Category: Lajme

Përgatiti: Fatlum Jashari

Një raport i Ministrisë së Mjedisit, Planifikimit Hapësinor dhe Infrastrukturës konstaton se Ligji për Ndërtim, i cili është në fuqi nga vitit 2012, nuk ka koherencë të brendshme në 21 nene dhe nuk është i harmonizuar me 9 ligje të tjera.

Nga problemet kryesore të evidentuara është mungesa e Kodit Unik të Ndërtimit, të cilin Qeveria do të duhej ta miratonte 6 muaj nga hyrja në fuqi e ligjit.

Kodi do të përcaktonte vendosjen e kërkesave minimale për adresimin e fuqisë strukturore, hapësirave të emergjencës, sanitarisë, ndriçimit adekuat, ventilimit, qasjes, eficiençës së energjisë dhe sigurinë e jetës në lidhje me objektet, për të mbrojtur shëndetin publik, sigurinë dhe mirëqenien e përgjithshme të banorëve.

Duke konstatuar mos-zbatimin e ligjit në raport me Kodin, raporti rekomandon që ai të hiqet dhe në ligjin e ri të zëvendësohet me standardet apo kodet ndërtimore të Bashkimit Evropian.

Mes tjerash, raporti propozon që në ligji i ri të saktësojë se: “ndërtimi nuk mund të fillojë pa u pajisur me leje”, e po ashtu se “objekti nuk mund të përdoret pa u pajisur me certifikatën e përdorimit”.

Ligji vlerësohet QW bie ndesh në nenet që përcaktojnë llojet e ndërtimit dhe llojet për të cilat lëshohen lejet e ndërtimit.

Paqartësi e ndeshje kompetencash konstatohen ndërmjet nivelit qendror dhe lokal, në lëshimin e lejeve në zonat e veçanta, e po ashtu edhe në dispozitën për përcaktimin e taksës administrative për pajisje me leje.

Vonesat për pajisje me leje ndërtimore, në shumë raste deri në një vit ose më shumë, sipas raportit, përbëjnë cenim të të drejtave qytetarëve.

Në kuadër të rekomandimeve lidhur me nenin për kundërvajtjet për shkelje të Ligjit për Ndërtim, propozohet të shtohet edhe kapitulli për veprat që lidhen me korrupsionin zyrtar dhe veprat penale kundër detyrës zyrtar, nga Kodi Penal.

Ndonëse nuk ka një shifër zyrtare, ndërtimet e reja gjithandej qyteteve në Kosovë janë shtuar vrullshëm, veçmas pas shpalljes së pavarësisë.

Mos respektimi në masë të konsiderueshme i planeve urbanistike, distancës dhe kritereve tjera minimale, përbëjnë shqetësim në këtë vrull.

Deri më 2017, institucionet kishin evidentuar më shumë se 350 mijë ndërtime pa leje në Kosovë – ndërsa ligji për legalizim është plotësuar e ndryshuar dhe afati është zgjatur disa herë, por që interesimi nuk ka qenë masiv.

Më shumë detaje i gjeni në Edicionin Qendror të lajmeve në videon më poshtë:

Përgatiti: Pranvera Krasniqi

15 aktakuza për krime lufte janë ngritur gjatë vitit 2023 nga Prokuroria Speciale. Tetë prej tyre, të cilat parashohin gjukim në mungesë, ishin risi e vitit 2023 pasi gjykimi në këtë formë u bë për herë të parë në Kosovë.

Ministrja e Drejtësisë, Albulena Haxhiu zotohet se hetimi i krimeve të luftës është prioritet për qeverinë.

“Sikurse edhe në 2021 dhe 2022, ne kemi ndarë buxhet nga Ministria e Drejtësisë me ndryshim në buxhetin e Republikës së Kosovës për Këshillin Prokurorial. Dhe qëllimi ka qenë që të shtohen edhe katër prokurorë shtesë në kuadër të Departamentit për Krime të Luftës, gjashtë bashkëpunëtorë profesional dhe dy persona staf teknik apo përkthyes që mund të ndihmojmë prokurorët për adresimin e këtyre rasteve”, tha Haxhiu.

Ndërkaq, Amer Alija nga Fondi për të Drejtën Humanitare konsideron se ka pasur hetim më intensitet më të lartë.

“Nëse flasim për këtë vit, apo për 2023 dhe nëse e krahasojmë me vitet paraprake prej se i kanë marrë kompetencat Prokuroria Speciale, viti 2023 ka qenë me një intensitet më të lartë për arsye se janë ngritur gjashtë aktakuza ndaj personave që janë arrestuar, po ashtu janë ngritur edhe 8 aktakuza në mungesë. Në krahasim me vitet e kaluara ku janë ngritur një apo dy aktakuza. Pra, ky vit ka qenë ndoshta, edhe pse ka hyrë në fuqi Ligji për Gjykimin në Mungesë, kemi pasur më shumë rezultate në hetimin e këtyre rasteve”, tha Alija.

Sidoqoftë, drejtoresha e Qendrës për Rehabilitimin e të Mbijetuarve të Torturës, Feride Rushiti, pohon që sigurimi i dëshmive për dhunën seksuale, vazhdon të mbetet sfidë.

“Natyrisht që pas 24 vjetësh nuk është e lehtë për të mbijetuarit e dhunës seksuale, qoftë për të hyrë në procesin e dëshmisë, qoftë për t’u ballafaquar me gjykatën, për faktin që ky proces është mjaft i ndjeshëm edhe kur nuk ka ndjeshmëri të institucioneve, bëhet edhe më i vështirë. Megjithatë, ne jemi munduar paralelisht për të punuar me të mbijetuarit, për t’i fuqizuar dhe për të kërkuar drejtësi dhe njëkohësisht për të punuar me policinë për krime lufte, me gjykatat në mënyrë që ata të kenë një qasje sensitive”, tha Rushiti.

Nga Prokuroria Speciale deri më tani janë ngritur 33 aktakuza me rreth 90 të pandehur. Në Tribunalin e Hagës janë dënuar gjashtë eprorë serbë, të cilët kanë pasur hierarki të larta komanduese gjatë kohës së luftës, në pesë prej tyre ka pasur edhe vepra penale të dhunimit seksual.

Më shumë detaje i gjeni në Edicionin Qendror të lajmeve në videon më poshtë:

Gjatë 24 orëve të kaluara janë evidentuar gjithsej 55 aksidente, ku 34 shoferëve u janë konfiskuar patentë shoferi për shkelje të ndryshme të rregullave në trafik.

E pas kësaj, policia ka apeluar të gjithë pjesëmarrësit tjerë në trafik që të jenë vigjilent dhe gjatë pjesëmarrjes në rrugë të respektojnë dispozitat ligjore.

“Siguria në trafikun rrugor është prioritet për të gjithë, respektoni shenjat e trafikut për një siguri më të madhe rrugore Gjatë 24 orëve të kaluara janë evidentuar gjithsej 55 aksidente në trafikun rrugor, Policia e Kosovës me zyrtarët e saj janë duke kryer aktivitete në teren me qëllim që të parandalohen aksidentet rrugore, por edhe janë duke ndërmarr masa ndëshkuese ndaj atyre personave që nuk respektojnë rregullat dhe shenjat në trafik”.

“Gjatë 24 orëve të kaluara në këtë fushëveprim në nivel vendi janë realizuar 545 pika kontrolli të automjeteve, përderisa 34 shoferëve iu janë konfiskuar patentë shoferi per shkelje të ndryshme të rregullave në trafik. Apelojmë tek të gjithë shoferët, por edhe pjesëmarrësit tjerë në trafik që të jenë vigjilent dhe gjatë pjesëmarrjes në rrugë të respektojnë dispozitat ligjore që burojnë nga ligji mbi trafikun rrugor, në mënyrë që secili të kontribuon në zvogëlimin e statistikave të aksidenteve rrugore”, thuhet në njoftimin e policisë.

Kryetari i AAK-së, Ramush Haradinaj, ka uruar qytetarët e Kosovës që sot festojnë Krishtlindjen ortodokse.

Haradinaj, potencoi se festat fetare gjithmonë u kanë shërbyer qytetarëve të Kosovës, por edhe të gjjthë njerëzve vullnetmirë, për ta kultivuar solidaritetin ndërmjet tyre.

“Të gjithë qytetarëve të Kosovës, që sot festojnë krishtlindjen ortodokse, gëzuar për shumë mot! Me këtë rast, i uroj edhe miqtë tanë ndërkombëtarë që shërbejnë në misionet e ndryshme në vendin tonë, si dhe të gjithë të krishterët e ritit ortodoks”, shkroi Haradinaj.

“Festat fetare gjithmonë u kanë shërbyer qytetarëve të Kosovës, por edhe të gjjthë njerëzve vullnetmirë, për ta kultivuar solidaritetin ndërmjet tyre. Krishtlindjen ortodokse, i kremtofshi në paqe, me familjet tuaja, me mirësi e begati!”.

Qendra Kombëtare për Menaxhim Kufitar ka përditësuar të dhënat për pritjet në kufi.

Aktualisht të Dheu i Bardhë po presin deri në një orë, ndërsa në Merdar deri në 3 orë.

Në Bërnjak, Mucibabë dhe Mutivodë pritjet po zgjasin deri në 10 minuta, ndërsa në pikat tjera jo më shumë se 5 minuta.

Ish-ushtari i Ushtrisë Çlirimtare të Kosovës, Hasan Dakaj është arrestuar mëngjesin e së premtes nga autoritetet e Serbisë në pikëkalimin kufitar në Merdarë.

Avokati i tij, Xhevdet Smakiqi, ka thënë se informatat e fundit që i ka janë se tashmë Dakaj është dërguar nga Qendra e Ndalimit në Kushumli në Qendrën Kryesore të Paraburgimit në Beograd, në rrugën Bacvanska.

“Informatat e fundit per rastin e arrestimit e Hasan Dakaj qe i kam marrur janë se tashmë Ztr. Hasan Dakaj është dërguar nga Qendra e Ndalimit ne Kushumli ne Qendren Kryesore te Paraburgimit ne Beograd ne rrugen Baçvanska.”

Sipas Smakiqit, Prokuroria e Serbisë pretendon se ai në vitin 1999 ka kryer krime lufte.

“Pjestari i UÇK-se Hasan Dakaj pretendohet nga Prokuroria serbe se kinse ai ne vitin 1999 ka kryer krime lufte si 19 vjeçar. Sipas detyres zyrtare Hasan Dakaj i është caktuar një avokat nga Serbia, ku ne intervistimin para prokurorit serb Hasan Dakaj është deklaruar i pafajeshem edhe per faktin se fare nuk ka qenë në ato lokacione sipas dyshimeve te prokurorise se serbise dhe se është ngatrruar ne identitet me dikend tjetër.

Smakiqi ka bërë të ditur se të martën do të mbahet seanca dëgjimore lidhur me kërkesën për caktimin e masës së paraburgimit.

“Te Marten 2024 pritet dhe nje seance degjimore per te shqyrtuar kerkesen e Prokurorise serbe lidhur me masen e paraburgimit. Ne cilësinë e avokatit te Familjes Dakaj jamë në kontakt orë pas ore me te ngarkuarin ne Zyren Nderlidhëse te Kosoves në Beograd dipomatin Jetish Jasharin dhe e falenderoi per qasjen profsionale. Por duke qenë se arrestimi i Hasan Dakaj është ndalim politik për te iu hakmarrur pjestareve te UÇK-së për arrjtjen e pavarësisë dhe qe mos ti lejojë ta gezojnë liberalizimin e vizave kategoria qe ka kontribuar për këtë ditë përbën çështje poltike dhe fare pak juridike.”

Ai i ka bërë thirrje kryeministrit Kurti, ministers Gërvalla dhe diplomatëve që të bëjnë presion që Dakaj të lirohet sa më shpejtë.

“Prandaj i bëjë thirrje Kryeministrit, Minstres Gervalla dhe secilit diplomatë te bëjë presionin adekuat diplomatik e politikë qe ndermjetesit e dilogut dhe ambasadat e vendeve mike te ndikojnë qe Hasan Dakaj i pafajeshem te lirohet sa me shpejtë. Kurse thirrjet e kujdoqoftë nga zyrtaret e shtetit te Kosoves qofshin dhe diplomatë te Kosoves qe qytetaret e Kosoves te mos levizin neper territorin e Serbisë janë tërsishtë jo profesionale dhe legjitojnë arrestimet poltike te kundërligjshme. Liberalizimi levizja e lirë nuk është parciale as selektive iu takon secilit shtetas te Republikes se Kosoves edhe ish pjestarëve te UÇK-se.”

Policia Kufitare në pikë-kalimin kufitar në Morinë, derisa tentonte të arratisej, ka arrestuar 27-vjeçarin kosovar, i cili ishte i shpallur në kërkim ndërkombëtar nga autoritetet e Italisë për organizatë kriminale dhe emigracion të paligjshëm.

Kështu ka bërë të ditur policia kufitare në një postim në Facebook.

“Gjatë verifikimeve dhe intervistimit në vijë të dytë, në dalje të vendit, rezultoi se 27-vjeçari ishte shpallur në kërkim ndërkombëtar nga autoritetet Italiane, pasi Gjykata e Triestes, Itali, i ka caktuar masën e sigurisë “Arrest në burg”, për veprat penale “Organizatë kriminale” dhe “Emigracioni i paligjshëm”, sipas parashikimeve të legjislacionit penal të Italisë”, thuhet në njoftimin e policisë.

Interpol Tirana, në bashkëpunim me homologët në Itali, vijon procedurat për ekstradimin e 27-vjeçarit.

Javën e ardhshme në vendin tonë do të mbajë mot i ftohët, me reshje shiu dhe bore.

Sipas Instituti Hidrometeorologjik i Kosovës parashihen dhe dy episode me temperatura tipike dimërore. Java e fundit e janarit sërish parashihet me temperatura mbi vlerat e mesatareve. Temperatura dimërore parashihen në mesin e shkurtit dhe dekada e parë e muajit mars gjithashtu parashihet me temperatura tipike dimërore.

Parashihen ngrica dhe mjegull në ultësira dhe vise të larta, duke e vështirësuar qarkullimin normal të komunikacionit. Kujdes i shtuar për të gjithë pjesëmarrësit në komunikacion.

Të hënën do të jetë mot kryesisht i vranët dhe vende-vende me reshje shiu të cilat në pjesën e dytë të ditës parashihen të shndërrohen në borë. Gjithashtu shënohen edhe rënie të ndjeshme të temperaturave. Minimalet parashihen të lëvizin ndërmjet -3 deri -1 gradë celsius, ndërsa maksimalet e ditës parashihen të lëvizin ndërmjet 1-4 gradë Celsius.

Ditën e martë moti do të jetë kryesisht i vranët dhe vende-vende me fjolla bore. Temperaturat minimale do të lëvizin ndërmjet -3 deri -1 gradë Celsius, ndërsa maksimalet e ditës parashihen të lëvizin ndërmjet -1 deri 1 gradë Celsius.

Të mërkurën do të majë mot me vranësira dhe intervale me diell, por i ftohët. Temperaturat minimale do të lëvizin ndërmjet -6 deri -3 gradë Celsius, ndërsa maksimalet e ditës parashihen të lëvizin ndërmjet -2 deri 0 gradë celsius.

Ditën e enjte do të jetë mot kryesisht i ngjashëm me ditën e mërkurë por me temperatura për 2-3 gradë më ulët në vlerat e minimaleve. Temperaturat minimale do të lëvizin ndërmjet -8 deri -6 gradë celsius, ndërsa maksimalet e ditës parashihen të lëvizin ndërmjet -2 deri 2 gradë Celsius.

Të premten do të mbajë mot i vranët dhe me intervale me diell. Vranësirat vende-vende mund të sjellin fjolla të dobëta bore, kryesisht në viset e larta. Temperaturat parashihen të jenë afërsisht të ngjashme me të ditës së enjte, si minimalet , ashtu dhe ato maksimalet.