Category: Lajme

I dërguari amerikan Amos Hochstein ishte të hënën në Bejrut për bisedime që synojnë arritjen e një zgjidhjeje për konfliktin përgjatë kufirit Izrael-Liban, pjesë e një përpjekjeje diplomatike që riktheu në rajon edhe Sekretarin amerikan të Shtetit Antony Blinken, me qëllim arritjen një armëpushimi në Rripin e Gazës.

Zoti Hochstein u tha gazetarëve se kishte patur një takim “dobishëm” me kryetarin e parlamentit të Libanit Nabih Berri dhe se gjatë qëndrimit në Liban ai do të bisedonte me anëtarët e qeverisë, ushtrinë dhe këdo tjetër që është i gatshëm të punojë që vendi të rikthehet në rrugën e “sigurisë, qëndrueshmërisë dhe mirëqenies ekonomike”.

Ai vuri theksin tek Rezoluta 1701 e Këshillit të Sigurimit të OKB-së, e cila u miratua në fund të luftës së fundit mes Izraelit dhe Hezbollahut në 2006 dhe përfshin thirrjen që Hezbollahu të tërheqë luftëtarët e tij në veri të lumit Litani të Libanit dhe që Izraeli të tërheqë forcat e tij nga Libani.

I dërguari amerikan Hochstein tha se askush nuk bëri ndonjë përpjekje për ta zbatuar Rezolutën, duke shtuar se vetëm angazhimi i palëve për zbazimin e saj, nuk mjafton. Ai përsëriti se synimi është që të ndërtohet besimi tek të dyja palët se Rezoluta do të zbatohet dhe të garantohet që konflikti të mos përsëritet brenda një muaji apo një viti.

“Qytetarët e Libanit, si të gjithë në rajon, duan të shkojnë në shtëpi, të ndërtojnë një të ardhme paqësore, të sigurt dhe të begatë për veten dhe familjet e tyre”, tha zoti Hochstein.

Sekretari amerikan i Shtetit Antony Blinken u nis të hënën për një vizitë një javore në Lindjen e Mesme në përpjekje për të rigjallëruar procesin e negociatave për arritjen e armëpushimit në Gazë dhe për të siguruar lirimin e pengjeve që ende po mbahen nga Hamasi në një kohë kur Izraeli po planifikon një sulm hakmarrës ndaj Iranit.

Sipas zëdhënësit të Departamentit amerikan të Shtetit Matthew Miller, Sekretari Blinken do të diskutojë gjatë vizitës së tij planet për periudhën pas konfliktit dhe të theksojë nevojën “për gjetjen e një zgjidhjeje që u mundëson palestinezëve të rindërtojnë jetën e tyre dhe të realizojnë aspiratat e tyre të lirë nga tirania e Hamasit”, siç tha ai.

Ndërkohë, ushtria izraelite kërkoi falje të hënën për vrasjen e tre ushtarëve libanezë në një sulm në Libanin jugor.

Një zëdhënës i ushtrisë izraelite tha se sulmi i së dielës goditi një automjet të ushtrisë libaneze dhe se Izraeli nuk vepron kundër ushtrisë libaneze.

Ushtria libaneze nuk ka luajtur rol në konfliktin, i cili është përshkallëzuar gjatë muajit të kaluar, pasi Izraeli zgjeroi sulmet ajrore dhe trupat izraelite ndërhynë në jug të Libanit. /VOA

Ministri i Brendshëm në Shqipëri, Ervin Hoxha, ka reaguar në lidhje me komentet dhe deklaratat e analistëve për arrestimin e ish-presidentit Ilit Meta.

Në një postim të gjatë në Facebook, Hoxha shpreh keqardhjen për etiketimet fyese ndaj policisë, që sipas tij kryen detyrën.

“Kam ndjekur me vëmendje dhe respekt opinionet e një sërë analistësh të angazhuar mbrëmë, lidhur me ndalimin e shtetasit Ilir Meta nga Policia e Shtetit. Fjalori ka qenë ekstrem për mënyrën sesi u ekzekutua urdhri i Prokurorisë së Posaçme Antikorrupsion, ndaj shtetasit në fjalë. Janë përdorur etiketime të rënda ndaj policisë dhe janë akuzuar efektivët e saj për faje, që nuk i kanë bërë, dhe reagimi ndaj rezistencës me forcë të personit, që kishin detyrë të ndalonin është nxjerrë jashtë kontekstit të ngjarjes. Janë hedhur edhe variante alternative për mënyrën se si duhej kryer, ku duhej kryer, e kur duhej kryer ndalimi i shtetasit Ilir Meta, për shkak të asaj çka ai ka përfaqësuar në dekadat e jetës politike shqiptare. Nuk dua të bëj asnjë polemikë me zotërinjtë dhe zonjat e angazhuara, në ekranet e këtij diskutimi. Ata kishin mbrëmë, përtej pozicionimeve të njohura, edhe avantazhin e spektatorit në dhënien e gjykimeve, jashtë dinamikës dhe tensionit të ngjarjes”, shkroi Hoxha në Facebook.

Instituti Demokratik i Kosovës (KDI) sot mban konferencën në të cilën do të publikohet analiza gjithëpërfshirëse mbi përsëritjen dhe nivelin e ulët të zbatimit të rekomandimeve të dalura nga raportet e Zyrës Kombëtare të Auditimit (ZKA) për 12 komuna të Kosovës.

Analiza e hartuar së bashku me Aleancën Qytetare të Transparencës AQT përfshinë komunat: Ferizaj, Graçanicë, Gjakovë, Kaçanik, Kamenicë, Lipjan, Mitrovicë, Pejë, Prishtinë, Podujevë, Rahovec, Skenderaj.

Analiza gjithpërfshirëse ofron një pasqyrë të performancës së komunave bazuar në opinionet e përgjithshme të ZKA-së, llojin e gjetjeve dhe nivelin e zbatueshmërisë së rekomandimeve. Po ashtu, në këtë analizë janë bërë edhe krahasimet në mes të viteve 2022 dhe 2023, si dhe synohet të paraqiten shkaqet dhe rrethanat që po shpiejnë në përsëritjen e gjetjeve të auditorit për komuinat nga viti në vit.

Panelistë në këtë diskutim do të jenë: Vlora Spanca, Auditore e Përgjithshme e Republikës së Kosovës, Smajl Latifi, kryetar i Komunës së Rahovecit, Kadri Rahimaj, kryetar i Komunës së Kamenicës, Mirlinda Tishukaj Sadiku, anëtare e Komisionit Parlamentar për Mbikëqyrje të Financave Publike në Kuvendin e Kosovës dhe Hajdar Beqa, anëtar i Komisionit Parlamentar për Mbikëqyrje të Financave Publike në Kuvendin e Kosovës.

Instituti Hidrometeorologjik i Kosovës njofton se moti sot në vendin tonë do të jetë me diell.

Temperaturat minimale do të lëvizin ndërmjet -1 deri 1 gradë Celsius, ndërsa maksimalet e ditës parashihen të lëvizin ndërmjet 17-20 gradë Celsius.

Në mëngjes nëpër ultësira parashihet mjegull e radiacionit.

Përgatiti: Besmire Kluna

Mbikalimi afër shkollës “Ali Sokoli”, në kryeqytet, u ndërtua për këmbësorët, por ata rrallë herë e përdorin atë.

Arsyet, sipas këmbësorëve, janë papastërtia dhe kundërmimi i tepërt.

“Duhet me pas kujdes mos me gjujtë bërllog, edhe qytetarët duhet me kanë të vetëdijesum bre, po nuk di, më duket na nuk kemi nivel të kulturës, tash, nuk e di ku është arsyeja, pse e bëjnë këtë”, thotë një qytetar.

“Bërllogu vetë mblidhet qashtu, vetë bllokadë është kjo, katastrofë, shumë keq, Komuna vetë po ban biznes jo tendera, jo çtendera, jo i ki ba mirë jo i ke ba keq, veç me marrë pare prej tenderave”, thotë një tjetër qytetar.

Edhe në Komunën e Prishtinës e pranojnë se ky mbikalim nuk e ka pastërtinë në nivelin e duhur, por bëjnë të ditur se shpejt do të intervenojnë në këtë drejtim.

“Do e shohim si mundësi që brenda një kohe të shkurtër të intervenojmë për ta rregulluar, duke e pastruar e pastaj do të shohim mundësinë që këto mbikalime të kthehen në ambiente atraktive”, tha zëdhënësi i Komunës së Prishtinës, Donat Lushaku.

Lushaku po ashtu thotë se në planet e së ardhmes, pjesa poshtë mbikalimit planifikohet të mbyllet dhe të ketë një plan më konkret për shfrytëzimin e tij nga qytetarët.

Përgatiti: Benita Zeneli

Gjatë 3 viteve të fundit, në procesin e përcaktimit të tarifave të energjisë elektrike në Kosovë, vlerësohet se ka pasur rritje të transparencës nga ana e Zyrës së Rregullatorit të Energjisë.

Ndonëse, kishte rritje më të madhe të çmimeve për energji elektrike në vitin 2023, sipas raportit të “CorrWatch”, sa i takon përcaktimit të çmimeve, i veçantë ka qenë interesimi jo i madh për komente nga ana e qytetarëve.

“Në këtë vit përkundër që është rritur tarifa për 15% nuk kemi pasë interesim të madh prej qytetarëve për të dhënë komentet, por sa i përket transparencës ZRRE e ka zbatuar atë planin e saj sikur në shqyrtimet tarifore në të kaluarën”, tha Naim Bujupi nga INDEP.

Por, problematike për vendosjen e tarifave në vitin 2021 nga ky raport del të jenë vonesat për vendosjen e tarifave në mungesë të anëtarëve të Bordit të ZRRE-zë.

“Në vitin 2021 ne kemi vërejtur që Rregullatori ka bërë publike të gjitha dokumentet relevante është shumë e rëndësishme gjatë procesit tarifor që të bëhen publike aplikacionet e palëve që aplikojnë për tarifa. Në këtë kontekst Rregullatori i ka bërë publike aplikacionet e të licencuarve dhe gjithashtu ka hapur edhe afatet për diskutim publik dhe komente dhe kjo është shumë e rëndësishme për të përcaktuar transparencën”, tha Bujupi.

Përkundër përmirësimeve në aspektin e transparencës, INDEP-i i rekomandon Zyrës së Rregullatorit të Energjisë që të ofrojë më shumë informacione për konsumatorët sa i takon kostos shtesë në rritjen e tarifave.

Disa nga rekomandimet e dala nga ky hulumtim kanë të bëjnë me raportim më të rregullt dhe më të detajuar nga ndërmarrjet energjetike, konsultime më gjithëpërfshirëse, e përfshirje aktive të konsumatorëve në çdo fazë të procesit.