Për të martën parashikohet të mbajë mot i nxehtë, i karakterizuar me diell dhe vranësira. Ka mundësi të ketë ndonjë reshje të izoluar në zona të caktuara.
Sipas Meteo Kosova, pluhuri Saharian do të vazhdojë.
Era do fryjë nga kuadrati i jugperëndimit dhe perëndimit, e cila kohë pas kohe pritet të jetë mjaft e fuqishme, me shpejtësi prej 15-57 km/h.
Temperaturat minimale do të lëvizin prej 13 deri në 16°C, ndërsa ato maksimale prej 28 deri në 31°C.
Komuna e Prishtinës njoftoi se vizita e Bernard Kouchnerit në Kosovë është anuluar.
Në komunikatën për media u tha të hënën se vizita është anuluar “për shkak të çështjeve logjistike të ndërlidhura me Dr. Kouchner”.
“Ju njoftojmë se vizita e Dr. Bernard Kouchner në Kosovë, dhe të gjitha ngjarjet e planifikuara për datën 11 qershor 2024 janë anuluar. Vizita është anuluar për shkak të çështjeve logjistike të ndërlidhura me Dr. Kouchner. Posa të ricaktohet data e vizitës do t’ju informojmë në kohë. Ju falënderojmë për mirëkuptimin dhe bashkëpunimin tuaj”, thuhet në njoftim.
Përgatiti: Driton Sadiku
Afro 10 muaj iu deshën Ministrisë së Shëndetësisë që ta formulojë listën e çmimeve të barnave, pas hyrjes në fuqi të Ligjit për produkte medicinale.
Por e gjithë puna e Komisionit për çmimet e produkteve që u angazhua për këtë, u hodh poshtë nga Ministria e Shëndetësisë e cila e anuloi atë.
Për tërë këta muaj dështim, një ish-ministër i shëndetësisë thotë se dikush duhet të japë llogari.
“Ministria, qeveria, ministri i shëndetësisë të ndikuar nga interesat e mafias farmaceutike kanë dështuar në realizimin ligjor të vendosjes së pragut, ose nivelimit të çmimit të barnave. E para ka dështuar në implementim të ligjit duke shkelur afatet dhe e dyta duke krijuar një komision që ka ndjekur të njëjtën vijë të interesit”, tha Armend Zemaj, ish-Ministër i Shëndetësisë.
Me listën preliminare që ishte propozuar, qytetarët do të paguanin njësoj, por shumë më shtrenjtë se çmimet aktuale, andaj tash gjithçka do të nisë nga fillimi.
“Gjithçka duhet të rishikohet sepse ajo çfarë është parë, është parë me shumë shkelje dhe mbrojtje e interesave klienteliste dhe të cilat do ta rëndonin edhe më shumë koston dhe xhepin e varfër të pacientit dhe qytetarit”, tha Zemaj.
Kësisoj qytetarët do të vazhdojnë edhe për një kohë që për barnat e njëjta të paguajnë çmime të ndryshme nëpër barnatore.
Disa prej tyre nuk pajtohen me çmimet që shiten.
Ndryshe, ligji për produktet medicinale, që ndër të tjera nivelon dhe çmimin e barnave, ka hyrë në fuqi në korrik të vitit të kaluar.
Përgatiti: Nora Luta
Nga Komuna e Istogut, Nexhmedin Curri të hënën erdhi në Gjykatën e Prishtinës.
Por, nga aty tha se doli i lehtësuar që 25 vjet pas luftës drejtësia u bë, ndonëse sipas tij, jo mjaftueshëm, kur dëgjoi se Casllav Jolliq u shpall fajtor për krime kundër njerëzimit.
Trupi gjykues i kryesuar nga Musa Kongjeli, ia shqiptoi Jolliqit tetë vjet burgim.
Ata i falën besimin edhe dëshmisë së Currit, i cili sipas aktakuzës u keqtrajtua fizikisht nga Jolliq.
Gjykata e shkallës së parë në arsyetim ndër të tjera përmendi edhe dëshminë e të dëmtuarve të tjerë në këtë rast, Zef Malësisë dhe Naim Feratit.
Por, mbrojtja është shprehur e befasuar me këtë aktgjykim, pasi pretendon se nuk ka prova bindëse për fajësinë e Jolliqit.
Sipas aktakuzës, Jolliq nga janar i 1998-s deri më 21 qershor të 1999-s, në territorin e Komunës së Istogut në bashkëkryerje edhe me persona të tjerë keqtrajtoi, rrahu e torturoi civilë në komunën e Istogut.
Ai ishte arrestuar në qershor të 2022-s, ndërsa gjykimi kishte nisur në dhjetor të po të njëjtit vit.
Gjatë procesit u dëgjuan dhjetë dëshmitarë, 8 të PSRK-së, dhe dy të mbrojtjes, përfshirë të dyshuarin për krime lufte, Momir Pantiq.
Pantiq, sipas Prokurorisë, kishte hedhur poshtë teorinë e mbrojtjes se Caslavi nuk kishte qenë polic rezervë i forcave serbe.
Përgatiti: Sara Shehu
Vendimi i listës për rregullimin e çmimeve të produkteve medicinale, i cili para tri javëve hyri në fuqi me vendim të Ministrisë së Shëndetësisë, e që javën e shkuar u anulua nga po kjo ministri, ka nxitur reagime në komisionin për shëndetësi e mirëqenie sociale.
Anëtarët e Komisionit pretendojnë se anulimi është bërë për interesa personale financiare.
“Është dashur të ishte prezent ministri i shëndetësisë e sidomos pas reagimeve. Ka diçka më shumë, se anulimi i një vendimi duhet të sqarohet, nuk duhet të kaloj në heshtje kjo. Kemi një vendim që miratohet lista dhe një tjetër anulohet. Ai ishte i vetmi që e ka miratu edhe e anuloi”, tha deputeti i LDK-së, Armend Zemaj.
“Kemi analizuar listën e çmimeve, kemi qenë vërtet të zhgënjyer, sepse ka pasë rritje të çmimeve në produkte prej 50% deri në 300% për disa produkte nga kjo listë zyrtare. Përmes këtij ligji është dashur të zbriten çmimet si p.sh. për aspirin vetëm janë rritë çmimet. Ministri ka anulu diçka që vetë e ka miratu. Ka konflikt interesi”, tha deputeti i PDK-së, Bekim Haxhiu.
Sipas anëtarit tjetër të komisionit, nga radhët e AAK-së, Shemsedin Dreshaj, ka pasur mangësi në hartimin e këtij ligji.
“Ka pasur hezitime për këtë ligj se rregullon tavanin e çmimeve, por jo ne se kemi pasur asnjëherë të qartë. Ky ligj është shoqëruar me debate të shumta. Në komision për këtë ligj ka pasur ndryshime në pozita ndërrime, pra a keni pasur presion politik”, tha Dreshaj.
Nga ana tjetër, Virtyte Krasniqi, nga Agjencia e Kosovës për Produkte dhe Pajisje Medicinale, tha se duhet sërish të rishikohet lista e çmimeve të barnave.
“Derisa është funksionalizu komisioni janë ba ndërrime të shumta për shkak të orareve të ndryshme që i bojmë. Ky komision nuk paguhet, ka pasë problem se komisioni nuk paguhet është punë shumë e rëndë edhe pse profesionale. Listat zyrtare nuk mund të jenë gjithmonë publike. Duhet me ditë çmimet a janë me TVSH, apo pa TVSH, nuk mundemi veç thjesht me vendosë çmime”, tha Krasniqi.
Lidhur me këtë akt normativ, i cili ka për qëllim kursimin e xhepit të qytetarëve dhe mbrojtjen e tyre nga abuzimet me çmimet e larta për barna, ATV-ja ka pyetur edhe Ministrinë e Shëndetësisë për arsyet e anulimit të tij, por deri në këto momente nuk kanë dhënë ndonjë sqarim.
Përgatiti: Armand Hoti
Siç e do tradita e nisur nga ish-presidenti Ibrahim Rugova, pasardhësja e tij, Vjosa Osmani, i dhuroi një gur kristali ish-kryeministrit të Britanisë së Madhe, Tony Blair.
Kjo dhuratë, iu dha Blairit në shenjë mirënjohje për angazhimin e tij direkt për një Kosovë të lirë.
“Ne ju themi faleminderit, që përkundër sfidave, ju orientuat kompasin e historisë në anën e mbrojtjes së vlerave që përcaktuan kapitujt më të lavdishëm të historisë. Më lejoni të ju falënderoj përzemërsisht që jeni me ne në 25 vjetorin e çlirimit, në mënyrë që ta shihni edhe ju mirënjohjen e qytetarëve që kanë për ju”, tha presidentja e Kosovës, Vjosa Osmani.
Ndërkaq, duke thënë se emocionohet sa herë që vjen në Kosovë, ish-kryeministri Blair falënderoi qytetarët për vendosmërinë që të shohin vendin e tyre çdo ditë e më mirë.
“Është emocion i madh për mua të jem sërish në Kosovë. Dua të falënderoj popullin e Kosovës për përcaktimin e tyre 25 vite më parë dhe për vendosmërinë e tyre të palëkundur që ta shohin të mirën, çlirimin e para 25 viteve”, tha Blair.
Duarthatë, Blair nuk doli as nga zyra e Kryetarit të Prishtinës.
Përparim Rama ish-kryeministrit të Britanisë, ia dhuroi çmimin “Çelësi i Qytetit”.
Madje, në një seancë të posaçme, Tony Blair u shpall edhe “Qytetar Nderi”.
Gjatë të hënës, ish-kryeministri britanik është takuar me kryeministrin Albin Kurti, si dhe me liderët e partive opozitare.
Ndërkohë, në Ferizaj, për nder të rolit të tij për Kosovën, do të zbulohet shtatorja e tij.
Përgatiti: Driton Sadiku
Kryeministri Albin Kurti tha se shpresat e Serbisë për ta zbrazur Kosovën u shuan 1 çerek shekulli më parë.
Por të bëmat e saj ndaj popullit të Kosovës, thotë se duhet të shkruhen e punime të ndryshme të botohen sa më shumë, që ato të mos harrohen asnjëherë.
“Sikur sot një çerek shekulli më parë, më 10 qershor 1999, NATO-ja i dha fund fushatës së bombardimeve mbi Jugosllavi pas 78 ditësh bombardimeve. Në Nju Jork Këshilli i Sigurimit i Organizatës së Kombeve të Bashkuara e miratoi Rezolutën 1244 me të cilën autorizonte vendosjen e një force ushtarake e civile në Kosovë. Po atë ditë, UNHC-ja njoftonte se gjatë gjithë luftës në Kosovë 862 mijë e 979 refugjatë ishin dëbuar jashtë Kosovës dhe se sfida e radhës ishte organizimi i kthimit të tyre”, tha Kurti.
Për luftën dhe ditët e çlirimit të Kosovës, u fol edhe nga figura të tjera akademike, por edhe politike, gjatë konferencës shkencore, për 25-vjetorin e çlirimit.
“Përvjetorët si ky që shënojmë sot, na ofron një mundësi për të reflektuar për proceset dhe vendimet që i dhanë formë shtetit tonë”, tha ish-president i Kosovës, Fatmir Sejdiu.
“Uroj që Kosova të ketë ditë edhe më të bardha në të ardhmen. Uroj që shqiptarët në Ballkanin perëndimor të kenë një mirëkuptim mes njëri-tjetrit dhe të mendojnë më shumë për të ardhmen duke mos harruar”, tha ish-president i Shqipërisë, Alfred Moisiu.
Homologët nga akademitë e shkencave të të dyja vendeve, teksa e konsideruan si një nga ngjarjet më të rëndësishme në historinë e vendit, shtuan se ende ka gjëra për t’u bërë.
“Lidhja e Prizrenit bëri kombin shqiptar, shekulli 20 bëri dy shtetet tona, shekulli 21 ende nuk e ka thënë për ne fjalën e fundit“, tha kryetari i Akademisë së Shkencave të Kosovës, Mehmet Kraja.
“Ngjarje e cila çon në pavarësimin e Kosovës, duke mbyllur kështu cilin 100 vjeçar, të fitimit të pavarësisë së shqiptarëve në Shqipëri dhe në Kosovë”, tha kryetari i Akademisë së Shkencave në Shqipëri, Skënder Gjinushi.
Aktivitetet për shënimin e 25-vjetorit të Çlirimit të Kosovës kanë nisur nga data 8 qershor e do të zgjasin deri më 21 qershor.
Përgatiti: Kastriot Tahiri
Agron Ademaj i merr 120 euro pension si invalid civil i luftës, pasi shkeli në minë.
Me këmbë të amputuar, i paaftë për punë, thotë se me këto para nuk mund ta kalojë muajin.
Në mungesë të mjeteve financiare, tregon se nuk e ndërroi as protezën, që e mbajti katër vjet më shumë sesa duhej.
“Pensionet janë shumë të vogla për mirëmbajtje të protezës, se unë mbaj edhe familje. Kërkojmë nga qeveria me na mbështetë sidomos në protezë”. Protezën e kam mbajtë 6 vjet, duhet me mbajtë 2, shumë vështirë e kam pasë me lëviz se ajo zgjerohet e deformohet”, tha Ademaj.
Këto pakënaqësi, Ademaj bashkë me anëtarët e tjerë të Shoqatës së të Plagosurve nga Minat, i shprehën me protestë para qeverisë, të hënën.
Ata ndihen të diskriminuar nga shteti, pasi thonë se i kanë nevojat e njëjta me invalidët e luftës.
“Ai ka nevojë për protezë, ne kemi nevojë për proteza, proteza nën gjunjë pothuajse është e përafërt sa kushton një kosto, ndërsa proteza mbi gjunjë kushton rreth 40 mijë euro, ndërsa për neve janë caktuar rreth 5700 euro, ndërsa shumën tjetër duhet ta mbulojnë vetë anëtarët”, tha Jeton Kelmendi, anëtar i Shoqatës së të Plagosurve nga Minat.
“Kryeministri thotë që të gjithë qytetarët me statusin e invalidit të luftës duhet të sigurohet pagesa për proteza, ndërsa ministri Vitia çohet dy dite pas vendimit të kryeministrit dhe merr vendim dhe specifikon vetëm kategorinë e invalidëve të UÇK-së. Është shumë e padrejtë”, tha Avni Lubovci, kryetari i Shoqatës së të Plagosurve Civilë.
Protestuesit pritën për një kohë para qeverisë, me shpresën që mund të dalë dikush të diskutojë me ta.
Meqë një gjë e tillë nuk ndodhi, thanë se do të protestojnë sërish, deri në plotësimin e kërkesave.
Shoqata e invalidëve civilë aktualisht ka 74 anëtarë të cilët janë plagosur nga minat gjatë dhe pas luftës.
Përgatiti: Armand Hoti
Ish-kryeministri britanik, Tony Blair, është figura kyçe në seancën solemne të së hënës, në Kuvendin e Kosovës.
Edhe foltorja është rezervuar vetëm për të. Blair, para deputetëve dhe mysafirëve të tjerë në sallën plenare, flet me krenari për angazhimin e tij 25 vjet më parë, që kulmoi me çlirimin e Kosovës.
Madje, nuk shpreh pikë pendese për bombardimet e NATO-s ndaj caqeve serbe, më 1999.
“Më kujtohen njerëzit, duke i takuar, refugjatët në kamp në Shkup, duke i dëgjuar historitë e tyre, për zhvendosjen e tyre, për largimin e tyre. Fytyrat e tyre, që kërkonin ndonjë shenjë te fytyra ime, se a mund t’iu ndihmoj apo jo. Ne ju kemi ndihmuar dhe unë asnjëherë nuk jam penduar për këtë”, tha Blair.
Saktësisht 25 vjet më parë, u dha urdhri të ndalen bombardimet e NATO-s ndaj Serbisë, një ditë pas arritjes së Marrëveshjes Tekniko-ushtarake në Kumanovë, që largoi më pas edhe forcat serbe nga territori i Kosovës.
Pikërisht kjo marrëveshje, sipas kryeministrit Blair, ua dha mundësinë kosovarëve ta ndërtojnë një të ardhme më të mirë.
“25 vjet më parë u arrit marrëveshja për çlirimin e territorit të Kosovës, dhe Kosova më fund ishte e lirë dhe populli ishin të lirë të jetojnë, shpresojnë e të besojnë sërish në një të ardhme të lirë”, tha Blair.
Blair thekson mbështetjen për anëtarësimin e Kosovës në strukturat ndërkombëtare.
Ai kërkon nga të rinjtë kosovarë angazhim në zhvillimin e vendit dhe përtej.
“Të imagjinojmë këtë rini e cila ka mundësi brenda Kosovës dhe është brenda Evropës, të ndihmojë në inovacione teknologjike, që mund ta transformojnë botën. Ta imagjinojmë pasurinë e kulturës dhe artit kosovar, që mund të ndahet dhe të respektohet në vende shumë larg kufijve të Kosovës”, tha Blair.
Me të dalë nga Kuvendi, Blair pritet nga dhjetëra fëmijë kosovarë.
Përgatiti: Kastriot Tahiri
Revolucionar, intelektual e i papërsëritshëm është cilësuar ish-presidenti i Kosovës, Ibrahim Rugova, nga kryeministri i Shqipërisë, Edi Rama.
Përveç këtyre cilësimeve, në konferencën ndërkombëtare “Rugova dhe Perëndimi”, Rama tha se pa Rugovën, nuk do të kishte as Ushtri Çlirimtare të Kosovës.
“Rugova i dha popullit të tij një forcë të panjohur ndonjëherë në trojet tona. Presidenti Rugova ishte president i shpresës në mes të shtypjes së shpresës”, tha Rama.
Kryetari i partisë së themeluar nga Rugova, Lidhjes Demokratike, Lumir Abdixhiku, tha se ai gjithmonë ishte pro-perëndimor.
“Ibrahim Rugova: Kosova shtet i pavarur me përkrahës e aleatë. Presidenti, Evropën e konsideronte si bashkësi, e shqiptarët pjesë të tyre, ishte perëndimor, autentik, Rugova veproi në një kohë të thyerjeve të mëdha, ai zgjodhi fjalën e lirë, ne jemi popull perëndimor sikurse Ibrahim Rugova”, tha kryetari i LDK-së, Lumir Abdixhiku.
Veprimtaria e Rugovës është frymëzim edhe për ambasadorin amerikan, Jeffrey Hovenier, i cili thotë se i ka mbetur një merak në raport me të.
“Shpresoja të ma jepte një gur, sepse kjo ishte e famshme dhe shumë prej kolegëve të mi shpresonin dhe ai nuk ma dha, u theva i tëri”, tha Hovenier.
Kurse ish-kryeministri italian, Massimo D’Alema, kujtoi raportet me Rugovën, në kohën e bombardimeve të NATO-s.
“Ishte një moment i vështirë, kohë e vështirë në konflikt. Bombardimet e NATO-s kishin filluar, por nuk kishte shenja që Serbia do të dorëzohej dhe do t’i tërhiqte trupat e do ta lejonte paqen në Kosovë. Në Uashington, në një takim, mundësia e intervenimit të NATO-s ishte rritur”, tha D’Alema.
Konferenca “Rugova dhe Perëndimi”, u organizua në kuadër të 25-vjetorit të çlirimit të Kosovës.