Category: Lajme

Kryeministri i Kosovës, Albin Kurti, ka shkruar në “X” për platformën “E-Kosova”, duke thënë se tashmë aty ofrohen mbi 176 shërbime dhe janë të regjistruar mbi 916 mijë përdorues, shumica gra.

Kurti ka thënë se në E-kosova ofrohet qasje në shërbimet shëndetësore dhe familjare dhe platforma mund të përdoret për të aplikuar për grante dhe ndihma si dhe për të paguar taksat dhe shërbimet komunale.

Kryeministri ka paralajmëruar se shumë shpejt do të shtohen edhe shërbime të tjera.

“e-Kosova është shembulli më i mirë i faktit se ka mundësi edhe në situata të vështira dhe është dëshmi e vizionit të Qeverisë sonë për t’i kthyer situatat e tilla në ndryshime pozitive”, ka shkruar Kurti.

Deputeti i Lëvizjes Vetëvendosje, Adnan Rrustemi, thotë se Projektligji për byronë shtetërore për verifikimin dhe konfiskimin e pasurisë së pajustifikueshme do të miratohet brenda këtij viti, me ndryshimet e parapara në vendimin e Gjykatës Kushtetuese.

Ai tha se rrëzimi i Projektligjit për byronë nga Kushtetuesja është goditje për reformën në drejtësi dhe luftën kundër korrupsionit.

Rrustemi në një intervistë për KosovaPress akuzoi opozitën dhe në veçanti PDK-në se kur e kanë dërguar këtë projektligj në Gjykatë Kushtetuese motivin fillestar e kanë pasur mbrojtjen e pasurisë së pajustifikueshme të zyrtarëve publikë që kanë shërbyer gjatë kohës sa kanë qenë ata në pushtet.

“Është goditje e madhe për reformën në drejtësi dhe për luftën kundër korrupsionit te zyrtarët publikë në Kosovë. Natyrisht se ka dëmtuar angazhimin tonë për të luftuar korrupsionin në nivel të zyrtarëve të lartë publikë dhe konfiskuar pasurinë e pajustifikueshme në Kosovë. Ne besojmë dhe jemi të bindur se është fenomen i jashtëzakonshëm që e ka gërryer pasurinë për vite të tëra…Pa dyshim, se do të procedohet i njëjti projektligj me adresimin e këtyre katër neneve, por që dëmi është në kohë. Imagjinoni 16 muaj është gjysma e mandatit të një legjislature. Për të mbajtur pengë të bllokuar dhe në fund rezulton vetëm me katër nene. Ky është dëm i madh. Vonesa e pajustifikueshme krijon aludime të llojllojshme, por unë nuk dua të lëshohem në aludime, por vetëm po konstatoj dëmin që e ka shkaktuar…Jam shumë i bindur që do të procedohet shpejt dhe brenda këtij viti. Ne jemi në një periudhë si Kuvend afër pushimit mes dy sesioneve, por gjithsesi jam i bindur se brenda këtij viti do të vijë në Kuvend dhe miratohet”, tha ai.

Rrustemi akuzoi Gjykatën Kushtetuese se ka vonuar qëllimshëm për 16 muaj vendimmarrjen për Projektligjin për byronë.

“Megjithatë, në rrafshin politik, jashtë aspektit formal që opozita në Kosovë, në rastin PDK që ka dërguar këtë projektligj, nuk e ka dhe nuk e ka pasur asnjëherë motivin mbrojtjen e Kushtetutshmërisë. Motivi tyre fillestar e përfundimtar është padyshim mbrojtja e pasurisë së pajustifikueshme të zyrtarëve të lartë publikë. Duke qenë se kanë qeverisur gjatë në Kosovë, dhe duke qenë se pikërisht në periudhën kur ata kanë qeverisur, e sidomos në atë periudhë, korrupsioni, keqpërdorimi i detyrës zyrtare, e pasurimi i zyrtareve të lartë publik politikanëve ka qenë i jashtëzakonshëm. Thjesht, ata po angazhohen duke përdorur çdo instrument, madje edhe Gjykatën Kushtetuese në rastin konkret për të mbrojtur pasurinë e pajustifikueshme. Por, vonim mund të ketë, por, shpëtim nga konfiskimi i pasurisë së pajustifikueshme nuk mund të ketë”, tha Rrustemi.

Megjithatë, Rrustemi thotë se reforma në drejtësi nuk ka dështuar dhe se nuk duhet lokalizuar vetëm te procesi i vettingut, Këshillit Prokurorial dhe byrosë.

“Jo, në asnjë mënyrë. Reforma në drejtësi duhet të lokalizoj te vettingu, byroja dhe KPK-ja. Është e vërtetë se këto janë më të rëndësishmet, edhe për shkak të një mesazhi që përçojnë, por angazhimi në kuadër të reformës së drejtësisë është në disa drejtime. Është në pakon e ligjeve antikorrupsion, ato kanë kaluar, siç është zgjerimi i mandatit të agjencisë për parandalimin e korrupsionit, ndryshimi i ligjeve për deklarimin e pasurisë, natyrisht edhe verifikimin e saj. Në anën tjetër janë pako e projektligjeve të ndryshme në fushën e drejtësisë që kanë kaluar gjatë kësaj legjislature. Vetëm në sektorin e drejtësisë, ky kuvend në këtë legjislaturë ka kaluar ligje sa legjislaturat e mëparshme komplet që kanë kaluar ligje. D.m.th ne kemi rreth 40 ligje vetëm në fushën e drejtësisë gjatë këtyre tri vjetëve që janë trajtuar e miratuar, disa janë në procedurë, disa do të vinë shumë shpejt në Kuvend, ndërkohë që kemi legjislatura në Kosovë që në gjitha fushat nuk kanë kaluar 45 ligje brenda një legjislature. Natyrisht, nuk kanë qenë legjislatura katërvjeçare, por angazhimi është në disa drejtime”, thotë ai.

Krahas kësaj, Rrustemi tha se mazhoranca nuk do të tërhiqet në miratimin e Projektligjit për Komisionit të Pavarur për Medie, Këshillit Prokurorial dhe atij për zyrtarët publikë, pavarësisht kritikave të ndërkombëtarëve dhe shoqërisë civile.

“Në asnjë mënyrë, në nuk kemi fare qëllim për të kapur këto institucione, për t’i ç’kapur ato dhe për të liruar energjitë profesionale, intelektuale në Kosovë, dhe për t’i kthyer ato institucione në shërbim të interesit publik të qytetarëve dhe të shtetit. Ne nuk kemi as nevojë për t’i kapur institucionet, jo vetëm që nuk e kemi as synim, por as nevojë. Ata që pretendojnë, që kanë kapur institucionet dhe shtetin e kanë bërë për t’i mbrojtur interesat individuale dhe grupore të tyre”, tha Rrustemi.

Me ftesë të Ministrit të Punëve të Jashtme të Kroacisë, Gordan Grliç-Radman, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, ka udhëtuar për në Kroaci për të marrë pjesë në Forumin e Dubrovnikut.

MPJ në njoftim thotë se kjo platformë tashmë tradicionale paraqet një mundësi të mirë për diskutimin e sfidave aktuale të politikës ndërkombëtare.

“Gjatë këtij forumi, Ministrja Gërvalla do të paraqesë qëndrimet e Republikës së Kosovës rreth sfidave të paqes dhe stabilitetit në Evropë si dhe do të ndajë përvojën e Republikës së Kosovës me proceset e integrimeve euroatlantike dhe reformat e thella në sundimin e ligjit, ngritjen e standarteve të demokracisë dhe zhvillimin ekonomik. Ajo do të theksojë gjithashtu rëndësinë e rritjes së bashkëpunimit multilateral për tejkalimin e sfidave globale”.

“Në margjina të Forumit të Dubrovnikut, Ministrja Gërvalla do të zhvillojë edhe takime bilaterale me ministrat e jashtëm të vendeve pjesëmarrëse, me synim forcimin e marrëdhënieve dypalëshe dhe promovimin e interesave të Republikës së Kosovës në arenën ndërkombëtare”, thuhet në njoftimin e MPJ-së.

Presidentja Vjosa Osmani ka zhvilluar dje një takim me Ambasadorin e Francës në Kosovë, Olivier Guerot.

Sipas Presidencës, në takim është biseduar për zhvillimet e fundit në vend, Samitin e ardhshëm të Frankofonisë, si dhe procesin e anëtarësimit të Kosovës në organizatat ndërkombëtare.

“Në këtë takim, Presidentja ritheksoi përkushtimin e Kosovës për bashkëpunim të vazhdueshëm në mes të institucioneve të Republikës së Kosovës dhe Francës, në të mirë të qytetarëve të të dyja vendeve”, thuhet në njoftim.

Reagimi i plotë i presidencës:

“Presidentja Vjosa Osmani ka takuar dje, ambasadorin francez Olivier Guerot

Presidentja e Kosovës, Vjosa Osmani, ka pritur dje në takim ambasadorin e Republikës franceze, Olivier Guerot.

Në takim është biseduar për zhvillimet e fundit në vend, Samitin e ardhshëm të Frankofonisë, si dhe procesin e anëtarësimit të Kosovës në organizatat ndërkombëtare.

Në këtë takim, Presidentja ritheksoi përkushtimin e Kosovës për bashkëpunim të vazhdueshëm në mes të institucioneve të Republikës së Kosovës dhe Francës, në të mirë të qytetarëve të të dyja vendeve”.

Sindikata e Pavarur e Administratës së Kosovës (SPAK), ka paralajmëruar se do të i drejtohen institucioneve kompetente për të përgatitur dërgimin e Projektligjit për Zyrtarët Publik, për herë të dytë në Gjykatën Kushtetuese nëse ky ligj kalon për lexim të dytë në Kuvendin e Kosovës, raporton Ekonomia Online.

Kryetari i SPAK-ut, Ali Gashi, ka thënë për Ekonomia Online se janë të shokuar me iniciativën e qeverisë së Kosovës që me çdo kusht përmes këtij projektligji ta politizoj dhe ta kap shërbimin civil të Kosovës.

Gashi ka theksuar se qeveria ka anashkaluar në tersi aktgjykimin e Gjykatës Kushtetuese, duke shtuar se, në këtë formë me këtë projektligj tentohet që të prekte struktura organizative e shërbyesve civil e në theks të veçanta të gjithë zyrtarët publik.

“Ne jemi të shokuar me këtë iniciativën e qeverisë së Kosovës ose vazhdimin e tendencës që me çdo kusht me politizuar edhe me kap shërbimin civil dhe rruga me e përshtatshëm është përmes këtij ligji. Duke marr parasysh që ky projektligj i cili në një farë forme është kontrabanduar duke marr parasysh që nuk është informuar as shoqëria civile, as grupet e interesave veç sindikatat. Në një farë forme duke anashkaluar në tersi aktgjykimin e Gjykatës Kushtetuese tentohet që të prekte struktura organizative e shërbyesve civil e në theks të veçanta të gjithë zyrtarët publik, prandaj në më kohë edhe kemi dërguar shkresat tona dhe kemi dhënë edhe rekomandimet tona dhe kemi deklaruar që si format, si variant që kanë prezantuar qeveria, është i pa pranueshëm. Ky projektligj ka për qëllim ta kap, ta politizoj dhe në një farë forme ta prish strukturën e shërbimit civil në Kosovë, një shërbim që konsiderohet si në ndër shërbimet civile me profesionale në rajon e ngritur me mund e shumë sakrifica”.

“Kjo tendence vie në dy rrafshe, si duket kjo qeveri ende nuk i ka kaluar inati dhe mendon që shërbimi civil është kundër kësaj qeverie dhe dëshiron që të hakmerret. E dyta janë të pa aftë, njerëzit të cilët merren ose atyre grupeve që ju ka besuar janë njerëz që nuk kanë përvojë, nuk e din as çka është shërbimi civil, nuk  e din çka është zyrtari publik dhe bëjnë kësi ligje që fatkeqësisht po me duket jemi rekord në rajon mos të themi edhe në Evropë për ligjet të cilat janë në kundërshtim me Gjykatën Kushtetuese dhe kjo është fatkeqësi dhe pa përgjegjshmëri edhe në sytë e miqve tanë”, ka thënë ai.

Kryetari i SPAK-ut ka thënë se si sindikatë nuk janë marr parasysh rekomandimet e tyre dhe në vazhdimësi kjo qeveri ju ka mbyllur dyert e bashkëpunimit.

Ai ka akuzuar qeverinë së është duke punuar në shkatërrimin e sindikatave në Kosovë.

“Absolutisht ne nuk jemi ftuar, ne kemi linjat tona zyrtare që komunikojmë përmes shkresave përmes grupeve parlamentare. Siç e dini ju në vazhdimësi kjo qeveri ka mbyllur dyert e bashkëpunimit, nuk i njeh sindikatat, përkundrazi qëllimi kryesor i saj ka qenë dhe vazhdon që të jetë shkatërrimi i sindikatave në Kosovë. Ne si federatë e shërbyesve civil jemi plotësisht dhe tërësisht kundër këtij projektligji pasi jemi të sigurt që këtu nuk ka asgjë parimore, nuk ka asgjë të mirëfillte, thjeshtë tendencë për politizim dhe hakmarrje ndaj shërbyeseve civil. Kjo është e pa pranueshme dhe në qoftë se ky projektligj kalon si i tillë ne jemi të obliguar që ti drejtohemi institucioneve dhe ju siguroj që ky projektligj do të përfundoj në Gjykatën Kushtetuese për herë të dytë”, ka thënë ai.

Gashi me këtë rast ka përmendur edhe nenet që sipas tij, janë kundër kushtetues.

“Gjykata Kushtetuese e ka thënë shumë qartë të parashikueshmëria, që një e drejtë e fituar nuk mund të tjetërsohet. Përvoja e punës nuk guxon të lëvizet, problemi është që një e drejtë e fituar në kuptimin e punës, është lëshuar tekë neni 46, tekë pozitat drejtuese të ulët dhe të mesëm ku këta tentojnë që të bëhen me mandat, aktgjykim ka thënë që kjo është e drejtë e fituar dhe nuk mund një ligj të ndërhyje në këto situata. Pastaj është tekë dispozitat kalimtare tekë neni 99, ku janë paraparë paragrafi 1,2,3,4,5,6,7 janë në kundërshtim me Gjykatën Kushtetuese dhe Gjykatë Kushtetuese i ka dhënë edhe arsyeshmërit edhe formën se si duhet të rregullohet në baze të konventave e rregullave, por që këta nuk i kanë marr. Paramendoni te dispozita kalimtare këta e fusin prapë në këtë projektligj që pozita drejtuese të ulëta dhe të mesme, fillon mandati me hyrjen në fuqi të ligjit bazikë. Kjo është e pa pranueshëm sepse njerëzit, këta zyrtar janë përgatitur”, ka thënë ai.

Dërgimin e këtij projektligji për herë të dytë në kushtetuese e kanë paralajmëruar edhe partitë opozitare në Kuvendin e Kosovës.

Sot në Kosovë pritet të mbajë mot kryesisht stabil, me intervale të gjata kohore me diell, por edhe vranësira.

Në disa vende kryesisht kodrinore-malore mund të ketë ndonjë rigë ose rrebesh të shkurtër shiu, ndërsa temperaturat maksimale shënojnë rritje deri në 30 gradë Celsius.

Në Shqipëri, Maqedoninë e Veriut, Luginë të Preshevës dhe Mal të Zi sot pritet të mbajë mot me diell dhe vranësira të pakta lokale, pak më të shumta në viset malore ku mund të ndodhë ndonjë rigë shiu.

Temperaturat shënojnë rritje të menjëhershme dhe ato maksimale mbi 30 gradë Celsius.