Category: Lajme

Grupi joformal i studentëve “Ku të nesërmen” ka vazhduar për ditën e pestë radhazi bllokadat në Podgoricë, për shkak të kërkesave të pa përmbushura në lidhje me tragjedinë në Cetinje ku humbën jetën 13 persona.

Studentëve iu bashkuan qytetarët nga të gjitha qytetet e Malit të Zi në një bllokadë të përbashkët nga ora 11:00 deri në 17:26.

Milo Peroviq nga grupi “Ku nesër?” tha se ata e kanë raportuar protestën në polici dhe bulevardi “Stanko Dragojeviq” është mbyllur për qarkullim.

Studentët kërkuan sërish dorëheqjen e ministrit të Punëve të Brendshme Danilo Sharanoviq dhe zëvendëskryeministrit Aleksa Beçiq.

Marko Vukçeviq nga grupi “Ku nesër?” tha se edhe një herë është treguar se një numër i madh njerëzish qëndrojnë pas kërkesave dhe se duan të jetojnë në një vend më të sigurt.

“Kanë qenë nja 200 vetë vazhdimisht, duhet të kenë kaluar një mijë persona, nëse jo më shumë, gjatë ditës këtu. Jemi të sigurt që na ka dëgjuar qeveria, shpresojmë se do të dëgjojnë dhe kërkesat do të plotësohen së shpejti”, tha ai për Vijesti.

Ai bëri të ditur se javën e ardhshme do të organizohet një protestë e madhe dhe se protestat do të vazhdojnë deri në plotësimin e kërkesave.

Aco Martinoviq, autor i vrasjeve më 1 janar 2025, kishte lënë të vdekur 13 persona dhe më pas kreu vetëvrasje. Në xhepin e tij më pas janë gjetur edhe 80 plumba.

Policia kishte bërë të ditur se të gjitha vrasjet në tragjedinë e Cetinjes u kryen për 30 minuta, pasi Aco Martinoviq kishte filluar të qëllojë në lokal. Mes të vrarëve ishin tre gra dhe dy djem, dy vëllezër të moshës 8 dhe 13-vjeç.

Aco Martinoviq pas largimit nga vendi ngjarjes ka vrarë veten pranë shtëpisë së tij familjare në Cetinje dhe ka ndërruar jetë rrugës për në spitalin e Cetinjës.

Mali i Zi pati shpallur tri ditë zie në nderim të viktimave të një prej krimeve më të rënda të regjistruara në vend.

“Jam i tronditur dhe i tronditur nga kjo tragjedi që ka mbuluar me të zeza Cetinjen tonë dhe u shpreh ngushëllimet e mia të sinqerta familjeve dhe miqve të viktimave”, pati shkruar presidenti i Malit të Zi Jakov Milatoviq në rrjetin social X.

Shumica e viktimave ishin anëtarë të familjes së Martinoviq, kumbarë ose miq të tij. Martinoviq kishte qenë i dënuar me kusht në vitin 2005 për sjellje të dhunshme.

Mediat e Malit të Zi pas vrasjes raportuan se në Cetinje kishte prani të një numri të vogël të policisë në rrugë, gjë e cila shkaktoi revoltë në mesin e qytetarëve, pas të cilës nisën kërkesat për dorëheqjen e Sharanoviq dhe Aleksa Beçiq, duke pasuar me bllokada të studentëve në rrugë.

Sot është Dita Botërore e Radios, e cila mbetet një medium jetik për përhapjen e ndërgjegjësimit, edukimin e audiencës dhe inkurajimin e veprimit kolektiv.

Qytetarët e intervistuar nga KosovaPress thonë se përkundër faktit që ajo nuk dëgjohet sikur në të kaluarën, radio mbetet një pjesë e përditshmërisë, duke e konsideruar një burim të rëndësishëm të informacionit.

Blerta, qytetare, thotë se dëgjon shumë shpesh radio gjatë vozitjes në automjet.

“Thuajse shumë shpesh, sepse voziti edhe gjatë shkuarjes për në punë me veturë, atëherë dëgjoj edhe radio… Ndoshta edhe jo, sepse janë edhe këto rrjetet tjera të komunikimit, si rrjetet sociale, që i shfrytëzojnë rinia, edhe të tjerët besa jo vetëm rinia. Ndoshta edhe dëgjohet mirëpo duke u nisur nga vetja jo shumë. Gjithsesi nëse je në trafik e dëgjon”, tha ajo.

Edhe Edor Dyla thotë se ndjek rregullisht emisionet e ndryshme në radio kur është duke vozitur.

“Ndonjëherë, kur jam në makinë. Përveç makinës nuk dëgjojë, vetëm në makina”, tha ai.

Ndërsa Shefki Buzhala thekson se nuk ka shumë kohë për të dëgjuar radio, dhe se zakonisht e përcjell televizionin.

“Shumë rrallë, se nuk kemi kohë edhe aq shumë. Kush ka kohë e dëgjon, kush nuk e dëgjon… Kur kemi kohë dëgjojmë, kohë nuk kemi, shumicën e kohës vetëm televizion, radio shumë rrallë”, potencoi ai.

Ndërsa qytetari tjetër Nasuf Mjekiqi mendon se radio nuk dëgjohet sikur më parë.

“Radio dëgjojmë më së shumti në veturë . Si ta ndezi veturën, më ndizet edhe radio. Jo nuk dëgjohet si më përpara, atëherë nuk kemi pasur televizion kështu që kemi qenë më të koncentruar në radio dhe e kemi dëgjuar. Nuk informohem shumë nga radioja, aty më shumë bëjnë pyetje si gjithmonë”, tha ai.

Ndërsa Bajram Ismaili thotë se ndjek vazhdimisht radion në kohën e lirë.

“Dëgjoj shpesh. Zakonisht kur jam në shtëpi, qetë dhe kur kam kohë jam i lirë e dëgjoj Kosovën e Lirë. Zakonisht informohem më së shumti prej radios. Sot radio nuk dëgjohet më pak si në kohët e kaluara”, potencoi Ismaili.

E shpallur në vitin 2011 nga Shtetet Anëtare të UNESCO-s dhe e miratuar nga Asambleja e Përgjithshme e Kombeve të Bashkuara në 2012 si Dita Ndërkombëtare e Kombeve të Bashkuara, 13 shkurti u bë Dita Botërore e Radios (WRD).

Tema e Ditës Botërore të Radios 2025 është Radio dhe Ndryshimet Klimatike: Një mjet i fuqishëm për veprimin klimatik.

Ndërsa Marrëveshja e Parisit merr një rëndësi të madhe, radio kontribuon në arritjen e objektivave të saj ndërkombëtare duke mbështetur popullsinë përballë ndryshimeve klimatike përmes shpërndarjes së informacionit të bazuar në fakte, zërave të dëgjuesve, emisioneve të dedikuara radiofonike.

Në vitin 2025, roli i radios në trajtimin e ndryshimeve klimatike është më i rëndësishëm se kurrë, duke ofruar një platformë për biseda që promovojnë qëndrueshmërinë mjedisore dhe frymëzojnë veprime.

Qoftë nëpërmjet stacioneve radiofonike të komunitetit që transmetojnë lajme lokale për klimën, rrjeteve kombëtare që rrisin ndërgjegjësimin për sfidat globale mjedisore, ose stacioneve globale që promovojnë marrëveshje ndërkombëtare për klimën, radio ndihmon në përforcimin e zërave dhe bashkimin e njerëzve rreth një angazhimi të përbashkët për të mbrojtur planetin tonë.

Departamenti amerikan i Thesarit vendosi sanksione të enjten ndaj prokurorit të Gjykatës Penale Ndërkombëtare (ICC) Karim Khan.

Presidenti Donald Trump nënshkroi një urdhër ekzekutiv më 7 shkurt që sanksionon ICC-në për lëshimin e një urdhër-arresti për kryeministrin izraelit Benjamin Netanyahu për krime lufte në Rripin e Gazës, transmeton AA.

Trump akuzoi gjykatën për përfshirje në “veprime të paligjshme dhe të pabaza që synojnë SHBA-në dhe aleatin e saj të ngushtë Izraelin”.

Organizata e Veteranëve të Luftës së UÇK-së nuk do të merr pjesë në asnjë aktivitet të organizuar nga qeveria aktuale me rastin e 17-vjetorit të shpalljes së se pavarësisë së Kosovës. Kështu ka bërë të ditur për KosovaPress, Xhavit Jashari, përfaqësues i Shoqatës së Familjeve të Dëshmorëve të UÇK-së. Megjithatë, ai thotë se do të zhvillojnë aktivitete tjera në shënim të kësaj feste, por jo në bashkëpunim me qeverinë aktuale.

Ai derisa arsyeton këtë vendim, thotë se vendi ka të bëjë me një qeveri dhe kryeministër “kundër vlerave të luftës së Ushtrisë Çlirimtare të Kosovës”.

“Kemi një qeveri dhe kryeministër anti UÇK dhe UÇK me një anti UÇK, kështu nuk munden bashkë me nderua dhe respektua luftën e UÇK-së dhe vlerat kombëtare…Shoqata e Familjeve të Dëshmorëve ka rreth dy apo tre vite që nuk i bënë aktivitetet bashkë me Qeverinë e Kosovës për shënimin e pavarësisë. Sepse kur goditet dhe bëhen përpjekje nga nja Gjykatë e njëanshme speciale në bashkëpunim me Prokurorinë e Serbisë, kemi një kryeministër që godet vlerat e luftës të UÇK-së. Kemi një ministre që udhëheq një dikaster aq të rëndësishëm, Donika Gërvalla (Schwarz), e cila njollos dhe është e faktuar ajo që ka deponuar dëshmi të rrejshme kundër luftës së UÇK-së. Pastaj, kemi udhëheqësen e Grupit Parlamentar, Mimoza Kusari-Lila, e cila bashkëpunon me kriminelet serbë me godit veteranin, e godet luftën e UÇK-së dhe është e natyrshme që nuk mundemi me këta t’i festojmë festat”, thotë Jashari.

Ai rithekson se në bashkëpunim me qeverinë aktuale nuk do të bashkëpunojnë për festen e 17 shkurtit. Derisa thotë se kanë aktivitetet e tyre.

“Dëshmoret dhe familjet e dëshmorëve, invalidë dhe familjet e tyre, veteranet, është rruga e ndritur që ka sjellë vendin tek liria dhe këto institucione janë krijuar pas kësaj lufte të përgjakshme e të lavdishme, dhe këto institucione duhet t’i respektojnë këto vlera…Ne bëjmë aktivitetet që organizatat e dala nga lufta, shënojnë festat…po në bashkëpunim me këtë qeveri në asnjë rrethanë dhe formë nuk do t’i shënojmë bashkërisht këto festa”, nënvizon Jashari.

Kryesia e Veteranëve të Luftës së OVL UÇK-së ka vendosur sot të mos ketë asnjë lloj bashkëpunimi me institucionet në detyrë të Qeverisë së Kosovës për kremtimin e 17-vjetorit të shpalljes së pavarësisë së Kosovës dhe manifestimin e 27-vjetorit të Epopesë së UÇK-së të familjes Jashari më 5, 6 dhe 7 mars.

Në një deklaratë për media pas mbledhjes së sotme të Kryesisë së OVL të UÇK-së thuhet se deri te ky vendim ka ardhur për shkak se Qeveria aktuale e Kosovës nuk ka treguar asnjëherë gatishmëri për bashkëpunim me OVL UÇK, duke i përjashtuar nga çfarëdo forme e financimit dhe mbështetjes ligjore dhe institucionale, por vetëm duke ofenduar, përjashtuar, linçuar dhe persekutuar nga çdo e drejtë ligjore.

Pas negociatave të dështuara mes Partisë së Lirisë Austriake (FPÖ) të ekstremit të djathtë dhe Partisë Popullore Austriake (ÖVP) konservatore, presidenti austriak Alexander van der Bellen diskutoi sot me përfaqësuesit e partive parlamentare për mundësinë e formimit të qeverisë.

Sipas raportimeve të mediave austriake, Van der Bellen zhvilloi takime gjatë ditës me kryetarët e Partisë Social Demokrate të Austrisë (SPÖ), partisë liberale Neos dhe ÖVP. Kryetari i FPÖ, i cili fitoi më shumë vota në zgjedhjet e fundit, Herbert Kickl, nuk u ftua në bisedime.

Negociatat mes të djathtës ekstreme dhe ÖVP-së dështuan dje pasi nuk u arrit marrëveshje për shpërndarjen e ministrive.

Para kolapsit të këtyre negociatave, pati edhe një përpjekje të pasuksesshme për të formuar një qeveri mes ÖVP, SPÖ dhe partisë Neos. Këto palë, megjithatë, kanë sinjalizuar tani një gatishmëri për të rifilluar negociatat.

Van der Bellen tha se pas bisedimeve me përfaqësuesit e partive, ai dëshiron të gjejë një zgjidhje për ngërçin politik në Austri. Ai nuk përjashtoi mundësinë e shpalljes së zgjedhjeve të reja dhe as formimin e një qeverie të pakicës.

Duke iu referuar qarqeve rreth presidentit, mediat austriake përmendin si mundësi edhe një qeveri ekspertësh.

FPÖ mirëpret zgjedhjet e reja pasi shpreson për sukses edhe më të mirë se në zgjedhjet në fund të shtatorit, kur Demokratët e Lirë fituan 29 për qind të votave. ÖVP fitoi 26 për qind dhe SPÖ fitoi 21 për qind.

Austria po përballet aktualisht me një rënie ekonomike dhe një shkallë në rritje të papunësisë.

Sot rreth orës 16:00 është raportuar për një grabitje në një institucion mikrofinanciar në rrugën “Robert Doll” në Prishtinë.

Flora Ahmeti, zëdhënëse e policisë rajonale për Prishtinë, ka bërë të ditur për KosovaPress, se bazuar në informacionet e para, dyshohet se një person nën kërcënim të armës ka grabitur një shumë parash.

“Aktualisht policia po kryen veprimet e nevojshme policore me qëllim zbardhjen e rrethanave të rastit si dhe identifikimin dhe arrestimin e personit të dyshuar”, ka thënë Ahmeti.

Qytetarët bullgarë sot po bojkotojnë dyqanet e shitjes me pakicë për shkak të çmimeve të larta.

Pas nismës që filloi në Kroaci dhe u përhap shpejt në shumë vende të Ballkanit, në Bullgari sot është vërejtur numër i reduktuar i konsumatorëve për shkak të bojkotit, transmeton AA.

Bojkoti është inicuar nga organizata joqeveritare, ndërsa, siç raportojnë mediat e vendit, organizatorët po i bëjnë thirrje qeverisë bullgare të vendosë tavan çmimesh për 70 produkte ushqimore bazë, transmeton AA.

Thirrje për bojkot ndaj dyqaneve dhe supermarketeve deri më tani ka pasur në disa vende të Ballkanit, duke përfshirë Koracinë, Bosnjë dhe Hercegovinën, Maqedoninë e Veriut, Shqipërinë, Kosovën dhe Serbinë.

Në Kosovë, të hënën më 10 shkurt, disa qytetarë iu bashkuan iniciativës për bojkotimin e supermarketeve si rrjedhojë e rritjes së vazhdueshme të çmimeve.

Këshilltari kryesor i presidentit ukrainas Volodymyr Zelensky, Mihajlo Podoljak, ka reaguar pas liderët evropianë paralajmëruan Uashingtonin kundër një marrëveshjeje paqeje për Ukrainën me Rusinë pa dëshirën e Kievit.

Podoljak ka shkruar në rrjetin X se suksesi i vërtetë do të vijë duke i dhënë fund luftës jo sipas kushteve të Rusisë, por me kushte të drejta të vendosura nga Ukraina, SHBA dhe Evropa.

“Rri i qetë. Emocionet e nxituara janë padyshim të panevojshme sot. Suksesi i vërtetë i politikës së jashtme amerikane, dhe natyrisht presidenti Trump personalisht, si dhe çdo aktor tjetër politik global, nuk do të përcaktohet vetëm nga dëshira për t’i dhënë fund luftës shpejt. Lufta mund të kishte përfunduar dje sipas ultimatumeve ruse – por kjo do të ishte krejtësisht e kotë. Këto kushte duhet të jenë racionale, të arsyeshme në këtë fazë të luftës, të bazuara strategjikisht dhe të justifikuara ekonomikisht. Ne nuk duhet të harrojmë pasojat globale reputacionale dhe politike”, tha Podoljak.

Donald Trump tha dje se ka arritur marrëveshje me presidentin rus Vladimir Putin për t’i dhënë fund luftës në Ukrainë.

Lëvizja e Trump ka alarmuar kryeqytetet evropiane që duan të luajnë një rol qendror në bisedimet e paqes, sepse çdo marrëveshje për Ukrainën do të kishte pasoja për sigurinë e tyre.

“Është e qartë se çdo marrëveshje pas shpinës sonë nuk do të funksionojë. Çdo marrëveshje do të duhet gjithashtu që Ukraina dhe Evropa të jenë pjesë e saj,” tha shefja e politikës së jashtme evropiane Kaja Kallas.

“Pse po u japim atyre (Rusisë) gjithçka që ata duan para se të fillojnë negociatat, tha Kallas në një takim të ministrave të mbrojtjes të NATO-s me homologun e tyre ukrainas në Bruksel, duke shtuar se “Ky është qetësim – nuk funksionoi kurrë.”

Sekretari amerikan i Mbrojtjes Pete Hegseth tha të mërkurën se ishte joreale që Ukraina të kthehej në kufijtë e saj të para vitit 2014 dhe se anëtarësimi i Ukrainës në NATO nuk do të ishte pjesë e një marrëveshjeje paqeje.

Në vitin 2014, Rusia pushtoi dhe aneksoi gadishullin ukrainas të Krimesë.

Në një deklaratë të lëshuar të mërkurën vonë pas bisedimeve në Paris, ministrat e jashtëm të fuqive evropiane, përfshirë Britaninë, Francën dhe Gjermaninë, thanë se Evropa duhet të jetë pjesë e çdo negociate të ardhshme për Ukrainën.

Por jo të gjithë liderët evropianë u alarmuan nga masa e Trump. Kryeministri hungarez Viktor Orban, një aleat i Trump, vlerësoi presidentin amerikan dhe kritikoi deklaratat e ministrave. “Nuk mund të kërkosh një vend në tryezën e bisedimeve. Duhet ta fitosh atë!”