ATV

Category: Lajme

  • Zyrtari i lartë amerikan sot për vizitë në Kosovë

    Zyrtari i lartë amerikan sot për vizitë në Kosovë

    Ndihmës Sekretari amerikan për Byronë Ndërkombëtare të Narkotikëve dhe Çështjeve të Zbatimit të Ligjit, Todd Robinson do të jetë për vizitë dyditore në Kosovë nga sot deri më 22 mars.

    Siç njofton Departamenti Amerikan i Shtetit, Robinson do të takohet vetëm me presidenten e vendit, Vjosa Osmani, por jo edhe me kryeministrin Albin Kurti, ashtu siç ndodhi me zyrtarin amerikan i cili në dy ditët e fundit ishte për vizitë në Tiranë, e që pati takim me kryeministrin Edi Rama.

    “Nga data 20-22 mars, Ndihmës Sekretari Robinson do të udhëtojë në Prishtinë, Kosovë, ku do të takohet me Presidenten e Kosovës Vjosa Osmani dhe me partnerët e INL-së në sektorin e zbatimit të ligjit dhe drejtësisë”, thuhet në njoftim.

    Me Kurtin s’u takua as zyrtarja e lartë e USAID-it, Erin McKee, e cila pati takim vetëm me presidenten e vendit, Vjosa Osmani.

    Mungesa e takimeve me zyrtarë të lartë amerikanë me Kurtin vjen pas acarimit të raporteve në mes Qeverisë Kurti dhe Administratës Biden.

    Këtë e ka bërë të ditur edhe emisari special i ShBA-së për Ballkanin Perëndimor, Gabriel Escobar, i cili tha se në pothuajse tri vite të Qeverisë Kurti nuk ka pasur asnjë takim të nivelit të lartë “mes askujt në Qeverinë e Kosovës dhe dikujt në administratën amerikane”.

  • MPJD-ja sot mban mbledhje komemorative në nderim të Arben Rugovës

    MPJD-ja sot mban mbledhje komemorative në nderim të Arben Rugovës

    Ministria e Punëve të Jashtme sot do të organizojë ceremoni komemorative në nderim të zyrtarit të këtij institucioni, Arben Rugova.

    Përmes një njoftimi për medie, MPJD-ja ka njoftuar se ceremonia do të mbahet të mërkurën në amfiteatrin e ish-objektit Rilindja me fillim nga ora 11:45.

    “Njoftim për mbajtjen e mbledhjes komemorative në nderim të jetës, veprës dhe kontributit të zyrtarit të MPJD-së, Arben Rugova. Nën patronatin e Ministres së Punëve të Jashtme dhe Diasporës, znj. Donika Gërvalla, në nderim të jetës, veprës dhe kontributit të Zyrtarit të Ministrisë së Punëve të Jashtme dhe Diasporës, z. Arben Rugova do të mbahet mbledhje komemorative”, thuhet në njoftim.

    Ndryshe gazetari dhe zyrtari i Ministrisë së Punëve të Jashtme, Arben Rugova ka vdekur të hënën.

  • Kurti për “The Telegraph”: Britania duhet të dërgojë më shumë trupa të na mbrojë nga pushtimi serb

    Kurti për “The Telegraph”: Britania duhet të dërgojë më shumë trupa të na mbrojë nga pushtimi serb

    Britania duhet të dërgojë më shumë trupa në Kosovë për të parandaluar luftën në Ballkanin Perëndimor, ka thënë kryeministri Albin Kurti.

    Ka vetëm një prani “simbolike” të NATO-s në vend dhe nuk do të mjaftonte për të parandaluar një pushtim nga Serbia, tha Albin Kurti për “The Telegraph” në një intervistë në zyrën e tij në Prishtinë.

    Vërejtjet e kryeministrit erdhën pasi Aleksandar Vuçiq, presidenti i Serbisë, la të kuptohet për një përpjekje për të rimarrë Kosovën në fillim të kësaj jave, duke thënë se Beogradi do të “presë për momentin më të mirë të mundshëm dhe ne do të shfrytëzojmë mundësinë tonë”.

    I pyetur nëse Britania duhet të rrisë praninë e saj ushtarake në rajon, Kurti tha: “Mbretëria e Bashkuar është pjesë e NATO-s dhe ata veprojnë dhe operojnë në atë mënyrë. Unë besoj se duhet të ketë më shumë trupa të NATO-s në Kosovë”.

    NATO ka 4,000 trupa në terren në Kosovë, por Kurti tha se vendi i tij “mund të mbrohet edhe më mirë” dhe se “NATO mund dhe duhet të angazhohet më shumë në Kosovë si ushtarakisht ashtu edhe politikisht” për shkak të kërcënimit nga Beogradi.

    Kurti tha se ai i kishte kërkuar Brukselit për më shumë trupa në Kosovë “disa herë”, përfshirë para pushtimit të plotë të Ukrainës nga Vlladimir Putini në shkurt 2022 dhe përsëri vitin e kaluar, kur persona të armatosur serbë sulmuan policinë në veri të vendit, duke vrarë katër.

    Rreth 200 trupa britanike u vendosën në rajon pas sulmit në një përpjekje për të ulur tensionet, duke iu bashkuar 400 trupave britanike tashmë të stacionuara atje. Këto trupa shtesë janë larguar që atëherë.

    Në kohën e dhunës, Alicia Kearns, kryetarja e komitetit të punëve të jashtme të Commons, akuzoi Perëndimin për dështimin në mbrojtjen e Kosovës nga agresioni serb dhe rus dhe i kërkoi qeverisë të “sigurojë që ne të mos miratojmë një politikë të bazuar në Beograd për Ballkanin”.

    Qeveritë e ShBA-së dhe Britanisë e kishin akuzuar Kurtin për nxitjen e tensioneve duke dërguar kryebashkiakët shqiptarë në rajonet kufitare të Kosovës me shumicë serbe.

    Analistët kanë paralajmëruar se propaganda e Kremlinit po nxit trazira në veri në një komb ku 93 për qind janë shqiptarë dhe 4 për qind janë serbë.

    Serbia aleate e Rusisë

    Serbia është një aleate tradicionale e Moskës dhe ka refuzuar të sanksionojë Rusinë pas pushtimit të Ukrainës.

    Sot, 45 trupa britanike janë të përfshirë në kontingjentin prej 4443 trupash të NATO-s në Kosovë. Në krahasim, Hungaria ka 365 trupa, Amerika 572 dhe Italia 1322. Kurti pranoi se ndërsa prania e trupave ishte “substanciale” në veriun me shumicë etnike-serbe, në përgjithësi ajo nuk ishte rritur “shumë” dhe ishte “përgjithësisht simbolike”.

    Kurti tregoi imazhet ajrore për “The Telegraph” që përshkruanin 41 kazerma ushtarake në Serbi, të cilat ai pretendoi se ishin të pozicionuara në mënyrë strategjike për të “mbrojtur Beogradin dhe për të sulmuar Kosovën”.

    Një tjetër imazh tregonte 48 baza operative sulmuese serbe të stacionuara përgjatë kufirit 381 km që ndan me Kosovën. Nga bazat, 28 besohet të jenë ushtarake dhe 20 xhandarmëri, me numrin e njerëzve në secilën prej 50 dhe 150.

    Ai vuri në dukje terrenin “malor” të vendit të tij, i cili e bën të vështirë mbrojtjen, si dhe 16 rrugët ilegale që serbët kanë përdorur për kontrabandën e municioneve dhe pajisjeve ushtarake në zonat me shumicë serbe, të cilat që atëherë janë mbyllur, transmeton Klankosova.tv.

    Kurti i përshkroi 48 bazat si “patkua” në formë – një formë në përputhje me atë që u shfaq brenda Kosovës gjatë luftës 25 vjet më parë.

    “Ata [Serbia] po presin një dritare mundësie për të na sulmuar”, tha ai.

    Ai e përshkroi patkoin si “shqetësues” për shkak të afërsisë së forcave serbe me kufirin.

    “Putini i vogël”

    Shqetësimi më i madh i Kurtit si udhëheqës i Kosovës është Vuçiqi, të cilin ai e përshkroi si “Putinin e Vogël” për shkak të miqësisë së tij me presidentin rus.

    Ai tha se “nuk ishte çudi” që në dhjetor të vitit të kaluar Vuçiqi tregoi admirim publik për Ilham Aliyevin, presidentin e Azerbajxhanit, kur mori rajonin e diskutueshëm të Nagorno-Karabakut nga forcat armene, duke pasur parasysh ambicien e tij për të pushtuar Kosovën.

    “Për shkak të kërcënimit që Serbia po na paraqet dhe për shkak të lidhjeve të shumta me Kremlinin, të kemi më shumë kapacitete dhe aftësi për ushtrinë dhe policinë tonë dhe më shumë trupa të NATO-s do të rriste sigurinë e vendit tonë dhe të rajonit”, theksoi Kurti.

    “Besoj për aq kohë sa Serbia nuk e njeh Kosovën, përderisa Serbia mban 48 baza operative sulmuese rreth vendit tonë dhe për sa kohë Serbia është aleate e ngushtë e Kremlinit, duhet të ketë më shumë kapacitete nga ana jonë dhe më shumë trupa të NATO-s”.

    Kosova tashmë shpenzon më shumë se 2 për qind të PBB-së së saj për mbrojtje, duke përmbushur objektivin e NATO-s që shumë vende anëtare nuk e bëjnë.

    Kurti u burgos në vitet 1990

    Kurti u burgos dhe u torturua si student aktivist duke bërë fushatë kundër sundimit serb të Kosovës në vitet 1990.

    Ai tha se e kujtonte mirë kohën e tij në burgun e Lipjanit në Prishtinë, ku u detyrua të jetonte dhe të bënte jashtëqitjen në një dhomë të vogël me 13 të burgosur të tjerë të luftës. Ai kujton orën e saktë të ditës që u silleshin burrave një copë bukë, se si rrahjet që ata merrnin ishin kaq brutale, të burgosurit humbnin rregullisht ndjenjat dhe se si ai mësoi të flinte ulur pasi nuk kishte vend për t’u shtrirë, transmeton Klankosova.tv.

    Në kohën e burgosjes së tij, Vuçiqi ishte në pushtet si ministër serb i informacionit.

    “Ai është ende në pushtet dhe unë u bëra kryeministër, por nuk kam urrejtje për serbët”, tha ai.

    “Por uroj që Serbia të ndryshojë qëndrimin dhe qasjen e saj ndaj Kosovës për normalizimin e marrëdhënieve. Unë besoj në drejtësi pa hakmarrje. Unë nuk besoj në hakmarrje. Nëse ka hakmarrje nuk mund të ketë drejtësi”.

    Duke iu përgjigjur komenteve të Kurtit, një zëdhënës i Ministrisë britanike të Mbrojtjes tha: “Mbretëria e Bashkuar vazhdon të ofrojë mbështetje aktive për sovranitetin dhe pavarësinë e Kosovës dhe ne po luajmë një rol jetik në ruajtjen e stabilitetit në Ballkanin Perëndimor”.

    “Trupat e Mbretërisë së Bashkuar janë aktualisht të dislokuara si pjesë e misionit paqeruajtës prej 4000 trupash të NATO-s në Kosovë. Misioni kontribuon në ruajtjen e një mjedisi të sigurt dhe për lirinë e lëvizjes për të gjitha komunitetet në Kosovë”.

  • Ish-kolegu e miku i Triumf Rizës thotë se vrasjen e tij e orkestroi Enver Sekiraqa

    Ish-kolegu e miku i Triumf Rizës thotë se vrasjen e tij e orkestroi Enver Sekiraqa

    Përgatiti: Nora Luta

    Nga Nju Jorku, përmes video-linkut, Arben Selmani, ka folur për herë të parë në gjykatore rreth vrasjes së Triumf Rizës. Shoku i fëmijërisë së Rizës, e më vonë edhe koleg në Polici, ka thënë se vrasjen e ka planifikuar Enver Sekriaqa.

    Ai e ka quajtura kulm të përndjekjeve e presionit që, sipas tij, Sekiraqa i bënte Rizës, pranimin e një informate nga inteligjenca. Sipas dëshmitarit, nga përgjimet kuptohet se Sekiraqa ishte dëgjuar duke thënë se do t’i vrasë Rizën dhe Selmanin, e do të largohet për një kohë nga Kosova.

    Kjo, sipas tij, kishte ndodhur pas ngjarjes në Sëiss Casino.

    Në përgjigjet e pyetjeve të Prokurorisë rreth motivit, Selmani tha se qëllimi ishte ushtrimi i presionit mbi Rizën, pasi ishte polici më i mirë elitar në atë kohë.

    E presionet ndaj tij, sipas dëshmitarit ishin shtuar kur në jetën e Rizës ishte shfaqur Adelina Ismajli. Mbrojtja po ashtu e pyeti dëshmitarin përse Sekiraqa nuk ishte arrestuar pas përgjimeve.

    Mbrojtja pati vërejtje se dëshmitari gjatë dëshmisë lexoi deklaratën e tij dhënë në hetuesi në 2018-n, duke kërkuar që të veçohet, por kjo u refuzua nga trupi gjykues. Pyetje për dëshmitarin pati edhe babai i të ndjerit.

    Gjykimi ndaj Enver Sekiraqës, i cili aktualisht është në arrest shtëpiak, pas vendimit të Apelit, do të vazhdojë të enjten.

    Ai akuzohet se e nxiti vrasjen e policit të Njësisë Speciale, Triumf Riza, ndërsa për vrasje u dënua me 35 vjet burgim Arben Berisha.

    Më shumë detaje i gjeni në Edicionin Qendror të lajmeve në videon më poshtë:

  • Inspektorët e tregut përplasin Hajdarin me opozitën

    Inspektorët e tregut përplasin Hajdarin me opozitën

    Përgatiti: Benita Zeneli

    Si zakonisht para anëtarëve të Komisionit për Ekonomi, Ministrja e Industrisë, Ndërmarrësisë dhe Tregtisë, Rozeta Hajdari, erdhi me 3 përfaqësues. Por, gjatë mbledhjes së të martës, njëri prej tyre u bë i padëshiruar.

    Pa mikrofon, gjatë mbledhjes së komisionit, deputetja e LDK-së, Valentina Bunjaku, dhe deputeti i AAK-së, Pal Lekaj, u panë duke debatuar me këshilltarin e ministres Hajdari, Kushtrim Dakaj, i cili më pas u largua nga salla.

    Për këtë reagoi Hajdari, sipas të cilës këshilltari i saj reagoi ndaj provokimeve që dy deputetët i bënë.

    “A është e lejuar që unë të bullizohem nga deputetët që filluan me sharje më të ulëta, por a more ndonjë masë. Ka qenë bullizim i tërësishëm ndaj personalitetit tim nga deputeti Pal Lekaj dhe deputetja Bunjaku. Ai u indinjua më shumë kur nuk u përdor mikrofoni, por u përdorën fjalët që ky i dëgjoi më afër. Prandaj ishte një reagim i tillë”, tha Hajdari.

    Shkaku i përplasjeve u bë çështja e inspektorëve komunalë që përmes projektligjit të ri, kompetenca për ta do të ketë niveli qendror.

    Në komision, gjithashtu, u fol edhe për Projektligjin për mbrojtjen e konsumatorit.
    Ndërkohë, në rend dite ishte edhe raportimi i ministres lidhur me realizimin e projekteve të ministrisë, për vitin 2023 dhe planet për 2024-tën.

    Por, në mungesë të raportit, raportimi u shty për një mbledhje tjetër.

    Ndërsa gjatë largimit të ministres nga salla, përplasjet rreth këshilltarit të saj me anëtarët e komisionit vazhduan.

    Më shumë detaje i gjeni në Edicionin Qendror të lajmeve në videon më poshtë:

  • Projektligji për kriptovalutat i dorëzohet Qeverisë

    Projektligji për kriptovalutat i dorëzohet Qeverisë

    Përgatiti: Haris Ademi

    Mbi dy vjet e gjysmë iu desh Komisionit parlamentar për Ekonomi, ta hartojë Projektligjin për Kriptovaluta.

    Nisma që pritet ta rregullojë përdorimin dhe qarkullimin e monedhës digjitale në Kosovë, i është dërguar qeverisë për mendim, javën e kaluar. Nga ekzekutivi thanë për ATV-në se do ta shqyrtojnë draftin në njërën nga mbledhjet e radhës.

    Udhëheqësja e grupit punues për këtë projektligj, Mimoza Kusari-Lila, thotë se vonesat kanë ndodhur për shkak të agjendës së ngjeshur legjislative në Kuvend.

    Ajo thotë se dokumenti tashmë i shkruar, tenton ta shtrijë kontrollin në këtë veprimtari të re, me fokus parandalimin e pastrimit të parasë.

    “Parasheh licencimin dhe autorizimin e agjentëve që veprojnë në emër të klientëve, veprimin e aktivitetit ekonomik të kriptoaseteve, si dhe rregullat shumë strikte të përcaktimit të procesit të gërmimit apo miningut”, tha Kusari-Lila.
    Kosova nuk ka infrastrukturë ligjore për kriptovalutat. Prandaj kryetari i Komisionit, Ferat Shala, nga Partia Demokratike, thotë se nuk ka qenë i thjeshtë hartimi i projektligjit.

    Për këtë, janë angazhuar edhe ekspertë ndërkombëtarë.

    “Ka qenë edhe ligj specifik, që e rregullon një fushë për herë të parë, dhe ka pasur mëdyshje si të rregullohet kjo veprimtari”, tha Shala.

    Optimist për këtë nismë nuk është eksperti i kriptovalutave, Granit Kadolli, që ka marrë pjesë në disa prej debateve publike për këtë çështje.

    “Nuk i kanë cekë disa gjëra teknike, kush e merr përgjegjësinë, banka apo kartelat, nuk e kanë cekë tokenizimin”, tha Kadolli.

    Nuk ka shifra të sakta sa persona mihin apo tregtojnë me kriptovaluta në Kosovë. Mirëpo, Kadolli thotë se kjo veprimtari ka trend të rritjes.

    Administrata Tatimore e Kosovës ka bërë disa herë thirrje që të paguhet tatimi në fitim deri në 10%. Por nuk ktheu përgjigje të martën sa ka mbledhur taksa nga ky sektor.

    Monedha më e famshme digjitale është Bitcoin, që aktualisht i është rritur vlera në rreth 60 mijë euro.

    Më shumë detaje i gjeni në Edicionin Qendror të lajmeve në videon më poshtë:

  • Mbi 9 milionë euro për 481 vetura me qira, tenderi i AQP-së

    Mbi 9 milionë euro për 481 vetura me qira, tenderi i AQP-së

    Përgatiti: Arton Hamiti

    Më shumë se 9 milionë euro pritet t’i shpenzojnë institucionet qendrore, lokale dhe të tjera publike për vetura me qira deri në vitin 2029.

    Gjithsej 34 autoritete kontraktuese kanë kërkuar nga Agjencia Qendrore e Prokurimit të nisë procedurat në mënyrë që për pesë vitet e ardhshme, trupat inspektuese t’i kenë në dispozicion 481 vetura, të 6 modeleve.

    Në mesin e institucioneve që kërkojnë më shumë vetura, prijnë Ministria e Shëndetësisë dhe ajo e Infrastrukturës me 69 automjete, respektivisht 59.
    Prej komunave, kryeson kryeqyteti që ka kërkuar 35 sosh.

    Bazuar në vlerën parashikuar të tenderit i bie që qiraja për secilën veturën të jetë rreth 18 mijë e 800 euro. Për një ish-ministre të Financave është më e drejtë që veturat të blihen në mënyrë që ato të mbesin pronë e përhershme e institucioneve.

    “Kur kam pa karakteristikat e veturave të cilat janë kërkuar dhe duke parë një buxhet mbi 9 milionë euro, unë kam besuar thellë se me ato mjete mund të blihen rreth 400 vetura të reja, të cilat do të mbeteshin pronë e institucionit”, tha kryesuesja e Komisionit për Mbikëqyrjen e Financave, Hykmete Bajrami.

    Nëse çmimi mesatar i një veture të re llogaritet të jetë 20 mijë euro, atëherë me 9 milionë e 66 mijë, mund të blihen 453 vetura të reja.

    Andaj, për kryesuesen e Komisionit për Mbikëqyrje të Financave, kjo mund të jetë keqpërdorim i parasë publike.

    Sipas specifikave në dosje të tenderit, veturat duhet të jenë të prodhuara në vitin 2023 ose 2024. Katër nga modelet e përshkruara janë vetura të vogla, ndërsa dy të tjera SUV që ndryshe njihen si Xhip.

    Ndërkohë, afati për dorëzimin e ofertave për tenderin 9 milionësh, i paraparë të mbyllet sot, është shtyrë për 12 prill.

    Më shumë detaje i gjeni në Edicionin Qendror të lajmeve në videon më poshtë:

  • “Projekti 5000” i Serbisë

    “Projekti 5000” i Serbisë

    Përgatiti: Armand Hoti

    Rekrutimet ende po vazhdojnë.

    Vetëm 250 kandidatë, në klasën e parë të vitit 2023, kaluan trajnimet për t’u bërë pjesë e Njësisë Speciale ushtarake më të madhe në Ballkan, që fqinji verior i Kosovës synon ta krijojë deri në fund të vitit aktual.

    Kjo njësi pritet të numërojë një personel prej gjithsej pesë mijë anëtarësh. Andaj autoritetet serbe e kanë quajtur këtë nismë “Projekti 5000”.

    “Sipas raportimit, presidenti Vucic po kërkon rritje të numrit të personelit të forcave speciale nga 1500 në 5000, nën të ashtuquajturin emërtim ‘Projekti 5000’’. Arsyeja e kësaj iniciative gjoja qëndron në sfidat dhe kërcënimet e perceptuara nga Qeveria e Serbisë, e cila, sipas saj, thekson nevojën për kapacitete të zgjeruara në kryerjen e operacioneve speciale, në një spektër më të gjerë operativ dhe strategjik. Me një ritëm të tillë, ‘Projekti 5000’ me shumë mundësi nuk do t’i përmbushë objektivat e tij, deri në afatin e caktuar – fundi i vitit 2024”, thuhet në raportin i QKSS-së.

    Referuar raportit të Qendrës Kosovare për Studimet të Sigurisë, që adreson këtë çështje, implementimi i “Projektit 5000”, mund të rezultojë me mobilizim për furnizim me armatim të vendeve fqinje.

    “Këto zhvillime mund të kontribuojnë në një dilemë sigurie në Ballkanin Perëndimor, ku vendet fqinje mund të ndihen të detyruara të forcojnë aftësitë e tyre ushtarake si përgjigje, duke çuar potencialisht në një garë armatimi dhe tensione në rritje. Gara e armatimit midis Serbisë dhe Kroacisë – për shumëkënd – tashmë kjo po ndodh”, thuhet më tej në raportin i QKSS-së.

    Andaj Qendra Kosovare për Studime të Sigurisë, në raport ka paraqitur edhe disa rekomandime për Qeverinë e Kosovës.

    “Qeveria duhet të investojë më shumë në institucionet e inteligjencës dhe të zhvillojë aftësi të reja të mbledhjes së informatave për të ofruar paralajmërim të hershëm. Agjencia e Inteligjencës e Kosovës dhe Policia e Kosovës duhet të shtojnë mjetet dhe sensorët për të monitoruar situatën në veri të Kosovës, ndërsa policia kufitare duhet të rrisë prezencën dhe patrullimet e saj përgjatë kufirit me Serbinë. (ZBULIM) Qeveria duhet të rrisë bashkëpunimin me partnerët strategjikë në shkëmbimin e informacionit (ZBULIM)”, thuhet në raportin i QKSS-së.

    Sipas të dhënave të Agjencisë Qendrore të Inteligjencës Amerikane, në vitin 2023 Forcat e Armatosura të Serbisë përbëheshin nga gjithsej 25 mijë trupa aktive.

    Më shumë detaje i gjeni në Edicionin Qendror të lajmeve në videon më poshtë:

  • Aplikimi i Kosovës për anëtarësim në BE pa progres

    Aplikimi i Kosovës për anëtarësim në BE pa progres

    Përgatiti: Armand Hoti

    Aplikimi i Kosovës për anëtarësim në Bashkimin Evropian, nuk po shënon progres.

    Komisioneri për Fqinjësi dhe Zgjerim i BE-së, Oliver Varhelyi, tha se vazhdimi i aplikimit të Kosovës drejt anëtarësimit në union, po pengohet nga zhvillimet në vend.

    Specifikisht, Komisioneri Varhelyi, përmendi vendimin e Bankës Qendrore, që lejon euron si valutë të vetme për kryerjen e pagesave në territorin e Kosovës.

    “Fatkeqësisht ngjarjet e fundit në Kosovë nuk e bënë fare të lehtë për Këshillin Evropian, që t’ia besojë detyrën te Komisioni që ta vlerësojë aplikimin e Kosovës. Ne kemi thënë shumëherë që kurdo që Këshilli ia beson Komisionit ta japë opinionin e tij në këtë aplikim, ne jemi gati të bëjmë këtë. Por ne po e shohim shumë qartë se në vend të deeskalimit, ne po shohim shfaqjen e elementeve të reja të eskalimit në atë vend. I fundit është vendimi i Bankës Qendrore, që ndalon një valutë të huaj”, tha Varhelyi.

    Vendin në ulësen e vendit anëtar në BE, shumë më shpejt pritet ta sigurojë Shqipëria, meqë sipas Komisionerit Varhelyi, tashmë i ka përmbushur gjithë çka i është kërkuar.

    “Komisioni Evropian ka disa muaj që pret vendimin e shteteve anëtare për hapjen e negociatave. Duhet të hiqet bllokimi nga një shtet anëtar. Ne duhet ta mbajmë premtimin, sepse Shqipëria i ka realizuar të gjitha kushtet. Para zgjedhjeve evropiane duhet të mbahet konferenca e dytë ndërqeveritare. Të nisë shqyrtimi i kapitullit të parë për të drejtat themelore dhe të vijojmë më tej”, tha Varhelyi.

    Ndërkaq, diplomati evropian tha se përparime për hapjen e negociatave për anëtarësim po shënon edhe Serbia, ndonëse pati vërejtje.

    “Megjithatë, gjërat nuk shkuan më lehtë në Serbi kur organizoheshin konferenca të reja ndërqeveritare për anëtarësimin dhe mendoj se kjo është për shkak të ndikimit të agresionit rus në Ukrainë. Por ne vërejmë përparim edhe në terren, prandaj i qëndrojmë propozimit tonë për hapjen e grupit të ardhshëm të negociatave”, tha Varhelyi.

    Kosova ka aplikuar për anëtarësim në Bashkimin Evropian, në dhjetor të vitit 2022.

    Më shumë detaje i gjeni në Edicionin Qendror të lajmeve në videon më poshtë:

  • Kurti: S’pranohen propozimet që janë në kundërshtim me rregulloren e BQK-së

    Kurti: S’pranohen propozimet që janë në kundërshtim me rregulloren e BQK-së

    Përgatiti: Krenare Mulliqi

    Pavarësisht presionit nga ndërkombëtarët dhe propozime që mund t’i marrë, Kryeministri Albin Kurti ka potencuar se nuk do të pranohet asnjë propozim që është në kundërshtim me rregulloren e Bankës Qendrore të Kosovës.

    I pari i ekzekutivit për Radio Evropën e Lirë dha një opsion që, sipas tij, mund të zgjidhë këtë çështje.

    “Serbia e ka shansin unik që guvernatori i Bankës Popullore të Serbisë t’i përgjigjet, Ahmet Ismaili – dhe në këtë mënyrë dy bankat qendrore ta rregullojnë çdo paqartësi. Pra, njëra ndër opsionet për zgjidhjen e kësaj çështjeje, për të cilën janë të njoftuar edhe partnerët ndërkombëtarë, është që më në fund guvernatori Ismaili të marrë letrën e përgjigjes”, tha Kurti.

    Kurti tha se shqetësimi i Beogradit nuk është për qytetarët serbë që jetojnë në komunat veriore, po pamundësia për të futur dinarë në Kosovë.

    Ndërkaq, për dialogun me Serbinë, i pari i Qeverisë tha se procesi ka ngecur te shkeljet që ia bën Serbia marrëveshjes.

    “Së paku tetë nga 11 nenet e Marrëveshjes Bazike, Serbia i ka shkelur. Dhe, kjo ka kulmuar me letrën e ish-kryeministres Ana Bërnabiq, e cila tash do të jetë kryetare e Parlamentit të Serbisë, ku ajo thotë se praktikisht tërhiqen nga Marrëveshja Bazike dhe nga aneksi i zbatimit [i arritur] në Ohër”, tha Kurti.
    Për draft-statutin për asociacionin Kurti tha se janë duke punuar në atë drejtim.

    “Mua po më thuhet që marrëveshjen duhet ta bëjmë me Beogradin zyrtar dhe unë po angazhohem për këtë. Por, ajo që nuk duhet ta bëjë askush, është që draft-statutin e Asociacionit ta nxjerrë nga paketa, sepse në atë mënyrë i bëhet shërbim Serbisë”, tha Kurti.

    Ndërsa, duke folur për çështjen e tokave rreth Manastirit të Deçanit, ai thotë se ka përfunduar gjithçka dhe, sipas tij, Kosova e ka rastin unik që në pranverë të anëtarësohet në Këshillin e Evropës.

    Më shumë detaje i gjeni në Edicionin Qendror të lajmeve në videon më poshtë: