ATV

Category: Lajme

  • Të enjten nis intervistimi i kandidatëve për kryeshef të Trepçës

    Të enjten nis intervistimi i kandidatëve për kryeshef të Trepçës

    Përgatiti: Armand Hoti

    Enis Abdurrahmani vazhdon të jetë ushtrues detyre i kryeshefit të “Trepçës”, përkundër faktit se shkarkimi i tij, qe kusht i minatorëve për ta ndërprerë grevën dhjetëditore, të filluar në tetor të vitit që lamë pas.

    Afati për aplikim për pozitën e kryeshefit në konkursin e rihapur, përfundoi më 26 dhjetor. ATV-ja kupton se të enjten do intervistohen kandidatët që synojnë për këtë pozitë.

    Destan Kërleshi, nënkryetar i Sindikatës së Minatorëve të “Trepçës”, shpreson se konkursi do të rezultojë me emërimin e një kryeshefi të ri që do të ndikojë pozitivisht në performancën e ndërmarrjes.

    “Meqenëse, konkursi i parë u mbyll pa rezultate, shpresojmë që në këtë konkurs të zgjidhet një kandidat potencial që mund ta çojë ndërmarrjen përpara.

    Ndërmarrja “Trepça”, aktualisht është në një situatë shumë të rëndë edhe në aspektin e prodhimit si dhe të financave”, tha Kërleshi.

    Ndërprerjes së grevës i parapriu një marrëveshje mes Bordit të Përkohshëm Mbikëqyrës dhe minatorëve grevistë.

    Kërkesat e minatorëve ishin të qarta: realizimi i pagës mujore nga data 06 deri më datë 10, shkarkimi i kryeshefit, si dhe sigurimi shëndetësor dhe kushte më të mira të punës. Përmes një komunikate të lëshuar më 5 nëntor, Bordi i “Trepçës”, theksoi se kërkesat e minatorëve po trajtohen me prioritet.

    Kryesindikalisti Kërleshi tregon për hapat që deri më tani janë ndërmarrë në realizimin e kërkesave të minatorëve.

    “Sa i përket realizimit të pagave, në muajin nëntor kemi pasur vonesa, pagën e dhjetorin e kemi marrë para Vitit të Ri, falë subvencioneve të Qeverisë… Sigurim shëndetësor nuk ka, lëvizje ka, sipas një takimi që kemi pasur në fillim të dhjetorit ME-ja ka ndarë subvencione ku është përfshirë edhe sigurimi shëndetësor i punëtorëve, të paguhet borxhi ndaj kompanive që më herët kanë bërë sigurimin e punëtorëve”, tha Kërleshi.

    Enis Abdurrahmani është ushtrues detyre i kryeshefit të “Trepçës”, për më shumë se dy vjet. Në fund të shtatorit të vitit 2023, Bordi paraprak i ndërmarrjes mori vendim për shkarkimin e Enis Abdurrahmanin për shkak të performancës së dobët. Më pas Qeveria e shkarkoi atë bord, duke emëruar një bord tjetër të përkohshëm, i cili ktheu Abdurrahmanin në detyrë. Deri në tetor të vitit 2023, ndërmarrja “Trepça” me kryeshef Enis Abdurrahmanin, nuk kishte realizuar as gjysmën e shitjeve të planifikuara për tërë vitin.

  • KMDLNj: Nuk përkrahim mbylljen e rrugës “Xhorxh Bush” dhe rrugëve të tjera, komuna të marrë pëlqimin e banorëve

    KMDLNj: Nuk përkrahim mbylljen e rrugës “Xhorxh Bush” dhe rrugëve të tjera, komuna të marrë pëlqimin e banorëve

    Këshilli për Mbrojtjen e të Drejtave e të Lirive të Njeriut ka reaguar për paralajmërimin e Komunës së Prishtinës për mbylljen e rrugës deri te Sheshi i Flamurit, pra rrugën “Xhorxh Bush”.

    KMDLNJ-ja ka njoftuar se nuk e përkrah këtë vendim dhe se komuna duhet ta marrë pëlqimin e banorëve për këto veprime dhe jo ta dhunojnë vullnetin e tyre dhe lirinë e lëvizjes.

    “Kur komuna e Prishtinës filloi të mbyllë rrugë të caktuara duke eksperimentuar se në cilin segment ‘është ndotja më e madhe e ajrit për shkak të fluksit të veturave’, dhe shih rastësinë pikërisht rruga që pastaj u mbyllë doli të jetë më e ndotura, KMDLNj pati reaguar duke e cilësuar si shkelje e të drejtave të njeriut përkatësisht si kufizim të lirisë së lëvizjes. Edhe trafiku, në vend se të shkarkohet u shndërrua në lëmsh për shoferët dhe udhëtarët. Edhe bizneset janë dëmtuar me këtë mbyllje. Me një fjalë trafiku u shndërrua në kolaps”.

    “Tash, për ta formalizuar vdekjen klinike të trafikut, komuna e Prishtinës ka paralajmëruar mbyllje të rrugës deri te Sheshi i Flamurit. Për KMDLNj kjo nuk paraqet asnjë zgjidhje përveç vazhdimit të kaosit të trafikut urban. Rrugët e mbyllura Komuna e Prishtinës i ka shndërruar në hapësira korruptive të biznesit duke dëmtuar maksimalisht bizneset tjera.

    “KMDLNj-ë përkrahë protestën e qytetarëve për hapje të rrugës ‘Xhorxh Bush’ dhe kundërshton çdo mbyllje të rrugëve tjera. Komuna e Prishtinës duhet ta marrë pëlqimin e banorëve për këto veprime dhe jo ta dhunojë vullnetin e tyre dhe lirinë e lëvizjes”.

  • Vuçiq për rikthimin e shërbimit të detyrueshëm ushtarak: Pa ushtri nuk jeni asgjë, na shkelin si miza, si mushkonja

    Vuçiq për rikthimin e shërbimit të detyrueshëm ushtarak: Pa ushtri nuk jeni asgjë, na shkelin si miza, si mushkonja

    Presidenti i Serbisë, Aleksandar Vuçiq, duke komentuar kërkesën për rivendosjen e shërbimit të detyrueshëm ushtarak, tha se fillimisht do të presë mendimin e kabinetit të tij për këtë çështje dhe se duhet të shihet se sa kohë do të zgjasë dhe nëse ushtarët do të shkonte në shtëpi në fundjavë.

    “Pa ushtri je askushi dhe asgjë, do të na shkelnin si miza, mushkonja,… Shikoni sa po investojnë Hungaria dhe Rumania… dhe do të kuptoni se si ka ndryshuar gjithçka në botë. ”, tha Vuçiq në një paraqitje të ftuar në TV Pink.

    Ai tha gjithashtu se ushtria serbe ka bërë përparime të mëdha dhe se kur ushtria është në një situatë të vështirë, kurrë nuk duhet ta thoni këtë “si dikush që pretendon të jetë i paanshëm”. “Ose do të kemi ushtri ose nuk do të kemi… Nëse doni NATO-n, atëherë nuk keni nevojë për ushtri, nuk ka problem, ka disa që nuk e kanë ushtrinë e tyre… Është një çështje e zgjedhjes politike”, shtoi ai.

  • Numri i palestinezëve të vdekur nga sulmet izraelite në Gaza rritet në mbi 23,000

    Numri i palestinezëve të vdekur nga sulmet izraelite në Gaza rritet në mbi 23,000

    Gjithsej 23,084 palestinezë janë vrarë dhe 58,926 janë plagosur në sulmet izraelite në Gaza që nga 7 tetori, tha në një deklaratë ministria e shëndetësisë e Gazës.

    Ministria, e cila drejtohet nga Hamasi, tha se 249 palestinezë u vranë dhe 510 u plagosën në 24 orët e mëparshme, raporton Reuters.

    Nuk ka qenë e mundur që gazetarët të verifikojnë në mënyrë të pavarur shifrat e viktimave të dhëna gjatë konfliktit.

  • Hekurudha Durrës-Prishtinë, Shqipëria konfirmon angazhimin e të dy qeverive

    Hekurudha Durrës-Prishtinë, Shqipëria konfirmon angazhimin e të dy qeverive

    Zëvendëskryeministrja shqiptare, njëherësh ministre e Infrastrukturës dhe Energjisë, Belinda Balluku solli në vëmendje projektin hekurudhor që lidh Durrësin me Prishtinën, duke e cilësuar atë si projekt kombëtar, për të cilin konfirmoi edhe angazhimin e të dy qeveritë.

    “Nuk harrojmë projektin që lidh Durrësin me Prishtinën, jo vetëm si një transport komercial të rëndësishëm, që do të lidhë portin e Durrësit me portin e thatë të Prishtinës, por edhe si një transport alternativ që do të lidh udhëtarët e shumtë midis dy vendeve”, tha Balluku në konferencën vjetore të mbajtur për shtyp.

    Sipas saj, ky është një projekt që do të mbështetet nga dy qeveritë, pasi quhet një projekt kombëtar, që lidh shqiptarët mes tyre.

    “Nuk bën pjesë në korridoret e transportit evropian, si rasti i segmenteve Vorë- Hani i Hotit apo Durrës-Pogradec, megjithatë dy qeveritë janë të angazhuara dhe besoj se me përfundimin e studimit të fizibilitetit, që tashmë ka marrë rrugë, ne do të jemi të gatshëm të hapim garën ndërkombëtare, të kombinuar midis dy vendeve tona dhe për të nisur menjëherë ndërtimin e kësaj hekurudhe që është një ëndërr e madhe e mbetur pa realizuar”, deklaroi Balluku.

  • Tromp: Gjykimi ndaj Thaçit dhe të tjerëve do të zgjasë edhe 3-4 vjet

    Tromp: Gjykimi ndaj Thaçit dhe të tjerëve do të zgjasë edhe 3-4 vjet

    Gjykimi ndaj ish-krerëve të UÇK-së Hashim Thaçit dhe të tjerëve në Hagë do të zgjasë së paku tri deri në katër vjet, thotë Nevenka Tromp, hulumtuese e Tribunalit të Hagës për krimet e luftës në ish-Jugosllavi.

    Për shtatë vjet e gjysmë, ajo shton se janë paditur vetëm gjashtë persona dhe se vetëm një rast është finalizuar. Ajo thotë se gjatë vitit të kaluar u bë e qartë se Dhomat e Specializuara nuk po punojnë në aktakuza të reja dhe se këtë vit pritet përfundimi i gjykimit të Pjetër Shalës.

    Në një intervistë për KosovaPress, Nevenka Tromp komenton edhe vendimin e Apelit për rastin e Salih Mustafës, për çka konsideron se gjykata ka prezantuar një praktikë të rëndë të dënimit.

    Dhomat e Specializuara në Hagë kanë filluar zyrtarisht punën në maj 2015. Për shtatë vjet e gjysmë, Tromp thotë se është shqiptuar vetëm një aktgjykim.

    “Në shtatë vjet e gjysmë, nga gjashtë të paditur që u gjykuan në tri gjykime të ndryshme, vetëm një është finalizuar plotësisht. Gjykimi i dytë, që përfshin individin Pjetër Shala, me siguri do të finalizohet. Pra, në tetë vjetët e punës së Tribunalit, të Dhomave të Specializuara të Kosovës do të kemi dy aktgjykime. Sa i përket katër individëve, në të ashtuquajturin gjykimi ndaj Thaçit dhe të tjerëve, këta katër individë po gjykohen. Hapja e këtyre gjykimeve ishte në prill të vitit 2023 dhe nëse mund të gjykoni se sa i shpejtë ka qenë rasti i Salih Mustafës, dhe sa i shpejtë ishte (rasti i) Pjetër Shalës, atëherë mund të presim që gjykimi i Hashim Thaçit dhe të tjerëve të zgjasë së paku edhe tri deri në katër vjet”, deklaron Tromp.

    Nevenka Tromp, e cila shkroi librin “Gjykimi i papërfunduar i Millosheviqit”, shton se Dhomat e Specializuara nuk po punojnë me aktakuza të reja.

    Gruaja, e cila punoi për shumë vjet në Tribunalin e Hagës për ish-Jugosllavi, teksa flet për drejtësinë e këtij institucioni, thotë se po bën histori juridike interesante.

    Tromp konsideron se dënimi për Salih Mustafën është praktikë e rëndë që gjykata e ka prezantuar.

    Krahas kësaj, Tromp thotë se në rasti i Mustafës konsiderohet si “drejtësi e ashpër” dhe se dënimi maksimal për krime lufte është 15 vjet.

    Ligjëruesja pranë Universitetit të Amsterdamit flet edhe për kohëzgjatjen e gjykimit, për çka konsideron se bazuar në kohën për të cilën po bëhen hetimet, gjykimet duhet të përfundojnë në kohë më të shpejtë.

    Tromp pret që gjatë këtij viti të përfundojë rasti i Pjetër Shalës.

    Me 3 gusht 2015, Kuvendi i Kosovës e ka miratuar Ligjin për Gjykatën Speciale, me seli në Hagë. Në këtë institucion, që funksionon me ligje të Kosovës, shërbejnë prokurorë e gjykatës të huaj.

    Kjo gjykatë heton krimet e pretenduara të luftës në Kosovë, për një periudhë kohore nga janari 1998 deri në dhjetor 2000.

    Në Gjykatën Speciale deri tani janë gjashtë persona të akuzuar për krime të pretenduara të luftës, Hashim Thaçi, Kadri Veseli, Jakup Krasniqi, Rexhep Selimi, Pjetër Shala e Salih Mustafa. Për këtë të fundit, Apeli ka vendosur dënimin prej 22 vjetësh.

  • Të shtëna me armë zjarri në Fushë Kosovë, i dyshuari ikë

    Të shtëna me armë zjarri në Fushë Kosovë, i dyshuari ikë

    Në orët e para të mëngjesit të sotëm, janë dëgjuar të shtëna me armë zjarri të pompa e derivateve “Kastrati” në Fushë Kosovë, raporton Gazeta Sinjali.

    Siç mëson Sinjali, për motive akoma të panjohura, dikush po dyshohet se ka gjuajtur me armë dhe më pas ka ikur me një veturë të tipit Golf.

    Të njëjtat burime thonë se viktima e rastit, një 23-vjeçar ka dhënë deklaratë para zyrtarëve policorë, ku ka rrëfyer atë që ka ndodhur.

    Ndërkohë në vendin e ngjarjes, një njësi policore ka sekuestruar gëzhojat dhe ka kryer ekzaminimet e nevojshme.

    Pas përfundimit të procedurave policore, Prokurori i Shtetit ka urdhëruar ndërmarrjen e veprimeve të nevojshme hetimore për identifikimin e të dyshuarit dhe kapjen e tij.

  • Stano pas vendimit për targat: Përparimi është i mundshëm, s’ka kohë për të humbur

    Stano pas vendimit për targat: Përparimi është i mundshëm, s’ka kohë për të humbur

    Bashkimi Evropian (BE) thotë se ka shpresë që këtë vit Kosova dhe Serbia t’i zbatojnë marrëveshjet e arritur deri tani në dialogun e ndërmjetësuar nga blloku, duke ngulur këmbë se ato janë të detyrueshme dhe se duhet të zbatohen në tërësi nga të dyja palët.

    Zëdhënësi i BE-së, Peter Stano, tha të hënën në Bruksel se fillimi i zbatimit të marrëveshjes për targat këtë javë mes dy vendeve tregon se “kur ka vullnet nga palët, atëherë edhe përparimi është i mundur”.

    Kosova dhe Serbia njohën edhe zyrtarisht targat e njëra-tjetrës, duke mos e zbatuar nga 1 janari regjimin e letrave ngjitëse që mbulonin simbolet shtetërore në targa kur automjetet lëviznin në territoret e tyre përkatëse.

    “Puna në dialog vazhdon dhe fokusi është në implementim të asaj që është arritur pajtim në Bruksel dhe më pas në Ohër vitin e kaluar. E pamë në rastin e njohjes së targave të veturave se progresi është i mundur. Palët u pajtuan për zbatimin e vendimit për targat”, tha Stano.

    Ai theksoi se BE-ja do të punojë për t’u ndihmuar palëve t’i zbatojnë ato për çfarë janë zotuar dhe e përsëriti se ato janë të detyrueshme për palët.

    Blloku prej 27 vendesh e ndërmjetëson prej vitit 2011 dialogun për normalizimin e marrëdhënieve mes Kosovës dhe Serbisë.

    Vitin e kaluar, Kosova dhe Serbia arritën Marrëveshjen në rrugën drejt normalizimit të marrëdhënieve dhe Aneksin për zbatimin e saj. Pavarësisht trysnisë ndërkombëtare që palët ta zbatojnë marrëveshjen, blloku evropian ka thënë se ajo nuk po zbatohet.

    Në pyetjen se çfarë mjetesh ka BE-ja për ta bindur Serbisë që të zbatojë marrëveshjen, pasi ajo është shprehur se nuk do t’i zbatojë disa pjesë të saj, Stano tha të hënën se Serbia ka zgjedhur si orientim integrimin në BE dhe në rast të dështimit në zbatimin e detyrimeve, do t’i rrezikohej ky proces.

    “E dimë se ka edhe çështje tjera që Serbia duhet t’i përmbushë në procesin e integrimeve e jo vetëm Kosovën. Por, një më shumë do ta bëjë rrugëtimin edhe më të vështirë”, tha ai.

    Marrëveshja për normalizim, prej 11 nenesh, mes tjerash parasheh edhe një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i zbatojnë, po ashtu, të gjitha marrëveshjet e mëhershme të dialogut.

    Shtetet e Bashkuara kanë thënë vazhdimisht që dialogu për normalizimin e raporteve duhet të përmbyllet me njohje të ndërsjellë mes Kosovës dhe Serbisë.

    Komuniteti ndërkombëtar vazhdimisht i ka kërkuar Kosovës që të themelojë Asociacionin e komunave me shumicë serbe, që do të duhej t’i jepte vendimmarrje më të madhe serbëve në Kosovë.

    Një draft-statut për Asociacionin iu prezantua Kosovës dhe Serbisë në tetor nga përfaqësuesit e BE-së, Shteteve të Bashkuara, Francës, Gjermanisë dhe Italisë. Megjithatë, së fundmi, kryeministri i Kosovës, Albin Kurti, ka thënë se ai dhe disa ministra të tij do të shkruajnë draft-statutin për Asociacionin.

    Në lidhje me masave ndëshkuese që BE-ja i ndërmori ndaj Kosovës viti e kaluar, pas rritjes së tensioneve në veri të vendit kur kryetarët shqiptarë u vendosën në zyrtarët e tyre në katër komunat me shumicë serbe pas zgjedhjeve të kundërshtuara dhe bojkotuara nga serbët lokalë, Stano tha se ato do të hiqen “kur të vlerësohet se janë ndërmarrë hapat e duhur për shtensionimin e situatës në veri të Kosovës”.

    Ai theksoi se blloku është duke e vëzhguar situatën në terren dhe duke punuar bashkë me partnerët për të parë nëse janë ndërmarrë masat e duhura.(REL)

  • Haradinaj: S’mbahet mend një vit më me shumë dështime se 2023, Qeveria me pafytyrësinë e saj po përpiqet t’i paraqes si suksese

    Haradinaj: S’mbahet mend një vit më me shumë dështime se 2023, Qeveria me pafytyrësinë e saj po përpiqet t’i paraqes si suksese

    Kryetari i Aleancës për Ardhmërinë e Kosovës (AAK) Ramush Haradinaj e ka quajtur të humbur vitin 2023. Sipas tij gjatë këtij viti ka pasur dështime në çdo segment të jetës e të politikës, raporton EO.

    Në një shkrim në Facebook, kreu i AAK-së ka thënë se ka pasur regres sa i përket pozicionit ndërkombëtar të Kosovës, sanksione e ndëshkime nga aleatët strategjikë.

    “Nuk mbahet mend që Kosova ta ketë pasur një vit më të humbur se sa vitin 2023! Me dështime në çdo segment të jetës e të politikës. Regres ne pozicionin ndërkombëtar të Kosovës; sanksione e ndëshkime nga aleatët strategjikë; asnjë njohje, asnjë investim i huaj; disfatizëm në raport me Serbinë e rrezikim i pavarësisë së vitit 2008; rritje enorme e çmimeve në artikujt elementarë, në energji, në tatime, në artikuj bazë ushqimor; dështim në investime e në zhvillim ekonomik; në arsim e në shëndetësi; me pagat më të ulëta në rajon; me afera të pazbardhura korruptive me rezervat shtetërore e tregtimin e energjisë; me luftë të paskrupullt ndaj gjyqësorit, me largimin masiv të rinisë nga vendi, e kështu me radhë”, ka shkruar Haradinaj në Facebook.

    Ndërsa tha se Qeveria e Kosovës, me pafytyrësinë e saj po mundohet që të gjitha këto dështime, t’i paraqes si suksese.

    “Natyrisht edhe me pafytyrësinë e qeverisë që të gjitha këto dështime t’i paraqes si suksese. Të gjitha këto dështime nuk mund të kalojnë pa ndëshkim. Prandaj sot, më shumë se kurrë kërkohet unitet e mobilizim që të ndalet rënia e shoqërisë dhe e shtetit”, ka shkruar Haradinaj në Facebook.

  • Bujqit gjermanë i bllokojnë rrugët për të protestuar kundër ndaljes së subvencioneve

    Bujqit gjermanë i bllokojnë rrugët për të protestuar kundër ndaljes së subvencioneve

    Bujqit gjermanë e filluan një javë protestash gjithëkombëtare duke i bllokuar rrugët me traktorë të hënën, për t’i kundërshtuar planet e Qeverisë për ndaljen graduale të subvencioneve bujqësore.

    Kolona të traktorëve dhe kamionëve, disa prej të cilët me afishe të vendosura përpara me mbishkrimin: “Pa bujq nuk ka ushqim, e as të ardhme”, u vendosën nëpër rrugët gjermane në temperatura minus zero.

    Në Berlin, dhjetëra traktorë të vendosur në rresht pamundësuan hyrjen në rrugën që dërgon drejt portës Brandenburg.

    Policia tha se u bllokuan rrugët dhe hyrjet në autostrada në shumë pjesë të Gjermanisë, duke shkaktuar komunikacion në trafik gjatë orës së pikut të mëngjesit.

    Bujqit gjermanë marrin pjesë në një protestë kundër ndaljes së subvencioneve për tatimet në automjete në Berlin, Gjermani, 7 janar 2024.

    Bujqit gjermanë marrin pjesë në një protestë kundër ndaljes së subvencioneve për tatimet në automjete në Berlin, Gjermani, 7 janar 2024.

    Bujqit janë zotuar se do ta bllokojnë komunikacionin kryesor dhe rrugët logjistike për një javë, duke thënë se heqja e lehtësimeve tatimore do t’i detyrojë bujqit ta braktisin punën e tyre.

    Joachim Rukwied, kryetar i Shoqatës së Bujqve të Gjermanisë (DBV), u kërkoi qytetarëve mbështetje.

    “Ne nuk duam ta humbim përkrahjen dhe solidaritetin që e kemi marrë nga një pjesë e madhe e popullit. Por, ne nuk do ta pranojmë rritjen e planifikuar të tatimit për sektorin e bujqësisë”, tha ai për revistën Stern të hënën.

    Kritikat e bujqve e nxitën javën e kaluar koalicionin e kancelarit Olaf Scholz – i cili është për ngut ta finalizojë draftin për buxhetin e vitit 2024 pasi ishte vonuar nga një vendim gjykate – të bëjë ndryshime të papritura, përfshirë ndryshimin e planeve për heqjen e subvencioneve për bujqësinë.

    Në vend se t’i japë fund papritmas uljes tatimore për naftën e përdorur në bujqësi, Qeveria planifikon që subvencionet të ulën për 40% këtë vit, për 30% më 2025, dhe do të hiqen plotësisht më 2026.

    Qeveria gjithashtu hoqi dorë nga planet për t’i dhënë fund trajtimit të privilegjuar për tatimet në automjete për bujqësinë dhe pylltarinë.

    Por, DBV-ja tha se këto ndryshime nuk mjafton dhe se protestat do të mbahen këtë javë. /REL/