Kryeministri i vendit, Albin Kurti, gjatë qëndrimit në Paris ka takuar kryetarin e Presidencës së Bosnjë-Hercegovinës, Zeljko Komshiq dhe anëtarin të Presidencës, Denis Beçiroviq.
Gjatë takimit ata kanë diskutuar rreth rëndësisë së zbatimit të plotë të marrëveshjeve që janë arritur në kuadër të Procesit të Berlinit.
Ata po ashtu kanë shqyrtuar mundësitë e thellimit të bashkëpunimit ndërmjet dy vendeve.
Një oficier i Forcës së Sigurisë së Kosovës është shpërblyer me medalje të argjendë gjatë një gare që është zhvilluar në Kroaci.
Kështu ka bërë të ditur FSK-ja përmes një njoftimi për media.
Oficeri Vllasa në kategorinë 35-40 vjeç, arriti të grumbulloi pikë dhe të radhitet në vendin e dytë dhe të shpërblehët me “Medaljen e argjendtë”.
Njoftimi i plotë:
Nëntoger Emir Vllasa pjesëmarrës nga Kosova në garën, Military Crossfit competition “Virbus Unitis 2023” që është mbajtur në Republikën e Kroacisë, në garën shumë sfiduese ku pjesëmarrës ishin njësi të ndryshme të sektorit të sigurisë, ushtarakë, policë, njësi speciale intervenuse, forca detare, zjarrfikës, gardian etj, ka arrritur rezultate të larta duke u radhitur i dyti në kategorinë ku ishte pjesmarrës.
Gara ishte individuale dhe e ndarë në kategori në bazë të moshës dhe gjinisë, oficeri Vllasa në kategorinë 35-40 vjeç, arriti të grumbulloi pikë dhe të radhitet në vendin e dytë dhe të shpërblehët me “Medaljen e argjendtë”.
Analistët në Beograd thonë se marrëveshjet e arritura në Bruksel dhe ajo e Ohrit nënkuptojnë se Serbia e ka njohur Kosovën si shtet, por që këtë duhet ta pranojnë edhe institucionet e Serbisë.
Ata përmendin njohjen e dokumenteve dhe një sërë çështjesh tjera, por thonë se presidenti serb, Aleksandar Vuçiq, po nguron ta pranojë.
Nga Serbia kërkohet dhënia e rezultateve në raport me Kosovën, që është njohja de facto.
Sipas njohëseve të zhvillimeve, raporti vjetor i Komisionit Evropian ku kërkohet nga Serbia që t’i përmbushë obligimet në dialog, është në njëfarë mënyre thirrja për ta njohur sovranitetin e Kosovës.
Dushan Janjiq, analist politik nga Forumi për Marrëdhënie Etnike, ka thënë se ofrimi i njohjes de fakto të Kosovës nga Serbia është në kuadër të marrëveshjes së Ohrit.
“Në thelb, kjo do të thotë se Serbia e pranon se në realitet ekziston Republika e Kosovës dhe jo e ashtuquajtura Kosovë, madje as ajo me yll. Në kuptimin juridik dhe diplomatik, kjo nënkupton, siç shkruhet në marrëveshjen e shkurtit, pezullimi i veprimeve për pengimin e njohjes së Kosovës dhe krijimin e pengesave për Kosovën në organizatat ndërkombëtare”, tha për televizionin publik Dushan Janjiq.
Edhe pse Beogradi zyrtar refuzon që me marrëveshjet e arritura e ka pranuar de fakto Kosovën, për analistët kjo nënkupton një gjendje faktike dhe të qartë, por që në Serbi po manipulohet.
“Presidenti i Serbisë tha se i pranoi marrëveshjet pa nënshkrim, a do të thotë kjo se një fjalë e dhënë në komunikimin zyrtar të një lideri dhe një politikani nuk do të thotë asgjë. Marrëveshjet nënkuptojnë që Serbia nuk do ta pengojë hyrjen e Kosovës në organizatat ndërkombëtare, përfshirë OKB-në. Me marrëveshjet e Brukselit, të gjitha institucionet realisht e kanë njohur Kosovën, pasi hyrja e përfaqësuesve serbë në institucione, pastaj njohja e dokumenteve, çfarë është kjo nëse nuk është njohje”, tha gazetari Rade Radovanoviq.
Normalizimi i marrëdhënieve me Kosovën është një nga kërkesat kryesore për Serbinë në rrugën e saj evropiane. Në Beograd vlerësohet se nga Serbia kërkohet që t`i zbatojë marrëveshjet edhe nëse nuk janë nënshkruar dhe se Perëndimi nuk do të pranojë vonesa për shkak të zgjedhjeve apo kushteve të tjera.
Policia e Kosovës njofton se një person dje (e enjte) në Podujevë ka raportuar se persona të panjohur kanë shtënë me armë dhe janë larguar me shpejtësi me një veturë në drejtim të panjohur.
Policia këtë rast e ka cilësuar vrasje në tentativë dhe kanë bërë të ditur se njësitet policore në vendin e ngjarjes kanë gjetur dhe konfiskuar pesë gëzhoja të armës, po ashtu një granatë dore me siguresë është gjetur në rrugë, me ç’rast njësitet për deminim nga KFOR dhe FSK kanë bërë tërheqjen e mjetit pa incidente.
“Podujevë 09.11.2023-02:08. Ankuesi mashkull kosovar ka raportuar se persona të panjohur pasi kanë shtënë me armë zjarri, janë larguar me shpejtësi me një veturë në drejtim të panjohur. Lidhur me rastin njësitet policore në vendin e ngjarjes kanë gjetur dhe konfiskuar pesë (5) gëzhoja të armës, po ashtu një granatë dore me siguresë është gjetur në rrugë, me ç’rast njësitet për deminim nga KFOR dhe FSK kanë bërë tërheqjen e mjetit pa incidente. Në konsultim me prokurorin, rasti është kualifikuar si më lartë dhe ndodhet në proces hetimor”, thuhet në raportin 24 orësh të policisë.
Dëshmitarja Erjeta Juniku, gruaja e të ndjerit M.J, ka thënë se në shtëpinë e tyre në bjeshkë, familja e të pandehurit e kishte lidhur një kabllo të rrymës pa lejen e të ndjerit.
Ajo ka thënë se bashkëshorti i saj ia kishte këputur kabllon dhe i kishte paralajmëruar vëllezërit e tij që të bisedojnë me vëllezërit e të pandehurit që të mos kenë probleme.
Këtë deklarim dëshmitarja Juniku e ka dhënë të enjten në Gjykatën Themelore në Pejë, në seancën e shqyrtimit gjyqësor ndaj të akuzuarit Shpejtim Knushi, i cili ka ngarkohet se vrarë M.J., pas një mosmarrëveshje për heqjen e kabllos elektrike nga shtëpia, raporton “Betimi për Drejtësi”.
Dëshmitarja ka treguar se në natën kritike ka qenë me vajzën e vogël në shtëpi.
Më pas tha se ishte njoftuar nga familjarët e bashkëshrotit të saj kur kanë telefonuar të pyesin se çka ka ndodhur.
Dëshmitarja ka thënë se të ndjerin e kishin dërguar në Gjakove në spital në gjendje të rëndë dhe pastaj e kanë transferuar në Prishtinë, nga plagët e rënda që i ka pësuar.
Ajo tha se ditën tjetër e kishte takuar në repartin intensive ku ishte në aparatet e oksigjenit, i cili kishte qëndruar një javë dhe më pas ishte transferuar në një repart tjetër.
Dëshmitarja tha se pas disa trajtimeve e kishin dërguar edhe në Tiranë, ku pas disa ditëve aty ka ndërruar jetë.
Në fjalën hyrëse prokurorja Ardita Beqiraj deklaroi se për tu vërtetuar gjendja faktike e veprës penale gjatë shqyrtimit gjyqësor do të procedohen dëshmitarët, bashkëshortja e të ndjerit vëllai i këtij të fundit ku do të tregojnë raportet në mes të ndjerit dhe të pandehurit.
Gjithashtu, prokurorja Beqiraj tha se do të administrohen provat materiale të cekura në aktakuzë, por me theks të veçante tha se CD-ja me video-incizim ku shihen veprimet e të pandehurit, ekspertiza mjekoligjore, shkaku i vdekjes, raporti i këqyrjes së vendit të ngjarjes dhe deklarata e tani të ndjerit M.J., do të vërtetojnë qëllimet dhe motivin e kryerjes së veprës penale.
Tutje, përfaqësuesi i të dëmtuarve avokati Berat Vokshi, tha se provat që do të administrohen do të jenë të pa kontestueshme për vërtetimin e gjendjes së drejtë dhe faktike, ku përgjatë shqyrtimit do të dëgjohen dëshmitarët në bazë të të cilëve do të argumentohen rrethanat se si ka ndodhur rasti ditën kritike, këmbëngulja e të akuzuarit për realizimin e veprës penale, ashtu edhe në bazë të provave materiale, aktekspertimeve mjekoligjore, tha se do të vërtetohet veprimi kundërligjor.
Avokati Vokshi tha se nga dëgjimi i dëshmitarëve dhe administrimit të provave do të ketë edhe ricilësim të veprës penale dhe atë nga vrasje në vrasje të rëndë.
Tutje, mbrojtësi i të akuzuarit Knushi, avokati Ndrec Dodaj, në fjalën hyrëse deklaroi se nëse shihen provat dhe faktet brenda aktakuzës në raport me gjendjen e provave do të rezulton se kanë të bëjnë me një aktakuzë sipërfaqësore për faktin se elementet kryesorë të veprës penale nuk do të vërtetohen.
Sipas tij, ka shumë fakte notore nga aktakuza që i vërteton vet i pandehuri siç janë takimi i ditës kritike, koha dhe vendi ku janë takuar me viktimën si ka shkrepur me armë, si dhe faktet tjera përcjellëse.
Në cilësi të dëshmitarit kishte për t’u dëgjuar edhe i dëmtuari Osman Juniku, mirëpo përfaqësuesi i tij, deklaroi se nuk ka mundur të vijë në shqyrtim gjyqësor për arsye shëndetësore dhe se jeton jashtë shtetit.
Më pas seanca u ndërprerë dhe pritet të vazhdojë me dëgjimin e të dëmtuarit dëshmitarit Osman Juniku, për datën 13 dhjetor të këtij viti në ora 10:00.
Ndryshe, sipas aktakuzës së ngritur nga Prokuroria Themelore e Gjakovës, me 15 qershor 2023, po e ngarkon të pandehurin Shpejtim Knushi, që me 4 korrik 2022, rreth orës 21:20 min, në fshatin Dujakë Komuna e Gjakovës, me dashje ka privuar nga jeta tani të ndjerin M.J.
Sipas aktakuzës, shkaku u vrasjes ishte një mosmarrëveshje në lidhje me heqjen e një kabllo elektrikë nga viktima në shtëpizën e të pandehurit në bjeshkë.
Pas fjalosjes mes vete në një moment i pandehuri kishte nxjerr nga brevzi pistoletën dhe në një distancë prej 2-3 shtënë fillimisht në tokë afër këmbëve të viktimës e më pas e qëllon në pjesë vitale të trupit.
Për këto ai ngarkohet për veprën penale të “vrasjes”, nga neni 172 i KPRK-së, si dhe për veprën e dytë “mbajtja në kontroll ose posedim të paautorizuar të armëve”, nga neni 366 par.1 të KPRK-së.
Kryeministri izraelit, Benjamin Netanyahu ka dhënë një intervistë tjetër për median amerikane, në të cilën ka hedhur poshtë pretendimet e Shtëpisë së Bardhë se Izraeli do të pauzonte katër orë në ditë luftën.
Ka pasuar shumë konfuzion natën e kaluar pas raportimeve të ndryshme të zyrtarëve amerikanë dhe izraelitë rreth asaj se a do të ketë pauza disa orëshe të luftës së Izraelit kundër Hamasit në Gaza.
Kur u pyet nga Fox News në lidhje me këtë çështje, lideri izraelit ka sqaruar se “jo, lufta vazhdon kundër armikut Hamas… por në vende të caktuara për një periudhë të caktuar – disa orë këtu, disa orë atje – ne dëshirojmë të lehtësojmë një kalim të sigurt të qytetarëve larg zonës së luftës”.
Ai nuk e tha në mënyrë eksplicite, por ka të ngjarë t’i referohej rrugës Salah al Din, të cilën Izraeli e ka hapur si një “korridor humanitar” disa herë gjatë kësaj jave, për të lejuar qytetarët e Gazës të largohen nga jugu.
Netanyahu tha gjithashtu se nuk kishte një plan kohor për luftën, por se ajo do të përfundonte pasi të mposhtet Hamasi.
Kryeministri e bëri të qartë se megjithëse Izraeli nuk kishte ndërmend të pushtonte apo qeveriste Gazën, ai parashikonte një territor të riformuar rrënjësisht dhe një rajon më të gjerë.
“Ne nuk duam të kërkojmë të qeverisim Gazën, nuk kërkojmë të pushtojmë, por kërkojmë t’i japim asaj dhe neve një të ardhme më të mirë në të gjithë Lindjen e Mesme”, tha ai.
Kryeministri i Kosovës Albin Kurti dhe presidenti serb Aleksandar Vuçiq, po qëndrojnë në Paris, ku sot do të fillojë Forumi i Paqes në Paris, me rastin e Ditës së Armëpushimit të Luftës së Parë Botërore.
Siç mëson ATV, Vuçiq dhe Kurti do të kenë takime të rëndësishme me përfaqësues të vendeve evropiane në margjinat e takimit, të cilat do të jenë sërish një mundësi për t’u thënë atyre se duhet të ndërmarrin hapa drejt normalizimit të marrëdhënieve dhe përmbushjes së detyrimeve nga marrëveshjet e arritura në shkurt dhe mars.
Ende nuk ka ndonjë konfirmim zyrtar nëse do të ketë ndonjë takim mes tyre, apo nëse takimet do t’i zhvillojnë individualisht vetëm e përfaqësues të vendeve të BE-së.
Kryeredaktori i ATV-së, Leart Hoxha, po qëndron në Paris për të përcjellë nga afër ngjarjet që do të zhvillohen në këtë forum, ku gjatë ditës do të ketë edhe lidhje të drejtpërdrejta për të dhënë detaje e fundit që do të pasojnë nga takimet e përfaqësuesve të BE-së me liderët e Kosovës dhe Serbisë.
Ndërkohë, edhe Departamenti Amerikan i Shtetit ka njoftuar se Ndihmës Sekretari për Çështjet Evropiane dhe Euroaziatike James C. O’Brien po ashtu do të marrë pjesë në Forumin e Paqes, ku pritet të takohet me kryeministrin e Kosovës, Albin Kurtin.
O’Brien do të zhvillojë takime edhe me kryeministrin e Shqipërisë, Edi Rama, presidentin e Malit të Zi, Jakov Milatovic dhe kryeministrin e Maqedonisë së Veriut, Dimitar Kovachevski.
Ndryshe, ambasadori amerikan në Kosovë, Jeffrey Hovenier, të mërkurën doli në një konferencë për media, ku foli për dialogun Kosovë – Serbi dhe çështjen që po shihet si pikë e nxehtë e këtij procesi, formimin e Asociacionit të komunave me shumicë serbe, për çka tashmë është propozuar një draft statut, që sipas SHBA-së përmbush të gjitha kriteret që i parashohin ata.
Propozimi i zyrtarëve perëndimorë për formim të Asociacionit të komunave me shumicë serbe në Kosovë, u është prezantuar kryeministrit të Kosovës, Albin Kurti dhe presidentit serb, Aleksandar Vuçiq, më 21 tetor nga përfaqësuesit e Shteteve të Bashkuara (SHBA), Bashkimit Evropian (BE), Francës, Gjermanisë dhe Italisë.
Hovenier është pyetur edhe nëse ekzistojnë afate kohore për zbatim të këtij draft-statuti.
Ai ka thënë se duhet vlerësuar angazhimin e madh të zyrtarëve më të lartë të vendeve evropiane për këtë proces, përfshirë kancelarin gjerman, Olaf Scholz, presidentin francez, Emmanuel Macron dhe kryeministren italiane, Giorgia Meloni.
“Ata i përdorin shprehjet ‘urgjente’, ‘sa më shpejt që është e mundur’, e të ngjashme. Ekziston një urgjencë, ka kërkesë që gjërat të lëvizin shpejt. Qeveria e Kosovës nuk ka arsye për të mos ecur përpara me këtë draft-statut. Kryeministri ka thënë se ka gatishmëri që ta pranojë në tërësi, javë më parë. Edhe ne po punojmë që kjo gjë të bëhet në kuadër të strategjisë sonë më të gjerë. Nuk ka të bëjë vetëm me Asociacionin, ka të bëjë me zbatimin e plotë të të gjitha obligimeve që i kanë Kosova dhe Serbia në Marrëveshjen Bazë dhe aneksin e Ohrit. Këtë dëshirojmë ta shohim”, ka thënë mes tjerash Hovenier.
Departamenti Amerikan i Shtetit ka bërë të ditur së Ndihmës Sekretari për Çështjet Evropiane dhe Euroaziatike James C. O’Brien do të udhëtojë për Francë dhe Belgjikë, nga 9 deri më 14 nëntor 2023.
Në komunikatë është bërë e ditur se në Paris do të marrë pjesë në Forumin e Paqes në Paris e ku do të takohet edhe me kryeministrin e Republikës së Kosovës, Albin Kurti.
O’Brien gjithashtu do të takohet edhe me kryeministrin e Shqipërisë, Edi Rama, presidentin e Malit të Zi, Jakov Milatoviç dhe kryeministrin e Maqedonisë së Veriut, Dimitar Kovaçevski.
Në këto takimet do të diskutohet për çështjet rajonale dhe raportet bilaterale.
Kryeministri Kurti në Francë do të takohet me James O’Brien
Departamenti Amerikan i Shtetit ka bërë të ditur së Ndihmës Sekretari për Çështjet Evropiane dhe Euroaziatike James C. O’Brien do të udhëtojë për Francë dhe Belgjikë, nga 9 deri më 14 nëntor 2023.
Në komunikatë është bërë e ditur se në Paris do të marrë pjesë në Forumin e Paqes në Paris e ku do të takohet edhe me kryeministrin e Republikës së Kosovës, Albin Kurti.
O’Brien gjithashtu do të takohet edhe me kryeministrin e Shqipërisë, Edi Rama, presidentin e Malit të Zi, Jakov Milatoviç dhe kryeministrin e Maqedonisë së Veriut, Dimitar Kovaçevski.
Në këto takimet do të diskutohet për çështjet rajonale dhe raportet bilaterale
“Ndërsa në Paris, ai do të marrë pjesë në Forumin e Paqes në Paris dhe do të takohet me drejtorin politik francez Frederic Mondoloni dhe zyrtarë të tjerë francezë për të diskutuar sfidat rajonale dhe globale. Ndihmës Sekretari O’Brien do të takohet gjithashtu me liderët evropianë, duke përfshirë kryeministrin shqiptar Edi Rama, kryeministrin armen Pashinyan, kryeministrin e Kosovës Albin Kurti, presidentin malazez Milatovic dhe kryeministrin e Maqedonisë së Veriut Dimitar Kovachevski për të diskutuar çështjet rajonale dhe dypalëshe”, thuhet në komunikatën e DASH.
Ndërkohë Ndihmës Sekretari O’Brien do të takohet me Shefin e Stafit të Kryeministrit belg Peter Moors për të diskutuar mbjatjen përgjegjëse të Rusisë për luftën e saj të paprovokuar dhe brutale kundër Ukrainës. Ai do të takohet gjithashtu me zyrtarë të BE-së dhe NATO-s.
Është sulmuar dje fizikisht ushtruesi i Detyrës i Drejtorit të Minierës së Trepçës, Bahri Karaça, në zyrën e tij.
Viktima ka pësuar lëndime dhe është dërguar për tretman mjekësor në spitalin rajonal, ndërsa i dyshuari pas intervistimit me urdhër të prokurorit është dërguar në mbajtje.
“Stantërg 09.11.2023-11:05. Është arrestuar i dyshuari kosovar pasi që i njëjti, për motive të panjohura ka sulmuar fizikisht viktimën mashkull kosovar. Viktima ka pësuar lëndime dhe është dërguar për tretman mjekësor në spitalin rajonal, ndërsa i dyshuari pas intervistimit me urdhër të prokurorit është dërguar në mbajtje”, thuhet në njoftimin e policisë.
Ambasadori serb në SHBA, Marko Gjuriq, në një intervistë për “Jerusalem Post” ka përsëritur frazën e vjetër të kriminelit të luftës Sllobodan Millosheviq, se Kosova është “djepi i shtetësisë, shpirtërores, kulturës dhe identitetit të Serbisë” dhe se njohja e pavarësisë së saj nga Izraeli ishte një goditje e rëndë për marrëdhëniet serbo-izraelite.
“Njohja e “të ashtuquajturës” Kosovë nga qeveria izraelite ishte, pa asnjë dyshim, goditja më e rëndësishme për marrëdhëniet serbo-izraelite në 75 vjetët e fundit”, ka pretenduar Gjuriq.
Ai ka thënë se “Kosova është tokë e shenjtë për serbët, jo vetëm 13 për qind e territorit sovran, por djep i shtetësisë, shpirtërores, kulturës dhe identitetit të Serbisë”.
Ai ka pretenduar se “Kosova konsiderohet si pjesë e Serbisë nga Kombet e Bashkuara dhe 110 shtete të botës, ku gjithsej 79.8 për qind e popullsisë e mbështesin qëndrimin e Serbisë për statusin e Kosovës”.
“Në tre vjetët e fundit, 27 shtete “e kanë revokuar apo ngrirë” njohjen e Kosovës, për të lehtësuar zgjidhjen përmes dialogut. Izraeli ishte i vetmi njohës i ri. Marrëdhëniet dypalëshe pësuan një goditje të rëndë. Por, marrëdhëniet mes serbëve dhe hebrenjve janë aq të forta dhe të bazuara, saqë me krenari mund të them se ne po vazhdojmë t’i zhvillojmë marrëdhëniet tona në shumë sfera dhe jam i bindur se këtë do ta bëjmë me një ritëm edhe më të madh”, ka pretenduar Gjuriq.