Category: Lajme

Rusia dhe Ukraina kanë kryer sulme ajrore gjatë natës, vetëm disa orë pasi Kievi u pajtua për një armëpushim 30-ditor pas negociatave me zyrtarët amerikanë në Arabinë Saudite.

Dy sulme me raketa të kryera nga Rusia goditën qytetin Krivij Rih të Ukrainës, tha guvernatori rajonal, Serhiy Lysak më 12 mars. Ai tha se nga këto sulme u vra një person, ndërkaq në një sulm të ndarë ndaj një anijeje mallrash pranë qytetit të Odesës u vranë katër anëtarë të bordit të anijes, shkruan Radio Evropa e Lirë.

Më pas, kryeqyteti ukrainas, Kiev, u godit nga një sulm tjetër i madh. Sulmi ndodhi vetëm disa orë pas negociatave në Xhedah të Arabisë Saudite mes delegacionit ukrainas dhe atij amerikan lidhur me përfundimin e luftës që Rusia nisi kundër Ukrainës më 2022.

Kryetari i Kievit, Vitali Klitschko, tha se mbrojtja ajrore u aktivizua dhe zmbrapsi sulmet.

Sulme janë raportuar edhe në Harkiv dhe Ministria për Transformim Digjital e Ukrainës tha se alarmet për sulme ajrore janë aktivizuar në dhjetë rajone që gjenden përreth Kievit.

Ministria ruse e Mbrojtjes tha se sistemet e saj kundërajrore kanë rrëzuar gjashtë dronë gjatë natës, një mbi Krimenë e aneksuar nga Moska dhe pesë mbi Detin e Zi. Kanali në Telegram, The Krymsky Veter, raportoi për shpërthime të fuqishme dhe lëshim të alarmeve paralajmëruese për sulme në qytetet në Gadishullin ukrainas të Krimesë dhe pranë objekteve të ushtrisë ruse.

Rusia, ndërkaq, tha se ka bërë përparime të tjera në rajonin perëndimor të Kurskut, teksa Moska po tenton të dëbojë forcat ruse që kanë pushtuar disa pjesë të territorit rus që nga gushti i vitit të kaluar.

Sulmet u kryen pasi Ukraina shprehu gatishmëri për të pranuar propozimin amerikan për zbatimin e një marrëveshje të përkohshme armëpushimi, me kohëzgjatje për 30 ditë, teksa SHBA-ja ka thënë se tani është në dorën e Moskës që të pajtohet në mënyrë që të hyjë në fuqi armëpushimi./REL

Ministri i Administrimit të Pushtetit Lokal, Elbert Krasniqi, ka thënë se do të hyjë në koalicion vetëm me Kurtin kryeministër.

Ai tha se s’mund të flasë në emër të minoriteteve tjera jo serbe se me kë do ta bëjnë koalicionin.

“Po, në bashkëpunim me kryeministrin Kurti do të jem pjesë e koalicionit të ardhshëm qeveritar dhe tashmë është shumë mirë i definuar ky partneritet i joni që fillon nga viti 2019 kur kam qenë pjesë e grupit parlamentar të VV-së, kështu që gjithçka është parimore dhe është e bazuar në këtë mirëbesimin e krijuar në këto katër vite si ministër, kështu që s’ka asnjë dyshim që do të jem pjesë e koalicionit të ardhshëm qeveritar dhe do të jem vetëm pjesë e një koalicioni ku kryeministër është Kurti”, tha Krasniqi.

“Por nga diskutimet që kam edhe me kolegë tjerë që janë në qeveri, partnerë kësaj qeverie, vullneti i gjithë tyre është që të jenë pjesë e Qeverisë Kurti 3 e cila do të jetë në ardhje shumë shpejt”, shtoi ai.

Presidenti i Shteteve të Bashkuara, Donald Trump, zyrtarisht ka rritur tarifat ndaj të gjitha importeve të çelikut dhe aluminit në 25 për qind më 12 mars, duke premtuar se tarifa do të ndihmojë krijimin e vendeve të punës në fabrikat në SHBA, në një kohë kur kërcënimet e tij me tarifa kanë tronditur tregun global, shkruan Radio Evropa e Lirë.

Bashkimi Evropian tha se do të përgjigjet ndaj hyrjes në fuqi të tarifave amerikane me kundërmasa.

Trump hoqi të gjitha përjashtimet e bëra nga tarifat e vendosura nga ai më 2018 ndaj metaleve, duke rritur po ashtu tarifat për aluminin nga 10 në 25 për qind.

Ndaras, Trump ka vendosur tarifa të veçanta ndaj Kanadasë, Meksikës dhe Kinës dhe po ashtu ka thënë se ka në plan që të vendosë tarifa ndaj importeve nga Bashkimi Evropian, Brazili dhe Koreja e Jugut me qëllim që të vendosë taksa “reciproke” që do të hyjnë në fuqi më 2 prill.

Trump u tha udhëheqësve të biznesit gjatë një tryeze diskutimi të martën se tarifat po bëjnë që kompanitë të investojnë në fabrikat amerikane.

Po të martën, Trump kërcënoi se do të vendosë tarifa prej 50 për qind ndaj çelikut dhe aluminit nga Kanadaja, por vendosi që kjo masë të jetë në 25 për qind pasi provinca e Ontarios hoqi dorë nga planet për të vendosur një tarifë shtesë ndaj energjisë elektrike që shet në Miçigan, Minesota dhe Nju Jork.

BE-ja, ndërkaq, më 12 mars njoftoi për kundërmasa që tha se do të hyjnë në fuqi më 1 prill, pas njoftimit të Trumpit për tarifa prej 25 për qind ndaj të gjitha importeve të çelikut dhe aluminit.

“Teksa SHBA-ja po vendos tarifa në vlerë prej 28 miliardë dollarësh, ne po përgjigjemi me kundërmasa në vlerë prej 26 miliardë eurosh [28 miliardë dollarë]”, tha presidentja e Komisionit Evropian, Ursula von der Leyen, përmes një deklarate.

KE-ja menaxhon konfliktet tregtare dhe komerciale në emër të 27 vendeve anëtare të BE-së.

“Ne gjithmonë mbesim të hapur për negociata. Ne besojmë fuqishëm që në një botë të mbushur me pasiguri gjeopolitike dhe ekonomike, nuk është në interesin tonë të përbashkët që të rëndojmë ekonomitë tona me tarifa”, tha von der Leyen.

KE-ja tha se nga kundërmasat do të goditen produktet e çelikut dhe aluminit, por edhe të tekstilit, prodhimet e lëkurës, pajisjet shtëpiake, produktet të plastikës dhe drurit. Produktet bujqësore do të preken po ashtu, përfshirë shpendët, mishi i viçit, disa produkte deti, frutat e thata, vezët, sheqeri dhe perimet.

Më 2018, gjatë mandatit të parë presidencial, Trump kishte vendosur tarifa ndaj aluminit dhe çelikut, por ato humbën efektin për shkak të përjashtimeve të bëra.

Pasi Kanadaja dhe Meksika ishin pajtuar me kërkesën e tij për rishikimin e një marrëveshjeje tregtare të Amerikës së Veriut më 2020, këto dy shtete shmangën taksa ndaj importeve të metaleve. Partnerët e tjerë tregtarë të SHBA-së kishin kuota për import të cilat zëvendësuan tarifat. Po ashtu, gjatë mandatit të parë të Trumpit, u lejua që kompanitë amerikane të kërkonin përjashtime nga tarifat, nëse, për shembull, nuk mund të gjenin sasinë e nevojshme të çelikut te prodhuesit vendas.

Përderisa tarifat e Trumpit mund të ndihmojnë fabrikat e çelikut dhe aluminit në SHBA, ato mund të rrisin çmimet për prodhuesit që i përdorin metalet si lëndë të parë.

Trump i sheh tarifat si një mënyrë për të rritur fabrikat vendase dhe Shtëpia e Bardhë ka theksuar se Volvo, Volkswagen dhe Honda po e shqyrtojnë mundësinë e zgjerimit të pranisë së tyre në SHBA. Megjithatë, mundësia e çmimeve më të larta, shitjeve më të ulëta dhe fitimeve më të vogla mund të bëjë që disa kompani të hezitojnë që të investojnë në objekte të reja prodhimi. /REL

Qeveria në detyrë e Kosovës ka miratuar të mërkurën nismën për lidhjen e marrëveshjes kornizë për bashkëpunim në fushën e mbrojtjes me Shtetet e Bashkuara të Amerikës.

Ministri në detyrë i Mbrojtjes, Ejup Maqedonci tha se kjo marrëveshje ka për qëllim që të dyja palët të angazhohen në avancimin e bashkëpunimit në fushën e mbrojtjes.

“Ministria e Mbrojtjes mbi bazën e objektivave dhe planifikimeve strategjike në bashkëpunim me shtetet aleate, në koordinim të plotë me Shtetet e Bashkuara të Amerikës ka iniciuar lidhjen e marrëveshjes kornizë për bashkëpunim në fushën e mbrojtjes ndërmjet Republikës së Kosovës, përfaqësuar nga Ministria e Mbrojtjes dhe Shteteve të Bashkuara të Amerikës, përfaqësuar nga Departamenti i Mbrojtjes. Qëllimi i kësaj marrëveshje është që të dyja palët të angazhohemi në avancimin e bashkëpunimit në fushën e mbrojtjes, si planifikim i mbrojtjes, qëndrueshmëri strategjike dhe ngritje të kapaciteteve strategjike ushtarake. Një hap i tillë i bashkëpunimit është ndërmarrë në përputhje me qëllimet e integrimit më të gjerë euroatlantik, cenimit për sigurinë, rritjen e ndërveprueshmërisë gjithmonë duke u mbështetur në partneritetin e fortë ekzistues në fushën e mbrojtjes dhe sigurisë”, deklaroi ai.

Qeveria i dha dritën e gjelbër edhe marrëveshjes së përgjithshme të sigurisë me Slloveninë, për shkëmbimin dhe mbrojtjen e ndërsjellë të informacionit të klasifikuar.

Kryeministri në detyrë, Albin Kurti tha se kjo marrëveshje është hap i rëndësishëm.

“Arritja e marrëveshjes për sigurinë në fushën e mbrojtjes së informacionit të klasifikuar mes Kosovës dhe Sllovenisë është hap i rëndësishëm me ndikim në disa aspekte. Forcimi, bashkëpunimi dypalësh, sigurimi i informacioneve të klasifikuara, përmirësimi i kapaciteteve institucionale dhe mbështetja për integrim euroatlantik”, tha Kurti.

Në mbledhjen e sotme të qeverisë janë miratuar tri marrëveshje mes Kosovës dhe Mbretërisë së Bashkuar.

Ministrja në detyrë e Drejtësisë, Albulena Haxhiu tha se marrëveshja e parë është për transferimin e personave të dënuar.

“Qëllimi i kësaj marrëveshje është përmirësimi i mëtejshëm i bashkëpunimit të ndërsjellë në fushën e drejtësisë, vendosja e drejtësisë dhe rehabilitimi social i personave të dënuar, duke mundësuar ekzekutimin e sanksioneve penale në shtetin vendbanimit të përhershëm të personit të dënuar. Kjo marrëveshje rregullon ekzekutimin e vendimeve gjyqësore përmes transferimit të personit dënuar në rastet kur një shtetas i shtetit të administrues është duke vuajtur dënimin në shtetin dënues dhe kërkon transferimin në shtetin administrues me qëllim të rehabilitimit social”, tha ajo.

Marrëveshja e dytë e miratuar është nisma për marrëveshjen për ndihmë të ndërsjellë juridike në çështje penale mes Kosovës dhe Mbretërisë së Bashkuar. Ndërkaq, marrëveshja e tretë është për ekstradim, për çka Haxhiu tha se bazohet në zotimin e Kosovës për të zhvilluar partneritet evropian.

Në mbledhjen e sotme të kabinetit qeveritar, ndër tjera, u miratua edhe nisma për lidhjen e marrëveshjes ndërkombëtare të partneritetit për menaxhimin e grant-kontratës të asistencës teknike, në kuadër të programit për bashkëpunim ndërkufitar Kosovë-Shqipëri.

Nismë për lidhje të marrëveshjes ndërkombëtare të partneritetit për menaxhimin e grant-kontratës të asistencës teknike, kabineti qeveritar miratoi edhe me Malin e Zi. /kp

Kandidati për deputet nga Koalicioni për Familje, Visar Korenica, në emisionin COMPASS në ATV, tha se ende nuk ka një vendim të prerë nëse ky subjekt politik do të marrë pjesë në zgjedhjet lokale.

Sipas tij, vendimmarrja varet nga konsultimet dhe organizimi i projektit të tyre politik në terren.

“Nuk kanë ndonjë vendimmarrje të caktuar, sepse nuk janë kryer ende konsultimet e nevojshme për pjesëmarrje në zgjedhjet lokale. Çfarëdo vendimmarrjeje e ardhshme do të ketë një emër, një projekt dhe një orientim konservator politik që do t’i përfaqësojë kandidatët tanë potencialë”, tha Korenica.

Ai tha se nëse arrijnë të organizohen si duhet, do të angazhohen edhe në zgjedhjet lokale.

“Gjithçka varet nga sa do të mund të organizohemi me projektin e ri politik. Nëse koha dhe organizimi na premtojnë, pse jo, me shumë kënaqësi”, u shpreh Korenica.

Deklaratën e plotë të Visar Korenicës në COMPASS, e gjeni në videon më poshtë:

Organizata e Traktatit të Atlantikut Verior (NATO) ka lëshuar një deklaratë zyrtare pas përfundimit të vizitave të Sekretarit të Përgjithshëm, Mark Rutte në Sarajevë e më pas në Prishtinë.

“NATO rikonfirmon angazhimin e saj për stabilitetin e Ballkanit Perëndimor, ndërsa Sekretari i Përgjithshëm Rutte përmbyll vizitat në Sarajevë dhe Prishtinë”, thuhet në titullin e deklaratës së bërë publike sot.

NATO tregon në krye të deklaratës se “më 10 dhe 11 mars 2025, Sekretari i Përgjithshëm i NATO-s, Mark Rutte, vizitoi Sarajevën dhe Prishtinën”.

“Në Sarajevë, ai u takua me zyrtarë të lartë të Bosnjë dhe Hercegovinës, përfshirë Kryesuesin dhe anëtarët e Presidencës, Kryesuesin e Këshillit të Ministrave, Ministrin e Punëve të Jashtme, Ministrin e Mbrojtjes dhe Ministrin në detyrë të Sigurisë, si dhe me Komandantin e Shtabit të NATO-s në Sarajevë, Përfaqësuesin e Lartë për Bosnjë dhe Hercegovinën dhe Komandantin e misionit të EUFOR-it. Sekretari i Përgjithshëm gjithashtu zhvilloi një diskutim me studentë në Universitetin e Sarajevës”, thuhet në deklaratë.

Gjatë vizitës së tij, z. Rutte theksoi se “NATO mbetet e përkushtuar në mënyrë të palëkundur ndaj stabilitetit të këtij rajoni dhe ndaj sovranitetit, integritetit territorial dhe sigurisë së Bosnjë dhe Hercegovinës”, thuhet në deklaratën e Aleancës. Ai shtoi se “Marrëveshja e Paqes e Dejtonit është themeli i paqes në këtë vend dhe duhet të respektohet; ne mbështesim Zyrën e Përfaqësuesit të Lartë; çdo veprim që minon Dejtonin, rendin kushtetues ose institucionet shtetërore është i papranueshëm; retorika dhe veprimet nxitëse janë të rrezikshme; ato përbëjnë një kërcënim të drejtpërdrejtë për stabilitetin dhe sigurinë e Bosnjë dhe Hercegovinës”. Sekretari i Përgjithshëm i NATO-s gjithashtu nënvizoi nevojën që liderët politikë në Bosnjë dhe Hercegovinë “të bëjnë pjesën e tyre” dhe “të marrin përgjegjësinë” për përparimin dhe stabilitetin e vendit të tyre. Ai e bëri të qartë se “nuk është viti 1992” dhe se NATO dhe partnerët e saj ndërkombëtarë janë të pranishëm dhe të angazhuar në Bosnjë dhe Hercegovinë dhe “nuk do të lejojnë krijimin e një vakuumi sigurie”. Më në fund, ai theksoi se Aleanca mbetet e përkushtuar ndaj bashkëpunimit me Bosnjë dhe Hercegovinën. “Ne tashmë kemi një partneritet të fortë dhe jemi të gatshëm të ndërtojmë mbi mbështetjen afatgjatë të NATO-s për Forcat e Armatosura të unifikuara të BiH dhe për reformat në mbrojtje dhe siguri, përmes Shtabit tonë në Sarajevë, Qelizës sonë të re Politike dhe Paketës sonë për Ndërtimin e Kapaciteteve të Mbrojtjes”, tha ai.

“Në Prishtinë, Sekretari i Përgjithshëm udhëhoqi një vizitë të Këshillit të Atlantikut të Veriut dhe partnerëve kontribues të trupave në misionin e drejtuar nga NATO, KFOR, si dhe në Ekipin Këshillimor dhe të Ndërlidhjes të NATO-s (NALT). Së bashku me Zëvendës Sekretaren e Përgjithshme të NATO-s, znj. Radmila Shekerinska, dhe Kryetarin e Komitetit Ushtarak të NATO-s, Admiralin Giuseppe Cavo Dragone, ata u takuan me udhëheqësinë dhe personelin e KFOR-it dhe të NALT-it. Ata gjithashtu zhvilluan një shkëmbim pikëpamjesh me Shefat e Misioneve të Bashkimit Europian, Misionin e BE-së për Sundimin e Ligjit në Kosovë (EULEX), Përfaqësuesin e Posaçëm të Sekretarit të Përgjithshëm të OKB-së dhe Shefin e Misionit të UNMIK-ut, si dhe me Shefin në detyrë të Misionit të OSBE-së. Për më tepër, Sekretari i Përgjithshëm u takua me përfaqësues të institucioneve të Kosovës për diskutime dypalëshe”, thuhet në deklaratën e NATO-s.

“NATO ka mbështetur paqen dhe stabilitetin në rajonin e Ballkanit Perëndimor për tridhjetë vjet; angazhimi ynë mbetet i fortë edhe sot, i udhëhequr nga KFOR-i, i cili është misioni ynë më i gjatë dhe aktualisht më i madh. Nën udhëheqjen e shkëlqyer të Gjeneral Major Enrico Barduani, trupat tona të KFOR-it punojnë pa u lodhur për të siguruar një mjedis të sigurt dhe të qëndrueshëm për të gjithë njerëzit dhe komunitetet që jetojnë në Kosovë, në përputhje me mandatin afatgjatë të OKB-së për KFOR-in; ndërkohë, Ekipi Këshillimor dhe Ndërlidhës i NATO-s vazhdon të mbështesë organizatat e sigurisë në Kosovë, përmes ndërtimit të kapaciteteve, arsimit dhe koordinimit të trajnimeve; një rajon i sigurt i Ballkanit Perëndimor do të thotë më shumë siguri në të gjithë hapësirën Euro-Atlantike”, tha Sekretari i Përgjithshëm Rutte. “NATO do të vazhdojë të luajë rolin e saj, në bashkërendim të ngushtë me Policinë e Kosovës dhe Misionin e BE-së për Sundimin e Ligjit në Kosovë, secili në rolin e tij si garantues i sigurisë”, shtoi ai. “Zgjidhja që çon në paqe afatgjatë është politike; NATO do të vazhdojë të mbështesë plotësisht normalizimin e marrëdhënieve midis Beogradit dhe Prishtinës, të udhëhequr nga Bashkimi Europian; kjo është e vetmja mënyrë për të zgjidhur çështjet e hapura dhe për të siguruar një të ardhme të qëndrueshme, duke garantuar që të drejtat e të gjitha komuniteteve të respektohen dhe mbrohen; për të çuar përpara Dialogun, të dyja palët duhet të tregojnë fleksibilitet, të bëjnë kompromiset e nevojshme dhe të fokusohen në përfitimet afatgjata”, theksoi ai.

Komisionerja e Bashkimit Evropian për Zgjerimin, Marta Kos do të vizitojë Shqipërinë nga data 12 deri më 14 mars, duke shënuar misionin e saj të parë zyrtar në vend.

Kjo vizitë do të shërbejë si një rast për të diskutuar me autoritetet shqiptare mbi gjendjen e procesit të anëtarësimit në BE, veçanërisht progresin në reformat themelore dhe në drejtësi, shkruan ATSH.

Vizita do të jetë gjithashtu një mundësi për të përcjellë rëndësinë e konsolidimit të arritjeve përmes rezultateve të mëtejshme të prekshme, në përputhje me natyrën e bazuar në merita të procesit, përcjell KosovaPress.

Ndër të tjera, Komisionerja do të takohet me kryeministrin Edi Rama, kryenegociatoren për integrimin në BE, Majlinda Dhuka dhe me kryetaren e Kuvendit Elisa Spiropali.

Sipas axhendës zyrtare të publikuar në faqen e Komisionit Europian, në 13 mars në orën 10:10, Komisionerja Kos do të japë një konferencë të përbashkët për shtyp me kryeministrin Edi Rama.

Gjatë vizitës në Shqipëri, Komisionerja Kos do të angazhohet gjithashtu me institucionet e pavarura shqiptare të drejtësisë, deputetë, duke përfshirë përfaqësues nga opozita, si dhe me organizata të shoqërisë civile.

Si pjesë e misionit të saj, Komisionerja Kos do të vizitojë tre projekte të financuara nga BE në Elbasan, ku do të angazhohet me sipërmarrje sociale të mbështetura nga asetet e konfiskuara nga krimi i organizuar, do të angazhohet me gra viktima të dhunës me bazë gjinore dhe shkëmbime me studentë të rinj që marrin pjesë në programin e shkëmbimit të shkollave të Ballkanit Perëndimor, i cili mbështet pajtimin dhe mësimin ndërkulturor dhe dialogun.

Komisionerja e Bashkimit Evropian për Zgjerimin, Marta Kos do të vizitojë Shqipërinë nga data 12 deri më 14 mars, duke shënuar misionin e saj të parë zyrtar në vend.

Kjo vizitë do të shërbejë si një rast për të diskutuar me autoritetet shqiptare mbi gjendjen e procesit të anëtarësimit në BE, veçanërisht progresin në reformat themelore dhe në drejtësi, shkruan ATSH.

Vizita do të jetë gjithashtu një mundësi për të përcjellë rëndësinë e konsolidimit të arritjeve përmes rezultateve të mëtejshme të prekshme, në përputhje me natyrën e bazuar në merita të procesit, përcjell KosovaPress.

Ndër të tjera, Komisionerja do të takohet me kryeministrin Edi Rama, kryenegociatoren për integrimin në BE, Majlinda Dhuka dhe me kryetaren e Kuvendit Elisa Spiropali.

Sipas axhendës zyrtare të publikuar në faqen e Komisionit Europian, në 13 mars në orën 10:10, Komisionerja Kos do të japë një konferencë të përbashkët për shtyp me kryeministrin Edi Rama.

Gjatë vizitës në Shqipëri, Komisionerja Kos do të angazhohet gjithashtu me institucionet e pavarura shqiptare të drejtësisë, deputetë, duke përfshirë përfaqësues nga opozita, si dhe me organizata të shoqërisë civile.

Si pjesë e misionit të saj, Komisionerja Kos do të vizitojë tre projekte të financuara nga BE në Elbasan, ku do të angazhohet me sipërmarrje sociale të mbështetura nga asetet e konfiskuara nga krimi i organizuar, do të angazhohet me gra viktima të dhunës me bazë gjinore dhe shkëmbime me studentë të rinj që marrin pjesë në programin e shkëmbimit të shkollave të Ballkanit Perëndimor, i cili mbështet pajtimin dhe mësimin ndërkulturor dhe dialogun.