Në të gjitha institucionet e arsimit parauniversitar në Shqipëri nis sot viti i ri shkollor 2022-2023.
Ministria e Arsimit dhe Sportit në Shqipëri ka publikuar një video, ku bëhet e ditur se edhe ky vit shkollor ka nisur me këndimin e himnit kombëtar.
Për herë të parë në shkollë do të shkojnë rreth 29 mijë nxënës, ndërsa në klasat e 10-ta rreth 27 mijë nxënës.
Bëhet e ditur se këtë vit shkollor, në klasë të parë janë pranuar edhe fëmijët që janë 5 vjeç por që brenda vitit do të mbushin 6.
Gjatë këtij viti shkollor kanë përfituar tekste falas të gjithë nxënësit e arsimit bazë nga klasa e parë deri në klasën e 9-të, por edhe 16 kategori në nevojë, të veçanta, në arsimin e mesëm.
Në Shkup të Maqedonisë së Veriut do të mbahet Samiti i Krerëve të Shteteve në Procesin e Brdo Brijunit.
Pjesë e këtij samiti është edhe presidentja Vjosa Osmani.
Në sesionin e përbashkët me liderë të rajonit, Osmani do ta mbajë fjalim, ndërkaq më pas do të zhvillojë takime bilaterale me krerët e disa shteteve pjesëmarrëse, njofton Presidenca.
Temat qendrore të takimit të sivjetmë janë përshpejtimi i procesit të anëtarësimit në BE, luftimi dhe zvogëlimi i pasojave nga ndryshimet klimatike në rajon, si dhe krijimi i kushteve për qëndrimin e të rinjve në Ballkanin Perëndimor.
Takimi i Brdo-Brijuni është ngjarje vjetore multilaterale në të cilën takohen presidentët e gjashtë shteteve të Ballkanit Perëndimor si dhe të Sllovenisë dhe Kroacisë, e ku fokusi kryesor është në procesin e zgjerimit të Bashkimit Evropian dhe anëtarësimin e rajonit në BE.
Ky proces është një nismë rajonale e bashkëthemeluar nga presidentët slloven dhe kroat në vitin 2010.
Gjatë qëndrimit të Maqedoninë e Veriut, presidentja Osmani, krahas presidentit Stevo Pendarovski dhe atij të Shqipërisë, Bajram Begaj, do të marrë pjesë në ceremoninë e përurimit të bustit të Shën Terezës në hapësirën e Ambasadës së Republikës së Kosovës në Shkup.
Presidentja e Kosovës, Vjosa Osmani ka thënë se në 22 vjetorin e sulmit terrorist në ShBA, riafirmohen përpjekjet në mbrojtje të lirisë dhe demokracisë, vlera këto të cilat definojnë miqësinë dhe partneritetin e përhershëm me Amerikën.
Ajo ka shtuar po ashtu se 11 shtatori i vitit 2001 ndryshoi rrjedhën e historisë përgjithmonë.
“Sot, krahas aleatëve tanë amerikanë, nderojmë 3 mijë viktimat e sulmeve terroriste kundër Shteteve të Bashkuara të Amerikës, ndërsa riafirmojmë përpjekjet tona të çdoditshme në mbrojtje të lirisë e demokracisë, vlera të cilat definojnë miqësinë dhe partneritetin tonë të përhershëm”, ka shkruar Osmani në Facebook.
Të paktën 2 mijë e 122 njerëz kanë humbur jetën në tërmetin që goditi Marokun dhe 2 mijë e 421 të tjerë janë lënduar, tha të dielën transmetuesi shtetëror 2M.
Ekipet e shpëtimit paralajmërojnë se numri ende pritet të rritet.
Tërmeti me magnitudë 6.8 goditi vonë të premten. Sipas Shërbimit Gjeologjik të SHBA-ve, ky ishte tërmeti më i fortë që goditi rajonin rreth qytetit antik të Marrakech në një shekull.
Nikolla Radimiroviq, Drejtor i Administratës në Komunën e Leposaviqit është arrestuar të shtunën nga policia e Serbisë bashkë me të fejuarën e tij.
Për arrestimin e tij, reagoi mbrëmë Ministri i Punëve të Brendshme, Xhelal Sveçla që tha se Radimiroiviq u arrestua vetëm për arsyen se bënë pjesë në institucionet e Kosovës.
Pos Sveçlës, reagoi edhe Ministri për Komunitete dhe Kthim, Nenad Rashiq, veçse shtoi se arrestimet e tilla janë praktikë e kamotshme e policisë serbe.
“Nikolla është një prej viktimave që është në paraburgim. Duhet ta mbrojmë Nikolla Radimiroviqin, jam në kontakt me zëvendësin tim që merret me këtë, që ta gjejmë ndihmën adekuate juridike për të që sa më shpejtë të dalë nga kjo gjendje. Është një metodologji që po zbatohet që 7-8 vjet. Çdoherë që unë jam përpjekur ta kaloj kufirin, jam ndaluar për disa orë”, tha Rashiq.
Teksa ka treguar se si është ndaluar Radimiroviqi në kufi bashkë me të fejuarën e tij, ministri njoftoi se ai do të mbahet në paraburgim së paku deri të hënën.
“Ka ndodhur së pari një ndalim në pikën kufitare, është mbajtur aty 4 orë, është marrë në pyetje prej anës së personave që e kanë prezantuar vetëm si anëtarë të BIA-s. Pas një kohe të gjatë, prej 9:30 është marrë në pyetje deri në orën 19:00-20:00, prej atyre organeve që e kanë transferuar në stacionin e policisë në Rashkë dhe prej atij momenti po mbahet atje dhe sipas informacioneve do të jetë aty së paku deri të hënën pasi gjyqtari nuk është aty dhe kur të vijë të hënën do të merret me rastin. Guxoj të supozoj që kjo është një prej pjesës metodologjisë shantazhuese”, tha Rashiq.
Sipas ministrit Rashiq, Radimiroviq është ngarkuar me veprën penale “Shkelja e rendit kushtetues”.
Edicionin Qendror të lajmeve në ATV e gjeni në videon më postë:
Ambasadori i Kosovës në Belgjikë, Agron Bajrami, ka bërë të ditur se është inauguruar statuja e Nënë Terezës në Kishën “Notre Dame de Laeken” në Bruksel.
Sipas tij, ky inaugurim e theksoi mesazhin e paqes që Nëna Tereza barti, siç u shpreh ai, në jetë dhe amshim.
“Paqja dhe dashuria mes njerëzve, në një botë plot mirësi, me Nënën Tereze si simbolin e saj, u festua në Meshën e Shenjtë, në Kishën Notre Dame de Laeken, në Bruksel. Inaugurimi i statujës së shenjtores shqiptare dhe laureates së Çmimit Nobel për Paqe vetëm sa e theksoi mesazhin e paqes që Nëna Tereze barti në jetë dhe amshim”, shkroi tutje ai.
Ministri për Kthim dhe Komunitete, Nenad Rashiq, ka deklaruar se është skeptik për mbajtjen e zgjedhjeve në veri, pasi fajtor për këtë e sheh Serbinë, raporton Ekonomia Online.
Ai, në një konferencë për media, ka deklaruar se nuk janë rrethanat sipas tij për këtë proces, duke thënë se pala negociatore e Serbisë në dialog është duke u munduar që këtë gjë mos ta lejojë.
“Unë besoj në demokraci dhe kam dëshirë që të gjithë banorët serbë të veriut të marrinë pjesë në zgjedhje. Nuk e shoh që në këto momente është e mundshme mbajtja e zgjedhjeve. Përkundrazi, unë e shoh se nga aspekti i pushtetit në Beograd ose kryenegociatorët e dialogut ose negociatorët, nuk e kanë për qëllim përshpejtimin e mbajtjes së zgjedhjeve, qoftë rrethanave politike, qoftë një motivi që na sjellë marrëveshjen përfundimtare”.
“Sa do që munden ta shtyjnë procesin, do ta shtyjnë dhe në këtë moment nuk e shoh një vullnet pozitiv as nga qytetarët në veri. Ky është fakt i keq, ndoshta por është fakt. Në këtë moment jam skeptik për mbajtjen e zgjedhjeve në veri”, ka thënë Rashiq.
Presidenti i Serbisë, Aleksandar Vuçiq, tha se në Bruksel pas katër ditësh do të pasojnë bisedime të rëndësishme dhe se sipas tij Beogradi, do të insistojë në paqe dhe dialog.
“Bisedime të rëndësishme na presin në Bruksel pas katër ditësh. Ne, si më parë, do të insistojmë në paqe dhe dialog dhe do të theksojmë se jemi pa mëdyshje me popullin tonë nga Kosova”, ka shkruar Vuçiq në llogarinë e tij në Instagram.
Më 14 shtator në Bruksel do të zhvillohet takimi i radhës në mes të kryeministrit të Kosovës, Albin Kurti dhe presidentit serb, Aleksandar Vuçiq në kuadër të dialogut.
Raportuesja për Kosovën në Parlamentin Evropian, Viola von Cramon, ka thënë se BE-ja nuk po i kushton vëmendje sa duhet pasivizimit të adresave të shqiptarëve në Luginë të Preshevës nga ana e autoriteteve serbe.
Von Cramon në platformën “X” ka shpërndarë një reportazh të “Tagesspiegel”, ku tregohet për spastrimin etnik që po bëhet në Luginë të Preshevës.
“Shpesh akuzohemi se nuk i kushtojmë vëmendje të mjaftueshme në BE kësaj forme të diskriminimit. Kjo është e saktë. Unë vetë e kam ngritur këtë problem shpesh në komisione, e kam përfshirë në raporte të ndryshme dhe e kam vizituar vetë rajonin.
Fatkeqësisht, problemi është se pakica shqiptare në Serbi – ndryshe nga popullata serbe në Kosovë – nuk është pjesë e dialogut të organizuar nga BE-ja dhe për këtë arsye merr peshë dukshëm më të vogël në Bruksel, por edhe në kryeqytetet tjera të BE-së. Për këtë BE-ja duhet ta vendosë këtë temë shumë më përpara në agjendë në bisedimet për anëtarësim të Serbisë dhe t’i japë prioritet shumë më të madh mbrojtjes së pakicave në Serbi. Nuk mund të hyjë në BE asnjë vend që ua heq qytetarëve të vetë shtetësinë pa asnjë arsye”, ka shkruar Von Cramon.
