Policia e Kosovës ka njoftuar për rrëmbimin e një burri dje në Prishtinë.
Sipas Policisë për rrëmbimin e tij, ka njoftuar shoku i tij.
”Rr. Fadil Vata, Prishtinë 26.02.2024. Policia ka pranuar një informatë nga një qytetar se një shok i tij është rrëmbyer nga një person dhe i njëjti është dërguar në një mal në afërsi të Prishtinës. Njësitë policore kanë filluar ta trajtojnë rastin. Pas disa orësh personi që dyshohet se ka qenë i rrëmbyer është paraqitur në stacion policor. Njësitë e hetimeve rajonale janë duke e trajtuar rastin. nuk raportohet për të arrestuar”, thuhet në njoftimin e Policisë.
Vendimet e Bankës Qendrore të Kosovës për qarkullimin e valutave do të jenë temë kyçe në Bruksel të martën (sot), në ditën kur janë ftuar për takim përfaqësues të Kosovës dhe të Serbisë. Nga Bashkimi Evropian kanë thënë se takimet me palën kosovare dhe serbe do të mbahen në mëngjes. Është bërë e ditur se “ai do të kenë rrjedhën e takimeve në formatin e zakonshëm të dialogut”.
Zëdhënësja e BE-së për çështje të Politikes së Jashtme dhe Sigurisë, Nabila Masralli ka deklaruar se të dyja palët e kanë konfirmuar pjesëmarrjen, por nuk ka saktësuar se kush do të shkojë nga Kosova në këtë takim.
“Ajo që unë mund të them është se po, do të kemi takim nesër. Takimi i nesërm është takim i dialogut i cili do të fokusohet në zgjidhjet e çështjeve të hapura lidhur me vendimin e fundit për qarkullimin e valutave nga Banka Qendrore e Kosovës. Takimi do të nisë në mëngjes dhe do të ketë rrjedhën e takimeve në formatin e zakonshëm të dialogut. Dhe po, të dyja palët kanë konfirmuar pjesëmarrjen e tyre“ ka thënë ajo.
Nga BQK-ja kanë thënë se kohë më parë ka shprehur gatishmërinë që të angazhohet dhe takohet edhe me Bankën Popullore të Serbisë (NBS).
Nga Serbia është thënë se do të shkojë kryenegociatori, Petar Petkoviq.
Brukseli zyrtar ka konsideruar si të nevojshëm takimin për gjetjen e një zgjidhjeje për zbatimin e Rregullores së BQK-së, që ndalon përdorimin e dinarit për pagesa brenda shtetit, ani se Kosova ka përgatitur një plan 10-pikësh për zbatimin e Rregullores.
Në komunat me shumicë serbe në Kosovë, dinari serb ka qarkulluar qysh prej pasluftës.
Shteti serb ua paguan serbëve të Kosovës – përmes një sistemi paralel – pagat, pensionet, ndihmat sociale, dhe përfitimet tjera.
Ligji për Financat e Pushtetit Lokal në Kosovë lejon dërgimin e ndihmave financiare nga Serbia.
Ky vend i ka ndarë 139 milionë euro për Kosovën për vitin 2024 – rreth 11 milionë më shumë sesa më 2023.
Lista Serbe – partia më e madhe e serbëve në Kosovë – e ka kritikuar ashpër vendimin e BQK-së, duke e konsideruar vendimin e autoriteteve si tentim për dëbim të serbëve nga Kosova.
Ministrja e Ekonomisë, Artane Rizvanolli do të raportojë sot në Komisionin për Ekonomi, Industri, Ndërmarrësi dhe Tregti. Kurse, ministri i Mjedisit, Planifikimit Hapësinor dhe Infrastrukturës, Liburn Aliu do të raportojë në Komisionin për Mbikëqyrjen e Financave Publike.
Rizvanolli do të raportojë lidhur me realizimin e projekteve të ministrisë për vitin 2023 dhe planet e ministrisë për vitin 2024. Ndërsa, Aliu lidhur me raportin e auditimit të performances” Prokurimet e negociuara pa publikim të njoftimit për kontratë në Ministrinë e Mjedisit, Planifikimit Hapësinor dhe Infrastrukturës në vitin 2021”. Sipas njoftimit, Komisioni për Mbikëqyrjen e Financave Publike, do të shqyrtojë edhe raportin e auditimit të PVF-ve, të Postës së Kosovës sh.a për vitin 2022, ku të ftuar do të jenë bordi dhe kryeshefja ekzekutive.
Ndërsa, në Komisioni për Ekonomi, Industri, Ndërmarrësi dhe Tregti, përveç ballafaqimit me Rizvanollin, do të shqyrtojë edhe planin e Performancës të AKP-së për vitin 2024 dhe planin e Performancës të AKRK-së për vitin 2024 – i reviduar.
Sonte në mbrëmje, në aeroportin e Rinasit pritet të zbresë një nga figurat më të njohura botërore të momentit. Volodymyr Zelensky, Presidenti i Ukrainës, që prej dy vitesh po udhëheq luftën kundër Rusisë, duke mobilizuar kombin dhe ushtrinë si dhe duke bindur pjesën më të madhe të botës, të jetë përkrah vendit të tij.
Ai është paraparë të pritet nga kryeministri Edi Rama. Megjithatë, ngjarjet në Ukrainë dhe elementët e sigurisë do të përcaktojnë edhe agjendën e Volodymyr Zelenskyt në Tiranë, ku ajo që dihet me siguri është pjesëmarrja në samitin e 28 shkurtit. Edhe pse në agjendën paraprake ishte parashikuar një takim me presidentin Bajram Begaj dhe kryeparlamentaren Lindita Nikolla ato janë anuluar.
Zelenksy do të marrë pjesë në një forum që të mërkurën do të bëjë bashkë lider të BE-së dhe të Evropës Juglindore. Nga Bashkimi Evropian do të vijë Ursula Von der Leyen, ndërsa janë ende në pritje të konfirmimeve Greqia dhe Kosova, nëse do të përfaqësohen nga kryeministrat, apo nga presidentët. Serbia ka njoftuar se do të jetë e pranishme përmes presidentit Aleksander Vuçiq. Liderët e BE-së dhe Ballkanit Perëndimor do të qëndrojnë edhe të enjten, në një Samit për integrimin.
Pak ditë më parë në një mesazh në platformën “X” kreu i shtetit të Ukrainës vlerësoi mbështetjen e Shqipërisë ndaj Ukrainës dhe shprehu padurimin për një të ardhme më të sigurt për gjithë Evropën. Shqipëria ka vendosur disa sanksione ndaj Rusisë, ndërsa ka dënuar luftën e saj në Ukrainë.
Pak pyetje kishte mbrojtja e Agim Çekut ndaj Daut Haradinajt, me kërkesë të së cilës edhe u ftua të dëshmojë në rastin “Veteranët”.
Duke u përgjigjur në pyetjet e avokatit Ramë Gashi, Haradinaj tha se anëtarët e Komisionit Qeveritar, të akuzuar në këtë rast nuk janë përgjegjës për asnjë veteran të rrejshëm, duke ua vënë barrën zinxhirit komandues në nivel të zonave.
Ish-eprori UÇK-së në zonën e Dukagjinit, tha se sa ishte deputet e kishte kundërshtuar ligjin, që sipas tij krijoi konfuzion.
Mbrojtja pati disa herë kundërshtime në pyetjet e prokurorit special, Valdet Gashi, por nuk u aprovuan nga Gjykata, e cila lejoi Haradinajn të përgjigjet.
Ndonëse, Haradinaj tha se kontribuoi në dizajnimin e aplikacionit, kur u ballafaqua me një të tillë që e kishte nënshkrimin e tij, tha se nuk i kujtohet.
Tutje, Haradinaj, duke u përgjigjur në pyetjen rreth përcaktimit ligjor për të arrestuarit politik, iu referua kryeministrit Albin Kurti si mashtrues.
“Përpos kryeministrit Kurti që është veteran mashtrues, për të tjerët nuk më kujtohet”, tha Haradinaj.
Të akuzuarit shpesh dhanë komente gjatë dëshmisë, për çka kryetari i trupit gjykues Gazmend Bahtiri u tërhoqi vërejtjen, por jo edhe kur Shukri Buja i tha prokurorit që nuk ka njohuri për strukturën ushtarake.
Gjykimi ndaj Agim Çekut, Nuredin Lushtakut dhe të tjerëve do të vazhdojë edhe të mërkurën.
Apeli e ktheu rastin në rigjykim, pasi shkalla e parë i kishte liruar të gjithë të akuzuarit.
Qeveria synon që pronësinë e aksioneve të Operatorit të Sistemit të Transmisionit – KOSTT ta bartë nga Kuvendi te Ministria e Financave.
Pushteti ekzekutiv synon që këtë ta bëjë nëpërmjet ndryshimeve në propozuara në Projektligjin për Energjinë Elektrike, i cili është vënë në konsultim publik.
Projektligji i sponsorizuar nga Ministria e Ekonomisë parasheh që, brenda 60 ditësh nga hyrja eventuale në fuqi, Kuvendi të iniciojë procedurën për bartje të së drejtës së pronësisë.
“Aktualisht, Operatori i Sistemit të Transmetimit të Energjisë Elektrike i raporton Kuvendit të Republikës së Kosovës. Për t’u siguruar që monitorimi e funksionimi i ndërmarrjes të bëhet në mënyrë optimale e efiçiente, si dhe për të liruar Kuvendin nga barra e mbikëqyrjes, kemi paraparë bartjen e të drejtës së pronësisë së KOSTT-it, te Ministria e Financave, Punës dhe Transfereve”, tha Edita Pozhegu, këshilltare e Ministres së Ekonomisë.
Referuar praktikave evropiane, eksperti i energjisë, Arben Kllokoqi, tha se kërkohet për dy ose më shumë ndërmarrje publike në sektorin e njëjtë, së paku, pronësinë ta mbajnë ministri të ndryshme.
“Në rast se Qeveria ka asete edhe në transmision, dhe ka pronësi në gjenerim, apo në ndonjë biznes tjetër që ka të bëjë më prodhimin apo shitjen e energjisë elektrike, atëherë praktikë është që të jenë dy ministri të ndryshme. Në disa raste mund të jenë fonde të ndryshime, siç është rasti në Francë. Dhe, në këtë mënyrë arrihet përputhshmëria me direktivën. Megjithatë, përputhshmëria duhet të vlerësohet nga Sekretariati i Komunitetit të Energjisë”, tha Kllokoqi.
Kllokoqi theksoi se, para hyrjes në fuqi të ligjit, duhet një lloj certifikimi nga Komuniteti i Energjisë në Vjenë për të shmangur elemente eventuale të monopolit.
“Përveç konkludimit parimor se është në përputhje, duhet të shikohet se çfarë vendime, si vendoset bordi, çfarë vendime mund të marrë bordi dhe çfarë ndikimi ministritë përkatëse mund të kenë, apo edhe qeveria mund të ketë në vendimet e ndërmarrjes?”, tha Kllokoqi.
Të hënën, në KOSTT nuk u përgjigjën lidhur me ndryshimet e propozuara.
Ndërsa, qëndrim nuk dhanë as deputetë të dy partive opozitare, PDK e LDK.
Gjykata e shkallës së parë e ka liruar kryetarin e Kuvendit Konjufcën, nga akuzat për hedhje të gazit lotsjellës, pasi tha se gjatë gjykimit nuk u provua fajësia e tij.
Gjykata ka konfirmuar se pika dy e akuzës ndaj kryetarit të Kuvendit për veprën penale pengim i personit zyrtar, është parashkruar.
Mbrojtja Vendimin e cilëson të drejtë.
Konjufca akuzohej se sa ishte deputet hodhi gaz lotsjellës në mbledhjen e kryesisë së Kuvendit, në kundërshtim të ratifikimit të marrëveshjes për demarkacion me Malin e Zi, në gusht të vitit 2016.
Gjatë këtij gjykimi dëshmuan Sabri Hamiti, Pal Lekaj dhe disa ish-deputetë të cilët nuk e inkriminuan direkt Konjufcën.
Hamiti gjatë dëshmisë kishte thënë se ishin përfaqësuesit e Vetëvendosjes, që kishin hedhur gaz dhe si pasojë ishte ndërprerë mbledhja e kryesisë.
Ministri i Shëndetësisë, Arben Vitia, tha se, me rritjen e vlerës së koeficientit të pagave në 110 euro, mjekët kosovarë tash e kanë pagën më të lartë në rajon.
Por Oda e Mjekëve të Kosovës po e kundërshton këtë konstatim, meqë thotë se profesionistët shëndetësorë paguhen më mirë në shtetet fqinje.
Paga mesatare për një mjek specialist në Kosovë është 1260 euro, ndërkohë një i tillë në shtetet fqinje, si në Mal të Zi paguhet 2500 euro, kurse Shqipëri dhe Bosnjë Hercegovinë është 2000 euro.
“Nuk pajtohemi me këtë deklaratë të Ministrit, pasi që ne kemi pagën më të ulët të mjekëve në rajon….”, tha kryetari i Odës së Mjekëve të Kosovës, Pleurat Sejdiu.
Sipas kryetarit të Odës, Pleurat Sejdiu, paga e mjekëve në Kosovë është dinjitoze vetëm atëherë kur krahasohet me sektorët e tjerë në nivel vendi, dhe jo me shtetet tjera ballkanike.
“Nëse bëjmë llogaritje për pagat në vend po, por me vende të tjera jo, nuk i kemi më të larta”, tha Sejdiu.
Të pakënaqur me pagat janë edhe infermierët. Ata paralajmëruan grevë para Ministrisë së Shëndetësisë për të hënën, mirëpo i vetmi që doli ishte Enlirat Duraku.
“Infermierët nuk kanë dalë edhe pse kemi pasë së bashku me grevu, këtu para MSH-së, ata po frikësohen. Nuk kanë dalë për këtë, por unë nuk do të ndalem duke pritur që kërkesat tona të realizohen. Pra jemi të vetëdijshëm që 99 për qind të infermierëve janë të frikësuar prej shefave të tyre, sidomos eprorëve të tyre, pra frika është shkaku kryesor”, tha Duraku.
Në bazë të ligjit të pagave, infermierët paguhen nga 535.5 deri 588 euro, derisa ndihmësit e tyre i marrin nga 472 euro. Kurse kryeinfermieri merr rrogë prej 672 eurosh deri 651.
Dyshimet e para të prindërve për vdekjen e vajzës së tyre 4 vjeçare nga Gjakova, ishin si pasojë e lëndimeve trupore dhe neglizhencës së mjekëve.
Por në raportin e SHSKUK-së dhe Spitalit të Përgjithshëm “Isa Grezda” në Gjakovë, i cili u diskutua të hënën ndërmjet Komisionit për të Drejtat e Njeriut dhe atij për Shëndetësi dhe Mirëqenie Sociale me krerët e shëndetësisë, thuhet se vajza është diagnostikuar me SEPSË.
“Është diagnostikuar me SEPSË. Për diagnozën përfundimtare duhet t’i presim dhe rezultatet e fundit të hetimeve që kanë nisur. Kjo lloj e SEPSE-së që është infeksion i rëndë i gjakut dhe se vdekshmëria është shumë e lartë. Sipas raporteve dhe bisedave me profesionistët e fushës që i kanë trajtuar pacientët s’ka shenja që ka pasur shkaktarë të jashtme që e kanë rënduar gjendjen e pacientes…”, tha ministri i Shëndetësisë, Arben Vitia.
Për procedurën e trajtimit të 4 vjeçares foli drejtori i përgjithshëm i SHSKUK-së, Elvir Azizi.
Ndonëse të ftuar, në komision nuk morën pjesë kryetari i Gjakovës, Adrian Gjini, e as drejtoresha e shëndetësisë në këtë komunë, Adelina Shehu.
Por, pjesë e diskutimit ishin dy deputet gjakovar, të cilët patën disa pyetje për ministrin.
“Meqë SEPS është sëmundje ngjitëse, a është kontrolluar familja e vajzës…”, tha Fridon Lala, deputet i IRDK-së.
“Informatën për vdekjen e vajzës e kanë marrë nga mediat, si mund të ndodh kjo…në autoambulancë nuk u lejuan prindërit…”, tha Agon Batusha, kryetar i LVV-së në Gjakovë.
Për gjitha këto, ndonëse të mangëta, Vitia pati përgjigje.
“Është rregull të mos ketë shoqërues, po ne kemi kontrolluar familjen jemi në kontakt të vazhdueshëm me ta…”, tha Vitia.
Ndërkaq, për diagnozën përfundimtare, Vitia tha duhet t’i presim edhe rezultatet e fundit të hetimeve që kanë nisur.
4 vjeçarja, vdiq më 19 shkurt në QKUK, 2 ditë pasi ishte transferuar nga spitali i përgjithshëm “Isa Grezda” në Gjakovë, për trajtim të mëtutjeshëm.
Ndërtesa e Komunës së Zveçanit tashmë po sigurohet vetëm nga Policia. Pjesëtarët e KFOR-it janë larguar, meqë vlerësuan se situata është stabilizuar.
Për të marrë shërbime në komunë, qytetarëve të komunitetit serb u duhet të shkojnë në objektin e improvizuar në fshatin Lipë, mbi 5 km larg nga qendra.
Megjithatë, kryetari Ilir Peci po planifikon të zhvendoset në objektin e Komunës, tash pas largimit të KFOR-it.
“Në koordinim me ambasadorët do të marrim vendimin e duhur, por jo të shpejtë që të gabojmë, kështu që besoj që do të shkojmë”, tha Peci.
Peci thotë se ka komunikim të vazhdueshëm me qytetarë, gjë që i jep besim se prezenca e tij në komunë nuk mund të risjellë tensione.
“Tash kemi pothuajse çdo ditë takime me qytetarët serbë, nuk është ajo frymë e cila ka qenë te qytetarët serbë dhe besoj që nuk do të përsëritet e njëjta gjë”, tha Peci.
Sidoqoftë, në afërsi të objektit qytetarët serbë ndonëse më të paktë në numër, vazhdojnë të qëndrojnë në të njëjtat tenda që i vendosën në maj, kur kundërshtuan zgjedhjen e Pecit kryetar.
Largimi i KFOR-it nga objekti i komunës, thonë se nuk përbën ndonjë ndryshim për ta.
“Sipas meje, largimi i tyre nuk do të ketë ndikim në ndryshimin e gjendjes. Siguria është në nivel, edhe sikur të rrinin asgjë nuk do të ndryshonte”.
Rreth deeskalimit në veri, shefi i diplomacisë së Bashkimit Evropian, Josep Borrell, tha se përpjekjet dështuan edhe një herë në takim me kryeministrin Albin Kurti e presidentin serb Aleksandër Vuqiq, më 16 shkurt, pas Konferencës së Sigurisë në Munih.
