Category: Lajme

Policia e Kosovës ka njoftuar për një rast të “Sulmit ndaj personit zyrtar” dhe “Lëndimit të lehtë trupor”, që ka ndodhur në Prizren.

Sipas policisë, ngjarja ka ndodhur më 17 maj 2026 rreth orës 23:20, ku një grua e dyshuar fillimisht kishte fyer e më pas kishte sulmuar fizikisht një zyrtar policor, duke e goditur me shqelm derisa ai ishte duke hyrë në marketin e një pompe të derivateve.

Policia bën të ditur se e dyshuara ka shfaqur rezistencë edhe gjatë arrestimit, me ç’rast dy zyrtarë policorë kanë pësuar lëndime të lehta trupore.

Të dyshuarës i është ofruar trajtim mjekësor në stacion policor, ndërsa zyrtarët policorë kanë marrë tretman mjekësor.

Me vendim të prokurorit, e dyshuara është dërguar në mbajtje për 24 orë.

Një inspektor komunal është sulmuar dje në Prishtinë derisa po kryente detyrën e tij zyrtare në një lokal.

Ai ishte sulmuar fizikisht nga pronari i lokalit dhe disa persona të tjerë ende të paidentifikuar.

Policia ka njoftuar se viktima ka pranuar tretman mjekësor në lidhje me rastin, ndërsa janë intervistuar tre dëshmitarë të rastit.

Të dyshuarit janë në arrati, rasti po hetohet.

“Prishtinë / 17.05.2026 – 15:50. Viktima mashkull kosovar (m/k) inspektor komunal, ka raportuar se derisa ka qenë në kryerje të detyrës zyrtare, është kanosur dhe sulmuar fizikisht nga i dyshuari m/k –pronar i një lokali dhe disa persona të tjerë ende të pa identifikuar. Viktima ka pranuar tretman mjekësor ndërsa lidhur me rastin janë intervistuar tre dëshmitar rasti. Të dyshuarit gjenden në arrati, rasti është duke u hetuar nga njësitet kompetente policore”, thuhet në raportin 24 orësh të Policisë.

Tre zhytës shpellash finlandezë do të bashkohen këtë të hënën, në përpjekjet për të gjetur dhe trupat e katër zhytësve italianë që vdiqën të enjten ndërsa eksploronin shpella nënujore 50 metra të thella në Maldive gjatë një ekspedite zhytjeje në atolin Vaavu, njoftoi rrjeti evropian i zhytësve DAN.

Ekipi mbërriti dje, të dielën, tha DAN Europe në një deklaratë. Trupi i njërit prej zhytësve italianë u gjet të premten, tha Forca Kombëtare e Mbrojtjes e Maldiveve në një deklaratë.

“Trupi u nxor nga një shpellë afërsisht 60 metra e thellë. Vlerësohet se edhe zhytësit e mbetur do të jenë brenda shpellës, e cila është afërsisht 61 metra e gjatë”, thuhet në deklaratë.

Zhytësit finlandezë, Sami Paakarinen, Jenny Westerlund dhe Patrick Grenqvist, do të punojnë me anëtarët e Forcës Kombëtare të Mbrojtjes së Maldiveve (MNDF), e cila po koordinon operacionin, dhe zyrtarë të tjerë.

Një zhytës i MNDF-së që mori pjesë në operacion, Togeri i Parë Mohamed Mahoudi , vdiq të shtunën nga sëmundja e dekompresionit, duke e detyruar MNDF-në të pezullojë përkohësisht operacionin, i cili po kryhej në kushte të këqija moti

Monumenti i Ushtrisë Çlirimtare të Kosovës në Kaçanik është dëmtuar, e ky veprim nxiti reagimin e Organizatës së Veteranëve të Luftës së UÇK-së.

Kryetari i OVL të UÇK-së, Hysni Gucati, në emisionin “Ora 7” në Klan Kosova, e ka cilësuar aktin si të papranueshëm dhe të turpshëm, duke theksuar se në emër të UÇK-së janë vrarë njerëz, dhe se kemi mbi 5,000 dëshmorë të kombit.

“Është një dobësi shumë e madhe. Me thënë bufalisht, është marre me atë që ka ndodhur në Kaçanik, sepse po e tregojnë fytyrën e vërtetë e asaj që ndodh, por nuk ka raporte policore, prandaj nuk mund të tregojmë me gisht dikë që e ka kryer këtë akt vandal”.

“Ky akt është turp i madh, sepse në emër të UÇK-së janë vrarë njerëz dhe ne kemi mbi 5,000 dëshmorë të kombit që janë vrarë në emër të UÇK-së”, tha mes tjerash Gucati.

Organizata e Veteranëve të Luftës së UÇK-së, i ka dalë në mbështetje protestës së sotme të studentëve shqiptarë në Maqedoninë e Veriut. Sipas OVL të UÇK-së, kauza e tyre është e drejtë.

“OVL e UÇK-së, mbështet plotësisht studentët shqiptarë në Maqedoninë e Veriut, të cilët kanë dalë tani në rrugë për të kërkuar dinjitet dhe status të barabartë për gjuhën dhe identitetin shqiptar. Zëri i tyre është legjitim. Kauza e tyre është e drejtë”, thuhet në njoftimin e organizatës”, thuhet një njoftim.

Sipas tyte, shqipja nuk është nder i falur nga shteti apo i negociuar përmes marrëveshjeve politike.

“Është e drejtë e patjetërsueshme e një populli në trojet e veta. Kërkojmë që këto të drejta të respektohen, menjëherë dhe pa kushte. Dinjiteti shqiptar nuk negociohet”.

Kryetari i Aleancës Kosovare të Bizneseve, Agim Shahini ka reaguar pasi Kosova është renditur si vendi i dytë më i varfër në Evropë.

Shahini përmes, një postimi në Facebook, ka shkruar se AKB-ja e konsideron shqetësim kombëtar dhe dështim institucional faktin që Kosova, sipas raportit të fundit ndërkombëtar për GDP-në për kokë banori sipas PPP-së, renditet si shteti i dytë më i varfër në Evropë, menjëherë pas Moldavisë.

Sipas tij, ky raport është pasqyra më e qartë e degradimit ekonomik që po i ndodh Kosovës ndër vite.

Postimi i tij i plotë:

Aleanca Kosovare e Bizneseve e konsideron shqetësim kombëtar dhe dështim institucional faktin që Kosova, sipas raportit të fundit ndërkombëtar për GDP-në për kokë banori sipas PPP-së, renditet si shteti i dytë më i varfër në Evropë, menjëherë pas Moldavisë.

Ky raport është pasqyra më e qartë e degradimit ekonomik që po i ndodh Kosovës ndër vite. Është e papranueshme që një vend me resurset më të mëdha njerëzore në rajon, me diasporë të fuqishme dhe me potencial zhvillimor, të vazhdojë të mbetet në fund të Evropës për mirëqenie ekonomike.

AKB-ja vlerëson se institucionet e Kosovës kanë dështuar të krijojnë politika serioze zhvillimore dhe ambiente të favorshme për biznesin dhe investitorët. Përderisa vendet e rajonit po ecin përpara me investime, prodhim dhe eksporte, Kosova po vazhdon të mbijetojë nga diaspora, importi dhe konsumi.

Bizneset në Kosovë po përballen çdo ditë me rritje të vazhdueshme të kostos së energjisë,mungesë të mbështetjes shtetërore,pasiguri ekonomike dhe politike, burokraci të rëndë, ekonomi joformale dhe konkurrencë të padrejtë, si edhe mungesë të strategjisë për prodhim vendor.

Është turp ekonomik dhe institucional që Kosova sot renditet pas shumicës së vendeve të rajonit, ndërsa qytetarët po largohen masivisht nga vendi për shkak të mungesës së perspektivës ekonomike.

AKB-ja paralajmëron se pa ndryshime urgjente në politikat ekonomike dhe pa trajtim serioz të sektorit privat, Kosova rrezikon të thellojë edhe më shumë varfërinë, papunësinë dhe varësinë ekonomike.

AKB kërkon një paketë emergjente për mbështetjen e prodhimit vendor, ulje të barrës fiskale për bizneset, ndaljen e politikave që rëndojnë sektorin privat,strategji kombëtare për investime dhe eksporte dhe dialog të sinqertë institucional me komunitetin e biznesit.

Kosova nuk mund të ndërtojë zhvillim ekonomik me propaganda politike, por vetëm me ekonomi reale, prodhim, investime dhe partneritet me biznesin tha në fund Agim Shahini kryetar i Aleancës Kosovare të Bizneseve.

Ish-ministrja e Jashtme e Kroacisë, Vesna Pusiq, ka deklaruar se anëtarësimi i Malit të Zi në Bashkimin Evropian është çështje e mbijetesës së shtetit malazez, duke paralajmëruar se dështimi i këtij projekti do ta vinte në rrezik pavarësinë dhe sovranitetin e vendit.

Pusiq u shpreh se Mali i Zi vazhdon ta ketë mbështetjen e shumicës së qytetarëve dhe të shumicës së partive politike për anëtarësim në Bashkimin Evropian, pavarësisht rënies së lehtë të entuziazmit për shkak të zhvillimeve të fundit politike dhe gjeopolitike.

Sipas saj, sfida kryesore për forcat pro-evropiane në Mal të Zi është që të organizohen politikisht për zgjedhjet e ardhshme dhe të marrin përgjegjësinë për drejtimin e vendit.

“Ata që në Malin e Zi njëmend duan që Mali i Zi të hyjë në BE, duhet t’i fitojnë zgjedhjet. Besoj kjo është detyra e parë”, ka thënë ajo.

Pusiq vlerësoi se Mali i Zi ndodhet në një situatë të ndryshme nga vendet e tjera kandidate për BE.

“Për Malin e Zi, ndryshe nga ndoshta të gjithë kandidatët e tjerë dhe kandidatët e ardhshëm, anëtarësimi në BE është një çështje e mbijetesës së Malit të Zi si shtet”, deklaroi ajo.

Ajo paralajmëroi se nëse dështon integrimi evropian, Mali i Zi do të mbetet pa sovranitet real.

“Nëse dështojnë në këtë projekt, ata do të mbeten formalisht dhe ligjërisht, dhe natyrisht de facto, pa pavarësi dhe sovranitet”, paralajmëroi Pusiq.

Sipas saj, presioni ndaj Malit të Zi vjen kryesisht nga Serbia dhe Rusia, të cilat, sipas saj, e shohin Malin e Zi si pjesë të një politike më të gjerë pro-ruse në rajon.

Pusiq shtoi se problemi nuk është vetëm presioni i jashtëm, por edhe ekzistenca e forcave të fuqishme politike brenda vetë Malit të Zi që, sipas saj, nuk besojnë se shteti malazez duhet të ekzistojë si shtet i pavarur.

“Në Mal të Zi ka një pjesë të opozitës që beson se Mali i Zi nuk duhet të ekzistojë si shtet i pavarur”, deklaroi ajo. /Koha

Ministria e Industrisë ka publikuar dje çmimet e derivateve për dje dhe sot.

Siças saj, çmimi maksimal i derivateve do të jetë:

-Nafta: 1.61 euro/litër;

-Benzina: 1.52 euro/litër

-Gas: 0.76 euro/litër.

Çmimi më i ulët që nga rritja e çmimit të naftës pas shpërthimit të luftës në Lindje të Mesme, ka qenë me 13 dhe 14 maj nga 1.59 euro për litër të naftës.

Aktori Jeton Zogjani ka ngritur shqetësimin për mungesën e një ilaçi të domosdoshëm për pacientët që trajtohen me hemodializë.

Përmes një postimi në rrjetet sociale, Zogjani tha se ilaçi “Sevaren”, i cili përdoret nga pacientët në dializë, është vështirë të gjendet në tregun farmaceutik dhe se aktualisht familja e tij po përballet me mungesën e tij.

Ai bëri të ditur se babai i tij prej shtatë vitesh është në dializë dhe se për herë të parë kanë mbetur pa këtë terapi, duke e cilësuar situatën si shqetësuese.