Category: Lajme

Ministri i Mbrojtjes, Ejup Maqedonci, ka njoftuar se në kuadër të forumit “Defence 24 Days” është takuar me homologun polak, Władysław Kosiniak- Kamysz.

Ai ka thënë se e ka njoftuar ministrin polak rreth situatës së sigurisë në Kosovë dhe rajon. Maqedonci i ka treguar edhe për 48 bazat e ushtrisë serbe të vendosura përgjatë vijës kufitare me Kosovën.

“Ministrin Kamysz e informova rreth situatës së sigurisë në vend dhe rajon, gjersa shpreha dhe shqetësimin tim për militarizimin e Serbisë dhe 48 bazat e ushtrisë dhe gjandarmërisë serbe të vendosura përgjatë vijës kufitare me Kosovën, e gjithashtu dyshimin e bazuar me rastin e sulmit në Banjskë që grupet terroriste po mbështeten nga strukturat e sigurisë të shtetit të Serbisë me qëllim për të shkaktuar destabilizimin e Kosovës dhe Ballkanit në përgjithësi.”

Maqedonci ka thënë se Kosova do të vazhdojë të ofrojë mbështetje për Ukrainën.

“Duke qenë të vetëdijshëm se lufta në Ukrainë kërcënon sigurinë e përgjithshme të Evropës, theksova që Kosova do të vazhdoj të ofroj mbështetjen e pakursyer për Ukrainën brenda kapaciteteve tona shtetërore.”

Ministri i Mbrojtjes ka shkruar se me ministrin polak janë dakorduar për vendosje të bashkëpunim në fushën e mbrojtjes mes dy shteteve.

“U dakorduam që është tejet e rëndësishme të vendosim bashkëpunim në fushën e mbrojtjes ndërmjet Kosovës dhe Polonisë.”

Ministri i Mjedisit, Planifikimit Hapësinor, Liburn Aliu, ka kujtuar heroin e kombit, Luan Haradinaj në 27-vjetorin e rënies së tij.

Përmes një postimi në Facebook, Aliu ka shkruar dy vargje të këngës së këngëtarit, Iir Shaqiri, dedikuar për heroin Luan Haradinaj.

“Lavdi lajmëtarit të lirisë, heroit të kombit, Luan Haradinaj”, ka thënë ndër tjera ai.

Postimi i plotë:

…Edhe Uragani ka nja cak pushimi,

n’rrenze të një Shkëmbi, ku bën gjumin Trimi.”

Lavdi lajmëtarit të lirisë, heroit të kombit, Luan Haradinaj!

Gjergj Kastrioti hyri në histori si një nga gjeneralët më të mëdhenj të kohës, një strateg i shquar i luftimeve dhe i diplomacisë së kohës dhe sot duhet të kemi model diplomacinë e tij, të kemi më shumë miq, më shumë vetëdije qytetare e kombëtare, në interes të shtetit e kombit, paqes, dinjitetit dhe të lirisë për të vetëqeverisur si një shoqëri me një mendësi të qytetëruar.

Kështu u tha në simpoziumin shkencor i cili është mbajtur në Institutin Albanologjik në Prishtinë, e ku u lexuan kumtesa nga studiues të ndryshëm mbi gjetjet e reja për Gjergj Kastriotin. Aty u kërkua nga institucionet e Shqipërisë dhe Kosovës që ta hartojnë një ligj të veçantë për heroin tonë kombëtar, Gjergj Kastriotin, raporton KP.

Profesori Arbin Xhata, duke vlerësuar lartë veprën e heroit kombëtar, propozojë që 28 tetori të shpallet festë kombëtare.

“Kemi një propozim shumë interesant dhe domethënës nga diaspora, këtu vjen Belisa Jezerci nga simpoziumi dhe organizatori i simpoziumit, propozohet që 28 teori 1458 të shpallet festë kombëtare-shtetërore pasi Gjergj Kastrioti është shpallë mbret i Shqipërisë. Kjo ishte dhe unë me shokët që jemi organizator propozojmë që kjo festë të bëhet sepse për herë të parë Gjergj Kastrioti është shpallë mbret i Shqipërisë”, tha ai.

Drejtori i Institutit Albanologjik, Lulzim Lajçi tha se Gjergj Kastrioti është testamenti i parë i orientimit të shqiptarëve.

“E ndjejë obligim moral dhe intelektual të bëj një apel drejtuar institucioneve më të larta të Republikës së Shqipërisë dhe institucioneve të Kosovës që të nxjerrin një ligj të veçantë për Gjergj Kastriotin Skënderbeun. Ky ligj do të draftohej nga një komision i përbërë nga deputetët e parlamentit të Shqipërisë dhe parlamentit të Kosovës dhe si ligj i përbashkët, pas miratimit në të dy parlamentet do të zbatohej në të dy shtetet shqiptare. Nxjerrja e këtij ligji do të kishte edhe simboliken e vet. Arsyetimi i shkurtër për këtë ligj. Gjergj Kastrioti është kryeheroi jonë kombëtar, burrë shtetasi më i madh politikë e ushtarak në historinë e arbërisë, kryegjenerali i të gjitha kohërave, themelues i shtetit shqiptar dhe i Besëlidhjes Shqiptare në nivel kombëtar. Me emrin e tij lidhet , flamuri i shqiptarëve, uniteti, rezistenca epike shqiptare dhe një epokë e tërë, epoka skenderbejane. Skënderbeu ishte i pari që përpunoi vizionin madhështor, rrugën e Shqipërisë nga do të ecte, nga lindja apo perëndimi. Ai është testamenti i parë i orientimit të shqiptarëve, nga pa vizionin e tij properëndimor ne do të humbasim orientimin, qenien, kështu që do të zhdukeshim në margjinat e historisë apo në konflikte shteruese e të përgjakshme të brendshme”, tha ai.

Vlora Gashi nga Lëvizja e Deçanit, ka thënë se është bekim i madh për kombin që brezë pas brezi të jetë pikë referimi strategun e fuqishëm që erdhi dhe u bë kryeheroi i popullit tonë.

“Për 25 vjet me radhë Gjergj Kastrioti e pengoi, madje e ndaloj ekspazionin osman drejt Evropës, e stopoi perandorinë osmane të depërtonte në zemrën e saj, duke ruajtur e mbrojtur shqiptarët, atdheun dhe qytetërimin modern… Gjergj Kastrioti hyri në histori si një nga gjeneralët më të mëdhenj te kohës, një strateg i shquar i luftimeve dhe i diplomacisë së kohës. Sot duhet të kemi model diplomacinë e tij, të marrim model që të kemi më shumë miq, më shumë vetëdije qytetare e kombëtare, në interes të shtetit e kombit, paqes, të dinjitetit dhe të lirisë për të vetqeverisur si një shoqëri me një mendësi të qytetëruar. Në Kuvendin e Legjës, Gjergj Kastrioti vuri themelet e shtetit të arbërit të mirë organizuar që sot të ndërtojmë një shtet me dinjitet, t’i bashkojmë të gjitha pjesët e mbetura qysh atëherë dhe të mos lejojmë që shërbimet e huaja anti-shqiptare të na ndajnë, të na fyejnë e të na devijojnë nga qenësia e të jetuarit si komb pasardhës arbëror“, tha ajo.

Në këtë simpozium, veprën e heroit e vlerësuan larë edhe shumë studiues të tjerë.

Familjarë të dëshmorëve e qytetarë, që të hënën kishin adhur për homazhe në Kompleksin Memorial të Dëshmorëve në Gllogjan, me rastin e 27-vjetorit e rënies së Heroit të Kombit, Luan Haradinaj, janë shprehur të zhgënjyer me qasjen e institucioneve ndër vite sa i përket trajtimit institucionalë për familjarë të dëshmorëve, veteranëve e invalidëve të luftës, raporton EO.

Ata kanë kërkuar nga institucionet që t’i përkrahin më shumë këtë kategori të shoqërisë, pasi “falë tyre e gëzojmë lirinë e pavarësinë”.

Xhemail Islami, vëllai i dëshmorit Xhavit Islami, ka thënë se është i zhgënjyer nga shteti për mos kujdesin ndaj familjarëve të dëshmoreve.

Ai ka thënë se vëllai i tij dëshmor ka lënë dy fëmijë dhe gjithë këto vite nuk është interesuar askush për gjendjen e tyre.

“Po të mos ishin këta me rënien e tyre nuk do ta gëzonim këtë liri. Jam pak i zhgënjyer pas lufte me përkujdesjen e familjeve të dëshmoreve. Ku mund të them që pak a shumë nuk ka kurrfarë përkujdesje, nuk vjen kush të shikoj. Vëllau ka lënë dy fëmijë, vajzë e djalë. Mund të them se kush nuk ka ardh pas luftë të pyes për ta se si jetojnë, si qëndrojnë ekonomikisht”, ka thënë ai.

Bashkim Kajdomcaj, kryetar i Këshillit për Mbrojtjen e të Drejtave e të Lirive të Njeriut në regjionin e Prizrenit, ka thënë se ndër vite qasja e institucioneve nuk ka qenë e duhura ndaj kësaj kategorie të luftës.

“Mendoj që qasja e institucioneve, pavarësisht kush ka qeverisë me vite të tëra, është dashtë dhe duhet më bërë shumë, më tepër për këta njerëz që kanë dhënë jetën. Mendoj që nuk është bërë dhe nuk po bëhet sa duhet. Kemi pakënaqësitë me pensione të kategorive të ndryshme”, ka thënë ai.

Rusia tha të hënën se filloi përgatitjet për një stërvitje ushtarake që përfshin armët bërthamore jostrategjike të vendit në përgjigje të asaj që i përshkroi si “provokime dhe kërcënime” perëndimore.

Një deklaratë e Ministrisë së Mbrojtjes ruse tha se filluan përgatitjet për mbajtjen e një stërvitje në të ardhmen e afërt me formacionet raketore të qarkut ushtarak jugor të vendit, së bashku me përfshirjen e aviacionit dhe marinës së vendit.

Duke treguar se stërvitja u urdhërua nga Presidenti Vladimir Putin, deklarata tha se synonte “të rrisë gatishmërinë e forcave bërthamore jostrategjike për të kryer misione luftarake”.

“Gjatë stërvitjes do të kryhen një sërë aktivitetesh për të praktikuar përgatitjen dhe përdorimin e armëve bërthamore jostrategjike”, thuhet më tej në deklaratë.

Ai tha gjithashtu se stërvitja synon të sigurojë sovranitetin dhe integritetin territorial të Rusisë “në përgjigje të deklaratave provokuese dhe kërcënimeve nga zyrtarë individualë perëndimorë kundër Federatës Ruse”. (AA)

Janë sekuestruar kamerat e sigurisë së bizneseve që ndodhen përgjatë lumit Buna, aty ku u gjet trupi i 9-vjeçares dhe ku dyshohet se janë mbytur edhe nëna e saj, motra dhe vëllai më i vogël.

Gazetarja Dorjana Bezat raporton se kamerat kanë fiksuar momentin kur Alma Arrazi ishte e ulur në një kafe pranë Bunës, së bashku me vogëlushët, 9, 6 dhe 3 vjeç.

Policia po vijon hetimet për zbardhjen e ngjarjes, ndërsa nga ana tjetër 8 ekipe janë angazhuar në kërkimet në ujërat e Bunës dhe Drinit, për të gjetur trupat e tyre.

Po ashtu është kërkuar dhe ndihma e palës malazeze për të shtrirë kërkimet dhe në ujërat fqinje.

Deri më tani nuk ka asnjë rezultat.

Kryetari i Bashkimit Demokratik për Integrim (BDI), Ali Ahmeti, në një intervistë për Ekonomia Online, ka thënë se ndërhyrjet e spektrit politik të Kosovës në zgjedhjet në Maqedoni të Veriut, nuk janë të mira, sidomos në proceset euroatlantike që po kalon Kosova.

Kreu i BDI-së, duke folur për ndërhyrjet e kryeministrit Albin Kurti në zgjedhje në Maqedoni të Veriut, thekson se ky fakt nuk ndikon në raportet me Kosovën por që kërkon që “të mos lihet një hije e keqe tek popullata në Maqedoni të Veriut”.

Sipas Ahmetit, Kosova duhet t’i ketë miq fqinjët dhe se ndërhyrje të tilla nuk ka pasur asnjëherë.

“Së pari, sa i takon marrëdhënieve Kosovë-Maqedoni e Veriut, ka ndodh ndërhyrje që i bëhet nga këtu, nuk është e mirë sepse Kosovës i duhen miq, në veçanti shtetet fqinje. Fqinjët duhet t’i ketë aleat për proceset e rëndësishme. Maqedonia e Veriut vend anëtare në NATO, është në prag të anëtarësimit në Bashkimin Evropian, është në të gjitha institucionet ndërkombëtare, kurse Kosova sigurisht që është e pikë e dobët, duke filluar nga unë. Këto raporte që ju i theksoni fare nuk do të ndikojnë në raportet ndërshtetërore Kosovë-Maqedoni e Veriut, por e mira është që të mos lihet një hije e keqe tek njerëzit, tek popullata në Maqedoni, sepse asnjëherë nuk ka ndërhyrë as Kosova e as Maqedonia nëpër fushata”, thotë Ahmeti.

Ahmeti thotë se raste të tilla nuk kanë ndodhur asnjëherë, madje as nga Shqipëria. Ndonëse kjo çështje thotë se nuk ka ndikuar në përçarje, Ahmeti thekson se nuk është pritur as me admirim.

“As unë nuk jam involvuar asnjëherë në Kosovë, pavarësisht se unë të gjithë i kam bashkëluftëtarët të angazhuar në partitë politike por asnjë raund nuk kam mbajt anë. As Shqipëria nuk ka mbajt anë në Maqedoni por kjo varet edhe prej qëndrimeve të njerëzve, prej qëndrimeve të drejtueseve. Nuk do të ketë ndonjë pasojë apo diçka e tillë në Maqedoni. Nuk ka ndikuar në përçarje por nuk pritet me admirim kjo ndërhyrje”, u shpreh Ahmeti.

Presidentja e Kosovës, Vjosa Osmani, ka kujtuar heroin e kombit, Luan Haradinaj në 27-vjetorin e rënies së tij.

E para e shtetit ka shkruar se Luani, sikurse edhe familja Haradinaj dhanë shumë për lirinë e Kosovës, “duke u shndërruar në emblemë të lirisë sonë, ndaj do të jenë të nderuar përherë”.

“27-vjet më parë, në një përballje stoike me forcat e regjimit gjenocidal të Serbisë, Luan Haradinaj bie heroikisht, pak para se të vijë liria, të cilën luftëtari i UÇK-së me bashkëluftatarë, e patën ideal dhe amanet nga brezat, ndaj dëshmuan përkushtim, sakrificë dhe guxim. Luani, sikurse edhe familja Haradinaj dhanë shumë për lirinë e Kosovës, duke u shndërruar në emblemë të lirisë sonë, ndaj do të jenë të nderuar përherë. Hero Luani, luftoi për lirinë e Kosovës dhe ra hero në kufirin ndërmjet Kosovës dhe Shqipërisë. Në këtë përvjetor, përkulemi para veprës heroike të Luanit me bashkëluftëtarë të UÇK-së dhe nderojmë të gjithë dëshmorët tanë, të cilët e bën të mundshme lirinë tonë. Qoftë i përhershëm kujtimi për Luanin dhe të gjithë ata që ranë në altarin e lirisë”, ka shkruar Osmani.

Një rast i rëndë ka ndodhur mbrëmë në Fushë Kosovë dhe po cilësohet si “Vrasje e rëndë në tentativë”, pasi një burrë po dyshohet se ka goditur me thikë në kokë një person tjetër. I dyshuari tashmë ndodhet nën masën e ndalimit policor.

Rasti ka ndodhur në banesën e të dyshuarit në rrugën “17 Shkurti”, ku fillimisht e kishte ftuar viktimën, e më pas e ka goditur pasi kishte refuzuar të konsumojë drogë dhe të kryente marrëdhënie seksuale.

Sinjali ka mësuar se sipas informacioneve të para, palët kanë lidhje familjare mes vete, pra janë nip (i dyshuari) e dajë (viktima).

Policia ka njoftuar se viktima që u sulmua me thikë është dërguar në QKUK për trajtim mjekësor, teksa i dyshuari është dërguar në mbajtje për 48 orë.

“Është arrestuar i dyshuari mashkull kosovar, pasi që i njëjti nën ndikim të substancave narkotike, fillimisht e kishte joshur viktimën mashkull kosovar, që të konsumoj substancë narkotike, e pasi viktima kishte refuzuar të konsumoj , i dyshuari e kishte joshur (cytur) që të kryejnë marrëdhënie seksuale kundër dëshirës së tij, dhe pasi edhe kësaj here viktima kishte refuzuar, i dyshuari me një thikë kuzhine, e kishte goditur viktimën në kokë , me ç’rast i shkakton lëndime trupore”.