjes “Trepça” edhe të enjten paradite në Stantërgë ishin në grevë shkaku i mosrealizimit të pagave për muajin korrik.

    Ndërkohë, u.d. i kryeshefit ekzekutiv të ndërmarrjes “Trepça”, Enis Abdurrahmani ka konfirmuar se në mesditë kanë ekzekutuar pagat e muajt korrik për të gjithë minatorët e minierës së Trepçës.

    Kryetari i Sindikatës së minatorëve të Trepcës, Ibrahim Januzi, ka thënë për KosovaPress se minatorët gjenden në kushte shumë të rënda financiare, andaj po grevojnë për shkak të vonesës së pagave.

    “Për shkak të mosrealizimit të pagave të minatorëve, ata po shprehin pakënaqësi përmes kësaj greve…Minatorët janë në kushte shumë të rënda për shkak të obligimeve ndaj institucioneve bankare, obligimeve familjare, planifikimeve të jetës së përditshme’, ka thënë Januzi.

    Minatori, Miftar Mehmeti theksoi se ka qenë i detyruar të krijojë raport me një bankë komerciale dhe tani për shkak të vonesës së pagesës së këstit mujor iu kanë paraqitur probleme.

    Ai shpreh hallin e tij se banka komerciale i ka dërguar disa herë mesazhe telefonike për të paguar këstin mujor.

    “Është duke më ardhur mesazhi që tre herë prej banke për kredi’, u shpreh ai.

    Në anën tjetër, Enis Abdurrahmani, u.d. i kryeshefit ekzekutiv të ndërmarrjes “Trepça” ka konfirmuar për KosovaPress se sot gjatë ditës, siç u shpreh ai falë subvencioneve të ndara nga qeveria, kanë ekzekutuar pagat për të gjithë minatorët e “Trepçës”.

    Abdurrahmani thekson se ndërmarrja ka pasur disa kriza financiare si rezultat i rënies së çmimit të metaleve në bursë, kursit të paritetit mes dollarit dhe euros, si dhe disa problemeve tjera, të cilat, sic thekson ai, kanë ndikuar drejtëpërdrejt në vonesë të pagave.

    “Sot janë ekzekuruar pagat për të gjithë punëtorët e ndërmarrjes “Trepça” Sh. A. Pagat janë ekzekutuar falë subvencioneve të ndara nga Qeveria e Kosovës dhe falë angazhimit të madh të Ministrisë së Ekonomisë….Kemi pasur disa kriza si rezultat i disa faktorëve të jashtëm të cilat janë të pa menaxhueshme nga ana jonë, siç janë rënia e çmimit të metaleve në bursë, kursi i paritetit të dollarit dhe euros, edhe shumë probleme tjera që kanë qenë si rezultat i krizës së energjisë… Të gjithë këta faktorë kanë prekur në formë direkte të hyrat e ndërmarrjes, ndërsa kjo është shoqëruar me rënie të produktivitetit, si shkak i vjetërsisë dhe zhvlerësimit të makinave produktive në miniera dhe flotacione’, u shpreh Abdurrahmani.

    Minatorët kanë nis protestën një javë më parë shkaku i mosekzekutimit të pagave të muajit korrik.

    Minatorët në Mitrovicë patën hyrë në grevë edhe një muaj më parë, në korrik për mos ekzekutimin e pagave të muajit qershor.