Në raportin 24 orësh të Policisë u bë me dije se ankuesja femër kosovare ka raportuar se bashkëshorti i saj viktima mashkull kosovar ka dalë nga shtëpia dhe nuk dihet vendndodhja e tij.
Rasti është duke u hetuar.
Detaje të tjera rreth këtij rasti nuk janë dhënë.
Tre civilë janë vrarë dhe 13 të tjerë janë plagosur nga granatimet ruse në tri rajone lindore të Ukrainës, thanë autoritetet vendore të mërkurën.
Një person u vra në Kramatorsk, në rajonin e Donjeckut, derisa tetë të tjerë u plagosën, tha guvernatori rajonal Vadym Filashkin.
Në rajonin e Harkivit, dy bujq u vranë në vend kur vetura e tyre u godit në fshatin e Petropavlivkës në rrethinën e Kupianskit, derisa një grua u plagos, tha guvernatori rajonal Oleh Synyehubov.
Në rajonin e Hersonit, katër njerëz u plagosën nga sulmet ruse me artileri, mortajë dhe dronë, thanë autoritetet vendore.
Ndërkohë, Forcat e Mbrojtjes Ajrore të Ukrainës thanë se i rrëzuan 13 prej 19 dronëve të shkrepur nga Rusia në katër rajone ukrainase mëngjesin e së mërkurës.
Ajo tha se i shkatërroi edhe një raketë S-300 dhe katër raketa Kh-22.
Dronët u rrëzuan në rajonet Harkiv, Dnipropetrovsk, Zaporizhja dhe Donjeck, tha ajo.
Katër dronët e mbetur nuk e arritën cakun, sipas saj./REL/
Së paku 45.123 ushtarë rusë janë vrarë prej se Moska e nisi pushtimin e Ukrainës para gati dy vjetëve, sipas një hulumtimi nga Mediazona dhe Shërbimi rus i BBC-së, të cilat i kanë identifikuar ushtarët e vdekur.
Dy e treta e të gjithë të vrarëve të konfirmuar – vullnetarë, rekrutë, ish të burgosur dhe luftëtarë nga kompanitë ushtarake private – nuk kishin lidhje me ushtrinë para se të niste pushtimi, ka gjetur hulumtimi.
Këtu përfshihen 5.406 ushtarë të mobilizuar, 80 për qind e të cilëve u vranë në vitin e dytë të luftës.
Krasnodar, Sverdolvsk, Bashkortostan dhe Çelabinsk janë rajonet me numrin më të madh të të vdekurve.
Gazetarët i kanë identifikuar 27.906 ushtarë rusë të vrarë vitin e kaluar – 57 për qind më shumë se humbjet e konfirmuara në vitin e parë të pushtimit.
Nga tetori i vitit të kaluar deri këtë muaj – kryesisht në periudhën gjatë të cilës forcat ruse u futën në qytetin industrial Avdivka dhe në zonat përreth në rajonin e Donjeckut – hulumtuesit e konfirmuan vdekjen e 6.614 ushtarëve rusë.
Avdivka ra javën e kaluar.
Gazetarët e bazuan hulumtimin e tyre në të dhëna nga burimet e hapura si, shpallje vdekjesh në gazeta, mesazhe në rrjetet sociale nga të afërmit e viktimave, raporte nga administratat lokale, si dhe të dhëna nga varrezat. Hulumtuesit thonë se numri i vërtetë mund të jetë së paku dy herë më i lartë.
Ministria e Mbrojtjes e Rusisë nuk i zbulon të dhënat për humbjet e ushtarëve dhe nuk komenton për shifrat e raportuar nga gazetarët.
Në janar, drejtori i CIA-s, Willam Burns, tha në një shkrim të publikuar në revistën Foreign Affairs se së paku 315.000 ushtarë rusë janë plagosur apo vrarë gjatë luftës në Ukrainë./REL
Presidenti i Serbisë, Aleksandar Vuçiq, ka thënë mbrëmë se organet kompetente shtetërore do të ngrenë aktakuzë për rastin Banjsko “në përputhje me ligjin për vepra të caktuara penale”.
Vuçiq tha për Radiotelevizionin e Serbisë (RTS) se për këtë temë ka folur dje me kryetarin e Këshillit Evropian, Charles Michel, dhe ka shtuar se mund të ngrihen aktakuza për shkaktim të rrezikut të përgjithshëm.
Vuçiq pretendon se serbët që u përleshën me policinë e Kosovës në Banjskë ishin “të ndjekur si bisha”.
“E si mund të ngrehin aktakuzë për diçka tjetër kur ata njerëz do të thonë “ne e bëmë punën tonë sepse sipas rezolutës 1244, Kosova i takon Serbisë dhe atje duhet të ketë deri në 1000 pjesëtarë të ushtrisë dhe policisë serbe dhe ne duhet të mbrojmë vatrat tona dhe vendin tonë në përputhje me Kushtetutën”. Dhe çfarë t’u themi, për këtë ju do të dënoheni dhe të pranojmë që Kosova është shtet i pavarur dhe t’i gjykojmë nga ky këndvështrim”, ka pretenduar Vuçiqi, paraprakisht duke paragjykuar se ata “janë të pafajshëm”.
“Atyre njerëzve u është premtuar, u kam sjellë një premtim nga evropianët dhe amerikanët, se askush nuk do t’i ndjekë pas barrikadave në nëntor, dhjetor”, ka thënë Vuçiq.
Kryeministri i Kosovës, Albin Kurti, ka deklaruar se këtë vit, buxheti për komunat në vend është më i madh ndonjëherë. Ai ka mohuar akuzat se po favorizohen komunat e afërta me Lëvizjen Vetëvendosje, raporton EO.
Në një takim me kryetarët e komunave së bashku me ministrin e Administrimit të Pushtetit Lokal, Elbert Krasniqi, Kurti ka shtuar se buxheti i vitit 2024 është për gati 90 milionë euro më i lartë krahasuar me vitin paraprak 2023, kurse për tri vite mandat buxheti vjetor i komunave është rritur për 195 milionë euro më shumë
“Granti i përgjithshëm për komuna për vitin 2024 kap vlerën 284.7 milionë euro, që është granti me vlerën më të madhe ndonjëherë. Komuna e Ferizajt dhe Gjakovës janë komunat me më së shumti projekte infrastruktore, kurse Obiliqi, Skenderaj, Rahovec janë renditur në top tre komunat përfituese nga granti i performances komunale që ndahet nga Ministria e Administrimit dhe Pushtetit Lokal. Po dëgjojmë fjalë se komunat e afërta me pushtetin po përfitojnë më shumë, e kjo nuk qëndron aspak”, tha Kurti.
Kryeministri shtoi se secila komunë këtë vit e ka të paktën për 40 për qind më të lartë buxhetin sesa para tre viteve, ndërsa kërkoi nga kryetarët që të mos kontribuojnë në keqinformim të qytetarëve kur vjen puna tek mbështetja e nivelit qendror për atë lokal.
Duke luftuar me emocionet, vetëm disa ditë pas vdekjes së dyshimtë së kritikut të Kremlinit, Aleksei Navalnyt, në një burg në Arktik, Yulia Navalnaya, e veja e tij, është zotuar se do të vazhdojë të çojë përpara aktivizimin e burrit të saj, kundër qeverisë autoritare të presidentit rus Vladimir Putinit.
“Do ta vazhdoj kauzën e Aleksei Navalnyt”, ka thënë ajo përmes një postimi në X – platformë e njohur më parë si Twitter.
“Do ta vazhdoj luftën për shtetin tonë, dhe u bëj thirrje që të qëndroni mbrapa meje. Mos e ndani vetëm dhimbjen që na ka rrethuar. Ju kërkoj që të ndani me mua edhe zemërimin dhe urrejtjen për ata që kanë guxuar të vrasin të ardhmen tonë”.
“U rikujtoj fjalët e Alekseit… ‘nuk është turp të bësh pak. Është turp të mos bësh asgjë. Është trup t’i dorëzohesh frikës’”, ka thënë shtuar ajo.
Kjo ka qenë një thirrje e papritur, por e pastër si loti, që rusët të mbajnë gjallë shpresën për ndryshim që e ka mbajtur gjallë Navalnyn, dhe të bëjnë çfarë të munden për ta jetësuar atë, në një shtet që Putin ka dominuar për gati një çerek shekulli.
Mirëpo në kohën e kufizimeve më të ashpra – prej epokës së diktatorit sovjetik Josef Stalinit – dhe teksa vazhdon lufta e Moskës kundër Ukrainës, Navalnaya përballet me betejë të ashpër, teksa synon të bëjë dallimin.
Politikani opozitar, Dmitry Gudkov, ka thënë se deklarimet e Navalnayas përbëjnë “akt të guximshëm” dhe “vendim të rrezikshëm”.
“Yulia e ka vënë mbi supe përgjegjësinë për komunikim, mbështetje dhe inspirim të njerëzve”, ka thënë Gudkov për Current Time, rrjetin televiziv në gjuhën ruse, të menaxhuar prej Radios Evropa e Lirë, në bashkëpunim me Zërin e Amerikës.
“Ajo ka bërë thirrje për mbështetje, dhe për këtë arsye kam reaguar. Shpresoj që pas asaj që ka ndodhur, ne do të mund të bashkohemi, t’i lëmë anash ambiciet, të harrojmë ofendimet e së kaluarës, që janë mbledhur në mes të opozitës dhe shoqërisë civile”.
“Armiku është i fuqishëm”, ka thënë ai.
“Dhe frikësohem që, fatkeqësisht, kjo nuk do të jetë vrasja e fundit politike”.
Vdekja e Navalnyt e ka zbehur opozitën tashmë të përçarë në Rusi, pasi një pjesë e figurave me ndikim janë detyruar të largohen prej shtetit, ose janë burgosur, në kuadër të shtypjes që u ka bërë shteti zërave kundërshtarë qysh prej protestave kundër Qeverisë, të udhëhequra pjesërisht prej Navalnyt, që datojnë prej vitit 2011-2012.
Shteti e ka rënduar edhe më shumë dorën pas zgjedhjeve presidenciale të vitit 2018 dhe vendimet janë intensifikuar pas nisjes së luftës në Ukrainë, në shkurt të vitit 2022.
Analistja politike Yekaterina Shulman, ka thënë se ekziston një pakicë e konsiderueshme ende brenda Rusia, mirëpo vdekja e Navalnyt do të mund t’i “demoralizojë” dhe “paralizojë” shumë prej tyre.
“Ka shumë diversitet në mesin e shumë grupeve të pakënaqura brenda Rusisë”, ka thënë Shulman për Radion Evropa e Lirë.
“Disa janë të pakënaqur për shkak të luftës dhe disa për shkak se lufta po zhvillohet ‘pa ndonjë rezultat’. Disa janë të pakënaqur për shkak të inflacionit, disa për shkak të ndërhyrjeve në jetën private, apo kufizimeve në internet. Disa frikësohen nga shtypja, apo shtypja e njerëzve të rrethit të tyre”.
“Këta njerëz nuk kanë shkuar askund, mirëpo ata janë të shpërndarë”, ka thënë ajo.
“Ende është pikëpyetje se kush mund t’i koordinojë ata dhe më çfarë suksesi”.
Në një shtet ku institucionet në vend që t’i shërbejnë publikut, e mbështesin shtetin, rruga përpara është e paqartë.
“Nuk ekziston asnjë mekanizëm ligjor për të shndërruar zemërimin tonë në ndryshim politik”, ka thënë shkrimtari liberal dhe satiristi, Viktor Shenderovich./REL
Për herë të parë në Kosovë ka filluar vaksinim i vajzave kundër kancerit të qafës së mitrës.
Në një njoftim të Komunës së Prishtinës thuhet se ky është një hap i rëndësishëm për shëndetin e vajzave.
Vaksinimi thuhet se ka filluar të martën, ku nxënëset e moshës 11 vjeçare, të shkollës “Qamil Batalli” në Prishtinë, janë bërë të parata që janë vaksinuar me vaksinën Human Papilloma Virus (HPV).
“Vaksina HPV ka një rëndësi të jashtëzakonshme për shëndetin e vajzave, duke ofruar një mbrojtje efektive kundër kancerit të qafës së mitrës; një sëmundje që po shfaq një rritje shqetësuese në numrin e rasteve”, thuhet në njoftim.
Nënkryetarja e Komunës së Prishtinës, Jehona Lushaku – Sadriu, bashkë me drejtorin e Shëndetësisë, Izet Sadiku, kanë vizituar këtë shkollë.
“Fillimi i vaksinimit në moshën 11 vjeçare për vajzat, është zgjedhur për shkak të efektivitetit të saj të lartë në këtë fazë, duke mbrojtur deri në 99% të grave nga ky rrezik në të ardhmen. Ky lajm pozitiv për vaksinimin është i rëndësishëm për të gjitha vajzat, duke ofruar mbrojtje të duhur për t’i parandaluar këto sëmundje”, citohet të këtë thënë nënkryetarja Lushaku.
Andaj, për të parandaluar kancerin e qafës së mitrës, OBSH-ja rekomandon vaksinimin e vajzave të moshës 9 deri në 14 vjeçe, kur, siç thuhet, shumica nuk e kanë filluar ende aktivitetin seksual.
Kryeministri Rama ka ndarë në rrjetet sociale foto nga vizita e tij në Ankara, nga takimi me Presidentin Erdogan dhe nga mbledhja e parë e Bashkëpunimit në Nivel të Lartë mes dy vendeve.
“Mirëmëngjesi dhe me fotoalbumin e mikpritjes vëllazërore në Ankara, ju uroj një ditë të mbarë”, shkruan Rama.
Presidenti turk Recep Tayyip Erdogan dhe kryeministri Edi Rama bashkë-drejtuan mbledhjen e parë të Bashkëpunimit të nivelit të lartë midis dy vendeve, me pjesëmarrjen edhe të disa prej ministrave të kabineteve qeveritare respektive, 8 prej tyre pjesë e qeverisë shqiptare.
Për mediat treguan se çfarë u arrit në Mbledhjen e Bashkëpunimit të Nivelit të lartë mes dy qeverive.
Kryeministri falënderoj presidentin e Turqisë për njohjen e pavarësisë së Kosovës, ndërtimin e 500 apartamenteve nga tërmeti dhe me vaksinat kundra koronavirus.
Ministrat e dy qeverive nënshkruan tre memorandume bashkëpunimi dhe dy marrëveshje. Memorandume për Urbanizimit dhe Ndryshimeve Klimatike, për menaxhimin e qëndrueshëm të pyjeve dhe zonave të mbrojtura dhe për Fushat e Medias dhe Komunikimit në komunikimin dhe informimin publik.
Sikurse marrëveshje mbi statusin e zyrës së koordinimit të programit TIKA në Tirana. Përfshi një marrëveshje kuadër me karakter ushtarak.
Gjatë kësaj vizite kryeministri Rama qëndroi në Anitkabi për të parë Mauzoleumin e Mustafa Kemal Atatürkut, lideri i Luftës Turke për Pavarësi dhe themeluesi e Presidenti i parë i Republikës së Turqisë. /tch
Ministrja e Jashtme e Gjermanisë, Annalena Baerbock, tha të martën vonë se presidenti i Rusisë, Vladimir Putin, do të mbahet përgjegjës për luftë në Ukrainë dhe për pasojat globale që i ka shkaktuar ajo, gjatë samitit të grupit të 20 vendeve më të industrializuara – G20, këtë javë.
“Nëse Putini mendon se pas dy vjetëve bota do të harrojë se kush është përgjegjës për luftën në Ukrainë dhe pasojat e saj globale, e ka shumë gabim”, tha Baerbock të martën para se të nisej për takimin e ministrave të Jashtëm të G20-ës në Brazil.
“Ne nuk do të heqim dorë nga parimet themelore të Kombeve të Bashkuara dhe do ta mbështesim fuqishëm Ukrainën, sa të jetë e nevojshme dhe derisa populli i saj mund të jetojë në paqe dhe në liri përsëri”, shtoi ajo.
Rusia e nisi pushtimin e paprovokuar dhe të jashtëligjshëm të Ukrainës në shkurt të vitit 2022.
Ukraina, lufta në Rripin e Gazës dhe kërcënimi i zgjerimit të konfliktit në Lindjen e Mesme pritet të luajnë rol të rëndësishëm gjatë takimit të G20-ës.
Ministri i Jashtëm i Rusisë, Sergei Lavrov, pritet të marrë pjesë në takim në Rio de Zhaniero.
“Me humanizmin dhe përkushtimin tonë ndaj ligjit ndërkombëtar, ne i luftojmë kundër pamëshirëshmërisë së aktorëve, siç është Qeveria ruse”, theksoi ajo.
E tërë bota do të përfitojë “nëse të gjithë ne u përmbahemi rregullave për të cilat jemi pajtuar së bashku”, tha ajo.
G20 u themelua me besimin e “zgjidhjet e përbashkëta janë të mundura nëse ne qëndrojmë pranë njëri-tjetrit dhe i bashkojmë forcat”, nënvizoi Baerbock./REL
Kryeministri i Kosovës, Albin Kurti dhe ministri i Administrimit të Pushtetit Lokal, Elbert Krasniqi sot do të mbajnë takim me kryetarët e komunave.
Takimi do të mbahet në orën 09:00 në Hotel “Internacional Prishtina” në Prishtinë.