Category: Lajme

Të paktën nëntë persona kanë humbur jetën si pasojë e sulmeve izraelite të kryera gjatë natës në Qytetin e Gazës, në një kohë kur tensionet në Lindjen e Mesme vazhdojnë të mbeten të larta pavarësisht armëpushimit të arritur mes Izraelit dhe Hamasit muaj më parë.

Spitali Shifa – i cili funksionon vetëm pjesërisht pas dëmtimeve të mëdha të shkaktuara gjatë luftës së Izraelit kundër Hamasit – tha se viktimat u vranë në të paktën katër sulme të ndryshme.

Nuk dihet ende numri i të plagosurve, ndërsa ushtria izraelite nuk ka komentuar deri tani për sulmet.

Që nga arritja e armëpushimit mes Hamasit dhe Izraelit në tetorin e kaluar, ushtria izraelite ka vazhduar sulmet.

Sipas Ministrisë së Shëndetësisë në Gaza, që nga ajo kohë janë vrarë 936 palestinezë. Këto shifra nuk bëjnë dallim mes civilëve dhe luftëtarëve.

Gjatë së njëjtës periudhë, sipas ushtrisë izraelite, janë vrarë katër ushtarë izraelitë.

Sipas autoriteteve shëndetësore në Gaza, më shumë se 72 mijë persona janë vrarë që nga fillimi i luftës, shumica prej tyre civilë.

Izraeli pretendon se merr masa të jashtëzakonshme për të shmangur viktimat civile.

Nga ana tjetër, Hamasi vrau 1,200 persona dhe mori peng 251 shtetas izraelitë dhe të huaj gjatë sulmeve të 7 tetorit 2023 ndaj Izraelit, sipas autoriteteve izraelite.

Njëmbëdhjetë persona janë arrestuar gjatë një aksioni policor të zhvilluar në fshatin Pozheran të Vitisë, nën dyshimin për përfshirje në organizimin e bixhozit të kundërligjshëm.

Sipas Policisë, hetuesit e Stacionit Policor në Viti, pas pranimit të informatave relevante dhe zhvillimit të veprimeve hetimore në koordinim me Prokurorin e Shtetit, kanë realizuar një bastisje më 4 qershor 2026 në një lokacion ku dyshohej se zhvillohej veprimtari e paligjshme.

“Më 04.06.2026 janë realizuar një bastisje në një lokacion në fshatin Pozheran, komuna e Vitisë, nën dyshimin se në këtë lokacion po zhvillohej veprimtari e kundërligjshme që ndërlidhet me veprën penale ‘Organizimi i skemave piramidale dhe bixhozit të kundërligjshëm’”, thuhet në njoftim.

Gjatë aksionit policor janë arrestuar 11 persona të dyshuar.

“Gjatë bastisjes janë arrestuar njëmbëdhjetë persona të dyshuar. Po ashtu në vendin e ngjarjes janë sekuestruar prova materiale që ndërlidhen me veprën penale të lartcekur, të cilat do të shërbejnë si dëshmi në procedurën penale”, njofton Policia.

Me vendim të Prokurorit të Shtetit, rasti është proceduar në Prokurorinë Themelore në Gjilan për procedurë të rregullt gjyqësore. /Telegrafi/

Çmimet e pronave të banimit në tremujorin e parë të vitit 2026 janë rritur për 5.3 për qind krahasuar me tremujorin e parë të vitit të kaluar, sipas Indeksit të Çmimeve të Pronave të Banimit (IÇPB) të publikuar nga Agjencia e Statistikave të Kosovës (ASK).

Ndërkaq, krahasuar me tremujorin e katërt të vitit 2025 çmimet e pronave të banimit shënuan rritje prej 2.4 për qind.

Sipas ASK-së në rajonin e Prishtinës, çmimet e pronave të banimit u rritën me 1.4 për qind në tremujorin e parë të vitit 2026, krahasuar me tremujorin e parë të vitit 2025.

Ndërsa në rajonet e tjera të vendit, çmimet e pronave të banimit u rritën për 12.3 për qind në tremujorin e parë 2026, krahasuar me tremujorin e parë 2025.

Besian Mustafa, kandidati për deputet i LDK-së dhe djali i veprimtarit të LDK’së, Xhemail Mustafa, ka njoftuar se ka vdekur nëna e tij.

Mustafa ka shkruar se ajo do të varroset të premten pasdite në varrezat e Arbërisë në Prishtinë.

Njoftimi i plotë:

Të dashur miq e familjar,

Sot ndërroi jetë nana, ma i dashtuni shpirt n’këtë botë.

Varrim bëhet nesër në 16:40 në varrezat në Arbëri, Prishtinë.

Sa të kam frymë kam me të kujtu Nanë

Presidenti i Francës, Emanuel Macron, ka arritur në Mal të Zi për Samitin BE-Ballkan Perëndimor që do të mbahet me 5 qershor.

Macron është pritur në aeroport nga kryeministri Jakov Mijatovic.

“Kjo është një vizitë me rëndësi të madhe politike dhe simbolike dhe përfaqëson një konfirmim të miqësisë midis Malit të Zi dhe Francës, por edhe mbështetje për rrugën evropiane të vendit tonë”, ka shkruar ai.

“Mali i Zi ka një detyrë për të përfunduar punën. Institucionet duhet të jenë të forta, reformat konkrete dhe qytetarët duhet të ndiejnë se e ardhmja evropiane nuk është një mesazh i largët politik, por një rrugë drejt një shteti më të rregullt, të drejtë dhe të fortë”, ka shtuar Mijatovic.

Katër persona kanë humbur jetën pasi një aeroplan u rrëzua pranë Medulinit në Kroaci.

Policia e Istrias mori një raport për një rrëzim të një aeroplani të vogël në zonën e Medulinit në orën 11:25 të paradites.

“Më 4 qershor, në orën 11:18 të paradites, u mor një raport për rrëzimin e një avioni të vogël në zonën e Campanož (pranë aeroportit Medulin). Raporti është konfirmuar, të gjitha shërbimet e emergjencës (policia, ambulanca dhe zjarrfikësit) janë në vendngjarje dhe po marrin masa dhe veprime brenda juridiksionit të tyre”, njoftoi policia.

Katër persona vdiqën, ndërsa, sipas informacioneve jozyrtare, dy persona janë ende në kërkim. Sipas informacioneve jozyrtare, ata janë shtetas të huaj.

Policia e Rajonit të Prishtinës, respektivisht hetuesit e Njësisë së Hetimeve të Përgjithshme (NjHP) në Prishtinë, kanë arrestuar një person të dyshuar për shtytje në zjarrvënie.

Rasti ka ndodhur më datë 16.11.2025, në rrugën “Nezir Gashi” në Prishtinë,  ku është djegur një automjet dhe janë shkaktuar dëme të konsiderueshme nga zjarri.

Lidhur me këtë rast, sot nga hetuesit policorë të NjHP-së është arrestuar i dyshuari i dytë:

• B.H, 37 vjeç, mashkull, i cili është ndaluar në pikën kufitare në Jarinjë.

Personi i arrestuar, me vendim të prokurorit të shtetit, është dërguar në qendrën e mbajtjes për 48 orë.

Ministri në detyrë i Financave Hekuran Murati ka njoftuar se është hapur aplikimi për certifikim të ofruesve të arkave fiskale digjitale.

Murati përmes një postimi në profilin e tij në rrjetin social Facebook, ka publikuar edhe linkun ku mund të aplikohet.

Postimi i tij:

Hapet aplikimi për certifikim të ofruesve të arkave fiskale digjitale!

Të gjithë operatorët ekonomikë që janë të interesuar të aplikojnë si ofrues të arkave fiskale digjitale për bizneset (SEF), mund të aplikojnë për t’u certifikuar në linkun në vijim https://apps.atk-ks.org/sefaplikimi/

Gjykata Supreme e Kosovës ka reaguar ndaj raportimeve të fundit në media, duke sqaruar se vendimi i fundit i Gjykatës Kushtetuese nuk ka të bëjë me aktgjykimin e saj për liberalizimin e tregut të energjisë elektrike dhe kërkesëpadinë e Odës Ekonomike të Kosovës (OEK).

Përmes një komunikate, Supremeja thekson se pretendimet se “Gjykata Kushtetuese ka rrëzuar vendimin e Gjykatës Supreme për tregun e lirë të energjisë” janë të pasakta. Sipas saj, vendimi i Kushtetueses i referohet një aktvendimi tjetër të Gjykatës Supreme, me të cilin ishte hedhur poshtë si e palejueshme një padi administrative e një paditësi tjetër.

“Vendimi i Gjykatës Kushtetuese nuk i referohet aktgjykimit P.A.nr.18/2025, me të cilin ishte aprovuar padia administrative e Odës Ekonomike të Kosovës kundër Zyrës së Rregullatorit për Energji (ZRRE)”, thuhet në sqarimin e Gjykatës Supreme.

Institucioni gjyqësor rikujton se aktgjykimi P.A.nr.18/2025 mbetet në fuqi dhe paraqet një çështje të veçantë, e cila nuk është objekt i vendimit të fundit të Kushtetueses.

Postimi i plotë:

Sqarim lidhur me vendimin e Gjykatës Kushtetuese për kthimin në rishqyrtim të vendimit të Gjykatës Supreme për tregun e lirë të energjisë elektrike

Prishtinë, 4 qershor 2026 – Gjykata Supreme e Kosovës informon opinionin publik se raportimet sipas të cilave “Gjykata Kushtetuese ka rrëzuar vendimin e Gjykatës Supreme për tregun e lirë të energjisë dhe e ka kthyer çështjen në rishqyrtim”, nuk i referohen aktgjykimit të Gjykatës Supreme me të cilin ishte aprovuar padia administrative e Odës Ekonomike të Kosovës (OEK) lidhur me liberalizimin e tregut të energjisë elektrike.

Për sqarim, vendimi i Gjykatës Kushtetuese ka të bëjë me një aktvendim tjetër të Gjykatës Supreme, përmes të cilit ishte hedhur poshtë si e palejueshme padia e një paditësi, me arsyetimin se akti i kontestuar nuk përmbante elementet e një akti nënligjor normativ dhe, rrjedhimisht, nuk ishin plotësuar kushtet ligjore për shqyrtimin e tij në procedurë administrative.

Linku i aktvendimit të kthyer në rivendosje:

Ndërkaq, aktgjykimi i Gjykatës Supreme P.A.nr.18/2025, i cili ka të bëjë me kërkesëpadinë e Odës Ekonomike të Kosovës kundër Zyrës së Rregullatorit për Energji (ZRRE), mbetet një çështje e veçantë dhe nuk është objekt i vendimit të Gjykatës Kushtetuese për të cilin po raportohet.

Me këtë aktgjykim, Gjykata Supreme kishte aprovuar si të bazuar kërkesëpadinë e OEK-së dhe kishte:

shpallur të paligjshëm dhe shfuqizuar nenin 8 të Udhëzuesit për Liberalizimin e Tregut të Energjisë Elektrike, të datës 18 janar 2017;

shpallur të paligjshëm dhe shfuqizuar nenin 2 të Udhëzuesit për Ndryshimin dhe Plotësimin e Udhëzuesit për Liberalizimin e Tregut të Energjisë Elektrike në Kosovë.

Linku i aktgjykimit:

Në arsyetimin e këtij aktgjykimi, Gjykata Supreme kishte konstatuar se mospërputhjet ndërmjet dispozitave ligjore dhe dispozitave të akteve nënligjore normative kishin krijuar pasiguri juridike dhe ekonomike për konsumatorët e energjisë elektrike. Sipas vlerësimit të gjykatës, kjo situatë e bënte të domosdoshme ndërhyrjen gjyqësore për interpretim të unifikuar të normave dhe për mbrojtjen e parimit të sigurisë juridike, si dhe të trajtimit të barabartë në tregun e energjisë elektrike.

Për hir të informimit të drejtë, të saktë dhe të plotë të opinionit publik, ju ftojmë që ta publikoni këtë sqarim.