Dy persona kanë mbetur të lënduar në Mitrovicë, të njëjtit dyshohet se janë therur.
Këtë e ka konfirmuar zëdhënësi i policies për rajonin e Mitrovisës, Avni Zahiti, teksa shtoi se të njëjtit kanë kërkuar ndihmë mjekësore.
“Rreth orës 21:30, është raportuar se dy persona të lënduar nga mjeti i mpreht kanë kërkuar tretman mjekësor në emergjencen e spitalit rajonal në Mitrovicë. Njesitet kompetente policore po merren me rastin”, tha Zahiti.
Nuk dihet ende nëse ngjarja lidhet me ndeshjen e basketbollit, Trepça – Golden Eagle Ylli.
Memorandumi i mirëkuptimit, për projektin e ri të Ambasadës Britanike, i cili ka për qëllim luftimin e krimit dhe korrupsionit është nënshkruar këtë të enjte.
Kryesuesi i Këshillit Prokurorial, Ardian Hajdaraj, e vlerësoi të rëndësishëm projektin, duke shtuar se ky bashkëpunim do t’i forcojë kapacitetet për t’i hetuar veprat më komplekse.
“Jam shumë besimplotë që ky bashkëpunim do t’i forcojë kapacitetet e Prokurorisë Speciale dhe Policisë së Kosovës, për t’i hetuar veprat komplekse që konsiderohen të rëndësishme për përfshirjen në ekipe të përbashkëta të hetimit në përputhje me standardet ndërkombëtare dhe praktikat e mira”, tha Hajdaraj.
Ambasadori britanik, Jonathan Hargreaves, tha se përmes memorandumit, synohet të luftohet edhe shpëlarja e parave.
“E dimë që krimi shkatërron jetë, krimi i organizuar dëmton dhe kërcënon sigurinë kombëtare, gjithashtu korrupsioni që shohim në shumë vende të botës. Ne gjithë e dimë që rrjeti kriminal është shpesh i fshehur duke përdorur teknologji moderne, dhe kjo është arsyeja që jemi shumë krenarë të mbështesim këtë bashkëpunim, që do të ketë rezultate dhe besimin e të gjithë neve së bashku me liderët politikë, për ta luftuar këtë fenomen”, tha Hargreaves.
Ndërkaq, kryeprokurori i Prokurorisë Speciale, Blerim Isufaj, është shprehur optimist se objektivat e projektit do të arrihen me sukses.
“Fillimi i projektit për mbështetje të krijimit të ekipeve të përbashkëta hetimore kundër financave të paligjshme dhe krimit të organizuar në Kosovë, shënon vazhdimin e bashkëpunimit të dëshmuar e në pritje reale për zhvillimin e mëtejmë të kapaciteteve tona, që mundësojnë sundimin e ligjit. Ne jemi optimistë se objektivat e projektit do të arrihen me sukses. Ja ku jemi sot këtu për të shënuar një fillim të ri, një projekt me ambicie të mëdha, i cili nga këndvështrimi ynë vendos edhe pritje, të cilat do të fuqizojnë edhe më tej infrastrukturën ligjore dhe rrjedhimisht dhe kapacitetet profesionale për zbatimin e mandatit ligjor”, tha Isufaj.
Në ceremoninë e nënshkrimit, i pranishëm ishte edhe drejtori i Policisë. Gazmend Hoxha theksoi se memorandumi ka për qëllim fuqizimin e kapaciteteve të Policisë në fushën e inteligjencës dhe ndihmesën në krijimin e grupeve të përbashkëta hetimore vendore dhe ndërkombëtare, me qëllim të luftimit efikas të krimit të organizuar.
Përgatitje të veçanta bëri Komuna e Suharekës të enjten, meqë edhe mysafirët i kishte të tillë.
Aty erdhën 10 ambasadorë të shteteve të Bashkimit Evropian, të cilët kryetari Bali Muharremaj i priti me dhurata të ekipeve lokale të basketbollit dhe futbollit.
Ambasadorët erdhën në Suharekë, për ta parë nga afër ndikimin e investimeve evropiane në këtë komunë.
“Është një aktivitet shumë i rëndësishëm për ne, sepse dëshirojmë të tregojmë unitetin dhe veprimin e përbashkët mes BE-së karshi Kosovës. Kemi biseduar për zhvillimin ekonomik, sfidat që përballet komuna për furnizim me rrymë elektrike dhe ujë, që do të bëjë jetën më të mirë për qytetarët. Edhe për çështjen e sigurisë dhe bizneset për interesat e tyre, e përfshimë pak edhe futbollin. Biseduam edhe për çështjen e arsimit dhe regjistrimin e popullsisë”, tha ambasadori i BE-së, Tomas Szunyog.
Kryetari Muharremaj tha se në takimin e tij me ambasadorët, u bisedua edhe rreth mundësisë për zhvillim ekonomik, përmirësim të mjekësisë, si dhe sportit në këtë komunë.
“Biseduam për zhvillimin ekonomik në komunën e Suharekës, për shtimin e popullatës, mjekësinë, edhe për sportin, dhe për një bashkëpunim shumë të mirë. Ne morëm përkrahjen e BE-së për projekte të reja dhe do të jemi bashkë për një mirëqenie speciale më të mirë”, ka shtuar Muharremaj.
Me të përfunduar takimi, nikoqiri me 10 ambasadorët shkuan për të parë nga afër punën në fabrikat të cilat janë përfituese të grandit nga BE-ja.
Njëri nga pronarët, Burim Devetaku, tha se me grantin e BE-së investoi në makineri moderne.
“Me ndihmën e tyre ne kemi investuar shumë në makineri moderne ku 80 për qind janë për tregun e jashtëm. Një ndihmesë të madhe na ka dhënë edhe Kuvendi Komunal. Numrin e nxënësve e ndan shkolla, 4-5 nxënës çdo vit aftësohen më shumë për punë”, tha Devetaku.
Në vizitë nëpër komunën e Suharekës, i pranishëm ishte edhe shefi i EULEX-it, Giovanni Pietro Barbano.
Krismat e armës të mërkurën në Pejë, lanë të plagosur tre anëtarë të së njëjtës familje.
Menjëherë pas sulmit, i dyshuari, i cili nga policia u identifikua si Agron Gashi, iku nga vendi i ngjarjes.
Por në pranga të policisë, ai ra të enjten pasdite.
“Personi i dyshuar, pas intervistimit nga hetuesit e Sektorit Rajonal, me urdhër tё Prokurorit tё shtetit, ndalohet pёr 48 orё, pёr veprën penale “Vrasje e rëndë nё tentativё””, thuhet në njoftimin e Policisë.
Prokurori i rastit, Ersan Qavolli, duke mos dhënë detaje shumë për rastin, thotë për ATV-në, se konfliktit me armë mund t’i ketë prirë një mosmarrëveshje në lidhje me shitjen e një veture.
“Lidhur me motivet e këtij rasti, nuk mund të prononcohem në këtë fazë, për shkak të ndjeshmërisë së rastit. Po tregohem i rezervuar për motivet e rastit, mirëpo njëra ndër pistat mund të jetë edhe ajo”, tha prokurori i rastit, Ersan Qavolli.
I dyshuari nuk është person i panjohur për organet e rendit. Ndaj tij, nw fillim tw vitit ishte ngritur aktakuzw, pasi qw akuzohet se në dhjetor të 2023-tës kishte goditur me veturë një zyrtar policor.
“Është një rast i tillë, por ndaj tij është ngritur aktakuzë për veprën penale “rrezikim i trafikut publik dhe veprime të rrezikshme”, dhe “mosdhënia e ndihmës””, tha Qavolli.
Gjykata Themelore në Pejë nuk iu përgjigj pyetjeve të ATV-së, lidhur me aktgjykimet eventuale dënuese të shqiptuara ndaj të riut në të kaluarën.
Ndërkohë, njëri nga tre anëtarët e familjes Berisha, është në gjendje kritike.
“Lëndimet kanë qenë kryesisht në regjionin e poshtëm të barkut, të cilat kanë lënduar një pjesë të kockave, të enëve të mëdha të gjakut, të cilat i kanë shkaktuar një gjendje të shokut të rëndë. Pacienti ka pasur nevojë të trajtohet me operacion, i cili ka zgjatur rreth gjashtë orë. Për momentin gjendja e përgjithshme e tij, prezantohet të jetë shumë e rëndë dhe më tutje kritike”, tha Shaqir Uka, drejtor i Klinikës Intensive.
Po ashtu, një nga të plagosurit siç konfirmon edhe Forca e Sigurisë së Kosovës, është pjesëtar i saj.
Kështu po prisnin familjarët fillimin e seancës ku do ndahej drejtësia për vrasjen e 18-vjeçarit Lulzim Fejzullau.
Pritjes prej 4 muajsh që nga ngjarja, iu shtuan edhe 2 orë të tjera, meqë shpallja e vendimit u shty për në orën 15:00.
Seanca zgjati fare pak.
Trupi gjykues dy të miturit i shpalli fajtor për veprën penale “vrasje e rëndë në bashkëkryerje”.
Njërin e dënoi me 10 vjet burgim e tjetrin me 9.
Por, xhaxhai e vëllai i viktimës, u shprehën të pakënaqur me lartësinë e dënimit.
“Lartësia e dënimit nuk na e mbyll plagën”, tha Rrahim Fejzullahu, xhaxha i viktimës.
Andaj, vendimin thanë se do ta apelojnë, brenda afateve ligjore.
“Do të apelojmë brenda afateve ligjore…”, tha Tomë Gashi, avokat i familjes së viktimës.
Lulzim Fejzullahu ishte rrahur me mjete të forta mesditën e 14 janarit. Pas trajtimit fillestar në Podujevë, u dërgua në QKUK për ndërhyrje kirurgjike, ku edhe vdiq më 20 janar.
Policia fillimisht e pati raportuar rastin si vrasje në tentativë dhe therje me thikë, pas vdekjes së tij, prokurori kishte urdhëruar që hetimet të drejtohen kah vepra penale për vrasje të rëndë.
Në tentimin e radhës, të enjten, Kuvendi arriti ta miratojë marrëveshjen me Danimarkën për burgjet.
Bazuar në këtë marrëveshje, Danimarka do të marrë me qira 300 qeli, në burgun e Gjilanit, ndërsa të burgosurit pasi ta vuajnë dënimin, do të dëbohen nga Kosova.
Mirëpo, përveç kësaj marrëveshjeje, deputetët e pushtetit dhe të opozitës, dhanë votën e tyre PRO edhe për disa marrëveshje të tjera ndërkombëtare.
Me 93 vota për, u miratua Projektligji për ratifikimin e Marrëveshjes për njohjen e kualifikimeve profesionale për infermier, kirurg veterinar, farmacist dhe mami, në kontekstin e Marrëveshjes së tregtisë së lirë të Evropës Qendrore.
Por pa deputetët e Partisë Demokratike të Kosovës, është miratuar Projektligji për ratifikimin e Marrëveshjes së Kredisë mes Republikës së Kosovës, përfaqësuar nga Ministria e Financave, Punës dhe Transfereve, dhe Bankës Zhvillimore të Këshillit të Evropës (BZHKE) për Projektin “Banimi social adekuat”.
“Për mua ka shumë rëndësi se në bazë të cilave kritere do të bëhet përzgjedhja e familjeve, në çfarë mënyre do të operohet me komunat të cilat do të jenë bartëse, qoftë të procesit të ndërtimit në situata të caktuara, ose edhe menaxhimit të stokut të këtyre banesave”, tha deputetja e PDK-së, Eliza Hoxha.
“Ministri doli na ngatërroi me atë që edhe shërbyesit civilë do të përfitojnë prej kësaj. Por, këtu në projekt nuk shkruan për atë. Janë familjet me asistencë sociale dhe familjet me të ardhura të ulëta nën mesatare. Ti nuk e gjen një shërbyes civil që ka të ardhura në mesatare. Të bëhemi serioz kur i diskutojmë këto gjëra që janë të rëndësishme për plot familje”, tha deputeti i LDK-së, Abdullah Hoti.
Gjithashtu, në këtë seancë u miratuan edhe disa prej marrëveshjeve që të enjten e kaluar nuk morën dritën e gjelbër.
Marrëveshja e bashkëfinancimit për hartimin e projektit për ndërtimin e tunelit në rrugën Tetovë-Prizren kaloi me 82 vota për.
Është miratuar edhe Projektligji për ratifikimin e amendamentit numër 2 të marrëveshjes financiare, ndërmjet Republikës së Kosovës dhe Bashkimit Evropian për programin IPA 2016.
Mirëpo, votimi në lexim të dytë i Projektligjit për shëndetin riprodhues dhe fertilizim të asistuar mjekësor është shtyrë sërish.
Deputetët nuk e kanë miratuar amendamentin e deputetit Visar Korenica, ku pati kërkuar të largohen pjesët që parashihnin se e drejta për riprodhim u takon edhe individëve, përveç çifteve të martuara (burrit dhe gruas).
Shumica e votave në Kuvend për këtë amendament ishin në abstenim.
Babë e bir, të familjes Qena nga Romaja e Prizrenit, kanë mbetur të plagosur, pas një konflikti me anëtarë të familjes Likaj, nga fshati Krajk.
Sipas informacioneve fillestare, anëtarët e të dy familjeve ishin takuar në Gjonaj të Prizrenit, ku edhe ndodhi plagosja.
Fillimisht ata ishin rrahur e më pas ishte përdorur edhe arma.
Të plagosurit, sipas Shefit të emergjencës në Spitalin Rajonal të Prizrenit, janë jashtë rrezikut për jetë.
Personat e përfshirë në këtë incident, që besohet të jenë 11, janë të njohur për policinë e Kosovës, për shkak të kaluarës së tyre.
Deri të enjten pasdite, sipas policisë, vetëm një person është arrestuar.
Ndërkaq, Prokuroria e Prizrenit e konfirmon për ATV-në se i dyshuari A.L, është dërguar në mbajtje.
Është arrestuar A.L., për shkak të dyshimit të bazuar se ka kryer veprat penale “Tentim vrasje”, nga neni 172, lidhur me nenin 28 dhe 31, “Mbajtja në pronësi, kontroll ose posedim të paautorizuar të armëve” nga neni 366, “Pjesëmarrja në rrahje” nga neni 187, dhe “Asgjësimi apo dëmtimi i pasurisë” nga neni 321, sipas Kodit Penal të Republikës së Kosovës (KPRK). Ai, me vendim të prokurorit, gjendet në ndalim 48 orësh. Prokuroria Themelore në Prizren – Departamenti i Krimeve të Rënda, brenda afatit ligjor, për të dyshuarin A.L., do të parashtrojë kërkesë për caktim të masës së paraburgimit. Prokuroria në bashkëpunim me Policinë, janë duke ndërmarrë veprime të mëtejme hetimore lidhur me rastin.
ATV-ja po ashtu merr vesh se edhe në të kaluarën, familja Likaj e Qena kanë pasur mosmarrëveshje.
Forcimi i lidhjeve të Serbisë me Rusinë, në njërën anë, dhe armatosja e shpejtë dhe enorme e shtetit fqinj, në anën tjetër, sipas kryeministrit Albin Kurti përbëjnë kërcënim serioz për luftë të re në Ballkan.
Krahas 48 bazave ushtarake serbe, përgjatë kufirit me Kosovën, në konferencën për Mbrojtje në Londër, kryeministri përmendi edhe rrëmbimin e tre policëve dhe sulmin terrorist paramilitar në Banjskë, vitin e kaluar.
“Kërcënimi nuk është thjesht teorik, rreziku për një luftë të re është i vërtetë. Kohezioni dhe çiltërsia e para 25 vjetëve duhet të ripërtërihet sot… Serbia aktualisht po i forcon, më shumë se kurrë më parë, lidhjet, veçmas me Rusinë dhe Kinën. Në një kohë kur ne po përjetojmë një luftë në Evropë, nuk mund të injorojmë kërcënimin për një luftë tjetër në rajon, që të gjithë e dimë shumë mirë se çfarë do të thoshte”, tha Kurti.
Pasi foli për ambiciet territoriale të Serbisë, Kurti theksoi nevojën që shtetet anëtare të mbështesin rrugëtimin e Kosovës për në Aleancën Veri-Atlantike.
“Shtetet demokratike duhet të mbyllin vakumin praktik dhe politik, që i bën autokratët të besojnë se një sulm në një vend tjetër evropian, është i mundshëm… Ne duam t’i bashkohemi NATO-s sa më parë të jetë e mundur. Ne duhet të punojmë së bashku, në mënyrë që Kosova të jetë pjesë e NATO-s në këtë dekadë. Ne duam të kontribuojmë në siguri, e po ashtu të përfitojmë prej saj”, tha Kurti.
Pjesë e agjendës në vizitën e kryeministrit Albin Kurti në Mbretërinë e Bashkuar, është takimi me Sekretarin për Punë të Jashtme, David Cameron, si dhe anëtarë të parlamentit britanik.
Me rritjen e temperaturave është rritur edhe rreziku nga pickimi i rriqrave.
Edhe këtë vit, Malisheva vazhdon të jetë zona ku më së shumti po raportohen rastet e thumbimit nga rriqrat.
Kryetari i Malishevës, Ekrem Kastrati, tha se nga dita e djeshme kanë filluar me dezinsektimin e zonave endemike.
“Pavarësisht numrit të rasteve të thumbimeve nga rriqrat, është fat i mirë se tani e një dekadë nuk kemi raste të infektimit me këtë virus vdekjeprurës, por ne si komunë, brenda përgjegjësive dhe kompetencave, jemi duke bërë të pamundurën për mbrojtjen e shëndetit të qytetarëve. Jemi duke dezinsektuar zonat endemike të komunës sonë. Shfrytëzoj rastin t’i falënderoj të gjithë që janë të angazhuar në luftimin dhe parandalimin e kësaj sëmundjeje, duke filluar nga punëtorët shëndetësorë, zyrtarët përgjegjës komunalë, si dhe të gjithë qytetarët, të cilët po tregohen shumë të kujdesshëm”, tha Kastrati.
Kastrati thotë se desinsektimin po e bëjnë pa ndihmën e institucioneve qendrore, për të cilat ka edhe kritika.
“Pasi e kemi nisur desinsektimin dje, ne s’kemi pasur mbështetje nga institucionet qendrore, siç janë Ministria e Shëndetësisë, IKSHPK, Ministria e Bujqësisë, AUV, në mënyrë që luftimi dhe parandalimi i EHKK, të ketë rezultate dhe të mbrohet jeta dhe shëndeti i qytetarëve. Por do ia dalim vetë. Në QKMF kemi mjaftueshëm staf për trajtimin e rasteve, i trajtojmë më mirë se qytetet e tjera pasi që jemi mësuar me raste të tilla, i kuptojnë më lehtë mjekët kur është thumbim apo infektim”, tha Kastrati.
Iniciativën e komunës po e mirëpresin qytetarët.
“Është e qëlluar kjo ide pasi që parandalohen pickimet, komuna e ka bërë të duhurën”, tha një qytetar.
“Është një plan i qëlluar, megjithatë, duhet të bëhet në të gjitha fshatrat e jo vetëm në qendër”, tha një tjetër qytetar.
Përpos Malishevës, zona të rrezikuara nga ethet hemorragjike apo siç njihen Krimo kongo janë edhe Suhareka, Rahoveci, Gjakova dhe Klina.
Drejtori i Klinikës Infektive në Qendrën Klinike Universitare të Kosovës, Arben Vishaj, tha në një përgjigje me shkrim për ATV-në se që nga fillimi i vitit deri në muajin maj, janë regjistruar mbi 200 raste të pickimit nga rriqrat nga të gjitha regjionet e Kosovës, por asnjë nuk ka përfunduar me vdekje.
Edhe Instituti Kombëtar i Shëndetit Publik u ka apeluar qytetarëve që jetojnë në zonat endemike, të kenë kujdes të shtuar.
Me 84 vota pro, 19 kundër dhe 68 abstenime, është miratuar në Asamblenë e Përgjithshme të Kombeve të Bashkuara, rezoluta që shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.
Ky dokument dënon pa rezerva çdo mohim të gjenocidit të Srebrenicës, ndërsa gjithashtu dënon pa rezerva veprimet që i madhërojnë të dënuarit për krime lufte, krime kundër njerëzimit dhe gjenocid nga gjykatat ndërkombëtare, përfshirë ata që janë përgjegjës për gjenocidin e Srebrenicës.
Sponsorizuese të rezolutës ishin Ruanda dhe Gjermania, ambasadorja e së cilës, Antje Leendertse, tha se kjo nuk i drejtohet Serbisë, por shënjestron vetëm autorët e gjenocidit.
Fjalim të ashpër kundër rezolutës mbajti presidenti i Serbisë, Aleksandar Vuçiq, i cili ia përkujtoi Asamblesë homazhet në Srebrenicë më 2015.
“Unë vetë kam shkuar në Srebrenicë, për ta përulur kokën dhe për të vënë kurora lulesh, por gati më kanë mbytur, kurse një ditë më vonë e kam zgjatur dorën për ata që e kanë organizuar. Kjo nuk ka të bëjë me pajtimin, kjo s’ka të bëjë me përkujtimin, kjo është diçka që i hap plagët e vjetra dhe do të krijojë kaos politik, jo vetëm në rajonin tonë, por edhe në këtë sallë”, tha Vuçiq.
Ai i akuzoi, siç tha, shtetet e forta për politizim të kësaj nisme dhe presion ndaj anëtarëve të OKB-së që të votojnë pro.
“Nëse flasim për përgjegjësinë penale individuale, kjo tashmë është kryer përmes aktakuzave, verdikteve dhe të gjithë ata që janë akuzuar, tashmë janë dënuar dhe janë në burg”, tha Vuçiq.
Vuçiq tha se kjo do t’i thellojë përçarjet në rajon dhe më gjerë, ndërsa paralajmëroi se miratimi do ta hapë kutinë e Pandorës për më shumë rezoluta të tilla për çështje të gjenocidit nëpër vende të ndryshme.
“A do ta unifikojë ndokënd kjo rezolutë, në Bosnjë e Hercegovinë? A do të krijojë përçarje në rajon? Po. Përçarjet do të thellohen. A do të sigurojë kjo paqe dhe stabilitet në të ardhmen? Kam shumë dyshime”, tha Vuçiq.
Prej shteteve që votuan kundër rezolutës ishin Federata Ruse, Kina e Hungaria. Ndërsa, abstenuan Greqia e Emiratet e Bashkuara Arabe.
Në korrik të 1995-ës forcat serbe në Srebrenicë vranë mbi tetë mijë e 300 burra e djem myslimanë, krim që Gjykata Ndërkombëtare e Drejtësisë e cilësoi si gjenocid, më 2007.
