Category: Lajme

Policia gjermane e qëlloi për vdekje një “person të dyshimtë” afër qendrës për dokumentimin e nazizmit dhe konsullatës izraelite në qytetin Munih të enjten.

Sipas policisë në Bavari, burri u qëllua me armë dhe zona u rrethua përreth Karolinenplatz-it. Ministri i Brendshëm i Bavarisë, Joachim Herrmann, tha më vonë se i dyshuari kishte vdekur, raporton televizioni BBC.

Policia tha se një person ishte vërejtur në zonë dhe dukej se po mbante një armë zjarri, ndërsa policët pastaj hapën zjarr me armë zyrtare.

Autoritetet e sigurisë thanë se nuk kishte shenja për ndonjë të dyshuar tjetër dhe i bënë thirrje publikut që të mos publikonin pamje të incidentit në rrjete sociale.

Presidenti izraelit, Isaac Herzog do të vizitojë Shqipërinë më 11 shtator. Pos Shqipërisë, ai do të shkojë edhe në Serbi.

Një zyrtar i lartë i Izraelit tha për “The Times of Israel” se, gjatë udhëtimit, i cili do të zgjasë vetëm një ditë, Herzog pritet të takohet me homologët e tij Aleksandar Vuçiqin dhe Bajram Begajn, shkruan A2-shi.

Kreu i shtetit hebraik do të zhvillojë edhe një takim me kryeministrin shqiptar, Edi Rama.

Rreth gjysmë milioni euro është kostoja e ndërtimit të pllakave, shkallëve dhe tarracave në lagjen “Sante” në “Dardani”, ndërsa punimet pritet të përfundojnë për 180 ditë, raporton Ekonomia Online.

Aty, të enjten punimet i vizitoi kryetari i Prishtinës, Përparim Rama dhe drejtori për Investime Kapitale dhe Menaxhimin e Kontratave, Krenar Xhaferi.

Kryetari Përparim Rama, tha se në këtë lagje nuk është investuar me dekada, ndërsa shpreson se ky investim i rregullon problemet që ka pasur kjo zonë.

“Është një zonë me quajt një zonë historike që tregon një rrugëtim të Kryeqytetit, një zonë që nuk është investuar me dekada të tëra apo kurrë, apo investimet që kanë qenë këtu kanë qenë veç e veç dhe kemi një gje dje të mjerueshme sot. Prej sot e tutje kemi një plan dinamik 180 ditësh me një investim rreth gjysmë milion euro me një dizajn të ri i cili i përshtate hapësirave të kësaj kohë. Një dizajn retro edhe një përmirësim i dukshme pra i gjithë atyre hapësirave këtu për gjithë qytetarë që jetojnë në këtë pjesë dhe të tjerët që do ta vizitojnë. I rregullon edhe kanalet edhe këto hapësirat e hyrjeve në këtë zonë, po ashtu korridoreve, pra një numër të madh të problemeve që ka pasur kjo zonë”, tha Rama.

Drejtori për Investime Kapitale dhe Menaxhimin e Kontratave, Krenar Xhaferi, tha se kjo lagje ka qenë në gjendje shumë të keqe.

“Ne jemi rritur në këto hapësira nuk janë trajtuar më herët, gjitha detajet janë menduar janë menduar edhe hapësirat jashtë urbane duke menduar ulëset, duke i menduar shportat e bërllokut pjerrinat. Kujtoj që ‘Dardania’ e ka merituar këtë sepse është e pa trajtuar moti dhe është në një gjendje jashtëzakonisht të keqe”, tha ai.

Qendra Kombëtare për Menaxhim Kufitar(QKMK), u ka bërë thirrje qytetarëve të Kosovës dhe mërgatës që të shmangin të gjitha hyrjet dhe daljet në pikë-kalimet kufitare me Serbinë.

Në njoftim thuhet se kjo thirrje vjen pas paralajmërimeve të ashtuquajturit “Këshill Organizativ për Bllokada” në Serbi, i cili ka bërë të ditur se më 6 Shtator 2024, planifikohen bllokada të rrugëve që çojnë drejt pikë kalimeve kufitare me Republikën e Kosovës.

“Njoftohen të gjithë shtetasit e Republikës së Kosovës dhe pjesëtarët e mërgatës që planifikojnë të kalojnë tranzit përmes territorit të Serbisë, të shmangin të gjitha hyrjet dhe daljet në Pikë Kalimet Kufitare mes Republikës së Kosovës dhe Serbisë. Kjo thirrje vjen pas paralajmërimeve të ashtuquajturit “Këshill Organizativ për Bllokada” në Serbi, i cili ka bërë të ditur se më 6 Shtator 2024, planifikohen bllokada të rrugëve që çojnë drejt PKK me Republikën e Kosovës”, thuhet në njoftimin e QKMK-së.

Me tutje thuhet se autoritetet kompetente të RKS në bashkëpunim me partnerët, i kanë marrë të gjitha veprimet për menaxhim të situatës së paralajmëruar dhe ju inkurajojnë që të ndiqni me kujdes zhvillimet dhe paralajmërimet e reja lidhur me situatën dhe të informoheni vetëm nga burimet zyrtare të institucioneve të Republikës së Kosovës, për të shmangur dezinformatat dhe lajmet e rreme.

QKMK dhe autoritetet kompetente do të vazhdojnë t’u mbajnë të informuar për çdo zhvillim të ri.

Për më shumë thirrni në 045198606, 045 198000 dhe në numrin 080050095 (pa pagesë).

Ndërsa, një ditë më parë edhe Ministria e Punëve të Jashtme dhe Diasporës të Kosovës(MPJD), u ka bërë thirrje qytetarëve që t’i shmangin pikë-kalimet kufitare me Serbinë.

Ish i dërguari i posaçëm i Shteteve të Bashkuara të Amerikës për dialogun Kosovë-Serbi, Richard Grenell ka kujtuar “marrëveshjen historike”, nënshkrimi i së cilës u bë katër vjet më parë.

Grenell shkroi në se “ekipi Biden-Harris nuk arriti ta zbatonte atë”.

“Sot katër vite më parë i kemi bashkuar liderët e Kosovës dhe Serbisë në Zyrën Ovale me Presidentin Donald trump dhe ata nënshkruan një marrëveshje historike për t’i normalizuar dhe zgjeruar ekonomitë e tyre”, shkroi Grenell në X.

Postimit, ai ia ka bashkuar një fotografi nga një takim me ish-presidentin e Kosovës, Hashim Thaçi dhe presidentin serb, Aleksandar Vuçiq dhe një fotografi nga nënshkrimi i marrëveshjes nga kryeministri i atëhershëm i vendit, Avdullah Hoti dhe Vuçiqi.

Four years ago today we brought the leaders of Kosovo and Serbia together in the Oval Office with @realDonaldTrump – and they signed an historic agreement to normalize and expand their economies.

The Biden-Harris team failed to implement it. pic.twitter.com/GltkUQ9gOy

— Richard Grenell (@RichardGrenell) September 5, 2024

Asambleja e Përgjithshme e Kombeve të Bashkuara përmes një rezolute të veçantë caktoi 5 Shtatorin, përvjetorin e vdekjes së Shën Nënë Terezës, si Ditën Ndërkombëtare të Bamirësisë.

Dita Ndërkombëtare e Bamirësisë u krijua me qëllim të sensibilizimit dhe mobilizimit të njerëzve, OJQ-ve dhe palëve të interesuara në të gjithë botën për të ndihmuar të tjerët përmes aktiviteteve vullnetare dhe filantropike.

Kjo ditë shënohet edhe në njohjen e rolit të bamirëseve në lehtësimin e krizave humanitare dhe vuajtjeve njerëzore brenda dhe midis vendeve, si dhe të përpjekjeve të organizatave bamirëse dhe individëve, përfshirë edhe kontributin e jashtëzakonshëm të Shën Nënë Terezës.

Në Agjendën 2030 për Zhvillimin e Qëndrueshëm të miratuar në Shtator 2015, Kombet e Bashkuara pranojnë që çrrënjosja e varfërisë në të gjitha format dhe dimensionet e saj, përfshirë varfërinë ekstreme, është sfida më e madhe globale dhe një kërkesë e domosdoshme për zhvillimin e qëndrueshëm.

Agjenda gjithashtu kërkon një frymë të solidaritetit global, duke filluar nga ndërmarrjet e vogla e deri te kooperativat e mëdha dhe organizatat e shoqërisë civile dhe ato filantropike në zbatimin e Agjendës të përqendruar në nevojat e më të varfërve dhe më të prekurve nga krizat humanitare.

Data e 5 shtatorit për të shënuar Ditën Ndërkombëtare të Bamirësisë u zgjodh për të përkujtuar përvjetorin e vdekjes së Shën Nënë Terezës së Kalkutës, e cila mori Çmimin Nobel për Paqe në vitin 1979.

Shën Tereza, emri i plotë i së cilës është Anjezë Gonxhe Bojaxhiu, u lind më 26 gusht 1910 në Shkup. Ishte humaniste e njohur shqiptare, fituese e çmimit Nobel për Paqen, ndërsa më 19 tetor 2003 u shpall e bekuar nga Vatikani.

Për më shumë se 45 vjet ajo u shërbeu të varfërve, të sëmurëve e jetimëve. Ishte nënë kujdestare e 7,500 fëmijëve në 60 shkolla, ishte nënë që mjekonte 960,000 të sëmurë në 213 dispanseri, ishte e vetmja në botë qe trajtonte 47,000 viktima të lebrozës në 54 klinika, kujdesej për 3,400 pleq të braktisur e të lënë rrugëve, në 20 shtëpi pleqsh, kishte birësuar 160 fëmijë ilegjitim e bonjakë.

Shën Tereza ndërroi jetë më 5 shtator 1997 në Kalkuta të Indisë. Ndërsa Papa Françesku më 4 korrik 2016, duke lexuar formulën e shenjtë në emrin e Zotit ka shpallur Nënë Terezën, si Shën Tereza.

Instituti Hidrometeorologjik i Kosovës ka njoftuar se sot do të mbajë mot me diell dhe vranësira të dendura.

Sipas institutit, vranësirat gjatë ditës mund të sjellin riga shiu me shkarkime rrufesh.

“Temperaturat minimale do të lëvizin ndërmjet 11-14gradë Celsius, ndërsa maksimalet e ditës parashihen të lëvizin ndërmjet 27-31gradë Celsius. Do të fryjë erë kryesisht nga veriperëndimi e lehtë dhe lokalisht e fortë”, thuhet në njoftim.

Me rritjen e kostove të pushimeve verore, turistët po kërkojnë destinacione që ofrojnë eksperienca të pazakonta pa ndikuar në buxhetin e tyre, shkruan Unzela Khan në një artikull të botuar në të përditshmen britanike “Daily Express”.

Ne kemi zbuluar disa vende jo shumë të njohura por miqësore me portofolin, që sfidojnë pritshmëritë standarde të turistëve, duke siguruar aventura të vërteta me shpenzime minimale.

Jason Higgs, një ekspert udhëtimesh, ka identifikuar nëntë vende të çmuara të fshehura – që janë të përballueshme por të pasura në përvojë – mes të cilave kryeson Shqipëria.

Shqipëria, destinacioni evropian me dete blu të ndezur dhe qytete të bukura – ka një kosto mesatare ditore prej vetëm 27 euro.

“Hulumtimi ynë tregon se disa nga përvojat më të paharrueshme të udhëtimit mund të gjenden në qoshet më pak të eksploruara të botës”, tha Higgs.

“Këto destinacione ofrojnë kursime të konsiderueshme, dhe gjithashtu zhytje autentike kulturore dhe bukuri natyrore mahnitëse”, shtoi ai.

Shqipëria – ky thesar ballkanik krenohet me peizazhet malore mahnitëse, qytetet e bukura bregdetare dhe trashëgiminë e pasur kulturore.

Nga qyteti historik i Beratit në Rivierën piktoreske Shqiptare, Shqipëria ofron një mori përvojash me kosto të përballueshme krahasuar me fqinjët e saj evropianë.

“Në Shqipëri, ju mund të shpenzoni mesatarisht 27-37 euro në ditë, duke përfshirë akomodimin, transportin dhe ushqimin. Ushqimet e kuzhinës së shijshme mesdhetare si mishi i qengjit, djathi dhe ushqimet e detit janë shumë të lira”, tha Higgs./ATSH