Category: Lajme

Kosova nuk ka institucion të veçantë për paraburgimin e personave me çrregullime mendore. Institucioni më i ngarkuar është Qendra e Paraburgimit në Prishtinë, për shkak të afërsisë me Gjykatën Themelore në Prishtinë. Kështu thuhet në raportin për vitin 2023 të Qendrës Kosovare për Rehabilitimin e të Mbijetuarve të Torturës. Në bazë të monitorimit të kësaj organizate thuhet se gjatë vitit të kaluar ka pasur rritje të numrit të rasteve të lëndimeve e vetëlëndimeve.

Drejtoresha e Qendrës Kosovare për Rehabilitimin e të Mbijetuarve të Torturës (QKRMT), Feride Rushiti përmendi rastin e parë të kompensimit të dhunimit seksual në burgun e Dubravës në vitin 2014.

“Këtë vit kemi dëshmuar një rast historik të suksesit, ku gjykata për herë të parë e bën përgjegjës institucionet shtetëror për shkeljen e të drejtave të të burgosurve. E kam fjalën për një viktimë, fatkeqësisht të vitit 2014, i cili kishte përjetuar dhunë seksuale brenda burgut të Dubravës dhe që nga ai vit e kemi mbështetur dhe përfaqësuar në procese gjyqësore, por njëkohësisht rasti si i tillë natyrisht që ka qenë traumatizues dhe përveç që është përcjellur në procedura gjyqësore, i është nënshtruar rehabilitimit në organizatë dhe intervenimeve shëndetësore varësisht nga nevoja që i ka paraqitur rasti në fjalë. Në shtator të vitit 2023 Gjykata Themelore në Prishtinë kishte aprovuar pjesërisht kërkesë-padinë e viktimës dhe e detyron Ministrinë e Drejtësisë të jep kompensimin për dëme. Pas plotfuqishmërisë së këtij aktgjykimi Ministria e Drejtësisë e kompenson viktimën, ashtu siç është e paraparë me aktgjykim. Ky është rasti i parë i këtij lloji, ku Gjykata e bën përgjegjës institucionin shtetëror për shkeljen e të drejtave të të burgosurve”, deklaroi Rushiti.

Ky raport i monitorimit, Rushiti shtoi se shërben për gjenerimin e veprimeve konkreteve nga institucionet vendimmarrëse.

Në prezantimin e këtij raporti, Fatmire Haliti nga QKRMT, tha se kanë zhvilluar 19 vizita monitoruese.

“Ne si vend nuk kemi institucione të veçanta për paraburgimin e personave me çrregullime mendore, kështu që ata janë të shpërndarë në të gjitha qendrat e paraburgimit duke i vendosur në situata ndoshta sfiduese vet institucionet korrektuese për trajtimin e këtyre kategorive. Si institucion më i ngarkuar me persona me çrregullime mendore është Qendra e Paraburgimit në Prishtinë, për shkak të afërsisë që ka edhe me Gjykatën Themelore në Prishtinë, e cila është gjykata që e trajton më së shumti raste edhe po ashtu gjendet në afërsi të Institutit të Forenzikës së Kosovës…Në bazë të të dhënave zyrtare të Ministrisë së Shëndetësisë përveç monitorimit që e kemi marrë nga monitorimi i institucioneve korrektuese, shihet që numri i përdoruesve (të substancave narkotike) është në rritje. Përqindja nga 14 që ishte në vitet e kaluara tashmë ka kaluar 16 për qind ”, u shpreh ajo.

Rritje ka pasur edhe të numrit të lëndimeve dhe vetëlëndimeve të të burgosurve në qendrat korrektuese.

“Vërehet që ka tendencë në rritje të rasteve të lëndimeve dhe vetëlëndimeve. Nëse marrim në mënyrë periodike nga viti në vit, prej vitit 2022 në vitin 2023 ka pasur një rritje prej 40 rasteve më tepër, 341 raste janë evidentuar në rastin 2022 të lëndimeve, ndërsa në vitin 2023 kanë qenë 381 raste të lëndimeve. Për këto raste gjatë vizitave monitoruese kur i kemi pyetur të burgosurit na kanë raportuar për mënyra të ndryshme të lëndimeve të cilat ndodhin qoftë përmes konflikteve në mes të burgosurve apo gjatë lëndimeve aksidentale në punë apo shëtitore apo edhe gjatë sportit. E po ashtu ka pasur edhe raste të tilla që janë raportuar që kanë qenë nga përdorimi i forcës fizike prej stafit korrektues. Edhe numri i vetëlëndimeve ka shënuar një rritje, ku nga 125 vetëlëndime që kanë qenë të evidentuara zyrtarisht në vitin 2022, në vitin 2023, Departamenti Shëndetësor i Burgjeve raporton që numri ka qenë 189….Kemi pasur një vetëvrasje në vitin 2023”, shtoi Haliti teksa shtoi se numri i tentim vetëvrasjeve kanë qenë 24 raste.

Trajtimi i personave të privuar nga liria, zëvendësministri i Drejtësisë, Blerim Sallahu tha se është e rregulluar në përputhje me standardet ndërkombëtare të drejtësisë penale dhe të drejtave të njeriut. Ai tha se po punojnë për krijimin e kushteve ligjore që personat e burgosur të trajtohen me dinjitet.

“Kemi punuar në tri ligje bazë për menaxhimin e institucioneve korrektuese, përkatësisht në Ligjin për Ekzekutimin e Sanksioneve Penale, Ligjin për Shërbimin Korrektues dhe Ligjin për Shërbimin Sprovues. Këto ligje i kemi bërë të mundur që të dënuarve të ju njihen disa të drejta shtesë, përkatësisht të ju kthehen disa nga të drejtat që ju ishin hequr me ndryshimet ligjore të bëra nga qeveritë e kaluara…Kemi shtuar aktivitetet për luftimin dhe parandalimin e kontrabandës dhe për raste të kontrabandës kemi suspenduar zyrtarë korrektues dhe zyrtarë të tjerë të përfshirë. Kemi bashkëpunuar me organizata”, deklaroi ai.

Drejtori i Shërbimit Korrektues të Kosovës, Ismail Dibrani theksoi se ka rritje substanciale të buxhetit të Kosovës.

“Ka rritje substanciale të buxhetit nga ajo që nuk ka qenë as afër një milion euro buxheti, sot kemi buxhetin prej tetë milionë euro. Kemi kërkuar mbështetje në pajisje teknologjike më të avancuara, po ashtu edhe në pajisje të sigurisë të cilat do të na mundësonin avancimin tutje edhe përafrimin e standardeve ndërkombëtare….Si asnjëherë më parë vitin e kaluar kemi hapur konkurse, ku janë punësuar dhe janë në proces të punësimit afër 200 oficerë korrektues. Për herë të parë është hapur konkursi vetëm për gra ku janë punësuar 50 gra në institucionet tona korrektuese”, theksoi ai.

Në raportin e QKRMT-të për të drejtat e njeriut në institucionet korrektuese thuhet se të burgosurit e intervistuar u shprehën kryesisht të kënaqur me ushqimin që ju shërbehet. Po ashtu, theksohet se tri vaktet e ushqimit shërbehen nëpër salla të përbashkëta.

Molotovë, tym dhe flakë edhe në protestën e sotme para bashkisë së Tiranës të nga “Aleanca për Teatrin” e mbështetur dhe nga një pjesë e opozitës.

Në sheshin përpara Bashkisë së Tiranës u mblodhën dhjetëra protestues, teksa e pranishme është edhe Argita Malltezi, vajza e ish-Kryeministrit Sali Berisha.

Po ashtu, në shesh ishin dhe nënkryetari i këshillit bashkiak të Tiranës nga radhët e opozitës Dorian Teliti. Po ashtu, në protestë janë dhe përfaqësues të Partisë së Lirisë.

Kjo është protesta e gjashtë e thirrur pas arrestimit me urdhër të SPAK të disa ish-drejtorëve të kësaj bashkie. Protestuesit kërkojnë dorëheqjen e kryebashkiakut Erjon Veliaj, pas arrestimeve të disa ish-zyrtarëve të këtij institucioni.

Në drejtim të bashkisë protestuesit kanë hedhur molotovë, fishekzjarrë dhe tymuese.

Gjatë protestës, në fjalimin e tij, ish-kandidati për kryebashkiak të Tiranës Belind Këlliçi u shpreh se sot ka nënshkruar kallëzim të ri në SPAK ndaj Erion Veliajt.

“Jemi kundër kreut të bandës 5D dhe pronari faktik i inceneratorit. Do mbahet mend si i vetmi kryebashkiak që vuri policinë për të mbrojtur veten. I takon SPAK të ngrihet në lartësinë e detyrës e t’i përgjigjet një drejtësie pa regji”, tha Këlliçi.

“I bëj thirrje SPAK; sot keni damkën e madhe në kurriz, mbi shpatulla të burgosjes, pa asnjë fakt, pa asnjë provë të arrestit të liderit të opozitës”, tha Këlliçi.

Ndërsa Dorian Teliti, nënkryetar i Rithemelimit u shpreh se kjo protestë është pranë fitores së madhe.

“Jemi afër arritjes së objektivit tonë madhor, dorëheqjes përfundimtare të Erion Veliajt dhe më pas, dorëheqjes edhe të kryeministrit të Shqipërisë. Është rezistenca juaj që sot bëri të mundur që Edi Rama të bëjë disa hapa pas. Ai që para disa javëve i jepte mbështetjen e pakushtëzuar Erion Veliajt, sot u distancua nga ai”, tha Teliti.

Sekretari i Përgjithshëm i Partisë së Lirisë, Tedi Blushi iu drejtua protestuesve duke thënë se “ne nuk do ta lejojmë kurrë Erion Veliajn të bëjë gjumin e qetë, deri ditën që do të japë llogari një më një, për të gjitha krimet që i ka bërë qytetarëve të Tiranës, për të gjitha krimet që i ka bërë Tiranës dhe deri ditën kur ai t’ua kthejë ju dhe të gjithë qytetarëve të kryeqytetit edhe qindarkën më të fundit që ka vjedhur nga xhepat tuaj”.

Gjatë protestës, veç molotovit, protestuesit shtynë gardhin e sigurisë të vendosur nga Policia, duke u përpjekur të hyjnë në godinë çka ka sjellë edhe përplasje fizike me forcat e rendit. /atsh/

Vladimir Putin është betuar sot si president i Rusisë në një ceremoni luksoze në Kremlin, duke nisur një mandat të pestë rekord me më shumë pushtet se kurrë më parë.

Shefi 71-vjeçar i Kremlinit ka udhëhequr Rusinë që nga fillimi i shekullit, duke siguruar një mandat të ri gjashtë-vjeçar në mars, pasi fitoi zgjedhjet presidenciale pa çdo kundërshtim, përcjell klankosova.tv.

Zyrtarë qeveritarë dhe diplomatë të huaj në Moskë janë ftuar në ceremoni, përfshirë ambasadorin francez Pierre Levy, i cili pritet të marrë pjesë.

Vende të tjera evropiane, përfshirë Poloninë, Gjermaninë dhe Republikën Çeke, kanë sinjalizuar se nuk do të dërgojnë përfaqësues në mes të tensioneve të acaruara për konfliktin në Ukrainë.

Fitorja dërrmuese prej 87 për qind e Putinit në zgjedhjet presidenciale u provua nga shumica e vëzhguesve ndërkombëtarë dhe u hodh poshtë si e manipuluar nga opozita dhe grupet e të drejtave.

Është gjetur edhe trupi i 39-vjeçares Alma Arrazi, e cila u vetëhodh në lumin Bunë të Shkodrës bashkë me 3 fëmijët.

Trupi i djalit të vogël u gjet paraditen e sotme, ndërsa po ashtu është gjetur edhe trupi i dy vajzave, 9 dhe 8 vjeçe.

Tragjedia ndodhi më 2 maj, kur dyshohet se Alma Arrazi në kushte të rënduara psikologjike, u hodh bashkë me tre fëmijët e saj në lumin Buna.

Trupi i vajzës së madhe, E.Arrazi, 9 vjeç u gjet mbrëmjen e 4 majit nga një peshkatar në lumin Buna. Pasditen e së hënës, polumbarët gjetën trupin e dytë të vajzës së vogël 8 vjeçe jo shumë larg urës së Bunës.

Ndërsa ditën e sotme, 7 maj, u gjet trupi i Almës dhe djalit 3 vjeçar.

Erdgys Arrazi, bashkëshorti i Almës, është vënë në pranga dhe akuzohet se ka shtyrë gruan drejt vetëvrasjes.

Nga familja e Almës, motra e saj, u ka thënë hetuesve se Erdgys Arrazi ushtronte dhunë fizike e psikologjike ndaj 39-vjeçares e fëmijëve dhe vetëflijimi dyshohet se është pasojë e dhunës në familje.

Sipas dëshmive të tjera, shkaku shihet edhe tek tradhtia me një 18 vjeçare, për të cilën Alma kishte marrë dijeni. Madje pretendohet se Erdgysi e nxirrte live të dashurën e tij në celular, dhe ia tregonte vajzës 9-vjeçe.

Në një njoftim, prokuroria e Shkodrës ka treguar itinerarin e gruas dhe thotë se nga hetimet e deritanishme janë krijuar ‘dyshime të arsyeshme bazuar në prova se Erdgys Arrazi, si rrjedhojë e dhunës psikologjike të vazhdueshme ndaj bashkëshortes së tij, shfaqur në formën e ofendimeve të vazhdueshme dhe tradhtisë bashkëshortore, duke prekur rëndë dinjitetin e saj, ka shkaktuar vetëvrasjen e Alma Arrazit, e cila në gjendje të rënduar psikologjike dyshohet të jetë hedhur në lumë bashkë me tre fëmijët e mitur.

Gjykata e Shkodrës, vendosi sot masën e sigurisë “arrest me burg” ndaj Erdgys Arrazit.

Kryeministri i Republikës së Kosovës, Albin Kurti, të martën ka bërë homazhe pranë varrit të heroit, Bahri Fazliu, në 26-vjetorin e rënies së tij, raporton Ekonomia Online.

Nga aty, Kurti tha se Bahri Fazliu ra në një ballafaqim të rreptë me forcat serbe.

“Sot më 7 maj  janë mbushur 26 vjet nga rënia heroike e dëshmorit te kombit, Bahri Fazliut. Ai u vra në betejë, ballafaqim me forcat armike serbe në vendin i cili ndodhet në kufi të Kosovës, Shqipërisë dhe Malit të Zi, pra një vend domethënës i cili është në përputhje edhe me idealet e Bahri Fazliut”, u shpreh Kurti.

Në takimin e Këshillit Kombëtar për Ekonomi dhe Investime kreu i ekzekutivit kosovar Albin Kurti u ka bërë thirrje bizneseve që ta vazhdojnë bashkëpunimin me qeverinë për të zhvilluar së bashku plane strategjike dhe operacionale që rrisin investimet e huaja direkte, eksportin dhe nxisim zhvillimin efektiv të biznesit.

Kurti poashtu ka thënë se duan që qytetarët të jenë të përgatitur mirë dhe konkurrues në Kosovë.

“Nëpërmjet formimit dhe edukimit profesional që e synon plotësimin e nevojave të sektorit privat ne po krijojmë një të ardhme më të sigurt për të gjithë. Ne duam që qytetarët tanë të jenë të përgatitur mirë dhe konkurrues pikërisht këtu në Kosovë. Duke krijuar mundësi të vlefshme punësimi ne përmirësojmë mirëqenien e qytetarëve tanë kjo nuk ka të bëjë vetëm me fitimet ka të bëjë me njerëzit. U bëjë thirrje bizneseve tona më konkurruese, shoqatave të biznesit dhe projekteve të financuara nga donatorët që të vazhdojnë e të forcojnë edhe më tej bashkëpunimin me Qeverinë e Republikës së Kosovës. Së bashku ne mund të zhvillojmë plane strategjike dhe operacionale që rrisin investimet e huaja direkte, eksportin dhe nxisim zhvillimin efektiv të biznesit”, tha Kurti.

Kurti ka përmendur edhe ddisa rezultate nga bashkërendimi institucional dhe komunikimi i qartë me bizneset.

“Ne kemi parë tashmë rezultatet fillestare nga ky dialog. Ne po lëvizim për të hequr licencën e eksportit për produktet farmaceutike një pengesë kjo jo tarifore që vështirësoi biznesin për shumë vite me radhë. Kjo është një dëshmi e asaj që mund të arrijmë përmes bashkërendimit ndërinstitucional dhe komunikimit të qartë me bizneset”, shtoi Kurti.

Ndërkaq bëri me dije se edhe pse sektori publik dhe ai privat janë të ndara, shtëpia sipas tij është një.

“E dimë se sektori publik dhe privat janë sektore të ndara, mirëpo shtëpia është një. Konkurrueshmëria jonë ekonomike do të sjell prosperitet dhe mirëqenie për qytetarët tanë duke përmirësuar cilësinë e jetës së tyre dhe duke ndërtuar të ardhme më të ndritshme për të gjithë. Kur themi të gjithë mendojmë brezin tonë dhe ata që vine pas nesh.

Derisa zëvendëskryeministri i Kosovës, Besnik Bislimi ka përmendur edhe fondin e Bashkimit Evropian për implementimin e projektit për ballkanin Perendimor.

Sipas tij Kosova mund të përfitoj rreth 945 milion euro.

“Për implementimin e projektit për Ballkanin Perëndimor, Bashkimi Evropian ka ndarë gjithsej 6 miliard euro për periudhën e ardhshme 4 vjeçare dhe formula për alokimin e këtyre mjeteve është i tillë që synon rritjen më të shpejtë të vendeve të cilat janë më pak të avancuara në rrugëtimin e tyre drejt BE. Dhe nuk është e çuditshme pse Kosova përfiton mbi proporcionalisht në raport me fuqinë ekonomike dhe popullsinë që ka. Do me thënë Kosova merr ose ka mundësi të përfitoj 1/6 e këtyre fondeve ose 945 milion euro”, ka theksuar Bislimi.

Edhe ministrja e Ekonomisë Artane Rizvanolli ka bërë me dije skemat dhe subvencionimet e shtetit në sektorin e energjisë.

“Së pari dua të filloj të flas për skemat që i kemi pasur gjatë muajt të fundit për efiçiente të energjisë. Në fund të viti të kaluar kemi hapur skemën për subvencionim të pajisjeve efiçinete për ngrohje për biznese, kemi pasur diku mbi 100 aplikime dhe diku rreth 30 për qind të përfituesve kanë qenë pronare biznese të grave dhe kjo megjithëse është numër më i vogël i aplikimeve se që kemi pritur pjesëmarrja e lartë e bizneseve të grave tek përfituesit është një gjë për t’iu gëzuar. Me 6 shkurt kemi shpallur thirrjen për mbështetjen e konsumatorëve familjarë por edhe ndërmarrjeve të vogla dhe të mesme për investime në sisteme të energjisë së ripërtitshme….. Skema të financuar këto nga BE. Këto janë thirrjet të cilat tanimë kemi dhjetëra aplikme për të cilat thirrjet janë të hapura ende granti mund të arrij deri 6 mijë euro varësisht nga madhësia e sistemit dhe ju inkurajoj që ta përcjellni informatën tek anëtarët tuaj dhe t’i inkurajoni bizneset që të aplikojnë”, u shpreh Rizvanolli.

Sipas Rizvanollit, më 18 mars ministria e Financave Punës dhe Transfereve ka përfunduar marrëveshjen e financimit për parkun solar prej 100 mgw në pronësi të KEK-ut.

Gjatë viteve në vijim sipas saj do të ndërtohen së paku 200 mgw të parqeve solare derisa sipas saj detyrimisht do të krijohen vende të reja të punës në këtë fushë./kp

Presidentja e Kosovës, Vjosa Osmani, është duke qëndruar në Shtetet e Bashkuara të Amerikës. Osmani ka thënë se roli i SHBA-së ka qenë përcaktues për fatin e Kosovës prandaj SHBA-ja është në ADN-në e suksesit të Kosovës.

Këtë Osmani e ka thënë në ngjarjen kryesore me rastin e 20 vjetorit të MCC_së në prag të Samitit SHBA-Afrikë, ku edhe po merr pjesë presidenti George W Bush si themelues i MCC-së.

“Roli i SHBA-ve ka qenë përcaktues për fatin e Kosovës, ndaj SHBA-ja është në ADN-në e suksesit të shtetit tonë.

Në eventin qendror me rastin e 20-vjetorit të Korporatës së Sfidave të Mijëvjeçarit (MCC) në prag të Samitit SHBA-Afrikë, me pjesëmarrjen e Presidentit George W. Bush, njëherit themelues i MCC-së, fola për shtetndërtimin dhe zhvillimin e Kosovës, me ç’rast rikonfirmova rolin e pakontestueshëm të SHBA-ve për lirinë dhe shtetndërtimin.

Në të njëjtën frymë sot, MCC-ja po e vazhdon këtë trashëgimi duke ofruar mbështetje të çmueshme për zhvillimin ekonomik e të qëndrueshëm të Kosovës duke e bërë vendin tonë pjesë të pandashme të sukseseve, të cilat i përfaqëson SHBA-ja kudo në botë”, ka shkruar Osmani.

Pas shumë kërkimesh është gjetur edhe trupi i djalit 3-vjeçar i familjes Arrazi, Arditi, ndërsa kërkimet po vazhdojnë për trupin e nënës.

Lajmi u konfirmua nga drejtues të Agjencisë Kombëtare të Mbrojtjes Civile. Trupi është gjetur në anën e malit, në afërsi të fshatit Zues. Disa kilomentra larg trupit të vajzës që u gjet dje në Dajlan.

Dy ditë më parë është gjetur trupi i vajzës 9-vjeçare, Erigea, ndërsa dje u gjet trupi i vajzës tjetër, Gresi. Së bashku me nënën, Alma Arrazi, ata dyshohet se janë vetëmbytur pas dhunës nga bashkëshorti i Almës dhe babai i tyre, Ergys Arrazi.

Ky i fundit është vënë në pranga, i akuzuar si shkaktar për vetëvrasjen e tyre. Po ashtu forca të shumta polumbarësh, RENEA, FNSH, por edhe ushtria, po vijojnë kërkimet në ujërat e Bunës dhe Drinit për gjetjen e trupit të nënës.

Prefektja e Shkodrës, Majlinda Angoni, konfirmoi gjithashtu lajmin, ndërsa falënderoi të gjithë strukturat që po marrin pjesë në këtë operacion dhe banorët e fshatrave, që ndihmuan vullnetarisht.

“Gjej rastin të ngushëlloj familjarët për këtë tragjedi. Dua të falënderoj të gjitha strukturat pjesëmarrëse në këtë aksion, që 24/7 po bëjnë të mundur gjetjen sa më shpejt të viktimave. Dua të falënderoj edhe banorët e fshatrave, të cilët janë ofruar vullnetarisht për të bërë të mundur që ky aksion të përfundoj. Sapo morëm lajmin që u gjet edhe fëmija i vogël dhe shpresojmë që së shpejti të gjejmë edhe viktimën e fundit të kësaj tragjedie dhe operacioni do të mbyllet. Do të jemi këtu deri në gjetjen e turpit të nënës së fëmijëve”, tha prefektja.

Angoni bëri gjithashtu thirrje grave që të denoncojnë dhunën dhe të mos heshtin. “Të gjithë vajzat dhe gratë duhet të denoncojnë dhunën në rastin më të parë, në të gjitha strukturat që ofrojnë ndihmë ndaj tyre.” /tch

Ushtria izraelite tha të martën se ka marrë kontrollin e pikëkalimit kufitar në Rafah, midis Gazës dhe Egjiptit, pjesë kjo e cila ka qenë jetike për dërgimin e ndihmave dhe daljen e njerëzve të plagosur nga lufta në Gazë.

Ushtria tha se forcat po skanonin zonën në mëngjes pasi nisën një operacion tokësor dhe ajror në një pjesë të Rafahut lindor të hënën mbrëma, mes përpjekjeve diplomatike jashtë vendit për të arritur një armëpushim të ri.

Autoriteti i Kalimeve të Gazës tha në një deklaratë se marrja e kontrollit nga Izraeli ishte një “dënim me vdekje” kundër banorëve të Gazës, veçanërisht të sëmurëve dhe të plagosurve.

Gjatë gjithë luftës shtatëmujore, Rafahu – i vetmi vendkalim që nuk drejtohet nga Izraeli – ka qenë linja kryesore e shpëtimit të popullatës palestineze prej 2.3 milionësh të Gazës, duke lejuar futjen e furnizimeve humanitare në Gazë dhe transportin e pacientëve jashtë saj mes mungesave të rënda dhe shkatërrimit të objekteve të kujdesit shëndetësor.

Ushtria izraelite tha se një operacion i kufizuar në Rafah kishte për qëllim të vriste luftëtarët dhe të çmontonte infrastrukturën e përdorur nga grupi militant palestinez Hamas – i shpallur organizatë terroriste nga Shtetet e Bashkuara dhe Bashkimi Evropian.

Aleati më i afërt i Izraelit, SHBA-ja, ka këshilluar kundër ndërmarrjes së një sulmi në Rafah, qyteti që është streha e fundit për rreth gjysmën e popullsisë së Gazës.

Zyrtarët shëndetësorë palestinezë thanë se tanket dhe avionët izraelitë goditën disa zona në Rafah gjatë natës, duke vrarë 20 palestinezë dhe duke plagosur disa të tjerë gjatë goditjeve në të paktën katër shtëpi.

Banorët thanë se Izraeli kishte lëshuar fletushka të reja të martën, duke i paralajmëruar përsëri njerëzit të largoheshin nga zonat në lindje të Rafahut.

Tanket izraelite bombarduan gjithashtu zonat lindore në Beit Laha, Jabalia dhe Beit Hanun në veri të Rripit të Gazës, thanë banorët.

Ushtria izraelite tha se shumica e njerëzve dhe disa organizata ndërkombëtare ishin evakuuar nga zona e Rafahut lindor, ndërsa tha se vrau rreth 20 luftëtarë dhe gjeti tri boshte tuneli.

Një vendkalim tjetër aty pranë, i kontrolluar nga Izraeli, Kerem Shalom, u mbyll të martën për arsye sigurie dhe do të rihapet sapo të lejojë situata e sigurisë, tha ushtria.

Izraeli ka vrarë më shumë se 34.700 palestinezë në sulmet e tij ajrore, tokësore dhe detare në Gazë, sipas Ministrisë së Shëndetësisë në Gazë.

OKB-ja ka thënë se kriza e urisë që ka kapluar njerëzit në veri të Gazës, po bartet bartet edhe drejt jugut.

Lufta filloi kur militantët e Hamasit sulmuan Izraelin më 7 tetor, duke vrarë rreth 1.200 njerëz dhe duke rrëmbyer 252 të tjerë, nga të cilët 133 besohet se mbeten në Gazë, sipas të dhënave izraelite./REL/

Nga mesnata filloi heshtja në prag të rrethit të dytë të zgjedhjeve presidenciale dhe zgjedhjeve parlamentare që përfundon me mbylljen e vendvotimeve më 8 maj në orën 19 në Maqedoninë e Veriut.

Më 8 maj, në raundin e dytë të zgjedhjeve presidenciale kanë të drejtë të votojnë 1.814.317 zgjedhës, ndërsa në zgjedhjet parlamentare kanë të drejtë vote 1.815.350 zgjedhës. Diferenca në vota është 1033, përgjithësisht për shkak të moshës madhore të qytetarëve.

Votimi zhvillohet në 3480 qendra votimi dhe votuesit do të mund të vizitojnë qendrën e votimit dhe të votojnë vetëm një herë gjatë ditës.

Sot, një ditë para zgjedhjeve, të parët votojnë të sëmurët dhe të pafuqishmit, të burgosurit, të moshuarit dhe të regjistruarit nga diaspora, por vetëm për zgjedhjet presidenciale. Edhe pse fushata dhe përgatitjet për zgjedhjet përkoi me festat e Pashkëve, KSHZ-ja ua dorëzoi me kohë komisioneve komunale zgjedhore materialet zgjedhore.