Category: LAJME

Polonia dhe Letonia ngritën në ajër avionë luftarakë të hënën vonë, mes sulmeve ajrore ruse ndaj Ukrainës dhe shqetësimeve se luftimet mund të përhapen në hapësirën ajrore të NATO-s.  

Komanda Operacionale e Polonisë nisi operacionet e aviacionit ushtarak pak para orës 22:00, ndërsa sistemet e mbrojtjes ajrore tokësore dhe radarët u vunë në gatishmëri të shtuar. Autoritetet thanë se operacioni përfundoi pas orës 23:00 pa asnjë shkelje të hapësirës ajrore polake.

Banorëve në të gjithë rajonin e Lublinit iu dërgua gjithashtu një njoftim nga Qendra e Sigurisë Qeveritare, duke i informuar ata për sulmet ruse dhe se avionët polakë po operonin në hapësirën ajrore kombëtare.

Në Letoni, autoritetet raportuan një kërcënim të mundshëm për hapësirën ajrore të vendit në komunën lindore të Kraslavës pak pas orës 22:00, duke nxitur aktivizimin e avionëve luftarakë të Policisë Ajrore Baltike të NATO-s. Forcat letoneze thanë se kërcënimi kishte mbaruar deri në orën 23:50.

Të dy vendet kanë rritur vazhdimisht gatishmërinë e mbrojtjes ajrore, ndërsa sulmet me dronë dhe raketa ruse vazhdojnë pranë krahut lindor të NATO-s.

Avokati britanik Toby Cadman ka komentuar aktgjykimin ndaj ish-krerëve të UÇK-së në Hagë, duke shprehur shqetësim për dënimet dhe mënyrën se si janë trajtuar dëshmitë e mbrojtjes.

Në një intervistë për Euronews, Cadman ka folur edhe për mundësinë e zhvillimit të procedurave të apelit në Kosovë.

Cadman, i cili ka përfaqësuar më herët Nasim Haradinajn dhe njeh mënyrën e funksionimit të Speciales, i cilësoi dënimet, veçanërisht ato prej 25 vitesh për Hashim Thaçin dhe Jakup Krasniqin, si “shumë zhgënjyese”.

Sa i përket procesit të apelit, Cadman vlerësoi se mbrojtja duhet të fokusohet te mënyra se si janë trajtuar deklarimet e dëshmitarëve të mbrojtjes, duke thënë se kjo mund të argumentohet për të kërkuar rrëzimin e aktgjykimeve.

“Sa i përket apelit, mendoj që duhet të argumentohet shpërfillja e dëshmive të dëshmitarëve të mbrojtjes. Dëshmitë e mbrojtjes janë shpërfillur plotësisht dhe kjo duhet të argumentohet fuqishëm në apel dhe potencialisht të çojë në rrëzimin e aktgjykimeve. Si avokat, kam gjithmonë shpresë dhe besim në institucionet gjyqësore. Një nga gjërat që mezi pres”, tha Toby Cadman.

Sipas tij, fakti që procesi ka ndjekur penalisht vetëm njërën palë të konfliktit ndikon në legjitimitetin e institucionit, ndërsa theksoi se Specialja është një tribunal ndërkombëtar në çdo aspekt, përveç emrit.

“Reagimi im i parë ishte se kjo ishte një formë e pritshme, por është shumë zhgënjyese, sidomos shkalla e lartë e dënimit. Është kohëzgjatje shumë e madhe e dënimit, sidomos për Thaçin dhe Krasniqin, që u dënuan me 25 vjet. Kur një proces është ngritur për të ndjekur penalisht vetëm njërën palë të konfliktit, veçanërisht palën që ka vuajtur më së shumti, kjo ndikon në legjitimitetin e institucionit. Mendoj se një shqetësim tjetër është që vendimi jepet në emër të popullit të Kosovës. Kjo ka shkaktuar shqetësim të madh dhe po shohim lëvizje me sloganin ‘Jo në emrin tim’. Është e vështirë që kjo të barazohet me një gjykatë të Kosovës. Ky është një tribunal ndërkombëtar në çdo aspekt, përveç emrit”, tha Cadman.

Sa i përket hapave të mëtejshëm, Cadman tha se ndryshimi i ligjit për Specialen do të ishte i vështirë për shkak të presionit ndërkombëtar, ndërsa përmendi mundësinë që procedurat e apelit të zhvillohen në Kosovë. Ai argumentoi se ligji nuk e përjashton një mundësi të tillë dhe se do të ishte e preferueshme që proceset të zhvilloheshin në vendin ku kanë ndodhur ngjarjet.

“Kemi parë deklarata të shumta për ndryshimin e Speciales dhe mendoj për amendimin e ligjit, por mendoj se është shumë e vështirë që tani të ketë ndryshime. Një nga kritikat kryesore buron nga fakti se Specialja nuk ka asnjë lidhje me Kosovën, nuk ka koordinim me ministritë apo institucionet e Kosovës. Nëse shohim përpjekjet për reformën para disa vitesh, kishte një lëvizje në Kuvend për ta shqyrtuar institucionin dhe për të parë mundësinë për reformimin e ligjit. Autoritetet e Kosovës nuk kishin kompetencë për të bërë ndryshime dhe ndërkombëtarët ishin kritikë ndaj çdo përpjekjeje për të ndryshuar këtë proces. Mendoj se edhe tani do të ishte i njëjti presion nga BE-ja dhe SHBA-ja. Vetëm BE-ja do të kishte autoritet për ta bërë. Marrëveshja e shtetit pritës është një marrëveshje ndërkombëtare. Ajo ka një klauzolë ku Kosova potencialisht mund ta paraqesë një kërkesë në arbitrazh. Potencialisht është diçka që mund të konsiderohet tani nga autoritetet shtetërore.

Si marrëveshje ndërkombëtare, është mes Kosovës dhe Holandës, që ka të bëjë me shtetin pritës. Me faktin që institucioni ndodhet në Hagë, jashtë Kosovës, janë bërë komente që procedurat e apelit të bëhen në Kosovë. Aktualisht nuk ka asgjë që e ndalon këtë, sepse ligji thotë se selia është në Kosovë dhe diku tjetër; ai nuk thotë se procedurat nuk mund të zhvillohen dhe të mbahen në Kosovë. Edhe unë kam thënë që është e preferueshme që kjo gjë të bëhet në vendin ku kanë ndodhur ngjarjet. Kosova, në të vërtetë, nuk ka ndonjë fuqi për t’i kërkuar institucionit dhe BE-së, por ama nuk ka asgjë që ta pengojë zhvillimin e seancave në Kosovë. Unë e kam mbështetur këtë edhe për arsyen se gjykata nuk ka qasje nga populli i Kosovës”, tha ai.

Personeli shumëkombësh i çështjeve publike në kuadër të KFOR-it ka zhvilluar trajnim për përdorimin e sigurt të dronëve të vegjël në kampin “Bondsteel”.

Postimi i plotë:

Personeli shumëkombësh për çështje publike, i angazhuar në misionin e Forcës së Kosovës të udhëhequr nga NATO-ja (KFOR), ka marrë pjesë në një trajnim për përdorimin e sigurt të sistemeve të vogla të mjeteve ajrore pa pilot në Kampin “Bondsteel”, duke përmirësuar aftësitë e tyre për realizimin e imazheve ajrore.

Instruktorë nga Shtetet e Bashkuara dhe Gjermania kanë ofruar trajnim praktik për personelin e çështjeve publike nga Irlanda dhe SHBA-ja, duke zhvilluar aftësitë e tyre për integrimin e imazheve ajrore në operacionet e komunikimit publik.

Ky trajnim forcon ndërveprueshmërinë, ndërsa zgjeron aftësinë e KFOR-it për të dokumentuar dhe komunikuar aktivitetet e tij në të gjithë Kosovën.

KFOR-i vazhdon të zbatojë mandatin e tij, bazuar në Rezolutën 1244 të Këshillit të Sigurimit të Kombeve të Bashkuara të vitit 1999, për të kontribuar në një mjedis të sigurt dhe të qetë për të gjithë njerëzit që jetojnë në Kosovë, si dhe në lirinë e lëvizjes.

KFOR-i e realizon këtë mision në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre përkatëse si mekanizma të reagimit në fushën e sigurisë.

Kina ka shpenzuar një shumë rekord për importin e arit gjatë vitit 2026, duke blerë më shumë se 1 mijë tonë vetëm në tetë muajt e parë të vitit.

Sipas Financial Times, deri në fund të gushtit Kina ka shpenzuar 158.8 miliardë dollarë (rreth 138.5 miliardë euro) për importin e arit.

Kjo shumë është dukshëm më e lartë se 96.5 miliardë dollarët (rreth 84.1 miliardë euro) që Kina shpenzoi gjatë gjithë vitit 2025, kur importoi 886 tonë ar.

Gjatë vitit të kaluar, Kina kishte frenuar blerjet e arit, në një kohë kur çmimi i metalit të çmuar po rritej me shpejtësi.

Kina është gjithashtu prodhuesi më i madh në botë i arit. Sipas Këshillit Botëror të Arit, vendi prodhoi 384 tonë gjatë vitit të kaluar.

Të dhënat tregojnë gjithashtu se investitorët kinezë po blejnë më shumë ar, si pjesë e përpjekjeve për të diversifikuar pasuritë e tyre.

Forca e Sigurisë së Kosovës (FSK) ka avancuar kapacitetet e saj teknike për mirëmbajtjen e automjeteve HMMWV, përmes trajnimit “Maintenance Event”, të zhvilluar në objektin e SMAR-it, në Aeroportin e Gjakovës.

Në kuadër të zhvillimit dhe avancimit të vazhdueshëm të kapaciteteve profesionale të Forcës së Sigurisë së Kosovës, është realizuar trajnimi “Maintenance Event”, në objektin e SMAR-it, në Aeroportin e Gjakovës.

Trajnimi u zhvillua me pjesëmarrjen e pjesëtarëve të FSK-së dhe me mbështetjen e pjesëtarëve të Gardës Kombëtare të Ajova-s, SHBA, duke ofruar mundësi për shkëmbim të përvojave dhe avancim të njohurive teknike në mirëmbajtjen e automjeteve HMMWV.

Gjatë trajnimit, pjesëtarët e FSK-së zhvilluan aftësi praktike në inspektimin, mirëmbajtjen, diagnostikimin dhe riparimin e sistemeve kryesore të automjeteve HMMWV, me fokus të veçantë në transmisionin, sistemin e derivateve dhe sistemet elektronike.

Një komponent i rëndësishëm i trajnimit ishte edhe zhvillimi i kapaciteteve të instruktorëve të FSK-së, duke krijuar mundësi për bartjen e njohurive dhe përvojave të fituara tek pjesëtarët e tjerë të Forcës.

Ky aktivitet përfaqëson një tjetër hap në ngritjen e kapaciteteve teknike dhe profesionale të FSK-së, rritjen e efikasitetit në mirëmbajtjen e mjeteve dhe forcimin e bashkëpunimit të qëndrueshëm me Gardën Kombëtare të Ajova-s.

Rusia dhe Ukraina kanë shkëmbyer sulme të reja me raketa dhe dronë, duke shkaktuar viktima dhe dëme në të dyja anët, ndërsa presidenti ukrainas Volodymyr Zelensky ndodhet në Nju Jork për Asamblenë e Përgjithshme të OKB-së, ku pritet të takohet me presidentin amerikan Donald Trump.

Gjatë natës, forcat ruse goditën të paktën katër rajone të Ukrainës me raketa dhe më shumë se 200 dronë. Autoritetet ukrainase raportuan katër të vrarë në qytetin Dnipro dhe të paktën pesë të plagosur në zona të tjera, përfshirë kryeqytetin Kyiv. Sulmet dëmtuan banesa, biznese dhe objekte magazinimi.

Në të njëjtën kohë, Ukraina kreu një tjetër sulm me rreze të gjatë në territorin rus, duke goditur rafinerinë e naftës Kuibyshev në rajonin e Samarës. Sipas forcave speciale ukrainase, disa dronë goditën objektin dhe shkaktuan një zjarr të madh. Rafineria, në pronësi të Rosneft, është një furnizues i rëndësishëm i karburanteve për Rusinë qendrore.

Guvernatori i Samarës, Vyacheslav Fedorishchev, tha se një person u vra dhe katër të tjerë u plagosën në sulm. Ai tha se objektivi ishte një “strukturë industriale”, pa dhënë detaje të mëtejshme.

Ministria ruse e Mbrojtjes deklaroi se gjatë natës forcat e saj rrëzuan 297 dronë ukrainas mbi 14 rajone të Rusisë dhe mbi Krimenë e aneksuar ilegalisht.

Nga ana tjetër, Forcat Ajrore ukrainase thanë se sulmi rus përfshiu raketa kundër anijeve, raketa balistike, raketa kruiz dhe më shumë se 200 dronë.

Shkëmbimi i përditshëm i sulmeve ajrore vjen ndërsa vijat e frontit kanë ndryshuar relativisht pak dhe Zelensky po zhvillon një seri takimesh diplomatike në Shtetet e Bashkuara.

I began my visit to New York by a meeting with U.S. senators. I thanked them for their strong bipartisan support for Ukraine and for passing The Lindsey Graham’s sanctions bill. This is absolutely the right step, and once it is fully implemented, peace and guaranteed security will certainly be closer.We agreed that our teams will work closely on sanctions. I briefed the senators on the de-escalation proposals we will discuss with the President of the United States. We also raised our need for ballistic missile interceptors and the challenges we face ahead of the coming winter. There are things we can do together with America to protect lives. American made Patriot Systems cannot be replaced at this point, and the more anti-ballistic protection Ukraine has, the less emboldened Russia will be to continue its strikes and prolong the war. Thank you!
— Volodymyr Zelenskyy / Володимир Зеленський (@ZelenskyyUa) September 22, 2026
Në fillim të vizitës së tij në Nju Jork, presidenti ukrainas u takua me senatorë amerikanë, të cilëve u shprehu mirënjohjen për mbështetjen dypartiake ndaj Ukrainës dhe për miratimin e legjislacionit të ri për sanksionet ndaj Rusisë, të cilin Trump e ka nënshkruar në ligj.

Zelensky tha se masat e reja të sanksioneve mund të ndihmojnë në rritjen e presionit ndaj Moskës dhe bëri të ditur se u prezantoi senatorëve propozimet e tij për masa de-përshkallëzimi, të cilat synon t’i diskutojë me Trumpin.

Një prej kërkesave kryesore të Kievit mbetet forcimi i mbrojtjes ajrore, përfshirë furnizimin me më shumë sisteme amerikane Patriot, të cilat Ukraina i konsideron të nevojshme për përballimin e raketave balistike dhe sulmeve të vazhdueshme ajrore.

Zelensky pritet të kërkojë gjithashtu mbështetje për një “armëpushim energjetik”, me synimin që Rusia dhe Ukraina të ndalojnë sulmet ndaj infrastrukturës energjetike. Presidenti ukrainas ka thënë se një hap i tillë mund të shërbejë si pikënisje për masa më të gjera de-përshkallëzimi.

Në të njëjtën linjë, presidenti francez Emmanuel Macron tha se kishte diskutuar me Trumpin mundësinë e një armëpushimi për objektet energjetike dhe një moratoriumi për sulmet në Detin e Zi. Franca gjithashtu ka njoftuar se do t’i sigurojë Ukrainës radarë shtesë për mbrojtjen e rrjetit energjetik.

Zelensky synon që në takimin me Trumpin të diskutojë jo vetëm mbrojtjen ajrore dhe energjinë, por edhe sigurinë e eksporteve ukrainase të grurit dhe produkteve të tjera bujqësore përmes Detit të Zi, një rrugë jetike për ekonominë ukrainase dhe furnizimet ndërkombëtare.

Takimi Zelensky-Trump në Nju Jork zhvillohet në një moment kur sulmet ndaj infrastrukturës energjetike dhe objekteve të naftës kanë shtuar presionin mbi tregjet ndërkombëtare të karburanteve.

Reuters ka raportuar se sulmet ndaj kapaciteteve të rafinimit në Rusi, të kombinuara me ndërprerjet e furnizimeve të shkaktuara nga lufta në Lindjen e Mesme, kanë kontribuar në rritjen e çmimeve të naftës së përpunuar dhe veçanërisht të naftës dizel.

Ndërsa presidenti rus Vladimir Putin nuk pritet të marrë pjesë në Asamblenë e Përgjithshme të OKB-së, Zelensky po përdor takimet në Nju Jork për të kërkuar mbështetje ndërkombëtare për përfundimin e luftës dhe për masat e mundshme të de-përshkallëzimit.

Të shtëna me armë zjarri kanë tronditur një shkollë të mesme në provincën Manisa të Turqisë, ku një nxënës hapi zjarr para godinës së shkollës duke plagosur të njëmbëdhjetë persona, mes tyre edhe nxënës të tjerë.

Dy nga të plagosurit raportohet se ndodhen në gjendje kritike, ndërsa pamjet e publikuara në internet tregojnë një të ri duke lëvizur në një rrugë pranë shkollës me një pushkë në duar.

Në pamje, i riu fillimisht largohet nga zona e shkollës, duke kthyer kokën disa herë pas vetes. Më pas ai kthehet dhe vrapon drejt ndërtesës. Pak më vonë, në zonë shihen ambulanca dhe ekipe të emergjencës.

I dyshuari është kapur nga forcat e sigurisë, konfirmoi zyra e guvernatorit të Manisës, transmeton Telegrafi.

Sipas autoriteteve, alarmi për të shtënat pranë shkollës së mesme profesionale dhe teknike İnci Üzmez në distriktin Turgutlu u dha në orën 07:59 të mëngjesit.

Pas raportimit, në vendngjarje u dërguan një numër i madh forcash policore dhe ekipesh mjekësore. Autoritetet thanë se, sipas të dhënave fillestare, tetë persona u prekën nga incidenti dhe të plagosurit u transportuan në spitalet më të afërta.

I dyshuari, i cili besohet se ka përdorur armën, u arrestua dhe u mor në paraburgim. Ndërkohë, autoritetet kanë nisur një hetim gjyqësor dhe administrativ për të zbardhur rrethanat dhe motivin e sulmit, i cili ende nuk dihet.

Ngjarja vjen vetëm disa muaj pas dy sulmeve vdekjeprurëse në shkolla në Turqi, të cilat shkaktuan tronditje të madhe në vend dhe çuan në masa të reja sigurie për vitin shkollor 2026-2027, përfshirë kontrolle më të rrepta për armët. /Telegrafi/

 

11 people injured in shooting near a school in Turkey

In the city of Manisa, a 15-year-old student opened fire on his classmates with a hunting rifle.

After the shooting, the teenager fled on foot but was soon detained. His parents and grandfather, who owned the weapon, were also detained.

— NEXTA (@nexta_tv) September 22, 2026

Presidenti Donald Trump do të takohet me udhëheqësit e Groenlandës dhe Danimarkës të martën për të nënshkruar një marrëveshje që do të lejojë një prani më të madhe ushtarake amerikane në Groenlandë dhe mund t’i japë fund një mosmarrëveshjeje mbi ishullin me vendndodhje strategjike dhe të pasur me minerale.

Marrëveshja do t’i lejojë SHBA-së të zgjerojë gjurmën e saj ushtarake në Grenlandë, thanë për Reuters tre persona të njohur me çështjen, shkruan Reuters.

Përveç Bazës Hapësinore ekzistuese Pituffik, marrëveshja pritet të hapë dy vende të reja ushtarake: Narsarsuaq, një ish-bazë ajrore e Luftës së Ftohtë, popullsia e së cilës është zvogëluar në vetëm disa dhjetëra, dhe Mestersvig, që aktualisht përdoret nga Sirius Dog Sled Patrol, një njësi elitare e forcave speciale daneze, transmeton Sinjali.

Groenlanda, një ish-koloni dhe tani një territor gjysmë-autonom i Mbretërisë së Danimarkës , ndodhet midis Arktikut dhe Amerikës së Veriut dhe mban burime të mëdha energjie.

Refuzimi i Trump për të përjashtuar forcën ushtarake ose ekonomike për ta përvetësuar atë shkaktoi një krizë diplomatike në janar brenda NATO-s dhe e detyroi Danimarkën dhe qeverinë e ishullit të hynin në negociata intensive.

Trump do të takohet me kryeministren daneze Mette Frederiksen dhe kryeministrin e Groenlandës Jens-Frederik Nielsen në orën 10:30 të mëngjesit ET (14:30 GMT) në Asamblenë e Përgjithshme të OKB-së në Nju Jork për ceremoninë trepalëshe të nënshkrimit.
Ministri i Jashtëm danez, Lars Lokke Rasmussen, ka thënë se marrëveshja do ta vendosë sigurinë e Arktikut nën mbikëqyrjen kolektive të NATO-s, në vend që ta lërë atë vetëm në dorë të Uashingtonit dhe Kopenhagenit.

Trump tha të premten se marrëveshja i jep SHBA-së “kontroll të përhershëm mbi sigurinë dhe të gjitha nevojat e tjera në Groenlandë”. Danimarka nuk i është përgjigjur pohimit të Trump, por ka thënë se marrëveshja respekton sovranitetin e mbretërisë dhe të drejtën e Groenlandës për vetëvendosje.

“Arsyeja pse mund ta përfundojmë këtë marrëveshje, e cila është e dobishme nga perspektiva e Groenlandës, Amerikës dhe Evropës, si dhe në emër të Mbretërisë së Danimarkës, është se është çështje politike sigurie”, tha Frederiksen të hënën në Nju Jork.
Teksti mbetet i pabotuar përpara nënshkrimit të së martës. Mbetet e paqartë nëse marrëveshja ndryshon një traktat mbrojtës të vitit 1951 që ka qenë baza ligjore për praninë amerikane, apo funksionon si një kornizë e re.

Marrëveshja shënon një ndryshim nga ambiciet e mëparshme të Trump për një blerje të plotë të Grenlandës, një ishull tre herë më i madh se Teksasi me një popullsi prej vetëm 57,000 banorësh të shpërndarë përgjatë vijës së saj të thyer bregdetare.

Por kjo përfaqëson një zgjerim të konsiderueshëm të infrastrukturës ushtarake amerikane në ishull – rritja e parë e madhe që nga Lufta e Ftohtë, kur SHBA-të mirëmbanin 17 instalime dhe më shumë se 10,000 personel atje.

Presidenti turk Rexhep Tajip Erdogan bëri thirrje për reformim gjithëpërfshirës të Këshillit të Sigurimit të OKB-së, duke përfshirë heqjen e të drejtës së vetos që mbajnë anëtarët e tij të përhershëm, duke argumentuar se sistemi ndërkombëtar duhet të pasqyrojë më mirë realitetet globale të sotme.

Në një artikull për Bloomberg të titulluar “OKB duhet të heqë veton e Këshillit të Sigurimit”, Erdogan tha se krizat e fundit, duke përfshirë pandemitë, goditjet energjetike, ndërprerjet në zinxhirët e furnizimit dhe konfliktet rajonale, kishin demonstruar kufijtë e lënies së zgjidhjeve për sfidat globale në dorë të vendimeve të një grushti vendesh.

Duke theksuar se mekanizmat globalë të vendimmarrjes duhet të përshtaten me kushtet e sotme, ai tha se Këshilli i Sigurimit i OKB-së vazhdon të pasqyrojë strukturën e krijuar pas Luftës së Dytë Botërore.

Erdogan tha se një sistem përfaqësimi “më efektiv, i drejtë dhe i përgjegjshëm” ishte i nevojshëm dhe bëri thirrje për pjesëmarrje më të gjerë në vendimmarrjen globale, përcjell Telegrafi.

Ai theksoi se thirrja e Turqisë se “bota është më e madhe se pesë” duhet të kuptohet si një apel për një shpërndarje më të gjerë të përgjegjësisë në sistemin ndërkombëtar.

Erdogan ka kohë që ka shtyrë përpara reformat në OKB, shpesh duke përdorur sloganin: “Bota është më e madhe se pesë”, që i referohet anëtarësisë jo-përfaqësuese të Këshillit të Sigurimit.

Për vite me radhë, Këshilli është përballur me pretendime se pesë anëtarët e tij me të drejtë vetoje, SHBA-të, Mbretëria e Bashkuar, Franca, Rusia dhe Kina, kanë ndikim joproporcional.

“Është thelbësore që nevoja për reformë të shndërrohet në një plan veprimi konkret”, ka thënë Erdogan. “Në qendër të këtij plani veprimi duhet të jetë heqja e privilegjit të vetos”.

Ai argumentoi se thjesht shtimi i anëtarëve të rinj të përhershëm në Këshillin e Sigurimit nuk do ta zgjidhte përqendrimin e fuqisë vendimmarrëse në duart e një numri të vogël vendesh.

Reforma duhet të bazohet në parimin se asnjë vend nuk duhet të ketë aftësinë e përhershme për të bllokuar vullnetin e shumicës së bashkësisë ndërkombëtare, tha ai.

Presidenti turk gjithashtu bëri thirrje për një ekuilibër të ri midis Këshillit të Sigurimit të OKB-së dhe Asamblesë së Përgjithshme.

Ai propozoi forcimin e kompetencave të Asamblesë së Përgjithshme dhe krijimin e një Këshilli të Sigurimit pa anëtarë të përhershëm, me anëtarë të këshillit të zgjedhur nga Asambleja e Përgjithshme për mandate të caktuara.

Sipas qasjes së përshkruar nga Erdogan, vendet që kërkojnë një mandat tjetër do të duhet të rifitojnë besimin e shumicës së anëtarëve të Asamblesë së Përgjithshme përmes zgjedhjeve.

“Përfaqësimi dhe llogaridhënia e Këshillit të Sigurimit para Asamblesë së Përgjithshme duhet të forcohen”, ka thënë më tej ai.

Ai argumentoi se rendi ndërkombëtar i së ardhmes nuk mund të ndërtohet duke ruajtur hierarkitë e së kaluarës.

“Zhvillimet gjatë çerek-shekullit të fundit – një periudhë relativisht e shkurtër në historinë njerëzore – kanë treguar se asnjë ekuilibër fuqie dhe asnjë rend ndërkombëtar nuk është i përhershëm”, ka vënë në pah Erdogan.

Erdogani tha se janë shfaqur qendra të reja fuqie në fusha që variojnë nga ekonomia dhe siguria te teknologjia dhe diplomacia, ndërkohë që institucionet ndërkombëtare nuk kanë arritur të përshtaten me këto ndryshime me të njëjtin ritëm.

Presidenti turk vuri në dukje rëndësinë në rritje të korridoreve të sigurta dhe të qëndrueshme të tregtisë, logjistikës, transportit dhe energjisë, shkruan Abcnews.al.

Erdogani tha se pesha ekonomike e Azisë po rritet, ndërsa vendet afrikane po kërkojnë një përfaqësim më të fortë, në përputhje me potencialin e kontinentit.