Category: Lajme

Përgatiti: Arian Hajdaraj 

Mërgimtarët që hyjnë në Kosovë nga 1 korriku, nuk do kenë nevojë ta paguajnë Policën e Sigurimit.

Këtë taksë, automjeteve jokomerciale deri në 9 ulëse, Qeveria do t’ua subvencionojë me vlefshmëri për një muaj.

Nga njohës të ekonomisë, ky vendim po shihet si fushatë dhe si zgjidhje joadekuate.

“Besoj që diaspora e mendon një tretman më dinjitoz. Nuk besoj që ka nevojë për një muaj që të jetë një periudhë kohore e cila është e fragmentuar, sepse ata e meritojnë që të jenë tërë vitin të mbështetur. Ka nevojë edhe për digjitalizim”, deklaroi Safet Gërxhaliu, njohës i ekonomisë.

“Qeveria po mundohet të bëjë politikë me mërgimtarët. Sikur të ishte vendimi në vitin e parë, kur s’ka pasë kohë për ta ndryshuar gjendjen. Por tri vjet mandat të kësaj qeverisjeje, mendoj se është e papranueshme sepse kjo nuk është zgjidhje, sepse mërgimtarët nuk e kanë problem një pagesë, por për ta është me rëndësi që qarkullimin ta kenë më të lehtë”, tha profesori i ekonomisë, Fidan Qerimi.

Në vend të subvencionimit, anëtarësimi në Kartonin e Gjelbër, po konsiderohet si nevojë.

Pak muaj pas themelimit në vitin 2011, Byroja Kosovare e Sigurimit kishte aplikuar për t’u bërë pjesë e Byrosë së Kartonit të Gjelbër. Mirëpo, ky institucion kishte konstatuar se shteti fillimisht duhet të anëtarësohet në Kombet e Bashkuara.

Një dekadë më vonë, zëvendësministri Hysen Durmishi kishte deklaruar se Kosova ka kryer obligimet teknike, derisa mos-anëtarësimi mbetet peng i çështjeve politike./atvlive.tv/

Për më shumë klikoni në linkun e mëposhtëm:

https://www.youtube.com/live/_PTOGVRIiDg?si=xSiii3GG7RmznwWw

Policia ka sekuestruar një sasi të konsiderueshme të cigareve të kontrabanduara ditën e sotme në Gjakovë, duke zënë në flagrancë një person i cili po i barte nga automjeti i tij.

Siç raportoi Sinjali më parë, Policia e Kosovës ndaloi një veturë e cila konsiderohej si e dyshimtë, dhe pas patrullimit hasi në një sasi të madhe të duhanit që po kontrabandohej nga shoferi.

Pas kontrollit total të veturës dhe personit, Policia ka konfiskuar mallin dhe kanë njoftuar doganën.

Lidhur me këtë ka njoftuar edhe Policia e Kosovës, ku ka dhënë detaje shtesë rreth këtij rasti.

Sipas të njëjtëve, gjatë kontrollimit të automjetit është vërejtur se shoferi (F.L), kishte të ngarkuar një sasi prej tre mijë e dyqind e pesëdhjetë (3250) pako cigare, prej të cilave 1500 pako të llojit ‘Marlboro’, ndërsa pjesa tjetër e llojit ‘Winston’.

“Pasi që i dyshuari nuk posedonte dokumente përkatëse për cigaret që transportonte, në konsultim me prokurorin e shtetit, ato janë sekuestruar, mbi dyshimin se të njëjtat ishin të kontrabanduara. Lënda dhe malli i sekuestruar i është dorëzuar autoritetit Doganorë të Kosovës për procedurë të mëtejme”, thuhet në njoftim.

Themelimi i grantit të katërt, amendamentimi i Ligjit për prokurimin publik, menaxhimi me kontratat kolektive, eliminimi i burokracisë për themelimin e ndërmarrjeve publike lokale janë disa nga çështjet që komunat kërkojnë zgjidhje nga niveli qendror tash e dy vjet, por të cilat vazhdojnë të hasin në vesh të shurdhër.

Kështu thotë kryetari i Asociacionit të Komunave të Kosovës, Sazan Ibrahimi teksa potencon se shumica absolute e kryetarëve të komunave janë ankuar se niveli qendror nuk është duke i përkrahur në mënyrë të sinqertë.

“Asnjë zotim, asnjë kërkesë e komunave që është parashtruar që dy vite e më shumë, nuk ka pasur asnjë përpjekje nga niveli qendror që ta zgjidhë problemin. E kemi problemin me grantin e katërt, amendamentimin e ligjit për prokurim publik, kontratat kolektive që janë duke u marrë me dhjetëra miliona euro komunave. Komunat kanë kërkuar ndihmë. Eliminimin e burokracisë apo politizimin e proceseve sa i përket themelimit të ndërmarrjeve publike lokale, ku në disa raste niveli qendror me qëllim i zvarrit proceset vetëm e vetëm që mos t’ia lejojë komunave krijimin e ndërmarrjeve publike lokale edhe pse ato i përmbushin kriteret e kërkuara nga ligji për ndërmarrje publike”, tha Ibrahimi.

Ndër sfidat kryesore, Ibrahimi përmend kontratat kolektive të cilat po zbatohen padrejtësisht në kurriz të komunave, duke u kushtuar atyre me miliona euro. Ai potencon se këtë vit 22 komuna do të kenë mangësi në mjetet financiare për investime të reja kapitale.

“Shumica absolute e kryetarëve të komunave janë duke u ankuar që niveli qendror nuk është duke i përkrahur në mënyrë të sinqertë. Përveç mungesës së përkrahjes në investime kapitale edhe bashkëpunimin nuk e kanë korrekt me nivelin qendror…22 komuna këtë vit do të kenë mangët mjete financiare për investime kapitale të reja. Gjithashtu, mjete buxhetore të cilat ndahen drejtpërdrejt nga qeveria. Ka plot komuna të cilat nuk do të kenë asnjë cent për investime të reja kapitale.

Në anën tjetër kontratat kolektive të cilat janë duke u zbatuar padrejtësisht në kurriz të komunave duke ua marrë mjetet financiare nga të hyrat vetanake, ku të hyrat vetanake qëllimin kryesor e kanë investime kapitale, atëherë komunat do të kenë shumë shkurtime sa i përket investimeve kapitale. Në asnjë rast kryetarët e komunave dhe asociacioni kurrë nuk ka qenë kundër kontratave kolektive. Por, gjithmonë neve kemi kërkuar që zbatimin e kontratave kolektive ta bëjë niveli qendror, sepse ata janë nënshkrues”, tha Ibrahimi.

Ibrahimi thotë se vonesat në bartjen e të hyrave vetanake po u kushton komunave në raportin e auditorit dhe grandin e skemës së performancës. Ai potencon se shumica e kryetarëve këto vonesa po i konsiderojnë si politike

“Është një nen aty ku thuhet që me automatizëm barten të hyrat vetanake të komunave nga niveli qendror dhe kemi pasur vonesa dhe komunat janë duke theksuar se po ka ende vonesa. Ato mjete i kanë të komunave dhe niveli qendror nuk mund t’i mbajë ato mjete, sepse duhet t’i shohin në nivelin lokal. Këta po i vonojnë këto mjete. Pse po i vonojnë ata e dinë më së mirë. Kryetarët e komunave, shumica absolute e tyre thotë që ka ndoshta edhe konotacione politike, sepse nëse t’i vonon mjetet financiare t’i nuk mund t’i zbatosh projektet. Kontratat janë të nënshkruara dhe nëse komunat nuk i përmbahen kontratave, mund të ketë edhe penallti. Të gjitha këto mund të reflektojnë edhe në raportin e auditorit dhe pastaj nëse reflektohen këto mangësi në raportit e auditorit jo për fajin e komunave atëherë po paralizohen komunat edhe në grandin e skemës së performancës”, thekson Ibrahimi.

Kryetari i Asociacionit të Komunave të Kosovës thotë se është duke u hartuar një udhëzim administrativ, me të cilin niveli qendror do të tentojë t’i marrë hapësirat e komunave. Për këtë udhëzim administrativ, Ibrahimi thotë se nuk ka bazë ligjore.

Ai tregon se komunat janë në proces të hartimit të buxhetit komunal për 2025, për çka thotë se pritet deri në fund të korrikut apo fillim të gushtit t’i pranojnë limitet buxhetore të shpenzimeve. Lidhur me këtë, Ibrahimi thotë se komunat nuk janë të kënaqura, pasi do të ketë shkurtime në personelin arsimor dhe atë shëndetësor.

Irani ka paralajmëruar se “të gjitha frontet e rezistencës” – një grup i Iranit dhe i aleatëve të tij rajonalë – do të përballeshin me Izraelin, nëse ai sulmon Libanin.

Komentet nga misioni i Iranit në Nju Jork vijnë pas rritjes së frikës për zgjerimin e një lufte rajonale, ku do të përfshihej Izraeli dhe lëvizja libaneze, Hezbollah, që mbështetet nga Irani. Të dyja palët janë përfshirë në shkëmbime zjarri në baza ditore, që kur ka nisur lufta në Gazë më 7 tetor 2024.

Këmbimi i zjarrit është përshkallëzuar gjatë këtij muaji, së bashku me retorikën e të dyja palëve. Ushtria izraelite ka thënë se planet për një ofensivë në Liban “janë miratuar”, duke nxitur Hezbollahun të kundërpërgjigjet se asnjë pjesë e Izraelit nuk do të kursehej nga një konflikt i plotë.

Përmes një postimi në rrjetet sociale, misioni iranian tha se “e vlerësojmë si luftë psikologjike propagandën e regjimit sionist me synimin që të sulmojë Libanin”.

Por, shtoi se “nëse [Izraeli] nis një agresion ushtarak në shkallë të plotë, do të niste një luftë shfarosëse. Të gjitha opsionet, edhe përfshirja e plotë e Fronteve të Rezistencës, nuk përjashtohen”.

Lufta në Gazë nisi pasi Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – sulmoi jugun e Izraelit.

Irani, që mbështet Hamasin, ka lavdëruar sulmin, që e ka cilësuar sukses, por ka mohuar se është përfshirë në të.

Përveç sulmeve të Hezbollahut në veri të Izraelit, rebelët në Jemen, që mbështeten nga Irani, vazhdimisht kanë sulmuar anijet në Detin e Kuq, në shenjë solidariteti me palestinezët.

Irani mbështet edhe grupe të tjera në rajon.

Republika Islamike nuk e njeh Izraelin që nga revolucioni i vitit 1979 që rrëzoi udhëheqësin e Iranit, të mbështetur nga SHBA-ja.

Në prill u rrit frika për një luftë rajonale, pas një sulmi ajror në Konsullatën iraniane në Damask, që la të vrarë shtatë anëtarë të Gardës Revolucionare Islamike.

Irani u kundërpërgjigj duke lëshuar drejt Izraelit dronë dhe raketa.

Mediat iraniane më pas raportuan se janë dëgjuar shpërthime në provincën iraniane, Isfahan, ndërkaq zyrtarët amerikanë u cituan të kenë thënë për mediat amerikane se Izraeli kishte kryer sulm hakmarrës ndaj armikut të tij të përbetuar, Iranit.

Teherani minimizoi sulmin e dyshuar izraelit./REL

Kryeministri i Kroacisë, Andrej Plenkoviq, ka njoftuar për një takim me emisarin e BE-së, Miroslav Lajçak, në kuadër të Forumit të Dubrovnikut.

Ai tha se me të ka folur edhe për dialogun Kosovë-Serbi.

“Gjatë Forumit të Dubrovnikut në takim me Miroslav Lajçak. Diskutuam situatën politike në Europën Juglindore dhe procesin e dialogut ndërmjet Kosovës dhe Serbisë”.

Një pjesëtar i Policisë së Serbisë është gjuajtur sot me hark në qafë para Ambasadës së Izraelit në Beograd dhe aktualisht ndodhet në Qendrën Emergjente. Gjatë sulmit, pjesëtarët e policisë kanë arritur të vrasin sulmuesin.

Ministri i Punëve të Brendshme, Ivica Daçiq, ka deklaruar se një person i panjohur, identiteti i të cilit është duke u përcaktuar, ka qëlluar me hark një pjesëtar, i cili ishte në detyrë për të siguruar ambasadën izraelite.

“Sot rreth orës 11:00, një person i panjohur, identiteti i të cilit është duke u përcaktuar, ka qëlluar me hark një pjesëtar të Xhandarmërisë i cili ishte në shërbimin e sigurisë në ambasadën izraelite dhe e ka goditur në qafë”, sqaroi ai.

Daçiq ka deklaruar se pjesëtari i policisë M.J., ka përdorur armën në vetëmbrojtje dhe ka mundur sulmuesin, i cili si pasojë e plagëve të marra ka ndërruar jetë, shkruan Danas.