Category: Lajme

Agjencia e Sigurisë dhe Informacionit e Serbisë (BIA) mohoi akuzat se lideri i subjektit opozitar, Partia Republikane, Nikolla Sandulloviq, ishte subjekt i torturës, duke pretenduar se nuk ka pasur shkelje të të drejtave dhe lirive dhe as ushtrim të forcës së paligjshme fizike ndaj Sandulloviqit.

Më herët, Zyra e Prokurorit në Nish konfirmoi për Radion Evropa e Lirë se Sandulloviq ndodhet në paraburgim që nga java e kaluar, nën dyshimet “se ka kryer vepër penale të nxitjes së urrejtjes dhe intolerancës kombëtare, racore dhe fetare”.

Në deklaratën e lëshuar nga BIA më 10 janar u tha se ata ndërmorën aktivitete “me qëllim të sqarimit të aktiviteteve të kaluara të paligjshme të Sandulloviqit, të cilat prokurori kompetent i cilësoi si vepër penale të nxitjes së urrejtjes dhe intolerancës kombëtare, racore dhe fetare”.

“Duke thënë gënjeshtra për sjelljet e supozuara të paligjshme të anëtarëve të BIA-s, Sandulloviq dhe promovuesit e tjerë e të ashtuquajturës Kosovë, duan të përhapin dezinformata dhe të shqetësojnë opinionin vendës dhe të huaj, të dëmtojnë reputacionin e BIA-s dhe të destabilizojnë situatën e sigurisë së Republikës së Serbisë”, u tha në deklaratë.

Më 2 janar, Sandulloviq publikoi një video në X – që më herët njihej si Twitter – ku ai shfaqej në kompleksin “Adem Jashari” në Prekaz duke vendosur kurorë me lule në monumentin që përkujton ngjarjet e 5, 6 dhe 7 marsit 1998, kur forcat serbe vranë mbi 50 anëtarë të familjes së Adem Jasharit, një nga themeluesit e ish-Ushtrisë Çlirimtare të Kosovës (UÇK).

Një ditë pas publikimit të videos në rrjetin X, avokati Çedomir Stojkoviq bëri të ditur se Sandulloviqi është arrestuar më 3 janar dhe se familja e tij nuk ka asnjë informacion për vendndodhjen e tij.

Institucionet e Bashkimit Evropian konfirmuan më 9 janar se po monitorojnë situatën dhe informacionet lidhur me arrestimin e Sandulloviqit.

Sandulloviq është president i Partisë Republikane që u themelua më 2015, por që nuk e ka kaluar pragun zgjedhor për t’u futur në Parlamentin serb.

Ai ka një biografi kundërthënëse, ku përfshihet edhe plagosja e tij nga shpërthimi i një makine 13 vjet më parë, dhe arrestimi i tij për “përhapje paniku” më 2020 gjatë pandemisë së koronavirusit. /rel/

Lionel Messi do të luajë para një stadiumi gjysmë të zbrazët herën tjetër kur Argjentina do të luajë në shtëpi, me FIFA-n që ka ndëshkuar fituesit e Kupës së Botës 2022.

Sanksione janë ndërmarrë gjithashtu kundër Brazilit pas telasheve të tifozëve në Marcacana para ndeshjes kualifikuese të Kupës së Botës 2026 mes dy rivalëve në nëntor 2023. Të dy, “Selecao” dhe “Albiceleste” janë gjobitur me 50,000 franga zvicerane për “dështim për të siguruar që ligji dhe rendi të mirëmbahet”, ndërsa Argjentina duhet të paguajë edhe 20,000 franga zvicerane për “mungesë rregulli apo disipline brenda ose përreth stadiumit”.

Përleshjet mes tifozëve çuan në shtyrjen e lojës në fjalë për 27 minuta, me tetë herë fituesin e Topit të Artë, Messi, që çoi skuadrën e tij jashtë fushës përpara se të rivendosej rendi. Kur filloi ndeshja, Argjentina fitoi 1-0 dhe i shkaktoi Brazilit një humbje historike në shtëpi në kualifikueset për Kupën e Botës.

FIFA gjithashtu ka gjobitur Argjentinën me 50,000 franga zvicerane si rezultat i sjelljes së keqe nga tifozët në dy ndeshjet e mëparshme kualifikuese të Kupës së Botës, të cilat do të “investohen në një plan kundër diskriminimit”.

Argjentina është informuar se ndeshja e tyre e ardhshme në shtëpi, e cila aktualisht është një takim me Kilin në shtator, do të zhvillohet me “të paktën 50% të vendeve të bosh”.

Kampionët në fuqi të botës kryesojnë tabelën e kualifikimeve të Amerikës së Jugut pas gjashtë ndeshjeve, me Brazilin që çuditërisht renditet në vendin e gjashtë.

Kryeministri i Irlandës, Leo Varadkar, ka arritur mbrëmë në Kosovë për vizitë zyrtare.

Varadkar sot do të pritet me ceremoni shtetërore nga kryeministri i vendit, Albin Kurti, në orën 09:30, për të vazhduar më pas në takim dypalësh në ndërtesën e Qeverisë.

Kryeministri Kurti dhe homologu i tij irlandez, më pas do të dalin në konferencë të përbashkët për media.

Varadkar do të takohet edhe me presidenten e vendit, Vjosa Osmani.

Takimi mes tyre pritet të fillojë në orën 11:00 në Presidencë.

Kujtojmë se Varadkar u prit mbrëmë në Aeroportin Ndërkombëtar të Prishtinës ‘Adem Jashari, nga kryeministri, Albin Kurti.

“Sonte në aeroportin e Prishtinës e mirëpritëm Kryeministrin e Irlandës, Leo Varadkar në vizitën e parë ndonjëherë të një kryeministri irlandez në Kosovë. Mirë se vini në Republikën e Kosovës, z. Varadkar”, shkroi Kurti mbrëmë në Facebook.

Qeveria e Kosovës ka zhvilluar mbrëmë një mbledhje elektronike.

Sipas një njoftimi nga Zyra e Kryeministrit, Qeveria ka miratuar vendimin për të kërkuar nga presidentja e Republikës së Kosovës dhënien e autorizimit ministrit të Mjedisit, Planifikimit Hapësinor dhe Infrastrukturës për nënshkrimin e Marrëveshjes së bashkëfinancimit për hartimin e Projektit për Ndërtimin e Tunelit në rrugën Tetovë-Prizren ndërmjet Qeverisë së Republikës së Kosovës, e përfaqësuar nga Ministria e Mjedisit, Planifikimit Hapësinor dhe Infrastrukturës dhe Qeverisë së Maqedonisë së Veriut, e përfaqësuar nga Ministria e Transportit dhe Lidhjeve.

Kryetar i komunës së Gjakovës, Ardian Gjini, në emisionin COTEXT në ATV, tha se i ka mundë Lëvizjen Vetëvendosje në Gjakovë dhe do të vijë edhe “këtu” (në Qeveri) me i mundë.

“Sa herë të dua dalë edhe i lodhi te tanë”, thotë Gjini, duke shtuar se edhe në pushtetin qendror do t’i mundë VV-në.

Këtë deklaratë, Gjini e bëri pas një debati me analistin Xhevdet Pozhari.

Gjini tregoi se në kohën kur e ka marrë udhëheqjen e Komunës së Gjakovës, buxheti për investime kapitale ishte 3.2 milionë euro, ndërsa në vitin e kaluar ishte 17.5 milionë euro.

“Vitin që e lam, buxheti përfundimtar për investime kapitale u kanë 17.5 milionë euro, pa para të Qeverisë asnjë. A jeni tu e kuptu dallimin, prej 3.2 milionë në 17.5 milionë. Kjo ëhstë komuna e Gjakovës”, tha Gjini. /atvlive.tv

Kryetar i komunës së Gjakovës, Ardian Gjini, në emisionin COTEXT në ATV, tha se Kosova humb nga zvarritja e dialogut me Serbine.

“Unë dhe Aleanca besojmë që me zvarritje të procesit nuk kemi me fitu kurgjë. Rrethanat kanë me u rëndu për ne, kështu besojmë ne. A mundemi me qenë gabim eventualisht, patjetër gjithkush mundet me qenë gabim nëse e ka një mendim. Nuk mundet me thanë dikush që nëse unë e kam një mendim, kurrë gabim nuk e kam”, tha Gjini.

Ai tha se për një kohë të gjatë, politika është duke ia huqe debatit sa i përket dialogut me Serbinë.

“Për një kohë të gjatë, politika e Kosovës po ia huq debatit për këtë temë e si huqje e politikës edhe debati nëpër studio, nëpër të gjitha studiot po kthehet tek çështjet tepër praktike e jo strategjike. Nëse e shihni deklaratat e veçanta, sidomos të disa njerëzve në Kosovë që kanë përvojë në dialog që kanë marrë pjesë përpara, që kanë mbërri me kriju përvojë për me i pa caqet strategjike sepse nuk është koj vetëm dije e natyrshme, e inteligjencës apo diçka, por përvoja e bënë të veten fundi i fundit. Diskutimi duhet me qenë në atë se qysh fiton Kosova më shumë. A fiton Kosova më shumë me e zvarritë procesin, a fiton Kosova më shumë me e përshpejtua procesin. Pyetja e parë që është esenciale, se është lehtë që mbas 7-8 vjete me thanë a po e sheh çka keni pasë ba, qysh po thotë dikush sot, është lehtë me ia lanë fajin tjetrit, por kemi nevojë për zgjidhje. Pyetja e parë është, a jemi tu fitu si shtet edhe si popull me e zvarritje të procesit, apo jemi duke humbur me zvarritje të procesit”, tha Gjini. /atvlive.tv

Qeveria ka zhvilluar sonte mbledhjen e radhës në mënyrë elektronike.

Në këtë mbledhje është miratuar vendimi që Presidentja t’ia japë autorizimin ministrit të Infrastrukturës Liburn Aliu, në mënyrë që të nënshkruajë me Maqedoninë Veriore Marrëveshjen për hartimin e projektit për tunelin në rrugën Tetovë-Prizren.

“Qeveria e Republikës së Kosovës ka zhvilluar sonte një mbledhje elektronike në të cilën ka miratuar vendimin për të kërkuar nga Presidentja e Republikës së Kosovës dhënien e autorizimit Ministrit të Mjedisit, Planifikimit Hapësinor dhe Infrastrukturës për nënshkrimin e Marrëveshjes së bashkëfinancimit për hartimin e Projektit për Ndërtimin e Tunelit në rrugën Tetovë-Prizren ndërmjet Qeverisë së Republikës së Kosovës, e përfaqësuar nga Ministria e Mjedisit, Planifikimit Hapësinor dhe Infrastrukturës dhe Qeverisë së Maqedonisë së Veriut, e përfaqësuar nga Ministria e Transportit dhe Lidhjeve. Për këtë projekt, Qeveria ka siguruar buxhetin përmes ligjit në fuqi për ndarjet buxhetore për vitin 2024”, thuhet në vendim.

Kryetar i komunës së Gjakovës, Ardian Gjini, në emisionin COTEXT në ATV, ka sqaruar arsyen se pse kryetari i AAK-së, Ramush Haradinaj nuk ishte takuar me presidenten Vjosa Osmani, në dhjetorin e vitit të kaluar.

Ai tha se Haradinja ka shkuar në Presidencë në kohën e përcaktuar nga shefja e shtetit, por kjo e fundit nuk e ka respektuar orarin e caktuar.

“Nuk thirret një kryetar partie dhe një ish-kryeministër dhe me i thonë prit pak në korridor me roje, mos bëni hajgare. Më mirë me i thonë hajde dhjetë minuta më vonë me i lanë vetes kohë pak më shumë se me e lanë me pritë në korridor, vendoni veten në pozitë të tij edhe pritni pak në korridor edhe shihni qysh ju duket”, tha Gjini.

Ai thotë se Haradinaj është i saktë me kohën, si në rastin kur e fton dikë në takim, si në rastin kur ftohet në takim.

“Të gjithë njerëzit që kanë shku me taku kryetarin Haradinaj, qoftë kur ka qenë kryeministër, qoftë si kryetar partie e dinë që nëse e thërret dikë, vetë është me minuta. Edhe nëse e thërret dikush, vetë shkon me minuta. Nuk bën pjesë në grupin e politikanëve që nja 15 minuta vonohen edhe e shohin, sinqerisht po flas, e gjithë njerëzit që e njohin e dinë që është tepër i saktë në në takime, tepër i saktë, në fakt e kanë ndërtu një kulturë edhe të tjerët, më thonë në parti që kur caktohet takimi është fiks ora”, tha Gjini. /atvlive.tv