Category: Lajme

Kryeministri i Kosovës, Albin Kurti së bashku me Këshilltaren Politike, Ardita Sinani pritën në takim Kryetarin e Partisë Aksioni Demokratik në Shanxhak (SDA), Dr. Sulejman Ugljanin, deputetin shqiptar në Parlamentin e Serbisë, Shaip Kamberi, përfaqësuesit politikë boshnjakë në Serbi, Esad Salihovic, Selma Kucevic, Ado Kameniscanin, dhe Kryetarin e Këshillit Kombëtar Shqiptar në Serbi, Nevzad Lutfiu.

Zyra e Kryeministrit njofton se në takim u diskutua për brengat dhe shkeljet të cilat në mënyrë të vazhdueshme i përjetojnë si pakica shqiptare e po ashtu edhe ajo boshnjake në Serbi, dhe për atë se çfarë mund të bëhet së bashku për të përmirësuar këtë gjendje.

“Përfaqësuesit e Boshnjakëve në Serbi thanë se as ata nuk janë të kënaqur me trajtimin që i bëhet atyre. Parimi i reciprocitetit dhe i simetrisë së të drejtave të pakicave kombëtare në Ballkan Perëndimor, është formula e duhur për arritjen e një paqe të qëndrueshme e afatgjate në rajon”, thuhet në komunikatë.

Ndër të tjerash, kryeministri Kurti i njoftoi ata për takimet bilaterale dhe trilaterale që u zhvilluan me 14 shtator në Bruksel në kuadër të procesit të normalizimit të marrëdhënieve ndërmjet Kosovës dhe Serbisë.

Tema tjera të diskutimit ishin edhe mandatet e garantuara, përfaqësimi i garantuar institucional, pasivizimi i adresave të vendbanimeve, shkelja e të drejtave të pakicave dhe vështirësitë në përdorimin e gjuhës dhe simboleve.

Presidentja Vjosa Osmani, e cila po qëndron në Nju Jork ku po mbahet sesioni i 78-të i Asamblesë së Kombeve të Bashkuara, ka takuar presidentin e Letonisë, Edgars Rinkēvičs.

Në takim është diskutuar edhe për zhvillimet e fundit në vend ndërsa Osmani ka theksuar se Kosova mbetët e përkushtuar për paqe dhe siguri afatgjatë.

“Krahas marrëdhënieve bilaterale, në takim u diskutua edhe për zhvillimet e fundit në Kosovë, rajon e më gjerë, me ç’rast Presidentja Osmani ritheksoi se Kosova mbetet e përkushtuar për paqe dhe siguri afatgjate. Presidentja Osmani ka falënderuar Presidentin Rinkēvičs për mbështetjen e vazhduar të Letonisë për rrugën euroatlantike të Kosovës dhe anëtarësimin në organizata ndërkombëtare”, ka njoftuar Presidenca./KP

Mjekët në Klinikën e Pulmologjisë i kanë shpëtuar jetën një pacienti pasi një kurorë dhëmbësh i kishte depërtuar në rrugët e frymëmarrjes.

A.D nga Gjakovë ishte dërguar me urgjencë në QKUK pasi gjatë ndërhyrjes stomatologjike kishte gëlltitur kurorën.

Sipas njoftimit të Shërbimit Spitalor Klinik Universitar të Kosovës, mjekët kanë ndërhyrë në mënyrë urgjente përmes bronkoskopisë.

“Pacientes A.D(1986), nga Gjakova, e cila gjatë ndërhyrjes stomatologjike tek stomatologu, kishte aspiruar një kurorë dhëmbësh, duke i depërtuar në rrugët e frymëmarrjes i ishte keqësuar gjendja shëndetësore, duke e rrezikuar seriozisht shëndetin e saj, me simptoma të frymëmarrjes së vështirësuar dhe kollitje. Me urgjencë ishte sjellur në Klinikën e Pulmologjisë, ku mjekët e klinikës konstatuan se duhet të bëhet ndërhyrje urgjent përmes bronkoskopisë, duke hequr kurorën nga rrugët e frymëmarrjes dhe duke i shpëtuar jetën”, theksohet në njoftimin e ShSKUK-së./KP

Ministria e Mjedisit, Planifikimit Hapësinor dhe Infrastrukturës, në bashkëpunim me agjencinë japoneze “JICA”, zhvilluan fazën e dytë të projektit për zhvillimin e kapaciteteve për kontrollin e ndotjes së ajrit në Kosovë. Qëllimi është që të krijohet një data bazë me të dhëna dhe të ndërmerren masa varësisht nga rezultati që del nga matjet.

Zëvendësministri i MMPHI-së, Avni Zogiani, tha se qëllimi i këtij projekti është të hulumtojnë se në çfarë mase të ndotjes së ajrit kontribuon trafiku në përgjithësi.

“Sot jemi duke i parë, duke vizituar disa pajisje, një projekt për fushën e ajrit, një projekt që ka kohë që është zhvilluar nga ministria dhe agjencia japoneze për bashkëpunim ndërkombëtar, i cili ka për qëllim të kuptojë se në çfarë mase në këtë ndotjen e përgjithshme të ajrit kontribuon trafiku, përkatësisht automjete në trafik. Ato pajisjet që janë të montuara skaj rrugës, ky projekt është bërë në bashkëpunim fantastik me Policinë e Kosovës, natyrisht edhe me departamentet e ministrisë tonë dhe akterë të tjerë. Ne shpresojmë që shumë shpejt do të kemi të dhëna të sakta mbi burimin, mbi atë se çfarë mase janë automjetet kontribuese në mungesën e kualitetit të ajrit në Kosovë”, tha Zogiani.

Zogiani u shpreh se pret që ky projekt të ketë sukses, derisa potencoi se nëse nga të dhënat që sigurohen nga pajisjet matëse del se ka ndotje të madhe, do të propozohet zëvendësimi i automjeteve me karburante në ato elektrike.

“Nëse automjetet janë ndotëse, mund ta supozojmë tashmë, por në çfarë mase do ta kuptojmë shpejtë, ndotës shumë të mëdhenj. Atë herë duhet të marrim politika që të shkojmë kah zëvendësimi i automjeteve me karburante me mjete elektrike, me transport elektrik ose zëvendësimi i makinave individuale me transport publik. Politika të cilat, zakonisht kur ndërmerren kanë nevojë për një data bazë të dhënave e aktualisht ‘JICA’, përkatësisht agjencia japoneze për bashkëpunim ndërkombëtar është duke na ndihmuar në krijimin e kësaj data baze”, u shpreh Zogiani.

Zogiani tha se makinat të cilat do të detektohen se po ndikojnë në prishjen e kualitetit të ajrit, do t’iu nënshtrohen kontrollit teknik, dhe pas ekzaminimeve do t’iu bëhet më dije ngasësve se ku është problemi i automjetit.

Gjithashtu udhëheqësi i projektit nga agjencioni japonez “JICA”, Kuwahara Fumihiko, tha se kanë në plan të krijojnë data bazën e të dhënave për ndotje.

“Siç e dimë pra automjetet janë ndotës i madh i mjedisit, është supozim. Kështu që plani jonë edhe i projektit është të matë gazrat e shkarkuara nga automjetet në Kosovë. Kosova fatkeqësisht nuk ka të dhëna të mjaftueshme, kështu që projekti e ka për qëllim të krijojë data bazën që e përmendi zëvendësministri…Është qeveria e Kosovës ajo që ka kërkuar asistencën nga qeveria e Japonisë. Kosova është shtet i ri, 15-20 vjet kështu që ka nevojë ende për asistencë, dhe në të njëjtën kohë Japonia e ka pasur të njëjtën përvojë me ndotjen diku 40-50 vjet përpara, kështu që mund t’ia japim ekspertizën tonë qeverisë së Kosovës, për të përmirësuar procedurat administrative”, tha Fumihiko.

Kjo është faza e dytë e këtij projekti nga agjencioni japonez “JICA” që ka filluar prej rreth një viti e gjysmë dhe parashihet të përfundojë në fund të vitit 2025.

Ndërkaq “Projekti për Ngritjen e Kapaciteteve për Menaxhimin e Mbeturinave drejt një Shoqërie të Shëndoshë në Republikën e Kosovës”, i takon fazës së parë, që ka zgjatur rreth pesë vjet./KP

Deputeti i Vetëvendosjes, Gazmend Gjyshinca ka takuar në kryeministrin e Kanadasë, Justin Trudeau, me të cilin ka biseduar për zhvillimet e fundit në të dyja vende.

Ai ka treguar se pjesë e këtij takimi dhe bisedave ka qenë edhe kryetari i Partisë Laburiste të Mbretërisë së Bashkuar, Keir Starmer, si dhe me ekonomistin dhe ish-guvernatorin e Bankës së Anglisë, Mark Carney.

Postimi i plotë:

Kënaqësi të bisedojmë me kryeministrin e Kanadasë z. Justin Trudeau, me kryetarin e Partisë Laburiste të Mbretërisë së Bashkuar, z. Keir Starmer, si dhe me ekonomistin dhe ish-guvernatorin e Bankës së Anglisë, z. Mark Carney.

Folëm për punët që po bëjmë e për zhvillimet e fundit në vendet tona.

Shpreha mirënjohjen time të jem në mesin e tyre dhe i falenderova për ftesën e bashkëpunimin tonë disa vjeçar tashmë.

Është gjetur pa shenja jete një i mitur në Ferizaj, në rrugën “Imri Neziri”, pasditen e së martes.

Nga Prokuroria Themelore në Ferizaj, kanë konfirmuar për Insajderin se viktima është i moshës 13 vjeçare, dhe rastin e kanë cilësuar si vetëvrasje.

“Viktima është i mitur. Me vendim të prokurorit, trupi i pajetë i viktimës është dërguar në IML për obduksion. Rasti është iniciuar si ‘Vetëvrasje’, por hetimet po vazhdojnë”, tha zëdhënësja për media nga Prokuroria Themelore në Ferizaj, Vjosa Bafti.

Policia e Kosovës ka njoftuar se rasti ka ndodhur rreth orës 16:46, ndërsa nuk dihen shkaqet.

Administrata Biden do të ofrojë edhe një herë teste falas për Covid për të gjitha familjet amerikane duke filluar nga java e ardhshme.

Çdo familje do të ketë të drejtë të kërkojë katër teste të shpejta me postë duke filluar nga 25 shtatori përmes faqes së internetit covid.gov.

Programi, i cili do të kushtojë 600 milionë dollarë, synon të luftojë rritjen dimërore të rasteve me Covid, në mes të përhapjes së varianteve Eris dhe BA.2.86.

Sekretari i Shëndetësisë dhe Shërbimeve Njerëzore, Xavier Becerra, tha “Ne do të fillojmë edhe një herë programin tonë për t’u ofruar amerikanëve një mundësi për të kërkuar teste”.

Deri më sot, administrata Biden ka dërguar më shumë se 755 milionë teste falas për Covid në të gjithë SHBA-në, raporton dailymail.

Programi filloi në fillim të vitit 2022 kur shitësve u mbaruan testet dhe u pezullua në maj pasi administrata shpalli të përfunduar urgjencën e shëndetit publik.

Testet synohen të përdoren për pjesën tjetër të vitit dhe do të përfshijnë udhëzime për kontrollimin e datave të skadencës.

Të dhënat më të fundit tregojnë se ka pasur 20,538 pranime me Covid në spitalet amerikane deri më 9 shtator.

Ka gjithashtu shenja që vdekjet nga Covid kanë filluar të zvogëlohen.

Të paktën 59 avionë me mallra ndihmese nga 24 vende kanë zbritur në Libi për të ndihmuar njerëzit e prekur nga përmbytjet vdekjeprurëse, tha qeveria e unitetit libian të mërkurën vonë.

Në një deklaratë, ekipi i urgjencës i qeverisë tha se gjashtë anije të ngarkuara me materiale ndihme mbërritën gjithashtu në Libi, por nuk dha detaje të mëtejshme, shkruan AA, transmeton KosovaPress.

Deklarata vuri në dukje se ndihma e fundit përfshinte 150 tonë ndihma humanitare nga organizata “Turkish Red Crescent” dhe një aeroplan mallrash nga Arabia Saudite që transportonte 90 tonë ushqim dhe materiale strehimi.

Sipas shifrave të OKB-së, rreth 4,000 njerëz kanë vdekur në të gjithë Libinë për shkak të përmbytjeve shkatërruese të 10 shtatorit, ndërsa më shumë se 40,000 njerëz janë zhvendosur.

Kuvendi i Kosovës nuk ka pasur kuorum të mjaftueshëm për të votuar projektin për ratifikimin e Marrëveshjes së financimit në mes të Republikës së Kosovës dhe Bankës Evropiane për Investime për projektin “Rehabilitimi i linjës hekurudhore 10 B”.

Vetëm 72 deputetë kanë marrë pjesë në votim, që është numër i pamjaftueshëm sa i përket votimit të marrëveshjeve ndërkombëtare.

Në votim nuk kanë marrë pjesë deputetët e Partisë Demokratike të Kosovës dhe ata të Aleancës për Ardhmërinë e Kosovës, ndërsa Lidhja Demokratike e Kosovës e ka mbështetur këtë marrëveshje.

Derisa ka kërkuar votuat e deputetëve, ministri i Financave, Hekuran Murati, ka treguar se projekti ndahet në tri faza dhe ndër të tjera përfshinë rinovimin e binarëve dhe riparimin e tuneleve.

“Projekti i rehabilitimit të linjës hekurudhore 10, i cili projekt do të lejojë operimin e kësaj hekurudhe deri në 100 km/h në shumicën e seksioneve të linjës në përputhje me standardet e Bashkimit Evropian. Projekti është i ndarë në tri faza, faze e parë është nga Hani i Elezit në Fushë Kosovë, faza e dytë nga Fushë Kosova në Mitrovicë dhe faza e tretë është nga Mitrovicas në Leshak, dhe përfshinë rinovimin e binarëve, riparimin e tuneleve dhe urave dhe instalimin pajisjeve të telekomunikacionet”, tha ai.

Ndërsa shefi i deputetëve të PDK-së, Abelard Tahiri, ka thënë se nuk ja vlen të votohen marrëveshje të tilla në kohën kur Kosovës i janë vendosur masa nga Bashkimi Evropian.

“Kjo javë është edhe java e Kombeve të Bashkuara, ku gjithë liderët nga mbarë bota marrin pjesë në javën e Kombeve të Bashkuara, përderisa Republika e Kosovës e ka një kryeministër të izoluar i cili pothuajse është prej të vetmëve nga vendet e Evropës dhe Ballkanit Perëndimor i cili nuk merr pjesë. Pra jemi vend i sanksionuar, jemi vend që po izolohemi çdo ditë e më tepër dhe nuk ka kurrfarë kuptimi të marrim pjesë në votimin e kësaj marrëveshje”, tha Tahiri.

Në anën tjetër, deputeti i LDK-së, Avdullah Hoti, është shprehur kritik ndaj qeverisë së i përket masave të BE-së por ka bërë te ditur se deputetët e kësaj partie e mbështesin këtë marrëveshje ndërkombëtare.

“Ne si grup parlamentar e mbështesim këtë marrëveshje ndërkombëtare, ky projekt ka shtatë-tetë vite që ka nisur të realizohet, më vjen mirë që po shkon drejt finalizimit së paku pjesës së financimit. Dëgjova kryetari ne komisionit për buxhet që bëri thirrje që ta votojmë të lëmë anash pezmin, ne e kemi pezmin me mënyrën si jeni duke e menaxhuar vendin, si i keni sjell sanksionet, por nuk kemi pezëm me projektet e rëndësisë kombëtare”, tha Hoti.

Pas dështimit në votim, kjo pikë e rendit të ditës është bartur në seancën e ardhshme.

Në këtë seancë ka dështuar të miratohet edhe propozim-rezoluta për punën 2 vjeçare të qeverisë. Në seancën plenare për këtë rezolutë kanë votuar 19 deputetë, 49 kundër dhe tre të tjerë kanë abstenuar.

Kjo rezolutë ishte hartuar në prill të këtij viti.

Para hedhjes në votim të kësaj rezolute, shefi i grupit parlamentar të Aleancës për Ardhmërinë e Kosovës, Besnik Tahiri, tha se vazhdon problemi me zhvillim ekonomik si dhe saga me dialog.

“Ne më 21 shkurt në muajin e dytë të këtij viti kemi kërkuar që të debatohet për prioritetet e kësaj qeverie, fatkeqësisht asgjë nga rezoluta jonë që është ngritur nuk është arrit, vazhdon problemi me zhvillim ekonomik, vazhdon dështimi total i ligjit të pagave, vlerës së koeficientit, vazhdon saga me dialog”, ka thënë Tahiri./KosovaPress