Category: Lajme

Nga Ruben Avxhiu

Javën e kaluar botuesi i gazetës shqiptaro-amerikane “Illyria”, Vehbi Bajrami zhvilloi disa takime me kongresistë dhe këshilltarë të tyre në Kongresin Amerikan.

Një nga rezultatet e para të këtyre bisedave ishte vendimi i kongresistit Seth Moulton nga Distrikti 6 në Massachusetts për t’iu bashkuar Kaukusit të Çështjeve Shqiptare.

I drejtuar nga dy kongresistë demokratë dhe dy republikanë, Kaukusi bashkon anëtarë të Kongresit Amerikan që tregojnë interes dhe veprojnë në mbështetje të kauzave shqiptare në Dhomën e Përfaqësuesve dhe institucione të tjera në Washington.

Kongresisti Moulton e njoftoi për vendimin e tij botuesin Bajrami me anë të një mesazhi personal në të cilin shpreh edhe kënaqësinë për takimin e një jave më parë si dhe e fton për të bashkërenduar veprimet në të ardhmen.

Me këtë rast kongresisti Seth Moulton ka lëshuar edhe një deklaratë publike në të cilën thotë: Jam krenar që i jam bashkuar Kaukusit të Çështjeve Shqiptare. Si grupi kryesor i anëtarëve kongresionalë që përqendrohet në çështje që kanë të bëjnë me Kosovën, Shqipërinë dhe diasporën shqiptare, Kaukusi siguron një platformë të vlefshme për të çuar përpara paqen, sigurinë dhe demokracinë në rajon. Pres me padurim që të punoj me udhëheqës të këtij komuniteti duke përfshirë edhe me shumë lexues të gazetës “Illyria” për të çuar përpara këto kauza të rëndësishme”.

Seth Moulton ka shërbyer si oficer i Marinsave Amerikanë dhe në Kongresin Amerikan është veç të tjerash anëtar i Komitetit të rëndësishëm të Forcave të Armatosura.

Vehbi Bajrami punon prej dekadash në shërbim të çështjes kombëtare shqiptare në SHBA. Ai është botues i librit të njohur voluminoz “Shqiptarët e Amerikës”, si dhe ka shërbyer si Drejtor i Programit të “Zërit të Amerikës” në gjuhën shqipe. Përpara se të bëhej botues i gazetës “Illyria” ai ka qenë gazetar dhe redaktori menaxhues i saj. Për punën e tij në shërbim të kombit është nderuar me Urdhërin e Kalorësit të Skënderbeut nga Presidenti i Shqipërisë.

Zëdhënësi i BE-së, Peter Stano, ka thënë se raporti i Përfaqësuesit të Lartë të BE-së për Kosovën po shkon drejt finalizimit dhe se heqja apo jo e masave do të varet nga ky raport por edhe nga vendet anëtare.

“ Unë vetëm mund të konfirmoj, pa diskutuar publikisht proceset aktuale në Këshill, se raporti është para finalizimit dhe do t’u dorëzohet vendeve anëtare”, tha Stano në një konferencë për media në Bruksel.

Derisa sa i përket afatit dhe përmbajtjes, Stano theksoi se nuk mund të bëjë komente, pasi këto janë procedura të brendshme në kuadër të Këshillit Evropian.

Stano lidhur me këtë çështje ka folur edhe ditë më parë duke komentuar kërkesën e Kosovës për heqje masash. Ai kishte deklaruar se janë shtetet anëtare ato që marrin vendim për heqje masash dhe jo politikanët e Kosovës.

Hetuesit e kundërinteligjencës ukrainase e kanë shpartalluar një komplot rus për ta vrarë presidentin, Volodymyr Zelensky, si dhe figura të tjera ushtarake dhe politike, tha të martën Shërbimi i Sigurisë Shtetërore i Ukrainës (SBU).

Dy kolonelë të Gardës Shtetërore të Ukrainës, e cila i mbron zyrtarët e lartë, u arrestuan nën dyshimin se po e zbatonin planin e përpiluar nga Shërbimi i Sigurisë Federale i Rusisë, sipas njoftimit.

Kolonelët në fjalë ishin rekrutuar para se Rusia ta fillonte pushtimin e plotë të Ukrainës në shkurt 2022, sipas SBU-së.

Vaysl Maliuk, shefi i SBU-së, u citua të ketë thënë se, sipas komplotit, parashihej një sulm para se presidenti rus, Vladimir Putin, ta bënte betimin për mandatin e pestë presidencial të martën.

Maliuk tha se ai personalisht e ka udhëhequr operacionin e fshehtë për ta parandaluar komplotin.

Pretendimet e Ukrainës për përpjekjet ruse për vrasjen e Zelenskyt nuk janë diçka e re.

Më 2022, Zelensky tha se kishte së paku 10 tentime për ta vrarë atë.

Ndërkohë, prokurorët në Poloni thanë muajin e kaluar se e kishin arrestuar një polak nën akuzat se ishte i gatshëm të spiunonte për inteligjencën ushtarake të Rusisë në një komplot të dyshuar për ta vrarë Zelenskyn.

SBU-ja tha se agjentët rusë të inteligjencës kërkonin anëtarë të ushtrisë ukrainase, që janë të afërt me sigurimin e presidencës, të cilët do të mundë ta merrnin peng presidentin dhe pastaj ta vrisnin më vonë.

Plani gjithëpërfshirës i komplotit ishte identifikimi i lokacionit të zyrtarëve të lartë ukrainas dhe sulmimi i tyre me predhë fillimisht, pastaj me dronë dhe raketa./REL/

Këshilli Prokurorial i Kosovës (KPK), ka aprovuar raportin e komisionit për avancimin e nëntë prokurorëve në Prokurorinë Speciale të Republikës së Kosovës (PSRK).

Prokurorët e avancuar janë: Naim Gashi, i cili nga vlerësimi ka marrë 87 pikë, Arbresha Raça-Shala 85.33 pikë, Shenaj Berisha 83.66 pikë, Shahadin Destani 82 pikë, Halim Borovci 77 pikë, Katriot Memaj 76.33 pikë, Fatos Ajvazi 71.33 pikë, Bekim Kodraliu 71 pikë dhe Ajshe Ferati ka marrë 70.66 pikë.

Kryetari i komisionit vlerësues, u.d Kryeprokurori Besim Kelmendi, tha se kandidatët e përzgjedhur janë vlerësuar në bazë të vlerësimit të përformances, nuk kanë pasur masa disiplinore, ngritjen akademike dhe përgjigjet e dhëna gjatë intervistimit, e që sipas tij këta kandidatë kanë plotësuar kriteret sipas rregullores.

Por ndaj këtij vlerësimi të komisionit, ankesa kanë parashtruar kandidati Kujtim Munishi, Bukurije Gjonbalaj dhe Fitore Sadikaj, raporton “Betimi për Drejtësi”.

Ish-kryeprokurori i Prokurorisë Themelore në Prishtinë, Kujtim Munishi, ka paraqitur kundërshtimin e tij në lidhje me vlerësimin, sipas tij të moszbatimit të ligjit dhe poentim të pasaktë dhe të njëanshëm. Ai tha se ky proces ishte diskriminues dhe sipas tij komisioni ishte themeluar në kundërshtim me rregulloren dhe se vlerësimi i kandidatëve është bërë pa monitorues nga shoqëria civile dhe nuk është incizuar.

Munishi nga komisioni ishte vlerësuar më 64.66 pikë, duke zënë vendin e 11-të, i cili përmes ankese së tij ka kërkuar anulim e gjithë procesit.

Në lidhje me këto kundërshtime të Munishit, kryesuesi i komisionit Besim Kelmendi ka thënë se për këtë konkurs kanë qenë të njoftuar edhe shoqëria civile edhe partneret ndërkombëtar por që nuk kanë marrë pjesë.

Ndërsa, për vlerësimin, Kelmendi u shpreh se nga të gjithë kandidatët kanë kërkuar nga tri kopje të aktakuzave për të bërë një vlerësim profesional.

Për këtë, ai tha se prokurori Munishi ka paraqitur aktakuza të vitit 2017, duke thënë se prej atij viti nuk e ka ushtruar veprimtarinë si prokuror. Ai tha se ka vlerësime të mira si menaxher i prokurorisë, por në rastin konkret është marrë parasysh përvoja e punës pasi ka aplikuar në një prokurori që është shumë komplekse.

Por më këtë konstatim nuk është pajtuar anëtarja Jehona Grantolli, e cila tha se kandidati Munishi ka menaxhuar prokurorinë me numrin me të madh të rasteve në këtë sistem dhe se gjatë përformances së tij kjo prokurori ka pas efikasitet.

Ajo tha se gjatë kohës sa Munishi ka qenë në menaxhimin e kësaj prokurorie, ka qenë e pamundur të trajtoj edhe raste, duke pyetur se nëse ky kriter do kërkohet edhe për pozitat tjera në të ardhmen. Sipas saj, tek çështja e integritetit Munishit i është bërë edhe njëherë tjetër padrejtësi kur kishte aplikuar për Kryeprokuror të shtetit.

Edhe anëtari Armen Zenelaj, pyeti nëse është përzierje e kompetencave të komisionit për vlerësimin e përformances kërkimi i aktakuzave.

Për këtë, Kelmendi tha se nuk ka qenë kriter por ka ndihmuar në vlerësimin profesional të kandidatëve.

Më 6 vota kundër dhe katër për, ky kundërshtim i Munishit nuk u aprovua nga Këshilli Prokurorial.

Kundërshtime në lidhje me vlerësimin e komisionit, kishte paraqitur edhe prokurorja Bukurije Gjonablaj, për mos aplikim të drejtë të kritereve dhe poentimit. Gjonbalaj në ankesë kishte thënë se nuk i është poentuar drejtë përformanca, përvojën e punës, specializimi e trajnimet e saja.

Edhe për ankesën e Gjonbalajt, Kelmendi tha se kriteret dhe poentomi janë të qarta dhe varësisht nga vlerësimi i përformancës vendosen edhe pikët, duke shtuar se e njëjta nuk ka pasur ngritje akademike dhe ka pasur vetëm disa trajnime. Ndërsa në kategoritë tjera ka thënë që ka pasur pikët pothuajse maksimale.

Këshilli ka refuzuar edhe kundërshtimet e prokurores Gjobalaj.

Edhe prokurorja, Fitore Sadikaj ishte ankuar se komisioni e ka dëmtuar tek pikët e përformancës në vlerësimin e integritetit dhe përvojën e punës. Ajo kishte thënë se në të njëjtën kategori kur kishte aplikuar për prokurore të Apelit ishte vlerësuar me lartë ndërsa, në këtë konkurs me ulët.

Në lidhje me ankesën e Sadikajt, Kelmendi tha se vlerësimi i komisionit ka qenë korrekt dhe në përputhje me rregulloren.

Edhe ky kundërshtim u refuzua nga ana e Këshillit.

Në pikën tjetër të rendit të ditës, u aprovua ndryshimi i përbërjes së Komisionit për Transferimin dhe Avancimin e Prokurorëve të Shteti. Kjo pasi sipas kryesuesit të KPK-së, Ardian Hajdaraj, komisioni kishte mandat deri në avancimin e nëntë prokurorëve në PSRK.

Ai tha se anëtares Merita Mina-Rugova i ka përfunduar mandati si anëtare e Këshillit dhe në vend të saj u propozua Jehona Grantolli. Ndërsa, tha se anëtari Enver Sokoli ka arritur pensionimin dhe në vend të tij u propozua Agron Bajrami.

Ky propozim u votua nga të gjithë anëtaret e Këshillit.

Një anëtar, u zëvendësua edhe në Akademinë e Drejtësisë, kjo pasi Kryeprokurori i Prokurorisë së Apelit, Xhevdet Bislimi ka dhëne dorëheqje edhe nga pozita e kryeprokurorit edhe nga anëtari i Këshillit të Akademisë se Drejtësi, për shkaqe shëndetësore.

Këshilli aprovoi edhe dy propozimet e Prokurorisë Themelore në Ferizaj dhe asaj të Gjilanit. Prokuroria e Ferizajt ka kërkuar hapjen e konkursit për avancim të një prokurori në Departament për të Mitur pasi kjo prokurori funksionon vetëm me një prokuror, ndërsa Prokuroria e Gjilani ka kërkuar avancimin e prokurorëve në Departament për Krime të Renda, pasi kanë mungesë pas pensionimit të një prokurori dhe dorëheqjes se një tjetri.

Tutje, në këtë takim Merita Bina-Rugova u propozua që të zgjidhet udhëheqëse e Departamentit për Krim të Organizuar në Prokurorinë Speciale, por vendimi për këtë propozim është shtyrë pasi të shikohet rregullorja nëse ka ndonjë pengese që ajo të marrë ketë pozitë pasi ka qenë anëtare e Këshillit.

Ndër të tjera, Këshilli në fillim diskutoi dhe miratoi planin e integritetit në sistemin prokurorial, rregulloren për Mandatin, Strukturën, Funksionimin dhe Organizimin e Zyrës për Mbrojte dhe Ndihmën e Viktimave, raportin vjetor të punës së Prokurorit të Shtetit dhe raportin përmbledhës të Komisionit për vlerësimin e përformancës së Prokurorëve.

Me dyer të mbyllura për publikun po vazhdon diskutimi për pikën “Raporti përfundimtar për vlerësimin e parregullt të përformancës së një (1) prokurori të PTH në Prishtinë dhe kundërshtimi i parashtruar”, si dhe pika “të ndryshme”.

Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione ka diskutuar lidhur me peticionin e punëtorëve të AKP-së, raporton EO.

Të pranishëm në mbledhje ishin kryesuesi Mentor Hysenaj i Bordit Drejtorёve tё AKP-sё dhe drejtori Ekzekutiv i AKP-së, Arben Limaj.

Kryesuesi i Bordit Drejtorёve tё AKP-sё, Mentor Hysenaj ka thënë se pas një kërkese që i është bërë nga punëtorët i kanë takuar së bashku me zëvendëskryesuesin dhe tre anëtarë tjerë të bordit.

Sipas tij kanë diskutuar në detaje të gjitha çështjet dhe shqetësimet që i kanë ngritur ato.

“Në parim ne e kemi thirrur grupin e grave të cilat e kanë përgatitur peticionin. Pas një kërkese që i është bërë bordit dhe e kemi takuar së bashku me zëvendëskryesuesin dhe tre anëtarë tjerë të bordit që kemi diskutuar në detaje të gjitha çështjet dhe shqetësimet që i kanë ngritur ato. Madje, kam dëgjuar edhe deklarimin e saj publik në komision këtu në detaje. Mund të them se jam ekonomist me profesion, çështja e statistikave shpesh din të manipulohet, varësisht prej këndvështrimit si e sheh njeriu, e megjithatë e përgëzoj për iniciativën që e ka bërë si çështje e ngritjes së pabarazisë që ndodhet në AKP, e gjithë Kosovën”, ka thënë Hysenaj.

Kryesuesja e komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, deputetja Duda Balje ka pyetur kryesuesin e Bordit të Drejtorёve tё AKP-sё se sa punëtorë janë.

“Të kemi thirr sot me folë për barazi gjinore brenda shtëpisë a ka pas, jo në Kosovë, të lutem koncentrohu në institucionin që përfaqësoni. Për fillim sa punëtorë jeni komplet”, ka pyetur Balje.

Hysenaj ka thënë se kanë diskutuar për të gjitha detajet e ngritura.

“Kemi diskutuar për të gjitha detajet e ngritura. Barazia gjinore është term tjetër. Janë 209 të punësuar dhe çdo statistikë e ka një histori”, tha ai.

Ai tha se 54% janë gra prej zyrtarëve në AKP-së. Gjithashtu përmendi një shpallje brenda AKP-së. Si përfundim sipas tij, janë 5 kandidatë të kualifikuar e në bazë ligjit prej tyre kanë kaluar vetëm dy burra.

“Kemi pas shumë dëshirë të jemi shumë femra, ka shumë femra të zonja që punojnë mbi 20 vjet. Statistika si bord 8% femra kanë qenë e tash 17% në pozita të mesme”, është shprehur Hysenaj.

Hysenaj tha se nganjëherë duke dashur të respektojmë një të drejtë, shkelet një e drejtë tjetër.

Deputetja e Vetëvendosjes, Arjeta Fejza tha se çka ishte pak shqetësuese për të ishte se gratë kanë hezituar të vijnë në komision si shkak i frikës së hakmarrjes.

Fejza tha se Bordi e ka për detyrë të hartojë politika përkrahëse për gratë, duke shtuar se ligjet e Kosovës e njohin përparësinë drejtë avancimit të gruas.

Ndërsa Hysenaj ka thënë se në Kosovë vet femrat fatkeqësisht në Kosovë nuk i votojnë femrat.

“Vet femrat fatkeqësisht në Kosovë nuk i votojnë femrat për me heq kuotën”, ka thënë Hysenaj.

Kjo është kundërshtuar nga deputetja Fejza e cila ka thënë se kjo nuk qëndron.

Hysenaj ka thënë se ai është i thirrur ta mbrojë ligjin.

“Unë jam thirrë me mbrojt ligjin, ashtu si ju në kuvend që i keni miratu. Unë vet jam jurist, dhe ju siguroj pa asnjë hezitim. E ftoj komisionin edhe deklarimet ti hetojë deri në fund. Jam i hapur me bashkëpunu, asnjë ankesë nuk e kam për ndonjë shkelje për frikësim e as nuk i kam ftu as me i vet për kurgjo peticionistët. Mundohemi në bazë të aftësive me i mbush pozitat me femra unë në AKP jam prej 2010-ës dinamikat i di mirë”, ka thënë Hysenaj.

Gjykata Themelore në Prishtinë ka liruar nga akuza ish-sekretarin e Ministrisë së Infrastrukturës dhe tre zyrtarë të tjerë të kësaj ministrie, që akuzoheshin për keqpërdorim detyre.

Ish-sekretari Betim Reçica, e zyrtarët Isa Berisha, Mirdit Emini e Leonora Limani akuzoheshin për përzgjedhje të operatorëve ekonomikë që nuk i kishin ofertat më të lira për tenderin e Autostradës së Gjilanit.

Reçica akuzohej se si ish-ushtrues i detyrës së drejtorit të Prokurimit ka ushtruar presion mbi anëtarët e komisionit vlerësues për ta bërë një raport brenda 10 ditësh në favor të kompanisë “Gjoka Konstruktion”, e më pas i kishte ndryshuar raportet e komisionit vlerësues duke e shpallur atë kompani fituese. Mbi të rëndonin edhe akuzat për shpëlarje parash, dhe dyshohej se me para me prejardhje kriminale, me qëllim të fshehjes së tyre, e ka blerë një veturë sportive “Audi” duke e lënë në emër të të vëllait.

Mbi Berishën, Eminin e Limanin rëndonin akuzat e keqpërdorimit të detyrës zyrtare, pasi dyshoheshin se nuk zgjodhën operatorët më të lirë.