Në raportin 24 orësh të policisë, thuhet se në Vushtrri është arrestuar një person, pasi dyshohet se ka dëbuar familjen e tij nga shtëpia.
Sipas policisë, pas një mosmarrëveshje me gruan e tij, i dyshuari i ka thënë të njëjtës që së bashku me fëmijët e tyre të dalin nga shtëpia.
Me vendim të prokurorit, i dyshuari pas intervistimit është liruar në procedurë të rregullt.
Pacienti i parë njeri të cilit iu vendos një çip në tru nga “Neuralink” duket se është rikuperuar plotësisht dhe është në gjendje të kontrollojë miun kompjuterik përmes mendjes, ka thënë krijuesi i kompanisë, Elon Musk.
“Progresi është i mirë, dhe pacienti duket se është rikuperuar plotësisht, pa ndonjë efekt anësor. Pacienti është i aftë ta lëvizë miun nëpër ekran vetëm me mendje”, ka shkruar Musk në platformën “X”.
Musk ka shtuar se “Neuralink” tani po përpiqet të sigurojë që pacienti të klikojë butonin e miut sa më shumë.
Kompania me sukses e vendosi çipin në pacientin e parë njeri muajin e kaluar, pasi mori aprovimin për testime në njerëz.
Çipi vendoset në pjesën e trurit që jep mesazhet për të lëvizuar, ka thënë Neuralink, duke shtuar se qëllimi fillestar ka qenë që t’i bëjë njerëzit ta kontrollojnë një pajisje kompjuteri duke përdorur mendjen e tyre.
Policia e Kosovës ka bërë të ditur se kanë arritur të parandalojnë gara ilegale, në dy raste.
Siç njofton policia, gjatë orëve të mbrëmjes, përkatësisht pas orës 21:00 të së dielës kanë zënë në flagrancë në dy rrugë shoferët duke bërë gara ilegale.
Sipas policisë, në rrugën Agim B. Qelaj në Pejë, kanë kapur në shofer duke vozitur me shpejtësi 132 Km në zonën ku shpejtësia është e kufizuar 40 Km. Vozitësit i është shqiptuar gjoba në shumë prej 500 Euro pesë pike negative.
Po ashtu në rrugën Agim B. Qelaj në Pejë, kanë kapur një shofer duke vozitur 111 Km në zonën ku shpejtësia është e kufizuar 40 Km. vozitësit i është shqiptuar gjoba në shumë prej 500 Euro pesë pike negative
“Ekipet e NJRKRR në Pejë, gjatë implementimit të Planit Operativë “Rregullimi i komunikacionit dhe parandalimi i garave ilegale” me datë 18. 02. 2024 gjatë orëve të mbrëmjes pas orës 21:00 kanë zanur në flagrancë në dy rrugë duke bërë gara ilegale:
1. Në rrugën Agim B. Qelaj në Pejë, vozitje 132 Km në zonen ku shpejtësia është e kufizuar 40 Km. vozitësit i është shqiptuar gjoba në shumë prej 500 Euro pesë pike negative.
2. Në rrugën Agim B. Qelaj në Pejë, vozitje 111 Km në zonën ku shpejtësia është e kufizuar 40 Km. vozitësit i është shqiptuar gjoba në shumë prej 500 Euro pesë pike negative
3. Në magjistralen Pejë-Deçan- Gjakovë, në fsh. Rastavicë në dy raste vozitësve të cilët kanë bërë tejkalim të rrezikshëm, duke Rrezikuar trafikun rrugor. Në të dy rastet vozitësve u është shqiptuar gjoba në shumë prej 150 Euro dhe një pikë negative”, thuhet në njoftimin e Policisë së Kosovë.
Në dhjetor të vitit të kaluar tre të rinj humbën jetën si pasojë e garave të jashtëligjshme automobilistike.
Pas këtij rasti, Ministri i Brendshëm, Xhelal Sveçla paralajmëroi ashpërsim të dënimeve për shkeljet në komunikacion.
Sveçla tha se me ligjin e ri për rregullat e trafikut rrugor parashihet dhe do të ketë ashpërsim të masave ndaj shkelësve në komunikacion, ndër të tjera dyfishim të gjobave të vlerës monetare, dyfishim të afateve kohore të konfiskimit të patentë shoferëve dhe dyfishim të pikëve negative.
Më 21 shkurt të vitit 1945 në fshatin Tërstenik të Drenicës vritet Shaban Polluzha, njëri ndër komandantët më të njohur të zonës së Drenicës gjatë Luftës së Dytë Botërore.
Shaban Polluzha rrjedh nga një familje me gjendje ekonomike mesatare. Shabani nuk ishte i arsimuar, por si i ri u inkuadrua në jetën politike, të cilën ia imponuan rrethanat dhe padrejtësitë e regjimeve pushtuese.
U përball me bullgarë e austriak gjatë Luftës së Parë Botërore, dhe me regjimin e Jugosllavie borgjeze. Gjatë mbretërisë jugosllave ishte i inkuadruar në jetën politike, kryetar e deputet. Shpesh konfrontohej me qarqet e regjimit antipopullorë dhe për një kohë u detyrua të kalojë në ilegalitet në Shqipëri.
Gjatë Luftës se Dytë Botërore ishte komandant i një pjese të frontit në Mal të Zi, Kollashin dhe Sanxhaku i Tregut të Ri, ku u dallua për organizim e strategji. Ishte anëtar i Këshillit të Islihatit (gjyqit paqetues) dhe me propozimin e Miftar Bajraktarit e emërojnë kryetar të Islihatit në Drenicë. Shaban Polluzha kishte edhe taktikë politike.
Ai me strategji politike kishte bërë njëfarë lidhje formale dhe mashtruese me qarqet komuniste, por në realitet ai asnjëherë këtë ideologji nuk e pranoi si ideologji që do të zgjidhte çështjen shqiptare. Për këtë paria dhe këshilli organizativ i Kuvendit të Skenderajt e propozuan për komandant të Brigadës së Drenicës. Dihet mirëfilli se pas kapitullimit të Italisë fashiste (shtator 1943) Shtabi Suprem i UNÇJ-së shtoi aktivitetin e vet ushtarak, në Kosovë dhe në viset tjera shqiptare dhe deri në nëntor 1944 (por edhe më herët) në këto hapësira, u formuan njësitë e shumta të “UNÇJ-së”, duke filluar nga çetat, aradhet, batalionet e deri në brigada.
Këto formacione partizane edhe pse u formuan në truallin shqiptar nuk u formuan për të mirën e shqiptarëve. Në gjysmën e dytë të vitit 1944,derisa forcat aleate (amerikane-angleze-ruse…)përparonin në të gjitha frontet e luftës kundër ushtrisë hitleriane, Titoja do t´i shfrytëzojë këto rrethana, për luftimin e forcave të mbrojtjes kombëtare shqiptare dhe ripushtimin e Kosovës. Për t´i realizuar më lehtë synimet e saj ,udhëheqja jugosllave, në fillim të janarit 1945 urdhëron mobilizimin e “brigadave të Kosmetit” për t´i dërguar në Frontin e ashtuquajtur të Sremit-në Serbi.
Ndonëse qendra e rezistencës shqiptare në gjysmën e dytë të dhjetorit 1944-janar 1945 ishte përqendruar në Drenicë, ”Shtabi Operativ i Kosmetit”,urdhëroi Shaban Polluzhën që ta lëshonte Drenicën dhe të nisej në drejtim të Podujevës, për t´u bashkuar me Brigadën VII, e cila po marshonte për Serbi.
Shtabi i Brigadës së Drenicës largimin nga Kosova do ta kushtëzojë me ndërprerjen e vrasjeve dhe të plaçkitjeve mbi popullsinë civile nga ana e ushtrisë jugosllave, mirëpo pas dështimit të nënshtrimit të Shaban Polluzhës më 25 janar, nisin operacionet ushtarake në shkallë të gjerë për asgjësimin e Brigadës së tij.
Në këto operacione antishqiptare morën pjesë divizionet 24, 26, 44, 46, 52 të Serbisë. Divizionet 41 dhe 50 të Maqedonisë, grupi i brigadave të Malit të Zi (brigada e I e Bokës dhe brigada e VI) dhe repartet speciale të OZN-s të drejtuara nga Spasoje Gjakoviq. Në kohën kur forcat jugosllave zhvillonin operacionet më të përgjakshme në Drenicë, më 8 shkurt 1945, komandanti suprem i UNÇJ-së J.B. Tito me urdhër të veçantë nr.31 vendosi administrimin ushtarak në Kosovë.
Këtë vendim Titoja e mori më 7 shkurt 1945 në Beograd, në një takim me ushtarakët serb Savo Dërleviqin, Gjuro Medenicën dhe Kërsto Filipoviqin. Me këtë urdhër, i tërë pushteti në Kosovë do t´i kalojë një grupi të caktuar ushtarakësh serbo-malazez, të cilët do të ushtronin pushtetin politik, ekzekutiv dhe atë gjyqësor.
Kjo makineri ushtarake në Kosovë duke i marrë të gjitha masat gjoja për “spastrimin” e terrenit nga “mbeturinat e fashizmit” dhe “kundërrevolucionarët” vrau e masakroi pamëshirë mijëra shqiptarë gjithandej Kosovës.
Në këtë fushatë të egër ushtarake më 21/22 shkurt 1945 u shua me gjak edhe kryengritja e Drenicës, pas vrasjes së tribunëve popullorë Shaban Polluzha e Mehmet Gradica në kullat e Dvoranëve në Tërstenik.
Shaban Polluzha në vitin 2009 është dekoruar me medaljen “Heroi i Kosovës” nga ish-presidenti, Fatmir Sejdiu./KP/
Në Dhomat e Specializuara të Kosovës në Hagë vazhdon procesi gjyqësor ndaj ish-krerëve të UÇK-së.
Të matën në këtë proces ka dëshmuar dëshmitari i 45-të i Zyrës së Prokurorit të Specializuar me kodin W04576, Hajrush Kurtaj, në gjykimin ndaj Hashim Thaci, Kadri Veseli, Rexhep Selimi dhe Jakup Krasniqi.
Ky dëshmitar dëshminë e tij e pati filluar me 1 shkurt.
Në Dhomat e Specializuara të Kosovës (DhSK) në Hagë, dje ka përfunduar dëshminë e tij dëshmitari i i 46-të i ZPS-së në me kodin W00498, në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.
Kryesia e Kuvendit të Republikës së Kosovës do të mbajë sot mbledhjen e radhës.
Anëtarët e kryesisë do të mblidhen me fillim nga ora 13:00, për të diskutuar pikat e rendit të ditës.
Rendi i ditës është si në vijim:
I. Miratimi i procesverbalit të mbledhjes së mëparshme të Kryesisë së Kuvendit,
II. Pikat e papërfunduara nga Seanca plenare, e mbajtur më 8 dhe 14 shkurt 2024:
III. Propozimi i rendit të ditës për Seancën plenare të radhës:
IV. Propozimi i Seancës plenare të veçantë:
V. Shqyrtimi i propozimeve dhe i kërkesave
Sot prej orës 07:00 të mëngjesit të gjithë punëtorët teknik dhe ata të sigurimit fizik të Universitetit te Prishtinës dhe Qendrës Studentore do të hynë në grevë për shkak të pagave të ulëta.
Kryetari i Sindikatës së Punëtorëve të Sektorit Privat, Jusuf Azemi ka njoftuar se numri i atyre që do të futen nesër në grevë është rreth 250 për shkak të pagave të ulëta.
“Nesër me 21.02.2024 që nga ora shtatë e mëngjesit të gjithë punëtorët teknik dhe ata të sigurimit fizik të Universitetit te Prishtinës dhe Qendrës Studentore do të hynë në grevë për shkak të pagave te ulta. Numri i grevistëve është rreth 250”, njofton Azemi.
Nën patronazhin e UNESCO-s dhe Byrosë rajonale për shkencë dhe kulturë në Evropë, sot shënohet Dita ndërkombëtare e gjuhës amtare.
Mbrojtja e gjuhëve në botë, lufta kundër zhdukjes së tyre dhe ruajtja e identitetit të kombeve nëpërmjet gjuhës, janë qëllimet kyçe të manifestimeve që sot (21 shkurt) do të organizohen në suaza botërore.
Analizat e UNESKO-s tregojnë se mund të zhduken rreth 2.500 gjuhë nga pothuajse 6.000 që fliten në botë. Në 90 vitet e kaluara janë zhdukur rreth 200 gjuhë, ndërsa 199 i flasin më pak se dhjetë njerëz. E fundit që është zhdukur është gjuha “ajake”, të cilën e folur një grua e cila ka vdekur në vitin 2008 në Aljaskë.
Arsyet kryesore për zhdukjen e gjuhëve janë luftërat dhe dëbimi i detyrueshëm. Emigrantët gjithashtu e përziejnë gjuhën amtare me gjuhën e shtetit në të cilin jetojnë që të integrohen më mirë. Megjithatë, ka shembuj, më së shumti në Australi, ku gjuhët të cilat janë “nën kërcënim” i flasin të rinjtë, tha një përfaqësues i UNESKO-s.
Tridhjetë nga gjuhët që fliten në Francë midis të cilave edhe normane dhe bretonike, janë “nën kërcënim të fuqishëm të zhdukjes”.
Këtë të mërkurë nga ora 10:00 pritet të mbahet seanca gjyqësore ndaj kryetarit të kuvendit, Glauk Konjufca, i cili akuzohet për hedhjen e gazit lotsjellës në kuvend.
Në rastin e Konjufcës sot pritet të dëshmojë deputeti i AAK-së, Pal Lekaj.
Dëshmitari i fundit në rastin e Konjufcës qe ish-deputeti i LDK-së, Sabri Hamiti.
Konjufca akuzohet se në gusht të 2016-s, në cilësinë e deputetit ka hedhur gaz lotsjellës në sallën e Kuvendit dhe ka penguar personat zyrtarë në kryerjen e detyrave zyrtare.
Përgatiti: Armand Hoti
Rezistencën ndaj ish-regjimit kasapit të Ballkanit, minatorët e minierës së “Trepçës” në Stan Tërg, e bënë nën tokë. 1300 minatorë besnikë të idealit kombëtar, për tetë ditë e tetë net qëndruan larg familjeve, në horizontet e errëta të minierës.
Për dikë, dalja në sipërfaqe do të ishte edhe më e hidhur se qëndrimi në horizontet e minierës.
“I ka ardhur lajmi që gruaja tashmë i ka vdekur, ai ka thënë nuk dal, që jemi gjallë e shohim të pamën”, tha Rrahman Beqiri, minator grevist.
Por, greva e ‘89-ës u shndërrua në simbol uniteti për shqiptarët gjatë asaj kohe të cilët u dolën në krah punëtorëve të nëndheshëm. Për t’ua siguruar ushqimin, u mobilizua vetë populli.
“Unë vetëm podrumet e mensës çfarë kam parë të paketume, miell, sheqer, ilaçe çfarë jo, kanë qenë këtu të rezervuara”, tha Beqiri.
“Ka qenë një Baran i kanë thënë nuk e di kush kanë qenë ata, që e ka sjellë lopën dhe e kanë lidhur këtu te kapija, lopën e vet e ka sjellë dhe ka thënë se kjo është vetëm për minatorë”, tha Fehmi Hajredini, minator grevist.
Kurse greva mori edhe vëmendjen rajonale e ndërkombëtare.
“Telegrame dhe përkrahje kanë ardhur nga të gjitha anët e ish-Jugosllavisë sidomos nga Sllovenia, Kroacia nga viset e banuara me shqiptarë të Malit të Zi, por përkrahje kemi pasur edhe nga minatorët e minierave të perëndimit”, tha Hajredini.
Ndonëse të lirë, gjeneratat e reja të minatorëve të “Trepçës”, nuk janë të kënaqur me atë që gjiganti metalurgjik ofron. Kjo u manifestua me greva të shpeshta, duke kulmuar me grevën e tetorit të vitit të kaluar që zgjati dhjetë ditë.
Por, në përvjetorin e 35-të të grevës së lavdishme të minatorëve, për vizitë ishin edhe pushtetarët, të cilët premtuan angazhim për një “Trepçë” më të mirë.
“Sektorin e minierave do ta modernizojmë me qasje të arsyeshme ekonomike, teknologjike, sociale, por edhe mjedisore”, ka thënë kryeministri Albin Kurti.
Minatorët dolën në sipërfaqe, pasi morën lajmin për dorëheqjen e krerëve të Lidhjes Komuniste të Kosovës.