Category: Lajme

Përgatiti: Armand Hoti

Misioneve diplomatike të Kosovës, mund t’u shtohet një mekanizëm i ri inspektues.

Ministria e Punëve të Jashtme, synon ta funksionalizojë postin e inspektorit diplomatik.

“Misionet diplomatike dhe postet konsullore kanë për obligim t’i përgjigjen inspektorit diplomatik gjatë gjithë procesit të inspektimit, duke i ofruar qasje të papenguar në të gjitha hapësirat e përfaqësisë diplomatike dhe/ose konsullore, si dhe dokumentacionin e nevojshëm”, thuhet në Projekt-Ligjin për Shërbimin e Jashtëm.

Referuar projekt-ligjit për Shërbimin e Jashtëm, inspektori diplomatik, mes tjerash, ka kompetencë edhe ta intervistojë personelin e misionit të jashtëm.

Ndërkaq, në rast të evidentimit të ndonjë shkeljeje ligjore, inspektori i rekomandon Ministrit apo Sekretarit të Përgjithshëm, marrjen e masave ndaj diplomatëve.

Por profesori i diplomacisë, Valon Murtezaj, thotë se llupa inspektuese e misioneve të jashtme, nuk duhet të lihet në kompetencën e një zyrtari.

“Më shumë se të grumbullohet pushteti në një individ, në raste të caktuara, vlerësimet e ambasadave të caktuara, nëse është e nevojshme, bëhen nga task-forca apo nga ekipe vlerësuese”, tha Murtezaj.

Projekt-ligji parasheh që specifikat për procedurat e funksionimit të inspektorit, emërimin dhe shkarkimin e tij, të përcaktohen me një rregullore të brendshme të Ministrisë.

Sipas ish-zëvendësministrit të Punëve të Jashtme, këto çështje duhet të sqaroheshin në ligj, meqë ka rrezik të instrumentalizimit politik të inspektorit.

“Duhet të rregullohen me ligj dhe të mos lihen për faza të mëtejshme të rregullimit me akte nënligjore, sepse gjithnjë ka mundësi të keqpërdorimit pastaj të këtyre individëve dhe këtyre procedurave”, tha Murtezaj.

Edhe njohësi i politikës së jashtme, Emir Abrashi thotë se ekziston potenciali për keqpërdorime me këtë post, meqenëse është nismë pozitive.

“Projekt-ligji që është në konsultim publik, i lë shumë hapësirë që sa i përket funksioneve të inspektorit diplomatik, të përcaktohen me Udhëzim Administrativ, dhe këtu ka mundësi edhe për abuzim. Prandaj, në këtë aspekt mendoj që është shumë e rëndësishme që te çështja e inspektorit diplomatik, të përcaktohen detyrat më konkretisht në projekt-ligj”, tha Abrashi.

Përpjekje për ta jetësuar këtë pozitë, pati edhe në kohën kur Hashim Thaçi ishte ministër i Punëve të Jashtme.

Përgatiti: Pranvera Krasniqi

Prej 54 projektligje ta parapara për 6 mujorin e parë të këtij viti në Kuvendin e Kosovës, vetëm 11 për qind prej tyre janë miratuar. 4 prej tyre janë në procedurë, kurse 44 nuk kanë filluar fare.

Kjo statistikë tregon dështim, sipas shefit të Grupit Parlamentar të Aleancës për Ardhmërinë e Kosovës, Besnik Tahiri, të cilin ky po ia faturon pushtetit.

Në konferencën e së dielës, Tahiri tha se shumë projektligje të rëndësishme, kanë mbetur vetëm premtime të parealizuara.

“Projektligji për diasporën, skemat pensionale, kush i ka penguar të punojnë për to…”, tha Tahiri.

Në mesin e tyre projektligjeve të pa miratuara ka disa që kanë të bëjnë me shëndetësinë. Megjithatë, Tahiri vlerësoi se Kosova qëndron dobët në aspektin e zhvillimit të këtij sektor, pasi është shteti i vetëm në rajon pa sigurime shëndetësore.

“Më e keqja është të shëndetësia, as pas 3 vjet e gjysmë s’ka asnjë hap tutje për sigurimet….”, tha Tahiri.

Ndër tjera, Tahiri pati kritika edhe për rrugën nacionale Prishtinë-Podujevë, punimet në të cilën nuk kanë përfunduar tërësisht as pas rreth 8 vjetëve.

Përgatiti: Armand Hoti

Së pari, përzgjidhet ndeshja. Më pas kuota më e përshtatshme.

Krejt në fund, caktohet vlera e pagesës dhe vendoset basti.

Në këtë formë online, po ushtrohet aktiviteti i bastoreve dhe lojërave tjera të fatit, që nga 2019-ta, kur në Kosovë u ndalua kjo industri.

Gjatë vitit të kaluar, policia thotë se i evidentoi 42 raste, të organizimit të skemave piramidale dhe bixhozit të jashtëligjshëm. Kurse në tre muajt e parë të këtij viti, u evidentuan edhe 12 raste të tjera.

“Vetëm numri i rasteve për veprën penale “Organizimi i skemave piramidale dhe bixhozit të paligjshëm” nga neni 294 i KPRK-së, për periudhën kohore 2023-2024-tremujori i parë, të cilat janë nxjerrë nga SIPK: 2023 – 42 raste, TM1 2024 – 12 raste”, thuhet në përgjigjen e Policisë.

Policia nuk sqaron nëse po i referohet ndonjë rasti të organizimit të basteve online.

Sociologu Vehbi Mujku thotë se lojërat e fatit nuk sjellin dobi.

“Përveç problemeve familjare, ku ka pasur dhunë në familje, ku ka pasur probleme me fëmijë, ka pasur edhe persona të cilët kanë humbur shtëpi, lokale, troje, banesa, janë futur në fajde, në kredi, vetëm për t’i mbuluar këto shpenzime”, tha Mujku.

Gjatë 2017-ës dhe 2018-ës, Administrata Tatimore e Kosovës gjeneroi mbi 1.6 milion euro nga tatimet e bizneseve të lojërave të fatit.

Ekonomisti Fidan Qerimi thotë se tash, shteti nuk fiton asgjë nga kjo fushë, edhe pse po përdoren mënyrat alternative për të luajtur.

“Çdo aktivitet biznesor që nuk është i rregulluar me ligj, do të thotë se ka vjelje të tatimit dhe kjo është një humbje, sidomos në këtë biznesin e lojërave të fatit, është një qarkullim jashtëzakonisht i lartë, dhe ka miliona që janë në humbje besoj nga ky biznes”, tha Qerimi.

Meqë nuk ekziston mundësia të ndalohen plotësisht, Qerimi propozon që të kthehet ligjshmëria e lojërave të fatit në Kosovë, mirëpo me kritere më të ashpra.

“Për mendimin tim, fillimisht ne duhet ta ndryshojmë ligjin dhe t’i lejojmë këto biznese të operojnë edhe në aspektin fizik. Shteti duhet ta rrisë kontrollin në këto pika biznesore”, tha Qerimi.

Në vitin 2019, në dy kazino të ndryshme, brenda një jave u vranë dy persona.

Kjo nxiti Kuvendin e Kosovës, ta miratojë ligjin që ndalon lojërat e fatit, në mbarë territorin e vendit.

Mirëpo, kjo bëri që të shtohen bizneset e këtij lloji në shtetet fqinje, në afërsi të kufijve me Kosovën.

Një zjarr i madh ka shpërthyer në juglindje të Athinës të dielën, më 30 qershor, teksa autoritetet presin që situata të përkeqësohet edhe më shumë gjatë valëve të të nxehtit më vonë gjatë verës.

E mësuar me vera përvëluese, Greqia po përballet me një sezon të rëndë të zjarreve, teksa ka përjetuar valën e parë të të nxehtit me temperatura që kanë arritur në 44 gradë Celsius.

Sipas mediave lokale, zjarri nisi në qarkun Keratea mëngjesin e së dielës dhe flakët iu afruan shtëpive të banimit, përderisa kjo zonë e Athinës po përballet edhe me erëra të fuqishme.

Mediat në Greqi kanë raportuar se tri shtëpi janë djegur krejtësisht nga zjarri.

Afër 140 zjarrfikës dhe ekipe të tjera të shpëtimit, tetë helikopterë dhe nëntë avionë janë angazhuar për të shuar flakët.

Autoritetet kanë aktivizuar alarmin për evakuim, duke u bërë thirrje banorëve që të evakuohen nga gjashtë zona afër kryeqytetit grek, Athinës.

Zjarri në Athinë shpërtheu një ditë pasi një zjarr tjetër kishte shpërthyer në zonën e njëjtë, por që u vu nën kontroll nga zjarrfikësit.

Po ashtu, një zjarr shpërtheu në ishullin Serifos pasditen e së shtunës, por autoritetet arritën që ta vinin nën kontroll mëngjesin e së dielës.

“E gjithë pjesa jugperëndimore e Serifosit është djegur. Zjarri u ndal kur arriti në bregdet”, tha kryetari i Serifosit, Konstantinos Revintis.

Zjarri shkaktoi dëme nëpër shtëpi, depo dhe objekte të kultit, tha ai.

Ministria e Mbrojtjes Civile tha se pret zjarre me rrezik të lartë në Atika, Peloponez, Kretë, rajone që gjenden në veri dhe jug të Egjeut.

Sipas autoriteteve, më 29 qershor në mbarë Greqinë shpërthyen mbi 40 zjarre dhe shteti u përball me erëra që tejkaluan 100 kilometra në orë.

Më 30 qershor kryeministri grek, Kyriakos Mitsotakis, u bëri thirrje grekëve që të përgatiten për një sezon të vështirë të zjarreve.

“Kohë të vështira po na presin. Përpjekjet tona janë të vazhdueshme”, tha ai. /REL

Ministri i Punëve të Brendshme, Xhelal Sveçla, ka reaguar pasi në komunat veriore janë vendosur posterë me fotografi të presidentit serb, Aleksandar Vuçiq, dhe me mbishkrimin “Komandati suprem, po të presim”.

Sveçla përmes një shkrimi në Facebook, ka thënë se “nëse Vuçiqi është nisur pa kërkesë te Ministria jonë e Punëve të Jashtme dhe Diasporës, edhe ne po e presim të vijë dhe mandej mund ta vizitoni në burg, ku ai i ka tashmë disa miq të tij”.

“I paskan ngjitur tinëz gjatë natës disa postera në veri të Kosovës. Aty thonë që po e presin presidentin e Serbisë të vijë duke e quajtur atë ‘komandant’. Nëse është nisur pa kërkesë te Ministria jonë e Punëve të Jashtme dhe Diasporës, edhe ne po e presim të vijë dhe mandej mund ta vizitoni në burg, ku ai i ka tashmë disa miq të tij”, ka shkruar Sveçla.

Posterë me fotografi të presidentit serb, Aleksandar Vuçiq, dhe me mbishkrimin “Komandati suprem, po të presim”, janë vendosur në disa objekte në katër komunat veriore.

Lidhur me këtë zëvendësdrejtori i Policisë në Veri, Veton Elshani, ka thënë se është iniciuar rast “Nxitje e urrejtjes”.

“Në disa lokacione të 4 komunat e Veriut të Vendit janë shpërndarë pamflete me foton e Kryetarit të Serbisë. Pas konsultimit me Prokurorinë e Shtetit është hap rasti “Nxitje e Urrejtjes”. Nuk kemi të dyshimtë, ndërsa policia po punon në drejtim të ndriçimit të rastit”, tha Elshani.

Fuqizimi i bashkëpunimit në proceset e integrimit euroatlantik të Kosovës, iniciativat e përbashkëta rajonale, bashkëpunimi në siguri, mbrojtje dhe shkëmbime tregtare, ishin temat në fokus të takimit që Zëvendëskryeministrja dhe Ministrja e Punëve të Jashtme dhe Diasporës, Donika Gërvalla pati me Ministrin e Jashtëm të Kroacisë, Gordan Grlić-Radman.

Në takimin bilateral të mbajtur në Forumin e Dubrovnikut, Ministrja Gërvalla shprehu mirënjohjen ndaj Kroacisë për mbështetjen e madhe që i ka dhënë Republikës së Kosovës në procesin e anëtarësimit të Kosovës në Këshillin e Evropës, duke deklaruar që ky proces duhet të finalizohet sa më shpejtë me anëtarësimin e plotë në KiE.

Ministrja Gërvalla në takim me Ministrin Radman foli edhe rreth veprimeve destabilizuese të Serbisë në rajon dhe nevojën e rritjes së bashkëpunimit mes shteteve pro perëndimore të Ballkanit Perëndimor në ruajtjen e paqes dhe stabilitetit.

Dhjetëra të moshuar nuk dinin se çfarë do të ndodhë me fatin e tyre pasi institucioni ku ata po qëndronin u mbyll nga shteti. Autoritetet në Kosovë nuk u bënë vend të moshuarve, ndërsa familjarët ankohen se patën vështirësi për sistemimin e tyre, pasi që në vendimin për qendrën “Orenda”, në Pejë, thuhej se e njëjta duhet të mbyllet për 24 orë.

Gati dy vjet më parë, autoritetet në Kosovë kësaj qendre ia morën licencën pas publikimit të një videoje që tregonte se si keqtrajtohej një e moshuar nga infermieret.

Valter Gjeloshi, i cili jeton në Amerikë e kishte vendosur babain e tij në këtë qendër për të moshuar. Ai ishte një nga 29 të moshuarit që qëndronin në këtë institucion deri në fund të vitit 2022.

Gjeloshi tregon për KosovaPress, se asnjë qendër nuk ka qenë e hapur atë kohë për sisteminin e babait të tij.

“Ka qëndruar këtu në Amerikë për gjashtë muaj derisa kemi gjetur një vend tjetër për ta dërguar, por gjashtë muaj ka zgjatur derisa kemi gjetur një vend tjetër për ta dërguar….Nuk kemi pasur asnjë kontakt me institucionet, as me shtet, as me askënd, nuk ka dhënë asnjë përgjigje. Vetëm kemi qenë të informuar brenda dy ditëve që të tërheqim nga ‘Orenda’”, tregon ai.

Prindi i tij tashmë po qëndron në një qendër për të moshuar në Istog, por Valteri shprehet i pakënaqur me mënyrën se si ishte detyruar ta tërheq babain nga qendra paraprake.

“Që ta tërheqësh plakun brenda dy ditëve nuk ndodhë askund në botë pa e bërë një zgjidhje ose se çka duhet të veprohet me të moshuarit. Natyrisht ka qenë një gjë që unë kam qenë aty, por nëse nuk do të isha aty, plaku ynë do të kishte mbetur në rrugë, sepse nuk ka pasur askush që të shkojë ta marrë, e gjithë familja jetojmë jashtë”, shton ai.

KosovaPress ka tentuar të mësojë nga Ministria e Financave, Punës dhe Trasfereve për hapat që kishin ndërmarrë pas mbylljes dhe nëse kanë informacione lidhur me të moshuarit, por kjo ministri nuk ka kthyer përgjigje deri në publikimin e këtij artikulli.

Informacione zyrtare nuk ka as Komuna e Pejës, meqë zëdhënësi, Faik Zekaj thotë se nuk është kompetencë e tyre.

“Informacione të sakta nuk kemi që të na njoftojnë zyrtarisht, për shkak se ai e ka procedurën me Ministrinë e Financave, nuk e ka me Komunën e Pejës. Në komunë e ka marrë vetëm objektin në shfrytëzim, në ankand publik e ka rinovuar, e ka rregulluar dhe e ka bërë si shtëpi të pleqve. Tash sipas informatave, një pjesë i kanë marrë familjarët e tyre, një pjesë është një shtëpi e pleqve në Zahaq, komplet një shtëpi private, kemi informata por jo zyrtare, kështu që saktësisht se çfarë ka ndodhur ne si komunë nuk kemi saktë informacione. Kemi si drejtori e Mirëqenies Sociale, por tash për këtë kohë nuk kemi informata se ku janë”, deklaron ai.

Pas mbylljes së Orendës, Qendra për Kujdesin ndaj të Moshuarve në Zahaq të Pejës, kishte marrë shumë kërkesa nga familjarët për vendosjen e të moshuarve. Pronari Liridon Kastrati thotë se kapacitetet kanë qenë vetëm për dy të moshuar.

“Në momentin kur ka ndodhur rasti i Orendës, ne nuk kemi pasur hapësirë shumë, dy vende të lira i kemi pasur dhe kërkesat në atë moment kur ka ndodhur rasti, kanë qenë shumë të mëdha, mirëpo nuk kemi pasur mundësi që t’i pranojmë për shkak të vendit. Dy banorë të cilët janë pranuar nga qendra ‘Orenda’, kanë ardhur dhe me pranim të rregullt si të gjithë banorët që pranohen me kërkesa të familjarëve….Ka qenë dy-tri ditë pas rastit që ka ndodhur, kanë qenë kërkesa më intensive më të mëdha, por edhe gjatë kohës pas një muaji por janë edhe sot kërkesa në rritje për regjistrimin e tyre (për banorë të rinj)”, thekson ai.

Pronari i qendrës për të moshuarit “Orenda”, në Pejë, Anton Rasaj e konsideron të padrejtë mbylljen e institucionit që ai e drejtonte.

“Pas vendimit për mbylljen e Orendës për 24 orëve e kanë marrë të premten në orën 16:00, ku kërkohet që brenda 24 orëve të gjithë banuesit janë të detyruar të dalin nga Orenda, këtu ndodhë krimi i dytë njerëzor ndaj të drejtave të njeriut nga qeveria jonë e tanishme apo nga personat përgjegjës në Ministrinë e Financave, sepse në asnjë institucion nuk ekziston mundësia që brenda 24 orëve banuesit të jenë të detyruar të lëshojnë vendstrehimin apo institucionin tonë ‘Orenda’. Unë i kam informuar familjarët, familjarët kanë qenë kategorisht kundër tërheqjes së familjarëve nga ‘Orenda’. Na kanë përkrahur tërë kohën, i kam edhe faktet, edhe shkresat, kemi edhe peticione të familjarëve të cilët janë kundër tërheqjes së familjarëve të tyre nga ‘Orenda’”, shprehet ai.

Ai beson se do ta rikthejë licencën e punës, meqë konsideron se në këtë rast është bërë “komplot shtetëror”.

“Ky është një vendim arbitrar, i gjithë rasti çfarë ka ndodhur, pa marrë parasysh që dhuna është dhunë dhe duhet të vlerësohet dhe kritikohet nga të gjithë njerëzit normal, ky është një komplot shtetëror. Ky është krim ndaj një institucioni që është bërë me marrjen e licencave. Licencat nuk merren për veprime vetanake, personale. Hetuesia e Pejës ka ngritur aktakuzë ndaj tre personave, ndaj tri infermiereve për veprën e tyre të pahijshme, që duhet të kritikohet nga të gjithë ne edhe nga Orenda. Ne masat i kemi marrë atë ditë kur kemi dëgjuar që ekziston një video dhe ka ndodhur një dhunë. Ato janë suspenduar nga puna dhe ne përgjegjësinë tonë dhe detyrën tonë morale dhe institucionale e kemi kryer. Ato akuzohen për sulm të organizuar, institucioni nuk ka të bëjë me dhunën e një individi”, deklaron ai për KosovaPress.

Rasaj tregon se ka bërë katër padi ndaj institucioneve dhe njerezve të përfshirë në këtë rast, por që nuk është mbajtur asnjë seancë gjyqësore.

Zëdhënësi i Prokurorisë Themelore në Pejë, Shkodran Nikçi thotë se provat tregojnë për fajësinë e tre personave, të cilat brenda disa sekondave kanë goditur disa herë të moshuarën.

“Ky rast fillimisht është hetuar në mënyrë intensive nga Prokuroria Themelore në Pejë, ku në afatin optimal është ngritur aktakuza ndaj tre personave të pandehur, të cilët në bashkëkryerje kanë kryer veprën penale ‘sulmi’ ndaj të moshuarës tani të ndjerë. Për këtë çështje është mbajtur shqyrtimi fillestar, ndërkaq jemi në pritje të thirrjes së gjykatës për të vazhduar shqyrtimi gjyqësor, ku këtë shqyrtim Prokurori i Shtetit do të paraqes provat, do të propozojë dëshmitarë…Ku me deklarimet e tyre dhe me provat që ka Prokurori i Shtetit, do të argumentohet fajësia e kryerjes së kësaj vepre penale ndaj tre personave të pandehur, ku do të bindet edhe trupi gjykues që të njëjtit kanë kryer këtë vepër penale dhe duhet të shpallin fajtor sipas ligjit”, shprehet ai.

Në vendimin e marrjes së licencës së qendrës “Orenda”, ndër të tjera përmenden këto arsye: menaxhmenti ka dështuar në menaxhimin dhe monitorimin e ofrimit të shërbimeve për rezidentët e vendosur në këtë shtëpi, menaxhmenti nuk është kujdesur për zbatimin e plotë të standardeve minimale gjatë ofrimit të shërbimeve brenda kësaj shtëpie, sipas publikimeve në mediat e shkruara dhe elektronike, përveç abuzimit dhe dhunës së ushtruar ndaj rezidentës M.N, infermieret e involvuara në këtë rast, kanë bërë shkelje ligjore në ofrimin e shërbimeve sociale dhe shkelje të Kodit të Etikës për Shërbime Sociale dhe Familjare.

Në mungesë të përkrahjes nga shteti, bizneset e vogla në Kosovë po i shfrytëzojnë panairet për të promovuar produktet e tyre. Ata thonë se ndikimi i këtyre bizneseve është i madh në zhvillimin ekonomik të vendit, derisa paraqesin nevojën për mbështetje institucionale.

Këto biznese tregojnë se interesimi i qytetarëve për produktet e tyre është i kënaqshëm, derisa shtojnë se edhe çmimet janë të arsyeshme.

Në panairin “Ekspos Deçani”, morën pjesë disa biznese nga vende të ndryshe të Kosovës, por edhe nga rajoni.

Përfaqësuesja e ëmbëltores “Cakes by Darina” nga Istogu, Kaltrina Arifaj tregoi se në këtë panair po marrin pjesë e disa lloje të ëmbëlsirave, por theksin e vë tek çokollata e Dubait. Për blerjen e këtij produkti, ajo potencoi se kërkesat po shënojnë rritje.

Përmes ekspozimit të artikujve në panair, Arfiaj pret që të rritet numri i klientëve, si dhe bashkëpunimi me biznese të tjera.

Ajo tha se duhet të ketë përkrahje nga shteti për bizneset e vogla, pasi sipas saj, ato kanë ndikim kyç në zhvillimin e vendit.

Ndërkaq, Besnik Tahirukaj në “Ekspos Deçani”, mori pjesë me disa lloje të mjaltit. Ai i tregoi edhe çmimet e tyre, derisa u shpreh se nuk është e mjaftueshme mbështetja e shtetit për zhvillimin e biznesit të tij.

Përveç bizneseve nga Kosova, në këtë panair morën pjesë edhe ato nga komuna e Pukës, Lezhës dhe Ulqinit.

Ardina Nikaj, asistente në një nga shoqatat për zbutje të varfërisë në qytetin e Pukës, mori pjesë në panair me disa produkte reçeli, bimë medicinale dhe pije alkoolike.

Ajo potencoi se çmimet i produkteve të ekspozuara janë të arsyeshme për vlerën që kanë. Nikaj tregoi se reçelet me bimë të buta kushtojnë 2 euro, ndërsa ata me bimë të egra 3 euro.

Nikaj theksoi se panairet janë frytdhënëse për bizneset, ngase u mundësohet reklamimi i produkteve.

Panairi tradicional veror “Ekspos Deçani” u mbajt për herë të 13-të dhe ishte i hapur dy ditë.

Dy punëtorë janë lënduar dje (e shtunë) në Ferizaj derisa ishin duke punuar në një banesë në ndërtim e sipër. Policia e Kosovës njofton se viktimat janë dërguar për trajtim mjekësor.

“Rr. Gzim Sahiti, Ferizaj 29.06.2024 – 11:00. Raportohet se dy viktima meshkuj kosovarë, kanë pësuar lëndime trupore derisa kanë qenë duke punuar në një banesë në ndërtim e sipër. Viktimat kanë pranuar tretman mjekësor. Lidhur me rastin është njoftuar prokurori”, thuhet në raportin 24 orësh të policisë.