Category: Lajme

Belgjika ka konfiskuar më shumë se 1.6 milionë tableta të barabarta me 1.5 ton ilaçe ilegale në aeroportin e Brukselit, thanë autoritetet të mërkurën.

Konfiskimi, që është një nga konfiskimet më të mëdha në BE në vitet e fundit, u krye më 14 korrik në një ngarkesë me fara liri në aeroportin e Brukselit, i njohur gjithashtu si aeroporti Zaventem, tha në një deklaratë Agjencia Federale për Barnat dhe Produktet Shëndetësore.

Ilaçet u gjetën pas një inspektimi nga Agjencia Federale për Sigurinë e Zinxhirit Ushqimor në bashkëpunim me njësinë e hetimit special të agjencisë së mjekësisë dhe doganat, raporton AA.

Ilaçet ilegale përfshijnë Careforce-100, Cobra-120, Pregacare-300 dhe Artvigil-150, që përmbajnë përbërësit aktivë pregabalin, armodafinil dhe pregabalin.

Njësia speciale e hetimit nisi një hetim për barnat, duke paralajmëruar se përdorimi i barnave ilegale përbën rrezik serioz për shëndetin.

Dy persona humbën jetën gjatë stuhisë Daniel që përfshiu Greqinë të martën.

Sipas Brigadës së Zjarrfikësve, një grua 87-vjeçare e zhdukur nga dita e djeshme në zonën e Paltsi, rajoni i Magnezisë, është gjetur në një grumbull me dru, ndërsa 8 zjarrfikës kanë arritur të nxjerrin trupin e saj.

Të martën, një 51-vjeçar humbi jetën si pasojë e rënies së një muri, për shkak të sasisë së madhe të ujit, raporton ANA-MPA.

Po ashtu, Brigada e Zjarrfikëses tha se ka informacione për dy persona të zhdukur në fshatin Paltsi.

Një tjetër person, një 42-vjeçar, i cili u përfshi nga vërshimi i ujërave në përroin Aghia Ekaterini të Volos është gjithashtu i zhdukur.

Është pezulluar qarkullimi në autostradën Athinë-Selanik nga Nikea, Larisa deri në kufijtë e rajonit të Magnezisë për shkak të kushteve ekstreme të motit dhe përmbytjeve që kanë mbuluar rrugën.

Drejtoria e Policisë së Qarkut Thesalisë njoftoi se do të ndërpritet qarkullimi për të gjitha mjetet në të dy drejtimet.

Gjatë periudhës janar-qershor 2023 kompanitë e sigurimeve si dhe Byroja Kosovare e Sigurimit në emër të dëmeve për palët e dëmtuara kanë paguar hiç më pakë se 35,6 milionë euro, nga 27,8 sa ishte gjatë periudhës së njëjtë të vitit paraprak. Krahasuar me përqindja, pagesa e dëmeve gjatë periudhës janar-qershor 2023 me periudhën e njëjtë të vitit paraprak është rrit për më shume se 28 %

Pagesë rekorde e dëmeve për palë të dëmtuara ka ndodh gjatë gjashtë muajve të parë të këtij viti nga kompanitë e sigurimeve, por edhe nga Byroja Kosovare e Sigurimit (BKS). Viteve të fundit si trajtimi i dëmeve, ashtu edhe kompensimi i tyre është duke u bërë në një afat rekord. Sipas të dhënave zyrtare të Bankës Qendrore të Kosovës shihet se vetëm gjatë kësaj periudhe janë paguar hiç më pakë se pakë se 35,6 milionë euro, nga 27,8 milionë euro sa ishte gjatë periudhës së njëjtë të vitit paraprak. Krahasuar me përqindja, pagesa e dëmeve gjatë periudhës janar-qershor 2023 me periudhën e njëjtë të vitit paraprak është rrit për më shumë se 28 %. Valon Berisha, drejtor Financiar në Byronë Kosovare të Sigurimit (BKS) tregon për iSIGURIME se pagesa e dëmeve është duke u bere në afat të shpejt kohor. Më tutje drejtori Berisha ka treguar se asnjëherë më parë, si trajtimi i dëmeve, ashtu edhe kompensimi po behet shumë shpejt. “Siç e kam thënë edhe më herët me ardhjen e menaxhmentit të ri trajtimi i dëmeve dhe kompensimit në BKS behet në afat kohore rekorde. Një gjë e tillë po ndodh edhe nëpër kompani të sigurimit, ku trajtimi dhe kompensimi po behën shumë shpejt. Çdo ditë numri i lendeve që shkojnë në gjykatë nga palët e pakënaqura është duke rënë në masë të madhe” ka thënë më tutje drejtori Berisha.

Pagesa në katër vitet e fundit

Gjithnjë bazuar në të dhëna zyrtare të Bankës Qendrore të Kosovës shihet se deri në muajin qershor të këtij viti kompanitë e sigurimeve si dhe BKS-ja në emër të pagesës së dëmeve për palët e dëmtuara kanë paguara hiç më pakë se 35.6 milionë euro, nga 27,8 sa ishte në periudhën e njëjtë të vitit paraprak. PO ashtu, bazuar gjithnjë në të dhëna zyrtare shihet se gjatë periudhës janart-qershor të vitit 2021 në emër të dëmeve janë paguar 21,6 milionë euro, deri sa në periudhën janar-qershor 2020 në emër të pagesës së dëmeve për palët e dëmtuara janë paguar 21 milionë euro.

Në Gjykatën Themelore në Prizren, të mërkurën, në seancën dëgjimore Prokuroria Themelore në Prizren ka kërkuar caktimin e masës së paraburgimit për të dyshuarin Aziz Gashi, i cili po dyshohet për vrasjen e 48-vjeçarit në Prizren, derisa i dyshuari ka shprehur keqardhje për rastin që ka ndodhur.

“Me vjen keq ajo çka ka ndodhur se nuk e kisha bo, po se ajo është gjatë momentit, por është problemi se ata më kanë sulmuar edhe mua edhe kerrin, nuk i kam sulmu unë. Që 10 vjet kam probleme me ta, ma shumë 5-6 vjet…unë jam sulmuar nga tre persona, ma poshtë ata jetojnë. Dashta me thanë se m’vjen keq qajo që ka ndodh se nuk e kisha bo, për shembull mu kanë në gjendje të qetë ose në gjendje të rregullt”, ka thënë i dyshuari Gashi.

Paraprakisht, prokurorja Ervehe Gashi pas leximit të kërkesës për caktimin e masës së paraburgimit tha se qëndron në tërësi pranë së njëjtës, raporton “Betimi për Drejtësi”.

Prokurorja Gashi tha se duke pasur parasysh se në këtë çështje penale sapo kanë filluar hetimet dhe se i njëjti ende nuk është marrë në pyetje pranë Prokurorit të Shtetit, për të sqaruar dhe zbardhur gjendjen faktike të kësaj çështjeje penale.

Po ashtu, prokurorja tha se në Polici i dyshuari ka thënë se ka vendosur të mbrohet në heshtje, andaj me lënien në liri i njëjtit mund të ndikojë në deklarimet e dëshmitarëve, të dëmtuarve si dhe të dyshuarve të tjerë që i kanë ndihmuar pas kryerjes së veprës penale për t’u fshehur dhe për t’i fshehur provat materiale.

Tutje, ajo tha se i dyshuari Gashi nuk mund të mbrohet në liri duke marrë parasysh shkallën e përgjegjësisë dhe peshën e veprave penale, pasi që bëhet fjalë për veprën penale të vrasjes së rëndë dhe armëmbajtje pa leje, për të cilat vepra penale, sidomos për veprën e parë penale parashihet dënim kapital, faktin se kjo vepër penale ka tronditur tërë opinionin publik dhe se vepra është kryer para anëtarëve të ngushtë të familjes dhe ka sjellë frikë te qytetarët e Kosovës.

Nga të gjitha këto rrethana, Gashi tha se nëse i njëjti lejohet të mbrohet në liri, do të mundë të përsëritë vepra penale të këtilla ose vepra të reja penale.

Në fund, prokurorja Gashi tha se janë plotësuar kushtet ligjore nga Kodi i Procedurës Penale për caktimin e masës së paraburgimit.

Ajo theksoi se ka analizuar të gjitha masat alternative për sigurimin e prezencës së të pandehurit në procedurë dhe të gjitha provat, por se masa e paraburgimit është masa me të cilën sipas saj do të bëhet hetimi i papenguar në këtë çështje penale.

Kërkesën për caktimin e masës së paraburgimit, nuk e ka kundërshtuar mbrojtësja e të dyshuarit Gashi, avokatja Drenusha Berisha.

Masën e paraburgimit, e njëjta e ka cilësuar si masë mbrojtëse dhe siguruese për të mbrojturin e saj, me arsyetimin se gjatë konsultimit me të dyshuarin Gashi, i njëjti ka pohuar se tash e sa vite është në gjendje të rënduar psikike për të cilën tha se ekzistojnë edhe raporte nga mjeku.

Berisha tha se do të sigurojnë raportin psikiatrik dhe se të njëjtin do t’ia dorëzojë gjykatës dhe ka kërkuar që ndaj të dyshuarit Gashi të bëhet ekzaminimi psikiatrik, pastaj të mund të deklarohet rreth përgjegjësisë dhe peshës së fajit të tij.

Me qëndrimet e mbrojtëses së tij, është pajtuar i dyshuari Gashi.

Pas kësaj, gjykatësja e procedurës paraprake, Teuta Krusha tha se lidhur me kërkesën e Prokurorisë dhe pretendimet e palëve, do të vendosë me aktvendim të veçantë.

Ndryshe, Prokuroria Themelore në Prizren, më 5 shtator 2023, ka dorëzuar në Gjykatën Themelore në Prizren kërkesën për caktimin e masës së paraburgimit për të dyshuarin Aziz Gashi.

Gashi po dyshohet për veprat penale “Vrasje e rëndë”, nga Neni 137 dhe “Mbajtja në pronësi, në kontroll ose në posedim të paautorizuar të armëve”, nga Neni 366, par. 1 i Kodit Penal të Republikës së Kosovës.

Në kërkesë thuhet se i dyshuari Aziz Gashi, më 2 shtator 2023, rreth orës 18:45, në Prizren, në lagjen “Arbanë”, privon nga jeta personin tjetër dhe me atë rast me dashje e vë në rrezik jetën e më shumë personave, në atë mënyrë që pas një zënke të çastit që kishte ndodhur disa minuta më parë në mes të të pandehurit dhe viktimës, i pandehuri Aziz me automjetin e tij niset në drejtimin e shtëpisë së tij nga ku e merr armën e gjatë “AK-47”, hip në automjet dhe niset në drejtimin e viktimës, kur vjen në vendin e ngjarjes e vëren viktimën Beqir Morina, i cili ishte duke ecur në shoqëri me të dëmtuarit H.M. (bashkëshortja e viktimës), A.M. (vajza tetë vjeçare e viktimës), R.M dhe H.Sh.

Tutje thuhet se, Gashi u del përballë me automjet, i pajisur me pushkë automatike AK-47, zbret nga automjeti, shkrep 2-3 herë në drejtim të viktimës B.M, me ç’rast të njëjtin e godet në regjionin e barkut ndërsa të dëmtuarve, nga goditjet e marra viktima rrëzohet në tokë, i pandehuri i afrohet viktimës ia drejton armën në kokë dhe e ekzekuton duke shkrepur një rafal prej dhjetë plumbave në drejtim të kokës së viktimës me ç’rast e godet të njëjtin në kokë, viktima nga plagët e marra ndërron jetë në vendin e ngjarjes.

Po ashtu, në kërkesë thuhet se të dëmtuarat H. dhe A.M., gjatë tërë kohës kanë qëndruar afër viktimës, ndërsa i dëmtuari R.M., arrin të fshihet prapa një muri në afërsinë e vendit të ngjarjes, e i dëmtuari H.Sh., fshihet prapa automjetit të të pandehurit, i pandehuri largohet në drejtim të automjetit të tij, ku e vëren të dëmtuarin H.Sh., ia drejton armën, e në momentin kur i dëmtuari i drejtohet me fjalë se “unë nuk kam bërë asgjë, vetëm ju kam ndarë”, i thotë që të largohet nga aty, hip në automjetin e tij të llojit “Volkswagen Tiguan”, largohet nga vendi i ngjarjes në drejtim të panjohur, e me këtë rast të dëmtuarve H.M, A.M, R.M. dhe H.Sh., ua rrezikon jetën.

Për këto veprime, Gashi po dyshohet se ka kryer veprën penale të “Vrasjes së rëndë” nga neni 173, paragrafi 1 i Kodit Penal të Republikës së Kosovës.

Sipas Prokurorisë, Gashi po dyshohet edhe për veprën penale “Mbajtja në pronësi, në kontroll ose në posedim të paautorizuar të armëve” nga neni 366, par. 1 i Kodit Penal, pasi më 4 shtator 2023 në Prizren në shtëpinë e tij e cila gjendet në rr.”Fetah Sylejmani”, në lagjen “Arbana”, gjendet arma në kundërshtim me Ligjin e zbatueshëm lidhur me armët dhe atë pushkë automatike AK-47, së bashku me dy karikatorë të mbushur me fishekë, e me të cilën armë dyshohet se e ka privuar nga jeta B.M dhe me dashje u ka rrezikuar jetën të dëmtuarve H.M., A.M., R.M dhe H.Sh., e të cilën policia e ka gjetur, gjatë kontrollit të shtëpisë ku ishte fshehur i pandehuri në fshatin Tërpezë, komuna e Malishevës.

Sipas arsyetimit të kërkesës së Prokurorisë, janë plotësuar të gjitha kushtet ligjore për caktimin e masë së paraburgimit ndaj të pandehurit Gashi.

Ndryshe, Policia më 4 shtator 2023 konfirmoi për arrestimin e të dyshuarit.

Në njoftimin e Policisë, thuhej se nga ana e njësiteve policore përgjegjëse janë ndërmarre të gjitha veprimet e duhura procedurale, hetimore e ligjore. Sipas Policisë, kanë vazhduar veprimet operative- hetimore për të lokalizuar dhe arrestuar të dyshuarin e rastit të vrasjes.

“Gjatë ditës së sotme me urdhër të Prokurorit dhe me autorizim të Gjykatës Themelore në Prizren, është bastisë një lokacion në Malishevë ku është dyshuar se mund të gjendet I dyshuari, në atë lokacion nuk është gjet i dyshuari por është gjet një armë-pushkë automatike që dyshohet se është përdor në rastin e krimit, në lokacionin e njëjtë janë gjet edhe disa sendet personale të dyshuarit”, thuhej në njoftim.

Tutje thuhet se veprimet operative-hetimore kanë vazhduar duke kontrolluar lokacione të ndryshme, kryesisht në rrethinën e Malishevës. Policia njoftoi se në operacion për kërkimin e të dyshuarit përveç Sektorit të Hetimeve të Drejtorisë të Policisë në Prizren kanë asistuar edhe Drejtoria Rajonale e Policisë së Gjakovës/Stacioni Policor Malishevë dhe njësi të tjera nga Drejtoria e përgjithshme.

“Me vonë në orët e mbrëmjes nga Hetuesit e Rajonale dhe Njësia e Reagimit të Shpejt të Drejtorisë Rajonale të Prizrenit, në fshatin Tërpezë të Malishevës, është lokalizuar dhe është arrestuar I dyshuari Aziz Gashi, për të cilin me herët nëpërmes mediave është informuar publiku se është në kërkim nga policia”, thuhej në njoftim.

Pas intervistimit, thuhej se i dyshuari me vendim të prokurorit kujdestar u ndalua për 48 orë, ndërsa policia me autorizim të prokurorit të rastit vazhdon mbledhjen e provave dhe dëshmive.

Ndryshe, prokurorja Ervehe Gashi më 4 shtator 2023 kishte treguar për veprimet të cilat i ka ndërmarrë, ku tha se janë kryer dy bastisje si dhe veprime të tjera për identifikimin dhe gjetjen e të dyshuarit.

“Po, për të dyshuarin A.G, mbrëmë i kemi bërë dy bastisje nuk kemi mujt me gjet, i kemi dërgu nëpër pika kufitare informata te kerrit edhe informata te personit të dyshuar dhe automjetit , i kemi dërguar të dhënat personale në Aeroportin “Adem Jashari”, deklaroi ajo, duke shtuar se lidhur me identifikimin e të dyshuarit do të lëshohet urdhëresë për publikimin e fotos së tij.

“Sot në mëngjes e kam lëshu urdhëresën për autopsi tash po shkoj me lshu urdhëresën për publikimin e fotos së tij”, kishte thënë prokurorja Gashi.

Ndryshe, sipas raportit 24-orësh të Policisë, dyshohet se i dyshuari ka shtënë me pushkë automatike në drejtim të viktimës nga automjeti në lëvizje dhe ka ikur nga vendi i ngjarjes. Aty thuhet se i dyshuari dhe viktima kishin pasur një mosmarrëveshje, e cila kishte sjellë deri tek rasti tragjik.

Në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara të Kosovës (DhSK) në Hagë, po vazhdon edhe të mërkurën dëshminë Frederick Abrahams, nga OJQ-ja ndërkombëtare “Human Rights Watch”.

Abrahams është në cilësi të dëshmitarit të 22-të në këtë çështje, i cili dëshminë e ka filluar ditën e djeshme, duke u përgjigjur pyetjeve të prokurorit të specializuar Alan Tieger, raporton “Betimi për Drejtësi”.

Ndryshe, dëshmia e tij është paraparë të zgjasë katër ditë dhe atë Prokuroria ka planifikuar dy orë dhe ekipet mbrojtëse 16 orë për marrjen në pyetje të tij.

Seanca po vazhdon në sesion publik.

Gjatë muajit prill ka filluar gjykimi derisa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.

Më 4 prill mbrojtja e Thaçit, Veselit dhe Selimit kanë dhënë fjalën hyrëse derisa më 5 prill mbrojtja e Krasniqit ka dhënë fjalën hyrëse.

Më 11 prill ka filluar paraqitja e provave të Prokurorisë ku dëshmitarja e parë e mbrojtur e Prokurorisë, ka dhënë dëshminë e saj më 11 prill, 12 prill, 13 prill dhe më 17 prill.

Më 17 prill ka filluar dëgjimi i dëshmitarit të dytë, po ashtu i mbrojtur, i cili ka vazhduar dhënien e dëshmisë edhe më 18 prill, 19 prill dhe 20 prill, ku ka përfunduar dhënien e dëshmisë edhe dëshmitari i tretë, kurse më 10 maj ka filluar dhënien e dëshmisë dëshmitari i katërt, dëshmia e të cilit përfundoi më 17 maj.

Tutje, dëshmitari i pestë ka filluar dëshminë më 17 maj dhe e përfundoi më 22 maj, ku filloi dëshminë dëshmitari i gjashtë i cili përfundoi dëshminë më 23 maj, në të njëjtën ditë me dëshmitarin e shtatë.

Kurse, më 12 qershor ka filluar dëshminë e tij dëshmitari i tetë, i cili përfundoi dëshminë e tij më 14 qershor, ndërkaq me 15 qershor ka përfunduar dëshmia e dëshmitarit i nëntë.

Më 19 qershor ka përfunduar dëshminë dëshmitari i dhjetë, në ditën ku ka filluar dëshminë dëshmitari i 11-të i cili e ka përfunduar dëshminë e tij më 20 qershor. E më 10 korrik ka filluar dëshminë dëshmitari i 12-të, i cili ka përfunduar dëshminë më 11 korrik, në seancën ku ka filluar dëshminë Rrustem Mustafa, ish-komandat i zonës operative të Llapit.

Mustafa ka vazhduar dhënien e dëshminë së tij në seancën e 12, 13, 14, 17 dhe 18 korrikut.

Ndërsa dëshmitari i 14-të me radhë, Francis Ladwidge, oficeri britanez që shërbeu në Kosovë filloi dëshminë po më 18 korrik dhe e mbaroi më 19 korrik, ku nisi dëshminë dëshmitari i 15-të, i cili e përfundoi më 20 korrik.

Kurse, më 14 gusht filloi dhënien e dëshmisë dëshmitari i 16-të, e që e përfundoi më 16 gusht dhe më 17 gusht përfundoi dëshminë dëshmitarja e 17, Dragica Bozhaniq.

E dëshmia e dëshmitarit të 18-të ka filluar më 28 gusht dhe ka mbaruar më 29 gusht, në ditën kur filloi dëshminë dëshmitari i 19-të, i cili përfundoi dëshminë më 30 gusht.

Më 4 shtator përfundoi në të njëjtën ditë dëshminë dëshmitari i 20-të, kurse pa masa mbrojtëse, dëshmitari i 21-të, Agim Idrizi filloi të dëshmojë, i cili përfundoi dëshminë më 5 shtator, ku edhe filloi dëshmia e zyrtarit nga organizata ndërkombëtare “Human Rights Watch”, të Frederick Abrahams.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.