Category: Lajme

Kuvendi, sipas Institutit Demokratik të Kosovës, thuajse e ka përfunduar punën e tij, pasi sipas ligjit aktual, parashihet që puna e Kuvendit duhet të mbyllet një ditë para fillimit zyrtar të fushatës zgjedhore.

Kuvendi i Kosovës, gjatë legjislaturës së tetë, ka miratuar 282 ligje, por ka hasur gjithashtu në shumë sfida që kanë penguar efikasitetin e tij. Sipas një raporti të publikuar nga Instituti Demokratik i Kosovës, kjo periudhë është shoqëruar me mundësi të humbura dhe një mungesë të përgjegjshmërisë nga ana e deputetëve.

Për më tepër, në prag të zgjedhjeve, ku mbeten vetëm një muaj deri në mbajtjen e tyre, mbledhjet për të mbajtur seanca janë pothuajse të pamundura.

Eugen Cakolli nga KDI, duke komentuar këtë situatë, shpjegon se ligji aktual parashikon që puna e Kuvendit duhet të mbyllet një ditë para fillimit zyrtar të fushatës zgjedhore.

“Meqenëse kuvendi e ka përmbyllur sesionin e punës në fund të dhjetorit dhe që sesion i ri do duhej të fillonte nga mesi i muajit janar, atëherë proceduralisht kuvendi nuk mund të mblidhet më dhe si i tillë e ka përfunduar mandatin e tij dhe seanca e fundit e dhjetorit ka qenë seanca e fundit e kësaj legjislature, përveç nëse thirret ndonjë seancë e jashtëzakonshme me dakordim për t’i miratuar disa prej marrëveshjeve apo ligjeve që janë në pritje në kuvend”, tha Cakolli.

Por çfarë do të ndodhë me projektligjet dhe marrëveshjet ndërkombëtare që kanë mbetur pa u votuar?

“Të gjitha projektligjet që kanë mbetur në Kuvend do të kthehen tashmë në pikën zero, ndërsa marrëveshjet ndërkombëtare do të duhej që të risillen nga qeveria e ardhshme kurdo që ajo do të krijohet”, shtoi ai.

Duke e parë punën jo edhe aq efikase të kësaj legjislature, ai ka thënë se legjislatura e ardhshme duhet doemos të jetë më e përgjegjshme ndaj qytetarëve që i ka zgjedhur.

“Është e domosdoshme që Kuvendi të ketë një kalendar më të shpërndarë të punës, duhet të ketë masa të sanksionuara”, tha Cakolli.

Sidoqoftë, mbetet të shihet se cila do të jetë legjislatura e re e Kuvendit pas zgjedhjeve të 9 shkurtit. /rtk

Një person raportohet se është zhdukur nga 5 janari në Lipjan.

Në raportin 24 orësh të Policisë, thuhet se ai kishte dalë nga shtëpia dhe nuk dihet për vendndodhjen e tij.

“Lipjan / 05.01.2025 – 23:00. Është raportuar se viktima mashkull kosovar ka dalur nga shtëpia dhe nuk dihet për vendndodhjen e tij. Rasti në procedurë hetimore”, thuhet në njoftimin e Policisë.

Ushtari që shpërtheu një Tesla Cybertruck jashtë hotelit Trump në Las Vegas përdori AI gjeneruese duke përfshirë ChatGPT për të ndihmuar në planifikimin e sulmit.

Sipas policisë atje, një laptop, telefon dhe një orë janë ende nën shqyrtim gati një javë pasi 37-vjeçari Matthew Livelsberger qëlloi veten për vdekje pak para se kamioni të shpërthente.

Ai përmes ChatGPT ka kërkuar informacione mbi objektivat shpërthyes, shpejtësinë me të cilën do të udhëtonin disa raunde municionesh dhe nëse fishekzjarrët ishin të ligjshme në Arizona.

Livelsberger, një Beretë Gjelbër e ushtrisë që u dislokua dy herë në Afganistan dhe jetonte në Kolorado Springs, Kolorado, la shënime duke thënë se shpërthimi ishte një marifet që synohej të ishte një “thirrje zgjimi” për problemet e vendit, thanë zyrtarët javën e kaluar.

Shpërthimi shkaktoi lëndime të lehta në shtatë persona, por praktikisht asnjë dëmtim në hotelin Trump International. Autoritetet thanë se Livelsberger veproi vetëm.

Sundimtarët e rinj të Sirisë raportohet se u kanë dhënë poste të larta ushtarake disa luftëtarëve të huaj islamikë, përfshirë një shqiptari nga Maqedonia e Veriut. Kjo ka rritur frikën në vendet e origjinës të luftëtarëve për një eksport të mundshëm të revolucionit në tokën e tyre.

Përveç shqiptarit me origjinë nga Maqedonia e Veriut, Reuters dhe AFP, duke u thirrur në burime brenda Sirisë, kanë raportuar se edhe një shtetas i Taxhikistanit dhe tre ujgurë kinezë janë në mesin e të huajve që janë promovuar në poste zyrtare.

Atyre u është dhënë grada e gjeneral-brigadier dhe të paktën një prej tyre ka marrë postin e kolonelit sipas raportimeve që Radio Evropa e Lirë nuk ka mundur t’i verifikojë në mënyrë të pavarur.

Abdul Samrez Jashari, i lindur në Maqedoninë e Veriut – i njohur edhe si Abu Qatada al-Albani – në një profil në Facebook, që besohet se ai qëndron pas tij, ka shkruar se ka marrë gradën e kolonelit, shkruan REL.

Jashari, 48 vjeç, është udhëheqës i “Xhemati Albani”, i cili është një grup militant i përbërë kryesisht nga shqiptarët etnikë.

Ky grup ka aleancë me Hayat Tahrir al-Sham (HTS) – grupin islamist të shpallur organizatë terroriste nga Shtetet e Bashkuara dhe Bashkimi Evropian – që rrëzoi nga pushteti presidentin sirian, Bashar al-Assad në dhjetor të vitit 2024.

Abdul Jashari që nga viti 2016 është i sanksionuar nga SHBA-ja. Sipas vendimit të Thesarit, ky këshilltar ushtarak është sanksionuar si njëri nga liderët e Al-Nusrës, degë e Al-Kaidës në Siri, dhe ka ndihmuar në mbledhjen e fondeve për familjet e luftëtarëve të Nusrës.

Një tjetër luftëtar i huaj i emëruar kolonel u identifikua nga blogerët taxhikë, të afërt me forcat e HTS-së, si Saifiddin Tojiboev, luftëtar nga Taxhikistani.

REL-i nuk ka mundur të verifikojë autenticitetin e raportimeve lidhur me emërimin e supozuar të Tojiboevit si komandant i operacioneve dhe promovimin e tij nga major në kolonel.

Një burim nga sektori i sigurisë në Taxhikistan, i tha REL-it se Qeveria e këtij shteti është në dijeni për lajmin lidhur me emërimin e ri të Tojiboevit.

Tojiboev, 41 vjeç, është person i kërkuar në Taxhikistan dhe akuzohet se ka marrë pjesë në një konflikt të huaj, se është anëtar i një organizate terroriste dhe se ka rekrutuar luftëtarë për grupe terroriste. Ai po ashtu është në listën e sanksioneve të Bankës Qendrore taxhike, ku i ndalohet që të kryejë aktivitete financiare.

“Tojiboev dhe i vëllai kanë shkuar në Siri më 2013 dhe që atëherë kanë marrë pjesë në konflikte ushtarake atje”, tha në burim në Dushanbe për REL-in. “Tojiboev po ashtu ka rekrutuar disa shtetas taxhikë që t’iu bashkohen organizatave terroriste”.

Tojiboev ishte anëtar i Partisë së Rilindjes Islame të Taxhikistanit (IRPT), një lëvizje dikur popullore në Dushanbe, e cila më 2015 u ndalua dhe u shpall terroriste. Kjo parti ka mohuar akuzat për terrorizëm.

HTS-ja ende zyrtarisht nuk ka bërë ndonjë deklaratë publike lidhur me emërimin në poste të luftëtarëve të huaj.

Ky grup islamik është zotuar se do të aplikojë politika të moderuara sa u përket të drejtave të grave, është zotuar për pajtim kombëtar dhe raporte me komunitetin ndërkombëtar. Po ashtu, HTS-ja po tenton të krijojë një ushtri profesionale duke përfshirë persona nga fraksione të ndryshme militante që janë aleatë me të.

Në HTS bëjnë pjesë një numër i madh i luftëtarëve nga Rusia, Azia Qendrore dhe Ballkani. Shumica e tyre shkuan në Siri pasi grupi ekstremist, Shteti Islamik (IS) ishte njoftuar për krijimin e kalifatit në pjesë të Sirisë dhe Irakut më 2014.

Shqetësime në vendet e origjinës

Në shtetet e tyre të origjinës, shumë nga këta luftëtarë shihen si kërcënime potenciale për stabilitetin dhe sigurinë kombëtare.

Adrian Shtuni nga Qendra Ndërkombëtare Kundër Terrorizmit në fund të vitit 2024 i tha Radios Evropa e Lirë se nuk beson se tani mund të rriten interesat e luftëtarëve shqiptarë për t’u kthyer në vendet e tyre, edhe pas rënies së regjimit të Assadit.

“Nuk jam i sigurt që ata do të donin të ktheheshin, pasi këta persona janë të fokusuar, kanë një prapavijë xhihadiste, kanë rrezikuar jetën për synimet e tyre ideologjike, të cilat nuk i kanë fshehur”, deklaroi, duke shtuar se disa prej tyre mund të kenë ambicie për pozita në qeverisjen e re në Siri.

Presidentja e vendit, Vjosa Osmani ka thënë se nderi më i madh që mund t’i bëhet shtetit të Kosovës, është puna dhe përkushtimi për ta çuar përpara vendin.

Osmani në një video përmbledhëse ka thënë se përkushtimi për një jetë më të mirë për qytetarët e Kosovës, do të vazhdojë përgjatë vitit 2025.

Ajo është shprehur se ky duhet të jetë mision për të gjithë.

“Përgjatë vitit 2024, pjesa më përmbushëse e angazhimit ishin takimet me qytetarë. Bashkëbisedimet tona për sfidat dhe sukseset janë shtysa më e madhe për të vazhduar punën me përkushtim edhe në këtë vit të ri dhe për ta ndërtuar një të ardhme më të mirë për të gjithë!

Jemi këtu ku jemi me mision për ta udhëhequr vendin përpara, e për ta fuqizuar shtetësinë tonë edhe më shumë dhe për të qenë vesh e sy e mbështetje për secilin qytetar. Momenti kur do të themi se vërtetë ja kemi dalë është kur qytetarët do të thonë jemi krenarë për vendin tonë, për vlerat që ai përfaqëson dhe për mundësitë që ofron.

Ky është nderi më i madh që mund të ja bëjmë Kosovës. Edhe pse sfidat vazhdojmë ne i qasemi kësaj këmbëngulje me orenitim të qartë strategjik të bazuar edhe në vullnetin e qytetarëve. Qytetarët janë zemra e këtij shteti, përfshirë edhe rolin e madh të mërgimtarëve”, ka thënë Osmani në videon e publikuar sot.

Koreja e Veriut ka testuar me sukses një raketë të re balistike me rreze të mesme veprimi (IRBM) të pajisur me një kokë hipersonike.

Ata kanë raportuar se “sistemi i armëve do të ndihmojë në mënyrë të besueshme në pengimin e armiqve të saj në rajonin e Paqësorit”.

Lajmi është bërë i ditur nga agjencia e lajmeve e Koresë së Jugut, Yonhap.

Koreja e Veriut raportoi se raketa fluturoi rreth 1500 kilometra me një shpejtësi 12 herë më të madhe se shpejtësia e zërit një ditë më parë gjatë testit të udhëhequr nga udhëheqësi Kim Jong-un, sipas Agjencisë Qendrore Koreane të Lajmeve.

Mbreti danez ka tronditur disa historianë duke ndryshuar stemën mbretërore për të shfaqur më dukshëm Grenlandën dhe Ishujt Faroe – në atë që është parë gjithashtu si një qortim për Donald Trump, raporton The Guardian.

Mbreti Frederik ka bërë një deklaratë të qartë të synimit për të mbajtur territorin autonom danez dhe ish-koloninë brenda mbretërisë së Danimarkës.

Për 500 vjet, stemat e mëparshme mbretërore daneze kanë paraqitur tre kurora, simbolin e Unionit Kalmar midis Danimarkës, Norvegjisë dhe Suedisë, i cili u drejtua nga Danimarka midis 1397 dhe 1523.

Ato janë gjithashtu një simbol i rëndësishëm i fqinjit të saj Suedisë.

Por në versionin e përditësuar, kurorat janë hequr dhe janë zëvendësuar me një ari polar dhe dash më të spikatur se më parë, për të simbolizuar respektivisht Grenlandën dhe Ishujt Faroe.

Lëvizja vjen në një kohë të tensionit të shtuar mbi Grenlandën dhe marrëdhëniet e saj me Danimarkën, e cila vazhdon të kontrollojë politikën e saj të jashtme dhe të sigurisë.

 

Ish-deputeti i Kuvendit të Kosovës, Rrustem Mustafa thotë se presidenti i Serbisë, Aleksandar Vuçiq mund të provojë të “eksportojë problemet e brendshme jashtë Serbisë”. Taktikë kjo, sipas Mustafës, e njohur historikisht nga liderët serbë kur ndihen të kërcënuar në pushtet.

Megjithatë, sipas tij “kjo mundësi tashmë është marrë seriozisht nga NATO dhe mekanizmat e tjerë të sigurisë në rajon, të cilët janë të njoftuar dhe të përgatitur për çdo përpjekje për destabilizim nga jashtë”.

Në një reagim në Facebook, Mustafa ka kujtuar mënyrën si vepronte Sllobodan Millosheviq kur pushteti tij në Beograd lëkundej.

“Në atë kohë, ai shpërndante konflikte në rajon, përfshirë Kosovën dhe vende të tjera, për të shmangur vëmendjen nga krizat e brendshme”, ka shkruar Mustafa.

Vuçiq po përballet me protesta masive në Serbi – atje ku rrugët e kryeqendrës panë mbi 100 mijë protestues.

Protestat e studentëve u përhapën në Serbi pas vdekjes tragjike të 15 personave më 1 nëntor 2024 nga shembja e strehës hekurudhore në Novi Sad.

Kjo shkaktoi një valë pakënaqësie dhe luftë kundër korrupsionit, dhunës dhe për një shoqëri më të drejtë.

Vuçiq, i cili akuzohet për sundim gjithnjë e më autokratik, ruan lidhje të ngushta me Rusinë dhe Kinën./KP

Los Anxhelosi ka shpallur gjendjen e jashtëzakonshme pas shpërthimit të një zjarri të madh.

Shefi i zjarrfikësve, Kristin Crowley tha se më shumë se 30.000 njerëz janë urdhëruar të evakuohen dhe 13.000 ndërtesa janë në rrezik, raporton BBC.

Pamjet tregojnë shtëpi në zjarr në zonën e Paqësorit Palisades dhe banorë që braktisin makinat e tyre për t’u larguar nga flakët.

Zjarri shpërtheu të martën, i nxitur nga erërat me shpejtësi 80 km/h, dhe kushtet tepër të thata.

Një zjarr i dytë ka filluar gjithashtu të përhapet me shpejtësi mbi Altadena, pranë Kanionit Eaton.

Miliona njerëz në Kaliforni janë nën një paralajmërim të flamurit të kuq, që do të thotë se ekziston një rrezik ekstrem i zjarrit.

Policia e Kosovës ka njoftuar se ka konfiskuar dy armë, në dy raste të ndryshme, në jug të Mitrovicës.

Ngjarja ka ndodhur të martën pasdite dhe në rastin e parë, sipas policisë, arrestimi i të dyshuarit është bërë gjatë kontrollit të detajuar. Atij i është gjetur dhe konfiskuar një armë e shkurtë – pistoletë.

Ndërsa në rastin e dytë, siç thuhet në njoftim, tek i dyshuari në posedim pa leje është gjetur dhe konfiskuar një armë e gjatë – pushkë gjuetie.

“Të gjitha veprimet e ndërmarra i janë paraqitur prokurorit të rastit, ndërsa pas intervistimit, me aktvendim të prokurorit dy të dyshuarve u është caktuar masa e ndalimit policor. Ndaj tyre janë iniciuar raste për veprën penale ” mbajtje në pronësi, posedim, kontroll të paautorizuar të armës” , ka njoftuar Policia e Kosovës./KP