Category: Lajme

Ditën e sotme parashikohet të mbajë mot me diell dhe vranësira.

Gjatë orëve të pasdites, pritet të ketë rrebeshe të izoluara shiu, kryesisht në zonën perëndimore, veriperëndimore dhe atë veriore, duke mos përjashtuar mundësinë edhe për ndonjë vetëtimë dhe bubullimë, njofton Meteo Kosova.

Era do fryjë nga jugperëndimi, e cila kohë pas kohe mund të jetë e fuqishme, sidomos në regjionin e Gjakovës, me shpejtësi prej 10-42 km/h.

Temperaturat minimale do të lëvizin prej 8 deri në 11°C, ndërsa ato maksimale prej 22 deri në 26°C.

Rusia – e zemëruar nga ato që i cilëson si “deklarata provokuese” nga Perëndimi – tha se planifikon të kryejë stërvitje ushtarake, për të vlerësuar gatishmërinë e saj për të përdorur armë taktike bërthamore.

Që kur nisi pushtimin në shkallë të plotë të Ukrainës, në shkurt të vitit 2022, marrëdhëniet e Rusisë me Perëndimin ranë në nivelin më të ulët të mundshëm që nga fundi i Luftës së Ftohtë.

Kjo, pasi aleatët perëndimorë të Ukrainës mbështetën luftën e saj kundër forcave pushtuese ruse, duke e ndihmuar me armatim dhe logjistikë.

Kjo është hera e parë që Ministria e Mbrojtjes e Rusisë shpall publikisht stërvitje, të cilat përfshijnë armë bërthamore taktike.

Njoftimi erdhi pasi Britania dhe Franca bënë disa deklarata që dukej se tregonin përfshirjen më të madhe të tyre në konfliktin më shumë se 2-vjeçar.

“Për të rritur gatishmërinë e forcave bërthamore jostrategjike, me qëllim kryerjen e misioneve luftarake, Shtabi i Përgjithshëm ka filluar përgatitjet për mbajtjen e stërvitjeve në një të ardhme të afërt”, tha Ministria e Mbrojtjes e Rusisë përmes një deklarate të shpërndarë në aplikacionin Telegram.

“Gjatë stërvitjes do të kryhen një sërë aktivitetesh për të praktikuar përgatitjen dhe përdorimin e armëve bërthamore jostrategjike”, thuhet në deklaratë.

Aty theksohet, po ashtu, se stërvitja është urdhëruar nga presidenti Vladimir Putin.

Roli i armëve bërthamore strategjike është t’i godasin objektivat e armikut larg vijës së frontit, ndërsa armët bërthamore taktike janë krijuar për t’u përdorur në fushat e betejës.

Rusia ka arsenalin më të madh të armëve bërthamore në botë.

Stërvitja ka për qëllim t’i rrisë aftësitë e ushtrisë ruse “për të siguruar integritetin territorial dhe sovranitetin e shtetit rus”, në përgjigje të “deklaratave provokuese dhe të kërcënimeve të zyrtarëve perëndimorë ndaj Federatës Ruse”, thuhet në deklaratë, pa u dhënë detaje të tjera.

Javën e kaluar, presidenti i Francës, Emmanuel Macron, përsëriti deklaratën se vendi i tij nuk mund ta përjashtojë dërgimin e trupave në Ukrainë, për ta ndihmuar atë në luftë.

Zyrtarët në Mbretërinë e Bashkuar, ndërkohë, u duk se i dhanë Kievit dritën jeshile për të përdorur armë me rreze të gjatë veprimi – të dërguara në Ukrainë – për të goditur objektiva brenda Rusisë.

Deri më tani në konflikt, Britania e Madhe i ka dhënë udhëzime Ukrainës, duke i sugjeruar që armët me rreze të gjatë të përdoren vetëm brenda territorit sovran të Ukrainës.

Në fundjavë, zëdhënësja e Ministrisë së Jashtme ruse, Maria Zakharova, tha se “NATO-ja po përgatitet për një konflikt të mundshëm” me Rusinë dhe përmendi stërvitjet e aleancës ushtarake Steadfast Defender si “dëshmi” për këtë.

Këto stërvitje që do të vazhdojnë edhe këtë muaj, përfshijnë mbi 90.000 trupa të NATO-s.

NATO-ja ka thënë se, gjatë tyre, do të praktikohet se si trupat amerikane mund t’i përforcojnë aleatët evropianë në shtetet që janë në kufi me Rusinë dhe në krahun lindor të aleancës, në rast të ndonjë konflikti. /REL

Për tri ditë Policia e Gjakovës ka konfiskuar 70 motoçikleta për shkak të tejkalimit të shpejtësisë dhe kundërvajtjeve tjera.

“Nga data 03.05.2024 deri me datën 05.05.2024, duke marr parasysh numrin e madh të kundërvajtjeve që shkaktojnë drejtuesit e motoçikletave, janë ndërmarr masa preventive dhe ndëshkuese ndaj tyre me ç’rast janë konfiskuar shtatëdhjetë (70) motoçikleta për kundërvajtje të ndryshme si: tejkalim i shpejtësisë, mos vendosja e helmetës mbrojtëse, pa regjistrim dhe pa doganim etj”, thuhet në njoftim.

Njoftimi i plotë:

Drejtoria Rajonale e Policisë në Gjakovë, Njësia Rajonale e Komunikacionit Rrugor është duke vazhduar me aktivitete policore me qëllim zvogëlimin e aksidenteve në përgjithësi si dhe rritjes së sigurisë për të gjithë pjesëmarrësit në trafikun rrugor.

Si rrjedhojë e këtij angazhimi, nga data 03.05.2024 deri me datën 05.05.2024, duke marr parasysh numrin e madh të kundërvajtjeve që shkaktojnë drejtuesit e motoçikletave, janë ndërmarr masa preventive dhe ndëshkuese ndaj tyre me ç’rast janë konfiskuar shtatëdhjetë (70) motoçikleta për kundërvajtje të ndryshme si: tejkalim i shpejtësisë, mos vendosja e helmetës mbrojtëse, pa regjistrim dhe pa doganim etj.

Përveç masave ndëshkuese ndaj motoçiklistëve, gjatë këtyre tri (3) ditëve janë shqiptuar edhe katërqind e dy (402) gjoba të tjera për kundërvajtës të tjerë për: tejkalim të shpejtësisë, tejkalime në vendet e ndaluara, përdorim të telefonit gjatë ngasjes, mos vendosje të rripit të sigurisë dhe kundërvajtje tjera, si dhe janë konfiskuar 11 patentë shoferi.

Njësia Rajonale e Komunikacionit Rrugor në Gjakovë do të vazhdon me marrjen e masave të ndryshme preventive dhe ndëshkuese, gjithmonë me qëllim të ngritjes së sigurisë rrugore dhe parandalimit të aksidenteve, sidomos ato me pasoja të rënda.

Përgatiti: Pranvera Krasniqi

Kurioziteti, kushtet e dobëta ekonomike e familjare po vlerësohen faktorët kryesorë në rritjen e numrit të përdoruesve të drogës në Kosovë.

Në këtë listë, sipas drejtorit të Klinikës së Psikiatrisë në QKUK, Faton Kutllovci, kanë hyrë edhe femra e fëmijë të moshave 10 e 11 vjeç.

“Mund të konstatoj se nga informatat që ne i kemi se shënon rritje numri i femrave që abuzojnë me substanca psikopative e posaçërisht me kokainë dhe është një dukuri që duhet hulumtua”, tha Kutllovci.

Krahas numrit të madh të përdoruesve të drogës, edhe hapësirat e qendrave rehabilituese nuk po mjaftojnë.

Në klinikën e psikiatrisë në QKUK, kanë kërkuar trajtime 35 persona, ndërkohë që klinika posedon vetëm nëntë shtretër.

“Në repart kemi nëntë shtretër, të cilët janë në shërbim të personave që kërkojnë këto shërbime në klinikën tonë dhe në tremujorin e parë diku rreth 35 persona kanë kërkuar ndihmë… Në qoftë se përpara kemi konstatuar që diku mosha kur fillohet me abuzimin me këto substanca ka qenë 14-15 vjeçare, tani është edhe shumë e ulët, kemi pasur raste 10-11 vjeçar”, tha Kutllovci.

Neuropsikiatri Sami Rexhepi thotë se përdorimi i drogave, sidomos marijuanës, ka efekte të shumta negative.

“Marihuana po e zgjon edhe një kod gjenetik që ndoshta është i fjetur dhe po manifestohet edhe çrregullimi psikotik, dhe kur të vjen deri te çrregullimi psikotik, atëherë nuk ka më kthim mbrapa, aty vetëm çka mundet pak me u funksionalizua, por kurrë nuk mundet me u shërua plotësisht… Përdorimi i drogave apo hyrja në varshmëri prej tyre nuk është një portë të cilën e hap dhe hyn, por thjesht rrëshqet aty dhe e kupton shumë më vonë se ke krijuar një varshmëri prej drogave”, tha Rexhepi.

Ndërsa, 2840 persona kanë kërkuar trajtim të thellë në Qendrën “Labirint” e shumë të tjerë nuk janë paraqitur asnjëherë në databazë.

Sipas Policisë së Kosovës, gjatë periudhës janar-mars të këtij viti janë arrestuar për substanca narkotike 159 persona, prej tyre 10 të mitur nga mosha 14-18 vjeç.

Ndërsa, gjatë vitit 2023 janë arrestuar 859 persona, prej të cilëve 74 kanë qenë të mitur.

Përgatiti: Pranvera Krasniqi

Komuna e Prishtinës u desh të sjellë kontejnerë të rinj në lagjen Pejton, pasi dikush ua vuri flakën të vjetërve. Por shenjat e zjarrit kanë mbetur ende këtu.

Ngjashëm kishte ndodhur në lagjen Dardania. Personat, ende të paidentifikuar, veprën e kishin kryer në mes të ditës.

“Shumë jonë tu i djegë, nëse nuk merret diçka na e vuajmë, krejt na bjen fryma erën e tyre…”, tha Shefqet Zogiani, qytetar.

Për sigurinë e banorëve, por edhe që të identifikohen kryerësit, kërkohet vendosja e kamerave të sigurisë.

“Një cigare me gjuajtë duhet të dënohet, mbesin për gjithë, kamera është një lloj sigurimi ku çdo gjë parashihet ndërmerret dhe identifikohet me kohë çfarë kanë bërë…”, tha Gani Sefedini, qytetar.

Aktivistët alarmojnë se këto vepra janë të rrezikshme.

“Kishte mundur me pasë edhe dëme në njerëz, me u kallë banesat përreth…”, tha Luan Hasanaj nga organizata “Let’s do it Kosova”.

Pamjet e tilla nuk po u pëlqejnë as vizitorëve në kryeqytet.

“Ky ka qenë një fenomen që ka ndodhur edhe në Tiranë, pra procesi i qytetërimit nuk është me komanda, mendoj që dalë ngadalë do të hyjmë në fazën e qytetërimit… nëse personat përgjegjës do ishin vendosë para përgjegjësisë publike normal që do të ishte më mirë se sot”, tha Alfred Duka, vizitor.

Lidhur me zjarrvënien në kontejnerë, televizioni ka provuar ta kontaktojë ndonjërin nga zyrtarët komunalë të Prishtinës, por të hënën ishin të paqasshëm.

Në fund të muajit mars, komuna kishte sjellë 366 kontejnerë të rinj dhe i shpërndan në lagjet që ka nevojë.

Përgatiti: Armand Hoti

Si i ri, Luan Haradinaj dëshironte të bëhej boksier.

“Ideja e tij ka qenë që në një të ardhme, në rast se Kosova potencialisht çlirohet pa luftë, me qenë një sportist, një bokser në Kosovë”, tha Daut Haradinaj.
Por, atdheu e donte si luftëtar.

“Dihet fare mirë që pushka e tij është ndier në Serbi”, tha Daut Haradinaj.

Vetëm 20 vjeç, Luan Haradinajt iu besuan detyra të mëdha në radhët e Ushtrisë Çlirimtare të Kosovës. Në këtë moshë, ai u emërua komandant i logjistikës së UÇK-së.

“Angazhimi i Luanit ka qenë komplet për çlirimin e vendit dhe fitoren e lirisë, çlirimin nga pushtuesi serb”, tha Selim Krasniqi, bashkëluftëtar.

Por, më gjashtë maj të vitit 1997, Kosova humbi luanin e saj.

Atë të martë pranvere, ai priu çlirimtarët që po hynin nga Shqipëria në Kosovë, nga fshati Vlahne e Hasit në drejtim të Kuzhinit.

“Kemi rënë në pritë, ka qenë një betejë shumë e pabarabartë dhe kemi rënë befasisht siç janë pritat dhe ka qenë një emocion i jashtëzakonshëm, ka qenë një dhimbje e jashtëzakonshme për neve rënia e Luanit”, tha Krasniqi.

Në 27-vjetorin e rënies së Luanit, kulla e Haradinajve në Gllogjan hapi dyert për homazhe në kompleksin memorial.

Në mesin e mysafirëve ushtarakë e politikanë, qe edhe kreu i Bashkimit Demokratik për Integrim, Ali Ahmeti, i cili ishte pjesë e grupit të ushtarëve në ditën kur Luani u vra.

Në nderim të rënies heroike të tij, akademi përkujtimore u organizua edhe në Pejë.

Ndërkaq, vepra e Luan Haradinajt u kujtua edhe nga udhëheqësit e shtetit.