Zyra e Bashkimit Evropian në Kosovë, ka njoftuar se është shtyrë takimi i liderëve të Ballkanit Perëndimor, që ishte paraparë të mbahej në Shkup.
Kjo si shkak i tragjedisë që ndodhi të dielën në Maqedoninë e Veriut, ku vdiqën 59 persona dhe 155 u lënduan.
Ngjarja ka ndodhur si rezultat i shpërthimit të zjarrit brenda një diskoteke në Koçan.
Samiti i liderëve të Ballkanit Perëndimor, do të mbahej më 19 dhe 20 mars në kryeqendrën maqedonase, por u anulua për shkak të fatkeqësisë.
Organizata e Veteranëve të Luftës së UÇK-së ka shprehur ngushëllime për vdekjen e babait të ish-presidentit Hashim Thaçi, shkruan KP.
“Haxhi Thaçi do te kujtohet si njeri mirë, i urtë, i ndershëm dhe i respektuar. Si baba i përkushtuar, qe rriti dhe edukoi fëmijë me vlera të larta, si ish presidentin Hashim Thaçi, i cili si Drejtor i Drejtorisë Politike të UÇK-së, dha një kontribut të madh për lirinë dhe pavarësinë e Kosovës”, ka shkruar ndër të tjera organizata në telegramin e ngushëllimit.
Lajmi për vdekjen e Haxhi Thaçit u bë i ditur të dielën vonë. Ai ishte i shtruar në Qendrën Klinike Universitare pasi ishte në gjendje të rëndë shëndetësore, raporton KosovaPress.
Të enjten ai u vizitua nga Hashim Thaçi, të cilit leje për vizitë i tha Gjykata Speciale, e cila po gjykon për krime të pretenduara të luftës, transmeton KP.
Specialja u kritikua në Kosovë për mos realizim të kërkesave të Thaçit për të vizituar babain e vet të sëmurë, duke theksuar se vendime të tilla të gjykatës ishin të pabazuara dhe jo humane, shkruan KosovaPress.
“E dimë që dhimbja bëhet edhe më e rëndë për shkak të padrejtësisë që po i bëhet Hashimit në Hagë, duke e penguar që të ishte pranë babait sa ishte i sëmurë dhe sot që të jetë pranë familjes dhe t’i jap lamtumirën e fundit babait te tij”, ka shkruar OVL-UÇK të hënën.
Pas vizitës rreth tre orësh nën masa të rrepta të sigurisë, Thaçi u rikthye sërish në Hagë – qytetin holandez ku e ka selinë kjo gjykatë.
Hashim Thaçi po përballet me një proces të tejzgjatur gjyqësor pranë Dhomave të Specializuara të Kosovës – të njohura si Gjykata Speciale.
Ai po qëndron në paraburgim prej nëntorit të vitit 2020 nën akuzat për krime të pretenduara të luftës, shkruan KosovaPress.
Gjykimi ndaj tij ka nisur në prill të vitit 2023.
Bashkë me Thaçin, po gjykohen edhe Kadri Veseli, Jakup Krasniqi e Rexhep Selimi. Ish-krerët e UÇK-së janë deklaruar të pafajshëm për të gjitha pikat e aktakuzës.
Asnjëri nga të dyshuarit për spiunazh Besdri Shabani e Muharrem Qerimi nuk e kanë pranuar fajësinë.
Dy kosovarët që akuzohen për spiunazh, në seancën e sotme kanë mohuar çdo akuzë që rëndon mbi ta.
“Plotësisht jam i pafajshëm”, deklaroi Shabani.
Kurse, i akuzuari Qerimi e pranoi fajësinë vetëm për armëmbajtje pa leje.
“Nuk e pranoj për veprën penale të spiunazhit, e për armëmbajtje pa leje e pranoj fajësinë”, tha ai.
Prokurorja Fikrije Fejzullahu kërkoi që pranimi i fajësisë për veprën e armëmbajtjes pa leje t’i aprovohet Qerimit.
“Sepse është në përputhje me dispozitat procedurale pasi që nga fillimi ka pasur mbrojtje dhe mjaftueshëm është konsultu dhe se është në përputhje të plotë edhe me provat materiale”, tha prokurorja.
Edhe mbrojtësi i Qerimit, avokati Betim Shala tha se pajtohen me pranimin e fajësisë për armëmbajtje pa leje nga Qerimi pasi bazohet në provat materiale në shkresat e lëndës dhe bëhet pas konsultimit praprak.
Kështu, avokati i propozoi Gjykatës që t’i aprovohet pranimi i fajësisë Qerimit.
Gjermania është zotuar për 300 milionë euros ndihmë shtesë për sirianët përmes Kombeve të Bashkuara dhe organizatave të përzgjedhura, tha të hënën ministrja e Jashtme, Annalena Baerbock, para një konference donatorësh të udhëhequr nga BE-ja në Bruksel.
Më shumë se gjysma e fondeve të ofruara do të jenë për njerëzit në Siri. Ato do të zbatohen pa përfshirjen e qeverisë kalimtare, bëri të ditur kryediplomatja gjermane, raporton agjencia e lajmeve “Reuters”.
Fondet do të ndahen për ofrim të ushqimit, shërbimeve shëndetësore e strehimoreve urgjente, si dhe për masa mbrojtëse për njerëzit që janë posaçërisht të ndjeshëm, sipas Ministrisë së Jashtme të Gjermanisë.
Zonja Baerbock shtoi se nga kjo ndihmë do të përfitojnë edhe refugjatët sirianë dhe komunitetet mikpritëse të tyre në Jordani, Liban, Irak e Turqi.
Ministrja gjermane e përsëriti nevojën për një proces politik gjithëpërfshirës në mënyrë që të sigurohet një e ardhme paqësore për Sirinë.
“Si evropianë, ne qëndrojmë së bashku për popullin e Sirisë, për një Siri të lirë e paqësore” – tha ajo.
Baerbock gjithashtu bëri thirrje që qeveria kalimtare siriane ta hetojë vrasjen e qindra civilëve në fshatra të komunitetit Alawite dhe t’i mbajë përgjegjës ata që qëndrojnë prapa vrasjeve.
Një grup vëzhgues ka thënë se mbi 1.000 njerëz janë vrarë nga përleshjet e dhunshme që zgjatën disa ditë këtë muaj në rajonin bregdetar mes forcave qeveritare e besnikëve të ish-presidentit Bashar al-Assad./Nacionale
Presidentja e Kosovës, Vjosa Osmani, ka pritur në takim emisarin e BE-së për dialog, Peter Sorensen.
Pas këtij takimi, Sorensen do të pritet edhe nga kryeministri Albin Kurti. Pas takimit me Kurtin, emisari i BE-së do të takohet edhe me zëvendëskryeministrin, Besnik Bislimi.
Sorensen do të vizitojë Kosovën për të përgatitur vazhdimin e procesit të dialogut, në kuadër të së cilit për muaj nuk ka pasur lëvizje.
Hirësi Joan Pelushi të dielën u zgjodh Kryepeshkopi i ri i Kishës Ortodokse Autoqefale të Shqipërisë.
Zgjedhja e Kryepeshkopit Joan u bë nga Sinodi i Shenjtë i Kishës Ortodokse, pas Liturgjisë Hyjnore të së dielës, që për besimtarët ortodoksë përkon me të dielën e dytë të Kreshmës, shkruan ATSH.
Hirësi Joani u prit me një ceremoni të veçantë dhe hyri në Katedralen “Ngjalla e Krishtit”, ndërsa kambanat e saj dhe ato të të gjitha kishave ortodokse në Shqipëri, ranë njëkohësisht në nder të këtij momenti historik, përcjell KosovaPress.
Pas shpalljes së emrit të tij, Kryepeshkopi i ri mbajti një fjalë të shkurtër, që u prit nga dhjetëra besimtarë të pranishëm me duartrokitje dhe thirrjet “i denjë”.
Kryeministri i Shqipërisë Edi Rama ka uruar Hirësinë e Tij Joan Pelushi për zgjedhjen si Kryepeshkop i ri i Kishës Ortodokse Autoqefale shqiptare.
Në një postim në rrjetet sociale Rama uron që Zoti ta mbrojë Hirësinë e Tij Pelushi e ta udhëzojë gjithnjë në misionin e Tij të udhërrëfyesit të grigjës së besimtarëve ortodoksë”.
“Me kënaqësinë e rrallë të zgjedhjes së një shqiptari ndër më të mirët në krye të Kishës Ortodokse Autoqefale të Shqipërisë, si edhe me urimin e posaçëm për Hirësinë e Tij, Kryepeshkopin Joan Pelushi, që Zoti ta mbrojë e ta udhëzojë gjithnjë në misionin e Tij të udhërrëfyesit të grigjës së besimtarëve ortodoksë”, shkruan Rama.
Iljaz Vrioni u lind në Berat në vitin 1882 dhe vdiq në Paris, më 17 mars 1932. Ai ishte latifondist, nëpunës, nënshkrues i Deklaratës së Pavarësisë së Shqipërisë, kryeministër, disa herë ministër dhe diplomat i shtetit shqiptar.
Për kontributin e tij të pasur në marrëdhënie ndërkombëtare është dekoruar nga Republika Franceze në vitet 1920 me urdhrin e lartë Grand Officier de la Legion d’Honneur, raporton KosovaPress.
Mësimet e para i mori në vendlindje, të mesmin në Janinë, kurse shkollimin e lartë në shkollën e lartë të administratës në kryeqytetin e perandorisë, ku u diplomua më 1905.
Më 1909 – 1911 shërbeu si kryebashkiak i Beratit. Më 1912 delegat i Kuvendit të Vlorës, ku u zgjodh dhe anëtar i Pleqësisë. Më 1914 anëtar i delegacionit shqiptar që i dorëzoi kurorën Princ Vidit.
Më 1914-1918 qëndroi në Korfuz ku e shoqja, Xhemile Dino, lindi djalin e tyre, Jusufin.
Më 1920 ishte delegat i Beratit në Kongresin e Lushnjës, ku në qeverinë e dytë të dalë pas këtij Kongresi ishte kryeministër dhe ministër i Punëve të Jashtme.
Iljaz Vrioni ishte gjetje kompromisi mes palëve, qeveritë e tij disamujore u përqendruan në politikën e jashtme për njohjen e plotë të pavarësisë së plotë të vendit, fqinjësinë e mirë. Në politikën e brendshme thirrja e organizatorëve të huaj për organizimin e degëve të administratës, planifikimin e të ardhurave, përparësia ndaj arsimit, hartimin e një projektligji për zgjedhjet parlamentare.
Zgjidhet deputet i prefekturës së Dibrës 1921-1922, zëvendësohet më 1922, përcjellKosovaPress.
Pas ndërhyrjes së ushtrive serbe më 1921, u krijua qeveria e dytë e tij në korrik si koalicion mes dy partive më të mëdha, Partisë Popullore dhe asaj Përparimtare – pjesë e së cilës ishte atë vit. Ambicia e disa njerëzve shkaktoi në tetor të po atij viti një interpelancë që rrëzoi qeverinë.
Më 1923-1925 rizgjidhet deputet, tashmë i prefekturës së Beratit. Tashmë ishte përfaqësues i grupit indipendent. Emërohet në qeverinë Vërlaci, ministër i Jashtëm dhe më pas është kryeministër për dhjetë ditët para së të ndodhte Lëvizja e qershorit.
Largohet nga Shqipëria, qeveria Noli e shpall në kërkim për arsye politike.
Rikthehet me Triumfin e Legalitetit, shërben si ministër i Jashtëm në periudhën tranzitore prej dhjetorit 1924 gjer në janar të 1925 kur emërohet Imzot Gjergj Koleci.
Rikthehet si ministër i Punëve të Jashtme që më 12 shkurt 1927 dhe deri më 18 prill 1929, në një periudhë brenda së cilës kryen edhe detyrën e ministrit të Drejtësisë. Nga 1929 e deri në 1932 ishte ministër fuqiplotë në Britani dhe Francë për së dyti pas periudhës 1925-1926. Ndërron jetë nga infarkti në Paris, ndërsa u varros në Berat.
Në vitin 1946, regjimi do të zhvarroste eshtrat e ish-kryeministrit për t’i hedhur ato në lumin Osum të Beratit. Eshtrat vazhdojnë të mbeten të humbura duke e lënë pa varr.
Pas rreth 20 vjetëve punë të suksesshme të Universitetit të Prishtinës, vitet 1989-1990 shënuan fillimin e përpjekjeve të pandalshme serbe për ta shkatërruar arsimin e lartë në Kosovë, raporton KP.
Me ardhjen e Sllobodan Millosheviqit në krye të Serbisë, një figurë ultranacionaliste e politikës serbomadhe, i cili nxiti kundër shqiptarëve politika nacional-shoviniste, së pari në mesin e serbëve të Kosovës, më pastaj edhe në Serbi e më gjerë, shkolla shqipe në Kosovë, në veçanti Universiteti i Prishtinës, mori goditje të mëdha që çuan deri në rrezikimin serioz, me përmasat e shkatërrimit të arsimit shqip. Pushteti nacionalist serb u angazhua për ndryshimin dhe ndalimin e shollës shqipe në Kosovë.
Gjendja në universitet erdhi duke u përkeqësuar, krahas gjendjes në gjithë Kosovën. Qendra universitare nuk ishte më streha e studentëve dhe as e profesorëve shqiptarë. Sapo u mbyll semestri veror i vitit akademik 1990/91, më 28 qershor 1991, në ditën e Vidovdanit, (festë fetare serbe) Kuvendi i Serbisë vendosi masat e dhunshme në Universitetin e Prishtinës.
Gjatë vitit të ri akademik udhëheqësja e dhunshme, e dominuar nga kuadrot serbo-malaziase, e rritën numrin e studentëve për 923 studentë, kryesisht studentë serbë të sjellë nga viset e ndryshme të Serbisë dhe të Malit të Zi.
Më 21 gusht 1991, grupi i Helsinkit në Vjenë lëshoi një deklaratë, ku konstatohej se arsimi shqiptar në Kosovë më nuk ekziston dhe se është shkatërruar nga Serbia. Porse, me fillimin e vitit 1992, synohet të gjenden mundësitë dhe format që shkolla shqipe të fillojë të jetë aktive, përcjell KosovaPress.
Më 14 shkurt 1992 Universiteti i Prishtinës njofton se më datë 17 shkurt të po atij viti do të fillonte mësimi në nivelin universitar dhe kështu edhe ndodhi.
Në vitin 2019 ka kaluar ligji për statusin e punëtorëve të arsimit, sipas të cilit mësimdhënësve që kanë punuar në sistemin arsimor 1990-‘99, u ofrohen benificione pas daljes në pension.
Përveç mësimdhënësve, sipas ligjit edhe pronarët e shtëpive që në atë kohë kanë lëshuar objektet e tyre, të shfrytëzohen si shkolla, do të gëzojnë benificione, si dhe punëtorët teknikë dhe shërbyes.
Avokati Arianit Koci ka reaguar duke theksuar se Hashim Thaçit i është refuzuar disa herë e drejta për ta vizituar babanë e tij në momentet e fundit të jetës.
Një panel gjyqësor në Hagë nuk e ka marrë parasysh situatën dhe, përkundër kërkesave të përsëritura, ka vonuar lejen deri në momentin kur ishte tepër vonë.
Sipas Kocit, kjo situatë bëhet edhe më e rëndë duke pasur parasysh se Thaçi ndodhet në një paraburgim të pafund në Hagë, mijëra kilometra larg vendit të tij. Ai thekson se drejtësia nuk është vetëm procedurë dhe rregull, por edhe ndjeshmëri.
“Tani nuk ka më justifikime. Duhet t’i jepet leja për të marrë pjesë në varrimin e babait të tij. Kështu e do humanizmi. Kështu e kërkon drejtësia”, ka shkruar Koci.
Lajmi për ndarjen nga jeta të Haxhi Thaçit ka prekur shumë qytetarë, ndërsa mbetet për t’u parë nëse Hashim Thaçit do t’i mundësohet të jetë pranë familjes në këtë moment të dhimbshëm.
“Prehu në paqe, Haxhi Thaçi. E vërteta mund të vonojë – por nuk humb kurrë”, shkroi ndër të tjerash.
Njëzetenjë vjet më parë, shpërtheu revolta popullore kundër UNMIK-ut.
Pas përfundimit të luftës në qershor 1999, në Kosovë instalohet misioni i OKB-së, i cili lejoi krijimin e strukturave paralele serbe dhe ndikoi në ngulfatjen e ekonomisë së Kosovës.
Kështu më 17 mars 2004, filluan trazirat që më vonë janë përfolur shumë si “Trazirat e marsit”. Këto trazira filluan pasi që dy fëmijë shqiptar në pjesën veriore të Mitrovicës u mbytën në lumin Ibër.
Disa fëmijë që mbijetuan në orët e vona po atë natë treguan para kamerave se ata ishin ndjekur nga serbët dhe duke ikur dy fëmijë kishin humbur jetën në lum. Gjatë këtyre trazirave u vranë 19 persona, prej tyre ishin 12 shqiptarë.