Category: Lajme

Shtetet e Bashkuara i kanë paraqitur Ukrainës një propozim të ashtuquajtur “përfundimtar” të paqes, i cili përfshin njohjen e Krimesë si pjesë e Rusisë dhe pranimin jozyrtarisht të kontrollit rus mbi pothuajse të gjitha territoret e pushtuara që nga fillimi i pushtimit në shkallë të plotë në 2022.

Dokumenti një faqësh që SHBA ua prezantoi zyrtarëve ukrainas në Paris javën e kaluar, e përshkruan këtë si “ofertën përfundimtare” të presidentit Trump.

Në anën tjetër Shtëpia e Bardhë këmbëngul se është gati të largohet nëse palët nuk bëjnë një marrëveshje së shpejti, transmeton Telegrafi.

Sipas Axios, propozimi i presidentit amerikan Donald Trump përfshin lëshime të rëndësishme nga homologu i tij ukrainas Volodymyr Zelensky, i cili më parë kishte përjashtuar mundësinë e njohjes së Krimesë si ruse dhe pranimin e pjesëve të katër rajoneve në lindje dhe jug të Ukrainës si nën kontrollin rus.

Një burim i afërt me qeverinë ukrainase, raportoi se Kievi e konsideron këtë propozim jashtëzakonisht të njëanshëm në favor të Rusisë.

“Propozimi thotë shumë qartë se çfarë përfitimesh të prekshme merr Rusia, por vetëm në mënyrë të paqartë dhe në përgjithësi thotë se çfarë do të marrë Ukraina”, tha burimi.

Çfarë do të merrte Rusia sipas propozimit të Trump:

Njohja de jure nga SHBA e kontrollit rus mbi Krimenë.

Njohja de facto e pushtimit të pothuajse të gjithë rajonit të Luhanskut dhe pjesëve të okupuara të rajoneve Donetsk, Kherson dhe Zaporizhzhia.

Një premtim se Ukraina nuk do të anëtarësohet në NATO (dokumenti vë në dukje se anëtarësimi në BE është i mundur).

Heqja e sanksioneve të vendosura që nga viti 2014.

Rritja e bashkëpunimit ekonomik me SHBA-në, përfshirë në sektorët e energjisë dhe industrisë.

Çfarë do të marrë Ukraina:

“Një garanci e fortë sigurie” që përfshin një grup të veçantë të vendeve evropiane dhe potencialisht jo-evropiane me të njëjtin mendim.

Dokumenti përshkruan në mënyrë të paqartë se si do të funksiononte ky operacion paqeruajtës. Përfshirja e SHBA nuk përmendet.

Kthimi i një pjese të vogël të rajonit të Kharkivit të pushtuar nga Rusia.

Lundrimi i papenguar përgjatë lumit Dnipro në zonat ku ai kalon përgjatë vijës së kontaktit.

Kompensimi dhe ndihma për rindërtim (nuk tregohen burime financimi).

Propozimi “përfundimtar” i referohet gjithashtu kontrollit të SHBA-së mbi termocentralin bërthamor të Zaporizhzhia, i cili zyrtarisht do të konsiderohej territor ukrainas, me energji elektrike prej tij të furnizuar si në Ukrainë ashtu edhe në Rusi.

Dokumenti përmend gjithashtu një marrëveshje SHBA-Ukrainë për burimet minerale, e cila, sipas Trump, është planifikuar të nënshkruhet të enjten më 24 prill.

Plani u hartua pasi i dërguari i Trump, Steve Witkoff u takua me Putinin për më shumë se katër orë javën e kaluar. Pasi plani u prezantua, Putin ofroi të ndalonte pushtimin e Rusisë përgjatë vijave të frontit aktual, si pjesë e një marrëveshjeje të mundshme.

Një zyrtar amerikan që mori pjesë në bisedime tha se Sekretari amerikan i Shtetit, Marco dhe Witkoff kishin punuar së bashku “për të zhvilluar një kornizë për të na afruar më afër përfundimit të luftës”.

Megjithatë, sipas zyrtarit, Kievi është aktualisht më i interesuar të diskutojë një armëpushim 30-ditor gjatë takimeve në Londër sesa në miratimin e planit të propozuar të paqes.

“Negociatat vazhdojnë, ne ndjehemi përsëri dhe shpresojmë se po ecim në drejtimin e duhur”, u tha gazetarëve të martën sekretarja e shtypit e Shtëpisë së Bardhë, Karoline Leavitt. /Telegrafi/

Pas ndërprerjes së seancës së katërt konstituive të Kuvendit të Kosovës, kryetari i Partisë Demokratike të Kosovës, Memli Krasniqi, ka akuzuar Lëvizjen Vetëvendosje për bllokim të qëllimshëm të institucioneve, raporton ATV.

“Kanë kaluar 73 ditë nga zgjedhjet dhe 27 ditë nga certifikimi i rezultateve, dhe ende nuk kemi institucione të reja. Vetëvendosje, të cilës i takon ta propozojë kryetarin e Kuvendit, ka vendosur të mbajë peng shtetin për shkak të tekeve të tyre për një emër të vetëm,” tha Krasniqi para gazetarëve në hollin e Kuvendit.

Ai e cilësoi këtë situatë si të paprecedent në historinë e Republikës së Kosovës dhe theksoi se vonesat po dëmtojnë procesin demokratik dhe pritjet e qytetarëve për krijimin e institucioneve të reja. /atvlive.tv

Gazetarja e ATV-së, Benita Zeneli, në një lidhje të drejtpërdrejtë nga Kuvendi i Kosovës për emisionin informativ të ATV-së, raportoi për përgatitjet dhe qëndrimet politike para nisjes së përpjekjes së pestë për konstituimin e legjislaturës së re.

Ajo tha se shumica e deputetëve kanë hyrë në ambientet e Kuvendit, ndërkohë që pritet të rifillojë tentativa për konstituimin e legjislaturës së nëntë.

“Shumica e deputetëve janë parë që të hyjnë nga objektet e Kuvendit të Kosovës për të tentuar për herë të pestë të bëhet konstituimi i Legjislaturës së nëntë. Paraprakisht është thirrur edhe një mbledhje nga kryesuesi Avni Dehari me përfaqësuesit e partive politike. Tashmë edhe po dëgjohet zilja për nisjen e seancës, e cila është paraparë të fillojë në orën dhjetë. Megjithatë ende kjo seancë nuk ka filluar”, raportoi Benita Zeneli.

Sipas saj, VV-ja pritet të propozojë sërish Albulena Haxhiun për kryetare të Kuvendit, ndërkohë që partitë opozitare mbesin të vendosura kundër këtij emri.

“Prej disa deputetëve të Lëvizjes Vetëvendosje është deklaruar se emri i Albulena Haxhiut do të propozohet sërish për kryetare të Kuvendit, edhe pse ajo ka dështuar dy herë që të marrë votat e mjaftueshme. Nga partitë opozitare, si LDK, PDK dhe AAK, është theksuar se nuk do ta votojnë këtë emër. Madje nga PDK kanë thënë se vetëm Donika Gërvalla dhe Albulena Haxhiu janë emrat që nuk do t’i mbështesin, ndërsa emrat e tjerë do të jenë të mirëseardhur”, raportoi Zeneli.

Më shumë detaje i gjeni në videon më poshtë:

Në “Studio e Hapur” në ATV, Melos Kolshi nga Instituti i Kosovës për Drejtësi ka komentuar zhvillimet rreth dështimit për zgjedhjen e kryetarit të Kuvendit, duke kujtuar një precedent të ngjashëm nga viti 2017.

Sipas tij, praktika aktuale e mospajtimit me kandidatin për kryeparlamentar nuk është e re dhe ishte ndjekur edhe nga Lëvizja Vetëvendosje në të kaluarën.

“Një situatë e tillë veçse e kemi pasur edhe në vitin 2017, kur vetë Lëvizja Vetëvendosje nuk e kishte votuar kandidatin e PAN-it, Kadri Veselin. Ata patën kërkuar një kandidat tjetër,” theksoi Kolshi, duke shtuar se këto veprime tashmë po ndërtojnë një praktikë të gabuar që mund të dëmtojë funksionimin institucional.

Ai nënvizoi se aktgjykimi i Gjykatës Kushtetuese është i qartë: të drejtën për të propozuar kryetarin e Kuvendit e ka partia më e madhe, por zgjedhja kërkon konsultim dhe bashkëpunim ndërpartiak.

“Konstituimi i Kuvendit nuk duhet të ngatërrohet me formimin e Qeverisë. Pozita e kryetarit të Kuvendit nuk duhet të futet në marrëveshje politike, por duhet të zgjidhet përmes mirëkuptimit ndërmjet subjekteve parlamentare,” tha Kolshi.

Zhvillimet e fundit nga Kuvendi i gjeni në videon më poshtë:

Para nisjes së tentativës së katërt për konstituimin e Kuvendit të Kosovës, kryetari i Lidhjes Demokratike të Kosovës, Lumir Abdixhiku, ritheksoi qëndrimin e pandryshueshëm të partisë së tij ndaj procesit, raporton ATV.

“Qëndrimet tona janë të qarta dhe nuk ndryshojnë. LDK-ja është njëra prej 15-16 partive në Kuvend. Le të gjejnë gjuhën e përbashkët të tjerët. Ne po kontribuojmë në mënyrë demokratike,” tha Abdixhiku, duke thënëse krijimi i institucioneve kërkon bashkëpunim dhe jo përjashtim.

Kreu i LDK-së tha se, nëse do të kishte 48 deputetë, ai do ta kishte formuar tashmë edhe kryesinë e Kuvendit edhe Qeverinë. Por, sipas tij, ky proces nuk duhet të kalojë përmes presionit.

“Po t’i kisha 48 deputetë, sot do ta kisha edhe Kryetarin e Kuvendit, edhe Qeverinë. Por do ta bëja pa sharje, pa kërcënime dhe pa shantazhe. Politika është diskutim, bindje dhe parim,” theksoi ai.

Zhvillimet e fundit në Kuvend i gjeni në videon më poshtë:

Para nisjes së vazhdimit të seancës konstituive të Kuvendit të Kosovës, deputeti nga radhët e partisë Guxo në koalicion me Lëvizjen Vetëvendosje, Faton Peci thotë se rrjedha e vazhdimit të kësaj seanca do të varet nga gatishmëria që partitë opozitare do të shprehin për konstituimin e Kuvendit të Kosovës, raporton KP.

“Rrjedha e seancës do të varet nga diskutimi dhe gatishmëria e të gjitha partive politike për tu gjetur një rrugë zgjidhje për t’u konstituar Kuvendi i Kosovës”, tha ai.

I pyetur se sa kanë shpresë që opozita do të ndryshoj qëndrimin e saj karshi propozimit të Lëvizjes Vetëvendosje për kryetarin e Kuvendit, Peci thekson se nuk mund të thotë se ka shpresa në këtë drejtim.

“As nuk mund të them se kam shpresë, është çështje ekskluzivisht e atyre që marrin pjesë dhe që përfaqësojnë parti politike… Mendoj se duhet me i thirr zërit të arsyes me gjet zgjidhje me dal prej kësaj situatës, Kosova ka nevojë për institucione ka nevojë për Kuvend, ka nevojë për qeveri funksionale”, tha ai.

Sot do të tentohet për herën e peste të konstituohet legjislatura e nëntë e Kuvendit.

Vazhdimi i seancës është paraparë të nisë sot nga ora 10:00.

Lëvizja Vetëvendosje ka kërkuar arritjen e një marrëveshjeje politike për zgjedhjen e kryetarit të Kuvendit, përcjell KosovaPress.

Kryesuesi i seancës konstitutive, Avni Dehari i ka ftuar në takim të gjitha subjektet parlamentare, mëson KosovaPress nga burimet.

LVV-ja dështoi më 19 prill të zgjedh Albulena Haxhiun kryetare të Kuvendit./kp

Nënkryetarja e Partisë Demokratike të Kosovës (PDK), Vlora Çitaku, ka konfirmuar se subjekti i saj ka pranuar ftesën nga kryesuesi i Kuvendit, Avni Dehari, për një takim me grupet parlamentare dhe se PDK do të marrë pjesë në këtë takim, raporton KP.

Ndërsa, ka thënë se PDK dhe qytetarët presin zhbllokim të gjendjes së krijuar në Kuvend për siç u shpreh ajo “paaftësisë së VV për të krijuar shumicën”.

“Kemi marr ftesën para pak minutash sigurisht që do të shkojmë. PDK dhe po besojmë qytetarët presin zhbllokimin e gjendjes së krijuar në Kuvend si pasoj e paaftësisë së VV për të krijuar shumicën. Fatkeqësisht këto janë vetëm shqetësimet tona e shqetësimet e qytetarëve janë çmimet e larta e energjia elektrike”, ka thënë ajo.

Derisa deputeti i zgjedhur i PDK-ë, Nait Hasani, ka deklaruar se kandidatura e Albulena Haxhiut për kryetare të Kuvendit nuk ka as mbështetjen e plotë nga partia e saj, prandaj nuk ka arsye që PDK ta mbështesë atë.

“Ajo nuk i ka votat e partisë së vet mas pari andaj nuk kemi nevoja ta votojmë na, le ta votojnë ata të vetë një herë. Ne do të votojmë kryetarin që është konstruktiv, bashkëpunues, mirëkuptues dhe nderi i Kuvendit. Përveç Donikës dhe Albulenës të gjithë të tjerët janë të mirëpritur”, ka thënë ai.

Ndryshe, para vazhdimit të seancës, kryesuesi i seancës konstitutive, Avni Dehari i ka ftuar në takim të gjitha subjektet parlamentare. /KP