Një femër është raportuar e zhdukur në Prizren. Sipas Policisë së Kosovës, viktima femër kosovare është larguar nga shtëpia dhe nuk ka njohuri për vendndodhjen e saj.
“Prizren, 21.10.2024 – 10:00. Është raportuar se viktima femër kosovare është larguar nga shtëpia dhe nuk ka njohuri për vendndodhjen e saj, rasti në procedurë hetimore”, thuhet në raportin 24 orësh të Policisë.
Policia e Kosovës për 24 orë ka shqiptuar 2 mijë e 88 gjoba. Kështu njofton raporti i policisë, sipas të cilit aksidente trafiku me fatalitet janë raportuar 2, aksidente trafiku me të lënduar janë regjistruar 20 si dhe aksidente trafiku me dëme materiale janë regjistruar 32.
Sipas policisë brenda 24 orëshit janë arrestuar 20 persona, ndërsa 8 janë në mbajtje.
Ish-deputeti i LDK-së, Fadil Geci, do të vazhdojë edhe sot dëshminë tij në procesin gjyqësor ndaj ish-krerëve të UÇK-së në Gjykatën Speciale.
Seanca e së martës pritet të nisë në orën 9:00, ndërkohë që transmetimi i saj bëhet 45 minuta më vonë.
Geci në nisje të dëshmisë së tij të hënën, ka sqaruar përmbajtjen dhe ndikimin e komunikatës së 59-të të UÇK-së. Në këtë komunikatë vëllai i Fadilit, Gani Geci, ishte etiketuar si tradhtar pas vrasjes së komandantit të UÇK-së, Abedin Rexha.
Atij nga ZPS-ja iu treguan deklaratat e Hashim Thaçit, Rexhep Selimit e Jakup Krasniqit lidhur më komunikatën. Në deklaratën e Selimit thuhej se Thaçi e ka shkruar komunikatën e 59-të.
Kryetari i trupit gjykues, Charles Smith, ka treguar se dëshmia e Gecit pritet të zgjasë rreth dy ditë.
Në këtë rast ish-presidenti Hashim Thaçi, ish-kryeparlamentarët Kadri Veseli e Jakup Krasniqi, si dhe ish-shefi i deputetëve të Vetëvendosjes, Rexhep Selimi, akuzohen lidhur me ndërmarrje të përbashkët kriminale lidhur me krime lufte dhe krime kundër njerëzimit. Në bazë të aktakuzës së ZPS-së e publikuar në shkurt të vitit 2023, Thaçi, Veseli, Krasniqi e Selimi akuzohen për ndërmarrje të përbashkët kriminale lidhur me rreth 100 vrasje, pastaj për tortura e trajtim mizor në rreth 40 qendra ndalimi gjatë periudhës 1998-1999.
ZPS-ja pretendon se kryen ndërmarrje të përbashkët kriminale që ndërlidhet me gjashtë akuza për krime lufte: Përndjekje (Pika 1), Burgosje (Pika 2), Akte të tjera çnjerëzore (Pika 4), Torturë (Pika 6), Vrasje e paligjshme (Pika 8), Zhdukje me dhunë (Pika 10) si dhe katër akuza për krime kundër njerëzimit përfshirë këtu Arrestim dhe ndalim i paligjshëm ose arbitrar (Pika 3), Trajtim mizor (Pika 5), Torturë (Pika 7) dhe Vrasje e paligjshme (Pika 9). Shumica e viktimave të krimeve sipas ZPS-së janë shqiptarë, civilë dhe pjesëtarë të Lidhjes Demokratike të Kosovës.
Sipas ZPS-së, të akuzuarit kanë qenë në dijeni apo është dashur të jenë në dijeni shkaku i pozitave udhëheqëse në Shtab të Përgjithshëm, lidhur me pretendimet për krimet që janë kryer dhe kanë pasur qëllim që ta marrin pushtetin në Kosovë përmes tyre. Ish-drejtuesit e Shtabit të Përgjithshëm të UÇK-së i kanë mohuar të gjitha këto akuza. Ata kanë thënë se UÇK-ja nuk kishte hierarki të tillë, meqë peshën e kishin komandantët e zonave dhe se kishte për qëllim ta luftonte Serbinë e jo civilët.
Deputeti gjerman dhe raportuesi për Kosovën në Bundestag, Thomas Hacker, e cilëson procesin e Berlinit një sukses të madh, teksa falënderon Kosovën që zhbllokoi marrëveshjen e CEFTA-s.
“Samiti i Procesit të Berlinit ishte një sukses i madh. Ne arritëm të zhbllokonim Marrëveshjen e CEFTA-s midis gjashtë anëtarëve, gjashtë shteteve të Ballkanit perëndimor për Tregtinë e Lirë. Diçka e tillë shtyhej vit pas viti dhe tani më në fund ranë dakord. Mendoj se ishte vërtetë sukses i madh dhe jam mirënjohës ndaj Qeverisë së Kosovës veçanërisht e cila në fund bëri të mundur të hapej rruga për një marrëveshje të rëndësishme”, tha Hacker.
Sa i përket dialogut, Hacker vlerëson se duhet një qasje e re dhe se Lajçak nuk ka qenë i drejtë. Sipas tij, masat ndaj Kosovës janë të padrejta dhe duhet të hiqen menjëherë.
Duke kritikuar ato që i sheh si veprime jo demokratike e të dëmshme të Serbisë, deputeti gjerman thotë se për të hyrë në BE, vendi duhet të njohë Kosovën.
“Aktualisht në rrugën e integrimit të Kosovës dhe Serbisë në BE, ky dialog bilateral është një nga gjërat më të rëndësishme. Kemi pasur shumë përpjekje për të zgjidhur problemet, për të hequr pengesat por sado që vazhdojmë gjithmonë bëhen hapa prapa. Prandaj është e nevojshme një fillim i ri i dialogut. Ne kemi parë marrëveshje që Vuçiq i ka konsideruar të vlefshme pa nënshkrim, dhe gjysmë ore më pas ka thënë se marrëveshja është kundër kushtetutës së vendit të tij. Ne tani do të kemi një të dërguar të ri për dialogun. Miroslav Lajçak largohet në fillim të vitit të ardhshëm. Unë mendoj që kemi mundësinë për një fillim të ri të dialogut. Gjatë muajve të fundit, Lajçak nuk konsiderohej më si një ndërmjetës i drejtë. Tani shpresoj që të kemi një të tillë”, tha Hacker për A2Cnn.
Shtatë raste të vjedhjeve dhe tri raste të dhunës në familje janë regjistruar gjatë një aktiviteti në parandalimin e indicenteve të policisë rajonale në Ferizaj.
Kështu ka njoftuar policia përmes një komunikate për media, ku ndër të tjera ka treguar se në rajonin e Ferizajt janë arrestuar 38 persona të kërkuar me urdhëresa të gjykatave kompetente për vepra të ndryshme penale.
Njoftimi i plotë i policisë:
Policia Rajonale e Ferizajt ka ndërrmarrë një sërë aktivitetesh në parandalim të inicenteve. Gjatë javës që shkoi, nga data 14-20/10/2024 janë raportuar :
Veprat penale kundër pasurisë, 7 raste të vjedhjeve, të cilat kanë ndodhur: 6 në Ferizaj dhe 1 në Shtërpë.
Veprat penale të dhunës në familje
Në rajonin e Ferizajt janë raportuar 3 raste të dhunës më familje, prej tyre : 1 rast në Ferizaj, 1 rast në Shtërpcë dhe 1 rast në Han të Elezit. Ndërsa me vendim tëprokurorit të shtetit 1 person pasi është intërvistuar nga policët hetues të dhunës në familje është ndaluar në mbajtje, kurse 2 persona të tjerë janë liruar për procedurë të rregullt hetimore.
Realizimi i urdhëresave të gjykatës
Në rajonin e Ferizajt policia ka arrestuar 38 persona të kërkuar me urdhëresa të gjykatave kompetente për vepra të ndryshme penale.
Zyrtarët e rendit gjetën pesë njerëz të vrarë nga një sulm me armë në një shtëpi në juglindje të qytetit Seattle të shtetit Uashington në ShBA të hënën në mëngjes. Policia tha se një adoleshent është dërguar në mbajtje.
Disa njerëz e telefonuan linjën emergjente rreth orës 5 të mëngjesit për të raportuar të shtëna në qytetin Fall të shtetit Uashington, tha zëdhënësi i policisë lokale, Mike Mellis, në një konferencë për gazetarë të hënën pasdite, raporton agjencia “Associated Press”.
Policët ndaluan menjëherë një adoleshent, ndërsa një i ri tjetër, që ishte lënduar, u dërgua në një spital në qytetin Seattle, tha zëdhënësi Mellis. Të dy adoleshentët jetojnë në shtëpinë ku u gjetën trupat, shtoi ai.
Zëdhënësi tha se policët që hynë në shtëpi gjetën pesë trupa. Dy ishin të të rriturve, ndërsa tre u përshkruan si adoleshentë të rinj. Nuk është publikuar akoma ndonjë emër.
Porsa u zbuluan trupat, ne kuptojmë qartazi se kjo është skenë krimi shumë domethënëse” – tha zëdhënësi.
Sipas tij, në sulm duket se ishin të përfshirë anëtarë të një familjeje, por shtoi se autoritetet nuk dinin ende se çfarë lidhje saktësisht kishin njerëzit mes vete. Ai gjithashtu tha se nuk kishte rrezik të vazhdueshëm ndaj komunitetit.
“Nuk kam arsye për të menduar se do të ketë ndonjë arrestim shtesë” – tha më tej zëdhënësi i policisë lokale.
Adoleshenti i ndaluar u dërgua në qendrën për ndalimin e të miturve në distriktin King, sipas zëdhënësit Mellis. Adoleshenti do të paraqitet në gjykatë në seancën dëgjimore fillestare të martën ose të mërkurën, tha zyra e prokurorit lokal.
Një fqinj i tha televizionit “King TV” se një çift me pesë fëmijë jetonte në shtëpinë ku ndodhi rasti. “Unë thjesht jam në shok të plotë, po vazhdoj të shpërthej në lot” – tha ai.
Ministri i Mbrojtjes, Ejup Maqedonci, ka komentuar sërish situatën me ushqim në FSK.
Ai ka thënë se e ka njoftuar edhe presidenten Osmani për situatën, për të cilën tha se nuk ka qenë e madhe siç është raportuar në media.
Maqedonci ka komentuar edhe raportet me zv/ministrin Maqedonci.
“Mund të them me përgjegjësi të plotë se unë jam dera, e cila është e hapur, për të gjithë ata që kanë çështje rreth Ministrisë së Mbrojtjes, dhe nuk ka nevojë, dhe nuk do të ketë nevojë, por edhe nuk do të lejoj, që dikush tjetër të jetë dera e Vetëvendosjes apo cilësdo strukturë, brenda Ministrisë së Mbrojtjes”, shtoi Maqedonci.
“E kam siguruar dhe gjithashtu e kam njoftuar se që në asnjë moment, asnjë pjesëtarë i Forcës së Sigurisë së Kosovës, nuk ka pasur mungesë të ushqimit, pavarësisht që është stërmadhuar çështja e ushqimit, në asnjë rast dhe asnjë ditë, asnjë pjesëtarë i FSK-së nuk ka mbetur pa ushqim”, deklaroi Maqedonci në Dukagjini.
Presidenti i Republikës së Shqipërisë, Bajram Begaj do të zhvillojë një vizitë zyrtare në Bosnje-Hercegovinë të martën dhe të mërkurën, më 22 dhe 23 tetor.
Para Presidencës së BeH-së është planifikuar një pritje ceremoniale me nderime ushtarake, e cila do të pasohet nga një takim tete-a-tete i anëtarëve të Presidencës së BeH me Presidentin e Republikës së Shqipërisë, Begaj.
Pas takimit janë planifikuar deklarata për shtyp.
Janë planifikuar edhe takime të presidentit Begaj me kryetaren e Këshillit të Ministrave të Bosnjë-Hercegovinës, Borjana Krishto dhe anëtarët e kolegjiumit të të dy dhomave të Asamblesë Parlamentare të Bosnjë-Hercegovinës.
Drejtori i Shërbimeve Publike në Komunën e Prishtinës, Bekim Brestovci, ka thënë se deri në fundit të marsit të vitit të ardhshëm synojnë që t’i largojnë nga rrugët mbi 1 500 qenë endacakë.
Në një intervistë për Ekonomia Online, Brestovci ka thënë se arrijnë që brenda javës t’i trajtojnë deri në 50 qenë, ndërsa nga 11 shtatori kur është funksionalizuar strehimorja, kanë kapur 268 qenë endacakë.
“Të them të drejtën është duke shkuar shumë mirë, është duke komplet sipas dinamikës që e kemi paraparë për këtë fazë sepse pastaj do të rrisim dinamikën. Më gëzon fakti se nga 11 shtatori kur e kemi funksionalizuar qendrën e veterinarisë e deri më sot i kemi kapur 268 qenë të cilët janë trajtuar dhe të gjithë këta janë dhënë për adoptim. Kështu që po punojmë me këtë ritëm, diku ndërmjet 40 dhe 50 qenë brenda javës”.
“Ka javë kur kushtet klimatike janë pak më të vështira me shi, ku pastaj edhe frekuenca e qenve të kapur është pak më e ulët, mirëpo jemi në një dinamizëm qysh e kemi paraparë. Po them se dinamizmin do ta shtojmë në momentin e funksionalizimit të strehimores sonë, sepse pastaj edhe nëse kemi pak nevojë për të pritur deri sa një adaptues t’i krijojë kushtet në bazë të kontratës për adoptimin e qenve, atëherë mundet që qentë të cilët janë të kapur t’i lejmë për disa javë në këtë procesin e socializmit brenda qendrës sonë të strehimit”.
Brestovci ka thënë se për vitin e ardhshëm synojnë që t’i largojnë qentë endacakë nga hapësirat publike, përfshirë sheshet, kampusi universitar e institucionet arsimore e shëndetësore.
“Deri në fund të marsit të vitit të ardhshëm dhe në bazë të buxhetit të paraparë që e kemi, synimi jonë t’i largojmë nga hapësirat publike, njëkohësisht t’i trajtojmë dhe t’i japim në adaptim prej 1300 deri në 1 500 qenë maksimumi. E dimë që me këtë numër nuk do të zgjidhet problemi me qenë endacakë tërësisht, mirëpo do ta krijojmë një zonë të mbrojtur nga qentë endacakë që përfshinë të gjithë qendrën e kryeqytetit, duke filluar nga sheshet, kampusi universitar, të gjitha hapësirat ku kemi shkolla e çerdhe e qendrat e mjekësisë familjare. Do na mbetet diçka edhe për vitin 2025 për shkak limitit buxhetor që e kemi”.
“Ne për t’u përballur edhe për pjesën tjetër të mbetur të qenve endacakë, i kemi drejtuar një kërkesë me shkrim Qeverisë së Kosovës dhe nëse do të kemi mbështetje financiare nga ta, atëherë natyrisht që intensiteti jonë do të jetë që deri në shtator të vitit të ardhshëm ta kemi përfundimisht të zgjidhur problemin me qentë endacakë në Kryeqytet dhe kjo më mos të mbetet temë e Kryeqytetit”, ka thënë Brestovci, teksa tregon edhe për shumën e kërkuar nga ekzekutivi.
“Ne kemi parashtruar një kërkesë në vlerë prej 3 milionë euro jo vetëm për kapje por edhe për disa pajisje të cilat do të na nevojiteshin për ta pajisur qendrën tonë të veterinarisë edhe me pajisje shtesë”, u shpreh Brestovci.
Sot vazhdon procesi gjyqësor në rastin Thaçi dhe të tjerët. Seanca është parapa të nis nga ora 09:00 deri në 16:30.
Një ditë më parë në seancë publike, ish-pjesëtari i Ushtrisë Çlirimtare të Kosovës (UÇK), Fadil Geci e ka nisur dëshminë e tij para Dhomave të Specializuara në Hagë, në rastin ndaj Thaçit dhe të tjerëve.
Geci ishte thirrur nga prokuroria që të jap informacione lidhur me autorësinë e asaj që njihet si komunikata 59-të si dhe për kërcënimet që ai pretendon se Hashim Thaçi dhe Rexhep Selimi i kanë bërë Tahir Zemajt.