Category: Lajme

Që nga hapja e temës së zgjedhjeve të parakohshme parlamentare, nuk kanë munguar as diskutimet se si do të bëhen koalicionet mes subjekteve politike.

KosovaPress ka realizuar një anketë me pyetjen se a do të jetë qeveria e ardhshme VV-LDK?

Në këtë anketë për një javë kanë votuar 938 persona, ndërkaq 706 apo 75.27 për qind e tyre kanë votuar Jo, 166 apo 17.70 për qind kanë votuar Po, ndërsa në opsionin Nuk e di kanë votuar 66 apo 7.4 për qind.

Ndryshe Lidhja Demokratike e Kosovës nuk e kishte pranuar ftesën e kryeministrit Albin Kurti për takim, derisa Partia Demokratike e Kosovës ishte e vetmja parti opozitare që iu përgjigj ftesës pozitivisht.

KosovaPress më 26 maj ka realizuar edhe një anketë ku qytetarët për një javë kanë votuar në pyetjen nëse qeveria e ardhshme do të formohet mes partisë në pushtet, Lëvizjes Vetëvendosje, dhe partisë më të madhe opozitare, Partisë Demokratike të Kosovës.

Nga 633 anketues që morën pjesë, 32 për qind ose 206 prej tyre votuan pro këtij koalicioni, kurse kundër votuan 363 anketues ose 57 për qind.

Ndërsa, 64 pjesëmarrës ose 10 për qind të tjerë në anketë thanë se “Nuk e dinë” nëse qeveria e ardhshme do të jetë LVV-PDK.

Në vazhdën e këtyre diskutimeve, KosovaPress ka realizuar edhe një anketë me pyetjen se kush do t’i fitojë zgjedhjet në Kosovë?

Në atë anketë për një javë kishin votuar 2 mijë e 118 votues, ndërsa rezultatet ishin VV 888 vota ose 41.93 për qind, PDK 768 apo 36.26 për qind, LDK 325 vota apo 15.34 për qind, AAK-Nisma 47 apo 2.22 për qind, Lista Guxo 20 apo 0.94 për qind, nuk e di 70 apo 3.31 për qind.

Presidentja e Kosovës, Vjosa Osmani, ka shprehur falënderime ndaj ish-kryeministrit të Mbretërisë së Bashkuar, Tony Blair, për “shpëtim nga shfarosja”. Osmani ka shprehur ka shprehur mirënjohjen e saj dhe të popullit të Kosovës për kontributin për çlirimin e vendit, raporton EO.

Në konferencën përbashkët me ish-kryeministrin Blair, e para e shtetit ka deklaruar se vendimi i atëhershëm për intervenim ishte i duhur dhe se për këtë, mirënjohës është i gjithë populli i Kosovës.

“Në vitin ’99 roli juaj si kryeministër britanik gjatë ndërhyrjes së NATO-s në Kosovë ishte vendimtar, ndaj sikurse atëherë që ishit hero i popullit të Kosovës, si dhe hero i lirisë e demokracisë; edhe sot jeni hero i paqes për vendimin e drejtë të asaj kohe dhe gjithë përkrahjen që ia keni dhënë Kosovës gjatë këtyre 25 viteve”, ka thënë ajo.

“25 vite pas dhe çdo ditë nga ajo, ne ju themi ‘faleminderit Sir Tony Blair’, që përkundër sfidave ju orientuat kompasin e historisë në anën e mbrojtjes së vlerave që kanë përcaktuar kapitujt më të lavdishëm të historisë njerëzore”, ka thënë Osmani.

“Me forcat aleate të NATO-s ju na shpëtuat nga shfarosja e cila synohej nga regjimi gjenocidal i Millosheviqit. Në kujtimet e juaja ju vet e keni thënë se intervenimi i Kosovës ishte ‘një betejë midis të mirës e të keqes, një betejë midis qytetërimit dhe barbarisë dhe një betejë midis demokracisë dhe diktaturës’. Kosova sot është një nga trashëgimitë tuaja më të suksesshme, është një nga mësimet se mbrojtja e lirisë, paqes dhe demokracisë janë shtyllat e civilizimit dhe obligim i secilit në çfarëdo kohe”, ka deklaruar Osmani.

Osmani ka përmendur faktin se shumë fëmijë të pasluftës e gëzojnë emrin e Tony Blair, duke i cilësuar si shenja të gjurmëve që ish-kryeministri ka lënë te populli.

“Ju na shpëtuat nga shfarosja. Ju keni thënë se intervenimi në Kosovë ishte një betejë midis të mirës dhe keqes. Shumë fëmijë të asaj kohë mbajnë emrin tuaj. Trashëgimi juaja në Kosovë është trashëgimi e shprese, lirisë dhe partneritetit”, u shpreh Osmani.

Ndërkohë, ish kryeministri Tony Blair tha se është i nderuar që ndodhet në Kosovë dhe shtoi se mezi pret që ta shohë vendin tonë në ‘familjen e kombeve’.

“Është emocion i madh për mua të jem sërish në Kosovë. Dua të falënderoj popullin e Kosovës për përcaktimin e tyre 25 vite më parë dhe për vendosmërinë e tyre të palëkundur që ta shohin të mirën, çlirimin e para 25 viteve. Atëherë isha i bindur që ishte gjëja e bindur për ta bërë dhe vazhdoj ta kem këtë bindje dhe ashtu jam i bindur edhe sot që duhet të rrimë krah Kosovës në mënyrë që e ardhmja e Kosovës të jetë në linjë me meritat e njerëzve të saj”, u shpreh Blair.

“Këtu po ndodhin shumë gjëra, pres me padurim ta shoh ditën kur Kosova si komb i pavarur dhe Sovran zë vendin e duhur në familjen e kombeve. Së shpejti do ti adresohem deputetëve të Kuvendit por dua të shpreh falënderimin ndaj njerëzve të Kosovës”, deklaroi ish-kryeministri britanik.

Kryetari i Kuvendit, Glauk Konjufca, në kuadër të shënimit të 25 vjetorit të çlirimit të vendit, ka pritur në takim ish-kryeministrin britanik, Tony Blair, raporton EO.

Blair, më herët u takua me presidenten Osmani, me ç’rast mbajtën një konferencë për media.

Kjo vizitë, siç njofton ambasada e Shtetit të Izraelit në Kosovë, po bëhet “në kuadër të angazhimeve tona për bashkëpunim dhe shkëmbim të përvojave në fushën e shëndetësisë mes Izraelit dhe Kosovës”.

Tamar Ziv, Ambasadore e Shtetit të Izraelit në Kosovë, ka shoqëruar Dr. Yoel Har-Even, Zëvendës-president për Çështje Globale në Divizionin Global të spitalit Sheba Tel HaShomer, dhe znj. Mika Amram, Drejtore e Shërbimeve Globale të Pacientëve në spitalin Sheba Tel HaShomer, gjatë vizitës së tyre të punës në Kosovë.

Thuhet se në këtë vizitë u diskutuan tema të shumta, me fokus të posaçëm në trajnimin e personelit mjekësor.

Për mikpritjen e tyre, ambasadorja Ziv ka falënderuar Arben Vitinë, ministër i Shëndetësisë, Dafina Gexha-Bunjakun, zëvendësministre e Shëndetësisë, Elvir Azizin, drejtor i përgjithshëm në SHKSKUK, Dr. Dafina Bashollin dhe Dr. Baton Kelmendin, specialistë të mjekësisë emergjente, Dr. Narqize Arenliu-Hoxhajn, drejtore e përgjithshme në Spitalin e Përgjithshëm të Prizrenit, Dr. Laura Nushin, drejtore e përgjithshme në Spitalin e Përgjithshëm të Mitrovicës, Dr. Gëzim Berishën, drejtor mjekësor në Spitalin e Përgjithshëm të Mitrovicës, Dr. Valbona Krasniqin, drejtore e Mjekësisë Fizikale, Dr. Teuta Osmani Vllasollin, specialiste e fiziatrisë, dhe specialistët e mjekësisë fizikale, Dr. Ardiana Murtezanin, Dr. Ilirjana Boshnjaku Dallkun dhe Dr. Nerimane Abazin.

Ambasadorja Ziv ka falënderuar edhe Roy Roznek, Konsullin e Nderit të Kosovës në Izrael, i cili gjithashtu iu bashkua takimeve.

Siç njofton Ambasada, spitali Sheba është renditur si spitali i 9-të më i miri në botë nga “Newsweek”.

Konflikti në familjen Kokollari në Shtime që ndodhi mbrëmjen e 19 majit ka përfunduar me fatalitet. Si pasojë e rrahjes mes dy anëtarëve të familjes, djalit dhe babait, ky i fundit nuk ka arritur të mbijetojë. Pas trajtimit për disa javë, ai vdiq në Qendrën Klinike Universitare të Kosovës.

Pasi Polici mori informacionin mëngjesin e së shtunës se Dema Kokollari ka humbur jetën në Klinikën Intensive, rasti mori kthesë tjetër dhe djali i tij u arrestua sërish.

Trupi i pajetë i viktimës është dërguar në IML për obduksion, teksa me urdhër të Prokurorit të Shtetit, i dyshuari është intervistuar.

Sinjali ka mësuar se i dyshuari që u ndalua lidhur me rastin është Shpend Kokollari.

Ai është intervistuar, ku ka deklaruar se qëndron pas deklaratës që ka dhënë ditën kritike ku ka ndodhur rasti dhe më pas me urdhër të Prokurorit është dërguar në mbajtje për 48 orë.

Incidenti në familjen Kokollari që përfundoi tragjikisht

Siç merr vesh Sinjali, në dosjen e Prokurorisë për këtë rast thuhet se fillimisht Dema Kokollari, tashmë i ndjerë ishte kapur me bashkëshorten e tij.

Debati verbal mes çiftit në orët e mbrëmjes të 19 majit eskaloi edhe më shumë dhe viktima dyshohej se e kishte kërcënuar gruan se do ta pësojë keq.

E njëjta, sipas burimeve brenda Prokurorisë, ka kërkuar ndihmën e djalit të saj, i cili pasi ka arritur në dhomë, ka ndërhyrë, duke e larguar nënën e tij nga babai.

Por, asgjë nuk kishte mbaruar këtu, pasi babë e bir u përleshën mes vete, ashtu që Dema i ndjerë dyshohet se kishte goditur djalin me tavolinë, e më pas ky i fundit e shtynë derisa ai rrëzohet dhe e humb vetëdijen.

Ka qenë djali, tashmë i dyshuari, Shpendi, i cili kishte kërkuar ndihmën e Policisë, duke e raportuar rastin.

Palët atë ditë janë dërguar për trajtim mjekësor e më pas kanë dhënë deklaratat e tyre para hetuesve policorë, ku kanë dëshmuar për atë që ka ndodhur.

I ndjeri ishte dërguar më pas në QKUK për trajtim mjekësor, por që nuk arriti t’iu bëjë ballë plagëve.

Ndryshe, brenda afatit ligjor pritet të ushtrohet edhe kërkesa për masën e sigurisë ndaj të dyshuarit./sinjali