Category: Lajme

Sot, në një ceremoni të mbajtur para shumë përfaqësuesve të kompanive nga Kosova dhe Mbretëria e Arabisë Saudite, Kryetari i Odës Ekonomike të Kosovës, Lulzim Rafuna, si dhe Kryetari i Federatës së Odave Ekonomike të Arabisë Saudite, Hassan Al Hawaizy, firmosën zyrtarisht Marrëveshjen e Bashkëpunimit ekonomik ndërmjet dy vendeve.

Gjithashtu, gjatë Forumit Ekonomik të organizuar sot, kompanitë nga Kosova dhe Mbretëria e Arabisë Saudite ishin pjesë të takimeve të strukturuara B2B, për të eksploruar më në detaje mundësitë e investimeve dhe partneriteteve biznesore.

Ky Forum paraqet një hap të rëndësishëm në forcimin e lidhjeve ekonomike dhe të bashkëpunimit ndërmjet Kosovës dhe Arabisë Saudite.

Oda Ekonomike e Kosovës dhe Federata e Odave Ekonomike të Arabisë Saudite shprehin gëzimin e tyre për këtë marrëveshje të rëndësishme dhe angazhohen për të përforcuar më tej lidhjet ekonomike dhe të promovojnë bashkëpunimin reciprok në të ardhmen.

“Edukimi mediatik duhet të përfshihet në planprogramet mësimore shkollore”. Kështu u tha në përfundim të sesionit trajnues në Ferizaj, ku u diskutua me temën “Edukimi mediatik kundër dezinformimit për nxënësit nga komunitetet jo-shumicë në Kosovë”.

Të rinjtë e komuniteteve rom, ashkali e egjiptian të shkollave të mesme kanë ndarë përvojat e tyre, ku treguan për rastet kur janë atakuar me lajme të rreme.

Rreth 20 nxënës nga Ferizaj, në grupe të ndara, kanë ilustruar rastet e informimit keqdashës, lajmit të rremë, keqinformimit e propagandës që bëhen nga mediat në Kosovë.

Profesori Emin Sadiku nga shkolla ekonomike “Faik Konica” thotë se të rinjtë e komuniteteve po atakohen në masë të madhe nga lajmet e rreme.

“Nxënësit shpesh ka mundësi debatojnë mes vete përmes rrjeteve sociale, nganjëherë mund të vie edhe deri tek ndonjë ngatërresë e vogël, shtyrje apo sharje apo ndonjë mosmarrëveshje…vijnë si pasojë e keqinformatave dhe keqpërdorimeve që mund të bëjnë”, tregon ai.

Ai flet edhe për rastet se si pas pushimeve, nxënësit kanë paqartësi nëse do të rifillojë mësimi, si shkak i shpërndarjes së dezinformatave.

“Kur përfundojnë pushimet dimorore, ka raste nganjëherë ku si shkak i keqinformimit thuhet “jo s’po fillojmë këtë të hëne, jo shtyhet mësimi’. Këto raste shkaktojnë ndonjëherë huti tek nxënësit e tek të rinjtë”, shton ai teksa flet për raste të keqinformimit.

Teksa flet për trajnime mbi edukimin mediatik, ai konsideron se të tillat ndihmojnë të rinjtë që të arrijnë të identifikojnë lajmet e rreme dhe të mos bijnë pre e tyre.

Ndërkaq, sipas trajneres Linda Baleta, edukimi mediatik duhet të përfshihet në programet mësimore shkollore në mënyrë që të rinjtë të kenë sa më shumë njohuri rreth rrezikut që vijnë nga lajmet e rreme.

“Ajo çfarë kemi identifikuar gjatë këtyre sesioneve që nga fillimi i këtij projekti, është sa e madhe është nevoja që të rinjtë dhe jo vetëm të rinjtë por edhe grupmoshat e tjera të kenë sa më shumë njohuri rreth rrezikut dhe kërcënimit qe na vjen nga lajmet e paverifikuara, nga lajmet e pavërteta dhe nga dezinformata. Ndoshta është koha që të mendohet seriozisht që edukimi mediatik të përfshihet në planprogramet mësimore shkollore”, shprehet ajo.

Më tej, ajo thekson se në sesionet trajnuese është identifikuar nevoja e madhe që të rinjtë e komuniteteve të arrijnë të dallojnë lajmin e pavërtetë.

“Programi ‘edukimi mediatik’ e ka fokusin tek të rinjtë që vijnë kryesisht nga komunitetet rom, ashkali e egjiptian, duke qenë edhe kërkesa e Ambasadës amerikane. Ne kemi qenë në shumë komuna dhe do të vazhdojmë të shkojmë edhe në komuna të tjera, akoma nuk kanë përfunduar. I mbulon të gjitha komunat e Kosovës, besoj që do të jemi të paktën një herë në secilin qytet për t’u takuar me të rinjtë e këtyre grupmoshave dhe profesorët e tyre të cilët po ashtu bëhen pjesë e trajnimeve”, përfundon Baleta.

Gjatë së enjtes, të rinjtë e shkollave të mesme në Ferizaj janë trajnuar në lidhje me burimet e informatës, me synimin që të zhvillojnë mendimin kritik sa i përket përmbajtjeve mediatike.

Projekti “Edukimi mediatik kundër dezinformimit për mësimdhënësit, nxënësit dhe aktivistët e shoqërisë civile nga komunitetet rom, ashkali dhe egjiptian” mbështetet nga Ambasada e Shteteve të Bashkuara në Prishtinë.

Kryeministri teknik i Maqedonisë së Veriut, Talat Xhaferi, tha se nuk ka marrë ftesë ende për ta vizituar Kosovën.

I pyetur nga gazetarët pse nuk e ka vizituar Kosovën, ai tha se “në dasmë shkohet me ftesë”, derisa shtoi se nuk është çështje ftese, por shkak i agjendave.

Tutje, sa i përket raporteve ai tha se nuk ka pengesa në komunikim në mes të dy qeverive.

“Në dasmë kur shkohet, shkohet me ftesë, s’kemi marrë ftesë ende . Nuk është çështje e ftesë, është çështje e agjendave, dihet që ne jemi edhe para zgjedhjeve, kështu që raportet janë raporteve të dy vendeve miqësore, që udhëheqin institucionet përkatëse, nuk ka kurrfarë pengese në komunikim, personale janë çështje tjera, nuk i ngatërrojë unë institucionale me ato personale”, ka deklaruar ai.

Gjykata Themelore në Gjakovë ka shpallur aktgjykim dënues kundër të pandehurit I.Z., për veprën penale, “Vrasja” dhe “Mbajtja në pronësi, kontroll ose posedim të paautorizuar të armëve”.

Pas shqyrtimit fillestar ku i pandehuri e ka pranuar fajësinë sipas akuzës, gjykata të akuzuarin I.Z. e shpalli fajtor dhe i shqiptoi dënim unik me burg për dy veprat penale në kohëzgjatje prej 19 vjet, në të cilin dënim do t’i llogaritet koha e kaluar në paraburgim nga data 20 shtator 2023.

I pandehuri I.Z., akuzohet se “Me datë 20 shtator 2023, rreth orës 07:15 minuta, në fshatin Bellanicë, Komuna Malishevës, në parkingun e marketit “M…”, me dashje ka privuar nga jeta tani të ndjerin A. B. nga fshati Vraniq, Komuna Suharekës, në atë mënyrë që me të arritur në vendin e cekur më lartë, tani i ndjeri me veturën Fiat, ngjyrë e bardhë, i cili ishte duke shkuar në punë, ndërsa i pandehuri ndodhej në lokal së bashku me dëshmitarin B. E., dhe me të vërejtur se kishte arritur në parking tani i ndjeri A.B., i pandehuri ngritët nga tavolina, del jashtë dhe afrohet tek automjeti i të ndjerit, hap derën e automjetit dhe menjëherë me armën e llojit SIG SAUER- P320, shtënë pesë herë në kokë të tani të ndjerit, viktima bie përtokë, i pandehuri vazhdon duke shtënë edhe dy here prapë në drejtim të trupit të tij, përderisa trupi ishte i shtrirë për tokë, e ku nga plagët e mara i ndjeri ndërro jetë në vendin e ngjarjes, ndërsa i pandehuri largohet me veturën e tij nga vendi i ngjarjes dhe lajmërohet në polici.”

Po ashtu, është konfiskuar një pistoletë e tipit SIG SAUER – P320, 57 fishekë të kalibrit 9×19 mm, një karikator me 7 fishekë të kalibrit 9×19 mm, të cilën armë ditën kritike e kishte përdorur i pandehuri, si objekte të kryerjes së veprës penale.

Pas plotfuqishmërisë së këtij aktgjykimi, arma e konfiskuar do të shkatërrohet në rast se e njëjta nuk evidentohet se është përdorur në ndonjë rast tjetër të hapur, nga Libri i Rasteve të Hapura.

Kundër këtij aktgjykimi, palët kanë të drejtë ankese në afat prej 30 ditëve nga dita e pranimit të aktgjykimit në formë të shkruar.

Më 28 shkurt 2024 rreth orës 16:30 qytetari E.Dema nga Kaçaniku, i moshës 29-vjeçar, në rrugën “Ismail Raka” në Kaçanik i ka gjetur një shumë të caktuar të parave dhe i ka dorëzuar në stacionin e policisë në Kaçanik.

Policia kërkon nga pronari i vërtetë i këtyre parave të paraqitet në stacionin e policisë në Kaçanik, çdo ditë nga ora 08:00-16:00 dhe të vërtetohet pronësia, në mënyrë që t’i dorëzohen më pas.

Me këtë rast policia rajonale e Ferizajt e ka falënderuar qytetarin E. Dema për gjestin human dhe shembullor me rastin e dorëzimit të parave në stacionin e policisë.

Ish-kryeministri Avdullah Hoti ka deklaruar se nuk ka asnjë arsyetim pse Kosova nuk është e pranishme në Tiranë në Samitin e Ballkanit Perëndimor me Bashkimin Evropian.

Në një postim në Facebook, ai ka thënë se nuk ka agjendë më të rëndësishme për Qeverinë e Kosovës se samiti në Tiranë, përveç ndonjë emergjence kombëtare.

“Jam i sigurt se ligjëratat nëpër Irlandën Veriore janë vetëm pretekst për të ikur nga ky takim. Samiti në Tiranë është vendi për të prezantuar nevojat dhe projektet, si dhe për të bërë konsultimet e nevojshme me partnerë. Aty është vendi për të insistuar dhe avokuar për zhbllokimin e 300 milionë eurove për projekte për shkak të masave të BE-së ndaj Kosovës”, ka shkruar ai.

Sipas tij, Qeveria e Kosovës do të duhej të bënte konsultime të ngushta me Qeverinë Rama përpara këtij samiti.

“Sipas komisionarit për Zgjerim, Oliver Varhelyi, plani i BE-së për rritjen ekonomike të Ballkanit Perëndimor është konceptuar në Tiranë. Rrjedhimisht, Qeveria e Kosovës do të duhej të bënte konsultime të ngushta me Qeverinë Rama përpara këtij samiti”, ka përfunduar Hoti.

Në Samitin rajonal mbi Planin e Rritjes në Tiranë nuk do të merr pjesë fizikisht kryeministri i Kosovës, Albin Kurti.

Kurti do të jetë pjesë e Samitit virtualisht përmes një video-adresimi. Kështu ka konfirmuar për KosovaPress zëdhënësi i Qeverisë së Kosovës, Përparim Kryeziu.

Ai ka treguar arsyet përse Kurti nuk do të jetë pjesë e këtij samiti fizikisht.

“Për shkak të angazhimeve të mëparshme, kryeministri i Kosovës, Albin Kurti nuk do të jetë i pranishëm fizikisht në Samitin e sotëm në Tiranë. Megjithatë kryeministri Kurti do të jetë pjesë e Samitit virtualisht përmes një video-adresimi”, thuhet në përgjigjen me shkrim për KosovaPress.

Të enjten në Tiranë mbahet Samiti rajonal mbi Planin e Rritjes dhe Konvergjencës me fokus integrimin e Ballkanit Perëndimor drejt Bashkimit Evropian, si edhe zbatimin e Planit të Rritjes për Ballkanin Perëndimor.

Ky samit mbahet një ditë pas atij Ukrainë-Evropa Juglindore në kryeqytetin shqiptar dhe do të ofrojë mundësi të reja për një shkëmbim pikëpamjesh mbi të ardhmen evropiane të rajonit dhe mbi sfidat e përbashkëta rajonale.

Në samit do të jetë i pranishëm edhe komisionari i Bashkimit Evropian për Zgjerimin dhe Fqinjësinë, Oliver Varhelyi.

Në mbledhjen e II-të të kuvendit komunal të Deçanit për këtë vit, është diskutuar çështja e pagesës së shujtave ditore, të cilat sipas ligjit paguhen nga buxheti komunal.

Kryetari i kësaj komune, Bashkim Ramosaj tha se ky vendim duhet të shfuqizohet për shkak se është vendim që po dëmton buxhetin komunal të Deçanit.

Ramosaj tha se për shkak të pagesave të shujtave ditore, Deçani ka 1 milionë e 600 mijë euro borxh që duhet të paguajë.

“Shujtat ditore dy vitet e fundit kanë mundur të mos paguhen, këtë e dimë edhe sindikata edhe punëtorët dhe po përsëritet prapë, disa vendime në këtë shtet janë marrë në etapa politike, sidomos në fushata zgjedhore, që nuk është ditur si implementohen. Kur flasim për kontrata kolektive përgjegjësia nuk ka qenë e asnjë komune. Nëse e marrim këtë vendim si komunë që me e nda një kod buxhetor kur paguajmë edhe pagat edhe mëditjen nuk është e mundur, sepse një gjë të tillë nuk e lejon ligji. 44:45 Obligim për shujta me e paguar organizata buxhetore komunale që jemi penalizuar. Në këtë na kanë mirëkuptuar por zgjidhje nuk mund të bëjmë. Unë kam mundur me mbrojt këtë temë me gjykatë dhe mos me marrë pagesë askush, por kam pas mirëkuptim për shkak të pagave të ulëta, dhe prej kryetarit të sindikatës që në mbledhjen me u shfuqizuar ky vendim.46:02 Komuna e Deçani ka 1 milion e 600 mijë euro për të cilat duhet të paguajë për shkak të këtij defekti që ka ndodhur”, tha Ramosaj.

Ndërkaq, në mbledhjen mbajtur sot, komuna e Deçanit ka marrë vendim që të ndajë 20 mijë euro për bashkëfinancim me organizata jo qeveritare në sektorin e bujqësisë.

Drejtori i Bujqësisë, Pylltarisë dhe Zhvillimit Rural, Rifat Stokaj tha se do të nis një projekt për shpërndarjen e 50 serrave bujqësore për 50 fermerët e Deçanit.

Ai tha se në këtë projekt do të bashkë financojnë komuna, qytetarët dhe organizatat joqeveritare.

Stokaj tha se nëse ky projekt ka rezultate të mirë të prodhimtarisë, do të nisin edhe projekte të tjera.

“Neve kemi qenë në negociata me tre organizata jo qeveritare për ngritjen e këtyre serave që janë për të mirën e fermerëve tonë. Projekti total do të jetë diku rreth 60 mijë euro, 20 mijë euro participimi i Deçanit, 10 mijë euro nga qytetarët dhe 30 mijë euro nga shoqata. Neve na është kërkuar se cili do të jetë kapaciteti i Deçanit, sa fermerë janë në ato projeksione dhe gjithë materiali është aty, tjetër diçka nuk ka ende pa u nënshkruar marrëveshja. Për ndihmesën e 50 fermerëve me serra, të cilat do të jenë të kapacitetit një ari 10 me 10 apo 5 me 20 varësisht se në çfarë forme i kërkojnë fermerët, ata do të përfitojnë nga ndërtimi i tyre, pjesa metalike, pjesa e mbulesës, pra fermerët do të janë të gatshëm të fillojnë punën në ato serra. Do të bëhen mbi 50 vizita te fermerët dhe ato të kthehen në letër por se a do të ketë projekt të dytë do të shohim se a ka rritje të prodhimtarisë pastaj vazhdojmë me projekte tjera”, tha Stokaj.