Category: Lajme

Një gazetare italiane e ndaluar në Iran që nga 19 dhjetori është liruar dhe po kthehet në Itali, ka njoftuar zyra e kryeministres, Giorgia Meloni.

Një avion që transportonte Cecilia Sala u ngrit nga Teherani pas “pune intensive në kanalet diplomatike dhe të inteligjencës”, thuhej në një deklaratë.

Sala, një reportere për Il Foglio, u ndalua në Teheran tre ditë pasi mbërriti me një vizë pune. Situata e saj ishte ndërlidhur me atë të një inxhinieri iranian të arrestuar në Itali me një urdhër të Shteteve të Bashkuara.TCH

Serbia është aleati më i afërt evropian i Rusisë dhe korrupsioni është i kudondodhur në atë vend ballkanik, sipas një analize të publikuar nga Fondacioni gjerman Friedrich Naumann (Friedrich Naumann).

“Presidenti i Serbisë, Aleksandar Vuçiq, është takuar tashmë 17 herë me Presidentin e Federatës Ruse, Vladimir Putin. Në vitin 2019, Vuçiq mori Urdhrin e Aleksandër Nevskit në Moskë, i cili zakonisht u jepet figurave të mëdha ruse. Ky ishte një nga momentet më të lumtura në karrierën e tij politike”, thuhet në analizën “Rusia dhe pionierët e autokracisë: Si Kremlini destabilizon Evropën”, me autor gazetarin dhe profesorin e universitetit Thomas Brey.

Shtohet se regjimi në Serbi po përpiqet të zbatojë politikën e “botës serbe” bazuar në një projekt të ngjashëm të “botës ruse”.

“Ky program serbomadh ishte një nga shkaktarët e luftërave të përgjakshme gjatë shpërbërjes së Jugosllavisë”, thuhet në analizë.

Kujtohet se Serbia nuk e harmonizoi politikën e saj me BE-në dhe nuk vendosi sanksione kundër Rusisë.

“Kompania ajrore kombëtare Air Serbia ende fluturon disa herë në javë drejt Moskës dhe qyteteve të tjera ruse. “Ka një qendër humanitare ruso-serbe në afërsi qytetit të Nishit në jug të Serbisë, të cilën kritikët në Perëndim e konsiderojnë qendër për shërbimet e inteligjencës ruse”, thuhet në analizë.

Shtohet se mediat proqeveritare në Serbi janë bartësit kryesorë të propagandës ruse.

“Është edhe më e rëndësishme që janë zyrtarët serbë, veçanërisht ata në poste të larta qeveritare, të cilët kryesisht përhapin narrativa pro-ruse dhe antiperëndimore”, thuhet në analizë.

Shtohet se në ato media “Rusia ngritët deri në qiell, ndërsa Perëndimi demonizohet”.

Thuhet se Vuçiq në fakt po përhap propagandë ruse në intervistat e tij për mediat perëndimore.

Theksohet se edhe pse Gjermania është partneri më i rëndësishëm i Serbisë, ajo shpesh paraqitet në pasqyrë shumë negative në Serbi.

Në analizë thuhet se ” qoftë Putini nga Rusia, Orbani nga Hungaria, Vuçiqi nga Serbia apo Fitzi nga Sllovakia – sistemet e tyre të kontrollit politik dhe të ruajtjes së pushtetit janë të njëjta kudo”.

“Në radhë të parë është nacionalizmi i ri, i cili inkurajohet nga pretendimi se vendet fqinje, NATO, SHBA apo BE kërcënojnë kombin e tyre”, thuhet në analizë.

Përveç mediave të centralizuara dhe të censuruara, thuhet në analizë, mjeti kyç për ruajtjen e pushtetit është minimi sistematik i të gjitha institucioneve shtetërore si parlamenti, qeveria dhe ministritë, gjyqësori, autoritetet vendore dhe organet e pavarura mbikëqyrëse.

“Gjithashtu, tregu i punës është i instrumentalizuar politikisht”. Shumë poste në administratë dhe ekonomi mund të merren vetëm përmes partisë SNS në pushtet. Nuk është çudi që një dhjetë përqind e popullsisë së përgjithshme përbëhet nga anëtarë të SNS. Këta anëtarë luajnë një rol kyç në manipulimin e zgjedhjeve, sepse janë të detyruar të mbledhin vota të sigurta nga familjarët dhe kolegët e tyre”, thuhet në analizë.

Shtohet se Vuçiq, “si në një reality TV, si president i kudondodhur e mban publikun në emocione të vazhdueshme”.

“Pothuajse çdo ditë ai shfaqet në ekranet televizive, duke folur shpesh me orë të tëra për t’u prezantuar qytetarëve histori të rëndësishme, të mëdha, të pabesueshme apo dramatike, siç njoftojnë mediat qeveritare. Këto janë histori për komplote, krim të organizuar, skenarë frike për të ardhmen, investitorë të huaj spektakolar, vendosjen e themeleve apo hapjen e spitaleve moderne, rrugëve, fabrikave, hekurudhave dhe termocentraleve”, thuhet në analizë.

Shtohet se në të njëjtën kohë “fshin plotësisht kufirin mes kreut të shtetit dhe vetë shtetit”, sepse Vuçiq “pohon vazhdimisht se e ka bërë të mundur këtë apo atë, sikur të kishte investuar paratë e tij”.

Analiza gjithashtu thekson se, megjithëse opozita e margjinalizuar në Serbi është kryesisht e përjashtuar nga jeta politike, disa media kritike, gazetarë dhe politikanë janë çdo ditë subjekt i sulmeve dhe turpërimeve nga mediat qeveritare.

Ata akuzohen vazhdimisht se duan të vrasin presidentin, se shpifin për atdheun e tyre jashtë vendit, se janë të korruptuar dhe imoralë dhe se janë të kontrolluar nga inteligjenca e huaj. Si mund të kërcënojë një opozitë e dobët presidentin apo siç pretendohet shpesh – familjen e tij, kur ai mund të përdorë policinë, shërbimet e inteligjencës, madje edhe ushtrinë sipas gjykimit të tij?”, thuhet në analizë.

Kryeministri Edi Rama ka publikuar në rrjetin e tij social “X” lajmin për nisjen e një linje direkte fluturimi Shqipëri-Izrael.

Rama thotë se ky është një lajm fantastik për vendin tonë, ndërsa thekson se një e ardhme e përbashkët bashkëpunimi dhe respekti reciprok mund të çojë në mundësi të jashtëzakonshme për të dy vendet.

“Ky është një lajm fantastik për forcimin e mëtejshëm të lidhjeve mes Izraelit dhe Shqipërisë”, shkruan kryeministri Rama.

“Mirënjohës ndaj një njeriu të jashtëzakonshëm, një udhëheqësi frymëzues dhe mikut tim të dashur, Isaac Herzog, i cili solli me vete në Shqipëri një grup sipërmarrësish të shquar izraelitë dhe për fjalët e tij inkurajuese drejtuar komunitetit hebre të biznesit duke i nxitur ata ta shohin Shqipërinë si një vend vëllazëror të mundësive”, shkruan Rama ndër të tjera.

Postimi i plotë:

“Ky është një lajm fantastik për forcimin e lidhjeve mes Izraelit dhe Shqipërisë! Fluturimet direkte jo vetëm që bëjnë udhëtimin më të thjeshtë, por hapin mundësi për shkëmbime kulturore, turizëm dhe mundësi biznesi. Lidhja historike mes dy shteteve, përfshirë rolin heroik të Shqipërisë në strehimin e hebrenjve gjatë Luftës së Dytë Botërore, është një bazë e fortë për një lidhje më të qëndrueshme.

Inkurajimi i izraelitëve për të zbuluar bukuritë natyrore të Shqipërisë, traditat e saj të pasura dhe ekonominë në zhvillim do të kontribuojë në forcimin e miqësive dhe partneriteteve të forta. Një e ardhme e përbashkët e bashkëpunimit dhe respektit të ndërsjellë mund të sjellë mundësi të jashtëzakonshme për të dyja vendet. Për shumë momente të paharrueshme dhe një miqësie që po lulëzon.

Faleminderit, një njeriu të jashtëzakonshëm, një lideri frymëzues dhe mikut tim të dashur Isaac Herzog për sjelljen e një grupi të shkëlqyer sipërmarrësish izraelitë në Shqipëri dhe për fjalët e tij inkurajuese për komunitetin hebre të biznesit, duke i nxitur ata ta shohin Shqipërinë si një vend vëllazëror mundësish.”

Ministri i Shëndetësisë, Arben Vitia, në një konferencë për media ka njoftuar se do të filloj vaksinimi me vaksinën HPV për djemtë, vaksinë kjo që parandalon shumë lloje të kancereve.

Ai ka thënë se vaksinimi për vajzat për HPV ka filluar vitin e kaluar dhe se deri tani me këtë vaksinë janë vaksinuar 10 mijë vajza.

“Sot është një ditë e rëndësishme për shëndetin e fëmijëve dhe politikave shëndetësor. Ky është një hap thelbësor për parandalimin e sëmundjeve serioze. Ky virus shkakton shumë telashe dhe shumë lloje të kancereve. Në vitin e kaluar, miratuam përfshirjen e tri vaksinave të reja në kalendarin e fëmijëve. Nuk është një mundësi vetëm për vajzat, por edhe për djemtë për të parandaluar shumë sëmundje seriozë, HPV është virus shumë i rrezikshme dhe vaksinimi i djemve është një hap i rëndësishëm”, tha Vitia.

Vitia ka thënë se vaksinimi është i domosdoshëm pa marrë parasysh gjininë.

“Deri tani janë 10 mijë vajza nga grupi i synuar për t’u vaksinuar. Vaksinimi i të rinjve pa marr parasysh gjininë është i domosdoshëm”, ka thënë ai.

Ardita Baraku drejtoreshë e IKSHPK-së, ka thënë se ky vaksinim është shumë i rëndësishëm për mbrojtjen e kancereve dhe sëmundjeve të tjera për të dy gjinit.

“Është mjet efikas për mbrojtën e kancereve dhe sëmundjeve te tjera për të diganostifikimin e të dy gjinive . Është e rëndësishme që të vazhdoj ky trend i mirë i imunizimit dhe t’i kemi të mbrojtur fëmijët tani për një të ardhme të shëndetshme”, tha ajo.

Shefja e njësisë se vaksinimit në Institutin Kombëtar të Shëndetit Publik të Kosovës, Fetije Fetaj, ka thënë se nga 10 mijë dozat e dhëna deri më tani në Kosovë nuk ka pasur asnjë efekt anësor.

“84 për qind kemi arritur që të kemi vaksinimin e vajzave me HPV. Gjithë djemtë e vajzat e klasave të gjashta o të vaksinohen. Vaksina është e sigurt dhe efektive dhe do të ofrohet pa pagesë. 10 mijë doza janë dhënë dreri tani në Kosovë dhe asnjë efekt anësor serioz nuk është paraqitur”, tha Fetaj.

Bordi i Entit Rregullator të Energjisë (ERE) u mblodh sot për të shqyrtuar kërkesën e OSHEE për uljen e çmimit të energjisë për familjarët.

Drejtori i Tarifave pranë OSHEE, Romir Pajenga tha se çmimet për konsumatorët familjarë që shpenzojnë deri në 700 kwh, çmimi do të jetë 8,5 lekë për kilovat. Për ato familje që konsumojnë më shumë se 700 kilovat, çmimi do të jetë 9,5 lekë për kilovat.

Ku vendim hyn në fuqi më 1 shkurt 2025 deri në 31 dhjetor 2025.

Kryeministri Edi Rama tha se kjo është ulja e parë në historinë e këtyre 35 viteve të çmimit të energjisë elektrike.

“Ky është një fakt i cili na mbush patjetër me shumë krenari, po të marrim parasysh se nga çfarë humnere e kemi nisur ngjitjen deri në këtë pikë”, tha Rama në një konferencë për shtyp së bashku me zëvendëskryeministren dhe njëherësh ministre e Infrastrukturës dhe Energjisë, Belinda Balluku.

“Po të marrim parasysh se ulja e çmimit të energjisë elektrike në kohën e sotme është në kundërtendencë të plotë me rajonin dhe me kontinentin ku jetojmë, ku çmimet e energjisë elektrike jo vetëm janë rritur në përgjithësi, por janë të kërcënuar nga rritje të tjera”, shtoi Rama.

“Kjo masë, është një masë më shumë sesa e mirëmenduar, e diskutuar gjerësisht në të gjitha nivelet me ekspertizën e brendshme dhe me ekspertizë ndërkombëtare. E bazuar në projeksionet e planit tonë strategjik për sovranitetin e plotë energjetik dhe kthimin e Shqipërisë në një eksportuese neto të energjisë brenda mandatit tonë të katërt dhe sigurisht duke pasur parasysh edhe parimin e shpallur botërisht të qeverisë sonë për të ndarë me qytetarët frytet e reformave të dhimbshme, frytet e përpjekjeve shumë të mundimshme në këto vite dhe frytet e një rritjeje ekonomike, që për vitin 2025 e parashohim në harkun e 4%, që është një shifër shumë domethënëse”, tha Rama.

Shqiptari shumë i kërkuar, Dritan Rexhepi pritet të ekstradohet sot nga Turqia në Shqipëri.

Turqia e miratoi ekstradimin në Shqipëri të Dritan Rexhepit në shkurt të vitit 2024, i cili u arrestua në Stamboll në muajin nëntor të vitit 2023.

Në Shqipëri Dritan Rexhepi po gjykohet në mungesë në Gjykatën e Posaçme si porositës i rrëmbimit dhe vrasjes së Jan Prengës më 17 janar të vitit 2020.

I konsideruar si mjeshtri i arratisjeve nga burgjet shqiptare, italiane dhe belge, Dritan Rexhepi në mars të 2006-ës, u shpall fajtor dhe u dënua me 25 vjet burg në mungesë për vrasjen e dy policëve në Fushë-Krujë, Arben Keçi e Durim Kasmi në vitin 1998.

Shqiptari më i kërkuar në botë, Dritan (Gramos) Rexhepi, i arratisur nga burgjet e tri shteteve është cilësuar si vrasësi i parë me pagesë në Shqipëri.

Ai akuzohet në Shqipëri për vrasjen e dy policëve.

Rexhepi është lideri i një karteli droge, i cili ka trafikuar kokainë me vlerë qindra milionë euro nga Amerika e Jugut në Evropë./Tch

Një person është arrestuar në fshatin Cerkolez të Istogut pasi që i njëjti duke festuar Krishtlindjen Ortodokse, bashkë me disa persona, është parë në një videoincizim se kishte shtënë me armë.

Policia bën të ditur se i njëjtit gjatë bisedës me të, ka deklaruar se ka edhe armë të tjera në shtëpi.

Nё koordinim me Prokurorin e shtetit, nё shtёpinё e personit tё dyshuar nga zyrtarët policor janë gjetur dhe sekuestruar:

• Një armë pistoletё CZ 75B
• Dy karikatorë tё sё njejtёs armё
• Një pushkë gjysmё automatike M57 7.62mm
• Një pushkё gjuetie

“I dyshuari ёshtё arrestuar dhe pas intervistimit nga Hetuesit, me vendim tё Prokurorit tё shtetit është liruar nё procedurё tё rregullt”, thuhet tutje në njoftimin e Policisë.

Franca ka paralajmëruar Donald Trumpin që të mos kërcënojë “kufijtë sovranë” të Bashkimit Evropian pasi presidenti i zgjedhur i SHBA-së refuzoi të përjashtonte veprimet ushtarake për të marrë kontrollin e Groenlandës, një territor autonom i Danimarkës anëtare të BE-së.

Ministri i Jashtëm francez, Jean-Noel Barrot, i tha radios France Inter: “Nuk ka dyshim që BE-ja të lejojë vendet e tjera në botë, kushdo qofshin ata, të sulmojnë kufijtë e saj sovranë”.

Ai shtoi se megjithëse nuk besonte se SHBA “do të pushtonte” Grenlandën “ne kemi hyrë në një epokë që po sheh kthimin e ligjit të më të fortëve”.

Policia e Kosovës ka njoftuar se brenda 24 orëve të kaluara ka shqiptuar 1 mijë e 593 gjoba në trafik.

Gjatë kësaj periudhe kohore janë evidentuar disa aksidente në trafikun rrugor, 23 aksidente kanë qenë me lëndime dhe 39 me dëme materiale.

Po ashtu, policia njofton se janë arrestuar 18 persona, ndërkaq 14 të tjerë janë dërguar në mbajtje.