Instituti Hidrometeorologjik i Kosovës ka njoftuar se sot do të mbajë mot me diell dhe pjesërisht i vranët.
Instituti ka bërë me dije se vranësirat mund të sjellin riga shiu dhe shkarkime rrufesh.
“Temperaturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 18-22gradë Celsius. Do të fryjë erë kryesisht nga jugperëndimi e lehtë deri mesatare”, thuhet në njoftimin e institutit.
Presidenti amerikan, Donald Trump, ka deklaruar se është më e vështirë për Shtetet e Bashkuara të arrijnë një marrëveshje me Presidentin ukrainas Volodymyr Zelensky sesa me Moskën për zgjidhjen e konfliktit në Ukrainë.
Gjatë një deklarate për mediat, Trump theksoi se ai beson se Rusia është “gati” për të arritur një marrëveshje dhe se një marrëveshje me Moskën mund të ishte më e thjeshtë, ndërsa për Ukrainën shtoi se ka qenë më e vështirë.
“Unë mendoj se Rusia është gati. Mendoj se kemi një marrëveshje me Rusinë. Duhet të arrijmë një marrëveshje me Zelensky.
Mendova se mund të ishte më e lehtë të merresh me Zelensky. Deri më tani, ka qenë më e vështirë, por kjo është në rregull”, tha Trump kur u pyet për përpjekjet e tij për të ndihmuar në arritjen e një zgjidhjeje të qëndrueshme për konfliktin ukrainas.
Në postimin e tij në “Truth Social” të mërkurën, Trump kritikoi deklaratat e Zelenskit se Ukraina nuk do të pranojë kurrë Krimenë si pjesë të Rusisë.
Ai e quajti këtë qëndrim të dëmshëm për negociatat, duke theksuar se Krimea u humb disa vite më parë gjatë administratës së Presidentit Barack Obama dhe, sipas tij, nuk është një pikë diskutimi.
“Shpresoj që ata ta bëjnë këtë”, shtoi Trump, duke shprehur besimin e tij se mund të arrihet një marrëveshje mes të dyja palëve.
Të paktën 45 palestinezë vdiqën të mërkurën pas bastisjeve izraelite në Rripin e Gazës, njoftoi kanali televiziv Al Jazeera, duke cituar burime mjekësore.
Sipas burimeve, më shumë se 100 persona u plagosën dhe numri i viktimave vazhdon të rritet pas bastisjeve të natës.
Më 18 mars, Izraeli rifilloi armiqësitë në Rripin e Gazës dhe kreu një seri sulmesh ndaj objektivave të Hamasit, duke shkurtuar kështu armëpushimin që kishte qenë në fuqi në enklavë që nga janari 2025.
Zyra e kryeministrit izraelit Benjamin Netanyahu shpjegoi lëvizjen me refuzimet e Hamasit për propozimet e avancuara pas bisedimeve me të dërguarin e SHBA-së me WWW.
Ai pretendoi se qëllimi i operacionit ishte lirimi i të gjithë pengjeve izraelite. Hamasi vendosi përgjegjësinë për këtë spirale të fundit të përshkallëzimit në Gaza mbi Izraelin dhe Shtetet e Bashkuara.
Gjykata Kushtetuese i ka dhënë dritën e gjelbër për dekretim nga presidentja Ligjit për Këshillin Prokurorial të Kosovës (KPK).
Gjykata Kushtetuese e Kosovës ka shpallur kushtetues Ligjin nr. 08/L-249 për Ndryshimin dhe Plotësimin e Ligjit për Këshillin Prokurorial, pas kërkesave nga deputetët Abelard Tahiri dhe Arben Gashi me grupet e tyre.
Gjykata, në aktgjykimin e saj, konstatoi se ndryshimet që lidhen me përkufizimin e “integritetit profesional”, kushtin për mospasjen e aktakuzës, përbërjen e Komisionit të Posaçëm dhe kuorumin e vendimmarrjes nuk bien në kundërshtim me Kushtetutën.
Vendimi u mbështet në opinionin e Komisionit të Venecias dhe në aktgjykimet e mëparshme të Gjykatës në rastet KO100/22 dhe KO101/22.
Ligji do t’i dërgohet Presidentes për shpallje dhe hyn në fuqi me publikimin në Gazetën Zyrtare.
Gjykata Kushtetuese e Republikës së Kosovës ka shpallur një aktgjykim lidhur me kërkesat e deputetëve të Kuvendit të Kosovës, duke vlerësuar se disa nene të Ligjit nr.08/L-289 për Komisionin e Pavarur të Mediave janë në kundërshtim me Kushtetutën.
Në veçanti, Gjykata konstatoi se dispozitat që lidhen me zgjedhjen dhe shkarkimin e anëtarëve të Komisionit, kompetencat e tij, si dhe sanksionet për shkelje, nuk janë të përputhshme me parimet kushtetuese të pavarësisë, barazisë dhe lirisë së medieve.
Në përfundim, Gjykata shpalli shfuqizimin e Ligjit të kontestuar, ndërsa refuzoi kërkesën për masa të përkohshme. Kërkesat e parashtruesve ishin mbështetur nga Avokati i Popullit dhe Asociacioni i Gazetarëve të Kosovës, ndërsa Qeveria kundërshtoi vlerësimin.
Çmimet e aksioneve u rritën ndjeshëm në bursat evropiane sot, siç u rritën dje në Wall Street, teksa investitorët shpresojnë për një lehtësim të tensioneve tregtare midis SHBA-së dhe Kinës.
Indeksi STOXX 600 i aksioneve kryesore evropiane u rrit 1.8 për qind në orën 9:30, duke u forcuar për të dytën ditë radhazi. Në të njëjtën kohë, indeksi FTSE i Londrës u rrit 1.02 për qind, në 8,415 pikë, ndërsa DAX i Frankfurtit u hodh me 2.15 për qind, në 21,750 pikë, dhe CAC i Parisit u rrit 1,43 për qind, në 7,430 pikë.
Çmimet e aksioneve u rritën edhe në bursat aziatike. Indeksi MSCI i aksioneve të Azi-Paqësorit u rrit me 0.7 për qind. Në të njëjtën kohë, indeksi japonez Nikkei u forcua 1.9 për qind, ndërsa çmimet e aksioneve në Shangai, Australi, Korenë e Jugut dhe Hong Kong u rritën midis 0.1 dhe 2.4 për qind.
Investitorët në tregjet botërore të aksioneve u inkurajuan nga rritja e fortë e djeshme në Wall Street.
Indeksi Dow Jones u rrit me 2.7 për qind, ndërsa S&P 500 u rrit 2.5 për qind dhe indeksi Nasdaq u rrit 2.7 për qind.
Me këtë kërcim, indekset plotësuan të gjitha humbjet e një dite më parë, kur investitorët u shqetësuan nga sulmi i ashpër i presidentit amerikan Donald Trump ndaj kryetarit të Fed-it, Jerome Powell.
Megjithatë, Trump tha dje se ai nuk ka plane për të hequr Powell, ai thjesht dëshiron norma më të ulëta interesi.
Investitorët u inkurajuan gjithashtu nga deklarata e sekretarit të Thesarit Scott Bessent, se ai beson se tensionet tregtare midis SHBA-së dhe Kinës do të zbuten, megjithëse negociatat me Pekinin nuk kanë filluar ende dhe ka të ngjarë të jenë të ngadalta.
“Lehtësimi i acarimit SHBA-Kinë, falë komenteve të Bessent, e ka shtyrë tregun më lart,” tha Ryan Detrick, strateg pranë grupit Carson.
Trump më vonë tha se donte një marrëveshje me Kinën dhe se tarifat nuk do të ishin afërsisht 145 për qind, por as 0 për qind, transmeton KosovaPress.
Eksporti i mallrave kosovare ka shënuar rënie në mars të këtij viti krahasuar me periudhën e njëjtë të vitit 2024. Përderisa ka rritje të theksuar të importit. Kështu thuhet në raportin e Agjencisë së Statistikave të Kosovës, të publikuar sot, raporton KosovaPress.
Agjencia e Statistikave të Kosovës bën të ditur se të dhënat nga tregtia e jashtme e mallrave në Kosovë tregojnë për një deficit tregtar prej 21,8 për qind në muajin mars 2025, në raport me periudhën e njëjtë të vitit 2024, gjegjësisht në vlerë prej 535,7 milionë eurosh, krahasuar me deficitin prej 439,7 milion eurosh në vitin 2024.
Sipas ASK-së, eksporti mbulon importin me vetëm 12.2 për qind.
“Eksporti i mallrave në muajin mars 2025 kishte vlerën 74.7 milionë euro, ndërsa importi 610.5 milionë euro, që është një rënie prej 7. 2 për qond për eksport, si dhe një rritje prej 17. 3 për qind për import, duke krahasuar me periudhën e njëjtë të vitit 2024”, thuhet në raportin e ASK për tregtinë e jashtme, transmeton KosovaPress.
ASK tha se sipas të dhënave të grupeve kryesore të eksportit: 23,6% e përbëjnë metalet bazë dhe artikujt prej tyre; 11,9% e përbëjnë plastika, goma dhe artikujt prej tyre; 11,8% e përbëjnë ushqimet e përgatitura; 10,7% e përbëjnë artikujt e ndryshëm të prodhuar; pijet dhe duhani; 9,0% e përbëjnë produktet minerale, etj.
Ndërsa sipas të dhënave të grupeve kryesore të importit: 15,9% e përbëjnë produktet minerale; 12,8% e përbëjnë makineritë, pajisjet mekanike dhe elektrike; 10,7% e përbëjnë ushqimet e përgatitura, pijet dhe duhani; 10,3% e përbëjnë mjetet e transportit; 9,0% e përbëjnë metalet bazë dhe artikujt prej tyre, etj.
Sipas ASK-së, eksportet e Kosovës në vendet e BE-së arritën në 25,9 milionë euro, ose rreth 34.8 për qind e eksporteve të përgjithshme, me një rënie prej 15,8%). Partnerët kryesorë për eksportin e mallrave në BE ishin: Gjermania (10,8%), Holanda (3,3%), Italia (3,3), etj.
Importet e Kosovës nga vendet e BE-së ishin rreth 249,0 milion Euro, ose 40,8% e importeve të përgjithshme, me një rënie prej (-1,1%). Importet me pjesëmarrje me të lartë ishin nga: Gjermania (12,6%), Italia (5,5%), Polonia (3,2%), etj.
Po ashtu sipas ASK-së, eksportet e Kosovës me vendet e CEFTA-s arritën në 33,5 milionë euro, ose 44,8% të eksporteve të përgjithshme, me një rritje prej 3,3%. Partnerë kryesorë për eksport nga vendet e CEFTA-s ishin: Maqedonia e Veriut (15,8%), Shqipëria (14,7%), Mali i Zi (6,6%), Serbia (5,9%).
“Importet nga vendet e CEFTA-s arritën në 101,5 milion Euro, ose 16,6% të importeve të përgjithshme, me një rritje prej 51,1%. Vendet me pjesëmarrje më të lartë për import ishin: Maqedonia e Veriut (6,5%), Shqipëria (5,1%), Serbia (3,7%)”, thuhet në raport.
Ndërsa, sipas Agjencisë së Statistikave të Kosovës, eksportet e Kosovës me vendet e tjera të botës arritën në 15,3 milion Euro, ose 20,5%. Si partnerë më të rëndësishëm nga këto vende për eksport ishin: Zvicra (10,1%) dhe SHBA (3,0%). “Importet e Kosovës me vendet e tjera të botës arritën në 259,9 milion Euro, ose 42,6%. Vendet me pjesëmarrje më të lartë për import në këtë grup ishin: Turqia (14,0%) dhe Kina (12,0%)”, thuhet në raport.
Pritjet e konsumatorëve evropianë u përkeqësuan në prill për të dytin muaj radhazi, duke rënë në nivelin e tyre më të ulët në një vit e gjysmë, sipas një sondazhi të Komisionit Evropian, me Bankën Qendrore Evropiane (BQE), duke paralajmëruar se ndërprerjet në tregtinë ndërkombëtare mund t’i shtyjnë qytetarët të jenë të kujdesshëm dhe të kursejnë.
Indeksi që mat pritjet e konsumatorëve në eurozonë ra 2.2 pikë në prill në krahasim me marsin, në minus 16.7 pikë, llogariti Komisioni në një raport të publikuar të martën. Ky është niveli më i ulët që nga nëntori 2023, kur ishte minus 16.9 pikë, raporton KosovaPress.
Në muajin mars, ai ra me 0.9 pikë, pas një rritjeje të lehtë në muajin shkurt. Konsumatorët e BE-së gjithashtu treguan pesimizëm të theksuar në prill, me indeksin që ra me 2.1 pikë në minus 16 pikë. Në mars, ajo kishte rënë me një pikë.
Ndikimi i inflacionit dhe tensioneve tregtare
Sondazhi tregoi se ndjenja e konsumatorit evropian në prill u largua më shumë nga mesatarja afatgjatë, duke rënë në nivelin më të ulët në tetëmbëdhjetë muaj, sipas Komisionit, i cili kreu anketën nga 1-21 prill në 26 vende të BE-së, me përjashtim të Spanjës. Të dhënat mbulojnë 89.3 për qind të totalit të konsumit final privat në eurozonë dhe 90.9 për qind në BE.
Inflacioni në Eurozonë dhe BE u dobësua lehtë në mars, në 2.2 dhe 2.5 për qind respektivisht, treguan përllogaritjet e Zyrës Evropiane të Statistikave.
Banka Qendrore Evropiane (BQE) uli sërish normat e interesit javën e kaluar, me një çerek pikë përqindjeje, duke paralajmëruar se vala e tarifave kishte krijuar një shkallë të lartë pasigurie për ekonominë e eurozonës.
Ndërprerjet në tregtinë ndërkombëtare, tensionet në tregjet financiare dhe pasiguria gjeopolitike rëndojnë mbi investimet e biznesit dhe qytetarët mund të tregojnë më shumë kujdes dhe një tendencë më të madhe për të kursyer, theksuan ata.
KE do të publikojë një raport të plotë mbi gjendjen ekonomike në fund të muajit.
Policia e Rajonit të Prishtinës respektivisht, Njësiti i Trafikut të Kryeqytetit që nga 14 prilli në koordinim me inspektorët komunal dhe ata të Ministrisë së Transportit është duke e implementuar planin “Autobusi”.
Gjatë implementimit të planit bëhet e ditur janë shqiptuar 56 gjoba ,të ndryshme lidhur me mosrespektimin e rregullave mbi transportin e personve në komunikcionin rrugor.
Bëhet fjalë për gjoba që kanë të bëjnë me ndalim në vendin e ndaluar me shenjë të komunikacionit, bartja e pasagjerëve më tepër se sa lejohet në mjet si dhe mosrepsktimi i itinerarit me autobusë brenda qytetit.
Në konferencën mbi ecurinë e çështjes nga Thaçit dhe të tjerëve në Hagë, trupi gjykues ka dhënë disa urdhra me gojë, ndër të cilët edhe një për pranimin e disa dokumenteve që flisnin për një person të arratisur nga drejtësia në Kosovë.
Sipas trupit gjykues, bëhet fjalë për një viktimë të pretenduar e cila thuhet se ka bërë krime të rënda në Kosovë dhe më pas ka ikur nga drejtësia.
Ky ishte urdhri i gjashtë i trupit gjykues më 23 prill.
Në konferencë u tha se janë tre artikuj për një viktimë të pretenduar e që sipas mbrojtjes së Krasniqit janë të rëndësishëm. Për të vlerësuar besueshmërinë e viktimës së pretenduar.
Trupi gjykues konstaton se tri dokumentet përmbushin kriteret prima facie të rregullues 138. Sa i takon relevancës, trupi gjykues vlerëson se tri dokumentet janë relevante për besueshmërinë e personit që pretendohet se është mbajtur i ndaluar nga UÇK-ja dhe për të cilin shumë dëshmitarë, përfshirë edhe dëshmitarin 04758 kanë dhënë dëshmi. Trupi gjykues vëren se personi që është objekt i këtyre artikujve nuk është thirrur për të dhënë dëshmi. Relevanca e materialit lidhet me dëshminë e këtij dëshmitari që pretendohet se ja ka dhënë një personi tjetër i cili më pas erdhi dhe dha dëshmoni para turpit gjykues”, tha kryetari i trupit gjykues.
“Sa I takon vlerës provuese, trupi gjykues vërën se ndonëse saktësia e këtij informacioni që gjendet në artikuj, nuk mund të verifikohet në mënyrë të pavarur, sidoqoftë, tre artikujt kanë data të ndryshme, vinë nga burime të ndryshme mediatike, citojnë burime të ndryshme dhe sugjerojnë se viktima e pretenduar është dënuar për vepra të rënda penale në Kosovë dhe është arratisur nga Kosova. Trupoi gjykues konstaton se ndonëse dokumentet relevanten e kanë shumë të vogël, kanë një lloj vlere provuese e cila mjafton për të përmbushur standardin prima facie”, shtoi Smith.
Në këtë konferencë, mbrojtja e Hashim Thaçit, avokati Luka Misetiq tha ndër të tjera se Zyra e Prokurorit të Specializuar ka kërkuar që disa materiale nga çështja e Thaçit ku akuzohet për pengim të drejtësisë, të pranohen edhe në rastin për krime të pretenduara të luftës.
Misetiq tha se kanë të drejtë të dorëzojnë një kërkesë dhe të kërkojnë mjete juridike përkatëse.
Mbrojtja e Thaçit tha se mocioni i prokurorisë ngritë disa çështje që cenojnë disa nga të drejtat themelore të ish-presidentit – si atë për proces të drejtë juridik.
Misetiq kërkoi kohë dhe fjalë shtesë për ta kundërshtuar zyrtarisht kërkesën e ZPS-së./KP