Category: Lajme

Teksa afati për liberalizimin e tregut të energjisë po afrohet, Oda Ekonomike Amerikane në Kosovë përsërit qëndrimin e saj të mëparshëm se Kosova nuk është e përgatitur për një tranzicion të tillë.

OEA thekson se përtej mungesës së konkurrencës reale në treg, afati i shkurtër nuk u ka dhënë bizneseve as kohë të mjaftueshme për përgatitje, as hapësirë për zbatimin e masave mbështetëse gjatë kësaj periudhe kalimtare, të cilat janë thelbësore për të shmangur goditjet financiare dhe rënien e konkurrueshmërisë.

“Shqetësimet e bizneseve janë rritur ndjeshëm pas ofertave të marra nga furnizuesit, të cilat parashikojnë rritje mbi 200% të tarifave të energjisë, një zhvillim që bie ndesh me pritjet se liberalizimi do të sillte ulje të çmimeve përmes konkurrencës. Kjo rritje e paparashikuar do të prekë zinxhirin e gjerë të bizneseve në vend, nga sektori prodhues dhe përpunues, deri te sektori i shërbimeve, tregtisë dhe teknologjisë, duke vënë në rrezik qëndrueshmërinë financiare dhe perspektivën e investimeve”, thuhet në reagim.

Sipas Odës, argumentet se vendet e rajonit kanë zbatuar me sukses liberalizimin nuk janë valide në kontekstin e Kosovës.

“Vendet fqinje kanë qasje në burime alternative si gazi natyror, ndërkohë që në Kosovë, për shkak të vendimmarrjeve të gabuara në të kaluarën, projektet për ndërtimin e infrastrukturës së gazit janë braktisur, duke e lënë energjinë elektrike si burimin e vetëm për nevoja afariste dhe industriale.

Për më tepër, moskonstituimi i Kuvendit përbën një arsye shtesë se pse Zyra e Rregullatorit të Energjisë nuk duhet të vazhdojë me planet për liberalizimin e tregut në këtë fazë, duke pasur parasysh se ky institucion i pavarur është llogaridhënës para deputetëve të Republikës së Kosovës”, thuhet në reagim.

Për një tranzicion të qëndrueshëm dhe të drejtë, Oda Ekonomike Amerikane u bën thirrje politikëbërësve të shtyjnë afatin përtej 1 qershorit 2025 dhe paralelisht të miratojnë legjislacionin e nevojshëm dytësor për të mundësuar investimet në teknologji të ruajtjes së energjisë (bateri) dhe në sisteme me efikasitet të lartë energjetik.

Gjithashtu, kërkohet futja e një skeme nxitëse tatimore dhe doganore për teknologjitë e energjisë së ripërtëritshme dhe infrastrukturën mbështetëse. Pa këto masa, liberalizimi rrezikon të sjellë më shumë dëm sesa përfitim për zhvillimin e qëndrueshëm ekonomik të vendit.

Bashkësia Islame e Kosovës ka njoftuar se Imamit i Qabesë, Dr. Bandar Belilah, i cili po qëndron për vizitë zyrtare në Kosovë, ka udhëhequr faljen e namazit të xhumasë dhe ka mbajtur hytben para besimtarëve në Xhaminë e Madhe në Prishtinë

Në njoftimin e BIK thuhet se Belilah theksoi rëndësinë e ruajtjes së vlerave islame.

“Forcimit të besimit dhe unitetit në mesin e myslimanëve, duke përçuar mesazhe paqeje, mirësie dhe drejtësie. Ai gjithashtu falënderoi popullin e Kosovës për mikpritjen dhe përkushtimin ndaj fesë islame”.

Papa Leoni XIV e mbajti meshën e tij të parë të premten në Kapelën Sistine, ku u zgjodh papë një ditë më parë, duke paralajmëruar për rreziqet që sjell mungesa e besimit dhe duke shpresuar se Kisha Katolike do të mund të jetë fener që ndriçon “netët e errëta” të botës.

Leoni, ish-kardinali me emrin Robert Prevost dhe papa i parë amerikan, dukej i qetë derisa drejtonte meshën në kapelën e famshme të zbukuruar me afreske, përkrah të njëjtëve kardinalë që e zgjodhën si papën e 267-të dhe pasardhës të Papa Françeskut.

I veshur me petka relativisht të thjeshta në ngjyrë të bardhë dhe ari, Leoni XIV – i lindur në Çikago – i tha disa fjalë në anglisht para se të vazhdonte predikimin e tij me një italishte të rrjedhshme, transmeton Radio Evropa e Lirë.

Gjatë meshës, Leoni XIV, 69 vjeç, përshkroi vizionin e tij për Kishën që dëshiron ta ndërtojë, duke thënë se synon të shërbejë si “administratori besnik” për të gjithë kishën.

Papa i ri – që udhëheq 1.4 miliard katolikë në mbarë botën – e pranoi se besimi i krishterë ndonjëherë “cilësohet absurd” dhe si diçka që u përket “të dobëtëve dhe të paarsimuarve”.

“Mungesa e besimit shpesh shoqërohet tragjikisht me humbjen e kuptimit të jetës, neglizhencën e mëshirës, shkelje të tmerrshme të dinjitetit njerëzor, krizën e familjes dhe shumë plagë të tjera që e godasin shoqërinë tonë”, tha ai.

Ai u zgjodh papë në votimin e tretë të enjten, në ditën e dytë të konklavës./REL

Filatelia e Postës së Kosovës sot ka vënë në qarkullim postar emisionin e ri të pullave postare nga tema Evropa “Zbulimet kombëtare arkeologjike – Ulpiana 2023”.

Ky emision i pullave postare prezanton një nga zbulimet më të rëndësishme arkeologjike në Kosovë, në parkun arkeologjik të Ulpianës, raporton KosovaPress.

Motivet e pullave postare mbartin imazhe kushtuar themelimit të Justinianit të Dytë, e përshkruar si një urbs Dardaniae nga perandori Justinian dhe gruaja e tij Theodora (535-545 AD), si dhe të zogut houbara bustard (outis), një zog shtegtar, në dyshemenë mozaik të bazilikës episkopale të Justiniani i Dytë (535-545 AD), zbuluar nga A. Hajdari, C.J. Goddard dhe M. Berisha.

Ndërkaq, blloku filatelik paraqet “Representation of a houbara bustard (outis), a migratory bird”, pranë një shatërvani në dyshemenë mozaik të bazilikës episkopale të Iustiniana secunda (535-545 AD), zbuluar nga A. Hajdari, C.J. Goddard dhe M. Berisha.

Realizimi i emisionit të pullave postare është mundësuar me përkrahjen e Ministrisë së Kulturës, Rinisë dhe Sportit, ndërkaq pamjet e këtij emisioni janë siguruar nga vet zbuluesit, në kuadër të bashkëpunimit ndërinstitucional me Institutin Arkeologjik të Kosovës, Universitetin e Prishtinës dhe ENS.

Emisioni i pullave postare përbëhet nga dy pulla postare, blloku filatelik dhe Zarfi i Ditës së Parë (ZDP), ndërkaq në qarkullim postar do të jetë deri në konsumimin e saj të plotë.

Ish-deputeti i Aleancës për Ardhmërinë e Kosovës, Besnik Tahiri, ka komentuar 9 majin, Ditën e Evropës, duke ironizuar që Kosova e shënon këtë ditë, ndërkohë që shumë shtete të Bashkimit Evropian nuk e kanë festë zyrtare.

Tahiri ka ngritur disa pyetje kritike për procesin e integrimit të Kosovës në BE, duke theksuar se vendi është ende nën sanksione dhe masa ndëshkuese nga BE, ndërkohë që Serbia, e cila ka lidhje të ngushta me Rusinë, vazhdon të trajtohet me konsideratë.

Ai ka shprehur shqetësimin për qeverisjen aktuale të Kosovës, duke e quajtur sjelljen e saj autokratike dhe të pashembullt në procesin e konstituimit të Kuvendit.

Ai thotë se nëse Kosova ka për qëllim integrimin në Bashkimin Evropian dhe të qenurit pjesë e Këshillit të Evropës, atëherë duhet një ndryshim i qartë nga elita politike dhe BE-ja për të siguruar një proces të drejtë dhe të barabartë.

Pas ditësh të tëra kërkimesh intensive në zonën e Qafës së Burrelit, është gjetur trupi i Ardit Beshirit, 29-vjeçarit që mbeti i bllokuar nën një masiv dheu, pranë një fabrike përpunimi të kromit në Klos.

I riu ishte duke punuar me ekskavator kur një masë dheu u shkëput dhe e zuri poshtë, duke i marrë jetën në vend.

Ngjarja e rëndë ndodhi pranë fabrikës së kromit dhe ngriti në këmbë autoritetet për më shumë se një javë. Operacioni i shpëtimit ishte kompleks, për shkak të terrenit të vështirë dhe rrezikut nga rrëshqitje të tjera.

Në kërkim morën pjesë edhe Shërbimi i Mbrojtjes nga Zjarri dhe Shpëtimi i bashkisë Klos, Forcat e Policisë Punonjës të Autoritetit Kombëtar për Sigurinë dhe Emergjencat në Miniera (AKSEM), Ekip mjekësor me autoambulancë, Forca vullnetare nga komuniteti, Efektivë të Forcave të Armatosura me pajisje për detektimin e metaleve, Punonjës të Agjencisë Kombëtare të Burimeve Natyrore.

Rreth 1,000 ushtarë amerikanë që janë identifikuar si transgjinorë do të largohen nga ushtria, ka konfirmuar Departamenti i Mbrojtjes. Ky vendim vjen pas një urdhri të mbështetur nga Gjykata Supreme e SHBA-së, që i hapi rrugën administratës Trump të zbatojë ndalimin për pjesëtarët transgjinorë në shërbim aktiv.

Sipas Pentagonit, këtyre ushtarëve u ishin dhënë 30 ditë kohë për t’u vetëlarguar. Për ata që ende nuk janë deklaruar hapur, autoritetet do të përdorin të dhënat mjekësore për t’i identifikuar dhe larguar nga shërbimi.

Të dhënat tregojnë se që nga 9 dhjetori 2024, mbi 4,000 trupa në shërbim aktiv janë diagnostikuar me disfori gjinore.

Zëdhënësi i Pentagonit, Sean Parnell, ka konfirmuar se procesi i “ndarjes vullnetare” për këta ushtarë ka nisur.

Ky është hapi më i fundit nga administrata Trump që synon jo vetëm anëtarët transgjinorë të ushtrisë, por edhe veteranët LGBTQ+. Njëkohësisht, Departamenti i Çështjeve të Veteranëve ka nisur të shfuqizojë trajtimet për disforinë gjinore, duke hequr direktivën 1341 – një veprim që ka ngjallur reagime të ashpra nga grupet për të drejtat e njeriut.

Kreu i i Lidhjes Demokratike të Kosovës Lumir Abdixhiku, në një prononcim për media pas dështimit të seancës konstituive për të 13-të herë ka mbrojtur idenë e partisë së tij për krijimin e një qeverie tranzicionale, duke e thënë se është e vetmen zgjidhje gjithëpërfshirëse që është dhënë në rrethanat aktuale.

“Ndoshta nuk është ideja më e mirë, por është e vetmja gjithëpërfshirëse që gjendet në tavolinë. Nuk është çështje protagonizmi. Iniciativën mund ta marrë edhe dikush tjetër, ne kemi hedhur një ide për tejkalimin e krizës”, tha Abdixhiku.

Tutje ai kritikoi mënyrën si po zhvillohen seancat e Kuvendit, duke e krahasuar situatën me një “kasetofon të prishur”.

“U mblodhën sërish pas 48 orëve për të përsëritur të njëjtin skenar dhe për t’u tallur me një vend të tërë”, shtoi ai.Sipas kryetarit të LDK-së, në propozimin për qeveri tranzicionale përfshihen edhe zgjedhjet, por ai theksoi se për këtë duhet dialog dhe bashkëpunim politik.

Abdixhiku konfirmoi se do të marrin pjesën kur të ftohet takimi gjithëpërfshirës nga presidentja Vjosa Osmani, duke theksuar se ftesa është vazhdimësi e idesë së LDK-së.